花城匯艾薯

艾薯 Mr. & Mrs. Aysh@廣州花城匯

16/3/2016 

 

南洋吐司廚房

土司工坊@佐敦
12/8/2012 12:30
9/12/2012 20:30

12/8/2012 12:30
真係唔明白，點解任何時間澳牛都咁多人。去唔成澳牛，選擇去對面街嘅吐司工坊。雖然退而求其次，但原來都算意外收獲。是日午餐叫左兩個套餐，另加一個小食。

星洲叻沙套餐 ($42)
呢度嘅份量真如網評所講偏少，不過一碗細細嘅叻沙卻令人回味。賣相得，味道亦唔錯。叻沙配料有魚片、大蝦、豆卜、芽菜等，都係咁上下。材料都幾新鮮，起碼爽口彈牙。小豆卜用盡佢超強嘅吸收力狂索湯汁，更加係美味之中嘅極品。呢個叻沙湯底算係咁耐以黎最可口嘅。湯底用上唔少材料、香料炮製。湯底主調係香甜的，係充滿住蝦味嘅濃郁海鮮味，鮮味過後，係淡淡嘅椰香，再加點柔和辣味。如此鮮味，亦具層次感嘅叻沙湯底，真係第一次試，實在驚喜十足。所以枱上嘅溫馨小貼士，亦介紹左叻沙應該用湯匙食，短短細細嘅粗米線，再拌一啖湯一齊送入口，至係最佳食法。

肉鬆吐司套餐 ($29)
另一款輕型午餐選擇左人氣小食肉鬆吐土司。套餐仲包括半熟蛋同飲品，廿多蚊確實唔貴。切成九宮格嘅厚吐司，鋪滿厚厚一層肉鬆，非常飽足。土司烘得乾脆，邊位微焦脆脆的，中間仍然鬆軟。肉鬆既香且甜，淋上少許煉奶，更加滋味。一開始仲怕肉鬆吐司又咸又甜咁奇怪，原來兩者配合起黎嘅化學作用真係超強。

半熟蛋
多士配上半熟蛋係新加坡餐嘅特色。跟據食用小貼士，打破左半凝固嘅蛋黃，蛋黃同純白幼滑嘅蛋白混和，加上醬油同胡椒粉撈勻，就係簡單美味嘅小食。

皮蛋肉鬆 ($19)
不想多講，我冇興趣。

南洋奶茶
不得不提下呢度嘅南洋奶茶。上次試過K字頭又濃又甜嘅奶茶已經上左癮，今次一於黎個比拼。呢度嘅茶味還可以，可惜甜奶落得輕手，整體黎講同一般茶走冇乜分別。個人黎講，的確比較喜歡K頭字又甜又濃嘅地道奶茶。

雖然唔知呢間食物正宗唔正宗，但味道確實係個人喜歡。特別係一味肉鬆吐司，令人有衝動立即試埋個傳統咖椰吐司。價錢方面比尖東果間K字頭相宜，而且款式更多樣化，星期一至五嘅下午茶更加抵食。好一間新加坡過江龍，又一道力加速小女子嘅新加坡之旅。

9/12/2012 20:30

 牛油咖椰多士

娘惹米線 ($43)

米線非常幼身，可以充分吸收湯汁。湯汁酸酸甜甜，幾開胃。配料有半隻蛋、蝦、魚仔乾及豆卜。

矜貴南洋傳統早餐

Killiney Kopitiam@尖沙咀
17/6/2012 14:00
4/11/2012 12:00

17/6/2012 14:00
近排開始適應番沒有團購的日子，留意多左報紙、雜誌嘅飲食介紹。呢間吉利尼餐廳就係頭條日報介紹嘅新加坡過江龍。坐落港晶中心背後，唔行過真係唔知有間快餐式嘅超低調小店。店仔細細，食品選擇其實唔多，主要係南洋特色早餐同少量粉麵飯，絕對係輕食之選。

米暹 Mee Siam ($62)
米暹即係新加坡撈米粉，米粉配上芽菜、豆卜、蝦、白烚蛋等，外加一片青檸俾你自行加酸。顧名思義，撈米粉只有少量湯頭，呢款湯並唔係喇沙湯底，味道更為濃郁，椰香味濃，再加一點酸酸辣辣，多一點青檸香，比喇沙湯更香甜醒胃。米粉吸收晒湯嘅味道，撈埋炸乾蔥、蒜等配料，好惹味。另一樣吸濕大王就係炸豆卜，再加上清爽嘅豆芽菜，非常合襯。蝦的確新鮮爽口，但蝦味略嫌給比下去，而白烚蛋都係平平無奇。

凍甜奶咖啡
套餐配上咖啡或茶，先㨂左個凍甜奶咖啡。聽講咖啡粉係由新加坡送黎，加上甜煉奶，就成為一杯新加坡地道飲品。咖啡香的確有，味道比一般甜，奶味更重，不過同一般茶餐廳咖啡差唔多，無乜驚喜。

咖椰多士 Kaya Toast ($42)

