一龍拉麵

一龍拉麵＠馬鞍山
8/9/2019 19:00

近來幾鍾意黎呢個新場，有好多兒童遊樂空間，放完電一輪再食埋晚飯先返歸，今晚選擇呢間幾有日本風味的拉麵店。店面細細，全counter座，可以睇到成個煮麵的過程。無估到店仔細細都準備左小朋友餐具，非常細心。

灸燒叉燒拉麵 $66
價錢唔貴，份量都唔少。最欣賞湯底非常幼滑，忌廉咪，豬骨味算濃，但唔油膩，幾岩口味。叉燒本身口感亦係不錯，即場用火槍灸燒，多再一陣微微焦香。溏心蛋熟成度適中，可惜麵底略為腍少少，個人較鍾情日本的硬度。

香煎鰻魚拉麵 $88
非常創新的砲搭，特製龍蝦湯配鰻魚，材料真係超大方，相信係整整一大條鰻魚，非常滿足。湯底非常濃厚，配上拉麵條非常掛湯，啖啖都食到蝦香。

餃子 $22
新鮮熱辣，外皮脆脆的，不錯。

玉子燒 $25
四大件玉子燒，大大件，入口有蛋香，味道幾香甜，略嫌實淨左少少，不過呢個價錢的確好抵食。

一間由青年人打理的小店，細心製作，價錢抵之餘，質素係相當ok，當然仍有進步空間，總算值得一來。

豚道樂

豚道樂＠黃埔

9/6/2019 12:00

今日決定黎黃埔行下，入到黎九號水產搵食。點知好多都未開門，定係已結束營業。就係門口近近地搵間拉麵食，點知有驚喜。最開心係拉麵店有BB櫈，岩晒我地呢啲一家大細出門。

特上原味豚骨拉麵 $85
先呷一口湯，勁濃，勁甜，好香豬骨味，質地仲好滑好忌廉咪。麵底揀左幼直麵，需要硬度略為未做到。特上有好多片叉燒，真係非常多，叉燒經過燒烤，表面微焦，多一份炭香味。半隻溏心蛋醬油味幾入味，蛋黃半熟，剛剛好。仲有紫菜等配料，非常豐富，味道也不錯。

特上海老湯拉麵 $98

另一款海老湯拉麵係假日限定，湯底係豬骨嘅基礎下，再加入海老，味道更加濃郁鮮味。特上配料同前一款相同，因為海老題，再加上一大把櫻花蝦，多一個香脆口感，非常不錯。呢碗要求加上辣醬，更可以帶少少辣味提香，加得正確。

難得帶埋小B都可以嘆拉麵，可能係久違了的拉麵的味道，呢餐覺得份外好味。
Bookmark一下先。

一幻拉麵

一幻拉麵＠尖沙咀

28/4/2019 12:00

非常出名嘅過江龍，終於排到時間來朝聖，幸好早黎到仲有位坐，仲有BB櫈俾小朋友，讚！

濃厚豚骨蝦湯拉麵 $88
一睇賣相已覺得非常濃厚嘅湯底，的確，係非常極之濃郁，喺豚骨湯嘅基礎上加上蝦味，蝦味非常突出，質地好杰身。自選幼麵掛湯送入口，係非常正斗的。叉燒都相當腍滑。自行加配多一隻溏心蛋，溏心正好。拉麵上舖滿紅薑炸麵酥，令成個麵多左一份紅薑香味，非常特別。

特濃蝦汁叉燒拌麵 $88
幾特別嘅一款拌麵，色彩繽紛，麵底拌上蝦味醬油，非常鮮味。配料有有叉燒肉絲、蔥花、炸麵酥等，撈勻一齊食，口感非常豐富。溏心蛋作為點綴，不錯。

