墜入不甜蜜陷阱

Sweetbomb 22@尖沙咀
11/12/2011 19:00
26/2/2012 20:00

諗住用$48買一個足一磅蛋糕，團購寫到好吸引咁，仲掃左兩張，試過之後就知道完全中伏。眼見呢間舖頭仲不停喺唔同團購網做優惠，好多中過招嘅食客都話要公開呢個陷阱，希望唔好再有人被騙，固然要力撐。

喺Group Buyer做嘅優惠，係$48五選一蛋糕，選擇有雲石芝士、紐約芝士、朱古力松露、朱古力慕思、芒果慕思。先後兩次使用，試過兩款口味。

(相片從略，核突到唔想影)

紐約芝士蛋糕
第一次試，諗住叫啲比較穩陣嘅芝士蛋糕。蛋糕拎上手係熱嘅，直徑約有五吋。蛋糕面無任何水果或其他裝飾，焗過嘅表面係一撻深啡、一撻淺啡，好明顯受熱完全唔均勻。蛋糕側面外圈都係凹凸不平，有唔少餅底碎跌出，絕對出唔到街。熱嘅芝士蛋糕，無經過雪藏，明顯比較腍身，切嘅時候成個蛋糕幾乎散晒，都莫講話餅底超鬆散。味道方面，芝士味係夠濃郁嘅，係少甜但有咸味嘅芝士。入口係非常粗嚡、鬆散。蛋糕仲出現甩底情況，芝士部份同餅底居然一切就上下分離。而牛油餅底壓得唔夠實，居然仲食到粒粒砂糖，咬到索索聲，所以餅底味道超甜。

朱古力松露蛋糕
落單時明明話要朱古力松露蛋糕，感覺上佢俾左朱古力慕思蛋糕我，但其實都唔太似朱古力慕思，老實講，真係食左都唔知係咩蛋糕。論外型，今次我收貨，唔算樣衰，總算有半粒士多啤梨壓場，朱古力醬舖得夠平滑，我明白生意難做，所以都收貨。蛋糕表面有一層朱古力醬，無乜特別，典型平價、偏甜、唔香嘅朱古力醬。朱古力醬之下係一舊唔知咩，入口居然係煙煙韌韌，仲有彈牙感覺，口感質地好比啫喱，估計係超勁量魚膠粉所致。奇怪嘅口感，配合埋超淡朱古力味，已經好不安。食食下，竟然咬到細粒棉花糖，本來煙韌嘅蛋糕，變得更加煙韌，都唔知似乜，根本入唔到口。

以下又學下眾多位深深不忿嘅食客，列點式舉出團購網簡介，再逐一擊破，以表達不滿。

1. 「超抵優惠價$48換購原價$188 Sweetbomb 22足一磅優質蛋糕一個」
$48一個蛋糕，無咁得閒拎去過磅，但眼見細細一個，唔多覺足一磅，有網友話只得半磅。而且食落係如此質素，拉車尾都配唔上「優質」兩個字。原價竟然開到$188酒店級蛋糕水平，簡直就係荒天下之大謬。

2. 「專業蛋糕師全人手製造。餅師擁有多年蛋糕製作經驗，全部蛋糕均由人手製造。」
全人手製造係肯定嘅，因為只有人手做先可以做到如此粗糙。「多年蛋糕製作經驗」真係無辦法驗證，而「專業蛋糕師」呢個名涵真係唔係人人掛得起。以兩個蛋糕嘅賣相、質地同味道，可以百分之一百零一肯定，佢配唔上「專業」呢個形容詞。小女子閒時無野做，都會自家製蛋糕。自知稱唔上好正，但亦未至於差嘅水平。今次呢兩個蛋糕好明顯比業餘更業餘 。

3. 「Sweetbomb 22亦非常注重健康，所有蛋糕均選用低脂低糖材料，主張無添加，全部天然真味，口味適合男女老幼！」
係唔係低脂材料，真係無咁叻食得出，但芝士蛋糕個砂糖餅底，真係驚食左會有糖尿病。主張，可能佢真係主張，但無實際行動呢。

4. 「蛋糕賣相精美，派對送禮大方得體！送禮自用一樣咁啱！」
無錯，團購網上嘅相片絕對呃得下人，估唔到真係用黎呃人。實物拎上手之後，相片嘅一成水準都無。包裝係用一個白雪雪，紙質非常薄弱，用黎裝半打蛋撻都怕頂唔順嘅紙盒，仲弱雞到個蓋係合唔埋，盒外加一個街市菠菜蘭姐姐用嘅白色膠袋。運送嘅時候係感覺到，個蛋糕處於一個非常不穩定狀態，就算好小心拎，個蛋糕係好似有腳咁周圍轆，因為包裝盒無任何用作固定嘅托盤裝置，只得一張爛鬼錫紙。包裝同內容都唔見得人，自用都覺得不能接受，請問如何送禮? 相信唔止失禮俾人笑，更加會得罪人。

5. 「三個月換領期，橫跨年中六個重要節日 (平安夜/聖誕節/Boxing Day/元旦/農曆新年/情人節)總有幾個節日岩駛。絕對適合愛人間互相分享甜蜜幸褔，或送贈親友表達祝福心意！」
相信好多團購買家就係因為呢個咁強勁嘅賣點而狂掃，諗住平平地買個蛋糕做禮物，又或者作為扒地甜品，與朋友分享，點知全體中伏。如果繼續作為禮物的話，只係將陷阱(並非祝福)轉送他人。又或者作為情人節禮物的話，相信就會出現上年二月十四團購爛花陷阱一樣嘅結果，絕對係會俾愛人詐型，食多一百粒朱古力都甜唔番。

題外話，另一間團購公司又同呢間野合作，喺一月推出$68情人節蛋糕套裝，包括一個唔知咩蛋糕，加一隻唔可愛嘅熊啤啤。如果蛋糕一如以往都係交出咁嘅質素，真係難以估計有幾多對愛侶會因而吵架鬧分手。

好多受害者話，此店明顯唔係做生意，極無誠意。更有人陰謀論話，小店打算做完團購，賺一筆錢就走佬，提醒大家買左就快啲換。總之個個都變晒憤怒鳥，包括本人在內。
小店位於尖沙咀Solo Office，人流幾乎等於零，真係唔知佢除左做團購之外，邊度搵生意。第二次去嘅時候，已經發現小店玻璃門上貼左「歡迎頂讓」四隻大字，即係證明佢本身已經做唔住。不過衰啲咁講，相信有意頂黎做嘅老細，如果睇到網上評語只有清一式劣評，都應該會立即打消念頭。真係咁博照做的話，估計食客們都會對呢個名或者呢個地址存有唔少心理陰影，生意更難做呀。

