排隊食入門級拉麵

橫綱@油麻地
30/9/2012 13:00

油麻地有間橫綱拉麵，係N年前已經好出名嘅小店，所以每次行過都見到可怕嘅人群。試過幾次人流實在太多，拎左飛都打退堂鼓。近排拉麵熱潮越吹越勁，橫綱都係推介食店嘅其中之一，最後立定決心中午黎博一舖。橫綱一九八七年創立，可算係香港嘅日本拉麵店始祖。開業廿幾年，一直堅持嚴選食材、認真烹調、大眾化價錢，所以深受街坊歡迎。

味玉拉麵 ($60)
味玉拉麵係此店人氣之選，有一整隻味蛋，加上叉燒粒等。 自選豬骨味湯底比想像中薄弱，較為稀薄，味道講唔上濃郁，但算甘香清甜，幸好加上黑蒜油提味，有芝麻香同蒜香搭夠。麵條反而非常唔錯，店方選用幼身麵，非常幼滑，口感亦夠煙韌彈牙，即使浸喺熱湯一段時間，麵條都無浸腍，惟一不足就係唔夠掛湯。主食味蛋煮得比較熟，蛋黃近乎全凝固，黏口度一流，香味亦唔錯。味蛋之外，仲有厚切叉燒粒，半肥瘦，煮得入味香口，不錯。拉麵仲配上玉米粒、海帶、芽菜、菠菜、竹筍、紫菜等配料。六十蚊一碗，果真豐富。

叉燒拉麵 ($63)
另一款選擇左穩陣之選叉燒拉麵，再埋個豆醬湯，亦即係味噌湯。湯頭甜甜地，味噌尚算濃郁厚身，仲有粉粉粒粒嘅質感，相信並非開粉貨式。五大塊日式叉燒落得重手，圓圓一片切得厚薄適中，一圈圈睇得到肉同脂肪分佈，真正半肥瘦。可惜肉質唔算嫰滑，還好入口鮮甜，唔太肥膩。

此店出名之處係平、靚、正。一碗拉麵大約六十蚊，而且唔收加一，價錢比坊間所謂名牌店相差百分之三十。以六十蚊嘅價錢，算得上又靚又正，可算是愛拉麵人士嘅入門級之選。不過想試又平又靚嘅出品，必須準備好排隊嘅覺悟。由於舖面極奇細小，大約只有二十多個位。每次輪候都講緊以小時做單位。雖則舖仔細細，不過職員服務態度一流，做事效率亦唔錯，好有家庭式小店嘅感覺。總結一句，反正隊都是要排的，俾多點耐性就有好野食，不妨一等。

綿綿冰@元朗

綿綿冰@元朗

23/9/2012 19:30

綿綿冰始終都係元朗呢間最正！

朱古力味冰底、乳酸魔豆、西瓜、水蜜桃粒、煉奶 (＄33)
冰底夠濃，夠份量，配料夠多，勁抵食！

鹽酥雞 （$25)
新鮮即整，夠脆夠味，GOOD!

泛後甜品@元朗

泛後甜品@元朗

23/9/2012 17:30


芒果、益力多味雪花冰 ($38)
又貴又唔好食。

黑白有滑 ($24)
鎮店之寶。豆腐布甸，口感幼滑。加黃豆粉，配特濃芝麻醬，好味。

霸氣拉麵四天王

麵屋武藏 武骨@屯門

23/9/2012 14:30

今日黎一個新界西一天遊，不忘搜尋區內人氣拉麵。第一回先去日本第一嘅拉麵王麵屋武藏。始創於日本新宿嘅麵屋武藏，開業短短十幾年，已經成為日本No.1拉麵天王。店方喺多個日本全國票選同電視台拉麵店比賽中勝出，超過十萬家拉麵店中一枝獨秀，獲得「拉麵四天王」嘅美譽，早已喺日本享負盛名。

老闆知道香港人鍾意食拉麵，不惜搵食搵到日本，所以決定喺香港開設第一間海外分店，仲派出新宿店大廚來港擔任培訓及監督工作，以保證出品原汁原味。是次先黎試下人氣黑武骨湯底，再加一個白武骨沾麵。

黑武骨豚角拉麵 ($72)

烏卒卒嘅一碗拉麵，烏黑程度絕對係超乎想像，蒜香味亦驚人。人氣之選黑武骨係豬骨濃湯嘅基礎上，加入黑蒜油增加香氣。熱辣辣嘅頭啖湯味道的確驚喜，湯底膠質豐富，濃厚忌廉咪。豬骨味濃，感覺好鮮甜，甜味之中散發陣陣蒜香味。據講湯底除左用上大量豬骨之外，亦加入左唔少鰹魚、海鮮料熬製而成。而黑蒜油係洋葱、蒜嘅精草，所以味道更加濃郁。

優質湯底亦需要拉麵配搭得宜。武藏嘅自家製拉麵明顯比一般拉麵粗身，卷曲而且較為扁平，形狀十足烏冬麵，煙韌彈牙得黎亦非常掛湯。

主角選擇左豚角，份量足夠，橫切面亦相當吸引，明顯分得出三層巴士。豚角就好似中式東坡肉，脂肪、肉相間，以燒汁滷製。腩肉部份非常鬆化軟腍，醬汁滷得徹底入味。脂肪部份入口即溶，滑溜到不行。看似肥膩，但卻鮮甜無比，無過份負擔。

