自制假期嘆不太刻薄悠閒下午茶

麻布茶房@尖沙咀
31/10/2011 15:30

無團購嘅日子，只要識得捐窿捐罅，一樣可以搵到平食。星期一睇完<In Time>，走去附近食下午茶。原來星期一至五下午茶買一送一，兩個人食，仲平過去太刻薄。

牛肉玉子飯 ($37)
套餐跟一個滑蛋牛肉飯、湯仲有飲品。牛肉飯唔太大碗，當下午茶份量剛好，但滑蛋睇落唔太滑，牛肉都算入味。食牛飯始終都係吉野家比較好。

黑芝麻冰淇淋窩夫 ($36)
賣相非常吸引，切開足足有四件窩夫。窩夫整得靚，每個格格都非常清晰。外皮脆到不得了，咬落中間好鬆軟、濕潤，正正係外脆內軟嘅一百分表現。窩夫味道小甜，好香小麥味，顏色比一般深色，唔知會唔會係蕎麥呢? 配上超濃郁嘅芝麻雪糕，真係非常好。旁邊仲有一個白雪雪嘅鮮忌廉球，仲有味道好比濃縮芝麻糊嘅冰凍芝麻醬。一份非常驚喜嘅下午茶甜品。

買一送一嘅價錢，只需俾番原價加一，兩份總數$44。以平均一人$22嘅budget，相信食太刻薄都真係會太刻薄。$22可以安坐梳化，邊嘆香濃咖啡，邊食甜品，真係一個舒服嘅High Tea。平日人少少，先有半價呢個優惠，的確幾抵食。如果年假太多的話，不妨自制假期嘆番個悠閒下午茶。

走下坡快過sir滑梯的乳酪

Cheers Yogurt@太子
13/9/2011 18:30
30/10/2011 20:00

過左中秋節都仲未轉涼，FroYo繼續係我地嘅消暑良伴。團購又做勁抵優惠，$15買到$45現金券。咁抵，足足有七千人買左。先後兩次去食，亦見證住佢嘅興衰。

13/9/2011 18:30

原味、藍莓味乳酪，配椰果、芒果、蜜桃 ($47，團購價$17)

一張現金券夠食300g乳酪，由職員協助，好細心咁問你乳酪同配料嘅重量分配。選擇左100g原味加100g藍梅。乳酩幾幼滑，算結實。原味酸咪咪，但略嫌酸度未夠，可能因為藍梅味道更突出。藍梅味酸甜，並唔似出面嘅人工化學合成水果味，係好香甜，好新鮮嘅藍梅，可以話總結咁多次經驗，藍梅做得最好嘅一間。

今次配料破天荒採用水果配搭，其實有少少唔情願。因為當日客人都幾多，又唔想阻住後面，所以急急忙忙是但揀，揀左全部都係濕嘅配料。眼前只見到約有二十幾款水果，但唔見太多乾身配料，原來佢一樽樽周圍放，擺位唔夠集中，所以想食都搵唔到。好彩水果味道都唔錯，惟獨係芒果偏酸。

30/10/2011 20:00

原味、士多啤梨味乳酪，配朱古力麻糬、原味麻糬、Oreo ($45，團購價$15)

上次因為唔熟地頭，人又多，所以破天荒獨加水果。一向愛食乳酪多過愛食配料嘅我地，總覺得乳酪份量唔夠多。所以第二次見無乜人，金睛火眼搵番所有想食嘅乾身配料。

相隔一個半月，乳酩完全唔同晒。拎到上手已經見到乳酪呈粒粒冰狀，入口一啲都唔幼滑，就好似沙冰Smoothies咁，一粒粒，好明顯係水份過多，所以士多啤梨味非常薄弱，味道唔夠，而原味味道還算可以。但由十級好味嘅質素，一下子下滑咁多，真係非常失望。

今次全選乾身配料，Oreo落得夠重手，正好夠送晒成杯乳酪。麻糬算煙韌，甜甜地。仲有新鮮產品朱古力麻糬，只係原味加左少少朱古力味，其實無乜特別。

先後兩次去食，乳酪完全唔同晒，再食唔番新鮮、幼滑嘅質感。原本大好印象，喺一夜之間磨滅，高分直插谷底，真係唔知發生咩事。
因為第二次嘅失望經歷，相信我都唔會再去，但仍然想讚一讚佢地嘅營銷態度。做緊團購，明知個個客都係俾$45現金券，職員真係會落足心機磅足俾你，你話要幾重就幾重，職員每次唧完乳酪，甚至加完每款配料後都會小心過磅，所以能夠控制份量唔會超重，就算超重都唔會超得太過份，唔會乘機搶錢。
食過好味再翻轉頭，都能夠保住質素，繼續食得開心嘅，暫時都只有Tuttimelon同Yoppie。

巴巴閉長龍小食之王

肥姐小食店@旺角
30/10/2011 19:00

旺角行到爛晒，但每次行過都見到肥姐小食店門前有永不減退嘅人龍。眼見小店只賣幾款橙橙黃黃嘅唔知乜，仍然有人繼續支持。好奇心之下，決定一試究竟。

大墨魚 ($10)、生腸($5)、雞腎($5)

橙橙黃黃嘅唔知乜原來係冰凍嘅鹵水小食，加上鹵水汁、甜醬同黃芥末，就係人潮永遠不減之源。
煙韌嘅大墨魚片滲透住咸甜又充滿麻油香嘅醬汁，沾一沾甜醬更加好味。
生腸非常爽脆，每一節都充滿住鹵水味，入味度一流。
雞腎有正常嘅脆度，但因為比較厚身，唔算太入味，可以選擇加些少黃芥末自行調味。

甜醬同芥末都扮演住唔同角色，想香甜味美兼滋味，定係要衝上腦嘅刺激快感，閣下可以自行選擇。五蚊一串細、十蚊一串大嘅鹵水小食，係計燒賣、魚蛋之外嘅另一種選擇。

鹵水小食材料最緊要乾淨，要夠凍冰冰，亦要浸得入味，再加埋各式醬汁，肥姐小食確實係一間值得俾手指公嘅小店。專造專賣，亦足見佢對自家食品嘅自信。曾經有次唔信邪，想試下其他小食店嘅產品，比較一下肥姐係咪真係咁大吸引力。點知阿姐一個唔該就將串凍墨魚掉落熱滾滾嘅咖哩魚蛋汁入面煮，當堂眼都突埋。但墨魚熱晒、熟晒，卻丁點味都無。呢次唔信邪，證明唔係咁多店舖有信心提供冷凍鹵水小食，係肥姐先咁巴閉，哪來的自信?