另一份叫左個咖椰多士套餐，包括一份咖椰多士、兩隻半熟蛋同一杯飲品。
咖椰多士隨後送上，似乎係新鮮出爐。外皮烘得乾脆微焦，啡白相間烘得好靚。多士非常鬆脆，咬落索索聲，好熱氣。因為多士唔算好厚，所以請唔好抱住外脆內軟嘅期望，只係清一式脆到不得了已經唔錯。兩片多士中間塗左厚厚一層咖椰醬，再夾起一小片牛油。中間淺青黃色嘅就係咖椰醬，單憑顏色黎睇，幾似香蕉泥，但味道卻充滿椰香。一般新加坡地道做法，係以斑蘭葉、椰奶、蛋、糖煮成，所以除左椰香之外，仲有斑蘭葉嘅清新香氣。多士嘅熱力令牛油呈半溶狀態，與多士、咖椰醬融為一體，甜中略帶一點鹹，甜而不膩，非常討好嘅味道。

半熟蛋
新加坡人早餐食咖椰多士，都會配上半熟蛋，一脆一軟，呢個配搭真係妙。兩隻半熟蛋滑溜係一定的，而蛋香亦非常夠，只需要略加點豉油同胡椒粉，就會發覺，普通嘅食物配上簡單嘅烹調方式，都可以好好味。

甜奶茶
完美嘅早餐，要跟番一杯濃郁嘅甜茶，新加坡嘅奶茶，係出晒名又濃又甜。落單時，職員有查詢過奶茶需唔需要少甜，不過一於少理，反正自問嗜甜，應該唔怕。甜奶茶送到，茶味好濃，奶味亦夠香。攪一攪杯底，就發現甜嘅來源﹕煉奶。奶茶嘅幼滑，略為黏口嘅濃稠度已經好喜歡。濃郁、零苦澀味嘅茶香，再撞上香甜嘅煉奶，實在好討喜。甜，的確略甜，但呢個甜度好令人接受，而且係可以引發開心指數嘅味道。好多網友話，呢款茶即係港式嘅茶走，不過平時飲完又唔見會咁開心，好明顯係甜爺爺嘅原故。

唔講唔知，原來呢間小店唔野小，係新加坡超出名嘅老牌咖啡小店，由一九一九年開業到而家，淨係新加坡已經有超過五十間分店。呢間係香港第一間分店，小店唔大，裝修非常企理清新。以快餐運作，客人先到櫃台點菜，食品隨後由職員送上。雖然半自助形式，但服務一啲都唔差。職員夠多，而且好親切友善。不過星期日中午，人流都唔少，無得慢慢嘆，要嘆就最好揀平日。

呢個中午食嘅早餐，合共一百元正，一個字貴。不過今次過後，相信我已經愛上左又甜又椰嘅咖椰多士，配甜爺爺奶茶。近日成日心思思想翻食新加坡餐，仲諗過不如去一轉新加坡食最地道吧啦。未成行之前，暫定下一個目標係Toast Box。

4/11/2012 12:00

法式燒蛋多士套餐 ($30)
似西多士，多一份蛋香味，加埋牛油同咖椰真係好配！

咖椰多士餐一樣咁好味。

第二次一樣好味，抵繼續支持輕食！

牛角堡配Kawaii Menu

Sora ti.te.mo Cafe@九龍灣

7/10/2012 15:00

是日行下Mega Box，見到呢間餐廳仔嘅Menu非常吸引。聽聞佢嘅牛角酥非常唔錯，見下午茶平平地，一於試下。

芝士蛋沙律牛角堡+香辣焗薯角 ($29)

雖然賣相同宣傳相片實在無得比，不過牛角包比想像中好味。熱辣辣嘅包包牛油味夠香，而且非常鬆化，一層一層的，加上芝士、蛋沙律，真係唔錯，不過餡料比較少。至於薯角都係熱辣辣，仲啖啖肉，輕微辣味幾惹味。

雜菌濃湯烏冬 ($22)

烏冬就麻麻地，湯係忌廉濃湯，似係罐頭貨色，淡淡地，材料亦唔算多。

下午茶跟埋飲品都係廿零三十蚊，真係抵食。下次要試試和風薄餅同燒飯丸先。值得一提，呢間小店嘅出品都係迷你版、細細件，岩晒女士們。而且Menu實在整得好靚，唔客氣拎走一份。

綿綿冰@元朗

綿綿冰@元朗

23/9/2012 19:30

綿綿冰始終都係元朗呢間最正！

朱古力味冰底、乳酸魔豆、西瓜、水蜜桃粒、煉奶 (＄33)
冰底夠濃，夠份量，配料夠多，勁抵食！

鹽酥雞 （$25)
新鮮即整，夠脆夠味，GOOD!