配料方面仲有長白蔥絲、菠菜、紫菜同半隻溏心蛋，怒將配料吸滿黑武骨湯絕對係上佳做法。而溏心蛋亦值得一讚，熟成度剛好，蛋白不失幼滑，蛋黃亦香滑黏口，不錯。

白武骨叉燒沾汁麵 ($75)

沾汁麵亦係武藏嘅拿手好戲，特別選擇另一款白武骨試試原味。顧名思義，沾汁麵係用麵沾上湯汁先食，所以麵同湯係分開送上，排盤賣相亦更為豪邁。沾汁麵嘅湯底係特別製作，以確保沾麵嘅一秒間，麵條就可以吸盡湯汁嘅精華。貪口痕先試一口沾汁，味道濃得過分，一大碗湯嘅味道完全濃縮喺小碗之中。豬骨香甜，亦滲透海味，再帶一點青蔥香味。鹹，的確鹹，但特別留意，呢個唔係正常食法。只要加入麵條略為一沾，入口嘅味道絕對剛好。又扁又粗嘅麵條，更能發揮吸汁嘅功效，配搭更加突出。

沾汁麵指定配上叉燒一大塊，厚切到跟豬扒無異。叉塊用簡單汁煮，無再經過炭燒等花巧程序，但豬肉嘅鮮甜已經勝過一切，入口鬆軟，肉質嫩滑。將叉燒浸入沾汁，香味更加倍提升。

不得不提沾汁麵嘅一大特別之處。食晒所有拉麵、配料之後，不妨請店員加入魚高湯，略為攪拌後，就會變成一碗好味嘅餐後湯。湯除左豬骨味外，亦有好香海味，加上少許味噌，絕對比開粉嘅味噌湯好飲一百倍。最後連汁都飲埋，真正完食。

子持白魚天婦羅 ($32)

單睇名稱就知道白魚係有子的，魚身中間有粒粒魚春，口感幾得意。魚仔沾上麵衣去炸，外皮脆脆地，還好食落唔油膩。

今次拉麵挑戰非常成功。拉麵賣相、味道、質感都好滿意。特別討小妹歡心嘅，就係濃郁無比嘅湯底，口味絕對岩心水，值得比個Good。另外，不得不讚下店內嘅裝修同氣氛都好日系。探索半開式廚房後面，睇見師傅煮麵、瀝水嘅功架，加上閒時大叫口號，呢啲表演實在超給力，兼好有武士嘅霸氣。

求一碗好拉麵等候時間大約一小時，實在夠苦悶，不過都算值得。相信好嘅拉麵仲有好多，一於繼續追尋。

宅妹中環遊

宅麵@中環
9/9/2012 14:00

近排團購越來越淡靜，轉行專攻美食指南。剛好頭條出左本拉麵專題介紹，有意食盡書內所有推介嘅拉麵店，展開拉麵搵食之旅。第一擊剛好遇到團購宅麵，$38二選一口味，抵到爛，食左先講。

宅麵為於中環九如坊，假日時間靜到不得了。今次推廣兩款口味拉麵，黑地獄拉麵同赤丸味噌拉麵。

黑地獄拉麵
此拉麵特別之處，係湯底之上再加一個調味波。湯底係一般豬骨湯底，但色水略暗黑，簡介話屬於特濃豬骨口味，配上新鮮墨魚汁烹調，但似乎不實。湯底甜味足夠，但欠缺鮮味，亦無骨膠原的忌廉咪同黏口感覺。湯頭口味較為薄弱，似乎有意讓步俾調味波。

沾一點黑波波試味，味道果真超咸。略為與湯頭拌勻之後，係咸香嘅海味。介紹話佢係墨汁味噌，只可惜小妹實在分唔清點為之墨汁，點為之味噌，簡單黎講，只係一個有海鮮咸味的波波球。所謂嘅地獄，亦唔適合以「辣」做解釋，因為湯頭丁點辣味都無，咁究竟如何地獄? 實在諗唔明。提供改名建議如下﹕ 暗黑波波球拉麵、黑丸拉麵或墨丸拉麵。至於麵條方面係直身幼麵，尚算爽口滑身，加上還可以的煙韌，可惜香味欠奉，亦略帶點鹼水味。

拉麵附上兩塊叉燒、半隻溏心蛋、一大片紫菜圍邊、一堆木耳絲、青蔥同椰菜。配菜方面反而唔錯。叉燒肥瘦適中，無特別烹調加工，只清一色豬肉甜味，部份位置都相當腍滑，不過腍得黎一夾就散，最後慘變肉碎。溏心蛋反而唔錯，蛋白軟腍，蛋黃半生熟、黏黏的。一大片紫菜亦係亮點，鍾意脆口可以就咁食，亦不妨浸死佢夾附麵條一同送入口。

赤丸味噌拉麵
另一款赤丸味噌拉麵材料大同少異，湯底則配上微辣味噌，拌勻之後，湯底甜中帶微辣，較為惹味。

進駐中環嘅宅麵，舖租、人工等成本一定唔平，正價一碗拉麵大約七十多蚊，正路價錢。今次真係以半價試食，不過不失，無乜驚喜，亦唔算差。只不過對於長期宅於新界嘅鄉下妹黎講，中環實在太山長水遠，相信好大可能後會無期，Hello & Goodbye。