2017關西親子遊 [6.3 酒店總評]

今次選擇住喺難波，係為左方便來往機場。此行帶住紫凝BB就要更加考慮移動路線，同埋酒店嘅育嬰設施。問過幾間酒店唔係太多酒店提供BB床，所以最後揀左呢間Hotel Monterey Grasmere Osaka。

地點方便

酒店位於JR難波站旁，由車海電鐵站落車，可以沿地下街一路行去JR附近，其實話就話十分鐘，但拎住行李又推住車咁其實都幾遠，不過勝在全程只經過一條扶手電梯，而且一直都有蓋不見天，呢樣已經對我地黎講幫助好大。而且平日移動主要搭地鐵、京阪，由酒店行過去相對近少少，只係頭尾兩日辛苦少少，還算可以啦。最正係酒店樓下有一間大超市，日常所需補給真係超方便。

服務周到
職員英文流利，溝通無問題，而且一早準備好BB床，仲送一份兒童用品，不錯。Check In算快速，而Check Out更係極速，還左房卡就得，完全無安排同事檢查房間，真係一手交一手就搞掂。臨走前寄行李亦相當安全，登記後行李會放入房間，唔會就咁放大堂。

房間企理 配套充足
大集團經營，上到大堂已經感覺到氣派十足。房間大小正常，值得一提，酒店保安唔錯，每層要嘟房卡先可以進入走廊。走廊相當闊落光猛。房間正常大，雙人床正常大，都算舒適，好容易適應。床尾放左BB床，行李仲可以攤開放床尾，算唔錯了。房間提供免費Wifi，上網不錯，但電視台實在收得唔夠清。每日嘅打掃一齊都好整齊，補充物品絕唔慳。每日仲會送兩枝礦泉水。

洗手間
洗手間非常型格新潮，有齊沐浴露、洗頭水、牙刷等，真係乜都唔洗帶。而家都算幾闊落，幫紫凝沖涼都唔會太迫。

價錢
四晚Double Room不連早餐，用HSBC有九折，折實總數$4804，平均每晚$1330，提供埋BB床，帶埋紫凝出門住好少少，三個人還算可以。

2017關西親子遊 [6.2 最高級杯麵]

すみれ

7-11限定，日本十大杯麵第三名。湯頭係非常濃厚嘅味增湯，仲有肉碎，麵質煙韌，不錯。

 

日清奢華勾芡魚翅湯口味
為了慶祝45周年，日清推出限定豪華版「奢華勾芡魚翅湯口味」。

湯頭濃厚鮮味，真係似中式魚翅湯勾芡。

 

日清豪華級三重芝士忌廉松茸杯麵

忌廉蘑菇湯底，據聞係三重芝士馬臣芝士、車打芝士和埃文達芝士湯底，有濃厚忌廉味道、松茸風味，配料有西蘭花和菇片，不錯。

 

麵職人醬油豬骨湯
麵底幾靚，煙韌幼麵有麥香，湯底較淡口

 
元祖雞杯麵
清雞湯不錯，麵質較腍，幼身，蛋花雞肉幾特別。

 
薯條雞肉杯麵
夠大杯，雞肉似麥樂雞，薯條配料幾特別。
 

2017關西親子遊 [6.1 手信篇]

Manneken waffle 比利時鬆餅

盒裝七款口味，每款都唔同。口感幾特別，外層少少脆，中間粉粉腍腍，味道唔錯，甜度十足。有機會要回購。

三款特別的杯麵

Frantz 白朱古力草莓非常好味。免稅店買嘅抹茶草莓都好味，但草莓無咁大粒。

難得終於係機場買到把縮骨遮俾自己，仲有帶番紫凝嘅袋袋。仲有一堆Daiso平野。

2017關西親子遊 第五日 [5.3 See You Again]

兩點鐘到達南海電鐵車站，買到14:35車票，見仲有時間買埋Maneken做手信，七件新鮮雜錦口味¥1100。

14:35 南海電鐵，15:15到機場。但原來時間無多，太趕急唔夠時間食拉麵。
到櫃位Check In，空姐仲俾左兩張優先Pass，過關可以行優先通道。避過左長長嘅安檢人龍，輕輕鬆鬆過關，但日本嘅檢查比較嚴格，水會要求逐枝開俾職員睇同聞，檢查BB車都較為仔細，但一切順利。

入到關內免稅店最後衝刺，黎到行程最後一日發現無乜買過手信，呢度真係要買番夠本，但真係好多人，俾錢都等左一排。

坐無人電車去閘口等上機。16:45上機，Delay左少少，機上有BB籃提供，紫凝實在太眼訓，但籃太細其實佢訓得唔舒服，好扭計，最後抱住訓，訓足全程。

 