同樣都係團購，人地馬高先生真材實料嘅芝士蛋糕，都只賣$50，除左包裝靚仔、蛋糕賣相討好之外，味道更一流，個個食完都讚不絕口，團購一次比一次賣得多。呢個故事教訓，做生意者，無咁大個頭就唔好戴咁大頂帽。為食者，便宜可貪，但貪得要醒目，眼光要獨到，共勉之。

故地、老店、舊餐牌、新名稱

甜甜地甜品屋@深水埗

26/2/2012 14:45

搞電腦黎到深水埗，被迫要hea一個鐘，就喺附近搵地方hea，發現石磨坊已經消失左，惟有上開飯網搵搵，點知原來呢間甜甜地就係舊時嘅石磨坊，由原班人馬繼續經營，相信只係改左個名。

朱古力雪花冰 ($24)

精裝版雪花冰真係好精裝，份量細細，一個人應該都食得晒，正好解決到想食但凍到食唔落呢個問題。雪花冰一絲絲，比一般軟身，入口即溶。朱古力係特濃口味，輕微甘苦。配料仲有棉花糖、香蕉同椰果，再喺冰面淋左少許甜忌廉，味道正常，廿零蚊抵食。

椰香紅豆泥涼粉 ($26)

最鍾意石磨坊呢款甜品，一來將材料磨成泥真係少見，二來賣相仲好靚。紅豆泥圍住碗邊，中間有椰汁刨冰，下層就係涼粉，簡簡單單，但配搭唔錯。紅豆泥磨得好幼細，完係無粒粒嘅雜質，微甜但紅豆味超級濃郁。中間嘅冰底淋上香濃椰奶，撈埋紅豆泥一齊食亦得。破開椰汁冰，下面係涼粉，加左少少糖水，少少花奶，可惜涼粉味道太清。呢款甜品每款材料都可以獨立食，撈埋一齊食又得。食到最尾，紅豆泥已經慢慢溶化，撈埋椰汁花奶，感覺幾似紅豆冰，相當特別。廿幾蚊一大碗，份量十足，食完超飽。

椰香雜果涼粉 ($38)

點呢個甜品，因為睇相非常吸引，原來實物黎到，一樣強勁澎湃。冰柱整得超高、超結實，冰柱周圍仲有唔少款式嘅水果，最後有涼粉舖滿碗底，非常豐富。

刨冰刨得細碎，但仍然非常結實，冰柱屹立不倒，冰柱仲有紅、黃、綠、白幾種顏色，相信係特登淋上椰汁、芒果汁、西瓜汁同蜜瓜汁，營造彩虹效果，所以除左椰香味之外，刨冰仲滲透住水果嘅香甜。各式水果相信少不免會受過糖水浸禮，但甜度係可以接受，亦算新鮮，撈埋涼粉一齊食亦唔錯。呢個冰品實在太巨型，一個人根本無辦法完成，強烈建議要多人分享，如果唔係一定變雪人。

一向都幾喜歡石磨坊嘅出品，甜品款式比其他小店較為特別。最緊要就係價錢唔貴，亦有番咁上下質素，真係抵繼續支持。

戀人木村陪我食點心

點廚軒@土瓜灣

26/2/2012 12:00

土瓜灣嘅食街北帝街慢慢變得為人熟悉，所以連帶附近地區都越開越多食肆。今次就去新開三個月嘅點廚軒試菜，半價買到$100現金劵，食午餐夠晒數。

星州炒蘿蔔糕 ($28)

XO醬炒蘿蔔糕就試得多，今次可以試星州版。材料同星州炒米差唔多，有蛋絲、青椒、芽菜等，以少許咖哩提味，味道少辣。蘿蔔糕應該係炸過，外皮實實地，食落結實唔散，但同一般平價蘿蔔糕一樣，粉多，蘿蔔味不足。

芝心炸蝦丸 ($22)

呢款似乎係小店味自慢作品。三粒大大粒嘅炸蝦丸，外皮脆卜卜，炸粉唔厚，炸得夠乾身，唔油膩。一咬開蝦丸，芝士醬就唧出黎。芝士比較杰身，係微咸勁濃香嘅芝士味，好配合非常彈牙爽口嘅新鮮蝦膠，唔錯，值得推薦，但只係粒蝦丸，唔包括個醬。唔明點解佢會跟個柚子醬，味道有少少苦澀，同芝士蝦丸唔太夾，不沾也罷，淨食已足夠。

招牌流沙包 ($14)

話明係鎮店招牌美食，點都要俾面試下。雖然係新鮮即整熱辣辣，但包面好似唔多平滑，仲有爆口情況出現。食落包皮都算幾鬆軟，哎開包皮就有餡流出，仲好燙口。內餡甜度適中，味道濃郁，口感沙沙粉粉，似乎奶黃混合左咸蛋黃煮成流沙餡，所以色澤較鮮橙色，亦比一般嘅香濃。

點廚蝦餃皇 ($18)

一籠三大粒，粒粒都脹卜卜，外皮晶瑩剔透，睇到鮮蝦嘅橙紅色。皮略為厚少少，但入口非常煙韌黏口，內餡有三大隻蝦，味道非常鮮甜，口感好爽脆，屬高質素作品。

冬菇燒賣皇 ($18)

大大粒燒賣好飽滿，口感非常爽口結實，似乎用左唔少豬肉，仲有大蝦同冬菇粒，幾夠香味，調味亦唔錯。

豉汁蒸排骨 ($18)

成碟排骨係絕對無任何配菜墊底，包保全碟都係真材實料。最鍾意排骨有肉又有骨，肥瘦適中，入口幾爽甜，亦有輕微辣味，可惜豆豉味唔夠。

除左點心之外，餐牌仲有唔少炒粉麵飯、小菜煲仔，並唔係正宗淨飲茶食包嘅點心專門店，但茶錢照收，$3一位，好彩全日免收加一，埋單總數$124，團購價$74，食得飽飽。此店嘅點心都算唔錯，有一般點心專門店水準，味道中上，價錢合理。可惜位置唔太方便，眼見多數做緊樓上樓下街坊生意，所以都有唔少熟客仔幫襯。咁岩行過的話，都不妨一試。

小店茶餐廳格局，茶餐廳式經營，所以仲有電視睇。更得意嘅係，電視係播緊J2台，仲咁岩中午時間係日本節目。食緊蝦餃嘅時候，睇住日本音樂節目，聽住日本歌，感覺好神奇。不過算啦，邊有咁岩，原來下一個節目係月之戀人。木村~~~!!

不可一不可再。向清水Say NO!

