誠意甜品小店，糖圓不食湯圓

糖圓園@沙田
31/7/2011 20:30

越來越鍾意進軍香港團購市場無幾耐嘅集購城。以多次嘅經驗所得，集購城嘅優惠係比其他團購為高。今次又一抵買之選，$15買到$50現金券食甜品。曾經幫襯過糖圓園，覺得質素唔錯，老實講唔做團購都冇問題。今次做埋團購，當然義不容辭。

芝麻糊豆奶凍 ($21)
喺傳統嘅凍芝麻糊之上，加一個豆奶凍。呢一個黑白配，可以提供三種食法。
芝麻糊濃度適中，味道唔太甜，好香芝麻味。但今日可能失左手，芝麻有少許燶味，有好輕微嘅甘苦味，但足以證明唔係開粉。
豆奶凍好清甜，豆香味充足，似維他奶嘅豆奶味道，而且彈力非常高，有煙韌嘅口感。
兩者獨立食，味道已經好唔錯。將佢融為一體後，味道亦非常匹配。

蛋白雪蛤燉鮮奶 ($30)
相信係即叫即燉，等候需時。新鮮熱辣送上時，已聞到陣陣奶香味。
入口順滑之餘，奶味亦非常濃郁，鍾意清淡口味嘅朋友，可能會覺得味道略甜，但我一點都不介意，因為我嚐甜。
講起燉奶，相信澳門嘅出產係出晒名嘅。講真，糖圓園嘅燉奶未及澳門保健牛奶公司咁入口即溶。質感相對比較實在，結實，但仍然能夠保持軟滑嘅口感。面層加左一大湯匙嘅雪蛤，用薑汁糖水煮過，實屬滋潤佳品。

糖圓園似乎主打湯圓，但據聞一般般，所以一次都未試過。
沙田區難得一見嘅企理甜品舖， 味道價錢都係合理。無任何優惠下，大大話話都光顧過三幾次。今次仲有團購優惠，總數$16就可以食到以上兩款，當然更加心滿意足，值得繼續支持。

秒殺黑白雙煞

Yogurt Town@沙田
31/7/2011 19:00

筍仔網首次玩秒殺周，又俾我捕到用五個大洋買到三十蚊乳酪。第一次試沙田嘅Yogurt Town，店仔細細，只提供四款乳酪，配料水果約三十款。

網友話呢間最衰係冇得享受唧乳酪嘅樂趣，因為職員小姐會為你代勞。
但可能當時並非繁忙時間，所以我地有機會全自助。

原味、益力多味乳酪，配Oreo、黑朱古力粒

無意中又發覺到，黑白嘅搭搭最岩我地口味。

其中一款白色係原味乳酪，感覺上奶味偏重，酸味不足。而另一款益力多味，係比原味酸少少，但完全感覺唔到益力多嘅存在。食到一半仲已經麻木晒，兩個味道完全分唔開，分別唔大，味道上的確係一般。口感就幾幼滑，而且無氣泡，但都係遇到低質素乳酪嘅通病 -- 易溶。

配料方面，最衰嘅係無!麻!糬!!!! 只好加上濃味微苦嘅朱古力粒同OREO碎。

用左優惠券，補番$17，實價承惠$22。
$22，我食Yoppi好過! 更加大杯之餘，味道仲好十倍。
無緣再見，bye~

爆醬鬍子爸爸

Beard Papa Sweet

17/4/2011 12:00 @旺角
31/7/2011 18:00 @荃灣

曾經誤以為佢叫麵包爸爸，原來佢係鬍子爸爸。每次行過呢間店，都聞到陣陣吉士蛋香味，好吸引，但眼見一個芭芙由$10加到$14，唔再捨得俾錢。團購燃點番呢個希望。
蜂買同Paypal合作，同鬍子爸爸推出破天荒優惠，六蚊雞可以買到廿蚊Q-pon，可以買任何Beard Papa’s同Coco Frans甜品。最後，狂掃左八張。

