五十分抵食之大家姐小籠

皇之家大姊小籠包@佐敦
29/1/2012 20:00

記得早前食過不知所謂嘅出名上海菜，近排心思思想尋找最好味嘅上海菜。喺開飯網做下功課，佐敦有間幾好評嘅上海菜館，一於去試下。

南翔小籠包 ($12)
一份小籠包兩件起叫，每件小籠包扁扁圓圓，睇落外皮幾透薄，隱約見到內餡嘅豬肉同湯汁。夾起時即使蕩韆鞦都無穿底，可見外皮相當實淨。咬開略厚嘅摺口位，原來外皮一啲都唔厚，薄薄嘅外皮相當有彈性，所以用筷子都唔會夾穿。小籠包內充滿鮮味湯汁，可以裝滿一個湯匙。豬肉餡好軟腍，唔太肥膩，調味亦唔錯，再配埋個酸濃黑醋同薑絲，更加好味。

生煎鍋貼($12)
鍋貼用上比小籠包厚實嘅外皮，大大隻，煎得香脆，鍋貼底微焦，入口係脆脆地，煙煙韌韌嘅。肉餡都係豬肉加上椰菜等材料，口感比較爽口，相對無咁膩。鍋貼仍有豐富肉汁，的確唔錯。
 

生煎包 ($12)
生煎包底煎得香脆，可以同時享受兩種口感，焦嘅包底脆，白色嘅包皮軟熟，可惜包嘅味道唔夠香，如果加多啲椰香味，相信會更好。肉餡都係大同小異，最吸引之處，莫過於包皮吸收晒肉汁，做到包餡合一。

紅油抄手 ($28)
一客六大粒，醬油紅紅，上面仲有香蒜同青蔥。雲吞內餡有豬肉、菜同蘿蔔等，比較實。其實紅油抄手同一般雲吞都係咁上下，只不過醬汁調味比較特別。呢款醬汁味道少少甜，辣味係慢慢滲出嘅麻辣，可惜蒜蓉唔夠多，青蔥亦唔香，無乜特別。

回鍋肉炒年糕 ($40) 

炒年糕醬汁非常濃厚，材料豐富，賣相好吸引。年糕厚薄適中，煮得煙煙韌韌，質地剛好。記得試過幾次唔掂嘅年糕，勁硬實、咬到牙軟又有，熟到過晒火位，腍到不似年糕又有，但呢個年糕真係控制得唔錯，而且越食越食到米香。年糕配料有椰菜、冬菇同豬肉等。豬肉係五花腩，切得比較厚身，稍為硬左少少，幸好醬汁入晒味，而椰菜都吸收晒醬汁。年糕用濃郁嘅醬油同蒜等伴炒，亦帶濃烈嘅豆瓣醬甜辣味，炒得好夠夠鑊氣，非常惹味。

豆沙鍋餅 ($18)
以豆沙鍋餅作為甜品最好不過，豆沙鍋餅係新鮮即製，入口非常熱辣。餅皮煎得超薄，亦夠香脆，食到有蛋香味，豆沙餡非常幼滑，甜味適中，豆亦香濃。

豆漿 ($8)

豆味正常，味道合格。

此店每款點心都相當精緻，每客只係兩件起叫，如果人少少，可以一人一隻，有足夠空間試多幾款，岩晒貪心人士。每款包點都只不過十零蚊，質素有保證，絕對唔貴。餐牌所見，一款炒粉麵飯大約三、四十蚊，午市仲送埋豆漿，實屬街坊價位。食客俾得街坊價錢，食物質素OK，而服務態度更加係親切有善，抵!
只不過晚市時份幫襯，呢個抵會變得無咁抵，因為每位需收茶芥五大蚊，可惜茶係普通不過嘅茶水，另外再多謝加一服務費。今餐即刻由原本$130變成$154，呢啲心理關口真係有啲難過，所以得番五十分抵，話晒食少左兩籠小籠包喎!

乜東東漢堡

Chips Republic@尖沙咀
27/1/2012 20:00

平時無乜特別事都唔會去柯士甸果頭，唔搭西鐵的話，由尖沙咀或者佐敦起步嘅路程都唔差幾，所以行圓方嘅次數，一隻手掌數得晒。團購$28可以買到商場戲院旁邊嘅Chips Republic一份漢堡餐，包括新出品嘅炸豬排漢堡，再配埋原味薯條同汽水，價錢合理，可以行一轉試試。

至尊炸豬排漢堡 ($57，團購價$28)
至尊炸豬排漢堡除左一塊炸豬排外，仲配上芝士，新鮮蕃茄同生菜。漢堡包面舖滿芝麻，材料一層層堆疊，賣相唔錯。暖暖地嘅麵包，入口好鬆軟有彈性，芝麻味道好香，第一個步驟已經成功。麵包之下係熱辣辣嘅炸豬排，豬排同一般炸魚柳差唔多咁厚身，溫度熱辣得令芝士溶化合為一體。炸豬排裹上薄薄一層炸粉，炸得乾脆俐落，香口唔油膩。炸皮下嘅豬排非常鬆軟，食落唔算太乾，仲有些少肉汁。食過一啖之後，坐對面嘅姚生突然彈出一句﹕「件炸蝦餅幾好食。」呢個的確係一個問題，因為你唔話俾我知，我都唔知你係豬肉。可能豬排經過零下無限度雪藏，再一百重加工，豬肉嘅本來味道已經失去晒，只淨低淡淡嘅甜味，唔睇餐牌，真係唔知佢係豬肉。可能醬汁又太過好味，酸酸咪咪嘅沙律醬再混合香濃芝士，醬汁嘅濃郁擾亂左味覺。最後剩低嘅感覺，只係一件炸得好香脆但無乜味道嘅唔知乜野漢堡。

燒烤醬洋蔥炸豬排漢堡 ($58，團購價$28)
此款漢堡改用燒烤汁，配料仲有洋蔥同生菜。燒烤汁酸酸甜甜，味道幾濃郁，洋蔥煮得又腍又甜，仲有焦香味，而脆脆嘅炸豬排吸收晒醬汁，比前一款更加惹味。所以豬肉嘅味道更加消失到無影。

