老夫子港式餐廳

7/7/2019 12:30
老夫子港式餐廳

今日黎到九展做野，中午放飯發現呢間主題餐廳幾得意。老夫子主題，環境非常有趣，周圍都係老夫子主題角色，連枱櫈都有特別製作。

餐廳主打港式美食，同事叫左燒味飯，看似唔錯。我就叫左一碗麵，另加一啲小食大家Share。





柱候牛筋腩麵 $58
套餐跟醃青瓜。牛筋腩麵 非常大碗，超多牛腩，牛筋腩都燘得好入味，非常腍滑。幼麵都相當爽口彈牙，非常不錯。值得一提就係奶茶真係唔錯，原來是用金茶王茶底，今日實在太熱，叫左凍奶茶，味道都茶香味非常濃，相信熱奶茶會更好味。


泰式拼盆 $88
非常澎湃，有四大款菜式，豬頸肉有好香嘅香茅味，燒得好透，邊位微脆，非常惹味。泰式魚飯味道好香，春卷香脆唔油膩，札肉味道不錯。


熱浪芝麻雞翼 $48
四大隻雞翼炸得香脆，外皮脆卜卜，仲有芝麻辣粉，帶微辣好開胃，雞翼仲好Juicy，非常好味。


港式主題餐廳裝修有趣，食物味道都相當不錯，經過附近的話值得一試。

童年回憶＠荔園

荔園流金歲月＠荔枝角
16/6/2019 12:00

今日係父親節，想帶兩老去一啲特別嘅餐廳。好耐之前已Bookmark左荔園，呢度係好多人嘅童年回憶。

環境實在非常值得一影，船仔同過山車都係重點之一。

荔園動物反斗城 $98

摩天輪上有八隻小點心。小龜叉燒餐包、傻豬豬咸水角、雞仔鳳梨酥、天鵝芋角，隻隻都咁得意。味道就正正常常。

炸醬麵 $38
好耐無食炸醬麵，豬肉係片片肉片，甜辣酸炸醬非常好味，麵底本身也不錯。

牛坑腩麵 $38
牛腩份量都幾多，非常腍，非常入味。

淨魚蛋 $45
較實，唔夠彈牙。

酥炸明蝦角 $26

炸得好香脆，唔油膩，中間嘅蝦幾彈牙。

福建炒飯 $88
一般酒樓質素，餸料夠多，味道正常。

野菌紅燒豆腐 $78
份量都算多，大大碟，材料豐富。

路邊混醬腸 $22
賣相就一流，非常有風味，但呢度嘅腸粉認真麻麻地，一口粉，太腍身。

脆脆紅米腸 $32

腸粉都係太腍太粉，中間春卷尚算OK。

乾炒牛河 $78
鍋仔上，本身都好夠鑊氣，牛肉又夠多，調味適中，非常不錯。

餐廳以港式點心粉麵為主，賣相係吸引嘅。造型上都有心思，味道就有好有唔好，價錢又唔算貴，反正都係相機食先，影相係不錯的。

民華餐廳

民華餐廳@太子
21/5/2016 09:00
19/5/2016 09:00

21/5/2016 09:00

餐肉蛋治$18
餐肉俾得夠多，仲幾咸香，不錯。

19/5/2016 09:00

火腿蛋治$18
炒蛋非常靚仔，又夠厚，亦炒得好滑，但火腿薄薄一片，又較為淡口，都算OK啦。

華星冰室

華星冰室
17/5/2016 09:00

15/2/2013 11:00

@旺角
17/5/2016 09:00

鹹牛肉蛋治$22
要食豐富嘅早餐就要食厚厚嘅三文治，賣相相當靚仔。麵包好軟身，華星嘅炒蛋夠厚，亦炒得好滑，蛋香味幾濃，鹹牛肉落得夠多，都算足料，不錯。


@灣仔
15/2/2013 11:00

同澳牛一樣的常餐，滑蛋係好味的，可算不相百仲。
呢度的職員比澳牛更和藹親切，比澳牛多一份悠閒。

港島尋食名不虛傳明星式雞扒

榮式燒雞扒@北角

2016/3/8 14:00
2011/12/25 13:00

2016/3/8 14:00

雞藕天成 $48

試番上次驚為天人嘅雞藕飯。雞扒食舊好味，外皮香脆，雞肉嫰滑鬆軟，調味恰到好處非常惹味。藕餅都係煎得香脆，口感爽脆好味。


2011/12/25 13:00

聖誕節放假繼續周圍蕩，今次選擇去港島冒險。由北角開始向中環方向進發，唔搭車、邊行邊食，黎一個蕩失路之旅。第一站先去北角食個飽飽，選擇左港島嘅明星食肆，榮式燒雞扒。一個碟頭飯跟飲品，索價近四十蚊，仲要大排長龍，有幾吸引? 真係要試過先知。

