譽麵坊@土瓜灣

譽麵坊土瓜灣
6/1/2013 15:00

南乳雞球米線

的確好味。雖然炸粉略多，但沾上醬料味道超香，南乳味濃郁。果然係鎮店之寶。

南洋吐司廚房

土司工坊@佐敦
12/8/2012 12:30
9/12/2012 20:30

12/8/2012 12:30
真係唔明白，點解任何時間澳牛都咁多人。去唔成澳牛，選擇去對面街嘅吐司工坊。雖然退而求其次，但原來都算意外收獲。是日午餐叫左兩個套餐，另加一個小食。

星洲叻沙套餐 ($42)
呢度嘅份量真如網評所講偏少，不過一碗細細嘅叻沙卻令人回味。賣相得，味道亦唔錯。叻沙配料有魚片、大蝦、豆卜、芽菜等，都係咁上下。材料都幾新鮮，起碼爽口彈牙。小豆卜用盡佢超強嘅吸收力狂索湯汁，更加係美味之中嘅極品。呢個叻沙湯底算係咁耐以黎最可口嘅。湯底用上唔少材料、香料炮製。湯底主調係香甜的，係充滿住蝦味嘅濃郁海鮮味，鮮味過後，係淡淡嘅椰香，再加點柔和辣味。如此鮮味，亦具層次感嘅叻沙湯底，真係第一次試，實在驚喜十足。所以枱上嘅溫馨小貼士，亦介紹左叻沙應該用湯匙食，短短細細嘅粗米線，再拌一啖湯一齊送入口，至係最佳食法。

肉鬆吐司套餐 ($29)
另一款輕型午餐選擇左人氣小食肉鬆吐土司。套餐仲包括半熟蛋同飲品，廿多蚊確實唔貴。切成九宮格嘅厚吐司，鋪滿厚厚一層肉鬆，非常飽足。土司烘得乾脆，邊位微焦脆脆的，中間仍然鬆軟。肉鬆既香且甜，淋上少許煉奶，更加滋味。一開始仲怕肉鬆吐司又咸又甜咁奇怪，原來兩者配合起黎嘅化學作用真係超強。

半熟蛋
多士配上半熟蛋係新加坡餐嘅特色。跟據食用小貼士，打破左半凝固嘅蛋黃，蛋黃同純白幼滑嘅蛋白混和，加上醬油同胡椒粉撈勻，就係簡單美味嘅小食。

皮蛋肉鬆 ($19)
不想多講，我冇興趣。

南洋奶茶
不得不提下呢度嘅南洋奶茶。上次試過K字頭又濃又甜嘅奶茶已經上左癮，今次一於黎個比拼。呢度嘅茶味還可以，可惜甜奶落得輕手，整體黎講同一般茶走冇乜分別。個人黎講，的確比較喜歡K頭字又甜又濃嘅地道奶茶。

雖然唔知呢間食物正宗唔正宗，但味道確實係個人喜歡。特別係一味肉鬆吐司，令人有衝動立即試埋個傳統咖椰吐司。價錢方面比尖東果間K字頭相宜，而且款式更多樣化，星期一至五嘅下午茶更加抵食。好一間新加坡過江龍，又一道力加速小女子嘅新加坡之旅。

9/12/2012 20:30

 牛油咖椰多士

娘惹米線 ($43)

米線非常幼身，可以充分吸收湯汁。湯汁酸酸甜甜，幾開胃。配料有半隻蛋、蝦、魚仔乾及豆卜。

蕃滿門

蕃滿門@大埔
16/11/2012 13:00

蕃茄魔大愛，超鍾意，勁喜歡!

蕃茄滑蛋濃湯長通粉配脆皮咸豬手 ($45)

蕃茄濃湯的確好濃，有啖啖蕃茄肉，加微辣就更加惹味，加埋又香又滑嘅滑蛋實在太正斗。

主角配上脆皮咸豬手，兩大舊都好多肉。煎得脆脆，肉質爽口好入味，加少少蜜糖芥末已經好正!

朋友選擇左香酥雞扒似乎都唔錯。

大大粒，彈彈下，超A老翻魚蛋

安利大排檔@筲箕灣
13/3/2011 13:30

一向都甚少黎港島區，難得有事要落筲箕灣一轉，當然要去下筲箕灣嘅食街。
一條東大街有兩間安利，是但求其搵一間等位，都等左差唔多半個鐘。

魚蛋米 ($20)
呢碗魚蛋粉係可以一次過滿足晒三個願望，可以試晒魚蛋、蛋片、魚皮。
魚蛋大大粒，彈牙到不得了，幾驚佢彈走，係超爽口、超彈牙。又好夠魚味，但好彩唔腥。薄薄地嘅魚片就無乜特別，係比魚蛋香口少少。
竟然，連炸魚皮都好正，鬆脆、但唔油膩。熱氣版食法乾啃又得，想浸死佢腍晒食又得，得左。就一塊咁簡單嘅魚皮就可以為碗廿蚊雞嘅魚蛋米加分，好野!

墨丸豉油撈粗 ($24)
可能係呢度嘅特色，呢度啲丸全部都係大大粒。墨丸尚且算叫做OK，都仲係有少少咁多粉，但已經好過出面。撈粗麵又唔錯喎，個豉油醬汁甜甜地，幾有香味。

上網搵搵資料，好多人都話呢間叫大排檔嘅係翻版，但我又覺得翻唔翻版唔重要，啲野好食先緊要。就算如果佢真係翻版，我相信呢間都係超A貨嘅老翻，因為素質係唔錯喎。希望正版會更好，下次試!