日出茶太@大埔
24/2/2012 13:45

食完一份超好味但勁熱氣嘅豬扒麵之後，一定要買野飲。行過日出茶太見有特價飲品，$10一大杯，姑且一試，點知就出事。

(相片從略，灰到唔想影)

芝麻抹茶 ($10)
大杯，的確係勁大杯，係一般大裝珍珠奶茶杯。

內容係綠茶加奶嘅淺淺地粉綠色液體，浮遊左幾粒黑點，相信係芝麻。

吸一口，苦的。一pat粉粉地、苦苦地嘅東西，隨住一啖無味嘅水湧入。點解會咁? 明明親眼睇住，阿姐俾我之前已經搖過，亦深信係充分地勻。抹茶粉竟然係未溶嘅，明顯地仍然係水還水，粉還粉嘅地步。惟有自動波手搖一陣，又用枝飲管攪下。一分鐘後，感覺上抹茶粉已經溶晒，但入口都係完全無味。先聲明此杯已經叫左少冰，但味道同清水無太大分別，比重複用茶包沖十次還要差。 而芝麻味係零，一粒粒黑芝麻亦唔見得有香味。最後，只好當水飲。芝麻的確有，抹茶肯定存在，可能只係我期望太高，絕對係貪平 (??) 的惡果。

後記

早唔知幾多個月開始，呢間大埔分店已經擺出就執笠嘅姿態。還記得當初新開張，係由青春少艾同陽光哥哥仔負責沖調飲品。無幾耐之後，姐姐仔們突然老左三十年。正正喺舖面前側，竟然大模斯樣擺左一個迷你散貨檔口。我相信，以佢嘅生意流量，絕對做得出放租呢個行為。

今日再行過日出茶太，發現仍然有$10特價飲品，但芝麻抹茶已經俾人劃左。究竟因為咩原因，我已經唔太care。只係與一齊受害嘅同事不約而同講左句﹕「應該啦! 唔好害人。」

真係不可一、不可再。

安牛任食火鍋攻略

魯一居利寶閣宴會廳@九龍灣
19/2/2012 18:00

即使有免費穿梭巴士，總覺得Mega Box真係好遙遠，所以好日都唔黎一次。真心覺得果度嘅商舖生存空間好低，所以有中菜館要搞團購，$98火鍋任食兩小時，包埋加一、茶芥喎，咁抵。

老實說，食過之後，覺得一般質素， 其實都無諗過要記低。不過見團購有超過一萬人買左，咁受歡迎，都不妨hea寫做個record。如果團購友未食，又或者有興趣試正場嘅朋友，都可以參考下。

事前準備
1. 必須晨早預約。十二月初預約時，職員話即日至一月份嘅檔期已經完全滿晒，建議早兩個月前預約唔過份，始終假日多人，而且菜館唔算十分大，當天所見，全部人都係食火鍋，都幾爆場。

正場
2. 一定要早到。雖然話晚市六點至十點半，但強烈建議食早場，始終下場refill速度係未知之數。早趁職員落場時間準備充足，樣樣材料乾淨整齊，點都會食得開心啲。而且敬請六點前齊腳，因為菜館真係唔到六點都唔開燈，六點正已經有長長嘅人龍，等安排入座都幾費時。

3. 入座後，要立即填表申請食物，因為遞左表都要等差唔多十分鐘先有湯底，食材大約要等十五分鐘。餐紙有七款湯底可選，仲有八款任叫嘅食物，另加六款優惠價嘅海鮮類貴野。餐紙default每枱得兩張，其實每次叫野可以唔洗諗，怒寫報大數。多次試驗下，估計菜館廚房佬對數量嘅定義為每一份等於一件、一片、一粒或者一pat。
3a. 火鍋係一人一鍋唔洗爭，試過黑松露上菌鍋，清湯底加一pat黑色野，有啲菇味，唔知真定假嘅黑松露，但味道幾得意。馬來沙嗲鍋都係清湯底加沙嗲醬，味道都夠，但較油膩。聽講香茜皮蛋湯都正常，可試。
3b i. 免費任叫嘅食物，包括是次火鍋主題食材美國安格斯牛肉，比一般雪花肥牛靚啲、肥啲，牛味認真唔錯，有少許膻味，輕涮十秒就食得，夠腍夠滑，值得怒點一百份。
3b ii. 除左安牛，仲有本地肥牛，總覺得比安牛差少少，有安牛就唔洗特別揀本地牛。
3b iii. 鯪魚肉有手打鯪魚球同鯪魚滑兩款，其實味道一樣，建議揀鯪魚球，因為無咁捩(口棄) [註﹕ 呢hea]。
3b iv. 仲有黑豚肉片，比一般豬肉片肥啲，肉味都唔錯，甜甜地。
3b v. 仲有其他味道正常嘅材料，包括魚皮餃、韮菜豬肉餃同竹串海蝦等。
3c. 要自費嘅費野包括美國桶蠔、龍蝦、帆立貝等，無叫，唔講。
By the way，佢送果杯竹蔗水又幾好飲，清甜足料，但太細杯。

4. 喺個鍋未到之前，見人少少，未出現人龍，就要先去自助bar拎野食，最好分工合作， 一次過拎定多啲，因為到中段時間，人龍會排到出門口。自助配料都有唔少選擇，一般火鍋要食嘅材料都有齊。材料一盆盆放得整齊，經過一個鐘時間受盡催殘之後，都總算無食唔落口嘅甩皮甩骨情況，相信當日嘅客人都比較斯文，而樓面阿姐都有花時間整理。

5. 一人一鍋係用細爐仔，一舊迷你燃料燒到尾，都預左火力唔猛料，所以煲勁耐都唔滾。所以要採取一次過大堆頭放料策略，每次水滾就要將想食嘅生料冚唪唥放晒落去，一定要加蓋，而且唔可以中途開蓋，熱氣一走晒又要由頭黎過，耐心等候係必須的。特別好味嘅有，彈牙多汁牛根丸、豬頸肉、咖哩味雞軟骨。炸魚皮都唔錯，本身有少許咸味，落水揈[註﹕ fing]兩野就上岸時間剛剛好，吸收啲湯味，仲脆脆地。

散場
6. 團購價$98已包茶芥同埋加一服務費，無另加貴價海鮮的話，就無其他虢礫(口緙)嘞[註﹕ kick溺卡嘞]收費。食飽想閃嘅時候，禮貌上叫番阿姐埋單，阿姐話你走得先好走。

呢個火鍋除左有安格斯牛肉之外，真係無乜特別，只不過團購唔洗一百蚊有得任食，而且款式都算多，叫做幾抵。正價任食火鍋，都係正路價錢，大約一百鬆一位，另計茶芥、加一。除左任食火鍋之外，仲有飲茶點心放題，宣傳板寫一位大約五十幾，好似好抵，但原來茶芥收十蚊一位，另計加一，夾夾埋埋七十幾蚊埋單，好似吸引力唔大。