喺開飯網做番功課時，見到肥姐得到十幾個劣評，但細心一睇，原來劣評十個有九個九都係批評肥姐態度惡劣，唔想貼錢受氣咁話。計我話，肥姐一分鐘車輪轉，唔知做幾多單生意，相信食客都唔太介意咩態度，只求佢拿拿聲攞齊你想要嘅鹵水串，加多兩匙甜醬俾你就算，大家都係但求快啲享用美食罷。人家態度惡劣會令到食物難食左麼? 又何需咁執著於態度呢? 因為咁而俾個劣評人家，會唔會有啲唔公道? 公道自在人心，自在美食，食評應以食為重呀。

每分鐘都有長龍，長龍永不減退，正好證明佢嘅實力同吸引力。

怒火中燒黑豚肉

和光鐵板燒日本料理@銅鑼灣
30/10/2011 13:15

難得喺谷旁掃到平野，以 $68享受原價$138嘅和光1.5小時日本燒烤，包一份一人前嘅指定套餐，再可以無限量追加任食鹽燒黑豚肉同甜品，真係幾吸引。

套餐包括前菜、一盆雜錦燒肉、另加白飯、麵豉湯任裝，甜品任食。

1. 前菜﹕ 係涼伴大豆芽菜同菠菜，味道清清地，清下口味都算唔錯。

2. 麵豉湯﹕ 可以任飲，但非常普通不過，一碗都飲唔晒，無需encore。

3. 薄燒安格斯牛扒﹕ 團購話係牛扒，完全feel唔到邊忽係扒，只見到四片薄切牛肉片。只需要底面來回微燒二十秒，就可以掌握到六成熟嘅最高境界。完成品有輕微牛肉味，油花比較少，所以肉質麻麻，好一般。

4. 法式香草羊扒﹕ 我地功力深厚，羊扒剛好燒到六、七成熟，中間仲有粉粉嘅肉色，但六成熟嘅羊扒，肉質並唔算太嫰。調味亦略嫌太輕手，香草味同鹽味都不足，還好羊扒味道夠羶。

5. 鹽燒薄牛舌﹕ 牛舌超薄切，口感良好，夠爽口，牛舌只用鹽調味，但亦夠入味，而且勁羶，味道唔錯，每份得兩塊實在唔夠喉。

6. 意大利香草雞﹕ 四件雞肉係用綠色唔知咩汁醃過，就係所謂嘅意大利香草汁。雞經過燒烤後，雞皮微微焦脆，雞肉入口幾嫩滑，肉汁豐富，都算唔錯。

7. 鹽燒鯖花魚﹕ 團購餐單無寫到嘅神秘貴賓，相信係用黎取代左祕製魷魚鬚。兩件鯖花魚都算幾大件。魚皮同邊位燒到香脆，能夠鎖住肉汁，魚肉比較紮實，只用鹽黎調味，味道簡簡單單。

8. 鹽燒黑豚肉﹕ 可以任點任食，無限量追加嘅豚肉，睇落脂肪比較多，燒過後肉質入口即溶，肉味亦夠濃，只需加鹽同胡椒已經相當唔錯。最後兩個人總共追加左八碟，即係三十二塊，但質素一碟比一碟差，一碟比一碟鞋。
9. 甜品﹕ 所謂無限量追加嘅甜品係忌廉泡芙。泡芙細細粒，似喺雪櫃拎出黎，裡面嘅忌廉仲係硬硬地，冰凍凍，似雪糕泡芙。總數叫左十四粒，一啖一粒做甜品唔錯。

套餐仲跟白飯任裝，基本上一碗已經好夠食，相信無人咁傻仔添飯掛。
最後，不得不讚下個沾醬，味道好香好濃，甜甜地，配燒肉認真唔錯。

一向都知道，日式燒烤價錢唔平，而家計埋加一，午餐半任食都係$75一位，包飽，價錢真係抵。食物唔算得好突出，但亦唔算差，不過不失咁啦。有團購的話，的確值得一試。

偷瞄到晚市燒烤放題開價二百幾蚊，都係大路公價，呢個價錢，相信仲有更多更好嘅選擇。

溫馨提示，訂座嘅時候，職員竟然話團購只會做到十月三十一日，之後餐廳會裝修，但自己都唔知自己裝修幾耐。職員亦勸籲團購客一係就早啲食，一係就問番谷旁安排退錢。如果佢咁都講得出口的話，十一月一日餐廳仲存唔存在都係一個問題，想試就睇緣份啦。

日式燒烤最happy之處，莫過於自燒自食，要控制火喉，燒到合適嘅熟成度，真係幾考功夫。食材本身質素好係其一，醃得出色係其二，燒得恰到好處係其三。所以燒肉好唔好食嘅責任，並唔係只在於餐廳。名副其實係餐廳、食客通力合作嘅一件大Project。

遺憾美味酒吧西餐

Live House@太子
23/10/2011 19:30

喺集購城用$58買左兩張團購券，去一間位於始創斜對面某一座大廈嘅地牢位置，真係行過N次都唔會留意到嘅酒吧式西餐廳試菜。

Rockn' Roll ($42)
特式飲品有熱情果汁、檸檬汁同可樂。熱果汁其實係糖漿，搞唔勻沉晒底超甜，檸檬汁唔多覺，可樂似開左好耐走晒氣。以酒吧黎講，呢杯飲品幾失敗。

