鑽石山驚現馬來過江猛龍

姊妹@鑽石山

25/3/2012 13:30

身處喺鑽石山美食廣場嘅姊妹，簡單名字嘅背後，原來大有來頭。從頭條日報得知，呢間姊妹係馬來西亞過江龍，係當地一間極之出名、開到成行成市嘅食店，主打正宗星馬菜式，而鑽石山呢間更加係佢嘅第一間海外分店。

特色蛋春卷 ($30)

呢兩卷野正名係薄餅 (Popiah)，係此店嘅成名之作，聽講喺馬來西亞日賣六百份。煎得超薄嘅蛋皮，包住沙葛、青瓜、蘿蔔絲、花生碎同脆卜卜嘅炸粉等，材料好豐富。食落蔬菜料非常清爽鮮甜，加左甜甜地嘅特製醬汁，感覺更加濕潤可口。連一向討厭青瓜嘅本人，都願意咬晒所有青瓜絲。花生粒更加係重點所在，係脆度同香味嘅來源。雖然材料係全素菜，但配搭得宜，食極唔厭，十級推薦。

炸芝士春卷 ($25)

新聞紙另一推介美食，係炸芝士春卷。原來芝士並唔係包喺春卷裡面，而係放喺春卷表面。春卷炸得非常乾脆，可惜春卷皮太大塊，捲得太多層，餡料少到無影，隱約食得到有肉鬆等材料。上面嘅芝士無經過再烤焗，只係靠春卷嘅熱力自然溶化，芝士軟軟地，輕微痴牙，味道勁香，彌補到春卷嘅不足。

椰漿飯配炸雞件 ($38)

一睇呢碟飯已經覺得交足功課，首先有齊三種醬汁，未食已經俾足分，而且飯仲跟埋唔少配料，好似炸魚乾、花生同白烚蛋等，係坊間少見嘅誠意。炸雞本身其實麻麻地，炸得非常乾身，肉汁略嫌欠奉，質地偏乾柴，但外皮一陣濃香薑味都相當吸引。而椰漿飯的確無敵，入口非常香甜，椰香充斥喺口腔之中，回味無窮，食多幾啖都唔覺膩。嗜辣嘅朋友仲可以加埋特製醬汁，極度惹味，但個人實在受唔起果種又麻又辣嘅刺激，只好選擇海南三醬。黑醬油夠杰身，集甜、濃、香於一醬，另加酸辣汁同薑蓉，撈飯實在正斗。

過江龍黎香港做生意，老闆堅持選用馬來西亞當地嘅食材同正宗製作方法，確保原汁原味。的確，食到嘅係本地少接觸到嘅風味。個人覺得材料嘅配搭實在少見，特別係果卷野。呢個經驗令我改觀，一向都覺得所謂嘅美食廣場只係一個容納幾間垃圾食物嘅大排檔。但係，喺租金高企、連鎖霸權嘅時勢之下，美食廣場可能真係一個美食嘅立腳點。

新奇、有趣、刺激、好味。體驗正宗印度菜

印度廚房@油麻地
18/3/2012 19:00

從來未試過正宗印度餐，團購換來一個新體驗。原來喺油麻地、佐敦附近，就有一間由印度人主理嘅餐廳，提供最純正嘅印度美食。五道菜正宗印度二人餐，此新體驗只需$88，抵試。二人套餐包括兩款小食、一款燒烤串燒、兩款印度烤餅配兩款咖哩主菜，再加一份印度飯，同兩杯特飲，睇餐單都非常豐富。

香料胡椒餅 (Masala Papadam)
原來印度嘅胡椒餅真係一塊大薄餅。兩大塊口感勁脆嘅胡椒餅，脆到離晒譜，脆度拍得住薯片薄脆。胡椒餅上加左唔少生洋蔥粒、蕃茄粒同青蔥，胡椒味好濃郁，鹹鹹香香，食完之後，胡椒味同洋蔥嘅辣味仍然充滿喺口腔之中。

炸魚角 (Fish Pakora)
印度炸魚角並唔係西式嘅吉列魚手指，無炸得咁脆口。外皮粉漿薄薄，充滿住香料味道，中間魚肉幾鮮甜。

印度串燒雞 (Chicken Tikka)
呢款係得到其他食客一致好評嘅菜式，食落味道原來的確好野。又一出奇位係，串燒並無配上任何竹籤，而係由廚師串住黎燒熟之後，整件放上鐵板，再加上少許雜菜絲同檸檬就上菜。雞肉大大件，外皮深橙偏紅色，似乎經過長時間醃製，燒得微焦，香氣更吸引。雞件食落好嫰滑，醬汁味濃，味道微辣，有好香燒烤風味，配合少許檸檬汁更加惹味。

蒜蓉烤餅 (Garlic Nan)、芝士烤餅 (Cheese Nan)
兩塊烤飯份量超強勁，食完超飽肚，的確可以取代白飯。正宗嘅印度烤餅係用烤爐烤焗而成，呢兩件烤餅做得出色，製成品唔太油膩、入口乾爽，麵粉味濃，更鍾意佢既鬆軟又煙韌嘅感覺。加左蒜蓉，味道更濃郁。可惜芝士味道唔突出，同原味分別不大。不過兩款烤餅沾上咖哩汁之後，更見其價值。

香燒羊肉咖哩 (Mutton Masala)、原汁咖哩雞 (Chicken Curry)

印度咖哩以香味聞名，咖哩送上時，香味的確好吸引，口水流不停。咖哩集香、甜、辣於一碗，初入口時，只覺得甜味比較突出，但一路食，辣味就開始湧出，越來越辣。感覺上，香燒咖哩比原汁咖哩更辣、更刺激，味道更濃郁。而原汁嘅甜度同辣度，個人比較接受。香燒羊肉咖哩，份量都唔少，有足足六、七大件，羊肉韌度正常，獨立食膻味唔明顯，可能膻味通通融入咖哩汁之中，咖哩汁嘅羊味更香濃。而雞肉就非常嫰滑，吸收晒咖哩嘅味道，超級入味。

