Let's Eat Out

2017年11月12日星期日

2017關西親子遊第一日 [1.3 夜遊大阪]

19:00換番輕便行裝，正式開始旅程。第一站係去本町Akachan，地鐵落左車後行一陣就到，Akachan係大型BB用品百貨，有兩個館，有賣BB車、餐椅等大型用品，另一邊就賣零食、餐具等，此行主要係賣尿片、水同零食。點知只得M碼買唔成，但零食買左一大堆，BB專用樽裝水2L一大枝，洗左¥1431 。

20:00回程返難波準備去晚餐，晚餐係千房大阪燒，但要等位，天氣都凍凍地，惟有係街頭整粥俾紫凝食。還好只等左唔洗半個鐘就有位，入到去即刻暖晒。行前幾條街就有Rikuro，諗住買個新鮮蛋糕俾紫凝食，點知超多人惟有作罷，幸好都可以俾新鮮熱辣嘅大阪燒佢試試味。

今餐叫左兩客燒餅。兩客燒餅新鮮即製，送到座位嘅鐵板上，份量十足，職員表演從高空唧蛋黃醬，另外可以自行加木魚、海苔等，非常吸引。道頓堀燒 (¥1550)材料好豐富，有豚肉、牛根、蝦、魷魚，麵糊底好香，仲加左大量芝士，配上燒汁蛋黃醬非常惹味。另一客廣島Mix (¥1480)有豚肉、蝦、魷魚、粉麵，相對呢個配料無咁多，粉麵亦較淡口，但都算不錯。紫凝又可以試食中間無醬嘅麵糊，都好鍾意呢。是次搵到Blogger優惠券，全單減5%，埋單¥2945。

食完呢餐都九點幾要返歸，沿路紫凝都周圍睇野，非常興奮。返到難波呢間酒店最好就係樓下就有一間大型超市，生活所需都齊。回程前仲買左彩虹奇異果、尿片只買到大碼拉拉褲。宵夜食Haagen Dazs新口味。士多啤梨脆皮好正，味道濃。另一款三文治就一般般。

22:00 返到酒店，就用即棄浴缸袋包住浴缸，BB坐係毛巾上沖涼，初頭都有少少驚可能未試過咁大個浴缸，但總之沖乾淨涼。每晚亦要不停煲水準備第二日嘅用量，新買呢個旅行水煲真係好，唔阻位，煲水速度亦算快，最緊要就係好放心俾BB飲。

夜晚紫凝訓BB床，可能日頭太興奮，半夜喊醒幾次，最後抱佢落大床一齊訓，總算訓到少少。

2017關西親子遊第一日 [1.2 大阪到著]

16:10左右終於都到達關西空港，紫凝BB第一次呼吸日本嘅空氣。降落後，喺閘口等一陣就有BB車送到。黎到關西要搭接駁車去番大樓，過關過關好少人，好快完成。出關後等埋行李，再行去報關循例望兩下就出到閘了。

第一件事係買Pass，無諗到KAA Counter排咁長龍，所以分頭行事，爸爸幫BB換片，媽媽就去排隊買票。今行要買3套票﹕大阪周遊卡、阪神電鐵一日券、京阪電車一日券。

17:00黎到南海電鐵站。早前喺EGL買左南海電鐵來回換票證，黎到車站就可以換實體票非常方便，來回票只係港幣$150。我地將會搭Rapid B (17:35-18:14)，車程一貫地快，車箱舒適，只係行李位實在太少，還好有位寄存到BB車同兩件行李。短短車程，紫凝都算合作無扭計。

到達南海難波後，向酒店方向進發，由難波站地下街、經Nanba Walk行去酒店大約15分鐘時間，沿途只係經過一條扶手電梯，大致上都叫無障礙。目標地A30出口，升降機上到地面，就見到酒店入口。

Hotel Monterey Grasmere Osaka
電梯上22樓先係酒店電梯大堂，歐陸式建設，幾有氣派，仲有教堂喺酒店入面。酒店職員英文唔錯，溝通無任何問題，好快就Check in 2415號房，仲話BB床已經準備好，另外仲有一份小禮物俾小朋友。

上到24樓要再用房卡入走廊，保安相當唔錯。轉幾個彎就到2415房間，房間係大床房，床尾放左BB床，時尚浴室，走廊仲可以放到BB車，兩個喼開出黎都仲有位，不大但夠用。

2017關西親子遊第一日 [1.1 出發]

萬眾期待嘅親子遊終於都到啦!

