粟米班腩飯以外嘅選擇，殺你呀

Saizeriya Italian Restaurant
28/3/2016 13:30
26/12/2013 14:00
31/7/2011 13:00

28/3/2016 13:30 @紅磡

白汁野菌雞肉雲吞 $29
雲吞不錯，熟成度剛好，白汁加左洋蔥、芝士粉等，幾忌廉咪，野菌落得夠多。

野菌忌廉意粉 $27
醬汁同前者一樣，正常

水牛芝士比薩 $29

茄醬唔算多，比較淡口，但芝士就落得好重手。

肉醬多利亞 $27
肉醬好味，撈飯一流。

26/12/2013 14:00 @荃灣

31/7/2011 13:00 @荃灣
一個唔知點讀嘅名，係荃灣區出名平靚正嘅意大利餐廳。
星期日中午，一行五人，等位係指定動作，唔超過三十分鐘已經唔錯。

地中海海鮮比薩 ($32)
九吋比薩口感同味道有別於平時食嘅港式薄餅。比薩唔算厚底，但亦唔薄皮，稍為少少脆但較為煙韌，切起黎有點吃力。一般嘅比薩就好似扁左麵包咁鬆泡泡，蛋味較濃。意式比薩小麥味道好香，亦感覺到發酵過嘅風味。比薩面層舖滿煙三文魚、蝦、魷魚，仲有豐富嘅芝士。材料夠新鮮，芝士味濃郁，但稍為結實，做唔到拉絲效果。如果溫度更高，芝士融化得更徹底，相信會食得更開心。

吞拿魚比薩 ($28)
材料充足，每一啖都食到吞拿魚，配上蕃茄醬，酸酸甜甜好開胃。呢款芝士比較重手，味道濃郁，好滿足。

地中海海鮮焗飯 ($28)
出奇地以鐵板上菜，飯面舖滿青口、蜆仔、蝦同魷魚圈等，$28有如此新鮮、豐富嘅材料，真係超驚喜。用鐡板焗令飯有些少焦硬，要撈埋蕃茄汁一同進食。蕃茄汁正有開胃嘅酸味，食欲大增。

香辣雞翼 ($30)
雞翼係餐前小食最佳選擇，雞翼烤焗到金黃色，有刺激惹味嘅辣道，肉質嫰滑，肉汁豐富，小食黎講已經好唔錯。

卡邦拿意大利粉 ($24)
卡邦拿最必要嘅蛋味好充足，味道亦夾雜左雞湯同酒嘅香味。意粉韌度適中，煙肉略嫌煎得未夠香口。芝士味同忌廉口感應該要加倍，惟有自行加芝士粉，撈一撈，搞一搞，豐富一下。

餐廳大，職員不多，客人請自動波。自助型式，冇人幫你斟茶遞水，所以無須加一服務費。
每樣料理，包括九大吋比薩都係大約三十蚊。廿幾三十蚊一款，請唔好要求大大碟上菜。雖然味道講唔上極之好味，但至少合格有餘，性價比係超高。

澄清一點，今次冇用團購。冇任何優惠之下，人均消費只$29。勿論今餐係唔係正宗意菜，但只用一個粟米班腩飯嘅價錢，食到質素OK嘅料理，我都冇說話好講。

一個唔知點讀嘅名，因為試過味道，食過滿意，抵到爛，所以之後請記得佢，佢叫「薩莉亞」。

KFC新餐

KFC@馬鞍山
27/3/2016 18:30
20/8/2015 20:30

27/3/2016 18:30

大阪燒脆雞雞皮本身係脆辣雞走辣版，上面加左大阪燒汁、清新沙律醬、木魚片。二人餐優惠$65。

20/8/2015 20:30

上回講到，食完餐好睇好食但唔飽嘅，要搵宵夜。見2185個0嘅出左新包...(包??) 就當宵夜食啦。一個雙層雞扒軍艦餐$36.9，有一個雙層雞扒軍艦、墨西哥脆脆配特濃芝士醬、同中汽水。

兩塊家鄉雞扒夾住煙肉同芝士，賣相一定唔及廣告咁靚，份量細細舊。兩塊雞扒都足料嘅，新鮮熱辣，好多汁，味道都係咁啦。芝士同煙肉，再加埋沙律醬，味道係正常，但入口好膩，真係唔洗多食。

嘉樂冰室澎湃早餐

嘉樂冰室@荃灣
27/3/2016 10:30

火腿小奄列 $29
真係好澎湃，蛋、火腿粗切份量勁多。

雞絲湯米 $29雞絲醃過幾入味，米粉量多得驚人，二人分享都夠飽肚。

炸鮮蝦雲吞 $34非常足料，隻隻脹Bok Bok，蝦好大隻，仲好好新鮮勁彈牙，非常好味。

紅豆冰 $20
紅豆好大粒、好甜，不錯

土瓜灣其實好韓國

仁沙洞@土瓜灣
26/3/2016 13:00
5/8/2012 13:00

26/3/2016 13:00

韓式咖喱豬扒飯 $42

豬扒好脆，唔油膩。咖哩微辣幾香，不錯。

烤豬肉飯 ($38)