榮式燒雞扒拼烤豬頸肉飯、飲品 ($39)
黎到呢度，叫招牌雞扒係指定動作，第一份叫左雞扒拼豬頸肉飯。一大碟飯，一件雞扒，四片燒豬頸肉，仲有些少配菜。雞扒睇落同一般煎雞扒分別唔大，長長扁扁薄切一塊，惟一係多左幾條凹凸坑紋，始乎係放喺電爐黎個板燒。雞扒外皮呈金黃色，邊位微微燒焦，賣相相當討好。急不及待大口一咬，先發現魔力來源。原來金黃色嘅雞皮非常香脆，今餐就放縱一下，千萬唔好計較卡路里或膽固醇，一定要連雞皮一同送入口。熱辣辣、香噴噴嘅雞扒充滿肉汁，雞肉嫰滑鬆軟又惹味。似乎黑胡椒落得唔客氣，味道濃得黎帶點刺激，非常配合雞皮嘅蜜糖甜味，好有BBQ風味。雞扒都似係即叫即燒，基本上配得起所有「好味」嘅形容詞。但薄薄四塊嘅烤豬頸肉實在給比下去，感覺好普通，完全輪為配角。

配嘅白飯有甜豉油，仲有少許雜菜，最神奇之處，莫過於有菜甫同蔥油，廚師之意當然係希望食客可以用黎撈飯。白飯的確好味好多，咸咸甜甜送飯一流。

雞藕天成﹕ 榮式燒雞扒拼香煎藕餅飯、飲品 ($39)
有創意嘅名字，係食客們熱點名菜，好多人話藕餅仲出位過雞扒。一碟飯有兩大塊藕餅，外皮脆脆地，似乎係半煎炸處理。熱辣辣嘅藕餅食落好鬆脆，有蓮藕味係應份嘅，但估唔到章魚味道都好濃郁。口感好獨特，爽爽脆脆之外，亦感覺粉粉腍腍，相信仲有白蘿蔔、冬菇等材料，唔知有無肉碎存在呢? 味道的確比雞扒更出位，印象更深刻。

成餐飯食得急，食得靜，不過都係出於自願。因為太好味，潛意識控制下不禁一啖接一啖，唔想多講，只想多食。惟一怨言係，飲品真係好差，熱朱古力可以沖到有色但無味，的確厲害。

有人話榮式燒雞扒應該係用炭燒，如果今時今日都仲係用炭的話，先係奇蹟。但係，今日嘅雞扒，無論調味、鎖汁技術都一樣做得好，我已經好滿足。相信日後翻轉頭機會甚高，因為榮哥最近喺佐敦開左一間分店，榮式雞扒再唔係港島人嘅專享美食。早前仲搞埋團購，推介新出嘅雞扒鬆角包，可惜對包類興趣不大，無買到。只希望佐敦店嘅質素拍得住灣仔正店就好啦，咁就可以繼續嘆好味雞藕飯。

後記

完成文章想落標籤嘅時候，下意識打左「榮式」。感覺上，「榮式」同「台式」、「日式」、「泰式」嘅分類差唔多，食物的確有佢嘅獨特風味。但因為唔想賣廣告，所以最後決定屈就下，用番「港式」吧啦。

茄魔大召集

蕃滿門@大埔
16/7/2012 13:00

今日外出工作完成，趁時間尚早食個靚飯。雖然公司附近都有大把好野食，不過食多都厭，所以一有時間就去大埔中心果頭搵食。早排知道有間專做蕃茄食品嘅餐廳，今日就做過小蛇行遠少少食飯。