出一點Money，換一點堅持

荃灣古法雞蛋仔@荃灣
24/6/2012 13:30

行過荃灣德海街呢條小巷，都會聞到陣陣蛋香，原來呢間古法雞蛋仔係區內出晒名嘅，早前仲喺報紙專欄見報添，真係唔講唔知。一底雞蛋仔要$16，似乎比一般貴，但好多人話，試過就知道區區幾蚊係絕對值得俾。由於時間尚早，未見人潮。落單之後，雞蛋仔係即叫即整，仲睇晒全個製作過程，蛋香越來越濃郁，越等越想食。

朱古力雞蛋仔 ($16)
價值十六蚊一底嘅雞蛋仔，新鮮熱辣，拎上手非常有份量，可算係一般雞蛋仔兩倍重量，真材實料。雞蛋仔每粒都圓轆轆，惟外層並無滑到閃令令嘅外皮，只係保持雞蛋仔天然嘅奶黃色，有微細嘅氣孔，睇落似蛋糕，感覺反而仲真實。呢款朱古力味並無古銅色肌膚，係原用原味蛋漿，再起勢加上朱古力粒焗成。從表層黎睇，朱古力粒都唔少。

雞蛋仔講唔上非常香脆，但每粒雞蛋仔之間嘅薄皮，係脆到不得了。爆開蛋殼係充實而且飽滿嘅內餡，每一口都食到雞蛋仔嘅鬆軟，程度好比講大話蛋糕。味道方面亦算唔錯，蛋味還可以，朱古力味勁香濃，朱古力魔收貨。感覺上，比混和左朱古力醬嘅蛋漿更好，起碼兩種味道都食得到。一句講晒，呢度嘅雞蛋仔的確有水準，真正做到既脆且軟，味道亦唔錯，值得專程黎試。

至於價錢方面，十六蚊的確唔平，街邊仍有唔少十蚊一大底嘅選擇，不過質素絕對比唔上，睇你點揀。其實諗番轉頭，N年前十蚊一底雞蛋仔已經可以好高質素。時至今日，可能生意難做，有經營者選擇偷工減料，減低成本，將蛋漿溝稀務求做多幾底，雞蛋仔變得無內涵。亦有經營者堅持選用優質食材，通脹令成本增加，消費者自然要俾多幾蚊。俾多幾蚊除左食到好味雞蛋仔之餘，亦感受到小店對食品製作嘅一份堅持。家陣質素稍為好啲嘅雞蛋仔，又點至十蚊呀。

勁脆雞蛋仔

北角雞蛋仔@尖沙咀
10/6/2012 20:30

 
雞蛋仔 (團購價＄15兩底）
即整，熱辣辣，外型完整，無偷工減料，拎上手係實淨的。
外皮超脆，仲脆過薯片，食到索索聲，不過有啲界口。
味道夠甜但欠蛋味，中間唔夠充實，餡只得三分一。

車軚迫比薩

Big Pizza@尖沙咀

28/5/2012 13:00

尖東有一間小店嘅門面經常都攝住我嘅目光。喺極度細少嘅玻璃櫃中，放住八個異常巨大嘅Pizza，成個構圖相當得意。呢個車軚咁大嘅Pizza做團購，正係試味嘅好機會。谷旁$25可以買到12吋特大薄餅一件同飲品一杯。

夏威夷薄餅 ($35，團購價$25)、燒雞肉薄餅 ($35，團購價$25)

比薩實在太大件，無能力影到四正嘅相，惟有借Po谷旁張宣傳相。完整一個比薩有貨櫃車車軚咁大，直徑足足有24吋長。團購餐$25包一件裝薄餅，份量都唔小野，係一個大紙碟都裝唔晒嘅12吋長三角形。柯打後，店員將Pizza放入焗爐翻熱，再將Pizza放喺大紙碟上，再要對摺先可以放入紙袋。拎上手非常有重量，真係份量十足。

薄餅底唔算厚，但質地尚算鬆軟，部份位置比較香脆。不過最吸引人嘅，係表層嘅材料。內餡份量十足，鋪滿半溶化嘅芝士，散發住誘人嘅香氣。蕃茄醬酸酸甜甜，加上濃郁嘅水牛芝士，味道已經好正。夏威夷薄餅仲有有火腿、甜蜜蜜嘅菠蘿，非常清甜開胃。而燒雞肉薄餅有大大件燒雞、洋蔥、蕃茄粒、青椒粒等，材料非常豐富，啖啖肉。

兩款特大巨型比薩兼覓十足，而且味道都唔錯，材料豐富，醬汁又夠多。食一件已經夠做午餐，非常飽肚，$25抵食。得閒行過都可以買件當做lunch呀。不過最衰就係，只得外賣，買完之後，要搵個商場冷氣位先得有開餐。

嘆滋味卡巴。看重慶噴幼文化

Bismillah Kebab House@尖沙咀
2/5/2012 13:00

呢排驚驚地團購泡沫，所以近排多數只會買筍仔網同谷旁嘅團購，總覺得信譽稍為好啲。$25買一個重慶大廈嘅中東雞肉卡巴加汽水套餐，試新野。

一份中東雞肉卡巴，原來係勁粗一大條，切開一半都好大件。一次過換兩張券，總共四大件卡巴，午餐都夠飽。

雞肉卡巴脹book book，材料好豐富。外皮唔算脆口，反而感覺輕微煙韌。外皮包住豐滿嘅餡料，餡料多到好似經過壓縮，實實在在夾埋一堆。材料有洋蔥、生菜、蕃茄、雞肉等。雞肉超級多塊，塊塊都係大大件，結結實實，並唔係雞米粒。雞肉唔柴口，有好香濃嘅燒烤味。加埋生菜、蕃茄配合得恰到好處，口感爽脆，非常清新，即使雞肉汁唔算多，但蔬菜正好彌補呢個不足，整體唔太乾身。中間嘅醬汁更係靈魂所在，食得出有類似燒烤醬同千島醬嘅味道，亦帶少許印度香料味，同雞肉、蔬菜真係好夾，香而不膩。呢件卡巴實在有中東嘅味道，但口味又未至於難以接受嘅出奇味道，個人認為正好。