5/8/2012 13:00

土瓜灣作為為食之城九龍城嘅伸延地區，近排越來越多好野食。睇住呢間仁沙洞開左咁耐，每次只見全場爆滿，都未曾成功入過去。難得今日行過見到有位，當然把握機會去試一試呢間出名平、靚、正、又地道嘅韓國餐。午市時間提供十多款套餐，價錢三十多幾蚊，有前菜仲有湯，加五蚊雞就跟埋汽水，抵。

烤豬肉飯 ($33)
前菜有泡菜同薯仔，泡菜味道比一般的濃烈，少辣帶酸味，幾開胃。而薯仔粉粉腍腍好鬆軟，香甜嘅醬汁已經完全滲入薯仔中間，超級入味。另加一碗蘿蔔清湯，清甜唔油膩，正好解辣。
主菜選擇左烤豬肉，份量一啲都唔少，半大碟白飯，伴上半大碟餸菜，絕對夠送飯。豬肉片用上唔少洋蔥、紅蘿蔔、椰菜等，加上韓式甜辣醬炒香，香味撲鼻，未食已經流口水。熱辣辣嘅豬肉甜中帶少辣，醬汁味道濃郁，配飯一流。

牛肉雜錦飯 ($35)
另一款選擇牛肉雜錦飯。飯送上時，職員已二話不說，起勢勁唧韓式甜辣醬，再出盡力狂撈。上菜加送撈拌食物，正係韓式料理常見嘅餐前表演。都係果句，食韓國飯最緊要識撈，有專人服侍，用最正宗嘅方法呈現，食物不其然變得更好味。從撈到亂晒龍嘅飯之中，見到材料都相當豐富，有唔少芽菜、紅蘿蔔、翠玉瓜，再加上牛肉碎同太陽蛋等。撈勻之後，所有材料同醬汁融為一體，夾雜香甜微辣嘅味道，真係好惹味。唯一不足之處係，飯似乎比較濕潤而且唔夠熱，不過夏天大熱天時都還好。

開業兩年多，一間由韓國人經營嘅小餐廳，由裝修到食品，都極有韓國地道小餐館風味，實在好韓國。食物吸引，而且價錢超抵，真係值得繼續支持，推薦的說。

Euro go go

Euro go go@沙田
25/3/2016 15:30

黎沙田食下午茶，試下Euro Gogo簡單快捷。

  

三式薯皮 $42
有煙肉芝士、蒜香雞、吞拿魚，焗得幾香，配料都幾多，加茄汁唔錯。加$9跟餐茄湯通粉，但比較淡口。

法式薯蓉焗田螺 $40薯蓉好軟綿

千島海鮮Pizza 半份 $45
醬料夠多，海鮮落得足料

麵屋龍

麵屋龍@佐敦
16/3/2016 12:00

團購買到$58拉麵套餐。套餐包括一碗拉麵、三隻餃子、一罐罐裝飲品，都幾抵食。

札幌味噌拉麵

味道幾香，唔算太咸，都叫可以。配料好多芽菜、粟米等。拉麵條正常，叉燒較為鞋口，溏心蛋賣相唔錯，但唔夠入味。餃子反而驚喜，外皮幾脆，內餡幾鮮甜。

豚骨拉麵

湯底有輕微豬骨味，但唔算濃。

花城匯艾薯

艾薯 Mr. & Mrs. Aysh@廣州花城匯

16/3/2016 

 