特式牛腩西蘭花拼滑蛋蕃茄濃湯意粉 ($39)
一碗湯意粉份量驚人， 一黎到已聞到陣陣蕃茄香味。蕃茄湯底絕對配得起「特濃」二字，湯底除左用茄膏之外，仲加左唔少新鮮蕃茄肉，一碗湯配給到嘅份量相信有一整大個。湯底酸酸甜甜，味道一啲都唔人工化。客人可以選擇唔同程度嘅加辣，加少許辣，湯底更惹味。呢款湯底相信比阿媽靚湯還要濃郁，恨不得一滴不留，清得見底，而且食後唔覺得口渴，絕對真材實料。蕃茄湯底自動配上炒滑蛋，滑蛋炒得滑，配蕃茄食亦係唔錯。鍾意亦可以攪勻湯底，自製蕃茄蛋湯。今個意粉配上牛腩同西蘭花，唔好以為會自動淪為配角，兩者都係OK的。牛腩帶少許筋，煮得夠腍，吸收左蕃茄湯更加好味。而意粉都可以接受，不過見好多人都會選擇長通粉或者螺絲粉，相信可以邊食邊飲湯，會更加滋味。

小店開業無耐，已經得到唔少好評，對於鍾意食蕃茄嘅人黎講，實在不容錯過。當日一點鐘午飯時間人頭湧湧，好彩除左地下一層之外，樓上仲有唔少座位，所以都有唔少團隊係十個十個咁黎，確實勁有人氣。

經典瑞士風

瑞士咖啡室@灣仔
2/7/2012 18:30

團購似乎就黎玩完，唔止優惠越來越少，連啲優惠都越來越hea。今次呢個優惠，只需俾$10團購網賺，就可以去瑞士咖啡室享用晚市全單六折。團購網連set個套餐都慳番，客人鍾意食乜都得，勝在夠自由。

瑞士常餐 ($40)
常餐同茶餐真係無乜分別，呢個常餐包括呢餐廳嘅必點食品瑞士雞翼。套餐仲有牛油多士、火腿奄列、瑞士雞翼公仔麵同熱飲，正價要四十蚊，真係嚇人的貴。
兩塊厚多士烘得幾靚，平均的焦香，外皮脆脆的，中間腍腍的，可惜唔夠鬆軟，牛油又唔夠多。火腿奄列蛋略為乾身，蛋汁未見，唔夠幼滑，不過超多片火腿的確可取。至於名物瑞士雞翼就可以，應有的入味，應有的甜味，可惜雞翼頗為瘦，又可能煮得太耐，肉質幾乾柴仲有少少嚡。餐飲貪得意叫左朱古力立克，不過朱古力味同好立克味都唔夠。

西冷牛扒腸仔配意大利粉洋蔥汁 ($40)
一心諗住試試呢度嘅鐵板餐，但搵勻都唔見，惟有求其叫。牛扒同一般餐廳一樣，醃到無晒質感，得個腍字，味道淡晒。腸仔煎到乾晒，縮晒皮。洋蔥汁都係咁，意粉都係咁。

呢餐嘅質素普通過普通，嚴格黎講，只屬低級茶餐廳質素。正價超過四十蚊，可以話又貴、又難食。只係團購價俾個全單六折，感覺無咁不安。此店惟一可取之處，係六十年代嘅懷舊冰室裝潢，亦可以話係僅有嘅賣點。白色、綠色相隔嘅紙皮石階磚、青咇咇嘅卡位等，確實營造到非八、九十年代嘅風味。最少，難兄難弟，奇哥同寶珠姐食野嘅地方都係咁上下，估計呢個就係六、七十年代經典風情。黎呢度食，志在食氣氛，別無他求。

天上有地下牛

大利清湯腩@灣仔
6/4/2012 14:30

得到阿蘇讚到天上有地下無嘅老字號清湯腩，分店越開越多，竟然都有做團購嘅一日。$38套餐包括清湯腩或咖喱腩配粉麵飯，跟埋飲品，其實價錢唔係特別平，不過試下無妨。小店位於灣仔一條大街嘅後巷位置，唔留心真係搵唔到，人流亦唔多，可能就係做團購嘅主要原因。