卡邦尼意粉 ($68)
唔知幾時開始，愛上左卡邦尼意粉。可能因為佢最傳統，材料簡單，可以食到廚師嘅手勢，的確呢碟意粉非常好。白汁濃稠度適中，非常掛麵。醬汁調味好，忌廉、蛋汁各自發揮出來。意粉有適當軟硬度，仍保持煙韌。材料簡簡單單，有煙肉、磨菇、少許洋蔥，整體味道剛好。可算係印象中最好嘅卡邦尼意粉之一。但份量略少，不出十啖已經完全KO。

法式香草烤羊架 ($128)

過百蚊一份羊架，有四至五舊，可算係份量正常。羊肉煮得七、八成熟，夠嫩夠腍，肥瘦適中，脂肪位嘅羶味更加係無得彈。調味清清地，只有鹽、胡椒同香料，加一層薄薄嘅燒汁，更顯羊肉本身嘅鮮味。兩個人分真係唔夠過癮，伴碟嘅薯條同脆玉瓜、茄子都唔放過，全部清晒。

環境、服務態度良好，食物亦唔錯，但出到門口總覺得唔夠飽，更帶點遺憾地離開。

吳順超之一﹕

不嬲都對呢類型嘅酒吧式餐廳興趣不大，買嘅時候係見到午餐好吸引，一心諗住$29平平地可以一試。點知booking時，佢突然限制左使用日子，話星期日午市唔用得。明明團購網話一至日適用，呢下已經有啲唔順氣。要用的話，惟有硬食星期日晚餐，改為每張券當晚市$100現金使用。

極不滿之二﹕

到場時坐左一枱約十人嘅大客，三枱二至四人，基本上唔係Full House。上菜速度未免慢得有啲過份。足足等左25分鐘先黎一杯飲品，45分鐘先將意粉送到，50分鐘羊架先出現。而當時嘅座位冷氣頗勁，食物好快已經吹到凍晒，等左咁耐想慢慢嘆都唔得。

憤怒鳥之三﹕
最後埋單$238，補差價$38，計番團購券，實價$96，食到意粉，又食羊架，價錢係抵，但以我嘅能力係可以更抵，就因為硬食晚餐，可以話失去晒預算，非常之唔順氣。
以$38呢個差價，其實大可以買多一張現金券，變相多一百蚊quota用，total $300兩個人已經好見使，叫多個意粉都仲得。以我慳得就慳嘅性格，平時喺購買嘅時候已經諗過度過計過數，按預計消費金額而決定買幾多張券，務求將差額補得越少越好。如果一早預計到要食晚餐，我絕對有理由相信會因應價錢去買多一至兩張券。唔洗就住就住，到離席時都未覺飽。

料理雖好，但因為唔心甘唔情願，總覺得有啲遺憾。

上班一族專利雞批

金鳳茶餐廳@灣仔
18/10/2011 12:00

難得行過灣仔開會，同事仔請食金鳳雞批 ($7.5)，新鮮出爐超正!

拎到番公司，足足半個鐘有多，食嘅時候都仲暖暖地。好野!
一拎上手就聞到好香牛油味，批皮比一般嘅略厚，但完全唔影響佢鬆化嘅口感，鬆脆得黎有啲似蛋撻牛油皮嘅質感，牛油香得黎完全唔覺油膩。

中間內餡都非常豐富，雞切得比較大塊，夾雜左少許粟米同火腿絲，但略嫌火腿份量太少，香味不足。平時食嘅雞批好多時都有蘑菇同洋蔥，但呢件雞批卻欠奉，味道簡單，反而更加突顯佢係一件「雞」批，唔係雜批。材料調味適中，黏度適中，但唔太忌廉，相對無咁飽膩，作為下午茶一流。

佢的確係一件好雞批，感覺上批皮仲突出過餡料，但仍然相當精彩。
得閒行過不妨買番半打益下同事。有啲葡萄灣仔嘅朋友...

鞍山沙漠中的綠洲﹕芝士薄餅

Cheese Pizza@馬鞍山
16/10/2011 20:00

馬鞍山真係無乜野好食，商場俾大型連鎖餐廳佔領晒。點都要搵食的話，都仲有少量質素算可以嘅選擇。$88一個二人套餐，可以食到Pizza，價錢係一大吸引。

套餐包括一個自選六吋迷你批，飯、意粉或小食任選兩款，仲有湯或餐飲，兩個人係絕對夠食。

櫻之花薄餅﹕ 材料有千島汁、煙三文魚、洋蔥、粟米、獅子狗魚蛋、蟹柳、紫菜、芝麻等。

厚批餅皮夠鬆軟，有好香牛油味，口感有啲似麵包，韌韌地，但批面芝士略嫌唔夠多。日本風味嘅薄餅通常都係配千島醬，三文魚唔多覺佢嘅存在，洋蔥、粟米、獅子狗比較突出，味道偏甜。平平地廿幾三十蚊一個，算係交足功課。

炸雞﹕ 超大隻炸雞嘅外皮比平時食到嘅深色，炸皮比較厚身、硬身，似係基因雞巴辣香雞嘅炸皮，勝左炸得乾身，唔算油膩。脆皮底下係厚實一大件嘅雞肉。雞肉厚身得黎仍夠軟嫰，每咬一啖都充滿肉汁。但雞肉始終無乜味道，惹味度不足，最後淪為茄汁魔虐待嘅對象。

百里香燒豬排骨﹕ 非常、十分、極之驚喜嘅一味。排骨足足有十條骨，鍾意食呢味嘅人，一定最愛佢骨肉相連嘅精髓，半肥瘦嘅肉，仲有骨邊絲絲細筋。排骨烤得好，切開肉仍見到迷人嘅粉紅色。熟成度剛好，肉質唔韌，亦有肉汁。用香濃嘅香草、黑胡椒調味，盡顯鮮味，亦夾雜左豬嘅羶味。配上酸甜嘅燒汁係另一種更滋味嘅食法。

更喜出望外嘅係，跟排骨並唔係求其幾條放到腍晒嘅薯條，而係炸魷魚圈。薄薄嘅炸粉下，係新鮮魷魚，非常煙韌，極之足料，唔會粉多過餸，而且味道唔錯。

今時今日，$88食得飽兩個人，已經無怨言，仲要係食Pizza，食豬仔骨，更加係無投訴。總覺得Cheese Pizza係打正旗號要做低基因雞同比殺黑，但以平價快餐形式經營，係有佢嘅優勢。總好過花四十幾蚊，去基因雞買個一人餐，兩隻基因雞仲要縮水縮左足足一半。平時兩個人想食Pizza的話，無番兩舊水都唔洗旨意落到樓，而家只需近乎三份一價錢，已經食到正常水準，邊度搵呀? 