一份卡巴配埋飲品，份量足夠女孩子嘅午餐，團購價$25，正價的話，就$51一份。呢個團購$25抵俾，兌換到嘅唔只係好味嘅卡巴，仲有一個小社區嘅新奇體驗。

咁大個人從來未入過重慶大廈，今次為左食野，順便行左個圈。重慶大廈就好似自成一國嘅小社區，黃皮膚嘅香港人先係外國人，黑媽媽嘅印度噴幼先係本地人。佢地人多勢眾，個個牛高馬大，老實說，其實真係有啲驚。急急腳走上樓上，人流比較少，熱鬧情況似乎唔夠樓下咁旺盛。就喺一樓嘅盡頭，終於搵到呢間連個名都唔多識讀嘅食店。等食期間四圍八下，總覺得無我地嘅落腳點，名副其實坐立不安。

食物黎到嘅時候， 選擇左靠牆嘅自閉位開餐。進餐嘅廿分鐘時間，睇住每位店員好主動、熱心咁招呼客人，黑媽媽嘅面上，任何時候都帶住笑容。雖然未聽過一句廣東話，但一聲唔鹹唔淡嘅「噴幼」，親切感頓時暴升十倍。當你講完「Thank You」之後，必定送上一句「You Are Welcome」，加送招牌白牙齒笑容，外加兩粒閃星星，其實佢地真係好鬼有禮貌。臨走嘅時候，見到剛到場嘅食客，三唔識七、男人老狗都互相擁抱，又證明到佢地真係唔怕識噴幼，更可能係，會視任何一個人為噴幼，噴幼嘅噴幼即係自己嘅噴幼。

食完個充滿住美味、人情味嘅卡巴，都係急急腳咁走，繼續喺黑媽媽嘅牛高馬大之間穿插。雖然來也匆匆、去也匆匆，但兩個匆匆似乎有啲唔同。離開時嘅匆匆，除左滿腹之外，仲多左一啲對重慶大廈呢個小社區嘅認識。佢地嘅禮貌同熱情，的確值得欣賞﹔佢地嘅噴幼文化的確幾得意。可能，呢啲就係黑媽媽人獨特嘅相處模式。

鑽石山驚現馬來過江猛龍

姊妹@鑽石山

25/3/2012 13:30

身處喺鑽石山美食廣場嘅姊妹，簡單名字嘅背後，原來大有來頭。從頭條日報得知，呢間姊妹係馬來西亞過江龍，係當地一間極之出名、開到成行成市嘅食店，主打正宗星馬菜式，而鑽石山呢間更加係佢嘅第一間海外分店。

特色蛋春卷 ($30)

呢兩卷野正名係薄餅 (Popiah)，係此店嘅成名之作，聽講喺馬來西亞日賣六百份。煎得超薄嘅蛋皮，包住沙葛、青瓜、蘿蔔絲、花生碎同脆卜卜嘅炸粉等，材料好豐富。食落蔬菜料非常清爽鮮甜，加左甜甜地嘅特製醬汁，感覺更加濕潤可口。連一向討厭青瓜嘅本人，都願意咬晒所有青瓜絲。花生粒更加係重點所在，係脆度同香味嘅來源。雖然材料係全素菜，但配搭得宜，食極唔厭，十級推薦。

炸芝士春卷 ($25)

新聞紙另一推介美食，係炸芝士春卷。原來芝士並唔係包喺春卷裡面，而係放喺春卷表面。春卷炸得非常乾脆，可惜春卷皮太大塊，捲得太多層，餡料少到無影，隱約食得到有肉鬆等材料。上面嘅芝士無經過再烤焗，只係靠春卷嘅熱力自然溶化，芝士軟軟地，輕微痴牙，味道勁香，彌補到春卷嘅不足。

椰漿飯配炸雞件 ($38)

一睇呢碟飯已經覺得交足功課，首先有齊三種醬汁，未食已經俾足分，而且飯仲跟埋唔少配料，好似炸魚乾、花生同白烚蛋等，係坊間少見嘅誠意。炸雞本身其實麻麻地，炸得非常乾身，肉汁略嫌欠奉，質地偏乾柴，但外皮一陣濃香薑味都相當吸引。而椰漿飯的確無敵，入口非常香甜，椰香充斥喺口腔之中，回味無窮，食多幾啖都唔覺膩。嗜辣嘅朋友仲可以加埋特製醬汁，極度惹味，但個人實在受唔起果種又麻又辣嘅刺激，只好選擇海南三醬。黑醬油夠杰身，集甜、濃、香於一醬，另加酸辣汁同薑蓉，撈飯實在正斗。