香菇香料飯 (Mushroom Pullao)
其實食埋個烤餅，已經好夠飽，估唔到個餐仲包個印度飯，試左兩啖，真係同香港飯好唔同。飯粒比較修長，入口較乾身硬淨。唔係太知道用左咩配料，似係香菇加一啲雜菜掛，味道淡淡地，相信都要伴咖哩一齊食。

芒果乳酪特飲 (Mango Lassi)、雜果賓治
原來呢杯野係出名嘅印度特飲，芒果味係有嘅，不過比較人工化，甜味假假地，少少酸甜嘅乳酪味，感覺奇怪，不過解辣一流。而賓治同學就非常好味，好過好多K場果杯，夠味、足料。

呢個$88餐，對我黎講，就好似飲食文化交流。唔黎呢度，真係唔知印度菜是乜傢伙，今次絕對係一個非常有趣嘅體驗。呢度俾我嘅感覺非常正宗，因為除左一位香港人之外，全店由廚房到傳菜侍應，都係印度哥、印度叔，基本上同客人嘅溝通語言default係英文，的確風味十足。味道相信都係正宗的，因為我實在食唔慣，感覺上佢並無因為要做生意，而特登迎合香港人嘅口味。你問我好唔好食? 恕我真係唔識食，但其中幾款係幾岩我倆口味。鍾唔鍾意? 我會老實答你「唔鍾意」。但呢種咁有個性，咁獨特嘅風味，的確一試無妨。

安已不。明星級糖水店

金玉滿糖@尖沙咀
18/3/2012 16:00

一早知道呢間甜品舖係由藝人開嘅，但位置實在唔起眼，估計生意一般，要借團購做下宣傳。$20當$40現金用，試下無壞。

五福臨門 ($32)
叫得做五福臨門，應該就係樣樣齊，乜都有啲。餐牌寫有什果、涼粉、西米、黑珍珠、明珠、水晶球。的確，有好多粒粒，但對唔住，我數唔齊咁多款。什果有酸到阿媽都唔認得嘅奇異果、無乜味道嘅西瓜，仲有甜得好過份嘅蜜瓜等。加上煙韌度正常嘅大、中、小西米同埋索索聲、脆卜卜嘅粒粒仔果子，最底係一堆黑涼粉。呢碗野仲加左芒果汁做底，但可惜芒果味欠奉，只得輕微酸甜，好彩加左少許淡奶，叫做有啲味。材料的確豐富，但感覺上有點不倫不類，樣樣都有啲，但味道欠缺。做甜品並唔係話咁簡單，一堆甜野撈埋一齊，甜加甜等於甜品。配搭唔岩，反而似亂倒一通嘅大懲罰食品喎。

益力多雪花冰加雪糕 ($48)
夠大碟，係個碟夠大，魚仔型都幾得意，可惜雪花冰只屬小份量。冰底味道係有嘅，隱約食到益力多味，但講唔上濃郁兩字。頂層嘅雪花冰打得一片片，賣相幾討好，但食到落中間部份，冰係粉粉細碎，水感太勁，唔太掂當。自選配料係蜂蜜加椰果，更大鑊係椰果連糖水都未去清，入口一陣糖膠味，假甜得可怕。另加八蚊一舊薄荷朱古力雪糕，正常份量，正常味道。整體黎講，呢個冰真係唔多掂，$40得一款醬加一款配料，價錢唔平，份量亦嚴重唔夠。

小店新開無耐，開飯網食評只得兩個，似乎仍未能營造人氣。座落尖沙咀山林道，一條好日都唔轉入去嘅街道，真係較難有walk in客。不過小店最好就係坐得舒適，而且有多部電視，hea時間一流。可惜個人覺得甜品非常一般，難吸引反轉頭。而當日仲有少許不安感受，不吐不快。

話說當日食緊甜品嘅時候，小店內嘅全體職員(總共三位)，同時間夾埋一齊叫外賣。外賣送到後，就霸左靠牆嘅一張四人枱圍住圈食飯加吹水。對於喺營業時間內，亦有三枱客人在場嘅情況，全體員工同時間小休嘆外賣，當住啲客人面前食飯吹水，會唔會影響店舖形象，呢個問題已經唔係我所介意，還好哥哥仔未夠膽講出「食埋個麵轉頭先同你落單」呢啲說話。

我更介意嘅係，三位職員吹水時，毫無表示出任何意圖或企圖降低聲量。舖仔細細，我地坐喺幾位嘅正正對角位置，係可以完完全全聽到佢地嘅所有對話。騷擾與否都係事少，但佢地嘅對話內容，實在令人不快。言談間，幾位狂數團購宣傳嘅不是，包括做團購極度無肉食、幾乎白做，又試過團購客出蠱惑翻用優惠券，大數該等客人博大霧等等。幸好言語間無任何粗言穢語，但作為團購客嘅一份子，我地確實有點不快。雖然呢啲應該真係事實，但都唔應該俾客人聽到。更值得留意，該等職員係一定知道我倆係同一團購會員，因為早喺落單時，店方已經收取並核對有關優惠券。所以難免令我地不自覺對號入座，認為職員有意無意講俾啲客人聽。照道理應該唔會(希望真係唔會)，理性上都相信唔係，但心理上感覺極不安。

團購介紹話佢係明星級糖水店。明白嘅，藝人創業，明星朋友自然多，的確有唔少明星幫襯。所謂嘅明星級，應該真係多明星客人咁解，並唔係有質素、具名氣，喺飲食行頭裡有頭有面、受盡熱捧嘅意思。作為甜品舖，食品質素有待提升。作為飲食服務業，店舖、員工管理亦應該多加重視。

 

睇黎，佢送果張終身九折VIP卡，作用不大，放喺銀包都嫌阻住。

冰凍乳酪原點

Yogo Frozen Yogurt@銅鑼灣
18/3/2012 14:15

記得早年Froyo突然冒起時，第一次試食嘅就係呢間Yogo，感覺唔錯，從此愛上，兩個夏天都以Froyo解暑。團購又俾機會我回到原點，又可以錫住荷包，又可以試多次好味嘅乳酪。$15買到$40 現金券，抵食!