眼見Cheese Pizza越做越大，分店越開越多，慢慢都變左做連鎖式餐廳，只好求神拜佛佢質素唔好下滑太多。阿彌陀佛。

不舒適便輸鳥

XD Cafe@尖沙咀
16/10/2011 14:00

千辛萬苦，打過幾次電話，終於都book到呢間Cafe。團購優惠足足有3000人買左，佢仲周時會俾人包場開Party，係唔係咁受歡迎呀? $32食到一個佢話係意日泰fusion套餐，套餐包餐湯、小食、意大利粉同飲品，純睇價錢都幾吸引，好唔好食真係要試過先知。

磨菇忌廉湯﹕一睇就知係罐頭湯，湯面滿佈一點點白色，閒時仲撈到一pat pat，一片片白色未溶嘅忌廉漿。而且加水加得太多，非常稀，無乜味，好彩仲有一粒半粒磨菇仔食下。

榛子朱古力、薄荷朱古力﹕開粉開得幾夠味，榛子味夠香，朱古力係牛奶朱古力味，可能因為少冰，所以味道偏甜。另一杯薄荷朱古力都夠味，但薄荷味較奇怪，好牙膏。

蒜香雞翼﹕四隻發育不良、超迷你嘅雞翼，無乜色水，賣相麻麻。似乎係即叫即焗，外層有少許蜜糖嘅甜味，仲有好輕微嘅蒜味，味道唔足夠，要加倍! 咬落口肉質幾鞋，好似輕微過熟，但焗雞翼最好就可以保存肉汁，肉汁都算幾多。

越南庶蝦﹕四件細細嘅越南庶蝦，相信都係現成貨，蝦肉似魚肉，少少爽口，無乜特別。

香蒜海鮮意粉﹕意粉材料有硬硬地嘅魷魚、超迷你青口、極細粒蝦仁，仲有蘿蔔絲、半生熟洋蔥，同埋唔少菇類，名副其實一碟菇類多過海鮮嘅意粉。意粉煮得幾好，保留應有嘅煙韌度，而且炒得夠乾身，惟獨蒜味略嫌不足，唔夠香，蒜蓉應該都要加倍。

天婦羅蝦燒汁意粉﹕兩隻天婦羅蝦從佢唔均勻，亦唔金黃嘅外皮色水黎睇，應該係焗嘅。好處係比油炸少油，比較唔油膩。好彩皮都夠脆，較油炸乾身。但內餡就一般，炸皮太厚，炸粉仲厚身過隻蝦，而且蝦粉粉地，完全唔爽口，似乎買料唔夠眼光。意粉同香蒜海鮮意粉嘅基礎都係一樣，有菇、有蘿蔔絲，只係無左蒜味，換左做燒汁。但燒汁極少，落左都唔多覺，需要用極敏感嘅舌頭，先可品嚐到丁點嘅燒汁甜味。加多兩湯匙呀，唔該。

Cafe開喺一座行過左都唔多覺嘅唐樓上，想有walk-in客都難，所以多做包場開Party。訂左首場下午兩點鐘位，點知一入去到，就聞到超級大陣油煙味，而且開左冷氣都唔多涼。單以樓上Cafe，食客多數都想坐多陣、Hea多陣嘅性質，星期日兩點至三點呢個時段，絕對會俾劣劣評。

食物方面，好似樣樣做一半，明明個基本做得好味，但結果總係差少少，只需要加多倍，成個味道，成個感覺已經唔同晒。以樓上Cafe黎講，最值得讚嘅係，食物即叫即做，送到黎係非常熱辣燙口。而且店方選擇用焗爐、電磁爐，都唔用微波爐係一件功德。

以$32黎評一份樓上Cafe午市套餐，食物係正常，而且合理質素，比一般Cafe開價七、八十蚊一個餐黎講，已經係抵到爛。但輸嘅係，我地只會食飽走人，唔會視佢為一間樓上Cafe，坐定定吹水唔走，因為溫度同氣味令我地頂唔順。唔知其他時間嘅情況係點，只論當日兩點嘅親身感受，環境舒適呢Part我真係會俾零分。環境舒適係Cafe最重要嘅一環，就呢一個環節，佢已經輸左。

馬鞍山無野好食之即食日本料理

御沢日本料理@馬鞍山
9/10/2011 20:00

出街慣左用團購券當錢洗，點指兵兵點中邊張團購券就去邊度行街。今日無券在手，搵食都毫無頭緒，惟有返屋企附近求其是但食。本身諗住排元氣壽司，點知要等成一百張飛，都唔知等到幾時。由六點半ready等食飯，到八點都未諗到去邊食。依稀記得新港城某後街有間日本料理食過OK，就去果度。

雜錦魚生飯套餐，跟餃子、麵豉湯、中華沙律 ($54)
雜錦魚生飯唔多覺有幾雜錦魚生，食到有三文魚粒、白色魷魚、蟹子，好似仲有一粒蝦之外，其他材料並唔係雜錦魚生。好明白五十幾蚊唔能夠要求一碗色彩好豐富嘅雜錦魚生飯，唔好咁大想頭期望有白色、粉紅色或紅色果啲魚生，只求夠餸扒埋果幾啖飯。望上去幾燈色，三文魚係其中一種，都算幾新鮮，幾鮮甜，而飯面有一半都係蟹子，都知係假蟹子黎，味道都係咁，但唔夠送飯食囉。