後記
安利魚蛋粉麵@筲箕灣
15/8/2012 11:00

又黎筲箕灣搵食，二話不說就直衝入安利魚蛋粉試下正店。諗都無需多諗就柯打左切腩同魚片頭嘅配搭，話晒都係招牌菜，點都無錯。

切腩魚片頭河 ($30)

三十蚊一碗有清湯切腩同一大堆魚片加頭，其實相當足料。出面食一碗清湯腩都三十幾蚊，仲未計你要雙拼。清湯切腩最好就有肥有筋，膠質豐富，食起黎唔韌，仲有黏黏嘅口感。清湯腩本身有少許甜味，牛味亦夠濃郁。當然比唔上出名嘅清湯腩，但以一般麵檔質素黎講都算唔錯。炸魚片頭係此店名物，味道好香，明顯係外片炸得酥脆嘅香味。魚片有魚味，入口亦爽口彈牙，但略嫌咸左少少。

切腩牛丸麵 ($30)
另外一碗選擇左牛丸，呢度嘅牛丸似乎係手打，纖維比較多，而且仲有果皮味，味道似酒樓嘅山竹牛肉。

總結一句，如果過開港島經過的話，呢間小店都不妨一試。

不簡單的壹碗麵

壹碗麵@北角
22/7/2012 13:00

黎開港島又無團購，可以一試港島區嘅人氣名店。進入開飯網進階搜尋，揀選北角區四十蚊樓下嘅食店，第一名就係呢間小店。截至現時為止，擁有九十幾個好評，絕對唔野少。特別之處係唔食牛腩改食豬，仲有佢嘅自製粗麵都係一個亮點，一於試下。

蝴蝶腩撈粗麵 ($34)
原來蝴蝶腩有肉連少許筋膜，就好似牛腩咁，肉質一絲絲，腍得黎亦帶煙韌，冇左牛嘅膻味，換黎豬嘅甜香，相當唔錯。另外新鮮自家製特闊粗麵都非常唔錯。麵條就好似西式嘅寬條麵咁粗身，有些少厚度，麵質比一般麵更為煙韌，亦有蛋香。有人話粗麵比較硬身，的確咬開麵中間，仲見到麵芯，個人認為呢個正係Al Dente嘅最佳狀態。撈麵用上少許鹵水汁、芝麻同蔥花，食起黎較為清淡，香味欠奉，不過好戲正係枱上面嘅一盅秘製沙嗲醬。只需加一匙，成個味道完全唔同晒，更加惹味香甜。不得不提撈麵配上嘅清湯，相信係豬骨清湯，味道相當鮮甜，帶胡椒香辣味，濕下口唔錯。

酒糟炆豬腩肉撈QQ麵 ($34)
五花腩真係好似雙層巴士咁，脂肪同肉層層相間，非常腍滑。煮得入味之餘，味道甜甜帶淡淡酒香，食落一啲都唔油膩。呢款揀左QQ麵，即係手打鴨蛋麵，麵型似烏冬般粗幼，入口非常煙韌幼滑，蛋香比前款更濃烈。自動跟上甜甜嘅鹵水汁撈麵，麵索晒醬汁，超惹味。

溏心浸酒蛋 ($12)
一隻大蛋浸喺酒汁之中，酒係咸甜略帶酒香，聞起黎相當濃烈，但飲落其實無想像中咁勁。雖然送上時蛋白已經爆開，但蛋黃並無流出黎。蛋白腍腍滑滑，吸收左唔少酒香。中間嘅蛋黃比一般鮮橙色，估計可能係鴨蛋。蛋黃半凝固，蛋漿慢慢流黎出，充滿喺口腔之中，混和左酒香原來別有一番風味。聽聞呢款小食係台灣特產，下次去台灣真係要試試正版。

一間小小嘅麵館，賣著唔簡單嘅一碗麵。三十多蚊一碗麵，價錢合理。淨係款式特別，坊間未曾食過，已經值回票價，而且味道仲好好，實在驚喜。今次搵食搜尋成功，其實開飯網有時都信得過嘅。

天后腩

華姐清湯腩@天后
2/7/2012 13:30

過黎港島，一定要試下天后嘅人氣名店。呢間華姐係開飯網排頭位嘅名店，食飯時間人龍自然出現。一點多黎到，人唔算多，亦唔需要排隊，好事來的。

清湯牛腩麵 ($30)
三十蚊一碗牛腩麵其實唔算貴，度度都係咁上下。呢碗麵有六大件牛腩，都算係咁。牛腩睇落偏瘦，纖維係一梳梳的，比較乾柴硬實，比普通更普通。心諗，中伏鳥。不過，原來瘦腩之外，仲有幾件半肥瘦腩，呢幾來半肥瘦明顯更好味。肉質軟軟，鬆化得黎牛味亦非常濃郁，肉之間帶有少少脂肪，入口更香滑。所以，黎呢度食，必須要求想食嘅部份，唔怕講多一句，得來嘅質素確實差好遠。
不得不提，呢碗清湯真係幾好飲，非常鮮甜味美，除左牛骨香味之外，亦帶蘿蔔清甜，加少許青蔥，入口一啲都唔油膩，好清爽嘅湯底。至於麵，都係一般煙煙韌韌嘅全蛋麵。

咖哩牛腩撈麵 ($42)
另一款咖哩牛腩嘅牛腩似乎更好，大部份都係半肥瘦狀態，夠晒腍。而咖哩係一般港式少辣咖哩，都OK啦。

呢間牛腩天后係港島區數一數二嘅名店，好多食客都會同附近地區嘅清湯腩做比較，各有支持者。其他幾間就未試過，但比較新界區果幾間，個人喜歡大埔群記多啲。群記除左一般嘅爽腩、坑腩基本選擇外，仲有面珠等其他特別部位，而餐牌寫到明唔同部位有唔同價錢，你想食乜就叫乜，自主性大好多。天后呢間就無明確顯示有唔同牛腩部位，所以新仔唔知頭唔知路唔識叫，只好任由大廚先生分配，如果唔好彩分到勁瘦位就真係麻麻地。不過做番功課，好多熟客仔話，只要柯打時講多句，店方都會盡量滿足客人要求。所以黎呢度食，記得要講明想食邊個部位，唔怕多口水。

溫情肥龍穴

四海遊龍@紅磡
13/5/2012 13:30

呢間被我地稱為四海肥龍嘅餐廳，早一排好似執下又一間，仲以為絕左種。點知突然殺出一個團購，先知道仲有唔少分店在生。今次$31可以食一個豐富台式餐，有牛肉麵、鍋貼，仲有豆漿，真抵食。其實十二點至兩點呢啲黃金時間係禁止使用優惠，但見一點半到場人少少，膽粗粗問下龍頭大老闆可否破例，佢又好唔介意俾我地入座，真係唔該晒。