當辣薑哥遇上陳豪

葫蘆館@觀塘
19/2/2012 14:00

觀塘舊區一間最出名食奶類甜品嘅舖頭，應該就係葫蘆館。睇過唔少電視飲食節目，都介紹過呢度嘅撞奶。「羗汁撞奶」四隻大字仲搶鏡過招牌。

原味薑汁撞奶 ($20)、咖啡味薑汁撞奶 ($20)
薑汁撞奶必定係即撞，電視節目拍攝過製作過程。薑汁係大大舊老薑榨汁，薑汁會澈底隔渣，再撞入合適溫度嘅鮮奶。經過化學作用，奶會凝固成布甸狀。呢個化學作用，得意到連會考都考過。

食薑汁撞奶有幾個規則要遵守。第一，奶倒入薑汁後，絕對唔可以碰撞，撞散左就唔能夠成型，徹底失敗鳥。第二，必須要趁熱食，而且食嘅時候要溫柔，用湯匙一片片舀起，千祈唔好左攪右攪，肯定變水。

凝固左嘅奶超級滑溜，入口當然係即溶，唔覺意滑入喉嚨都唔緊要。此店選用水牛奶，佢話比一般牛奶鈣質同脂肪都更高，所以更香滑。食落味道唔太甜，奶味好清爽，無一般全脂奶甜膩嘅感覺。滑入喉嚨之後，薑味慢慢湧出黎，薑味濃，但辣得唔過份，配奶正好。但對於我呢個未戒奶嘅小朋友黎講，略嫌奶味唔夠，都係鍾意飲甜膩膩、膻到震嘅特濃牛奶。

此店出名之處，除左原味撞奶做得好之外，亦都敢創新。除左原味之外，仲有朱古力、士多啤梨、好立克、柯華田等等嘅味道，一於試埋個咖啡味。估唔到薑汁撞咖啡奶，都可以成功凝固到。未食已經聞到咖啡香味，入口當然都係滑溜溜，而咖啡味都幾出，但講唔上濃郁，感覺似淡淡地嘅咖啡拿鐵，加左薑味都好易入口，味道都唔差。只不過食食下，出現乳水分離情況，成個奶布甸散晒，變成一粒粒，水汪汪。始終唔係純奶，可能會有啲奇怪現象。定係有人多手犯禁亂攪?

薑汁撞奶實在係冬天最佳甜品，食完之後包保暖笠笠。客人仲可以隨意指明辣度同甜度，口味更加個人化。食完之後，熱力由喉嚨漫延至心口，暖足一個下晝。

雖然天氣好凍，但係我覺得好溫暖，又甜、又滑、又舒服，因為我食左薑汁撞奶。

舊區新店酸辣麻

臻味豬扒酸辣米線@觀塘
19/2/2012 13:30

觀塘舊區就黎重建，好多老店舊街都會消失，所以趁得閒真係要黎行下。唔行唔知，原來呢區有唔少雲南米線專門店，呢間臻味仲係新開無耐，人流都唔少，一於去試下。

肥牛酸辣米線 ($29)
原來酸辣米線都幾豐富，份量又夠多。除左有唔少片肥牛之外，仲有青蔥、香芹、芫茜等，此店嘅酸辣菜更係自家醃製，而花生就特別好食，因為入口仍然香脆可口。清湯底之中，加入酸辣材料，入口酸咪咪，酸得黎好開胃、唔涸喉，而辣味係輕微嘅麻辣，食落好刺激，越食越上癮。除左湯之外，米線都煮得唔錯，起碼唔會過腍，仍然保持到煙韌滑溜質感。主角肥牛係一般火煱用肥牛片，始終半肥瘦、薄薄一片，口感唔會差。牛膻味配酸辣，感覺唔錯。食完酸辣米線之後，成個人暖晒。

秘製豬扒蕃茄湯米線 ($33)
此店招牌秘制豬扒超大件頭，更加係新鮮即炸，即使浸入湯之中，入口仍然有輕微香脆感覺。連骨豬扒有蜜糖甜味，肉質非常鬆軟唔嚡口，肉嫰多汁亦唔油膩。加三蚊選配左蕃茄湯，湯底甜甜酸酸，有唔少新鮮蕃茄肉，同超級粉腍嘅白烚薯仔，味道都足夠，但始終不及紅磡蒙麵咁濃郁。

新開餐廳仔，人氣已經好鼎盛，米線款式都唔少。一向少食雲南米線，食過之後，發覺酸酸辣辣其實幾開胃，好容易食上癮。每碗粉麵廿幾三十鬆嘅價錢，大大碗，食完包飽。怕辣的話，仲可以半價柯打飲品，一個豐富午餐，都唔洗四十蚊。不過老實說，翻轉頭機會應該唔高，因為呢條街附近仲有好多間雲南米線舖，要食的話，不如逐間試勻罷啦。

那些年的大懲罰

天湖甜品小食@沙田

18/2/2012 21:00

那些年嘅中學慶祝廿五週年，食完個唔太豐富嘅盆菜，一大班同學仔去下場食甜品。估唔到一個屋邨樓下嘅大排檔，除左熟食之外，仲有唔少甜品選擇。

蛋白燉鮮奶 ($17)

湯匙放喺燉奶之上，證明佢夠結實。燉奶入口夠滑，奶味正常，可惜唔夠熱，味道唔夠濃郁。

椰汁黑糯米西米刨冰 ($22) 

自選刨冰份量都幾多，最底層係黑糥米同西米，上面有打得碎嘅刨冰，最後淋上椰汁。近排食開台式雪綿冰，今次反新潮食番傳統嘅刨冰，別有一種懷舊風味。刨冰入口唔會即溶，反而有咀嚼嘅空間，食到索索聲，更能感受冰凍感覺。黑糥米煮得煙韌軟腍，西米爽口，配埋濃香椰汁撈埋一齊，原來唔錯。食自選刨冰，最緊要揀岩配料，每樣材料無相沖，基本上係唔會難食。

大排檔格局，有好得意、好似雪糕筒嘅膠櫈仔，幾懷舊feel。除左熟食，仲賣埋甜品，餐牌水蛇春咁長，貼晒喺牆上面。所有食品都係街坊價錢，大件夾抵食，所以見到唔少人黎呢度宵夜。更得意嘅係，刨冰選擇好多，仲有啲騎呢配料。還記得那些年最興玩大懲罰，左溝右溝，溝一堆奇怪食物用黎整蠱輸家，黎呢度就岩晒。好似芝麻糊、黑糯米加煉奶刨冰，原來到最後會變成海底泥咁嘅樣，都咪話唔驚。又或者可以試下大菜糕、喳咋配刨冰跟芒果汁，唔知可唔可以清腸胃呢?