原味、士多啤梨味乳酪 ($42，團購價$17)

每次食乳酪必試嘅原汁原味真係唔錯，輕微酸味，乳香味夠，而且質感係超幼滑，零氣孔，冰涼得黎冰感唔重，絕對無沙冰feel。姐姐唧乳酪出黎嘅時候，已經睇到乳酪幾夠挺身，難得食到又滑又濃味嘅乳酪。士多啤梨味道亦夠香，酸甜適中，都相當唔錯。配料揀左原味麻糬，麻糬應有嘅軟綿同煙韌都充分表現出黎，加上濃甜嘅朱古力曲奇餅同朱古力針，令乳酪更加豐富可口。

呢間小店開業無耐，已經深受附近學生哥同上班一族歡迎。店方有四部乳酪機，共有八格乳酪，每次最少有五款口味選擇。由專人唧完乳酪之後，客人可以自行添加配料。配料整齊擺放，種類都有三十幾款。值得留意店方提供唔少坊間少見嘅健康材料，好似燕麥、果仁等，都幾多花款。同其他一樣，都係每100g盛惠$15的話，呢間質素感覺略勝一籌，難怪食過一次就念念不忘，值得推薦。

豪邁大啖吔丹麥鐵三角麵包

丹麥餅店@銅鑼灣
10/4/2011 13:00
18/3/2012 14:00

10/4/2011 13:00

一間傳統懷舊嘅餅店，賣緊大家童年時候嘅早餐食品。

 

熱狗 ($8)

一隻熱狗可以有幾好評?

長長地嘅豬仔包焗到熱熱。同西式嘅熱狗唔同，港式熱狗唔用芥末醬，改為一邊塗牛油，另一邊塗沙律醬。再加上一直喺爐邊烤緊嘅香腸，夾一夾，整個熱狗大功告成。食一啖就知，原來真係好味。首先新鮮即製一定唔會難食得去邊。再者麵包非常之鬆軟，仲有大陣甜甜嘅麵包味，係最香甜嘅餐包味道。熱力更將牛油同沙律醬溶入包中，最後配上熱辣辣、有肉味嘅香腸。一個得麵包、醬汁、香腸三個咁簡單嘅食材，已經集合晒所有好味嘅元素。

炸魚柳包 ($12)

麵包一樣焗到熱熱好鬆軟，魚柳炸得鬆脆，唔油膩。魚柳好新鮮，食到魚柳鬆軟嘅質感。茄汁同沙律醬同時出現，兩款醬汁加埋就係最原始嘅味道。食左呢個包之後，就覺得乜記物記已經唔入流。

每個包都只有好簡單嘅三個元素，冇任何生菜、酸瓜等配料， 係最原始、最簡單、亦都係好家庭式嘅風味。十蚊八蚊一個做下午茶或小食，係唔錯嘅選擇。妮啲思&鄭淘文，請大啖大啖食，啲汁流晒出黎先至過癮。

後記
18/3/2012 14:00

黎得銅鑼灣，唔想食太heavy，食個包包就最岩，今次一於試埋炸豬扒包先得。

炸魚柳包 ($13)
魚柳一樣咁新鮮，熱辣辣，脆脆地，配酸甜嘅醬汁真係好味。

豬扒包 ($13)
今次試埋好評嘅豬扒包，感覺上同澳門嘅唔同。包係鬆軟香甜嘅餐包，豬扒經過油炸，外皮脆脆地，肉質鬆軟，配上沙律醬同茄汁，係非常簡單，家庭式嘅包包。感覺上魚柳包更好味，因為豬扒味道較淡，肉味欠奉，被沙律醬同茄汁嘅酸甜蓋過。算啦，平平地，無計。

食呢個包，真係有啲捩(口棄)。首先，包係必須外賣拎走，好大機會係邊行邊食。醬汁同油喺雞皮袋滲出，食完之後成手油腍腍。不過好味無計，儀態不顧，大啖吔吧啦。

$46包場食牛陣

牛陣@尖沙咀
12/3/2012 13:45

尖沙咀H8係為食貓新蒲點，咁耐都未搵到時間走上去，終於俾我買到牛陣嘅火鍋團購，有機會去下H8，又有機會試下有幾牛。無敵超筍團購優惠，只需$38就可以歎價值$78嘅「牛陣」上級牛肉火鍋午市半任食。

超筍套餐包括清湯底、一碟150g嘅美國上級牛肉或豬柳肉配豬肋肉，限時60 分鐘，可無限量追加其他三十多款火鍋配料，係原價值$78嘅果款套餐。
 

湯底

其實餐廳都容許加錢轉湯底，不過反而想清清地，試原汁原味。清湯底真係非常清，輕微甜甜地，平平地無所謂啦。

美國上級牛肉
150g原來都唔少，都有整整八大片。牛肉切得厚薄適中，除左中間部份較多脂肪之外，其他部份雪花分佈都非常平均，脂肪含量適中，紋路清晰，只不過唔知係唔係燈光不足，色水略為深紅。牛肉只需稍為涮十秒，七成熟嘅牛肉都幾腍滑，肉味都算幾濃郁。加埋必點嘅芝麻醬，多一份麻香味，更加惹味。