跟餐仲配埋原味炸薯條，份量算多，亦夠新鮮熱辣。薯條炸得香脆，唔太油膩，中間非常軟腍，只可惜薯仔味道唔夠濃郁，而且唔夠結實。惟一可取之處係茄汁、白醋等係自助形式無限任加，茄汁魔可以放肆一下。

一間絕不起眼嘅快餐店，隱藏喺戲院後面，行過唔覺意見到嘅可能性係等於零，所以店方早排做過唔少次團購，賣過薯條，又賣過乳酪，期望以多元化高品質美食打響名堂。此店抵讚之處係，所有食物都係即叫即製，就算係流量較大嘅薯條，都係新鮮炸起。格調走中高檔西式快餐路線，所以索價成六十蚊一個套餐。對我黎講，呢啲貴價漢堡唔值得經常光顧，又何況只此一間，又唔算方便易搵，所以正價重臨嘅機會應該等於零。團購半價廿幾蚊一個套餐，雖則唔知自己食緊乜野，但論新鮮度，整體味道同口感都係唔錯嘅。都係果句，團購可以考慮，正價絕對無緣。

欺詐料理。絕不水皮街坊高檔甜品

水記甜品屋@大角咀
27/1/2011 17:00

除左傳統中式糖水外，越來越多創意甜品掘起。得到多個電視節目，無數咁多本飲食雜誌推介過嘅新力軍，早已聽過佢嘅大名，但礙於位置唔太方便，始終未有心去朝拜。半價團購優惠增加左一倍吸引力，只需$50就可以當$100消費，可以食個夠。

牛奶二重奏 ($28)
白雪雪嘅一杯綿綿冰，配襯鮮紅色嘅士多啤梨同爆爆珠，賣相好精緻。據講呢款牛奶甜品係用高級德國牛奶製作，所以味道特別濃郁。上層嘅牛奶綿綿冰刨得薄片，食落有冰感，食到索索聲。下層係非常幼滑嘅牛奶布丁，入口即溶，幾乎可以直入喉嚨，而且牛奶味比綿綿冰更濃郁。上下層口感各異，非常特別。而士多啤梨爆爆珠除左作點綴外，酸酸甜甜嘅果汁，亦同牛奶味好合襯，整體配合得宜。

分子蛋蘆薈撈椰 ($36)
呢杯可以一次過滿足到唔同欲望，除左有特大蘆薈外，仲有椰子綿花冰同椰子凍，唔少得此店嘅招牌名物分子蛋。呢杯嘅重點並唔係蘆薈定椰香，分子蛋反而更加突出。

所謂嘅分子蛋其實係芒果布丁奶凍，外皮白雪雪，光滑無瑕，中間橙黃色，似足一隻白烚雞蛋。分子蛋白外皮有少少煙韌，營造到蛋白結實嘅感覺，外型同口感完全可以欺騙大腦。甜甜嘅牛奶味慢慢浮現，先至醒覺佢係一件甜品。蛋白味道香甜，雲呢拿奶味香濃，原來大廚係用高濃度嘅新鮮法國忌廉製作，而蛋白上黑色嘅一點點，正係不計成本、昂貴嘅雲呢拿籽。中間橙黃色嘅蛋黃，係用新鮮芒果造成布丁，可惜芒果味道唔夠香甜。

一隻分子蛋係如此驚喜，要襯得起佢嘅，其實下層嘅蘆薈撈椰都相當唔錯。椰汁綿花冰刨得比前一款更幼細，就好似雪花咁入口即溶，可能佢想模仿細碎嘅椰絲，唔通又係分子科學? 綿花冰下係椰子凍，其實係幼滑嘅椰香奶凍，椰香甜味比綿花冰更實在，配上大大粒、清甜爽口嘅蘆薈，實在令人回味。

法式香草燴梨 ($39)
呢款甜品真係好難搵，唔係太多甜品舖有售，今次絕對係初體驗!
甜品即叫即製，所以等候需時，但食過之後就知道，等係值得嘅。話晒係酒店級甜品，所以要用高級嘅白色大碟盛裝，真係高級到不得了。食之前，先用鼻去品嚐。雲呢拿濃香撲鼻，夾雜左輕微嘅焦糖味。首先試一啖暖暖嘅雲呢拿香草汁，係甜而不膩、清爽嘅味道。主角啤梨入口一樣都係暖暖，沈浸喺香草汁之中。啤梨非常軟腍，味道好清甜，絕對食唔到一點丁酸味。睇過報導就知道，啤梨選用左成本特別高嘅比利時貨，先至襯得起香濃又柔滑嘅法國忌廉。一球Dreyers雲呢拿雪糕，正係玩味所在，暖熱嘅燴梨，夾一口冰爽嘅雪糕，感受冰火趣味。連最後一滴香草忌廉汁都不放過，完全清碟，香甜味更持久不散，回味無窮。唔知道此款甜品有冇特別規格，只覺得如果忌廉汁可以再調濃厚啲，杰身一啲，相信可以更容易伴啤梨一同入口，味道亦會更濃郁。

豐富嘅下午茶，總共叫左三款甜品，總數$103，團購優惠後，實價$53。五十幾蚊如此質素，真係超級無敵極度十分抵到爛。就算係正價，都只不過付出三十零蚊嘅街坊價錢，就可以品嚐到酒店級水準甜品，絕對唔貴。
改做乜記物記如此平民不過嘅名稱，原來甜品係落足一百分心機同創意，俾足酒店級享受。因為大廚先生用足三十幾年六星級酒店做餅嘅功力，研製出各款有創意又好味、坊間少見嘅獨特甜品。雖然小店無酒店級豪裝，但可以食到不計成本嘅高級食材，體驗到時興嘅食物科學，的確乜都抵番晒。

I'll be Back! 我會再來的，期望有朝一日，你會因為生意勁好，而轉戰出旺區，等我探你唔洗咁山長水遠。

後記

睇番餐牌介紹，牛奶三重奏內含牛奶綿綿冰，而椰撈入面嘅係椰子綿花冰，究竟綿綿冰同綿花冰有咩分別? 係小店別字之誤，定係確實係兩款唔同嘅東西? 因為牛奶綿綿冰比較冰感，冰底刨得較大片實在，而椰子綿花冰嘅冰底係細細碎碎，輕飄飄，口感上似乎有啲分別。定係我諗多左? 之但係...又有啲地方叫做雪花冰，或者雪綿冰，咁又係乜? 呢個問題，維基百科有無解說?