蝦味飯團 $20
知道拉麵相當重口味，另外叫左一個飯團俾小B，有味飯，中間仲有幾隻蝦仁，味道不錯。

一向都鍾意豚骨湯拉麵，今次可算第一次似蝦味湯底，原來非常驚喜，味道濃郁，仲加一分甜鮮味，今次可算一個很好嘅新體驗。

三田製麵所

三田製麵所＠尖沙咀

17/3/2019 12:00

帶住小B出街，好難食到拉麵。難得黎到尖沙咀，路過見到三田製麵所有BB櫈，好耐無食沾麵啦，對上一次仲係幇襯銅鑼灣店，所以唔洗諗直入。

濃厚豚骨魚介沾麵 $78

個人唔介意濃味，直接呷一啖沾湯，非常濃香，魚介味重，質地好厚好杰身。麵就係粗口，剛剛好掛滿湯。叉燒算腍滑，溏心蛋不錯。

蟹肉薯餅 $38

另外叫左一客薯餅小食，外脆唔算油膩， 中間係忌廉夾雜類似蟹肉的東西，味道係不錯嘅。

非常滿足的一餐。以後可以帶阿B來食拉麵了。

拉麵Jo

拉麵Jo
9/7/2017 12:00

特製沾麵 $104

湯夠熱，魚介豬骨湯味濃

麵正常煙韌、稍冷

叉燒係正花腩脂肪入口即溶

整體唔錯

麵道@荃灣

麵道@荃灣
1/2/2017 12:00

特盛味玉醬油豚骨拉麵 $88
湯底幾重豬骨味，麵條幾滑煮得夠硬，叉燒炭燒過，溏心蛋流心度不錯。

海老豚骨拉麵 $88
龍蝦湯底較為薄弱

芝士餃子 $28

麵屋龍

麵屋龍@佐敦
16/3/2016 12:00

團購買到$58拉麵套餐。套餐包括一碗拉麵、三隻餃子、一罐罐裝飲品，都幾抵食。

札幌味噌拉麵

味道幾香，唔算太咸，都叫可以。配料好多芽菜、粟米等。拉麵條正常，叉燒較為鞋口，溏心蛋賣相唔錯，但唔夠入味。餃子反而驚喜，外皮幾脆，內餡幾鮮甜。

豚骨拉麵

湯底有輕微豬骨味，但唔算濃。

大門食堂

大門食堂@沙田

28/2/2016 19:30

黎到沙手搵食，誤打誤撞喺禾輋搵到呢間拉麵店，原來係來自東京埼玉縣嘅過江龍拉麵店，主打平價家庭式拉麵料理。唔怪得七點未夠已經排晒隊，最後等左差不多半個鐘就入場。

煎餃子 $28
賣相幾好，皮好夠薄，肉餡好甜非常多汁。

味蛋 $12

味道唔錯。

大門叉燒沾麵 $68
據聞湯底係由埼玉縣直送到港，沾汁好厚杰身，湯底係魚介豬骨湯，味道夠濃，仲有一大堆魚介粉自行撈勻。但咸香味重鮮味較弱，唔算油膩。可惜沾汁唔夠熱，只得微暖，最後唔洗加湯全飲，好似有啲味精。所有配料全部放喺沾汁入面，材料都好豐富，叉燒兩片、長條腩肉兩條、竹筍、紫菜等。叉燒經微烤但唔明顯，肉味幾甜，肥瘦適中。腩肉係三層巴士，肉質唔夠入口即溶，但算可以。麵條幾粗身，硬度適中，溫度微暖，口感幾彈牙，本身麵質不錯，掛湯度可以，可惜有啲麵條仍然痴成一舊，絕對需要改善。以呢個價位黎講，可以入口，但絕對有唔少進步空間。

大門拉麵 $48
湯底都係魚介豬骨，但比沾汁薄弱好多，非常清淡，出奇地溫度夠熱，比沾汁仲熱好多。最後決定加入拉麵胡椒，多一分胡椒香，味道都有改善。麵條同沾麵一樣之係粗身，彈牙度都係唔錯，但都有痴埋一舊嘅問題。配料有一片叉燒、竹筍、紫菜、青蔥等，$48算唔錯。

最後埋單仲免收加一服務費，價錢黎講真係贏晒，出品算可以，但仍然好多進步空間。據講呢度嘅油麵幾特別，經過都有可能可俾多次機會佢。

元旦無敵豚王

豚王
1/1/2016 13:30
1/1/2014 18:00
1/1/2013 18:00

1/1/2016 13:30＠尖沙咀

唔睇唔覺，原來1月1日食豚王已經成為年度事件。今次終於有機會坐喺Bar枱，見證煮麵過程，咁至夠風味。

豚王 ($85)

賣相依然咁豐富澎湃，香氣一流。原味豚王湯底選擇多醬料，普遍油，口味正合心意。奶白色湯底入口順滑，豬骨味鮮甜濃郁，膠質豐富。首次試下加入1辣度嘅秘製辣醬，辣醬少辣，以香味為主，撈入湯之中又有另一種香氣，值得追加! 拉麵要求嘅硬度亦做到，質地實在而且煙韌。選擇肩肉叉燒，兩大片薄肉片，肉質非常柔軟，味道仲好甜。唔少拉麵店嘅叉燒係凍嘅，原來豚王會先將叉燒浸入熱湯翻熱，個人更鍾意呢種又暖又腍嘅版本。椰菜分量勁足，熟成度剛好，入口清甜。唔洗講，全碗豚王清得一滴不留。