正宗台灣牛肉麵

牛肉麵超大碗，除左個碗大，份量亦多。台式牛肉即係類似厚切牛展嘅物體。可以話，牛肉份量仲多過團購張宣傳相，足足有七、八大件。每件牛肉腍得黎不失嚼勁，膠質亦相當豐富，燘到入晒味，充滿紅燒香料味道，牛味亦濃郁。麵底係手打拉麵，唔算好滑溜，但幾鍾意煙韌爽口、微甜嘅感覺。所謂嘅牛肉湯，係清湯之上加些少紅燒牛肉醬汁，味道較為香濃，入口微甜，帶輕微豆瓣醬香辣味，可惜牛味欠奉。不過，呢碗麵算係交足功課，絕無偷工減料。

招牌鍋貼

每份團購餐都跟六隻招牌鍋貼，兩份十二隻一碟上，實在豪邁爽快。只睇賣相，呢碟鍋貼絕對唔差。即叫即煎，熱辣辣嘅長條形鍋貼，的確係貼貼服服咁貼住隻碟。外表煎得恰到好處，金黃微啡色，不帶一點焦黑。鍋貼外皮又薄又香脆，咬時仲聽到清脆嘅索索聲。內餡係簡單嘅豬肉、椰菜、洋蔥等，配搭非常清爽香甜，鮮味十足，肉汁都好豐富。加埋隨手任加嘅黑醋配蒜蓉，實在非常惹味。

豆漿

隨餐附送嘅豆漿，真係夠大杯，足足係一般上海舖三倍份量。豆漿夠凍，微甜，有淡淡豆香，絕對係飯後清爽嘅好配搭。

印象中，覺得呢間肥龍生意麻麻，所以分店越來越少，唔係今次團購，真係以為佢絕左種。今次再試，先發覺佢嘅質素其實唔差。不過，唔少網友話，位於美食廣場之中嘅幾間分店，質素完全唔得，所以劣評爆多。雖知道呢間野都係特許經營，估計食材都係由總部製作再分發，理應有充份監控，控制水準。但真係唔知點解，好多食肆都會出現同樣情況，分店數量同劣評數量係成正比，尤其以特許經營嘅食肆更加嚴重。相信呢個都係為食貓們，唔鍾意食連鎖霸權，寧願捐窿捐罅、四處尋食嘅原因之一。但個人就覺得呢間紅磡分店係OK嘅。

不得不讚多下，呢間紅磡店雖然店仔細細，只係簡單企理嘅茶記款式小店，但員工上下都非常好修養，禮貌一百分，態度一百零一分。每奉上一碟鍋貼、一碗麵，甚至一杯豆漿，都會送句多謝。由入場到離席，屬於我倆嘅多謝次數，應該不比果碟鍋貼少。呢餐係充滿溫情、人情味嘅豐富午餐。雖則一入場已表明團購客嘅身份，但店方絕無任何一絲歧視成份，態度仲好到令人唔好意思。所以我地都諗住叫多一兩款小食，等佢賺多幾個錢。可惜，呢餐實在太豐富飽足，無能為力，惟有下次。

獨孤一味拉麵天王

麵軒@旺角

22/4/2012 20:00

呢張Q-pon擺到差不多封塵，因為係2011年11月嘅產物。不嬲都習慣將啲勁長有效期嘅團購券，放到最後一刻先用。但見呢排團購爆煲，所以急急腳拎番出黎用。到呢一刻先從見天日，亦證明左呢期嘅團購吸引力欠奉。$38食一個麵軒嘅套餐，有特級御品牛肉拉麵、避風塘香脆炸豆腐加珍珠奶茶，其實都OK抵食。但此券只限旺角一分店，因為呢間分店真係靜到喊。

御品牛肉拉麵

呢個御品牛肉拉麵試過幾次，幾台式風味，係OK的。今次做團購仲可以平平地試一個套餐，其實都OK抵。呢個牛肉係牛展，份量都幾多。每塊厚薄適中，燘得勁稔，而且入味，膠質仲好重。另外，仲有唔少件牛筋，夠腍、夠入味，唔錯。麵係自製拉麵，幾彈牙煙韌，麵粉味甜甜地，幾香口，我覺得唔錯。而湯底都好夠濃郁，係紅燒牛肉湯。配菜白蘿蔔仲吸晒啲湯汁，非常爽甜。個人幾鍾意呢個麵，起碼牛味真係夠，已且湯底夠濃。

避風塘香脆炸豆腐

套餐小食係迷你炸豆腐。豆腐係勁細粒版，不過都炸得好香脆。中間幾空虛，其實似豆卜多啲。雖然叫做避風塘，但一啲辣味都無，只係簡單拌上炸蒜粒同椒鹽，非常惹味。

珍珠奶茶

呢度嘅珍珠奶菜係冰震，所以奶茶唔會俾冰溝淡晒，仲保持冰凍。奶茶味道正常，少少茶味，少許奶味，而珍珠都好煙韌。

麵軒初出道時，都攞過唔少獎，比較深刻印象係飲食天王嘅「拉麵天王」殊榮。的確，個人覺得佢嘅台式拉麵係做得唔錯，早幾年仲係我地Hea時間嘅首選地方。可惜，近幾年以特許經營方式經營，分店越開越多，但未能有效控制食物質素，唔同分店嘅水準參差不齊。惟有最主打嘅幾款特式拉麵，例如呢個御品牛肉拉麵，都算保持到水準。至於其他產品，實在不感興趣。咁做生意，似乎唔多掂，所以轉眼間執剩幾間，真係要諗下計。