清湯腩米、牛骨湯
先講下個牛骨湯，相信黎過呢度食野嘅朋友，一定知道小店牆上貼住唔少張，語帶恐嚇嘅說話「唔飲湯就係你嘅損失」。的確，個人覺得果碗牛骨湯係幾好飲嘅，湯底好清澈，一滴油都無，入口非常清甜順喉，帶有好香嘅牛骨味，雖然咁牛，但一啲都唔油膩，飲完亦唔覺口渴。電視節目介紹過，湯底不含味精，由多種藥材加二百多斤牛熬成，而且仲經過多重隔油，牛味更突出，真正原汁原味。

感覺上，清湯腩米嘅清湯真係比牛骨湯清，牛味稍弱，相信係溝淡左嘅原故。還好，牛腩份量都幾多，夠飽肚。落單時，無特選部位，所以都唔識分佢係咩位置。牛腩半肥瘦，少部份痴筋，肉質紋理非常細密。食落唔韌，非常軟腍，有入口即溶嘅感覺，完全唔痴牙，加埋筋位嘅爽脆質感，又軟又脆。牛腩肉味亦夠濃郁，夾雜左膻味同油脂味。小店話採用新鮮本地活牛，再用秘方調味燉煮足足十二小時，保證入味兼爽口鮮嫩咁話。唔理佢點整，但加埋個吸收晒清湯嘅米粉一齊食，我係收貨的。

咖喱腩飯
咖哩並非什麼印度式、什麼馬來式，只係典型港式咖喱，香辣平衡，無過份香料。只見咖哩上一層紅油，其實有啲驚，但聞落的確好香、好惹味。咖哩汁嘅辣味係可以接受，不至於食一啖，飲一啖水，個人認為辣得正好。沉浸喺咖哩汁嘅牛腩，份量都唔少。不過明顯地，呢碗牛腩比較肥，入口一樣腍滑入味，滲透住陣陣咖哩香。間中仲夾到兩、三件牛根，果種入口即溶、滑嘟嘟嘅感覺，真係引死人。不過可能係紅油壊事，實在過份油膩。另一樣要投訴就係，飯係一半熱、一半凍的，店方實在要留意下。

$38換來一個老字號牛腩體驗，感覺良好。未至於網友所講，出左名就差到無朋友，退步十丈遠，但價錢就繼續狂加。可能幫襯時並非繁忙時間，人少少，咁好彩可以分到正野。可惜，又未至於好食到，好似阿蘇所講嘅世間珍寶咁誇張。唔少網友都會將大利同附近幾間出名嘅清湯腩店比較，睇黎都要夾下行程，搵日去試埋先。

擺脫那渣，茶記不再茶

蘭香閣餐廳@沙田
4/4/2012 14:30

清明節做完應做嘅事之後，非常肚餓，去左沙田搵食。新城市廣場每逢假日都人頭湧湧，被內地豉油行人士攻佔晒，所以要避走旺區，轉戰附近嘅屋邨商場，搵到一間幾企理嘅茶記，食個下午茶。

沙嗲牛肉拼回鍋肉米粉 ($25)
大大碗雙拼粉麵自選兩個餸，沙嗲牛肉都算多，味道都係咁，不過回鍋肉就無肉齋筍，一般啦。

司華力腸拼西多士 ($24)
雖然西多士係半份，但司華力腸係一整大條，份量驚喜。最鍾意西多士中間花生醬夠多，加埋牛油同糖漿，真係好味。司華力腸都唔係普通貨色，外皮煎得脆脆，咬到卜一聲裂開，味道都足夠。

呢間茶記價錢正路，最抵食就係套餐可以任揀冷熱飲品，變相慳三蚊冰錢，而飲品都係正常質素。食物資素都係差唔多，不過一定比一般茶記更乾淨企理。

領匯商場大翻新後，食肆都變得高格調。餐廳無左個「茶」字，地下係乾爽清潔嘅﹔無左一張、右一張、上一張、下一張嘅落單紙仔。坐嘅再唔係摺枱、摺櫈﹔而係高椅背大木椅，配白色長方形闊落大枱。餐牌仲印埋彩色寫真、有色彩、有排版、File得整整齊齊嘅一大本硬皮書﹔再見唔到老闆親書，但霉到阿媽都唔認得嘅手寫是日特餐紙。幫你落單、送餐嘅侍應們，再唔係著住疑似白色、但染滿一笪笪豉油色嘅衫、耳背晾住枝原子筆嘅伙記大叔﹔取而代之，係穿上一身整齊黑色制服，態度溫和有禮貌嘅妙齡小姐。