餃子係某牌子解凍即炸，個皮韌韌地，個餡虛虛地，味道麻麻地。
麵豉湯係加熱水開粉式，唔想飲。
中華沙律，即係果啲一條條滑滑地、又爽爽地嘅綠色生物。都知道係批發連調味一早整定晒，只可以話佢啲貨無問題，味道正常。

照燒雞扒拉麵套餐，跟三文魚壽司、中華沙律 ($55)
照燒雞扒係無乜調味嘅雪藏雞扒煎熟後，煮多個話燒汁唔燒汁、咸咸甜甜嘅中式蠔油芡，再灑幾粒芝麻，果幾粒芝麻真神奇，係和風口味嘅重點所在。拉麵係非常之咁無得彈，因為佢係即食麵扮拉麵。即食麵口感粉粉腍腍，完全無煙韌感。湯底相信係連即食麵附送嘅豬骨湯調味粉，但可惜味道唔濃。如果因為成本所限，都係要用即食麵的話，不如直接買出前一丁特濃豬骨湯麵黎煮，我會比較喜歡。早排仲新出左隻黑蒜油豬骨湯，其實我都想試下。又或者買雪藏冷製嘅味千拉麵，都係附湯包，味道正常。喺大埔二十零蚊都食到一碗，仲包埋飲品，相信批發價唔貴，店方可考慮一下。拉麵惟一可讚係配料充足，有齊昆布、魚板、粟米、青蔥同半隻全熟蛋。

另外果兩件超迷你三文魚壽司更加係精彩。三文魚完全無任何生命跡象，死實實，凍冰冰，連舊飯都係冰凍結實。參考餐牌，一客兩件嘅三文魚壽司索價$15。好似元氣、板長都係咁上下價錢喎，請問你憑咩? 因為係套餐小食，所以按比例縮水? 應該係啦。

芝士吉列蝦卷 ($45)
食完兩個餐之後，好似仲未有滿腹之感，所以叫左一客上次食過印象唔錯嘅卷物，再考驗一下佢退步嘅程度。卷物外層係厚身芝士，仲有少許蟹子放上面，芝士包住紫菜，之後係薄薄一層壽司飯，中間係一大舊吉列炸蝦。配上微酸清爽嘅蛋黃醬，呢款壽司無須多沾豉油。

食過之後，即刻心滿意足，卷物果然係全場最好味。芝士經過輕微火炙，喺濃郁嘅芝士上有微微嘅燒焦味。壽司飯並唔係重點，因為吉列蝦已經佔據左八成半嘅直徑。幸好吉列蝦炸得好，外皮夠脆，蝦肉亦爽口，配上蛋黃醬更見濃郁。估唔到此款卷物仍然係水準之作。(編按﹕係此款熱食卷物ONLY，聞說其他凍食款色都係麻麻。)
最後加左五蚊雞叫左杯唔知乜鬼野玉露飲品，可以濕下個口。

可幸埋單唔洗加一，因為佢都無乜服務，可憐到連斟杯茶都好似有困難咁。埋單總數$159。
一個日本料理套餐開價五十零蚊絕對唔貴，但價錢同質素唔岩比例，只係個卷物物有所值。相信下次就算元氣要等二百張飛，我地寧願轉行食茶餐廳，都唔會再黎。

呢個價錢，喺旺角啲咁貴租嘅地方都仲有好多好嘅選擇。就算連囍帖街阿姐兩公婆都會幫襯嘅大埔人氣名店御八築地，價錢都係差唔多，咁不如搭多兩個站去大埔搵食算啦。

又一次驗證到好多人話馬鞍山無野好食，係岩嘅。

名店名物Go高糕!

坤記糕品專家@深水埗
9/10/2011 14:00

團購已經做到爛晒，團購優惠越來越唔吸引，可以全個星期一個團購都買唔落手，所以選擇遊走深水埗區搵平食。食完蝦子麵食埋個甜品，去左一間歷史悠久嘅中式糕點專門店買糕點。

芝麻糕 ($7)
高身又黑麻麻嘅芝麻糕一層一層堆砌，質地柔軟，可能因為預先包裝，邊邊位置有少許溶化，變得一pat野。質感係可以話入口即溶，無粒粒好幼滑，但好腍好粉，並非期望食到嘅煙韌感。芝麻味，有嘅，但唔濃郁，亦唔夠香，未至於人地所講嘅流動芝麻糊咁誇張。其實好普通料，七蚊一舊仔，不如俾多幾蚊食芝麻糊好過。

白糖糕 ($5)
白雪雪嘅白糖糕，係此店最出名嘅名物。最鍾意佢一絲絲嘅條紋，食落夠鬆軟，亦夠煙韌彈牙。一入口係一陣好清甜嘅白糖味，味道唔錯。但趙多幾啖，開始食到微微嘅酒味，繼而係酸味，相信係因為發酵時間過長，所以味道變酸。細細一件賣$5，其實真係貴。

名氣超大嘅一間舖，有無數個報紙、雜誌、電視節目介紹過，無數個名人黎採訪過。好多由細食到大嘅街坊，都慨嘆報導靠害。報導令出名的更出名，人氣越勁，賣得越多，越難保持固有水準。好多街坊都話，糕點無以前咁好，退步左好多。
算啦，對我黎講， 叫做試過所謂嘅名店，食過所謂嘅名物就算。

澳門蝦子麵名店第一代替品

劉森記@深水埗
25/4/2011 15:00
9/10/2011 13:30

@褔榮街
25/4/2011 15:00

聞說劉森記係香港少有嘅竹昇麵老店，又得到蔡生推介，係佢唔知幾多間常去食肆之一。開飯網友熱捧老店二百幾個好評，值得一試。

雖然網友熱點蝦子撈麵配雲吞同黑牛柏葉，但好想好想食炸醬，所以點左炸醬蝦子撈麵同牛筋腩蝦子撈麵。等餐途中，見隔離叔叔auntie密密食枱上嘅醃蘿蔔， 本來對呢啲咸濕野冇乜興趣，都貪得意夾兩粒食。嗯~爽爽脆脆，酸酸辣辣，正好當做開胃前菜，原來係呢間小店嘅獨特供應。

蝦子牛根腩撈麵 ($30)

蝦子撈麵一上枱，「啲蝦子唔洗錢架?」三十蚊一大碟，睇見都滿足。

牛筋腩煮得夠軟腍，腩汁香濃，夠入味。蝦子真係有蝦味，配上乾身幼麵，簡直係perfect match!