馬來咖喱茶餐

富源咖哩王@荃灣
27/1/2011 14:30

大年初五仍然享受緊我嘅悠長假期，唔洗拜年，可以周圍去。見手頭上仲有幾張團購券，趁今日計劃下行程，用團購券食足一日。午餐先食個馬來咖哩，$22有一份再配飲品，勁平。呢間餐廳新開無耐，主打正宗星馬泰菜，是日提供四款咖哩選擇。

招牌星馬咖喱牛腩飯
份量十足，飯勁多，非常飽肚。咖哩一大碗，有六、七大件牛腩，相當足料。咖哩係馬來式，未食已經聞到咖哩香味。咖哩汁味道香濃，只有溫和嘅辣味，亦帶香甜嘅椰香味，入口有粉粉粒粒嘅感覺，相信加左唔少椰漿調配，並唔係開粉無味嘅芡汁咖哩，伴飯唔錯。 大大件牛腩肥瘦適中，帶點筋，似係坑腩部位，腍得黎又爽口，亦富牛味。可惜咖哩味欠奉，相信兩者係分別獨立製作，落單時先結合上碟，所以牛腩同咖哩汁係完全分離，並唔入味。

招牌星馬咖喱雞扒飯
兩大塊香煎雞扒，再淋上足量馬來咖哩汁，俾得夠闊佬。雞扒外皮焦香，用鹽同胡椒提味，肉嫩多汁，跟咖哩撈飯最好不過。可惜伴菜無咖哩薯仔，只得幾片白烚椰菜同蘿蔔，略有不足。

店仔細細，茶餐廳格局，新到連開飯網都未有介紹。咖哩味道唔錯，起碼比一般茶餐廳開粉貨色更可口，廿二蚊的確抵食。正價午餐大約三十幾、四十蚊有找，走平民大眾化茶餐廳路線，住附近嘅街坊可以支持下。

雅苑座

雅苑座@尖沙咀帝苑酒店
26/1/2011 12:00

大年初四安排左公司團拜，跟同事們去帝苑酒店食餐勁。多得開飯網嘅珍貴Q-pon，享有自助午餐六折優惠，抵!

各式冷盆、涼伴小食、雜菜沙律、法式麵包

凍海鮮有長蟹腳、青口、大蝦、煙三文魚等

日式櫃枱有吞拿魚、三文魚、立魚、八爪魚等五款刺身，旁邊仲有兩、三款卷物

餐廳內有幾個熟食專櫃，提供燒羊脾、即製海南雞飯。仲有串燒燒烤檔，有串燒牛舌、雞翼、雞軟骨同各式蔬菜。中式點心部有小籠包、燒賣、餃子等點心。另外仲有十幾盆熱食，選擇唔算多，有咖哩、蔬菜、燉肉、幾款炒粉麵飯，仲有一中一西餐湯配麵包。

帝苑酒店著名嘅甜品部，前後推出過十幾款蛋糕甜點

有服務員即場製作法式班戟，仲有五款Häagen-Dazs雪糕任君選擇

朱古力噴泉可選配四、五款水果同泡芙等，仲有涼粉、杏仁豆腐等中式甜點

1. 煙三文魚﹕ 酒店供應一大盆任食唔嬲，煙三文魚味道唔錯，鹹味適中，可惜搵極都搵唔到合適嘅醬汁
2. 三文魚﹕ 刺身超級厚切，非常新鮮，幾肥美，但無乜鮮味，魚味亦欠奉
3. 吞拿魚﹕ 味道麻麻，吸引力不大，只係萬字醬油味道唔錯
4. 凍火腿﹕ 只有好普通無乜材料嘅款式，味道都係咁

5. 鎮江牛仔骨﹕ 甜甜酸酸，醋味極濃嘅牛仔骨，牛肉燘得非常腍，只不過牛味被醬汁掩蓋晒
6. 香煎青衣魚柳﹕ 簡簡單單用鹽同黑胡椒調味，煎香左嘅魚柳味道唔錯，魚味濃郁
7. 燒羊脾﹕ 要排隊等師傅切嘅羊脾，到最後所餘無幾。羊肉只有非常輕微嘅膻味，可能呢個部位比較熟，所以較乾身，要自行添加燒汁補濕一下
8. 串燒雞軟骨﹕ 雞軟骨燒到熱辣辣，咸咸地，幾爽脆
9. 煙肉香腸串﹕ 普通不過嘅BBQ小食
10. 川式玉子﹕ 感覺幾似麻婆豆腐，肉碎加左青蔥、辣醬伴炒，好惹味，配合滑一滑嘅玉子豆腐，正!