過江龍黎香港做生意，老闆堅持選用馬來西亞當地嘅食材同正宗製作方法，確保原汁原味。的確，食到嘅係本地少接觸到嘅風味。個人覺得材料嘅配搭實在少見，特別係果卷野。呢個經驗令我改觀，一向都覺得所謂嘅美食廣場只係一個容納幾間垃圾食物嘅大排檔。但係，喺租金高企、連鎖霸權嘅時勢之下，美食廣場可能真係一個美食嘅立腳點。

豪邁大啖吔丹麥鐵三角麵包

丹麥餅店@銅鑼灣
10/4/2011 13:00
18/3/2012 14:00

10/4/2011 13:00

一間傳統懷舊嘅餅店，賣緊大家童年時候嘅早餐食品。

 

熱狗 ($8)

一隻熱狗可以有幾好評?

長長地嘅豬仔包焗到熱熱。同西式嘅熱狗唔同，港式熱狗唔用芥末醬，改為一邊塗牛油，另一邊塗沙律醬。再加上一直喺爐邊烤緊嘅香腸，夾一夾，整個熱狗大功告成。食一啖就知，原來真係好味。首先新鮮即製一定唔會難食得去邊。再者麵包非常之鬆軟，仲有大陣甜甜嘅麵包味，係最香甜嘅餐包味道。熱力更將牛油同沙律醬溶入包中，最後配上熱辣辣、有肉味嘅香腸。一個得麵包、醬汁、香腸三個咁簡單嘅食材，已經集合晒所有好味嘅元素。

炸魚柳包 ($12)

麵包一樣焗到熱熱好鬆軟，魚柳炸得鬆脆，唔油膩。魚柳好新鮮，食到魚柳鬆軟嘅質感。茄汁同沙律醬同時出現，兩款醬汁加埋就係最原始嘅味道。食左呢個包之後，就覺得乜記物記已經唔入流。

每個包都只有好簡單嘅三個元素，冇任何生菜、酸瓜等配料， 係最原始、最簡單、亦都係好家庭式嘅風味。十蚊八蚊一個做下午茶或小食，係唔錯嘅選擇。妮啲思&鄭淘文，請大啖大啖食，啲汁流晒出黎先至過癮。

後記
18/3/2012 14:00

黎得銅鑼灣，唔想食太heavy，食個包包就最岩，今次一於試埋炸豬扒包先得。

炸魚柳包 ($13)
魚柳一樣咁新鮮，熱辣辣，脆脆地，配酸甜嘅醬汁真係好味。

豬扒包 ($13)
今次試埋好評嘅豬扒包，感覺上同澳門嘅唔同。包係鬆軟香甜嘅餐包，豬扒經過油炸，外皮脆脆地，肉質鬆軟，配上沙律醬同茄汁，係非常簡單，家庭式嘅包包。感覺上魚柳包更好味，因為豬扒味道較淡，肉味欠奉，被沙律醬同茄汁嘅酸甜蓋過。算啦，平平地，無計。

食呢個包，真係有啲捩(口棄)。首先，包係必須外賣拎走，好大機會係邊行邊食。醬汁同油喺雞皮袋滲出，食完之後成手油腍腍。不過好味無計，儀態不顧，大啖吔吧啦。

麻思梳喲~韓式街頭小食

韓點@紅磡

12/2/2012 13:30

紅磡有間全港首創韓國地道小食店，接受過無數雜誌、電視嘅專訪，個個食過都讚味道正宗，次次行過都堆滿人。見今日有時間，一於去排下隊。

韓式炒年糕 ($25)

廿五蚊一碗份量比想像中多，一打開就聞到好香嘅韓式甜辣醬味道。醬汁橙橙紅紅，紅色一點點應該係辣椒粉，仲有白芝麻點綴。年糕長條狀，睇落似港式豬腸粉，但每條都可以輕易分開，唔會癡埋一舊。

從電視節目得知，地道韓國小食都用左韓國入口嘅食材，保證原汁原味。年糕入口滑溜溜，食落好煙韌結實，越咬越有米香甜味。醬汁用左辣椒粉、辣椒醬、日本清酒同魚湯等煮成，煮得比較杰身，包裹住每一件年糕。整體感覺非常濃郁，味道以甜為主，食落有輕微酸味，亦慢慢滲出辣味，越食越刺激。椰菜片吸收晒醬汁，就好似食緊泡菜咁，超級入味。

年糕越食越覺辣味突出，間中需要飲水舒緩，但實在太過惹味，不禁一啖接一啖，怕辣都甘心頂硬上。兩人分食一份炒年糕，身體漸漸暖起黎，食完飽肚又溫暖，絕對係驅寒良品。

舖仔細細，專做韓式小食外賣，所以default包裝都係紙盒、膠叉。由韓國夫婦主理，老闆用韓文落單，由阿珠媽煮製食品，成個感覺真係好似身處韓國街頭。讚!