醬料
除左芝麻醬之外，仲有甜醬油等，另有蒜蓉、炸蒜、青蔥、辣椒等可以任意調配。

所有配菜係自助任攞，食物吧大約有二十款配料選擇，材料整齊企理，睇落都非常新鮮，感覺良好。有豆腐、廚師腸、烏冬、拉麵、粉絲等。個人覺得魚蛋幾彈牙唔錯，而牛肉丸雖然粉粉地，但中間有爆醬餡，幾特別。

蔬菜瓜果雜菇約有十款，都算幾新鮮，原來落南瓜打邊爐都唔錯。

Häagen-Dazs, presented by "I'm Sorry!" Hello Kitty
此店一大特色就係雪糕任食，因應唔同分店，提供大師或D記雪糕。揀得H8當然係貴價嘅大師啦。每次有四款雪糕任食，今日有咖啡、唔知芒果定蜜桃、士多啤梨同朱古力。不過有兩款比較受歡迎，份量唔多，而且雪得比較硬，要食就趁早。最好就係可以自由任加配料，有朱古力、士多啤梨醬、仲有朱古力彩針等，可以隨意配搭。

特登揀平日嘅兩點鐘，避開啲上班一族食飯時間，可以慢慢嘆，唔洗同人爭。去到嘅時候，只剩低三枱客，店方安排我地坐大大張四人枱。呢間分店應該新開無耐，裝修企理，座位都好闊落舒適。可能真係人流唔多，侍應們可以專心服待幾枱客，態度良好，並無出現網友們所講嘅十問九唔應。到後半場時間，幾枱客都走晒，只得我倆包場。快樂嘅時光過得特別快，60分鐘過去，都無任何一位職員催促埋單，亦無明示或暗示請你離開。只不過湯底煲左一個鐘，水份唔多，自動限時。食得飽飽，後段慢慢嘆雪糕，任食唔嬲。最後，我地坐足75分鐘先慢慢離去，職員們亦無任何黑面，唔順氣嘅表情，繼續大大聲笑住咁講多謝晒，仲友善提醒記得攞齊野。團購$38，另計加一$8，呢八蚊係值得俾的。

$46喺九龍區食午餐係閒閒地，今次仲可以包場半任食，的確抵。呢個套餐原價$78，都係合理價錢。不過事實證明食放題避開人流，係比較有著數。

題外話，當日大約2:30pm，見到有位疑似牛陣日本高層黎睇場，唔知會唔會係服務特別好嘅另一個原因?

千奇百趣低B班之沒有迴轉的壽司

大丸迴轉壽司@深水埗
11/3/2012 19:30

深水埗除左街坊平價茶記之外，早排發現開左間日本料理，試過午餐都可以。見團購做優惠，$43當$100現金消費，非常抵食，買左兩張，可以食餐好嘅。

一口炸雞 ($28)
散叫嘅兩款小食用一隻大碟一次過盛裝，但夾埋成六十蚊，睇落份量比較少。一口炸雞細細件，真係一口食得晒。雞炸得非常乾身，乾到汁都無滴，食落比較實硬，肉汁欠奉，嫰滑不足。

日本芝士年糕 ($32)
三十幾蚊得兩件，切開一半都係細細件。年糕外皮脆脆地，白色嘅年糕煙韌度略嫌不足，但米味唔錯。中間粉黃色嘅，係想流出黎嘅芝士軟心，芝味幾濃郁。但整體黎講，好似元氣比較好味。

日式帆立貝炒飯 ($68)
呢個炒飯嘅宣傳相片影得非常吸引，實物同相片大致差無幾，只係上面嘅帆立貝比相片縮水縮左一半，還好幾鮮甜。炒飯算炒得唔錯，飯幾乾身，粒粒分明，珍珠飯粒非常煙韌，有咬口。炒飯用左唔少青蔥、蘿蔔粒同柴魚片等，炒得非常乾爽，好有鐵板炒飯風味。

芥末八爪魚軍艦 ($18) presented by "Wearing a Beanie" Hello Kitty
每次食壽司例必點嘅八爪魚軍艦，用可愛嘅小木板送上，賣相討好。芥末八爪魚煙煙韌韌，份量都好澎湃，芥末味亦充足，只不過紫菜略嫌腍左少少，唔夠新鮮。

饅魚壽司 ($15)
最愛嘅饅魚壽司兩件只需$15，賣相唔錯，味道亦正常。

三文魚三味 ($18)
特價嘅三味，包括火炙黑椒三文魚、火炙醬油三文魚、火炙三文魚壽司，每款各一件。呢間店嘅火炙系列味道唔錯，炭燒味濃郁，再加上黑椒、醬油等唔同調味，更加惹味可口。三文魚燒得半生熟，更加腍滑。而其中一件三文魚肥美度好比三文魚腩，如果真的話，實在太抵食啦。

辣味三文魚軍艦 ($15)
三文魚第四種死法，係用辣汁醃製再放上軍艦，不過呢款三文魚辣味不足，麻麻地。

吉列炸蝦卷 ($25) presented by "I Love You" Hello Kitty
吉列炸蝦卷細細粒，應該係一件炸蝦切三件。炸蝦都算幾香脆，除左炸蝦之外，仲加左些少生菜，食落幾清爽，外層仲加左啲蟹子，味道正常，但唔太特別。

埋單要計埋加一，總數$241，計晒團購優惠，呢餐約係$130，團購價當然唔貴。$130埋單，質素收貨有餘的，但正價吸引力唔太大，其他地方都係咁上下。始終呢間位置唔係特別方便，而深水埗實在太多平價選擇。如果行開呢頭，想食壽司的話，都可以試下嘅。因為呢間有一個非常好嘅態度，所有壽司都係即叫即製，保證新鮮，一定唔會放得太耐。小店明明有一大條識轉識行嘅迴轉壽司帶，但上面係一件壽命都無，只係轉緊啲宣傳單張。想食壽司的話，一律要落柯打。態度係值得欣賞的，但改名做迴轉壽司，有迴轉壽司帶，但竟然無一件壽司係迴轉緊，呢個境況值唔值得上千奇百趣呢?