11. 果仁朱古力布朗尼﹕ 睇落幾結實，外層有好多果仁，入口幾香脆，中間係微微濕潤嘅朱古力蛋糕，內外配搭得唔錯，味道亦足夠
12. 熱情果芝士蛋糕﹕ 喺芝士蛋糕上加一層熱情果醬，芝士夠濃味，熱情果醬偏酸，餅底係極濃郁嘅朱古力曲奇餅底。每層獨立食的話，味道係唔錯嘅，但合體之後，上中下三層就唔多夾
13. 焦糖吉士布甸﹕ 布甸味道稍甜，入口幼滑有蛋香，但無焦糖感覺
14. 藍梅芝士蛋糕﹕ 聽講係此店人氣之選，芝士味道濃郁，亦感覺相當足料。頂層係酸酸甜甜嘅藍梅醬加果肉，味道唔錯。只不過再醃尖啲黎講，如果餅底再多番啲牛油香味，就無得彈
15. Tiramisu﹕ 二號人氣之選，Tiramisu好腍好幼滑，有濃郁嘅咖啡味，仲滲透住酒香，反而芝士先係其次
16. 松露朱古力蛋糕﹕ 面層係略厚嘅特濃朱古力醬，中間係朱古力慕絲，滑溜得黎，入口即溶，朱古力濃度極高，帶微微甘苦味，底層係鬆軟嘅朱古力清蛋糕。三層配合得剛好，朱古力味夠濃郁，最愛!
17. 雜梅綠茶意大利布甸﹕ 綠茶布甸味道極淡，一啲茶味都無，只係質感非常幼滑，可惜幾款梅子超級酸，成杯奇奇怪怪
18. 美國芝士蛋糕﹕ 味道偏酸嘅結實芝士餅，芝士味濃，但唔知點解咸咸地

19. 唔知什麼蛋糕，只覺得酸咪咪，麻麻地
20. Häagen-Dazs﹕ 自助餐先後提供五款味道。芒果雪芭甜到漏，芒果味唔覺，麻麻。最愛士多啤梨味，酸酸甜甜，奶味濃，仲有士多啤梨肉。雲尼拿、咖啡、朱古力都有幼滑口感，但感覺上比專門店嘅味道淡一啲。

是次自助餐，原價$260，憑開飯網優惠券得到六折優惠，加番正價加一，每位只係$182。食物選擇唔算特別，味道唔算十分好。以甜品打響名堂嘅自助餐，只有其中幾款招牌甜品比較值得試，其餘都係普普通通。唔通無左通利黃先生嘅領導，甜品都降晒呢。對我呢講，食自助餐嘅重點都係甜品，呢個自助餐嘅吸引力似乎比較弱。得到六折優惠，感覺會稍為好少少，因為勁食H記雪糕，番本都唔難。

極熱氣。勁芝味雞扒

阿升麵線@旺角

22/1/2011 14:30

行完花市見餓，去左旺角掃下街。早排食過阿升嘅芝味雞扒一直念念不忘，今日有胃口重拾滋味。睇番飲食雜誌報導，原來好芝味雞扒，日賣二百件，係時下受盡熱捧嘅芝味小食。 

好芝味雞扒 ($25)

雞扒永遠都係新鮮即炸，所以等候時間不下十分鐘。雞扒切件上，未入口已經感覺到熱辣香口。芝味雞扒係兩塊薄身無骨雞扒，中間夾左芝士，賣相非常吸引。

雞扒外層包左薄薄一層炸漿，炸得好香脆，入口仲有粒粒鹽酥效果，食到索索聲。台式雞扒最不能放過嘅，當然係炸皮外層嘅調味粉，有惹味嘅椒鹽、胡椒，再加少少辣粉，齋食雞扒已經好滿足。雞扒厚身啖啖肉，但仍然保持軟腍，唔太嚡，可惜比較乾爽，無肉汁可言。

經過油炸後，切開嘅雞扒邊位仲有半溶化芝士流出，芝士味道好濃郁、濃厚，據講係味濃嘅車打芝士。

芝味雞扒整個配搭得宜，味道吸引。廿幾蚊一份大雞扒，足夠兩個人分享，正係下午茶不錯嘅選擇。熱氣一次半次都唔怕啦，推介!

大王北行鳥

上海香港麵家@銅鑼灣
22/1/2012 11:00

年廿九最好嘅節目，莫過於行花市，今年一於趁墟過海行下維園，入場前先喺附近食個早點。一向少過海搵食，黎到銅鑼灣，只知道就近渣甸街比較多野食。原先想去車仔麵名店試試，點知晨早收爐大吉，最後求其是但搵間入場。

粢飯 ($15)
佢叫得做「粢飯大王」，無可能唔叫一份粢飯試試。睇住門口啲阿姐快手勁包，熱辣辣嘅粢飯就送到。粢飯用保鮮紙包住，對半切開成兩份，偷瞇到內餡材料唔算多，驚喜欠奉。米飯質地軟糯，唔太乾，飯包得勁厚身，相對內餡只得少少。材料有肉鬆、榨菜同油條。個人認為肉鬆係粢飯味道嘅靈魂，肉鬆唔夠多，唔夠香的話，成個粢飯都唔見得好有味道。而榨菜就貢獻左咸味同爽脆嘅口感。中間一大條油炸鬼就係香脆、香口、油香所在。但對唔住，大王呢個粢飯完全不行了。材料少得可憐，肉鬆無香味，只係榨菜得個咸字，連油炸鬼都唔新鮮，完全唔香脆，估計係放得耐左，變得又腍又韌。三樣材料完全唔配合，令粢飯只獨有咸菜味。咁同白飯包咸菜有咩分別?

生煎包 ($22)
暖暖嘅生煎包，皮並無乜煎香嘅痕跡，煎左等於無煎，所以唔期望食到脆底。包係韌韌地，香味不足，幸好有幾粒芝麻仔鎮住。好彩內餡都算係咁，肉餡調味唔錯，豬肉腍腍地，甜甜地，肉汁算幾多。

豆漿 ($8)
上海舖另一重點美味，應該就係豆漿。豆漿的確比其他食物較為突出，熱豆漿味道更加香濃，有淡淡豆香，味道唔太甜。

喺無做過功課嘅情況下周街搵食，店內嘅人流就係其中一個好有力嘅方向指標。眼見渣甸街幾間繼續營業嘅食肆中，呢間小店食客明顯比較多，而店前等外賣嘅人從未減退，估計呢間「粢飯大王」差極有個譜。原來呢間算係好出名嘅老字號上海舖，幾十人讚過好。可惜親身試過之後就覺得好一般，應該隨便搵一間豆品小店，都可以用更平嘅價錢，食到更好嘅質素，當然已經唔敢同台灣嘅阜杭豆漿比較啦。睇黎呢個大王都只係浪得虛名。