炸醬蝦子撈麵 ($30)

正係久違了炸醬嘅味道，香濃肉絲帶啲啲微辣，配麵剛好。但炸醬嘅濃味，稍稍掩蓋左蝦子嘅香味，炸醬同蝦子似乎唔夠朋友。另外，不得不提配麵嘅清湯。湯底極之鮮甜，一啲都唔油膩，係撈麵嘅良伴。

劉森記係一間值得encore嘅小店，比得上澳門嘅蝦子麵名店。

下次食好野唔洗走去澳門lu~遲啲要去隔離街正牌老店，食番網友熱捧嘅兩樣先，聽講老店比新店仲好!

後記

@桂林街
9/10/2011 13:30

2011年4月到訪過新店，今日終於的起心肝排下老店。今次去老店，特登點番最人氣嘅兩味。

蝦子雲吞撈麵 ($33)

竹昇麵仍然保持水準，都係十級彈牙，勁級煙韌。蝦子一大堆，灑滿麵上。細細粒非常脆口嘅蝦子，咸咸地用黎撈麵，將蝦嘅鮮味帶落麵條上。三粒雲吞選擇跟湯另上，鮮蝦同鮮肉比例剛好，味道唔錯，雲吞皮亦夠滑溜。出奇地，連條芥蘭都非常清甜好味。

蝦子薑蔥黑柏葉撈麵 ($33)
近排突然變黑嘅黑柏葉，因為未經過加工，好似健康啲，所以開始受歡迎。黑柏葉非常爽口，但好似白煮無乜味道，惟有自加辣椒豉油，或者撈埋薑蔥一齊食。除左口感之外，好似無乜特別。

半年時間，蝦子麵已經由$30加至$33，加價足足有一成，可見通脹幾咁強勁，只好期望加左價，唔會影響食物質素。老店環境始終唔及新店咁舒適，地方淺窄比較迫。感覺上，竹昇麵都係出自同一個師傅之手，蝦子都係同用一種製法的話，新店同老店嘅製成品，應該都係一樣嘅，咁下次不如去番新店，坐得舒服啲吧啦。

新潮老字號雲吞麵

六座雲吞麵@佐敦
5/10/2011 19:30

呢間小店坐落喺白加士街，隔離附近全部都係出名嘅老牌食店，睇個格局似係新開張。喺激安團購用$28買到一人滋味麵食套餐，包括小食、油菜、粉麵，仲有飲品，價錢唔貴，就去試試乜家伙。

柱候牛腩麵
一碗十級足料嘅牛腩麵，有五、六大舊牛腩，邊食邊尋到麵底仲有幾舊牛根，好似食極都食唔完，十級滿足。牛腩肉質爽口，都算幾入味，而牛根含豐富膠質感，比較結實，並唔係入口即溶嘅口感，但都幾有柱候味，味道唔錯。清湯底有少許腩汁味，再伴入少許青蔥同芫茜，味道更濃厚。

招牌雲吞麵
話晒招牌，果然有番咁上下料子。四大粒雲吞晶瑩剔透，薄薄嘅雲吞皮隱約睇到鮮蝦嘅橙紅色。非常鍾意佢嘅雲吞皮，薄之餘，亦好幼滑。皮靚餡亦好豐富，鮮蝦同鮮肉結實地撈埋一齊，蝦係原隻嘅，非常彈牙爽口﹔肉係鮮甜嘅，成粒雲吞味道好鮮味。
而幼麵都做得相當唔錯，麵質夠煙韌彈牙，有些少鹼水味，再配埋個湯底，就係最簡單、最傳統嘅港式風味。我並唔係什麼大師，唔會一啖就飲得出個湯有咩咩材料，只覺得湯底好清，好鮮甜，亦有好香胡椒味。返到屋企做番功課，知道湯係明火熬製嘅豬骨大地魚湯，乜湯都好，好味就得。

油菜
兩碟正常不過嘅油菜，最欣賞佢一細碟菜都好豪氣咁俾一大pat蠔油。家陣啲舖頭好少咁闊佬，佢唔加你一蚊都偷笑。

祕製豬頸肉
祕製即係新奇煮法，平時食開煎豬頸肉、炭燒豬頸肉、汁燒豬頸肉，今次整個炸豬頸肉。豬頸肉用炸粉包住拎去油炸，的確係炸得脆口，但炸粉仲厚過塊肉，而肉味都被炸粉蓋過，味道一般。

酥炸雲吞
四粒雲吞個皮都係脆到不得了，可能炸雲吞嘅重點不在餡，感覺炸雲吞嘅內餡比較薄弱，仍然有彈牙爽口嘅蝦，但風頭都俾炸皮蓋過。

幾樣食物都係質素良好，惟獨杯飲品真係抵鬧。有乜理由凍奶茶可以無茶味，凍檸蜜飲唔到菜蜜味，只覺得係檸水? 麵雖好，但最後衰喺杯飲品度，真係乜印象分都扣晒。

$28一個套餐，絕對抵食。舖仔細細，似乎係新開張，裝修企理，職員態度亦良好，又好熱情，係一間好親切嘅小店。後來得知佢始創於1966年喺藍田邨，算得上係老字號，所以麵食真係有相當質素。但可能係開分店掛，踩入白加士街，一條街周度都係更出名嘅老店，競爭實在太大。恕我孤陋寡聞，如果我有心去佐敦搵食，我會選擇更老字號嘅老字號。