前篇參考

1/5/2011

吱喳超級痴線麵鍋

知味平靚正台式餐

生活知味@青衣
26/12/2011 14:00
27/12/2011 15:30
8/4/2012 14:30
22/4/2012 13:30

呢篇記錄，絕對值得俾十粒星做個Bookmark。難得喜歡試新野嘅本人，竟然可以一連兩日去同一間餐廳食飯，真係絕無僅有。

26/12/2011 14:00

台灣芝士雞扒肉燥飯、 蜂蜜綠茶 ($40)
兩點鐘未有下午茶，叫住個午餐頂住肚。 一塊圓轆轆嘅炸雞扒，一咬開啲芝士就湧出黎。細看之外，原來係兩塊薄薄嘅雞扒，中間夾住芝士同火腿，再裹上炸粉油炸。流心雞扒外皮炸得脆卜卜，好香口，但肉質粉粉地，唔太似雞扒。中間嘅芝士同火腿就好好味，熱辣辣嘅芝士味道勁濃，加埋火腿更加惹味。食完成塊雞扒都唔覺油膩，想一試再試。流心雞扒配肉燥飯，相當有意思。肉燥份量澎湃，舖滿晒飯面，唔會好似一啲食肆，飯就一大碗，肉燥就得一細湯匙。肉燥份量多之餘，味道亦唔錯，有麵豉、醬油嘅味道，肉碎非常入味，仲有些少冬菇、洋蔥等材料，撈飯一流。蜂蜜綠茶味道正常，如果再濃郁啲就好啦。

香酥雞柳拼炸醬拉麵、西多士、台式奶茶 ($28)
香酥雞柳一大碟，份量唔少。外層有層厚厚嘅炸漿，唔係太脆，感覺粉粉地，雞柳實實地，比較乾身，沾下酸甜醬味道就好啲。加三蚊要嘅炸醬反而超級惹味，肉醬甜甜酸酸，辣辣地，仲有蕃茄味，就算撈落湯麵度，味道仍然濃郁。所謂嘅拉麵唔似日本拉麵，似係中式油麵，質地粉粉地，仲有芽菜、青蔥等做配料，都算係咁。

食完個麵，仲有西多士做甜點。西多士雖然無花生醬餡，只係外層包左蛋漿拎去半煎炸，但麵包都算鬆軟，而店方都好客氣，大方落左唔少糖漿同牛油，更滋味。台式奶茶好明顯係開粉，但奶粉份量唔夠，味道淡淡地。

27/12/2011 15:30

鹽酥雞扒米粉、西多士、布丁奶茶 ($28)
上次食過香酥雞柳一般般，眼見附近有幾枱食客都叫雞扒配麵，不如就跟風點一客，果然唔錯。大大塊鹽酥雞扒切開幾件，雞扒外皮唔係吉烈炸皮，係好似一片薄薄又酥酥脆脆嘅炸粉，真係有鹽酥感覺。雞扒肉嫰又多汁，有微微嘅胡椒味，其實唔洗沾沙律醬已經好惹味。

布丁奶茶一大杯，杯底係奶黃色嘅雞蛋布丁，沈浸喺台式奶茶之中。凍嘅台式奶茶可能已經一早調好味，所以今次有奶味亦有茶味。但布丁有少少硬，有少許粒粒、唔夠滑，仲好似有啲黏黏地嘅蛋衣。

台式牛肉公仔麵、花生厚吐司、蜂蜜綠茶 ($27)

台式牛肉就好似醬燒牛腩，牛肉半肥瘦，燘得好腍。醬汁少少辣，有啲似五香肉丁嘅味道，但因為浸左湯，所以味道唔夠濃。

今次試另一款花生醬吐司，吐司唔算厚，勝在夠鬆，而且烤得夠乾身。花生醬又夠味，溶晒入吐司，好味道。

一份豐富嘅午餐跟埋大大杯台式飲品都不過四十蚊，係好合理價錢。到左兩點三下午茶時間，一份茶餐二十零蚊已經有交易，仲要有麵、有吐司、有野飲，實在太抵。價錢平之外，味道亦正常有餘，真係唔介意連續兩日食埋同一類型嘅套餐。

8/4/2012 14:30

俾金魚佬昆左去青衣睇廟會，點知廟會已經執左。橫掂都係果頭，就等兩點三食個下午茶。一睇餐牌，就發現有所改動，好似加左少少價，不過度度都係咁加啦，不見怪。
 
知味豬扒鮮茄米粉、朱古力厚吐司、凍朱古力 ($29)

第一次試呢款豬扒 ，塊豬扒真係又厚又大塊，幾乎佔據晒成個湯碗。所謂嘅知味似乎係醬油、胡椒嘅基本調味，味道無乜特別，不過就相當鬆軟。新餐牌無左最愛嘅炸醬，只好配上鮮茄，蕃茄真係就咁一舊舊加落去，鮮茄湯底呢個期望實在過份，不過蕃茄總算鮮甜多汁。

朱古力厚吐司真係一流，除左吐司有厚度之外，上面嘅朱古力醬都係有厚度! 吐司外脆內軟，連朱古力醬都係脆脆地，非常夠味，正。

鹽酥雞扒咖哩公仔麵、西多士、 蜂蜜綠茶 ($33)
對比番上次影果幅相，鹽酥雞扒比上次更大塊。雖然加左價，但差價加番俾客人喎，讚! 雞扒又酥又脆，超入味多汁，真係無投訴。不過值三蚊雞嘅咖哩就完全唔掂，味道淡得可憐，連公仔麵果包調味粉都不如，下次一定唔會再叫。

第三次試下午茶，雖然價錢比之前貴左少少，但味道都一樣好，相信應該都會有第四次，繼續加長呢篇野啦。

22/4/2012 13:30

是日廟會行左就行左，但原來啲熟食攤位好多都未開工，最後轉戰去翠怡食飯。樓上間大快活唔知執笠定製修，決定又去飯堂食午餐。

香酥雞扒肉燥飯、手撕雞碗仔翅 ($38)
香酥雞扒一次比一次大塊，一樣咁好味。之前食過已經好欣賞呢度嘅肉燥份量非常澎湃，麵豉味勁香濃入味，撈飯一流。不過今次嘅重點，係試埋個碗仔翅。跟餐可以選擇基本飲品或手撕雞碗仔翅。早前見到唔少人都叫一盅盅嘅類似湯品物體，應該就係呢個。一打開蓋，材料勁豐富，有冬菇片、木耳絲、雞絲同素翅等。絕對係料多過湯，基本上同碗麵無乜分別，強烈建議用筷子食比較直接，肯定比街頭賣十五蚊一碗足料十倍。足料得黎，味道都唔錯。相信下次都會揀食碗仔翅，好過飲檸茶。