阿撈哈哈哈

Aloha@油麻地
20/1/2012 12:00

近排食飯又多左選擇，除左連鎖霸權嘅餐廳之外，團購引領我去一啲新開嘅小店，又試過唔少間樓上食肆，其中包括年青人最愛hea嘅Cafe。$20食到一款麵飯，再加送特飲一杯，就算唔hea時間都不妨一試。

Aloha卡邦尼意粉
近排喜歡上一款材料簡單嘅卡邦尼意粉，難得Cafe有售，仲要係招牌主菜，值得一試。雖然份量唔多，但賣相相當討好，好有光澤油亮感。材料有煎香左嘅煙肉同爽口嘅雜菇等。最欣賞佢意粉煮得剛好，難得仍然保持煙韌，好少見平價意粉都可以有咁嘅口感。卡邦尼汁係無蛋嘅忌廉汁，調味唔錯，應該有加入芝士令醬汁更濃郁，仲滲透住少許洋蔥香甜味，好配合各樣材料。醬汁濃稠度適中，正好掛麵，灑上少許香草同黑胡椒，更覺精緻。整體黎講，好岩我口味。

脆炸雞球
Cafe提供優惠價，只需加五蚊就可以享用一份脆炸雞球，一客有三件，正好加餸。雞球細細件，外皮粉漿比較厚，亦炸得唔夠脆，粉粉地，幸好雞肉算嫰滑，有肉汁，咸咸地夠入味。

忌廉鮮菌飯、蜂蜜綠茶
忌廉飯參考意大利飯做法，將忌廉混入白飯，令每粒飯都有味道。忌廉味道都唔錯，滲透淡淡芝士味。飯煮得軟腍黏口，伴埋忌廉汁，濕潤度剛好。飯係煮得唔錯，但略嫌配料唔夠多，只有煙肉幾片同少量雜菌。飯嘅份量一樣少得可憐，三扒兩撥就KO晒。

水蜜桃紅茶、蜂蜜綠茶
都預左Cafe嘅果汁系列飲品係用糖漿開水再加茶，但勝在味道夠，甜甜酸酸，就算溶冰後，味道唔太走樣，算係咁。

Cafe唔算大，大約容納到二、三十人，必備嘅梳化唔算好舒服，無搞什麼主題，無乜野兼覓，環境同一般Cafe差唔多。但食物就算做得唔錯，賣相吸引，味道正常有餘。最欣賞佢雖則唔係明火煮食，但並唔係求其提供微波爐食品。只不過份量真係太少，相信男士必須最少兩至三倍分量先足夠。可能今次佢真係按比例提供價值廿蚊嘅份量，所以我無意見，只當食個light lunch。正價黎講，都係大路價錢，五、六十蚊一個基本套餐，特飲再加錢另計，有地方Hea，有Game玩，有興趣可以Bookmark一下嘅。

南翔﹕ 個人不喜歡，不推介，絕對失望

南翔饅頭店@荃灣

15/1/2012 18:00

$79一份四道菜二人上海套餐，價錢唔貴，點可以唔買。四道菜包括一款小食、一份小籠包、一款飯麵再加一個甜品，$79已經包括茶錢同加一，真係好抵。六點鐘到達南翔饅頭店，已經有十幾人等緊位，團購客可以先訂枱，唔洗等位直入，受到唔少人歧視。

玫瑰果味茶

店方提供六款茶選擇，見玫瑰花茶比較特別就點左一壺。茶有淡淡嘅玫瑰花香，入口好清香舒服。

雞絲粉皮

睇落幾大碟頭，有米白半透明色嘅粉皮、一堆雞絲、一堆青瓜絲同麻醬。粉皮入口夠滑身，算幾爽口彈牙。可惜雞胸肉絲比較嚡口，又無乜味，只靠淡淡嘅麻醬，似乎唔多濃厚。

蝦仁雞火炒飯

睇名都唔知咩叫雞火，上菜細看之下，原來係雞肉同金華火腿，仲有細細粒蝦仁。飯係炒得唔錯，非常乾身，粒粒分明。蝦仁都算幾新鮮爽口，但無乜味道可言。雞粒份量少得可憐，一樣無味。只有零零碎碎嘅金華火腿絲，帶些少咸香，仲有少少青豆同蔥粒，材料少得極可憐，基本上同蛋炒飯無太大分別，而且調味唔夠，白飯不如。

鮮肉小籠包

一籠六隻新鮮出爐，本以為熱辣辣嘅招牌菜應該唔差得去邊，點知完全錯晒。小籠包皮摺得工整，但一啲都唔豐滿，扁扁唔堅挺。皮絕對唔薄，頂部嘅摺疊位置更加硬實。咬開厚厚嘅外皮後，見唔到期望嘅汁如泉湧，只係暗藏左少許倒唔出嘅肉汁。還好豬肉餡細細一舊，腍腍地幾鮮味。只不過外皮同內餡配搭唔得宜，呢個水平嘅小籠包，隨街都食得到。

高力豆沙

可幸上枱時仲暖笠笠，相信都係新鮮即炸。蛋白外表炸得唔算太脹，欠缺左圓轆轆脹脹嘅可愛模樣。蛋白皮非常厚身，算不上海綿般鬆軟，亦略嫌淡而無味。咬開相對較厚嘅外層，良久先發現中間嘅豆沙餡，甜就夠甜，但香味不足，而灑面嘅幼砂糖亦作用不大。

素聞南翔呢個品牌，除左賣饅頭之外，佢嘅小籠包都相當出名，曾經獲獎無數。可惜今日一試完全極之失望透頂。招牌菜小籠包竟然係如此水準，質素未及得早前提過嘅紅磡$14一籠四粒。其他幾款前菜、炒飯，以及餐後甜品，都只係交出隨街都食得到嘅行貨，難道佢收得七十大蚊，真係俾番七十蚊功力?! 呢一餐的確只值七十九蚊，如果要加一，又或者要另加茶錢的話，已經覺得有點不值。相信拎住八十蚊，亦唔難搵到質素好佢十倍嘅小店，所以翻轉頭機會絕對等於零。