先後兩次去食鬍子爸爸。計過數，以補水最少嘅方法購買，務求以最抵嘅價錢食到，貫徹慳家嘅美德。每個芭芙價錢$13至$18不等，如一次過使用兩張現金券，每次有$40 quota，補番幾蚊，已經可以食到3個。

朱古力脆皮芭芙 ($14)、意大利芝士芭芙 ($16)、特濃吉士芭芙 ($14)

濃朱古力曲奇芭芙 ($14)、意大利芝士芭芙 ($16)、特濃吉士芭芙 ($14)

特濃吉士芭芙 ($14)﹕吉士芭芙係最原汁原味嘅版本，點都要試下。外型討好，脹book book，表面落左些少糖粉。芭芙外層脆脆，中間好鬆軟，有微凍嘅奶黃色吉士醬。吉士忌廉好滑，甜度適中，有好香嘅奶味，仲有雲尼拿味道。見到粒粒黑點就知道用左雲尼拿籽，香味更加突出。係唔係特濃，真係要比較過普通版先知，但吉士味道已經夠香濃，所以第二次都願意encore。

意大利芝士芭芙 ($16)﹕ 面層有微苦嘅可可粉，芭芙內層係芝士味同咖啡味忌廉，咖啡味好重，亦食到有少許酒味。Tiramisu應有嘅咖啡、芝士味都表現晒出黎。

 
朱古力脆皮芭芙 ($14)﹕
喺普通吉士芭芙之上，加一層香濃朱古力脆皮。

濃朱古力曲奇芭芙($14)
外型同意大利芝士芭芙差不多。芭芙面層加左朱古力曲奇皮，朱古力濃得黎有少許微苦，一粒粒口感更加豐富。

正價十幾蚊一個計，件頭都算大，三個芭芙兩人分，做下午茶係好足夠。何況而家用優惠券，差不多買一送二嘅價錢，實在係好滿意。而吉士醬落得一啲都唔吝惜，咬一啖，吉士醬就喺咀角唧晒出黎。食起黎有些少狼狽係在所難免，但不失為一種另類享受，亦係食芭芙嘅一種樂趣。

賞心悅目，最上鏡暴肥 @君怡酒店

君怡酒店咖啡屋@尖沙咀
24/7/2011 18:30

$169可以食到酒店自助晚餐? 團購創造奇蹟，化二百蚊為神奇，真係要多謝蜂買。六千幾人跟左呢團，證明真係好吸引。

訂左六點半，一行五人家庭日聚餐。一入到去就見到色彩繽紛，擺放得好靚、好整齊嘅食物。
餐廳分開幾個counters，分類放左唔同食物。

刺身壽司吧﹕三文魚、八爪魚同七、八款壽司，仲有主打嘅長腳蟹
日式鐵板燒﹕由大廚即叫即煎，有西冷扒、羊肋排同其他肉類
中西日式熱盆類﹕有中式小菜、咖哩、吉列、蔬菜
冷盆及沙律吧﹕幾款冷凍海鮮，如凍蝦、翡翠螺等，仲有自助沙律配菜
甜品及水果吧﹕大約二十款精緻甜品，杯裝雪糕、朱古力火鍋、數款水果
飲品枱﹕提供奶茶、咖啡之餘，仲有紅酒、白酒、啤酒、果汁任飲

1. 三文魚刺身﹕ 幾新鮮肥美，好鮮甜。一碟只得兩、三塊唔夠喉，要拎多幾碟先夠
2. 翡翠螺﹕ 係自助餐嘅另一主打，平時不太好海鮮都試食一粒。螺肉味道爽甜新鮮，但好似有少許沙
3. 長腳蟹﹕ 家人話幾都鮮甜，有蟹味
4. 刁草醃三文魚伴蜜糖芥末汁﹕三文魚用香草醃過，加埋甜甜地嘅蜜糖芥末汁，比齋食刺身多一種味道。三文魚得小小兩塊，下面係一堆我唔會食嘅雜草
5. 蒜香帶子伴菠菜﹕帶子幾爽口，淋上似蠔油味嘅蒜蓉醬汁，好惹味，連下面嘅菠菜撈左汁都好味道
6. 凍火腿﹕有幾款唔同材料嘅火腿，味道其實冇乜特別。其實最緊要選擇夠多同夠凍
7. 冷麵﹕麵質偏腍，但冷麵汁幾鮮味