正宗札幌拉麵。風味。風格

爵士拉麵@粉嶺
12/2/2012 18:30

粉嶺聯和墟有間極具人氣，拉麵迷必須朝拜嘅小店。黎到新界北區，點都要加插一個行程去八一八。晚市時段六點鐘開始，六點零五分去到，已經要等位。

札幌味噌湯底叉燒拉麵、日式醬油蛋 ($62)
等候十分鐘，新鮮即製、熱辣辣嘅拉麵就送到。大大碗拉麵，叉燒舖滿碗面，另加一隻日式醬油蛋，沉浸喺啡黃色、芳香濃郁嘅札幌味噌湯之中。

第一步驟﹕試湯底。 呷一口味噌湯，就已經迷得一陣陣。湯底係微辛味濃湯，完全無講錯。味道有豬骨湯嘅濃香，濃而不油膩，味噌亦夠突出，咸甜適中，略帶少許麻香辣味，比一般齋味噌，黎得更有層次。拉麵有粗有幼，有圓有扁，似乎係手打拉麵。老闆亦細心控制時間，軟硬度剛好，保留到拉麵煙韌彈牙嘅口感。隱約食到麵嘅蛋香，不過有少許梘水味。卷曲嘅麵條，正好掛湯，麵同湯配合得宜。

主角叉燒亦唔失禮，聽老闆講，叉燒係每日新鮮製造，賣完就算。當日六點半時份，已經賣左七成，遲黎嘅朋友可能會失望。一碗叉燒拉麵，有六大圓片，比一般闊綽得多。叉燒白白滑滑，並無用太多功夫煎炒燘燉焗，只係將豬肉嘅鮮味完整呈現。叉燒肉質七成瘦三成肥，嫩滑軟腍得黎亦帶點爽口，入口相當鬆化，肉味的確好鮮甜。
拉麵本身配料真係唔多，有一片紫菜、幾條芽菜，仲有啲青蔥，所以貪心加多十蚊要多隻日式醬油蛋。醬油蛋並唔係溏心蛋，蛋黃係結結實實嘅，唔會影響到濃湯嘅原味，係另一種食法。

呢碗拉麵的確唔錯，可算係暫時試過，最好味嘅味噌湯底，所以毫不客氣，湯清得一滴不留，就算過左幾個鐘，都完全唔口渴，係計上次大阪和歌山拉麵嘅第二個深刻美味。

釧路醬油湯底爵士拉麵 ($80)
試過味噌湯，呢個醬油湯底，絕對係清淡之選。湯底有日式醬油嘅甜味，簡簡單單地將「清」同「甜」表現出黎。掛得爵士呢個招牌，應該將渾身解數使出，所以材料非常豐富。除左兩大片叉燒之外，仲有粟米、海帶、紫菜、蟹柳等，而另一水準之作肥牛片亦都唔錯。 肥牛片切得薄薄，非常軟腍嫰滑，唔需要太多咀嚼。吸收晒甜甜嘅湯底，仲帶點壽喜燒嘅風味。

爵士拉麵由來自北海道嘅老闆先生主理，提供好地道嘅日本拉麵，當然札幌味噌湯底更加出色。價錢同質素成正比，只略收每位一蚊雞茶錢，無須加一服務費，呢個我最欣賞。

店仔細細，拉麵只有六款選擇，每款拉麵分「小」同「中」份量，價錢$35至$85。每款拉麵都可以自選湯底，包括釧路醬油湯底、札幌味噌湯底同辛味噌湯底，特別湯底分別要加多兩至三蚊。嫌唔夠餸的話，都可以另加配料，選擇夠自由，形式十足日本地道拉麵店，所以有點餐後隨即付款、不准改單或加單呢啲規則，所以落單時請諗清楚，唔好後悔。

可能因為呢啲香港少見嘅規則，好多食客話佢串，香港地呢啲服務態度唔得咁話。我就覺得呢啲並非不合理要求，一來更容易控制質素，二來大家快啲有得食，得益嘅都係各位食客。而且呢種體驗更加和風，食正宗拉麵，體驗埋地道拉麵文化，求之不得啦。何況人家喺餐牌上寫到明，遵守遊戲規則係應有嘅禮儀。硬要話佢串的話，只可呻小店營業時間唔長，真係限時限刻，想食真係要check清楚，鬼叫佢唔憂做。

小店隱藏於粉嶺聯和墟某個街角，無豪華裝修，唔算超級乾淨企理，反而有種日本鄉郊小店嘅風味，值得一試。

福音窩心甜品

彩虹甜品屋 @上水
12/2/2012 16:00
 

上水區難得被受支持嘅甜品舖，連頭條搵食雜誌都有介紹過，佢話甜品夠誠意，兼夠溫情。

益力多綿綿冰 ($35)
自選綿綿冰，冰底有六款選擇，一於試下一般甜品舖少見，食客們首選冰底，益力多味，再貪得意揀埋啲唔拉家、平時少見嘅配料。碟上綿綿冰份量唔少，冰底打得算靚，一絲絲嘅薄片，結實唔易溶，已經好過好多甜品小店。入口一試，益力多味道勁超濃，根本就係成枝益力多雪成冰嘅原汁原味，似乎無加太多水，所以無過份冰感，入口即溶，抵讚。粉紅透明色嘅蒟蒻粒帶微甜，有好輕微酸味，唔知係唔係士多啤梨? 口感煙韌，幾得意。芒果得三片，略嫌太少家，好彩酸酸甜甜，芒果味夠濃。綿綿冰配椰汁糕真係第一次見，老實講，獨立食一粒味道唔錯嘅，夠滑身，但配綿綿冰真係有啲怪。

愛心甜品 ($33)

一入到舖頭，見每枱客人都有一、兩個椰皇，店內瀰漫住椰香，所有揀左一款凍椰皇試一試。所謂愛心甜品，係椰皇加荔枝雪米糍，仲浮游左一啲大、小西米同蒟蒻等，乜都有。椰皇汁味道好清甜，凍冰冰，非常解渴。配上紅色皮嘅荔枝雪米糍，原來唔錯。雪米糍中間係雲尼拿雪糕，外皮吸收晒椰皇汁，兩者已經融合一體，雪米糍除左有荔枝、雲尼拿味，仲有淡淡椰香，實在驚喜。蒟蒻刻意做成可愛嘅心形，入口煙韌微甜，加埋爽口嘅大、小西米，非常豐富。當然唔好忘記，要清埋椰皇裡面清甜新鮮嘅椰肉!