前一日已經執定行李，此行加埋紫凝BB嘅野，要出動兩個喼加一架BB車。

帶B出門除左平時出街嘅用品，今次特別準備左4枝香港水、10包寶寶百味即食粥粉、4個即棄浴缸套等。還好執齊所有野，仲有四份一個喼可用。

七點起身，紫凝食少少野，就出發，今次兩大一B坐的士啦，08:10出門口去機場，09:00就到，折左齊頭$300。

第一次搭香港航空，係最右邊嘅櫃位，一黎到已經見到「優先櫃」，我地帶住BB就可以享用到呢個服務。因為帶B客唔能夠網上Check In，所以黎到機場先做，出好機票，寄好行李，BB車決定會推到閘口先寄上機。

過關啦，原來行前少少有優先通道，但普通閘唔洗點排隊算啦，不過優先通道肯定可以再快啲。今行帶左兩枝飲用水上機，過關時照直申報有水，關員只係問左句BB幾大，係咪所有水都係佢飲就放行。BB車獨立過，都再手摸車內外，咁好彩我抽中Random Check要企定定搜身，雖然搞左好多野，但全程都好快。

09:45黎到美食廣場，今次再食大力水手快餐。不過真係麻麻地，雞又乾身，最好食竟然係薯波。食完早餐想買本雜誌行遠少少，紫凝BB好似知道有旅行去，全程異常興奮，揮晒手咁。

今次要去212閘，即要搭兩個站無人駕駛車。11:15到達，先喺旁邊育嬰室換片，換片室都相當闊落，基本野齊啦。到閘口，指定動作。

上機前先收起BB車，地勤用大膠袋裝好，等入閘。喺閘口問地勤，就知道可以確定提供到BB籃。帶BB又可以優先入閘，但原來行到入隧道都係排同一條隊。

此行已優先Mark到窗口嘅闊位，空姐俾一條BB專用安全帶，扣喺成人安全帶上。大約12:00遲左少少起飛，大約20分鐘後，安全帶燈已經熄左，空姐裝起BB籃，紫凝就可以坐喺上邊玩。BB餐到，原來係罐頭果蓉、肉蓉、果汁等，但凍冰冰都唔知點食，無諗到可以叫空姐幫手加熱，不過味道都唔好，無乜興趣。

至於大人餐出乎預期算唔錯，有前菜有冷麵，非常夠凍，汁又好夠味，不錯。餐包熱辣辣，主菜可選燒汁豬肉片飯、雞肉薯蓉，兩者都正常味道，甜品仲有百福百腐花。最後紫凝就飲左果汁、食左果蓉，食左啲白飯、麵包。食飽飽後好快就訓左，總計黎講叫做訓左兩個鐘，係中途想轉身唔夠位有輕微扭計，但全程機都唔算嘈，比預期中好好多。