垂死復活怨念怪味料理

神串一日本料理@尖沙咀
18/12/2011 14:00
11/3/2012 13:30

18/12/2011 14:00

經常行過The One嘅高層，見到唔少食肆，但生意好似麻麻地，因為人流唔多。其中一間日式料理神串一終於要做下團購宣傳，早前有放題任食，但評語好一般。今次$38食壽喜燒定食，對個菜單幾有興趣，所以買左兩張黎試。

套餐包括前菜中華沙律、麵豉湯、壽喜燒鍋配白飯。

壽喜燒湯底味道淡淡地，少少甜，少少醬油，同想像中濃郁香甜嘅醬油湯底好唔同。鍋物有幾片雪花肥牛，肉味算可以，肥瘦適中。食肥牛不可缺少嘅仲有生雞蛋，其中一鍋仲中左獎，發現到兩大隻雞蛋。雞蛋算係呢個鍋最好味嘅成員，雞蛋味夠濃，浸喺湯慢慢煮熟後，呈現最滑溜溜嘅半生熟狀態。配料仲有好多椰菜、冬菇、豆腐、金菇同粉絲等，配料真係配角，只係用黎墊高啲肥牛，令到個鍋見食啲，味道好一般，而且啲金菇好似有泥味，怪怪地。

食完成餐飯嘅感覺，同啲金菇一樣，怪怪地。

門口掛住嘅，竟然唔係「歡迎光臨」嘅水牌，而係「休息」兩隻字。入到去，餐廳似乎無乜開燈，但係完全feel唔到佢想營造邊一種格調，只覺得佢想環保兼慳電。玻璃窗邊透入刺眼陽光，更加感覺佢無乜開冷氣。餐枱似乎無人抹過，仲有兩粒白飯加三粒白芝麻。陽光反射之下，仲見到椅背框映出閃閃嘅油光。職員們態度散慢，齋傾計唔願做野。廚房佬都唔願出菜，足足等左半個鐘都未有野食，疑似係白飯未煲熟之故。

事隔一星期，上開飯網睇番食評，發覺餐廳名稱旁邊寫住「已結業」，心中不禁暗喜開口中。我地好似有預知能力咁，就喺佢臨執笠之前，用埋張團購券，始終硬食總好過等十年都退唔番錢。睇番開飯網食評，過半數係劣評，團購中伏嘅食客們都施咒早執早著，大家嘅念力令佢今日真係關門大吉。幫襯時，餐廳內外上下左右，都好一致地俾到一種聽執笠嘅態度。如果一間餐廳抱住呢種態度去經營，執笠都真係遲早嘅事。不過都係可喜嘅，因為期望不久嘅將來，會開番一間新食肆，當然更加希望係一間好食肆。

後記
11/3/2012 13:00

有日唔知痴左邊條線，又走去買左兩張$30嘅午市套餐優惠。買完之後先醒覺，又係神串一，乜唔係執左笠咩? 上開飯網睇番，「已結業」三隻字消失左，估計係轉手經營復活左。算啦，一個套餐包麵豉湯、一個飯同一杯飲品，計埋加一都係$38，食飽就算。

豚肉西京鍋燒飯 (Presented by "Do Not Disturb!" Hello Kitty)

一個熱鍋上菜，但賣相認真麻麻，白雪雪無黎色水，係白飯加洋蔥煮豬頸肉片。味道正常，唔覺有幾和風。乾爭爭，汁都無滴。至於果碗麵豉湯，感覺上係菜頭菜尾加埋啲麵豉煮埋一煲，啲菜又煮到爛晒，奇奇怪怪。

和風牛肉飯

比較穩陣嘅選擇，肥牛都幾多，腍腍地，無乜肉味，同吉野牌差得遠，只不過特別在加左一粒蛋。

第二次去神串一，門口改為貼左「滿座」，似乎進步左。入到去，的確客人係多左十倍，員工好似有番啲精神，出菜速度亦快左，但啲野食一樣奇奇怪怪，唔多好味。唔知因為咩原因，明明由「已結業」突然復活，但完全唔覺得係好事，只覺得係垂死掙扎，死唔斷氣。唔係講笑，繼呢個午餐團購之後無耐，又整個團購晚市任食放題。久違了的Hello Kitty仔又重出江湖，用咁嘅衰樣，講番一聲「Do Not Disturb! 咪再搞我!」

為左隆重歧視佢呢種不屈嘅態度，我都要改下個標題襯番佢。

城底之急凍青蛙

Frozen Frog Yogurt@旺角
4/3/2012 21:00

銀城商場地庫開左唔少精品店，近排仲有乳酪、台式飲品店進駐。團購$20就可以試試青蛙仔乳酪，當$40現金使用。

原味、黑加倫子乳酪 ($40.5，團購價$20)
小店舖仔細細，無得自由唧，唧乳酪嘅工作由姐姐仔代勞。除左原味之外，仲有兩款每天轉換嘅乳酪口味。唧好乳酪之後，就由客人自助隨意添加配料，都有成二十款乾配料同水果選擇。