完全擺脫舊式那渣茶記嘅影子，換來一種類似小西餐廳嘅風格。作為希望食好野嘅人，就覺得無壞嘅，餐廳整齊企理，始終心理上會食得安心一啲。但犧牲了一點，所謂嘅傳統同集體回憶。

豪邁大啖吔丹麥鐵三角麵包

丹麥餅店@銅鑼灣
10/4/2011 13:00
18/3/2012 14:00

10/4/2011 13:00

一間傳統懷舊嘅餅店，賣緊大家童年時候嘅早餐食品。

 

熱狗 ($8)

一隻熱狗可以有幾好評?

長長地嘅豬仔包焗到熱熱。同西式嘅熱狗唔同，港式熱狗唔用芥末醬，改為一邊塗牛油，另一邊塗沙律醬。再加上一直喺爐邊烤緊嘅香腸，夾一夾，整個熱狗大功告成。食一啖就知，原來真係好味。首先新鮮即製一定唔會難食得去邊。再者麵包非常之鬆軟，仲有大陣甜甜嘅麵包味，係最香甜嘅餐包味道。熱力更將牛油同沙律醬溶入包中，最後配上熱辣辣、有肉味嘅香腸。一個得麵包、醬汁、香腸三個咁簡單嘅食材，已經集合晒所有好味嘅元素。

炸魚柳包 ($12)

麵包一樣焗到熱熱好鬆軟，魚柳炸得鬆脆，唔油膩。魚柳好新鮮，食到魚柳鬆軟嘅質感。茄汁同沙律醬同時出現，兩款醬汁加埋就係最原始嘅味道。食左呢個包之後，就覺得乜記物記已經唔入流。

每個包都只有好簡單嘅三個元素，冇任何生菜、酸瓜等配料， 係最原始、最簡單、亦都係好家庭式嘅風味。十蚊八蚊一個做下午茶或小食，係唔錯嘅選擇。妮啲思&鄭淘文，請大啖大啖食，啲汁流晒出黎先至過癮。

後記
18/3/2012 14:00

黎得銅鑼灣，唔想食太heavy，食個包包就最岩，今次一於試埋炸豬扒包先得。

炸魚柳包 ($13)
魚柳一樣咁新鮮，熱辣辣，脆脆地，配酸甜嘅醬汁真係好味。

豬扒包 ($13)
今次試埋好評嘅豬扒包，感覺上同澳門嘅唔同。包係鬆軟香甜嘅餐包，豬扒經過油炸，外皮脆脆地，肉質鬆軟，配上沙律醬同茄汁，係非常簡單，家庭式嘅包包。感覺上魚柳包更好味，因為豬扒味道較淡，肉味欠奉，被沙律醬同茄汁嘅酸甜蓋過。算啦，平平地，無計。

食呢個包，真係有啲捩(口棄)。首先，包係必須外賣拎走，好大機會係邊行邊食。醬汁同油喺雞皮袋滲出，食完之後成手油腍腍。不過好味無計，儀態不顧，大啖吔吧啦。

這裡是紅磡，這裡有港包

時新快餐店@紅磡

12/2/2012 12:00 

近排成日講集體回憶，黎到紅磡，最好味嘅回憶，應該就係時新嘅包包。不知不覺間，開飯網好評已經直迫八百個，人龍仍然不減。闊別一年嘅好味包包，我又黎啦! 正午十二點時份，興幸人唔多，店內仍然有位坐。

食開時新包包嘅人都知道，漢堡包選擇其實唔多，黎黎去去都係一塊定雙層漢堡，有蛋定無蛋，加定唔加芝士，而醬汁就可以選擇沙津汁，蕃茄汁，咖哩汁或黑椒汁，係好簡單，完全Tailor-made嘅設計。

雙層漢堡蛋包 ($16)

雙層芝士蛋漢堡包 ($18)