原個椰皇外殼畫上哈哈笑，配上色彩繽紛嘅餐紙巾，明白到此店受歡迎嘅原因。食甜品除左可以滿足甜胃之外，可愛又窩心嘅甜品，更會令人心情暢快，實在係女士們最愛。老實說，此店價位喺北區黎講算貴，但仍有大班支持者。相信除左有部份人係共同背景外，小店嘅親切同誠意，亦加分唔少。

麻思梳喲~韓式街頭小食

韓點@紅磡

12/2/2012 13:30

紅磡有間全港首創韓國地道小食店，接受過無數雜誌、電視嘅專訪，個個食過都讚味道正宗，次次行過都堆滿人。見今日有時間，一於去排下隊。

韓式炒年糕 ($25)

廿五蚊一碗份量比想像中多，一打開就聞到好香嘅韓式甜辣醬味道。醬汁橙橙紅紅，紅色一點點應該係辣椒粉，仲有白芝麻點綴。年糕長條狀，睇落似港式豬腸粉，但每條都可以輕易分開，唔會癡埋一舊。

從電視節目得知，地道韓國小食都用左韓國入口嘅食材，保證原汁原味。年糕入口滑溜溜，食落好煙韌結實，越咬越有米香甜味。醬汁用左辣椒粉、辣椒醬、日本清酒同魚湯等煮成，煮得比較杰身，包裹住每一件年糕。整體感覺非常濃郁，味道以甜為主，食落有輕微酸味，亦慢慢滲出辣味，越食越刺激。椰菜片吸收晒醬汁，就好似食緊泡菜咁，超級入味。

年糕越食越覺辣味突出，間中需要飲水舒緩，但實在太過惹味，不禁一啖接一啖，怕辣都甘心頂硬上。兩人分食一份炒年糕，身體漸漸暖起黎，食完飽肚又溫暖，絕對係驅寒良品。

舖仔細細，專做韓式小食外賣，所以default包裝都係紙盒、膠叉。由韓國夫婦主理，老闆用韓文落單，由阿珠媽煮製食品，成個感覺真係好似身處韓國街頭。讚!

蘇Good魚蛋

陳記魚蛋@紅磡
12/2/2012 13:00

魚蛋係最常見嘅掃街小食，而陳記嘅出品被阿蘇稱為全香港最好食嘅魚蛋。小店仲用海報size印左好幾張阿蘇嘅大樣，十足代言人咁款。

小辣魚蛋 ($6)
N年前兩蚊幾一串嘅魚蛋仔，到今時今日已經升價三倍。小店用一細紙杯裝住，有六小粒魚蛋仔。人地話此店嘅賣點，並唔係魚蛋，而係獨家秘製嘅辣醬。食客可以因應自己嘅抗辣能力，叫大、中、小辣同唔辣。話明係秘製醬汁，小小怕辣嘅我地，都試左小辣版。

魚蛋細細粒，非常結實，入口唔算十分爽口彈牙，但食落好有魚味，原味甜甜地。
小辣醬汁落得重手，未食已經聞到好香沙嗲味。輕輕沾一啲醬汁，初起係甜甜嘅味道，類似沙嗲，又似咖哩，有蒜香又感覺到花生味存在，好香濃惹味。咀嚼之後，麻辣味就慢慢攻上黎，辣得好過癮。

老實說，魚蛋無乜特別，秘製醬汁就比一般小店突出。無咁叻試勻全香港所有魚蛋，所以唔敢學阿蘇話佢係Number One，只係覺得佢個醬叫做唔錯咁啦。

這裡是紅磡，這裡有港包

時新快餐店@紅磡

12/2/2012 12:00 

近排成日講集體回憶，黎到紅磡，最好味嘅回憶，應該就係時新嘅包包。不知不覺間，開飯網好評已經直迫八百個，人龍仍然不減。闊別一年嘅好味包包，我又黎啦! 正午十二點時份，興幸人唔多，店內仍然有位坐。

食開時新包包嘅人都知道，漢堡包選擇其實唔多，黎黎去去都係一塊定雙層漢堡，有蛋定無蛋，加定唔加芝士，而醬汁就可以選擇沙津汁，蕃茄汁，咖哩汁或黑椒汁，係好簡單，完全Tailor-made嘅設計。

雙層漢堡蛋包 ($16)

雙層芝士蛋漢堡包 ($18)

等餐時間約十五分鐘，因為每個包包係新鮮即製。廚房傳出黎嘅香味，同煎漢堡嘅滋滋聲就可以證明一切，包保熱辣辣。包包份量十足，高度亦十足，但當然要毫不保留，不顧儀態地，一大啖咬落去，先至可以感受到果種滋味。

包包用上嘉頓麵包，輕輕焗過，所以麵包更加鬆軟，亦有微脆感覺，好香芝麻味。圓圓厚厚一塊自家製漢堡，就係俘虜一眾為食貓嘅靈魂所在。漢堡扒外層煎得焦脆，入口非常鬆軟，軟腍得黎亦帶點肉筋嘅煙韌。肉味濃，充滿住洋蔥嘅香甜，肉汁澎湃到流晒出黎，直情睇到肉汁喺纖維之間流動。

蛋外皮煎得香脆，蛋黃仍然保持半熟嘅溏心狀態，感覺更加幼滑。加埋自家調製、味道微酸較稀嘅沙律汁，就係美味嘅來源。加多兩蚊，多一塊芝士，都係抵嘅。因為芝士係完整嘅一大塊，唔會好似乜記，睇落完整，原來切割技巧高超，實質得半塊。芝士係綿上添花，令漢堡多一分濃郁感。

第二次品嚐時新漢堡包，雖然價位微漲左一蚊，漢堡扒稍為縮左啲啲，但美味不減。每食一啖都有發自內心嘅滿足感，只想繼續一啖接一啖。

漢堡包只不過係一個包，一塊漢堡扒，一隻荷包蛋，一片芝士同一pat醬汁嘅配搭，任何西餐、快餐、小食店，甚至住家都可以輕鬆製作得到。但點解時新仍然有咁多人支持，好評不斷增加? 食過嘅朋友自然會知，果種美味並唔能夠用筆墨形容。更何況除左滿足口腹之欲外，時新嘅港包仲包含左港人對「香港第一個漢堡包」嘅認同與支持，係真正屬於香港人嘅包包。可能呢啲集體回憶，正正為包包加添多百零二百點人情分。呢種羈絆先至係漢堡包最好嘅調味料。

前篇參考

20/3/2011

充滿港式風味，百分百香港人嘅漢堡包

凍到索索聲飯後冰品

糖黐豆@大埔
8/2/2012 20:30

食過暖笠笠嘅煲仔飯，飯後甜品黎個冰火就刺激啦。就喺陳漢記嘅不遠處，有間偏台式嘅小餐廳，除左有粉麵飯、小食之外，仲有唔少甜品選擇，一於冰一冰。

豆腐味綿綿冰 ($32)
綿綿冰夠大碟，上枱絕對唔失禮。冰底打得碎碎，好鬆散，入口似雪花即溶，所以食嘅時候，好容易倒塌，比較呢hea。不過好在豆味都算夠濃，似係豆奶嘅味道，甜甜地，幾清爽。加埋濃甜嘅朱古力漿，入口都唔錯。自選配料揀左蜜糖星星、芒果爆爆珠同椰果，配料同豆腐味都好襯，微酸少甜，唔錯呀。