呢間小店嘅乳酪質感算唔錯，加完配料之後，乳酪都無溶化，質地較為結實，亦都非常幼滑，完全無任何一點空孔，口感唔錯。原味酸度較微弱，係偏重奶味，乳酪感唔足夠。而粉紫色嘅黑加倫子就比原味酸少少，有輕微水果味。兩款乳酪質感係非常之好，但味道略嫌唔夠濃郁。配料選擇左益力多味爆珠，亦加左黃色星星啫哩，酸酸甜甜水果味，煙煙韌韌，可以幫補下乳酪口味。每逢食乳酪必配嘅原味糯米糍，呢間就做得唔錯，香軟煙韌，食落有啲似日式年糕，唔錯。而乾粉類配料都磨得好細緻，從來未見過咁幼細嘅Oreo碎，而餅乾碎味道更吸引，除左牛油味之外，仲有好香玉桂味。

其實對呢間青蛙牌乳酪係無任何期望，諗住平平地一試無妨，估唔到質素都可以。佢嘅特色係乳酪質地非常好，配料都唔錯，只不過乳酪嘅味道略嫌不足，似乎比配料搶左風頭，無乜特別，不過不失。如果行開附近的話，都可以一試，反正做緊優惠價，每100g只需$12，比唔少店舖平幾蚊，都抵食嘅。

請宣揚這秘密。見證這一百分誠意

秘密花園1981咖啡店@長沙灣
4/3/2012 19:00

早年前已經幫襯過呢間咪咪花園，覺得午餐質素唔錯，只不過衰在地點隔踄，介乎長沙灣同荔枝角中間，唔喺果頭返工，係絕對唔會經過。今次有口福，筍仔網$53就可以試試西式晚餐，有湯、有扒、有飲品，仲有甜品，咁豐富，千祈咪走寶。

意大利雜菜湯、牛油餐包
餐湯係平時常見嘅雜菜湯，比較稀，但蕃茄味濃酸少辣，仲有好多蘿蔔、椰菜等，相當足料。餐包係一般現成包包，鬆軟確係鬆軟，但如果花多少少時間焗熱佢，令牛油可以融入麵包中，相信會更加好。

蘋果蜜桃綠茶
餐飲可選擇茶、啡之外，仲可以揀是日特飲。蘋果蜜桃綠茶味道夠濃，蜜桃、蘋果味充分表現出黎，仲食到有細細碎碎嘅蘋果皮肉，估計係新鮮即榨，並唔係用濃縮果汁欺騙食客，真材實料。

西冷牛扒伴蒜蓉黑椒汁
大大塊地圖形狀嘅牛扒，配幾件香脆入味嘅薯角，同埋白烚雜菜，蒜蓉黑椒汁用杯仔另上，盛裝賣相討好，亦感覺高檔。西冷牛扒外層些少焦脆，要求嘅七成熟的確做到，切開牛扒肉芯仲有片片粉紅色。牛扒係帶些少筋、少許脂肪嘅類型，軟腍程度正常，帶微輕煙韌，並唔係醃到腍晒、無晒質感果種偽裝牛扒。牛味夠濃，有肉汁，沾埋蒜香帶微辣刺激嘅蒜蓉黑椒汁，味道更加豐富。始終都係黑牛最合襯。

法式羊架伴薄荷汁
估唔到團購幾十蚊已經可以品嚐到貴價羊架，真係驚喜，當見到羊架份量十足，的確比驚喜更驚喜。羊架足足有三大件，每件都係連骨帶啖啖肉，都相當厚身。 羊架外皮燒得微焦，表面灑滿香草，睇見都流口水。羊肉大約燒得八成熟，肥瘦適中，始終帶些少脂肪先至夠膻香。外皮真係脆脆地，肉質腍滑，一啲都唔韌，肉汁仲好豐富。除左羊味十足之外，亦帶微微嘅香草、黑胡椒味，可見醃製得非常夠時間。其實原汁原味唔沾任何醬汁已經好夠味，套餐仲跟埋薄荷汁。起初感覺奇奇怪怪，嘗試輕沾一滴試味，醋酸味勁濃，仲有涸喉感覺，真係有少許抗拒。但原來伴埋羊肉一齊食，肉味中和左醋酸味，令羊肉更加清新可口，就好似羊肉加黃芥末嘅微妙化學作用。事實證明，醬汁係一定要撈埋主角一齊食，先見其價值。

原味木糠布甸

一向都知道呢間小餐廳嘅木糠布甸係自家製，而且深得大眾歡心，的確，係事實。木糠布甸嘅重點係幼滑、細碎嘅瑪莉餅碎，餅碎平均地舖喺布甸表面，造型已合格有餘。木糠布甸分為兩層，中間都有一層餅乾碎，口感非常豐富。布甸甜度適中，牛油忌廉味香濃，質地好幼滑，入口即溶程度好比雪糕。加埋奶味十足嘅餅乾碎，實在太好味。質素好過好多所謂甜品舖。

藍梅芝士餅

細細件，切得幾靚仔，似乎都係自家製作品。從橫切面睇黎，餅底好結實，無任何分裂嘅情況出現，入口有好香牛油味。芝士部份都相當幼滑，勁芝味，面層嘅藍梅醬酸酸甜甜，味道到位，仲有粒粒藍梅，非常好味。不過真係太細件，完全唔夠喉。

團購價五十多蚊一個套餐，真係抵食，至於正價係一般西餐價位，$60-85左右。此餐廳嘅出品，由餐湯到甜品，都令人滿意，相信就算正價黎食都係合理價錢。特別係甜品更加令人回味，好多人都話甜品係一餐嘅終點，一個美味嘅甜品，就為一餐畫上完美嘅句號。唔知係唔係晚市客人唔算多，所以喺呢度食飯，感覺特別舒服。歐陸式嘅枱椅，加上別緻嘅裝潢擺設，氣氛認真一流。服務方面都係有讚無彈，陽光男孩們個個親切有禮，非常勤力主動，請著呢啲員工，老闆眼光真好。