眼見七點離席時，門外仲有幾十人等緊位，不自覺丁出十萬個問號，究竟食客們為乜要等位等咁耐? 佢又何來如此大名氣呢? 相信我只接受「個人口味唔同姐!」呢個答案。

尋找朱古力魔快樂之源

Venchi Chocolate@尖沙咀

20/11/2011 18:30
8/1/2012 15:30

20/11/2011 18:30

各大商場就黎成為朱古力魔嘅天下。名牌朱古力專門店越開越多，尖沙咀海港城又一間新開嘅專門店。過百年歷史嘅意大利朱古力名店，除左粒裝朱古力外，仲賣埋Gelato。谷旁做團購，$38買到兩杯各三球意大利雪糕，總共六個球，平均六蚊雞多啲一球，邊度搵? 唯有團購先做得出。

名店每日提供六款味道選擇，但因為有超過一萬五千人買左團購嘅關係，幾次行過都只係見到賣剩其中兩、三款，而必試嘅朱古力味更加係完全無影。橫掂團購券有效期唔短，點都要試足六款味道先得。今日有幸見齊六款唔同味道，而出奇地，極具人氣嘅榛子仍然存在，仲有兩款朱古力口味選擇，睇黎今日就係適當時候出手。

Hazelnut、Orange Chocolate、Extra Dark Chocolate

話明係Gelato，原汁原味、低脂、低卡先係王道。呢三個球嘅質感，除左「滑」字之外，應該搵唔到其他更貼切嘅形容詞。口感幼滑，質感較為黏實，絕無覺得雪到冰實實，係好似雪凍左嘅忌廉咁滑溜，而且溶得唔太快，可以慢慢品嚐。

Hazelnut

原汁原味嘅榛子呀! 就好似食緊榛子果仁嘅味道。唔似坊間有啲雪糕，掛名係榛子，但其實係榛子雲尼拿，被奶味搶晒。

Orange Chocolate

好香橙味，朱古力味亦夠濃，各自各精彩。鮮橙嘅微酸正好配合朱古力嘅濃郁，調配得宜，絕對唔霸道。

Extra Dark Chocolate

可算係招牌口味，特濃朱古力帶有好輕微甘苦味， 唔太甜，正好食到朱古力嘅原味。一啖食落口，味道就好似食緊原粒純度極高嘅朱古力。但更加享受佢幼滑、又冰凍嘅口感。完成一整杯之後，朱古力味仍然停留喺口腔持久不散，真係回味無窮，係朱古力魔必食推介。

Apricot、White Peach、Pear

水果味嘅Gelato，係完全唔會加奶製作，可以保存到水果嘅鮮味。水果味Gelato並唔似雪芭咁冰感，仍然營造到雪糕順滑嘅質感。

Apricot

睇名一時未諗得到其實係乜水果，入口只覺得超級酸咪咪，酸到咪埋雙眼。但無問題，唔怕酸嘅小朋友，一樣接受到。勁酸之下，其實仍食得到杏桃嘅鮮甜清新。

White Peach

白桃相對味道較淡味，一點酸再加一點清甜，桃味好香，正係好粉紅色嘅味道。

Pear

超級驚喜，Gelato中有一粒粒嘅籽，味道像真度極高，相信係用新鮮水果製造。明明知道自己係食緊雪糕，但總覺得似食緊凍冰冰嘅雪梨茸咁，簡直就係新鮮雪梨嘅味道。

三球Gelato原價$46，其實一啲大牌子嘅雪糕都係咁上下。當然Gelato比傳統雪糕健康，而Venchi Gelato嘅吸引力唔比Gelato專門店弱。

今次團購係有史上最開心嘅經驗，朱古力有科學驗證到嘅魔力不在話下，連水果Gelato都會令人驚喜開心，呢兩杯雪糕真係會令人心情愉快。

奉老闆諭﹕老闆比較低調，唔多願意上鏡。而且呢排生意太好，開飯網唔知連續幾多個星期Number 1，已經上鏡上到怕左。想影雪糕相嘅朋友，請就就個鏡頭，唔好攝埋老闆先生入鏡。多謝合作。

後記
8/1/2012 15:30

12月尾Venchi又搞新意思，同筍網合作送出三千球雪糕。只需要幫佢做個簡單宣傳，就可以免費嘆一球好味Gelato。

Creme Brulee

再次到訪，當然要試新味道，即刻叫左杯焦糖布丁試試味。同上次食到嘅一樣，質感滑一滑，幼滑得黎亦不失黏實，非常忌廉咪! 雪糕本身無焦糖味，只係雲呢拿奶香味極濃，亦帶點牛油味同蛋香，味道有啲似吉士醬，唔會話太甜。雪糕中間有細細粒脆脆地嘅焦糖，幼滑之中亦感覺到香脆，同平時食焦糖布丁好似，的確係一杯食完好舒服，難以忘懷嘅Gelato。

有外表無內涵後巷拉麵

上野拉麵@尖沙咀

8/1/2011 13:30

尖沙咀有個叫做嘉蘭圍嘅小巷，睇住地圖都唔識去。一路以為係後巷一條，完全唔知收埋左咁多食肆。最近有間日式拉麵店新開張，借谷旁賣一賣廣告。$38一個套餐，有前菜、拉麵同飲品，一試無妨。

叉燒豚角醬油拉麵

一細碟日式冷食前菜，係醃製過嘅蘿蔔絲同豆腐卜，味道甜甜地，幾開胃。

拉麵賣相幾靚，睇落材料都幾豐富，主角係叉燒同豚角煮，仲有醬汁肉碎，配料有半隻蛋，一塊仔明太子、粟米、青蔥、竹筍、木耳等等，似模似樣。呢款拉麵係配醬油湯底，醬油味道甜甜地，但做湯底似乎略嫌過淡，香味唔突出。拉麵據講係由日本進口，係直身幼麵，咬落少少煙韌，入口幾順滑，所以唔太掛湯。