精選四寶古早牛肉麵、蜂蜜綠茶 ($48)
台式古早風味牛肉麵份量都幾多，四寶係包括牛腩、肥牛、金錢肚同牛展。先講下個湯，佢話係用牛骨、牛肉熬煮十二小時嘅牛高湯，牛味都係有嘅，但可以再濃郁一啲。好彩牛腩唔韌，都幾腍滑。肥牛得少少幾片，但略為嚡口。金錢肚就超大、超多塊，幾爽口。薄薄幾片牛展味道清淡。麵底係自制手打拉麵，口感算煙韌，略帶少許粉粉，真係似手打。呢個麵材料好豐富，但所有材料都好似一樣味，其實寡寡地。同埋，一碗麵加基本飲品已經要$45，都幾貴下，似乎都係下午茶抵食。

過海嘆泰茶

泰式茶餐廳@鰂魚涌
6/4/2012 19:00

一間細細嘅茶餐廳都有得獎菜式，一味「咖哩軟殼蟹脆包」就贏得「食神爭霸戰之全城食家推介大獎」。可惜本人唔好蟹，不過食下泰菜都無妨。團購$33多款麵粉任揀，小食都有五款選擇，飲品仲係檸檬特飲，抵食。

泰式炸蝦餅、泰式清湯底豬頸肉河粉

泰式炸蝦餅炸得酥脆乾身，中間係啖啖蝦肉，新鮮彈牙，蝦肉係微微一粒粒，唔會一口粉漿，真材實料。可惜蝦味講唔上濃郁，沾醬相信係泰式甜辣醬，但感覺似沾燒鵝嘅酸梅醬，少辣少酸多甜，蜜得有點過份。

泰式清湯底豬頸肉河粉份量相當多，豬頸肉有整整八大片，外皮似乎燒過，輕微焦香，肉質算爽口，但有點硬實。河粉非常得意，係一大片、超闊嘅河粉片，質感好滑溜，感覺有啲似未捲嘅豬腸粉。泰式清湯加左唔少冬菜同青蔥，幾夠香。

酸辣鳳爪、椰汁雞湯底豬扒粉絲
酸辣鳳爪用左去骨鳳爪加左唔少酸辣汁同青瓜蔬菜。鳳爪夠彈牙爽脆，吸收晒又酸又辣、充滿香蒜味嘅魚露汁，非常惹味刺激。

另一款粉叫左椰汁雞湯底，椰汁味好香，雖然雞味唔重，但口感非常幼滑，相信加左唔少椰奶，而且除左椰香味，亦酸中帶微辣，又唔油膩，個人幾喜歡。加配幼身粉絲，吸晒啲湯汁，實在好正。豬扒反而輪為配角，但肉質好腍，好鬆化，帶好香醬油味，仲有些少啡黃色類似咖哩嘅香料調味。湯中仲浮遊左幾舊白蘿蔔，超清甜，完全無渣，配湯又係一流。

青檸梳打
一杯打入勁多汽嘅梳打，加埋青檸，好清涼解渴，不過飲完胃氣超勁。

叫自己做茶餐廳，但其實格局比茶記更乾淨舒適。上至佈置、下至餐具水杯，都好有泰式風情。雖然無試過佢嘅得獎菜式，但無攞獎嘅食品質素都算滿意，團購餐$33實在抵食。睇番餐牌，正價都係正路價錢，大約五十蚊有一個海南雞飯餐，聽講質素都OK，行開果頭可以一試。

天上有地下牛

大利清湯腩@灣仔
6/4/2012 14:30

得到阿蘇讚到天上有地下無嘅老字號清湯腩，分店越開越多，竟然都有做團購嘅一日。$38套餐包括清湯腩或咖喱腩配粉麵飯，跟埋飲品，其實價錢唔係特別平，不過試下無妨。小店位於灣仔一條大街嘅後巷位置，唔留心真係搵唔到，人流亦唔多，可能就係做團購嘅主要原因。

清湯腩米、牛骨湯
先講下個牛骨湯，相信黎過呢度食野嘅朋友，一定知道小店牆上貼住唔少張，語帶恐嚇嘅說話「唔飲湯就係你嘅損失」。的確，個人覺得果碗牛骨湯係幾好飲嘅，湯底好清澈，一滴油都無，入口非常清甜順喉，帶有好香嘅牛骨味，雖然咁牛，但一啲都唔油膩，飲完亦唔覺口渴。電視節目介紹過，湯底不含味精，由多種藥材加二百多斤牛熬成，而且仲經過多重隔油，牛味更突出，真正原汁原味。

感覺上，清湯腩米嘅清湯真係比牛骨湯清，牛味稍弱，相信係溝淡左嘅原故。還好，牛腩份量都幾多，夠飽肚。落單時，無特選部位，所以都唔識分佢係咩位置。牛腩半肥瘦，少部份痴筋，肉質紋理非常細密。食落唔韌，非常軟腍，有入口即溶嘅感覺，完全唔痴牙，加埋筋位嘅爽脆質感，又軟又脆。牛腩肉味亦夠濃郁，夾雜左膻味同油脂味。小店話採用新鮮本地活牛，再用秘方調味燉煮足足十二小時，保證入味兼爽口鮮嫩咁話。唔理佢點整，但加埋個吸收晒清湯嘅米粉一齊食，我係收貨的。

咖喱腩飯
咖哩並非什麼印度式、什麼馬來式，只係典型港式咖喱，香辣平衡，無過份香料。只見咖哩上一層紅油，其實有啲驚，但聞落的確好香、好惹味。咖哩汁嘅辣味係可以接受，不至於食一啖，飲一啖水，個人認為辣得正好。沉浸喺咖哩汁嘅牛腩，份量都唔少。不過明顯地，呢碗牛腩比較肥，入口一樣腍滑入味，滲透住陣陣咖哩香。間中仲夾到兩、三件牛根，果種入口即溶、滑嘟嘟嘅感覺，真係引死人。不過可能係紅油壊事，實在過份油膩。另一樣要投訴就係，飯係一半熱、一半凍的，店方實在要留意下。