改名做秘密花園，絕對唔關周姐輪或者玄彬事。經營起緣係一個非常溫馨嘅故事，而深入一個舊式工廠大廈區之中，的確係一個秘密嘅地點。附近有咁多工廠寫字樓，絕對係上班一族嘅午飯熱點。只不過平日晚上同埋假日，人流真係相對少好多，星期日晚七點時份，係完全唔需要等位。所以店方都好懂得把握網上宣傳，一來拓展市場，二來可以同客人增加交流、保持聯繫。店主亦好樂意回應客人嘅意見，從開飯網所見，無論評語係讚定彈，大部份留言都有店主細心回覆，感覺良好，亦見用心。一句講晒，能夠充分感覺到經營者對每一位客人嘅重視，足見一百分誠意。

此店絕對配得上近排一個好常見嘅形容詞「有Heart」，所以值得我同樣「有Heart」地落足一百分心機去讚揚。我相信呢個絕對唔係杯能梳的咪咪，真係希望多啲人認識佢，支持佢，等佢繼續做落去。

加油!

豪邁。澎湃。英雄盡顯霸氣

Hero Sandwich@大角咀
14/8/2011 13:30
4/12/2011 18:00
4/3/2012 14:00

14/8/2011 13:30

Hero，充滿霸氣嘅名稱，係新開業已經受盡熱捧嘅三文治餐廳。雖然地方有啲唔就腳，見開飯網評語不錯，一試無妨。團購價$29一個多倫多風味三文治餐，可以任選一款三文治，配薯條及汽水，有興趣嘅仲可以加錢轉配其他小食同飲品。

燒肉眼牛扒三文治、 酸忌廉煙肉焗薯、汽水 ($60，團購價﹕$43)
材料有據講由加拿大入口嘅肉眼牛扒，配上芝士、紅洋蔥、生菜同特製醬汁。
燒牛肉以醬汁醃製，再薄切一片片，以薄切肥牛嘅形態一大疊堆砌，再夾入麵包中，非常豪邁。燒牛肉片熟成度一流，仲見到肉中間有一片迷人嘅粉紅色，正係最幼嫰嘅地步。牛肉味濃，有微微嘅羶味，軟綿嫰滑根本不需太多咀嚼。肉質軟嫰得黎，肉汁更豐富。一大啖咬嘅時候，牛肉汁喺麵包邊流晒出黎。最令人印象深刻嘅係，肉汁並唔係慢慢滴落黎，而係水如泉湧咁流落黎。每一啖都食得到牛嘅嫰滑同肉汁，更勝酒店級自助餐嘅燒牛肉。牛肉汁仲滲入麵包內，令麵包更軟腍，與牛扒融為一體。

法包內層輕輕塗過牛油，經過烤焗後，微暖嘅麵包更加外脆內軟，鬆脆可口，係法包嘅最高境界。其他嘅配料係錦上添花，以半生熟洋蔥提味，仲有新鮮爽脆嘅生菜片。芝士溶化得徹底，同甜酸有輕微芥末味嘅特製醬汁混合，一個三文治就係如此豐富，如此精彩，但醬汁俾多少許的話，相信會更加開心。

大拿拿加多$14轉嘅焗薯反而係最差。一個細細焗薯有天然嘅薯仔味道，無其他調味，只靠中間一丁點酸忌廉同煙肉碎提味。酸忌廉味道偏啖，還好煙肉碎脆脆，亦有些少調味粉。

 

燒豬扒三文治、薯條、Mövenpick蒸餾咖啡 ($45，團購價﹕$32)

燒豬扒三文治明顯不及以上咁精彩，但味道仍尚算不錯。兩大塊豬扒以濃甜燒汁醃得入味，肥瘦適中，邊位有些少脂肪，有豬扒應有嘅爽滑，但豬肉味略嫌不足。配料有新鮮清甜蕃茄同爽口生菜，仲有半熟洋蔥，塗上白色類似沙律醬嘅酸甜汁。麵包一樣做得出色，但難忘牛扒包嘅澎湃肉汁，始終略遜一籌。

三文治旁有一堆跟餐嘅粗薯條。炸得香脆唔油，啖啖薯仔肉，面層仲灑左調味粉，有咸咸香香嘅味道，忍唔住食唔停口。

轉配嘅咖啡亦都好唔錯，據講係Mövenpick咖啡。聞到陣陣咖啡香，先飲一口唔加糖，味道好濃郁，冇任何一丁點酸味，咖啡香唔苦澀，質感幼滑好Creamy，感覺上係比較多奶嘅製法，正合心意，配上Mövenpick專用咖啡糖，味道更香甜濃郁，咖啡味久留喺喉嚨丁，持久不散。

知道平時人氣已經唔小，而家仲有團購嘅推動， 點都要等下位。所有三文治新鮮即製，開放式廚房睇到晒製作過程，等餐需要約二十分鐘。正價一個餐，三十幾至五十幾蚊都有，味道的確係唔錯，有團購更加抵食。衰在位置比較隔涉，如果行開果頭的話，相信都有興趣俾正價食多次，當晚餐都唔錯。

後記
4/12/2011 18:00

食過一次就回味無窮嘅Hero又做團購!! 雖然使用期得短短一個月，但都係毫不猶疑，買左兩張團購券，實行再試好味三文治。今次選擇喺傍晚時份黎，Order番最人氣嘅燒肉眼牛扒三文治，三文治仍然保持水準，肉汁豐富又軟嫰嘅牛扒，真令人難忘。

煙三文魚雞蛋沙律三文治、薯條、汽水  ($43，團購價﹕$29)

終於都試埋上次售罄嘅煙三文魚治。未食之前，八卦拎開上層麵包，一睇，煙三文魚由頭排到尾，一大塊覆蓋喺長長嘅法包之上，完全唔吝惜。煙三文魚的確有煙燻嘅香味，味道微咸，再加埋新鮮生菜、蕃茄，同埋蛋沙律，成個配搭非常唔錯。蛋沙律味道濃郁，有粒粒蛋白，食起黎唔覺膩，配煙三文魚好夾，係一件好清新嘅三文治。