飛機餐正常，最好食都食冷麵。

八點半左右落機，過關一切順行，但等行李就係好快，因為都貼左Priority，但點知等極都等唔到BB車，搞到要搵職員幫手，遲左成半個鐘先出到黎。回程搭的士返到屋企。

2017關西親子遊 第五日 [5.2 狂掃黑門]

十二點黎到黑門市場，真在多人多人好緊要，但午餐總要食，去番上次最愛嘅三平買壽司。幸好場內有位坐，人實在太多，總算勉強放到BB車。買左一份吞拿魚、三文魚雙拼(¥3000)，吞拿魚係非常之咁好食，鮮甜唔腥無筋。三文魚都係好鮮甜，仲有無限咁多三文魚籽醃得非常入味，超正。另一份鰻魚(¥1800)，都係無得輸。另外買左燒元貝(¥3800)做手信，非常大隻，幾多汁幾入味。

石橋關東煮，每款¥100，要左4款，包括豆腐、牛筋、魚片同竹輪，熱辣辣又味道不錯，紫凝BB都好鍾意。最後就係西川鮮魚店嘅即開海膽¥1800有L size，開好你果隻後，仲係上面潛建多三層，咁嘅份量仲想點，而且係超級鮮甜，好有海味，喺日本先食到咁好味。
 
黑門市場食嘅仍然唔錯，但係人實在太多，無乜興趣再返轉頭了。
一點半回程返酒店拎行李，準備返香港了。

2017關西親子遊 第五日 [5.1 GFO ]

最後一日行程係難波、梅田附近行。九點Check Out後搭車去梅田，諗住試下出名嘅Pancake做早餐，點知又遇上幾個月一度嘅地下街定休日，改為直接去GFO搵食，選擇唔多，得呢間Tully Coffee似有早餐。

 

柯打左一份Pancake(¥650)、蛋三文治(¥350)、Coffe ¥310。
 

黎得GFO就係想睇下呢度嘅科技野Knowledge Capital Active Lab。都係啲大學生嘅研發，較為得意就係呢部換衫機。

十一點離開，回程去難波，DAISO狂掃。繼續向黑門市場進發。

2017關西親子遊 第四日 [4.3 夜遊天王寺]

係時候搵晚飯食，Market Place就無乜特別野好食，見時間尚早，橫掂有周遊卡任搭地鐵，決定增遊天王寺行一陣食晚飯。七點黎到天王寺，一出車站就見到新建築あべのハルカス，就係近鉄百貨12F就有好多間餐廳，揀左呢仙台牛舌利久。

柯打左兩個套餐，各¥1650。有湯、飯、沙津、四至六塊燒牛舌。燒牛舌非常腍，入口肉質似牛腩，已經加上鹽、胡椒調味，味道不錯，伴碟仲有少少酸泡菜，配埋一齊食都幾特別。牛肉湯配上大量清蔥幾清甜。番茄燉牛舌幾入味。埋單¥3564，味道正常，但試過就算，唔算太特別。
 
 

八點半食飽就去隔離嘅Q Mall行下Akachan補給。臨走前仲買埋聖誕節特別版Krispy Kreme。揀左兩款共¥550，一款係士多啤梨果醬聖誕老人，另一款係焦糖小鹿，做宵夜不錯。

 

2017關西親子遊 第四日 [4.2 海遊]

下一站大阪港，十二點半黎到先醫肚。搵到一間家庭式烏冬專門店築港麵工房，午飯時間唔算多人，只有幾檯上班一族。小店專門手打烏冬，先去買餐券，再自取食物。搵左一個Mega烏冬(¥1380)、另一個係人氣之選雞肉天婦羅手打烏冬(¥880)。Mega真係大得有點離譜，有齊齊店內炸物嘅所有配料，仲跟一碗大白飯，真係超勁。烏冬幾清甜口感煙韌，唔錯。炸物款式好多，味道正常。另一款係咖哩湯底，非常濃厚微辣，雞肉天婦羅係最好味。

 

之後行去此遊重點海遊館。憑大阪周遊卡可享門票優惠折實¥2100。推BB車入場時可搭升降機，到場後租左個儲物架放野，而館方建議唔好推BB車，所以連架車都寄存係服務台。 

海遊館都好多層，由最高層慢慢向下移動。每層都有唔同主題，動物都好多，最好就係每個魚缸都係落地玻璃，小朋友都睇得好清楚。最吸精係海豚遊水遊得超快，同中間最大嘅太平洋海岸有大鯨鯊，仲岩岩遇上餵食時間，真係好壯觀。