一碗麵有兩塊叉燒同兩塊豚角煮，兩樣味道都唔錯，簡介話豬肉係荷蘭進口嘅高級貨。叉燒用醬油醃製，煮得好腍，而且非常入味。豚角煮更加好味，豚角係肥瘦肉相間嘅五花腩，脂肪入口即溶，有甜甜油香味，連埋腍腍嘅瘦肉，口感更一流，一啲都唔覺肥膩。而半熟蛋都做得唔錯，蛋黃係半形固，溏心蛋醃製得好夠味，食落有蛋香。

成碗拉麵其實配搭得幾好，拉麵夾埋肉碎一齊食，味道更惹味。但介紹話有半塊明太子，可惜不知不覺已經溶晒，試唔到味。 

味噌海鮮湯底

另一款拉麵係味噌湯底，相對味道更加清淡，只有少少甜味，食唔出麵豉香味。所謂嘅海鮮配料係一隻大蝦同兩塊魚板，豐富度絕對比唔上前一款。大蝦都算幾新鮮，肉質算彈牙爽口，但蝦味欠奉，得個大字。魚板更加普通，甜甜地，腍腍地。

飲品可以選擇各款水果乳酸同汽水。最欣賞佢提供罐裝汽水，並唔係一杯打到無晒氣嘅糖水。而白桃乳酸味道酸咪咪，白桃味突出，仲有氣。

呢間新開嘅拉麵店，環境係唔錯嘅，亦有日本格調。拉麵賣相係靚，兩款豬肉材料比較突出，但除此之外，其實真係好一般，起碼連最基本嘅湯底都做得唔好。感覺上做一半唔做一半，材料雖好，但無好好發揮，整體分數就大打折扣。團購價$38一餐就無所謂，但正價講緊成七、八十蚊一碗，就絕對唔值。喺尖沙咀附近都有好多拉麵專門店，相信質素好過佢多多聲。星期日嘅中午時份，人流唔太多，只有三數枱客。宣傳用途嘅團購餐完食後，只覺得限於試完就算，只有外在美嘅拉麵，唔會令我想翻轉頭。

大眾化街坊韓食

韓淼莊韓國料理@大角咀

2/1/2012 18:00

不嬲都知道大角咀好多好野食，但實在比較隔涉，好難的起心肝去果頭搵食。有團購的話就唔同講法，價錢越平，吸引力越高。$52可以食到韓國料理二人套餐，有湯、配菜、主菜，仲跟埋飲品，價錢勁吸引。

甜薯仔、白菜苗、泡菜、大荳芽菜、餐湯
所謂嘅前菜，係韓式四小碟凍食小點，都係啲醃製嘅開胃小食。得四粒仔嘅甜薯仔味道唔錯，似係用微辣嘅醬燒汁煮過再雪凍食，薯仔好甜，口感粉粉，好開胃。而白菜苗就無乜特別，只係蒜蓉炒白菜，勝在白菜唔會苦。泡菜味道好香，醬汁濃郁，微微酸，多多辣，但辣得黎唔會令人抗拒，反而越食越上癮。大白菜好爽口，裡裡外外都吸收晒醬汁，非常滋味。大荳芽菜，用麻油調味，簡簡單單。

餐湯似係中式嘅青紅蘿蔔煲豬骨，睇落非常足料，味道亦正常，但唔太熱，呢點作為餐湯的確扣左唔少分。喺韓式料理餐館飲嘅，竟然係中式湯，其實有無韓式湯呢?

雞肉雜錦石頭鍋飯 

二人餐主菜有八款選擇，主要係唔同配搭嘅石頭鍋飯，仲有唔同肉類嘅鐵板飯，最後各選其一試試味。石頭鍋飯最緊要鍋夠熱辣辣，的確，由頭到尾，個石鍋仍然保持適當嘅溫度，任何時候飯都係熱辣辣。石鍋飯材料都幾豐富，雞肉碎係必定嘅，另外仲有石鍋飯常見嘅配料，好似冬菇、芽菜、紅蘿蔔絲、白菜等等，中間仲有一隻生蛋，當然唔少得韓式甜辣醬，用黎撈個痛快。韓式甜辣醬味道幾濃味，甜得黎少少辣，同其他材料一齊撈勻，變得更加惹味。其實石鍋飯只要有個好味嘅醬，個鍋夠熱，基本上已經唔會差得去邊，當然唔好忘記最底部嘅飯焦啦。

鐵板烤牛肉飯

用熱辣辣嘅鐵板上菜，熱氣十足，香氣一流，睇落份量都唔少。牛肉份量多，而且貨真價實，並無用太多菜墊底。牛肉唔算薄片，本身亦唔韌，有少許牛味，加埋香甜嘅燒汁，味道更濃烈。每一啖都要夾埋吸收晒燒汁嘅椰菜，用黎伴飯就最好不過。只不過鐵板一路加熱，放底下嘅牛肉就開始韌，呢個應該係不可能改變嘅事實，尤其係牛肉。

食完豐富嘅韓國菜，飲餐叫左杯可樂，叫可樂嘅原因並唔係因為鍾意飲，係無得揀。餐廳提供嘅飲品選擇，有可樂同幾款蜂蜜茶品。但從網評得知，所有蜂蜜茶都淡如水，不飲也罷。多得食家們嘅溫馨提示，所以保守地選擇可樂，呢款不可能出錯嘅飲品。點知，可樂都可以出錯，唔夠凍兼無汽，就已經錯晒。

$52夠兩個人食飽，食物味道正常，扮韓國料理都扮得似模似樣，基本上收貨。眼見佢一份套餐正價都係三、四十蚊嘅價錢，街坊價位，實在唔貴。最衰就係位於大角咀勁吊腳，翻轉頭機會唔高。