薯條唔洗講，仍然係香脆無比，啖啖肉又惹味。

光顧過兩次，質素都係好，試過三款三文治，總覺得燒肉眼牛扒三文治更勝一籌。下午六點時份黎到，唔洗等位，工作人員做三文治做得更有心機。想試好野的話，不妨避開繁忙時間，當做early dinner，坐定定，食件豐富三文治，嘆番啖香濃咖啡。如此享受，團購價都只係三十多幾蚊。

再後記
4/3/2012 14:00

Hero似乎做團購做得好開心，近期間唔中都推出有效期一個月嘅團購優惠，益晒我啦，又可以試新款。今次都係中午時間黎，都幾爆場，要等一陣位。

照燒雞三文治套餐 ($40，團購價﹕$29)

同其他三文治一樣，餡料豐富，蔬菜新鮮爽脆，醬汁濃郁，係呢度嘅特色。麵包一定係外脆內軟，材料超豐富，雞扒夠大塊，肉嫰多汁。另加固定班底新鮮蕃茄、生菜同紅洋蔥，醬汁係甜甜地嘅照燒汁。呢個三文治味道正常，不過都總好過老麥嘅板燒雞腿包。

黑椒煙燻牛肉三文治套餐 ($44，團購價﹕$29)

除左超級好味嘅燒肉眼牛扒三文治之外，餐牌仲有一款黑椒煙燻牛肉三文治，一於試埋。材料有芝士、蕃茄、紅洋蔥、生菜，配上蜜糖芥末醬。主角係黑椒煙燻牛肉，睇落其實似火腿，但件頭比火腿厚身，口感亦較為煙韌，外邊有粒粒黑椒，黑椒味濃，仲有少許煙燻味，味道幾濃香，不過整體黎講比較乾身。

順帶一提，今次薯條係偏腍身版本，並唔係熱氣脆脆嘅，但一樣薯味十足，調味十足。其實我都幾鍾意食腍薯條。

截至2012年3月，已經先後幫襯過Hero三次，試過五款三文治，最好食嘅依然係招牌燒肉眼牛扒三文治。希望遲下又有團購，可以繼續試新款，繼續加長呢篇野，哈哈。

酥記豬扒。賣麵不賣飲

東記上海麵@大埔
24/2/2012 13:00
2/3/2012 13:00

24/2/2012 13:00

生活喺大埔，係一件好值得高興嘅事，因為左右附近都有出名好食嘅餐廳。就近嘅大埔新街市熟食市場，已經有好幾間有能力吸引區外人士特登黎搵食嘅人氣名店。其中一間係專做豬扒、雞翼上海麵嘅小店。

豬扒拼菜肉雲吞幼麵 ($25)
此店菜單少到可以隨時背出黎，獨沽兩味，一係豬扒，一係雞翼。$25雙拼粉麵任選豬扒或雞翼，加配炸菜肉絲、雪菜肉絲、竹筍肉絲、牛丸、牛筋、牛腩、炸醬或者菜肉雲吞。亦都可以要淨豬扒、或淨雞翼，再唔係就豬扒拼雞翼，以上就係全個餐牌。

酥炸豬扒永遠都係隨後送到，因為係新鮮即炸。豬扒有肉有骨，大大塊，任何時候黎食都一定係酥脆到爆。外皮炸粉薄薄地，最欣賞佢炸得乾身，香口唔油膩。脆皮之下就係軟腍腍嘅啖啖肉，肥瘦適中，脂肪位更加嫩滑多汁。豬扒除左有甜甜嘅肉味外，仲加左唔少調味料，味道濃郁入味，蒜味特別香，惹味程度拍得住某大大雞扒。不過超級酥脆嘅代價，就係頂級熱氣，食到咁上下，惟有要浸下湯解熱，再唔係就即刻飲涼茶。

題外話，之前試過炸雞翼都唔錯，一樣新鮮熱辣，勁juicy夠味，不過個人都係偏愛炸豬扒多一點。

老實講，黎呢度食，真係志在豬扒或雞翼呢兩位主角，其他配料都係用黎送下麵。不過幾款材料之中，菜肉雲吞都有唔少支持者。一碗有四粒，雲吞皮夠薄，有菜、有肉，內餡粉粉腍腍，調味適中。而幼麵都幾彈牙煙韌，仲係咁易有多條菜，廿幾蚊碗真係抵食。

熟食市場有兩間都係靠豬扒、雞翼麵打響名堂嘅食肆，據講係出自同一世家，只不過係兄弟分開做。兩家都試過，感覺上都係呢間東記略勝一籌。只不過有時人太多，或者東記唔憂做放大假，都可以去對面嘅世記止下痕。

值得留意，此店只賣麵，不賣飲。勁熱氣要飲野的話，隔離舖仔會主動兜搭，一杯大約十零蚊，感覺上唔太抵，我會選擇落7仔買好過。同埋，要知道此店嘅潛規則，當食物到齊後，要即時俾錢，以防走數。

後記
2/3/2012 13:00

今日又黎幫襯，要試多次個雞翼做番個記錄。

 

雞翼拼菜肉雲吞幼麵 ($25)
東記另一個招牌就係酥炸雞翼。一份有四大隻，的確，隻隻都係非常大隻，絕對唔係雞仔。雞翼同豬扒一樣，外皮超脆，薄皮之下係啖啖肉。雞翼剛好熟透，肉質非常嫰滑，醃得入味，雞汁不停滴出。呢款雞翼無豬扒咁熱氣，食多幾隻都唔怕，真係試得過。