芒果冰底酸酸甜甜，味道都夠濃，估唔到同脆脆嘅杏仁片都幾夾，芒果漿都好夠味。

藍梅冰底明顯做得無咁好，一睇就見到冰底似沙冰，完全唔幼滑，仲食到索索聲，超冰感，真係凍到震。而藍梅味都幾人工，麻麻地。

呢度一個綿綿冰，所有配料都係自由選擇，冰底有六種，糖漿五款，仲有十幾款配料選擇。一個基本配搭包一款冰、一款糖漿同三款配料，價錢只不過$32。同規格嘅甜品，喺市區講緊四十幾蚊，呢度三十零蚊絕對係街坊價。味道當然比唔上綿冰專門店，只不過價錢平平地，過下口癮都可以嘅，但記得唔係款款冰底都做得好。

某同事點左個類似叫彩虹雪山的東東，係椰汁味綿綿冰，加士多啤梨漿、芒果漿仲有椰果、西米等配料，三十多蚊，冰底做得夠味，成個配搭都唔錯，都可以一試。

閒時午市時間，都有幾個套餐可試，三十鬆啲就有一款飯或麵，味道都唔錯，特別推介肉燥撈米同香茅豚肉飯。跟餐除左可選茶啡外，亦可以揀豆腐花或西米露等甜品。其實午餐味道係OK嘅，只不過套餐只有五、六個選擇，仲要十年都唔轉一次，翻食欲望唔高。兼且學生哥仲有特別平價優惠，中午時份一定輪為學生飯堂，插針都插唔入，想食就趁學生放假啦。

題外話，有時見到一個學生仔食完成個餐，都仲要叫多個綿綿冰，乜家陣啲學生哥咁大食，仲咁有錢，埋單要成六十蚊喎，真幸福。

大埔明星飯堂之火辣煲仔飯

陳漢記@大埔

8/2/2012

天時冷除左打邊爐之外，食煲仔飯都係一個非常適合嘅活動。趁今日超凍，大班同事們去附近嘅陳漢記食個暖笠笠煲仔飯。新鮮煲仔飯夜晚六點先推出，只係六點多少少，店內已經完全滿座，舖外仲排左不下十人，最後差唔多等左成個鐘先有位。

白膳排骨煲仔飯 ($55)

煲仔飯落單即製，入座前已經落定單，坐低左都仲要等多廿分鐘，新鮮熱辣嘅煲仔飯終於送到。煲仔飯先倒入豉油，再蓋上煲蓋焗最少三分鐘。豉油慢慢變熱，飯亦可以吸收到豉油香，滲到飯底，仲會結出帶豉油味嘅香口飯焦。有人話唔打開蓋，直接將豉油沿住煲邊倒入，呢個先係最岩嘅古法淋豉油方法。我就唔理咁多，打開蓋倒左少少豉油就算，肚餓。打開蓋嘅兩秒間，偷睇到材料好豐富，所以等待嘅時間過得特別慢。豉油飯嘅香味飄散，更覺肚餓。

夠鐘啦，係時候打開寶箱!

成個飯面都舖滿左白鱔同排骨，十級豐富。家陣街市一斤白鱔講緊超過一百五十蚊嘅時勢，一碗五十五元正嘅煲仔飯，居然分享到四大塊肥厚嘅白鱔。排骨嘅份量仲多過酒樓一碟大點豉汁蒸排骨，實在驚喜!

白鱔白雪雪，師傅切得非常厚身，份量十足。鱔片啖啖肉，較為軟腍，唔夠爽脆，好彩肥美度亦足夠。食得出用左些少果皮提味，味道幾鮮甜，唔覺有腥味。排骨加埋辣椒絲同豆豉蒸煮，香味十足，有肉有骨，正合心意。排骨食落夠肉地，好爽滑鮮甜。試食到同事們只需俾多五蚊雞加配嘅兩條臘腸，臘腸食落比較肥，味道算唔錯，油脂滲入飯中，更加惹味。

豉油似係製過，味道少少甜，加熱後伴飯一齊食，味道幾香。可惜白飯略嫌較為濕潤軟腍，如果再乾爽多少少，相信更加好。煲底結左些少飯焦，未算完全焦黑，係可入口嘅深啡色程度，可惜飯焦都唔算太脆，過下口癮食兩啖就算。

聽人講廟街嘅煲仔飯都好出名，雖然未試過，但覺得陳漢記嘅出品叫做算係咁，當然仲有進步空間。話晒係大埔好評Number 1嘅名店，晚飯時間排隊等位係指定動作。除左煲仔飯之外，腸粉同粥品其實都唔錯。腸粉出名晶瑩剔透，皮薄餡靚，有「玻璃腸粉」嘅美譽。而各式粥品都非常出色，粥底軟綿綿，香甜足料，係午餐良品。 

陳漢記嘅超強名氣，除左係大埔區街坊熟知嘅事實，更加係唔少美食節目嘅採訪對象，所以吸引唔少區外人士，山長水遠都會揸車黎搵食，有唔少明星紅人都會黎幫襯。就係食飯當日，又見到藝人拍攝緊一個美食節目，仲見到N年前出名嘅影視紅星黎食飯。勁!

大圍街坊專用甜館

甜藝館@大圍
5/2/2012 16:00

大圍越開越多間甜品舖，札根多年嘅甜藝館出名平靚正。近期見到甜藝館做半價團購，十蚊雞就可以當廿蚊用，梗係唔放過。

雪糕世界 ($20，團購價$10)
雪糕世界底層係大菜糕，上面舖滿左大明珠，最後加一個大大嘅曲奇妙趣雪糕球。大菜糕並唔係平時見到嘅透明色，而係奶白色，食落有輕微奶香味。大大粒西米明珠煙煙韌韌，加埋爽滑大菜糕，足足有兩種唔同嘅口感。甜品仲落左唔少白色嘅淡奶，呢款奶並唔係平時食開某大牌子嘅花奶，而係甜度輕微，少少似忌廉嘅淡奶。加埋凍冰冰嘅曲奇雪糕，係一款食得飽人嘅甜品。

幻彩涼粉 ($22，團購價$12)
製成品同圖片一樣，層層疊堆砌幾豐富。涼粉係最傳統嘅黑色仙草啫喱，配料有大明珠、西瓜、蜜瓜、椰果等，全部都好鮮甜。涼粉並無用太多糖水，只係加左少許淡奶調味。自選雪糕係朱古力味，感覺上同涼粉唔係太夾。朱古力味雪糕上仲淋左味濃嘅芒果醬，好似有啲奇怪。

喺大圍呢啲地區，大部份食肆都係做街坊生意，價錢唔貴得去邊，糖水舖當然唔例外。甜藝館供應傳統嘅中式糖水之外，雖然無好西式嘅蛋糕甜點，但都有唔少新鮮創意雜撈甜品，價錢真係唔貴，廿蚊雞已經夠埋單，而且每碗都係非常足料，好抵食。所以晚飯後時段，都有唔少街坊幫襯，堂食同外賣都有大班捧場客。

「魯肉飯」謎思

食過西門町嘅滋味魯肉飯，突然冒出一個問號。
究竟「魯肉飯」、「滷肉飯」、「肉燥飯」、「焢肉飯」有咩分別?