蘇Good魚蛋

陳記魚蛋@紅磡
12/2/2012 13:00

魚蛋係最常見嘅掃街小食，而陳記嘅出品被阿蘇稱為全香港最好食嘅魚蛋。小店仲用海報size印左好幾張阿蘇嘅大樣，十足代言人咁款。

小辣魚蛋 ($6)
N年前兩蚊幾一串嘅魚蛋仔，到今時今日已經升價三倍。小店用一細紙杯裝住，有六小粒魚蛋仔。人地話此店嘅賣點，並唔係魚蛋，而係獨家秘製嘅辣醬。食客可以因應自己嘅抗辣能力，叫大、中、小辣同唔辣。話明係秘製醬汁，小小怕辣嘅我地，都試左小辣版。

魚蛋細細粒，非常結實，入口唔算十分爽口彈牙，但食落好有魚味，原味甜甜地。
小辣醬汁落得重手，未食已經聞到好香沙嗲味。輕輕沾一啲醬汁，初起係甜甜嘅味道，類似沙嗲，又似咖哩，有蒜香又感覺到花生味存在，好香濃惹味。咀嚼之後，麻辣味就慢慢攻上黎，辣得好過癮。

老實說，魚蛋無乜特別，秘製醬汁就比一般小店突出。無咁叻試勻全香港所有魚蛋，所以唔敢學阿蘇話佢係Number One，只係覺得佢個醬叫做唔錯咁啦。

極熱氣。勁芝味雞扒

阿升麵線@旺角

22/1/2011 14:30

行完花市見餓，去左旺角掃下街。早排食過阿升嘅芝味雞扒一直念念不忘，今日有胃口重拾滋味。睇番飲食雜誌報導，原來好芝味雞扒，日賣二百件，係時下受盡熱捧嘅芝味小食。 

好芝味雞扒 ($25)

雞扒永遠都係新鮮即炸，所以等候時間不下十分鐘。雞扒切件上，未入口已經感覺到熱辣香口。芝味雞扒係兩塊薄身無骨雞扒，中間夾左芝士，賣相非常吸引。

雞扒外層包左薄薄一層炸漿，炸得好香脆，入口仲有粒粒鹽酥效果，食到索索聲。台式雞扒最不能放過嘅，當然係炸皮外層嘅調味粉，有惹味嘅椒鹽、胡椒，再加少少辣粉，齋食雞扒已經好滿足。雞扒厚身啖啖肉，但仍然保持軟腍，唔太嚡，可惜比較乾爽，無肉汁可言。

經過油炸後，切開嘅雞扒邊位仲有半溶化芝士流出，芝士味道好濃郁、濃厚，據講係味濃嘅車打芝士。

芝味雞扒整個配搭得宜，味道吸引。廿幾蚊一份大雞扒，足夠兩個人分享，正係下午茶不錯嘅選擇。熱氣一次半次都唔怕啦，推介!

大王北行鳥

上海香港麵家@銅鑼灣
22/1/2012 11:00

年廿九最好嘅節目，莫過於行花市，今年一於趁墟過海行下維園，入場前先喺附近食個早點。一向少過海搵食，黎到銅鑼灣，只知道就近渣甸街比較多野食。原先想去車仔麵名店試試，點知晨早收爐大吉，最後求其是但搵間入場。

粢飯 ($15)
佢叫得做「粢飯大王」，無可能唔叫一份粢飯試試。睇住門口啲阿姐快手勁包，熱辣辣嘅粢飯就送到。粢飯用保鮮紙包住，對半切開成兩份，偷瞇到內餡材料唔算多，驚喜欠奉。米飯質地軟糯，唔太乾，飯包得勁厚身，相對內餡只得少少。材料有肉鬆、榨菜同油條。個人認為肉鬆係粢飯味道嘅靈魂，肉鬆唔夠多，唔夠香的話，成個粢飯都唔見得好有味道。而榨菜就貢獻左咸味同爽脆嘅口感。中間一大條油炸鬼就係香脆、香口、油香所在。但對唔住，大王呢個粢飯完全不行了。材料少得可憐，肉鬆無香味，只係榨菜得個咸字，連油炸鬼都唔新鮮，完全唔香脆，估計係放得耐左，變得又腍又韌。三樣材料完全唔配合，令粢飯只獨有咸菜味。咁同白飯包咸菜有咩分別?

生煎包 ($22)
暖暖嘅生煎包，皮並無乜煎香嘅痕跡，煎左等於無煎，所以唔期望食到脆底。包係韌韌地，香味不足，幸好有幾粒芝麻仔鎮住。好彩內餡都算係咁，肉餡調味唔錯，豬肉腍腍地，甜甜地，肉汁算幾多。

豆漿 ($8)
上海舖另一重點美味，應該就係豆漿。豆漿的確比其他食物較為突出，熱豆漿味道更加香濃，有淡淡豆香，味道唔太甜。

喺無做過功課嘅情況下周街搵食，店內嘅人流就係其中一個好有力嘅方向指標。眼見渣甸街幾間繼續營業嘅食肆中，呢間小店食客明顯比較多，而店前等外賣嘅人從未減退，估計呢間「粢飯大王」差極有個譜。原來呢間算係好出名嘅老字號上海舖，幾十人讚過好。可惜親身試過之後就覺得好一般，應該隨便搵一間豆品小店，都可以用更平嘅價錢，食到更好嘅質素，當然已經唔敢同台灣嘅阜杭豆漿比較啦。睇黎呢個大王都只係浪得虛名。