 

黎到必試鯨鯊軟雪糕，原來係波子汽水味。最後一個場館係觸摸區，可以伸手落水池摸下啲鯊魚BB。

 

都行左近兩個鐘，之後轉戰就去Market Place。其中一大吸引力就係新開嘅Legoland Discovery Center，門票要¥2300，但持周遊卡係可以免費入場。其實就唔係好大，主要係放好多Lego俾小朋友玩，仲有Lego場景，玩左一架坐車仔射擊遊戲。另外仲有一架類似飛天魔法車就無玩。最得意就係小小世界，用Lego砌左大阪嘅特式景點。講真如果要俾錢入場其實性價比幾低。

喺Market Place周圍行下，なにわ食いしんぼ横丁昭和街影下相，臨時時坐埋天保山大觀覽車睇夜景。

18:15玩完走人，見時間尚早，增遊天王寺搵食。

2017關西親子遊 第四日 [4.1 大阪今昔]

今日大阪周遊一日，可以晏啲啲九點先出發。第一站想落地下街食早餐，竟然撞中兩月一度嘅地下街定休日，咁惟有去其他地方搵食，諗起南海通附近就有老爺爺芝士蛋糕。由難波City出發，慢慢行去南海通，時間尚早，周圍遊下等佢開門，終於9:30買到新鮮出爐老爺爺芝士蛋糕(¥685)。新鮮出爐真係超級辣手，芝士更香濃，蛋糕鬆軟仲入口即溶。紫凝BB都好鍾意呢。

邊行邊食正式出發。早前喺機場買左大阪周遊卡一日券(¥2500)，搭地鐵由難波去 天神橋筋六丁目，大約10點零就到達第一站大阪今昔館。上次黎大阪遇著臨時休館，今次帶埋紫凝BB黎到，仲準備左和服俾佢。原來入館係地下層已經排緊隊，好在人唔算太多，入場前要寄存所有行李 。場館唔算大，只有兩層，高層只係觀景台，仲遇上電視台拍攝。樓下就精彩得多，全部係古時日本生活場景，紫凝BB著住和服，好多人話佢可愛。場內都可租成人和服，實在太熱門了。館內佈置幾寫實，仲有好多小玩意，閒時仲有天氣轉變，感受到日夜轉變，天晴雷暴。

之後仲有部份係模型展示幾有趣。今昔館唔算好大，但影相都花左唔少時間，都幾值得一去。

2017關西親子遊 第三日 [3.4 麵包超人在神戶海灣]

一路圍住神戶塔行，慢慢日落天黑，五點幾到達Mosaic，天橋行過去就到麵包超人博物館。
博物館有兩層，二樓係Playground幾多野玩，但設施都要大個啲先岩，所以無特登俾錢入場。地下係購物商場，有好多唔好類型商店，有飲餐小食、服裝、玩具等。剛好遇上表演時間，排排坐凡睇超包超人同朋友們唱歌跳舞，小朋友仲可以一齊上台玩，氣氛非常好。

商店街內仲有好得意嘅麵包店，真係可以食麵包超人。款式非常多，仲整得好似。買左一款聖誕節特別版¥310，落單時拎相片去俾錢，仲有台戲，職員叫Uncle整包再由麵包爐拎出黎。最欣賞係買一個包都用禮盒裝好，仲有個靚靚袋。麵包賣相就贏晒架啦，中間係朱古力餡，味道正常。咁好嘅包裝同服務，價錢貴少少都覺得值。

六點鐘返番去商場食晚飯，今餐試下神戶名物神戸元町ドリア。柯打兩客，一個海老のイセエビ風味クリームドリア(¥1180)，另一個デミグラスハンバーグドリア(¥1180)，再叫左一個薯角配明太子醬(¥290)。鍋飯非常熱辣辣，上檯時有點火熱住。飯醬汁比較多，芝士味亦濃，撈埋食都唔錯。漢堡扒味道唔錯，幾有肉汁。埋單¥2862，不過不失。
 
 
臨走前買埋神戶甜品No. 1嘅魔法壺布甸。今期仲出左Hello Kitty特別版，比多少少錢就有靚靚粉紅Hello Kitty壺仔。¥1593有四杯，呢兩晚宵夜有著落。賣相非常靚，面層有焦到盡但未到苦嘅焦糖，布甸奶味、雲尼拿味非常濃，非常幼滑入口即溶。

 

完成神戶一日遊，影埋夜景。行去高速神戶站搭阪神線。其實有地下街但搵極唔見，迫住行露天地方，都幾風。大約八點三終於到站，搭車返大阪。