呢個的確係一個好問題，有時會見到一片片嘅五花腩，有時係肉碎伴飯，究竟咩等於咩?
就住呢個問題，相信夠字數可以寫篇論文。喺網上搜尋下小百科，發現原來係一門高深學問，大家研究下。

簡單版嘅解說，係唔同地方嘅名稱差異。

醬汁煮肉碎嘅飯，台灣北部叫「魯肉飯」，喺南部就叫「肉燥飯」。南部都有所謂嘅「魯肉飯」，但就係一片片嘅五花腩肉，即係北部所講嘅「焢肉飯」。維基百科又話，「魯肉飯」嘅正確寫法應該係「滷肉飯」，而「魯肉飯」只係集非成是、約定俗成嘅名稱。

假如而家身處台北，可以食到﹕
1. 「魯肉飯」等於「滷肉飯」，用濃郁醬汁滷煮嘅豬肉末配飯

2. 「焢肉飯」即係「爌肉飯」，白飯面上應該見到用醬汁醃製煮成嘅五花腩肉塊

假如去台灣南部旅行，叫法就相當唔同﹕
1. 想食豬肉末配飯，請叫「肉燥飯」
2. 想食肥肥厚厚嘅五花腩肉塊配飯，請講「魯肉飯」

更深入地研究，好多台灣朋友話，除左叫法上有分別，其實北部所講「魯肉飯」同南部稱為「肉燥飯」，即豬肉末伴飯，兩者嘅烹調方法都好唔同。

為左配合台灣北部工商業城市嘅飲食習慣，食品製作最好可以循環加熱，所以好適合用濃郁醬汁燘煮肉類呢種方法，即係「滷肉」。滷汁材料煮熟後，仲可以不停加熱，越煮越香。而「滷肉」會用上有肥有瘦嘅豬肉，切成小粒狀，所以入口會夾雜左粒粒嘅脂肪肥肉。

而南部嘅「肉燥」會用無皮同脂肪嘅純肉部位絞製成肉末，再加上紅蔥頭等用爆炒方式煮製，肉碎煮得較為乾爽，係好典型嘅家庭料理。

可以話對於「焢肉飯」係咩嘅爭議相對比較少，控肉係將五花腩肉切成大大塊嘅長片狀，當成主菜配飯食。

對我黎講，做過功課後，其實「肉燥飯」同「焢肉飯」係好容易聯想同明白。只不過「魯肉飯」就比較特別，因應唔同地方嘅製法，可能係兩樣完全唔同嘅美食。其實有唔少台灣當地嘅朋友都討論過呢個問題。當地人點餐時都覺得非常混亂，試過落柯打後，店員送上嘅菜式同心目中所想完全唔同。所以有時為免尷尬，點餐前都會問清楚，所謂嘅「魯肉飯」係肉末定係五花腩塊。

網上咁多篇文章分享，真係無辦法考究係真係假，只不過越睇越得意，不妨參考下。

情迷旺角西門町

西門町台灣麵食@旺角
5/2/2011 13:30
開飯網搜尋「旺角」+「台灣菜」，佔據搜尋榜首位置嘅，就係呢間有近三百五十個好評嘅台式料理小店。任何時間行過，店內最少坐足八成滿，晚飯時份，更會大排長龍。趁中午時份唔洗等位，一於重臨西門町嘆番餐。

廟口魯肉飯 ($31)
魯肉飯基本上係每枱客例點嘅名菜，一碗飯材料充足，有足量嘅魯肉，半隻滷蛋，仲有唔少蔬菜。魯肉係瘦肉同脂肪混合，配上香甜醬汁燉煮，非常濃郁。魯肉煮得腍，非常入味，隱約食到冬菇碎等材料，仲夾雜左粉粉軟軟嘅肥膏，入口其實有啲怕怕，但成個感覺完全唔油膩。醬汁充足、略為濕潤嘅魯肉配上爽口榨菜粒伴飯，真係非常惹味，不知不覺間已經完全清碗。強烈建議先將魯肉同飯伴勻，以免因為太好味，極速食晒啲餸，最後只淨低白飯，不過還好仲有隻滷蛋。

香辣牛筋新竹米粉 ($34)
一大碗睇見都驚喜，牛筋份量超多，相當於一般餐廳嘅兩倍份量。所謂嘅香辣，並唔算太辣，但香氣十足，味道係醒胃、惹味嘅甜辣味。牛筋食落軟韌適中，大大件亦燘得夠腍身，但仍不失爽口嘅膠質感。而新竹米粉非常幼細、煙韌，配濃味牛筋一流。

網皮芋蓉卷 ($19，優惠價$9)
九蚊雞一客，有三件芋蓉卷，真係幾抵。網皮炸得好香脆，勝在夠乾身、唔油膩。網皮低下包住芋蓉，仲有些少疑似豬肉碎同冬菇粒等，味道剛好，口感粉粉腍腍。芋蓉卷仲可以沾一下酸甜辣醬，更加好味。

星期日午市時間仍有供應抵食套餐，一款飯或麵只需三十零蚊，仲附送冷熱飲品一杯，超抵! 小店仲提供追加小食優惠，大約俾多十元、八塊就可以加配一款小食，四十蚊埋單，已經可以滿足離開。

當天發生左小插曲，印象深刻，但疑似老闆態度十個抵讚，應記。
落單阿姐似乎係新手，點菜覆單論論盡盡，及後見到手上嘅埋單紙，無啦啦多左三大蚊。疑似老闆問清楚後，樂意改單，並送上兩句唔好意思。後來，一碗新竹米粉竟然變成擔擔麵，先知道問題所在。原來阿姐口頭覆單正確，但手寫單出錯，所以亦順理成章出現左擔擔麵底加三蚊。疑似老闆立即換上一碗正確又新鮮嘅香辣牛筋新竹米粉，前前後後，一共講左五句唔好意思，同三次對唔住，搞到我地都真係唔好意思，麻煩晒。

雜誌盛讚此店食品非常正宗好味，但老闆並非地道台灣人，而係確確實實嘅香港人。當日所見，疑似老闆先生事事親力親為，非常落力，待客有禮不在話下，亦感覺到果種威嚴嘅氣派。隱約聽過疑似老闆提點員工，言語間無帶一點責罵，只係好聲好氣勸勉員工要盡心盡力，相信阿姐們亦心服口服。

多得頭條本搵食指南，引領我去西門町食好野，無團購之下，要搵平靚正嘅，呢度係一個不錯嘅選擇。

士多啤梨