2017年10月22日星期日

世上有免費晚餐

Lion Rock@旺角帝京酒店
22/10/2017 18:30

參加左帝京嘅周年活動，贏左二獎，得到一餐免費晚餐，真係開心到不得了。

先黎一個麵包籃，暖暖地，味道不錯。岩晒食唔到正餐嘅小BB。

龍蝦濃湯伴香草多士，湯真係非常之好飲，龍蝦味濃，好忌廉咪。多士烤得酥脆，香草味非常足夠。

自選沙律揀左香煎黑椒吞拿魚伴尼哥斯沙律。一向唔太鍾意食草嘅覺得都係咁樣。

主菜揀左香煎特選西冷扒件野菌忌廉燒汁跟脆辣薯角。賣相非常吸引，西冷扒煎到五成熟剛剛好，中間仲有肉汁，味道唔錯。而配業薯角更加好食，香口，微辣，好醒胃。

烤胡椒芥末羊架件香草燒汁跟炸薯。羊架膻味幾重，中間仲有肉汁，夠腍身，唔錯。

法式雲呢拿燉蛋夠幼滑，蛋味同雲呢拿味重。上面焦糖烤得好脆，非常正。

呢個免費晚餐正常3 Course $398。而家得獎獎品完全係無hea你，俾足一百分心機，真係一個非常不錯嘅體驗。呢個價錢，大時大節都可以豪下。值得。

食景好過食飯

灣景餐廳＠海洋公園

22/10/2017 13:00

黎海洋公園同家人慶祝生日，黎得玩一日一定要係園內食午餐。可怕已經book唔到幾間靚餐廳，最後就去工聯會買餐券，每張百零蚊包一個午餐連飲品，將午餐消費設封頂價。近近地就揀左纜車山頂站附近嘅呢間，貪佢可以預先訂位。

景，的確係靚嘅，全海景。座位都算闊落，
呢間餐廳係自助式，自己出去拎野食。睇睇餐單，每款都成$180。

焗三文魚配香草忌廉汁飯 $188

吉列豬扒配蕃茄醬飯 $188

柱候牛腩飯 $196

印度咖哩雞配油酥餅 $188

咁多款都係茶餐廳質素，非常極之十分普通。
如果開價近二百，係肯定唔會入黎食。黎到主題樂園預左食野一定貴，幸好有餐券百零蚊封頂，叫左心理上好過一啲。仲可以係冷氣下邊食邊歎海景，感覺上舒服少少。

2017年9月10日星期日

Outback SteakHouse

Outback SteakHouse

10/9/2017 13:00 @荃灣

最好味，新鮮熱辣嘅黑麥包

燒雞肉芝士夾餅 $88
芝士味勁濃，內餡夠多，不錯

意大利香草牛肉三文治 $108
牛肉幾香。

燒加拿大黑毛豬扒 $118
肉好鞋，失望。

21/12/2015 19:30 @旺角

靚太團聖誕聚餐。有會員卡85折，人均百零蚊抵食。

第二次黎，點解個洋蔥花冧左。

愛麗斯坪燒雞胸
烤雞胸配蜜汁芥末醬、辣味蘑菇片、煙肉及芝士，伴上薯條。雞胸好大塊，食落又唔鞋，配芝士好惹味，不錯。

15/12/2015 18:30 @旺角

同事聖誕節聚餐。
Bloomin' Onion 特製洋蔥花球 $82
洋蔥花球伴上公司特製蛋黃辣根醬。

Crispy Fried Mushroom 炸蘑菇 $58
炸新鮮蘑菇伴上自製農村沙律醬。

香脆薯條混芝士 $48
薯條配上蒙特萊傑克芝士、車打芝士及煙肉粒，伴上自製的農村沙律醬。薯條偏腍唔夠香口。

是日餐湯，非常濃番茄味。

Toowoomba Pasta 鮮蝦蘑菇寬條麵 $148
鮮蝦蘑菇配白汁寬條麵，忌廉汁好濃好杰身，帶少許辣味，好惹味。蝦爽口，配上好多蘑菇，味道不錯。

Certified Angus Ribeye Steak 安格斯肉眼牛扒 $268
12安士肉眼牛扒，肉汁豐富，自選拌菜特色雞味飯、焗薯仔。肉眼就麻麻，但焗薯味道不錯。

Chicken Caesar Salad 燒雞凱撒沙律 $138

Baby Back Ribs 燒肉醬味豬肋骨 $218
烤肪骨配香濃燒烤醬，伴薯條及菜絲沙律。豬肋骨夠入味，好夠腍。

PANNA COTTA 咖啡奶凍 $48