Ocio＠大圍

Ocio＠大圍

23/6/2019 15:00

剛返完大圍探家人，臨走時見肚餓，就係大圍站附近行下搵下午茶食，就係油站附近見到呢間小店，難得今日有舖甜品癮，就試下甜品下午茶。小店細細間，裝修幾別緻，還好下午茶時間唔多人，坐番張卡位舒舒服服，決定叫幾款甜品食下先。

鑊仔士多啤梨雪山熱香餅 $79

出場實在澎湃，新鮮熱辣嘅兩層pancake配凍冰冰雪糕，正! Pancake非常鬆軟，蛋香味濃。下面除左士多啤梨外，仲加左士多啤梨果醬，多一陣酸甜味，非常好味。

朱古力布朗尼窩夫$65
估唔到窩夫可以咁玩法，本身窩夫朱古力味濃，又係熱辣辣配雪糕。上面仲有好多布朗尼粒粒，朱古力味好濃郁，香氣十足。

OREO曲哉雲呢拿奶昔 $49
最後，叫左一杯奶昔解下口渴，入口非常驚喜，真係完完整整嘅冰凍Oero，變左奶昔味遁不減，冰凍好味。

呢餐非常不錯，原本普通嘅甜品改裝變成高級，賣相又靚，影左唔少相。埋單$206，以下午茶來講非常貴，但味道係唔錯。

香葉泰國菜館

香葉泰國菜館@大圍
19/6/2016 13:00

星期日都有午市套餐唔錯。

泰式肉片炒粉絲
辣辣地，炒得乾身，幾香口。

Cafe 1950 歐陸餐廳 晚餐篇

Cafe 1950 歐陸餐廳
2/1/2016 20:00 @ 大圍
15/6/2015 19:00 @馬鞍山

2/1/2016 20:00 @ 大圍

15/6/2015 19:00 @馬鞍山

近排開左好多間嘅西日韓Fusion餐廳，的確唔錯。裝修已經好有格調，食物好多款式。

 

黑松露忌廉燴義大利芝士雲吞 $89
芝士雲吞係意粉皮包芝士內餡，粉粉地，幾好味。忌廉汁加上少許黑松露，質感好忌廉咪，味道幾濃，再配上唔少菇類，不錯。

牛肝菌墨魚仔蜆肉意式燴飯 $75
賣相十分之吸引，單睇已經覺得好足料，食落就知道啖啖都有餸。配料有好多牛肝菌、墨魚仔、蜆肉、車梨茄等，真係好足料。汁有少許番茄雜菌味，完整包裹每粒飯，非常惹味。

晚餐時份主菜自動做套餐，包餐湯同指定飲品，又唔洗再加一，埋單總數$166，呢個質素絕對抵食。非常開心，馬鞍山終於有好野食，行遠少少都肯!

博多拉麵龍亭

博多拉麵龍亭@大圍

7/4/2013 20:00

豚雞骨魚介拉麵 ($68)

竹炭胡麻黑蒜油拉麵 ($72)

美心彩虹蛋糕

美心西餅@大圍

13/2/2013 15:30

彩虹蛋糕 ($198)

大圍街坊專用甜館

甜藝館@大圍
5/2/2012 16:00

大圍越開越多間甜品舖，札根多年嘅甜藝館出名平靚正。近期見到甜藝館做半價團購，十蚊雞就可以當廿蚊用，梗係唔放過。

雪糕世界 ($20，團購價$10)
雪糕世界底層係大菜糕，上面舖滿左大明珠，最後加一個大大嘅曲奇妙趣雪糕球。大菜糕並唔係平時見到嘅透明色，而係奶白色，食落有輕微奶香味。大大粒西米明珠煙煙韌韌，加埋爽滑大菜糕，足足有兩種唔同嘅口感。甜品仲落左唔少白色嘅淡奶，呢款奶並唔係平時食開某大牌子嘅花奶，而係甜度輕微，少少似忌廉嘅淡奶。加埋凍冰冰嘅曲奇雪糕，係一款食得飽人嘅甜品。

幻彩涼粉 ($22，團購價$12)
製成品同圖片一樣，層層疊堆砌幾豐富。涼粉係最傳統嘅黑色仙草啫喱，配料有大明珠、西瓜、蜜瓜、椰果等，全部都好鮮甜。涼粉並無用太多糖水，只係加左少許淡奶調味。自選雪糕係朱古力味，感覺上同涼粉唔係太夾。朱古力味雪糕上仲淋左味濃嘅芒果醬，好似有啲奇怪。

喺大圍呢啲地區，大部份食肆都係做街坊生意，價錢唔貴得去邊，糖水舖當然唔例外。甜藝館供應傳統嘅中式糖水之外，雖然無好西式嘅蛋糕甜點，但都有唔少新鮮創意雜撈甜品，價錢真係唔貴，廿蚊雞已經夠埋單，而且每碗都係非常足料，好抵食。所以晚飯後時段，都有唔少街坊幫襯，堂食同外賣都有大班捧場客。

平民乳酪皇后

Yogurt Queen@大圍

11/9/2011 17:00

大圍無啦啦又湊熱鬧喺火車站附近開間乳酪店。喺一間細細嘅團購網用優惠價$15買到$40現金券試下呢間新店。

  

士多啤梨、原味扭紋乳酪

士多啤梨味係好假嘅士多啤梨味，乳酪只有輕微酸味，總覺得乳酪嘅牛油成份幾重，唔似一般乳酪咁清涼解渴，質感軟滑幼細，但好易溶，成個感覺就似乳酪味嘅軟雪糕。

配料有罐頭椰果、幾乾身嘅木糠、迷你超細粒偏硬嘅棉花糖、唔煙韌嘅原味麻糬、芒果味爆爆珠、無乜味嘅咖啡果凍、硬硬地嘅雜果粒，仲有罐頭蜜桃等。

因為有四十蚊現金，真係可以加到好多配料，加到條數都唔知點計。

原本一杯大乳酪加四款配料只係$33，仲可以加多兩款價值$3嘅配料，團購券仲免費送多兩款，總數應該有最少八款配料，搞到我都唔知係食配料定係食乳酪。成杯野溝黎溝去，好奇怪。

喺新界一個人口老化嘅平民屋邨地區，開間潮興嘅乳酪專門店，其實真係好博。而其實呢間小店無論係門面裝修、乳酪選擇、味道等各方面嘅吸引力都唔大，實在係十級博。所以近排喺門口竟然賣埋點心燒賣同埋凍撈撈，似乎生意不景，真係好驚佢隨時關門大吉，所以要快手用埋張現金券。

老實講，質素真係麻麻，似乎襯唔起個名。就算佢再做$15一大杯嘅團購優惠，真係無興趣、亦無信心再幫襯。