中評豆花下午茶

珍豆漿豆腐花專門店@旺角

2/1/2012 14:30

之前喺筍網用$15買到豆品專門店嘅$30現金券，呢間珍豆漿似乎新裝修，而且菜單選擇多左，除左主打豆製品之外，仲有唔少素食點心，一於去試下。

凍石磨豆腐花 ($12)

十二蚊一碗豆腐花，份量唔少。豆花原本無加甜，先試一口，食得出淡淡豆香味。豆花無經過片薄，厚厚一大片，質感一啲都唔滑溜，更有些少粗糙感。加左糖水同黃糖粉後，感覺就好好多。聽聞糖水係冰糖水，感覺更滋潤清甜，豆花都受到影響，質感變得幼滑，甜甜地亦變得易入口。

熱芝麻豆腐花 ($18)

熱食豆花更加感受到豆花嘅軟滑感，明顯比凍食好，但未至於可以滑入喉嚨嘅程度。加左芝麻糊後，豆味變得薄弱，芝麻糊反客為主。芝麻糊較杰身，仲食到芝麻碎，味道微甜，唔加糖水已經夠味道。 

麵醬豆卜 ($15)

細細一碟豆卜，原來係濕潤有湯汁。金黃色嘅豆卜浸左湯一啲都唔熱氣，食到有豆味，而氣孔仲吸收晒麵醬湯汁，非常入味。湯汁甜甜地，麵醬好濃郁，仲有淡淡薑味，越食越過癮。

即製手包秶飯 ($15)

秶飯對切成兩份，飯非常軟糯，中間包住油條、肉鬆、榨菜等，餡料唔算好多，味道都唔錯，只不過油條比較腍，食唔到脆脆嘅口感。

團購可以半價埋單，以上四款共銀三十元正，兩個人當食個簡單下午茶，絕對無投訴，但相信翻轉頭機會唔高，試過就算。

話晒係豆品專門店，豆腐花豆味係有嘅，但並唔講得上滑溜，反而微甜嘅冰糖水更加出位。一碗豆花索價十二蚊，感覺上算貴，因為仲有唔少出名豆品店嘅出品，七、八蚊都有交易，講真質素差不多。貴左嘅五蚊，相信係用黎俾旺舖租金同人工罷。對我黎講，當然希望俾幾多錢，食得番咁多錢，所以寧願選擇街邊立食新鮮熱辣嘅豆腐花。一啲咁平民嘅美食，都係用番最平民嘅方法品嚐，咁先夠風味。

外型100分星級雞蛋仔

利強記北角雞蛋仔@北角

25/12/2011 14:00

港島蕩失路之旅第二站
難得闖蕩北角，點可以唔試下馳名嘅雞蛋仔?! 喺對面街已經見到人龍，每分鐘都有人買緊，都咪話唔勁，果然係超出名嘅排隊名店。舖仔細細，只得一個窗口仔處理交收，其他外牆位置全部都貼滿晒明星到訪嘅相片、傳媒雜誌嘅報導等等，星味十足。

一底雞蛋仔要十五蚊，都真係幾貴。還記得那些年一底雞蛋仔都只不過七蚊、八蚊，就算係早年前，十蚊雞都有交易。點解你咁貴?

雞蛋仔大大底，淡淡嘅奶啡色，熟成度剛好。每粒雞蛋都好完整，圓轆轆，脹卜卜，外皮好光滑，唔會見到一個個洞孔或者一凹一凸，整體造型俾足一百分。餅皮邊緣位同雞蛋外皮都好香脆，就好似食緊雞蛋薄脆咁。雞蛋內裡唔算飽滿，大約三份一係有餡，但勝在夠軟綿綿。甜度適中，奶味同蛋味都可以，唔算好濃，但都叫做有啲味。

論外型，佢的確好過坊間嘅好多倍，超級靚仔。

二論口感，真係做到皮勁脆、內餡軟，唔錯呀。

再論味道，應該同出面嘅差唔多，少少甜、少少奶、少少蛋，未試過有一間勁有蛋味。

最後論豐富度，都唔差過其他店，正常程度，因為咁耐都未見過有雞蛋仔內餡可以用豐滿黎形容。

呢間雞蛋仔唔算好好，但已經比好多店舖好好多。喺未發現最好嘅雞蛋仔之前，雖然無得比上，但一定係比下有餘，所以得閒行過都可以試下。

膠登炸G包

高登炸雞@荃灣

24/12/2011 13:30

非教徒平安日唔洗去敬拜主，去左荃灣潮拜高登炸雞。荃灣新開分店，唔洗山長水遠過海去筲箕灣，都係一件好事。團購$15可以享用價值$31嘅炸雞包套餐，包一個炸雞包、蕃薯條，仲跟埋汽水，抵過食老麥。