中評豆花下午茶

珍豆漿豆腐花專門店@旺角

2/1/2012 14:30

之前喺筍網用$15買到豆品專門店嘅$30現金券，呢間珍豆漿似乎新裝修，而且菜單選擇多左，除左主打豆製品之外，仲有唔少素食點心，一於去試下。

凍石磨豆腐花 ($12)

十二蚊一碗豆腐花，份量唔少。豆花原本無加甜，先試一口，食得出淡淡豆香味。豆花無經過片薄，厚厚一大片，質感一啲都唔滑溜，更有些少粗糙感。加左糖水同黃糖粉後，感覺就好好多。聽聞糖水係冰糖水，感覺更滋潤清甜，豆花都受到影響，質感變得幼滑，甜甜地亦變得易入口。

熱芝麻豆腐花 ($18)

熱食豆花更加感受到豆花嘅軟滑感，明顯比凍食好，但未至於可以滑入喉嚨嘅程度。加左芝麻糊後，豆味變得薄弱，芝麻糊反客為主。芝麻糊較杰身，仲食到芝麻碎，味道微甜，唔加糖水已經夠味道。 

麵醬豆卜 ($15)

細細一碟豆卜，原來係濕潤有湯汁。金黃色嘅豆卜浸左湯一啲都唔熱氣，食到有豆味，而氣孔仲吸收晒麵醬湯汁，非常入味。湯汁甜甜地，麵醬好濃郁，仲有淡淡薑味，越食越過癮。

即製手包秶飯 ($15)

秶飯對切成兩份，飯非常軟糯，中間包住油條、肉鬆、榨菜等，餡料唔算好多，味道都唔錯，只不過油條比較腍，食唔到脆脆嘅口感。

團購可以半價埋單，以上四款共銀三十元正，兩個人當食個簡單下午茶，絕對無投訴，但相信翻轉頭機會唔高，試過就算。

話晒係豆品專門店，豆腐花豆味係有嘅，但並唔講得上滑溜，反而微甜嘅冰糖水更加出位。一碗豆花索價十二蚊，感覺上算貴，因為仲有唔少出名豆品店嘅出品，七、八蚊都有交易，講真質素差不多。貴左嘅五蚊，相信係用黎俾旺舖租金同人工罷。對我黎講，當然希望俾幾多錢，食得番咁多錢，所以寧願選擇街邊立食新鮮熱辣嘅豆腐花。一啲咁平民嘅美食，都係用番最平民嘅方法品嚐，咁先夠風味。

越式滿腹四人前

金滿都越南餐廳@荃灣
1/1/2011 19:30

未玩團購之前試過金滿都一次，感覺良好。今次做團購用$40就可以當$80現金券使，最吸引就係唔洗加一，而且想用幾張都得。最後買左四張，有$320 Quota，同朋友仔一月一日食餐勁。

越式炒金邊粉 ($45)
一如以往，份量超多，四十幾蚊一碟真係抵到爛。金邊粉色水幾靚，唔算太油，材料都好豐富。有扎肉、雞絲、蝦仁、蛋、芽菜、洋蔥同青椒等，用醬汁炒咸咸地，仲有好香黑椒味，好夠鑊氣。

沙嗲菠蘿雞絲炒飯 ($42)
食落就好似加左菠蘿嘅楊州炒飯，都係楊州炒飯果啲材料，無乜特別，沙嗲味唔覺唔覺，勝在配料算多，炒得夠乾身。

越式春卷 (小) ($25)
一客細春卷有四件，係包左米紙嘅迷網春卷。米網外皮炸得幾香口，米紙好鬆脆，食得出係新鮮即炸。內餡都係果啲野，有札肉絲、木耳、粉絲、雜菜等，調味唔錯。當然要怒加酸咪咪、少少辣嘅魚露就更加好味。

特式拼盤 ($95)
價值近百大元嘅拼盤，原來真係一大盤，而且仲有好多款式。
蝦餅大塊就大塊，但口感粉粉地，唔夠爽口彈牙，都叫做有蝦味，甜甜地。
扎肉片係凍食嘅，所以食落實實地，有少少豬肉味，如果撈埋青蔥同炸蒜一齊食會好味啲。
扎肉雞絲蝦片就麻麻地，蝦片唔夠香脆，味道叫做正常，配料夠多，都係札肉、檳海、蔥蒜，仲有花生碎等。
燻蹄得果薄薄四、五片，都係凍食，咬落實實地，一啲都唔爽口。
炸扎肉餅份量都唔少，炸得唔太脆，似半煎炸，口感實實地，煙煙韌韌，有好香胡椒味，食起黎幾辣。

炭燒越式沙嗲串 (大) ($45)
大版嘅原來得四串，可以豬、牛、雞任選兩款。牛肉燒得煙煙韌韌，牛味一般，只食到好香黑椒味。豬肉反而比較好味，肉味甜甜地，又唔韌。串燒唔覺得有炭燒感覺，沙嗲醬味道正常，微微辣味，有花生粒粒，但唔算惹味。

越式焗羊架 ($78)
越式焗羊架原來係香茅焗羊架，有兩大件。一打開鍚紙，就聞到好大陣香茅味。羊架好似熟左少少，差不多有八成熟，但好彩肉質仍然軟腍，熟少少都唔覺得韌。羊架有肥有瘦，脂肪位更加惹味香甜，香茅味滲透晒入羊肉裡面，所以羶味消失晒。呢款味道其實無問題，但總覺得羊架用黑椒或香草焗會比較正常，用香茅的話，總覺得怪怪。

叫到成枱都係，埋單只係$330，計番團購優惠，實價只不過$170，人頭費$42.5。用唱K lunch都唔只嘅價錢，就可以食得飽飽，兼hea足兩個半鐘，真係抵。
兩次黎金滿都食飯，感覺都一樣。任何飯麵小食都係大堆頭上菜，份量勁多，價錢唔貴，真係相當抵食。至於味道方面，正常水平一定有，但唔好期望係好地道、好正宗嘅越式菜，話晒佢只收你街坊價。如果諗住幾丁人hea下時間，食個飽飽，呢度絕對抵玩。