無論點都好，六座雲吞麵嘅雲吞麵係我鍾意嘅味道。從佢嘅裝修、餐牌所見，感覺上佢比較似喺傳統上加入新潮、年輕嘅元素，有呢種膽量亦係好事，祝你成功。

可愛又可恨的彩色小甜筒

Mazazu Crepe@沙田
12/9/2011 14:30
2/10/2011 19:00

平時甚少逛嘅Q幫娜娜團購，一係唔出，一出就係非常吸引嘅優惠。今次半價食Crepe，用$15買到$30現金券，任選色彩繽紛，極之吸引嘅法式薄餅。
分開兩次幫襯，兩次都係選擇同一個Double Jouir Crepes組合，由蛋糕、水果同醬汁組成，自由配搭鍾意嘅材料。

12/9/2011 14:30
芝士蛋糕、香蕉、可可醬 ($37)

第一次食，選擇左黃今今嘅組合，又香蕉、又芝士蛋糕，拎上手都係黃色嘅。餅皮煎得好薄，薄得黎亦非常軟熟幼滑。無錯，皮薄都可以好滑，係無粒粒唔鞋口嘅幼滑。餅皮有微微嘅蛋香味，亦算煙韌，就算只配搭鮮忌廉，已經好滿足。鮮忌廉係低脂忌廉，相信亦係低糖少甜，佢話係由日本大阪入口嘅低膽固醇植物脂肪鮮忌廉，所以奶味較為突出，亦無一般鮮忌廉嘅油膩感。鮮忌廉最誘人之處，莫過於其滑不溜口嘅口感，一大啖送到入口，總會滑溜到唧番出嘴角。

選擇左芝士蛋糕，並唔係結實嘅餅型芝士蛋糕，而係比較腍身、鬆軟嘅日式芝士蛋糕。可能因為配上濃甜嘅可可醬，芝士味道並唔突出，只有淡淡奶味。加上新鮮嘅香蕉肉，就係一個非常豐富嘅下午茶小食。

2/10/2011 19:00
布朗尼餅、草莓、焦糖 ($37)

第二次到訪，選擇全新嘅配搭，希望食到唔同材料嘅味道。今次呢位職員小姐嘅手勢，明顯比上次果位好，材料配色亦較上次吸引。中間一大舊布朗尼餅，未食已經見到兩層朱古力嘅顏色，口感比芝士蛋糕更結實，亦有少少脆脆口感，中間係濕潤極濃郁嘅朱古力蛋糕。明顯布朗尼餅比芝士蛋糕更勝一籌。加上酸酸甜甜嘅草莓同焦糖漿，亦不失為一個好配搭。

除左食餅之外，邊等邊睇住個製作過程都係一種享受。就好似玩Flash Game咁，左邊唧啲，右邊加啲，再捲成一個雪糕筒形狀，實在過癮。得閒又可以望下櫥窗上色彩繽紛嘅食物模型，區區消磨三、四分鐘等候時間，真係太容易。

可麗餅Crêpe，可愛嘅名稱，係甜魔又愛又恨嘅美食。
頭痛﹕件件都色彩繽紛好吸引，又可以自由選料，選擇太多，花多眼亂，唔知揀邊款。
可恨﹕材料同熱量成正比，材料越豐富，付出嘅代價越大，而且仲有最邪惡嘅鮮忌廉。好彩Mazazu Crepe提供低脂忌廉，減淡罪惡感。

如此可愛又可恨嘅甜品，多得團購，補番$7差價，只需付出$22就可以食到。
平時食甜品只會諗到去甜品舖坐低慢慢嘆，同樣都係三十幾蚊嘅價錢，Crepe係另一種邊行邊食嘅甜品選擇。

輕食名單新力軍

Délifrance Café@沙田

2/10/2011 18:00

Délifrance竟然做團購!! 只需半價$15就可以買到$30現金券，散叫或套餐都適用，咁著數當然要支持下。格過價最抵食係趁下午茶時間叫套餐，最後特登搵日出左沙田食過下午茶當early dinner。

迷你法式三文治配凍咖啡 ($32)

有三件迷你三文治，每件都有暖暖地又脆脆地嘅法包，法包上有新鮮蕃茄、沙律菜同主角材料。其中一件係白汁碎蛋沙律三文治，碎蛋沙律味道唔錯，有好香蛋味，加埋蛋黃醬，口感粉粉腍腍，仲有粒粒蛋白。當沙律淨食已經相當唔錯，配法包亦係一種好食法。另一件係芝士大蝦三文治，大蝦幾新鮮，夠爽口彈牙，簡簡單單配上一細塊香濃芝士，加埋生菜已經好好味。最後一款係吞拿魚三文治，魚肉比較實淨，撈埋甜甜酸酸嘅沙律醬，味道唔錯，吞拿魚始終都係最岩做三文治。

法式熱狗伴白汁碎蛋沙律配凍奶茶 ($34)

法包除左可以做三文治之外，仲可以配熱狗腸。香脆嘅法包塗左酸咪咪嘅酸瓜醬，但醬汁落得比較吝嗇，唔太夠味。好彩大條粗身熱狗腸仲唧左沙律醬，但味道一般，腸衣唔夠脆，腸肉只有咸味，無乜肉味。配菜碎蛋沙律同三文治果款一樣，味道一樣好。但整體黎講，唔夠三文治好味。

本平好少食Délifrance，總覺得法式野價錢唔平，只食法包三文治，男士會唔會唔夠飽。今次團購體驗令我對Délifrance改觀，原來Délifrance都係好平易近人嘅快餐式餐廳。套餐價錢相宜，法式三文治的確唔錯。餐牌仲有幾款甜果撻、雞卷等好想試，但係已經一早售罄，惟有下次。今次體驗成功，Délifrance將被列入輕食名單中。閒時想食下午茶，除左西多之外，都可以食下法包。

史上最差怪味乳酪

YO+ Frozen Yogurt@旺角
2/10/2011 15:00

乳酪係最佳飯後甜品，各大小團購都趁天氣仲未涼，勁賣乳酪現金券。團購賣乳酪一般都最少有半價優惠，好多時仲有三、四折添。今次喺筍仔網用$19買到$43現金券，試食旺角新開張Yo+。呢間乳酪店原本荃灣有一間店，後來關門大吉，轉戰旺角鬧市。

 

原味、朱古力味乳酪 ($45)