等餐時間約十五分鐘，因為每個包包係新鮮即製。廚房傳出黎嘅香味，同煎漢堡嘅滋滋聲就可以證明一切，包保熱辣辣。包包份量十足，高度亦十足，但當然要毫不保留，不顧儀態地，一大啖咬落去，先至可以感受到果種滋味。

包包用上嘉頓麵包，輕輕焗過，所以麵包更加鬆軟，亦有微脆感覺，好香芝麻味。圓圓厚厚一塊自家製漢堡，就係俘虜一眾為食貓嘅靈魂所在。漢堡扒外層煎得焦脆，入口非常鬆軟，軟腍得黎亦帶點肉筋嘅煙韌。肉味濃，充滿住洋蔥嘅香甜，肉汁澎湃到流晒出黎，直情睇到肉汁喺纖維之間流動。

蛋外皮煎得香脆，蛋黃仍然保持半熟嘅溏心狀態，感覺更加幼滑。加埋自家調製、味道微酸較稀嘅沙律汁，就係美味嘅來源。加多兩蚊，多一塊芝士，都係抵嘅。因為芝士係完整嘅一大塊，唔會好似乜記，睇落完整，原來切割技巧高超，實質得半塊。芝士係綿上添花，令漢堡多一分濃郁感。

第二次品嚐時新漢堡包，雖然價位微漲左一蚊，漢堡扒稍為縮左啲啲，但美味不減。每食一啖都有發自內心嘅滿足感，只想繼續一啖接一啖。

漢堡包只不過係一個包，一塊漢堡扒，一隻荷包蛋，一片芝士同一pat醬汁嘅配搭，任何西餐、快餐、小食店，甚至住家都可以輕鬆製作得到。但點解時新仍然有咁多人支持，好評不斷增加? 食過嘅朋友自然會知，果種美味並唔能夠用筆墨形容。更何況除左滿足口腹之欲外，時新嘅港包仲包含左港人對「香港第一個漢堡包」嘅認同與支持，係真正屬於香港人嘅包包。可能呢啲集體回憶，正正為包包加添多百零二百點人情分。呢種羈絆先至係漢堡包最好嘅調味料。

前篇參考

20/3/2011

充滿港式風味，百分百香港人嘅漢堡包

豉油痕燒味

廣東燒味餐廳@旺角
4/12/2011 13:00

廣東燒味開到油尖旺區通街都係，團購 $23可以有雙併燒味飯加例湯或飲品。對佢完全無期望，只求廿幾蚊食得飽肚。

叉燒燒鴨飯、叉燒油雞飯

出奇地，兩碟飯同一時間送上，但賣相可以差咁遠。

叉鴨飯，色水正常，排得靚靚，可算係正常吸引。叉雞飯啲叉燒毫無血色，白雪雪，啲雞皮黃到好似染左色，左一舊又一堆，非常混亂。

左邊嘅叉燒一號，肥瘦適中，瘦肉部份比較硬實，有少許脂肪就鬆軟好多，亦鍾意有少許燒焦嘅邊位。味道普通，蜜味唔夠，中規中距，好普遍一舊叉燒。而右邊果碟嘅叉燒二號，非常大舊，全瘦超乾柴勁嚡，一滴蜜汁或肉汁都唧唔出，齋叉燒仲好食過佢。

燒鴨其實有啲肥，脂肪同皮仲厚過舊肉，好肥膩下。鴨肉本身無乜味，但層皮嘅味道超濃超咸，毫無香味可言。 

黃油雞，皮肉正常分佈，肉都夠滑，但無乜雞味，而且雞骨間仲見紅，有啲驚。

例湯，似係一般味精湯，不飲也罷。

完全無期望下，貪平買左兩張，諗住用黎醫肚。的確，佢能夠飽腹，係肉體上嘅飽，精神同心靈完全得唔到滿足。真係唔明點解，呢間野開到遍地分店，仲話係好多豉油痕遊客來港首推嘅燒味餐廳，似乎都係店方俾錢買個旅遊書廣告位做下宣傳，呃呃氹氹咁。唔怪得，一入門口，侍應阿姐可以好自然地用煲冬瓜招呼我地話﹕ 「娘喂，痴冬C姐ben左呀!  (兩位，吃東西這邊坐呀!)」真係打左個突，心中只好暗暗回覆一句﹕ 「餓文吾市豉油痕，市腥揀忍呀。」