$38換來一個老字號牛腩體驗，感覺良好。未至於網友所講，出左名就差到無朋友，退步十丈遠，但價錢就繼續狂加。可能幫襯時並非繁忙時間，人少少，咁好彩可以分到正野。可惜，又未至於好食到，好似阿蘇所講嘅世間珍寶咁誇張。唔少網友都會將大利同附近幾間出名嘅清湯腩店比較，睇黎都要夾下行程，搵日去試埋先。

擺脫那渣，茶記不再茶

蘭香閣餐廳@沙田
4/4/2012 14:30

清明節做完應做嘅事之後，非常肚餓，去左沙田搵食。新城市廣場每逢假日都人頭湧湧，被內地豉油行人士攻佔晒，所以要避走旺區，轉戰附近嘅屋邨商場，搵到一間幾企理嘅茶記，食個下午茶。

沙嗲牛肉拼回鍋肉米粉 ($25)
大大碗雙拼粉麵自選兩個餸，沙嗲牛肉都算多，味道都係咁，不過回鍋肉就無肉齋筍，一般啦。

司華力腸拼西多士 ($24)
雖然西多士係半份，但司華力腸係一整大條，份量驚喜。最鍾意西多士中間花生醬夠多，加埋牛油同糖漿，真係好味。司華力腸都唔係普通貨色，外皮煎得脆脆，咬到卜一聲裂開，味道都足夠。

呢間茶記價錢正路，最抵食就係套餐可以任揀冷熱飲品，變相慳三蚊冰錢，而飲品都係正常質素。食物資素都係差唔多，不過一定比一般茶記更乾淨企理。

領匯商場大翻新後，食肆都變得高格調。餐廳無左個「茶」字，地下係乾爽清潔嘅﹔無左一張、右一張、上一張、下一張嘅落單紙仔。坐嘅再唔係摺枱、摺櫈﹔而係高椅背大木椅，配白色長方形闊落大枱。餐牌仲印埋彩色寫真、有色彩、有排版、File得整整齊齊嘅一大本硬皮書﹔再見唔到老闆親書，但霉到阿媽都唔認得嘅手寫是日特餐紙。幫你落單、送餐嘅侍應們，再唔係著住疑似白色、但染滿一笪笪豉油色嘅衫、耳背晾住枝原子筆嘅伙記大叔﹔取而代之，係穿上一身整齊黑色制服，態度溫和有禮貌嘅妙齡小姐。

完全擺脫舊式那渣茶記嘅影子，換來一種類似小西餐廳嘅風格。作為希望食好野嘅人，就覺得無壞嘅，餐廳整齊企理，始終心理上會食得安心一啲。但犧牲了一點，所謂嘅傳統同集體回憶。

霎時感動。港式越南風味

越式工房@鑽石山
1/4/2012 18:30

早前喺集購城買左兩張$19套餐券，食品未兌換，集購城就疑似執笠，拿拿聲用埋佢，費事變廢紙。此店係一間開喺新蒲崗工廠區嘅小餐廳，團購$19包括一個星馬泰越湯粉，加特色小食，仲送埋飲品，真係超平。

泰式燒豬頸肉配越式魚露撈凍檬
(編按﹕賣相似乎唔錯，但其實係本人自把自為執過靚位，佢原裝係超混亂的)

各式粉麵係任選的，由湯底、餸菜到粉麵類型，每項都有成六、七個選擇，自由度十足。主角選擇左泰式燒豬頸肉，大約有五薄片，配上生洋蔥、生菜絲、蘿蔔絲、芫茜等材料。泰式燒豬頸肉非常乾柴，肉味欠奉、燒烤味亦不足，非常麻麻。撈凍檬嘅主角係魚露汁，呢個汁偏重鹹味，酸辣味薄弱，似乎真係以魚露為主，但個人都係比較鍾意酸到喊嘅酸辣汁多啲。

越式香茅豬扒配新加坡喇沙湯金邊粉
香茅豬扒幾鬆化，但香茅味唔明顯，同一般豬扒分別唔大。豬扒配上少許芽菜同半隻白烚蛋，加上一個淡而無味，扮喇沙湯又扮得唔似嘅湯底，非常一般。惟一可取嘅係，金邊粉夠幼滑煙韌。

越南春卷、米網春卷

(編按﹕餐牌所寫係米綱春卷，米綱係乜? 真係有啲迷茫)

每個套餐都包括兩件小食，選揀左兩款唔同嘅春卷，但食落兩個春卷嘅材料都差不多，找錯處都找唔到分別。材料大約有蘿蔔絲、越南粉絲、木耳絲等。只係炸皮唔同，一款係有米綱，一款係有越南。不過兩款都相當鬆脆，口感唔錯。沾醬係有甜、有酸、有辣嘅甜酸辣醬，味道唔錯，好過鹹魚露。

越南扎肉蒸粉包 ($22)

(編按﹕餐牌所寫係「越南扎肉只蒸粉包」，究竟「只」代表咩? 係「扎肉只」定「只蒸」?)
散叫自加嘅蒸粉包，$22有三細件。扎肉味道唔錯，肉質爽滑、肉味濃郁。但下面嘅蒸粉包就唔太得，粉皮超厚，餡勁少，只得少許蘿蔔絲同木耳絲，味道麻麻。配汁又係鹹魚露，加得太多，真係會過鹹。

計埋團購優惠同另加散叫小食，此二人餐共合$62，價錢平，質素合符比例，都係平價質素，正價話要百二蚊，真係唔洗旨意，何況位置又咁吊腳。 小店集星馬泰越菜於一身，所以一碗粉係可以包含多國元素，但可惜風味不足，只齋係港式。