小店採取全自助形式，由唧乳酪到加配料都可以自行處理。小店提供兩款乳酪，十幾款唔太新鮮嘅水果加十幾款奇特嘅乾身配料。

是日有原味同朱古力味，自助唧嘅時候已覺得乳酪好溶、好水。加埋配料之後，已發覺部份乳酪開始溶化，未食就知質地唔掂。原味乳酪只有丁點酸味，味道偏奶，完全冇乳酪清爽涼快嘅感覺。質地確實偏腍，非常易溶，而且中間有細細個氣孔，相信空氣含量非常多，口感並唔幼滑。朱古力味更加可怕，千祈唔好期望係特濃朱古力，係味道偏淡嘅牛奶朱古力，可可味唔濃，只有些少朱古力奶味，無論係口感同味道，都似喺便利店用兩大蚊買到嘅朱古力味軟雪糕，如果只係一杯唔好味嘅軟雪糕的話，我唔需要俾多十倍價錢囉!

呢間店嘅配料比較特別，好多新奇嘅配料都係第一次見。正常嘅選擇唔太多，而且唔吸引，所以惟有揀幾款唔正常嘅配搭，選擇左OREO、朱古力脆波、綠色麻糬、紅豆、芝士餅。原來綠色麻糬係蜜瓜味麻糬，中左伏，味道好假。紅豆係用糖水煮腍左嘅紅豆，味道正常，但唔襯乳酪。而芝士餅係芝士味餅乾碎，幾乾身，味道幾好，但芝士始終有少少咸味，同乳酪唔太夾。乳酪唔太好味，配料太過新奇又唔夾，成杯好奇怪。

呢杯乳酪原價$45，用左現金券補番$2，總數$21。$21食一杯乳酪其實有好多選擇，排隊都輪唔到呢間。多得團購，大大話話都試過差不多十個唔同牌子嘅乳酪，有好味、有普通味，今次終於食到稱得上難食嘅乳酪。原本諗住食個午餐後甜品，點知換黎一杯奇怪乳酪，期望落差太大。相信呢間係我地飲食史上最差，絕對會列入黑名單，冇得反轉頭嘅一間。

麻麻地潮人餐

潮廷匯@尖沙咀

2/10/2011 13:30

而家呢個時世，閒閒地一個午餐四十幾蚊走唔甩。蜂買團購$45買到一個豐富潮式午餐，有齊點心小食、主菜配麵，仲有甜品任食，睇落都幾吸引。最後付出左九十大元。

每個午餐跟點心小食兩款，小食小小食，每份兩件，開下胃。 

@香草煎魚餅﹕ 外型似泰式魚餅，味道係確確實實嘅泰式魚餅。口感爽爽地似魚蛋，有少許香茅味，小小咖哩膏辣味，味道正常嘅魚餅。

@燒汁木魚餃子﹕ 就係煎得唔脆、餡唔豐富嘅日式菜肉餃子，加埋濕濕地嘅木魚絲，非常普通。

@鹵水紅腸豬耳絲﹕ 正常，其實好難唔正常。紅腸較腍，都幾入味。豬耳算爽脆，都算入味。

@毛袒醬鳳中翼﹕ 諗極都唔知咩叫毛袒醬，好奇心推動下叫左一份黎試。毛袒醬似係豆豉同沙嗲醬嘅混合體，少少辣，多多咸，感覺幾油膩。雞翼雖然大隻，但煮得太熟，肉質幾鞋。

 

主菜係中式小菜，細細一碟有幾件食下。

@台南肉燥牛筋腩﹕ 有幾大舊又硬、又實嘅紅蘿蔔，加幾細舊牛筋腩。牛腩有啲韌，唔夠入味。印象中台灣肉燥應該有肉碎，但食完成碟連一粒肉粒都見唔到，究竟何來肉燥?醬汁似柱候醬，極其量係柱候醬牛筋腩。

@糖醋鮮魚塊﹕ 魚塊炸粉超厚，食到有雪味，完全唔鮮。醬汁唔夠酸，唔糖亦唔醋，只係蕃茄色嘅茨汁。睇樣就知道，炸完啲魚求其淋個汁上面，完全冇翻炒動作。

今餐嘅主打係，佢話獨家首創嘅手唧墨魚汁魚蓉麵，有六種食法，最後選擇一湯一炒。

@龍蝦海鮮湯魚麵﹕ 佢話上湯每日煲制，湯味香濃。老實講，香濃真係唔多覺，只係有些少龍蝦湯味，唔算濃。海鮮湯有少少材料，有迷你青口、迷你魷魚粒等，無乜味。而湯魚麵有一個好大嘅問題，魚麵本身偏腍，用湯浸住更加濕潤更加唔彈牙，感覺粉粉。

@辣鮮露炒魚麵﹕ 佢話係即炒夠鑊氣，食過就知即炒係真嘅，但唔夠鑊氣。魚麵口感比湯麵好，因為比較乾身，較為爽口，但都稱不上煙韌彈牙。味道微辣，有好香麻油味，但唔太鍾意佢加左唐芹做配料。

所謂嘅飯後滋潤、消暑潤喉糖水任食，請貴客自行到小食枱處理。可憐中午約兩點時份，枱上有一煲乾塘到只有幾粒紅豆痴住煲邊嘅紅豆沙，仲有一煲得番木瓜碎屑同雪耳粒嘅木瓜雪耳糖水。最後拎左一碗木瓜雪耳糖水嘅糖水，加幾片約五亳咁大嘅雪耳，可憐到相都無謂多影。其實，糖水都係OK清甜，味道唔錯嘅。

$45團購再加多$11服務費，總數五十幾蚊一個酒樓午餐，唔算太貴。味道有正常，亦有唔正常，整體黎講唔算好味。抵讚嘅係，餐具幾骨子，小食用花邊碟裝住好吸引，服務態度亦唔錯。而酒樓裝修高雅，仲有落地玻璃可以眺望九龍公園，環境幾舒服。

總括黎講，除左食物認真麻麻地之外，其他樣樣都算唔錯。

但....食飯的話，食物唔合格，其他樣樣高分，咁算點?