米G蓮腸粉

第一腸粉@太子

2/12/2011 12:30

唐唐話深水埗最出名嘅美食係腸粉...?!唐唐講緊邊間腸粉真係唔知啦，只知道「米芝蓮」選中嘅係邊間腸粉專門店。就剛好喺佢上報當日，有機會一試。

之前喺筍仔網買左$10一張團購券，可以試一款腸粉，加送豆漿一杯。原本都打算呢個星期當做下午茶，去食埋佢。點知今朝早就見到各大報章介紹新一期「米芝蓮」中選名單，呢間小店就榜上有名，而且仲俾傳媒勁煲佢開業不足一年就上榜呀，金馬獎影后德嫻姐、柏高先生都係座上客呀咁。所以立即決定，即時決定，即日解決左呢張券，以免佢日後更出名，人龍湧現，想食都無得食。

十二點幾去到，好彩等位只需一分鐘。小店地方真係淺窄，舖仔細細坐到廿多人，避免不了背貼背嘅情況。一間小店獨賣腸粉，附加兩、三款粥品同蘿蔔糕等，都咪話唔博。

豆漿﹕ 幾清甜，有豆味。正好作為等待腸粉到來嘅良伴。

蜜汁叉燒拉腸﹕ 腸粉講不上晶瑩剔透，只可以隱約見到叉燒嘅橙紅色，單靠外型，已經覺得腸粉皮唔薄，的確。白白嘅腸粉皮入口帶黏性，並無想像中咁幼滑順口。人地話配方唔同坊間喎。但我欣賞佢夠米香，即使有相當厚度，仍然非常軟熟，可能各有各食法。內餡嘅叉燒，唔知係咪特意，切得比一般大塊，存在感更好。叉燒入口亦軟腍，肥瘦適中。不得不提，腸粉豉油本身已經非常好味，甜甜咸咸，正好增加腸粉嘅香味。

招牌第一拉腸﹕ 招牌腸內餡包括菜甫以及豬肉燥，好特別好創新嘅配搭。作為腸粉亦唔錯，菜甫有爽口粒粒嘅口感，加上濃郁惹味嘅肉燥，正係好台式風味嘅感覺，比一般叉燒腸更吸引。

所有腸粉都係即叫即造，即使入座唔洗等位，但等食都需要付上相當時間。全店滿座嘅情況下，等兩碟腸粉大約等左超過二十分鐘。但腸粉送上嘅時候，係熱辣辣，非常新鮮。團購價$10一碟加送豆漿，絕對無怨言。

小店開張無耐，已經數度加價，一碟腸粉由原先嘅$15，每次加兩蚊，已經加到今時今日嘅$19。當日佢仲未上米記榜之時，唔知道有幾大吸引力，令人願意俾張廿蚊紙齋食一碟腸粉。但相信由今日開始，小店人氣越勁，人龍自然越長，加價亦係理所當然嘅事，到時肯定廿蚊都唔夠埋單。好彩，早食早著。Yeah!

上班一族專利雞批

金鳳茶餐廳@灣仔
18/10/2011 12:00

難得行過灣仔開會，同事仔請食金鳳雞批 ($7.5)，新鮮出爐超正!

拎到番公司，足足半個鐘有多，食嘅時候都仲暖暖地。好野!
一拎上手就聞到好香牛油味，批皮比一般嘅略厚，但完全唔影響佢鬆化嘅口感，鬆脆得黎有啲似蛋撻牛油皮嘅質感，牛油香得黎完全唔覺油膩。

中間內餡都非常豐富，雞切得比較大塊，夾雜左少許粟米同火腿絲，但略嫌火腿份量太少，香味不足。平時食嘅雞批好多時都有蘑菇同洋蔥，但呢件雞批卻欠奉，味道簡單，反而更加突顯佢係一件「雞」批，唔係雜批。材料調味適中，黏度適中，但唔太忌廉，相對無咁飽膩，作為下午茶一流。

佢的確係一件好雞批，感覺上批皮仲突出過餡料，但仍然相當精彩。
得閒行過不妨買番半打益下同事。有啲葡萄灣仔嘅朋友...