不過黎呢度食飯，的確有一點感動。感動在於，該團購網疑似執笠，小店仍然肯繼續兌換優惠，替一眾苦主減少追討金額，那怕只值十九大元。呢十九大元，唔只為小債主們飽腹 (雖然份量唔多，其實唔係太飽)，仲為大家帶來一點希望、盼望，期望手揸緊果一千幾百蚊廢紙，以及似有還無嘅爛鬼積分，有朝一日將會恢復佢嘅原有價值。雖則唔知小店係唔係未收到風團購網死左，定係真係咁大方、又唔介意冒險招呼團購客，都值得俾個Good佢，係「Good Luck!」，祝佢收得齊條尾數。

酥記豬扒。賣麵不賣飲

東記上海麵@大埔
24/2/2012 13:00
2/3/2012 13:00

24/2/2012 13:00

生活喺大埔，係一件好值得高興嘅事，因為左右附近都有出名好食嘅餐廳。就近嘅大埔新街市熟食市場，已經有好幾間有能力吸引區外人士特登黎搵食嘅人氣名店。其中一間係專做豬扒、雞翼上海麵嘅小店。

豬扒拼菜肉雲吞幼麵 ($25)
此店菜單少到可以隨時背出黎，獨沽兩味，一係豬扒，一係雞翼。$25雙拼粉麵任選豬扒或雞翼，加配炸菜肉絲、雪菜肉絲、竹筍肉絲、牛丸、牛筋、牛腩、炸醬或者菜肉雲吞。亦都可以要淨豬扒、或淨雞翼，再唔係就豬扒拼雞翼，以上就係全個餐牌。

酥炸豬扒永遠都係隨後送到，因為係新鮮即炸。豬扒有肉有骨，大大塊，任何時候黎食都一定係酥脆到爆。外皮炸粉薄薄地，最欣賞佢炸得乾身，香口唔油膩。脆皮之下就係軟腍腍嘅啖啖肉，肥瘦適中，脂肪位更加嫩滑多汁。豬扒除左有甜甜嘅肉味外，仲加左唔少調味料，味道濃郁入味，蒜味特別香，惹味程度拍得住某大大雞扒。不過超級酥脆嘅代價，就係頂級熱氣，食到咁上下，惟有要浸下湯解熱，再唔係就即刻飲涼茶。

題外話，之前試過炸雞翼都唔錯，一樣新鮮熱辣，勁juicy夠味，不過個人都係偏愛炸豬扒多一點。

老實講，黎呢度食，真係志在豬扒或雞翼呢兩位主角，其他配料都係用黎送下麵。不過幾款材料之中，菜肉雲吞都有唔少支持者。一碗有四粒，雲吞皮夠薄，有菜、有肉，內餡粉粉腍腍，調味適中。而幼麵都幾彈牙煙韌，仲係咁易有多條菜，廿幾蚊碗真係抵食。

熟食市場有兩間都係靠豬扒、雞翼麵打響名堂嘅食肆，據講係出自同一世家，只不過係兄弟分開做。兩家都試過，感覺上都係呢間東記略勝一籌。只不過有時人太多，或者東記唔憂做放大假，都可以去對面嘅世記止下痕。

值得留意，此店只賣麵，不賣飲。勁熱氣要飲野的話，隔離舖仔會主動兜搭，一杯大約十零蚊，感覺上唔太抵，我會選擇落7仔買好過。同埋，要知道此店嘅潛規則，當食物到齊後，要即時俾錢，以防走數。

後記
2/3/2012 13:00

今日又黎幫襯，要試多次個雞翼做番個記錄。

 

雞翼拼菜肉雲吞幼麵 ($25)
東記另一個招牌就係酥炸雞翼。一份有四大隻，的確，隻隻都係非常大隻，絕對唔係雞仔。雞翼同豬扒一樣，外皮超脆，薄皮之下係啖啖肉。雞翼剛好熟透，肉質非常嫰滑，醃得入味，雞汁不停滴出。呢款雞翼無豬扒咁熱氣，食多幾隻都唔怕，真係試得過。

舊區新店酸辣麻

臻味豬扒酸辣米線@觀塘
19/2/2012 13:30

觀塘舊區就黎重建，好多老店舊街都會消失，所以趁得閒真係要黎行下。唔行唔知，原來呢區有唔少雲南米線專門店，呢間臻味仲係新開無耐，人流都唔少，一於去試下。

肥牛酸辣米線 ($29)
原來酸辣米線都幾豐富，份量又夠多。除左有唔少片肥牛之外，仲有青蔥、香芹、芫茜等，此店嘅酸辣菜更係自家醃製，而花生就特別好食，因為入口仍然香脆可口。清湯底之中，加入酸辣材料，入口酸咪咪，酸得黎好開胃、唔涸喉，而辣味係輕微嘅麻辣，食落好刺激，越食越上癮。除左湯之外，米線都煮得唔錯，起碼唔會過腍，仍然保持到煙韌滑溜質感。主角肥牛係一般火煱用肥牛片，始終半肥瘦、薄薄一片，口感唔會差。牛膻味配酸辣，感覺唔錯。食完酸辣米線之後，成個人暖晒。

秘製豬扒蕃茄湯米線 ($33)
此店招牌秘制豬扒超大件頭，更加係新鮮即炸，即使浸入湯之中，入口仍然有輕微香脆感覺。連骨豬扒有蜜糖甜味，肉質非常鬆軟唔嚡口，肉嫰多汁亦唔油膩。加三蚊選配左蕃茄湯，湯底甜甜酸酸，有唔少新鮮蕃茄肉，同超級粉腍嘅白烚薯仔，味道都足夠，但始終不及紅磡蒙麵咁濃郁。

新開餐廳仔，人氣已經好鼎盛，米線款式都唔少。一向少食雲南米線，食過之後，發覺酸酸辣辣其實幾開胃，好容易食上癮。每碗粉麵廿幾三十鬆嘅價錢，大大碗，食完包飽。怕辣的話，仲可以半價柯打飲品，一個豐富午餐，都唔洗四十蚊。不過老實說，翻轉頭機會應該唔高，因為呢條街附近仲有好多間雲南米線舖，要食的話，不如逐間試勻罷啦。