高登巴打設計嘅聰明杯，裝住蕃薯條同汽水。

食包唔襯薯條，改為蕃薯條，都係一種創意。蕃薯條有薄薄嘅炸粉包裹住，蕃薯條唔太熱，薯肉爽爽地、甜甜地，炸皮唔夠脆，仲有陣油味，似乎閒置左一段時間，唔多新鮮。

大大隻字印住「高登炸雞」嘅雞包，材料都幾豐富。炸雞扒超大塊，仲有一塊新鮮蕃茄同生菜，加少少沙律醬。雞扒唔算太熱辣辣，外皮嘅炸漿薄薄地，少少脆多多腍。雞扒肉質好嫰滑，肉汁豐富，亦有雞味，有少許鹽、胡椒粉同味粉調味，雞肉有味道，仲有少少辣，味道唔錯。 略嫌唔夠脆口，而且沙律醬落得太孤寒，連包食感覺幾乾身。

大雞包原價$18一個，其實算貴，亦感覺唔到傳聞中嘅即叫即整，唔覺得好新鮮。但今日團購十五塊錢就有大包、蕃薯條仲有汽水，真係抵到無野好講，係完全夠飽有餘。至於正價會唔會再食，就係問號一大個。而家高登友都唔太支持今時今日嘅高登炸雞，只覺得被借名上位。呢啲咁政治嘅私人恩怨就唔太關我事，但只論食物質素，佢唔係太留得住我嘅歡心。

巴巴閉長龍小食之王

肥姐小食店@旺角
30/10/2011 19:00

旺角行到爛晒，但每次行過都見到肥姐小食店門前有永不減退嘅人龍。眼見小店只賣幾款橙橙黃黃嘅唔知乜，仍然有人繼續支持。好奇心之下，決定一試究竟。

大墨魚 ($10)、生腸($5)、雞腎($5)

橙橙黃黃嘅唔知乜原來係冰凍嘅鹵水小食，加上鹵水汁、甜醬同黃芥末，就係人潮永遠不減之源。
煙韌嘅大墨魚片滲透住咸甜又充滿麻油香嘅醬汁，沾一沾甜醬更加好味。
生腸非常爽脆，每一節都充滿住鹵水味，入味度一流。
雞腎有正常嘅脆度，但因為比較厚身，唔算太入味，可以選擇加些少黃芥末自行調味。

甜醬同芥末都扮演住唔同角色，想香甜味美兼滋味，定係要衝上腦嘅刺激快感，閣下可以自行選擇。五蚊一串細、十蚊一串大嘅鹵水小食，係計燒賣、魚蛋之外嘅另一種選擇。

鹵水小食材料最緊要乾淨，要夠凍冰冰，亦要浸得入味，再加埋各式醬汁，肥姐小食確實係一間值得俾手指公嘅小店。專造專賣，亦足見佢對自家食品嘅自信。曾經有次唔信邪，想試下其他小食店嘅產品，比較一下肥姐係咪真係咁大吸引力。點知阿姐一個唔該就將串凍墨魚掉落熱滾滾嘅咖哩魚蛋汁入面煮，當堂眼都突埋。但墨魚熱晒、熟晒，卻丁點味都無。呢次唔信邪，證明唔係咁多店舖有信心提供冷凍鹵水小食，係肥姐先咁巴閉，哪來的自信?

喺開飯網做番功課時，見到肥姐得到十幾個劣評，但細心一睇，原來劣評十個有九個九都係批評肥姐態度惡劣，唔想貼錢受氣咁話。計我話，肥姐一分鐘車輪轉，唔知做幾多單生意，相信食客都唔太介意咩態度，只求佢拿拿聲攞齊你想要嘅鹵水串，加多兩匙甜醬俾你就算，大家都係但求快啲享用美食罷。人家態度惡劣會令到食物難食左麼? 又何需咁執著於態度呢? 因為咁而俾個劣評人家，會唔會有啲唔公道? 公道自在人心，自在美食，食評應以食為重呀。

每分鐘都有長龍，長龍永不減退，正好證明佢嘅實力同吸引力。

上班一族專利雞批

金鳳茶餐廳@灣仔
18/10/2011 12:00

難得行過灣仔開會，同事仔請食金鳳雞批 ($7.5)，新鮮出爐超正!

拎到番公司，足足半個鐘有多，食嘅時候都仲暖暖地。好野!
一拎上手就聞到好香牛油味，批皮比一般嘅略厚，但完全唔影響佢鬆化嘅口感，鬆脆得黎有啲似蛋撻牛油皮嘅質感，牛油香得黎完全唔覺油膩。

中間內餡都非常豐富，雞切得比較大塊，夾雜左少許粟米同火腿絲，但略嫌火腿份量太少，香味不足。平時食嘅雞批好多時都有蘑菇同洋蔥，但呢件雞批卻欠奉，味道簡單，反而更加突顯佢係一件「雞」批，唔係雜批。材料調味適中，黏度適中，但唔太忌廉，相對無咁飽膩，作為下午茶一流。

佢的確係一件好雞批，感覺上批皮仲突出過餡料，但仍然相當精彩。
得閒行過不妨買番半打益下同事。有啲葡萄灣仔嘅朋友...