黑王 ($95)

另一款必選係黑王。墨魚汁湯底仍然鮮甜，加入黑色嘅調味球，撈入大量味噌同肉碎，味道更豐富。選擇普通油分，的確重口味得黎亦好易入口。另外追加一隻溏心蛋 ($17) 好似略為退步，蛋白醬油味偏淡，但今次流心度不錯，還算可以。

1/1/2014 18:00＠尖沙咀

1/1/2013 18:00 ＠中環

2013年1月1日嘅晚上，選擇左去豚王「開年」。六點鐘左右到達，已經排緊隊，真係誇張。

店仔細細，開放式設計，食野嘅地方係街邊行人路位置，的確好有日本街頭風味。

 

落單選擇左一個豚王，一個黑王。

豚王 ($80)

論香氣已經贏晒，豬骨味勁香。湯底呈奶白色，入口鮮甜濃郁，豬骨味勁濃。湯底幼滑又厚重，膠質豐富，有黏口嘅感覺。熱辣辣冬天食實在太好，飲完都唔覺得口喝，果然真材實料。選擇左硬身幼麵，白雪雪嘅直身麵條非常幼滑，好適合「雪」入口。要求嘅硬度亦做到，質地實在而且煙韌。麵條掛湯力超強，每一啖都吸收晒豬骨嘅香味。叉燒係兩大片薄身肉片，主要係瘦肉為主，但入口唔覺鞋，肉質柔軟。原裝版跟嘅配料包括木耳，亦可選青蔥或椰菜。椰菜分量落得慷慨，正好清清油膩感。

黑王 ($90)

黑王係以豚王嘅湯底作基本，加上濃濃的墨魚汁同香蒜油而成。名副其實，黑得可怕，成碗墨汁嘅程度。湯底豬骨味仍然濃郁﹛再加上濃郁嘅蒜味，墨魚汁色就夠黑，但未發現墨魚味，不過湯頭更加濃厚鮮甜。黑色的湯底上，再加上黑色嘅調味球。調味球似乎係味噌加肉碎，味道微辣，混合湯底之後，味道更具層次，真正重口味!

溏心蛋 ($15)

額外加配嘅溏心蛋，蛋黃略嫌過份凝固，不過蛋白滲透香甜嘅醬油味，而且軟滑度十足，算可以啦。

枱上仲有唔少配菜，加酸加辣自由處理，配麵亦唔錯。

八、九十蚊一碗麵，實在好貴。但八、九十一碗豚王，真係物有所值。份量十足，味道難以忘懷，已經值回票價。知道豚王人氣爆登，一直未有排隊嘅勇氣。今日終於一嘗，完全明白人氣鼎盛嘅原因。一試湯頭，已經完全被迷倒。食麵嘅時候充滿住矛盾嘅感覺，不自覺大啖狂食，但又擔心太快食完。完食後，豬骨嘅香味仍遺留於口腔之內，離開時候感受到無限滿足，又難離難捨，實在又愛又恨。

つけめんTETSU

つけめんTETSU@銅鑼灣

27/12/2015 14:00

新開呢個沾麵專門店被各大傳媒狂煲，特式係熱石加熱服務。其實呢樣服務亦唔覺得有幾新奇，記得旺角漁場台風已經玩過。不過就話係東京沾麵名店首間海外分店，亦係「熱石投湯沾麵」嘅始祖，就趁假期黎試一試。

小店係銅鑼灣，遠離拉麵激戰場，自成一角。不過位置大馬路街舖，排隊位置都相當窄。當日1點左右黎到，門口大約七八人排隊，等左半個鐘左右。

沾湯係豚骨魚介湯。令人非常失望係送上時沾汁唔夠熱，並無辣口感覺，已經估到呢個湯好快玩完。味道方面其實唔差，亦同三田製麵所好似。魚介豬骨湯非常厚身，杰度十足，亦唔油膩。味道係夠，但以重口味人士黎講亦未到超濃境界。
沾汁裡有幾件叉燒，個人覺得相當唔錯，雖然偏瘦但煮得好軟腍入味，口感有啲似午餐肉，印象相當深刻。

300g普通沾麵加蛋 $98
麵條有兩種可選，一種係普通麵，一種係傳聞類似烏冬嘅粗麵條。沾麵亦可選熱食或冷食，熱食的話，麵係會浸喺高湯之中，雖然能有效保持溫度，但一向都鍾意冷熱交融嘅感覺，亦備好硬麵，都係食番最傳統果種吧。麵條入口都幾煙韌彈牙，有小麥味，份量亦正常，肚餓的話300g都可餵飽男士。 半熟蛋入味算唔錯，但稍為過熟。