偏見劣食﹕青瓜撈麵

大家食@油麻地
2/12/2011 13:00

午餐只食個第一腸， 當然唔夠飽。記得早前貪平買左兩張大家食團購券，立即去食埋，填飽個肚先算。平，的確係平，只需$14，就有一客招牌炸醬撈麵，再加埋一杯冷熱飲品。

$14一客，份量唔少，一大碟撈麵，一大堆花生，超多條青瓜，炸醬豬肉碎呢埋喺麵同麵之間。一向勁憎青瓜嘅本人，聞到青瓜味真係頂唔順。而每條青瓜粗度十足，份量超多，可能比M記中裝薯條更多。好衰唔衰仲要撈埋落個麵度，要一條一條夾走都幾花時間。

除去青瓜呢個敵人後，出現番一碟我接受得到嘅炸醬麵。麵係煙韌嘅，亦唔會過腍。肉醬係好味嘅，粒粒豬肉碎調味適中，亦夠惹味，濕潤度剛好，唔覺得太油膩。再加埋香脆花生，其實係一個唔錯嘅配搭。
但...點解? 點解青瓜嘅味道仍然陰魂不散...一陣陣嘅草青腥臭味...噢! 撈!
就係呢幾十條青瓜，破壞晒成碟撈麵，所以我俾劣評。編按﹕我係有偏見!

如果你愛青瓜，相信你會愛死呢碟撈麵。講完。

只可食喇沙的星泰餐廳

星泰真味 @大埔
25/11/2011 13:30

是日午飯時間去左大埔中心，碰上一田百貨瘋狂勁減，人山人海得更瘋狂，搵食艱難。

最後見到一間星泰餐廳有位，拿拿聲入去開餐。

香茅豬扒喇沙湯檬+凍奶茶 ($37)
湯粉比想像中大碗，材料亦唔少，豬扒竟然俾足三大塊，仲有其他配菜，幾足料呀!
豬扒浸入湯中，都食唔出係唔係香茅，但豬扒明顯煎過，外皮焦香。豬扒肥瘦適中，仲係肉帶骨，入口軟嫰，而且醃得入味，好香蜜糖同蒜味，味道甜甜地，好開胃。
湯底色水偏黃，椰香味道濃郁，少少辣度正好夠醒胃。最愛熱辣辣嘅喇沙湯底襯檬粉，粉撈湯一啖食，正! 檬粉煮得剛好，但略嫌剪得太過細碎。配菜仲有好多芽菜、豆卜、魚片同半隻熟蛋，豆卜吸收晒喇沙湯汁，一咬就唧晒入口，至係精髓所在。

午餐三十七蚊，正常質素，價錢合理，普普通通一間茶記嘅午餐都係咁上下。
睇埋下午茶餐牌，好似大約二十幾蚊有交易。
但睇番開飯網評，好多人都俾喊臉，似乎炒飯類型係地雷，可避則避。

是但UP係咁啦之土瓜灣麵食

輝香園茶餐廳@土瓜灣
20/11/2011 13:00

筍網話用$14買到一碗湯粉麵，配油菜再跟餐飲。求其買左兩張，趁星期日去開土瓜灣快快脆食左先。

牛腩麵、雲吞河、蠔油生菜、腐乳通菜

牛腩麵賣相唔太得，一睇就覺得啲牛好瘦好嚡，連一絲絲嘅纖維都睇得清楚。食落都一樣，瘦肉部份又韌又嚡，勁痴牙。只有少量部位有啲脂肪，腍左丁點，幼麵無乜特別，湯底亦普通。

雲吞好一般，有啲一般爽嘅蝦咁啦。河粉唔算滑，又係一般咁啦。
油菜正常新鮮程度，最叻就係啲醬落得夠多，唔孤寒咁啦，啲腐乳幾夠味咁啦。

成餐飯，都係咁啦。唔想多講，是但hea up。因為佢都係無乜誠意，樣樣野都係咁啦，所以我都hea俾佢，而呢篇文章嘅hea度係同食物嘅hea度同等。話晒土瓜灣北帝街，算係繼九龍城之後嘅另一條食街，唔該你俾番多少認真，如果唔係就係咁先。

棟篤笑住食

棟篤食@土瓜灣
13/11/2011 12:30

一個超勁嘅團購，一個朝早極速賣出過千張，再徇眾要求，特別加推六千張。因為夠平，只需$20即可享用蝦子麵一人餐。套餐包括一款麵食，一客上湯餃子，仲送埋冷熱飲品。

招牌蝦子撈麵
用細鑊仔裝住，但唔覺得同用碟裝有咩大分別，只係得意。一碟份量唔太大，蝦子夠覆蓋晒成個麵餅。幼麵夠乾身算幾煙韌彈牙，有少許鹼水味。蝦子幾有鮮味，但唔夠乾脆。整體黎講，只係一般，可能食慣左劉記嘅出品，總覺得其他蝦子麵麻麻地。

沙嗲肥牛撈麵
幼麵配白灼肥牛片，加沙嗲汁，簡簡單單，味道唔錯。幼麵都係咁，但幾欣賞沙嗲汁係濃烈厚身嘅醬汁，夠味之餘，配合白灼肥牛味道剛好。

白菜冬菇豬肉餃、雞軟骨餃
餃子細細粒，餃子皮比一般嘅水餃皮薄身，但非常滑溜煙韌，不錯。其中一款內餡似一般菜肉餃，無太大吸引力。另一款係雞軟骨，內餡有碎碎嘅軟骨、紅蘿蔔、木耳、馬蹄等，充滿蔬菜嘅甜味。
值得一提佢嘅餃子湯底，並唔係一般嘅清湯，顏色略深，似係海鮮豬骨湯，再加麵豉味，好有日本風味，而且飲完唔口渴，非常好。

店名夠特別，期望生意好到客人唔介意無位坐都要爭住食。背景唔少野，麵係來自香港四十幾年老牌麵家明豐粉麵廠。二十蚊一個麵餐，真係無乜要求，樣樣都OK。正價一個麵或者一客八件餃子，每款都只係二十零蚊，可以試下。