太古美食廣場

美食廣場@太古
15/3/2016 14:00
6/3/2016 13:00

Food Republic 15/3/2016 14:00

@Pepper Lunch

@番滿門

香酥雞扒炒蛋意大利麵
估唔到番滿門會進駐美食廣場。今次揀微辣湯底更加惹味，炒蛋一貫好味。雞扒炸得香脆，唔油膩，仲有泰式辣醬，好味。

Apita  6/3/2016 13:00

@ 神戶北之板

咖哩漢堡飯

跟粟米忌廉湯、沙律。漢堡幾鬆軟多汁，咖哩係典型日式備甜咖哩。

@ 橫濱麵大將

味噌湯拉麵加蛋配迷你叉燒飯定食 $60
湯底夠濃味，拉麵係普通貨色，叉燒幾夠腍。叉燒飯可以，但醬汁唔夠。

Cafeholic@沙田

Cafeholic@沙田
2016/3/13 15:00

黎沙田食下午茶。呢間應該幾闊落，坐得幾舒服。叫左幾份下午茶餐。

卡邦尼煙肉忌廉扁意粉 $54

賣相幾討好，忌廉汁做得唔錯，芝士味濃，食落唔算膩。扁意粉煮得剛好，唔太腍。配料有煙肉等，整體味道唔錯。

忌廉茄醬芝士雞肉意粉 $48

賣相更加吸引，醬係番茄醬做底，再加上忌廉，所以比一般紅醬甜，亦更香。芝士落得重手，所以做到拉絲效果，味道更佳。雞肉都算多，味道正常，整體唔錯。

香煎雞扒煎雙蛋厚多士配湯長通粉 $42

黑松露碎蛋沙律法式多士 $42

港島尋食名不虛傳明星式雞扒

榮式燒雞扒@北角

2016/3/8 14:00
2011/12/25 13:00

2016/3/8 14:00

雞藕天成 $48

試番上次驚為天人嘅雞藕飯。雞扒食舊好味，外皮香脆，雞肉嫰滑鬆軟，調味恰到好處非常惹味。藕餅都係煎得香脆，口感爽脆好味。


2011/12/25 13:00

聖誕節放假繼續周圍蕩，今次選擇去港島冒險。由北角開始向中環方向進發，唔搭車、邊行邊食，黎一個蕩失路之旅。第一站先去北角食個飽飽，選擇左港島嘅明星食肆，榮式燒雞扒。一個碟頭飯跟飲品，索價近四十蚊，仲要大排長龍，有幾吸引? 真係要試過先知。

榮式燒雞扒拼烤豬頸肉飯、飲品 ($39)
黎到呢度，叫招牌雞扒係指定動作，第一份叫左雞扒拼豬頸肉飯。一大碟飯，一件雞扒，四片燒豬頸肉，仲有些少配菜。雞扒睇落同一般煎雞扒分別唔大，長長扁扁薄切一塊，惟一係多左幾條凹凸坑紋，始乎係放喺電爐黎個板燒。雞扒外皮呈金黃色，邊位微微燒焦，賣相相當討好。急不及待大口一咬，先發現魔力來源。原來金黃色嘅雞皮非常香脆，今餐就放縱一下，千萬唔好計較卡路里或膽固醇，一定要連雞皮一同送入口。熱辣辣、香噴噴嘅雞扒充滿肉汁，雞肉嫰滑鬆軟又惹味。似乎黑胡椒落得唔客氣，味道濃得黎帶點刺激，非常配合雞皮嘅蜜糖甜味，好有BBQ風味。雞扒都似係即叫即燒，基本上配得起所有「好味」嘅形容詞。但薄薄四塊嘅烤豬頸肉實在給比下去，感覺好普通，完全輪為配角。

配嘅白飯有甜豉油，仲有少許雜菜，最神奇之處，莫過於有菜甫同蔥油，廚師之意當然係希望食客可以用黎撈飯。白飯的確好味好多，咸咸甜甜送飯一流。

雞藕天成﹕ 榮式燒雞扒拼香煎藕餅飯、飲品 ($39)
有創意嘅名字，係食客們熱點名菜，好多人話藕餅仲出位過雞扒。一碟飯有兩大塊藕餅，外皮脆脆地，似乎係半煎炸處理。熱辣辣嘅藕餅食落好鬆脆，有蓮藕味係應份嘅，但估唔到章魚味道都好濃郁。口感好獨特，爽爽脆脆之外，亦感覺粉粉腍腍，相信仲有白蘿蔔、冬菇等材料，唔知有無肉碎存在呢? 味道的確比雞扒更出位，印象更深刻。

成餐飯食得急，食得靜，不過都係出於自願。因為太好味，潛意識控制下不禁一啖接一啖，唔想多講，只想多食。惟一怨言係，飲品真係好差，熱朱古力可以沖到有色但無味，的確厲害。

有人話榮式燒雞扒應該係用炭燒，如果今時今日都仲係用炭的話，先係奇蹟。但係，今日嘅雞扒，無論調味、鎖汁技術都一樣做得好，我已經好滿足。相信日後翻轉頭機會甚高，因為榮哥最近喺佐敦開左一間分店，榮式雞扒再唔係港島人嘅專享美食。早前仲搞埋團購，推介新出嘅雞扒鬆角包，可惜對包類興趣不大，無買到。只希望佐敦店嘅質素拍得住灣仔正店就好啦，咁就可以繼續嘆好味雞藕飯。

後記

完成文章想落標籤嘅時候，下意識打左「榮式」。感覺上，「榮式」同「台式」、「日式」、「泰式」嘅分類差唔多，食物的確有佢嘅獨特風味。但因為唔想賣廣告，所以最後決定屈就下，用番「港式」吧啦。