200g普通沾麵 $89

食到後半，沾汁真係凍得唔能夠忍受，就玩一玩傳說中嘅熱石投湯。宣傳講熱石可以將湯加熱到60、70度。講店員加石後，的確有一下「咋」嘅視覺享受，但入口就覺得幫補不太，湯只係略為回暖，相信係因為石頭嘅溫度未夠高，又失望了。

最後再試一試湯割，咖啡壺裝住高湯，俾客人自行加湯。由於沾汁唔算非常濃郁，只係略為加少少溝淡，入口都係微溫，飲完就算吧。值得一提，枱面有炸洋蔥碎，味道的確幾香。撈入沾汁內，係另一種風味。

總括黎講，呢間沾麵出品算不錯，但尚有非常多進步空間。又可能我地已經食過唔少高水準出品，要求進一步提高，呢一碗沾麵無甚特別。

重新愛上富士山

富士山55@尖沙咀
13/9/2015 20:00
20/12/2015 14:00

兩年半前未對拉麵沾麵產生強烈興趣，對出品亦不甚講究。當時曾經黎過富士山55，只覺得都唔錯呀，但未有留低深刻印象。近年越食越要求高，亦睇到好多食評，先知道原來呢間55係超具人氣。決定今日再訪，證明當時真係有眼不識富士山。今日到來柯打左兩客沾麵。從未驚過重口味，必選一客特濃豚骨湯，再加一客櫻蝦湯。

特濃豚骨沾麵 ($78)

單睇賣相已經不錯。此處特色係沾麵用鐵碗裝著，正方便用迷你電磁爐加熱，保持沾湯溫度。特濃豚骨湯真係濃得不錯，再加上魚介粉，魚介香比豚骨味更為突出，非常香甜。個人幾欣賞佢嘅麵條，粗身麵非常煙韌，飛水亦唔錯，微凍正好。配料方面有兩片薄叉燒，略為燒過，叉燒雖然薄但味道相當香甜，肥瘦相間，不錯。而溏心蛋顏色淺白，應該無特過滷過，但入口相當甜，溏心程度亦算唔錯。最後加入鰹魚湯，將湯一飲而盡。

 

櫻蝦沾麵 ($88)

櫻蝦沾湯係豚骨湯基礎上加多滿滿一層櫻花蝦，豚骨湯濃度略減，更加提升到櫻蝦嘅香甜味，此款會配上細麵。

最後，將櫻花湯改造成芝士飯，蝦香味配上芝士香，非常好味。

今日再訪的確令我重新愛上，全靠一個小小嘅電磁爐，令沾湯可以長期保持高溫，正係食沾麵一大加分之處。

神虎拉麵

神虎拉麵@灣仔
6/12/2015 12:30

咁岩黎灣仔聽講座，咁耐冇食拉麵梗係要搵間好味嘅。呢間神虎係大阪過江龍，開飯網排名都相當高。

等左一陣就入座，坐喺吧枱位。枱面有極冰凍嘅檸檬水、醬菜同辣芽菜。

是日叫左兩款拉麵同一客煎餃子。

餃子 ($38) 係網友推介菜，話有驚喜。餃子真係即煎，上枱時熱辣辣，隻隻脹bok bok，外皮微焦，賣相不錯。餃子外皮非常薄，菜肉餡好鮮味多汁，非常唔錯。

神虎 ($85)

整碗非常夠熱，湯底相當唔錯。質地好忌廉味，非常幼滑。豬味味好濃郁，再左豬背油提香，唔算油膩，相當鮮甜。加上蔥花湯頭更香，辣醬都幾夠辣，稍為撈湯又另一番口味。拉麵係幼麵，硬度不錯。蛋都係唔錯，醬油味夠，流心度一流。仲有兩塊叉燒，肉質還好，味道幾甜。

白虎 ($75)
其實湯底係一樣，只係神虎多左隻蛋。自選自虎配料全走，無伴青蔥果真差咁D。

總算收貨，但因為地置太遠，較難吸引回頭。一紙記錄就算吧。

日本一風堂自家製麵

大阪手信係日本一風堂自家製麵。是次得到一盒白丸、一盒赤丸。



湯包配料俾得好足。
白丸有一個拉麵、液體湯包、醬菜、蒜蓉、芝麻。

 

湯底好重豬骨味，拉麵好幼滑，自家紫菜、豬頸肉片，非常好味。

赤丸有一侠拉麵、液體湯包、赤丸調味醬、黑蒜油、醬菜、芝麻。


  

赤丸湯底多一份辣味噌，少少辣夠開胃。