8. 燒火腿﹕係原隻烤焗嘅火腿，由大廚即時幫你切一塊塊。質地好軟腍，幾乎入口即溶，而且有咸咸嘅肉味，加埋照燒汁，更加香
10. 醬燒豬仔骨﹕ 用甜酸香濃嘅燒汁燒到入味，肉質軟腍
11. 吉列炸蝦﹕行過熟食counter見到一大盆幾十隻吉列蝦，有懷疑過究竟會唔會有咁多人食。試食兩隻之後，就知道一大盆都唔夠分。外皮超級鬆脆，香口得黎唔覺油膩，蝦肉新鮮爽口，再加埋酸酸甜甜嘅他他汁，更加清爽。同日本餐廳嘅有得揮，一人食五隻都唔夠

鐵板燒系列﹕牛扒、羊扒、牛油煎蝦係由大廚即叫即燒，但每人每次限量兩件。唔夠食的話，喺旁邊仲放左幾款，相信係大廚得閒時煎幾煎嘅，可以隨便任夾。味道其實冇乜特別，但話晒係鐵板燒，點都要試下
12. 豬扒﹕薄切豬扒同鹽醃過，幾軟腍入味
13. 冬菇
14. 魚柳﹕好似係龍利魚柳，幾嫰滑
15. 雞扒﹕冇乜特別，似住家煎雞扒，感覺唔到鐵板風味
16. 南瓜
有幾款未試過，訪問過家人，話香草牛油大蝦，醃嘅味道一般，唔夠味。而團購勁讚嘅澳洲頂級雪花西冷牛扒，家人話麻麻地，好似冇牛味，得個腍字

17. 日式海鮮蒸蛋﹕蛋比較實，唔似日式
18. 柱侯燘牛根腩﹕醬汁好香好濃，牛根同牛腩都入晒味，肉質非常軟腍，如果加埋碗米粉，就真係酒店級牛根腩米
19. 中式蒸魚﹕好嫰滑，充滿香蔥味
20. 鐵板燒法式羊肋扒﹕係呢個自助餐嘅必點名物，即叫即煎，請花十分鐘耐性慢慢等。羊扒剛好煎到七八成熟，肉質好嫰滑，而且非常juicy。羊味唔算好濃，但脂肪位嘅膻味恰到好處。加埋黑椒汁，更加好味。抵排隊!

21. 葡萄酒果凍﹕喺紫紅色嘅果凍上，有一層厚厚嘅白色忌廉泡泡，泡泡食落有一陣苦澀味。果凍雖然淡淡地，都有陣提子嘅苦澀味，估估下就覺得似紅酒，而白泡泡相信係白酒。用葡萄酒做甜品，我唔太接受，因為酒嘅苦澀味偏重，唔甜，唔似甜品
22. 士多啤梨奶凍﹕十個推介嘅甜品。酸咪咪嘅士多啤梨醬配果肉，下層係creamy嘅牛奶凍，正好中和左酸味，亦令奶凍多一陣鮮果味，一流
23. 木糠布甸﹕夠忌廉，好香奶味，但始終不及澳門的咁好
24. 青檸意大利蛋白撻﹕ 蛋白忌廉甜甜地幾好味，但青檸一個字酸
25. 芒果撻﹕芒果又幾甜，但撻皮比較普通，唔鬆化，實實地嘅牛油皮
26. 梳乎里蛋白球﹕ 可愛到不得了嘅蛋白球。蛋白香，非常之鬆泡泡，好似食風咁，加埋微甜嘅雲尼拿醬更加吸引
27. 法式焦糖燉蛋﹕焦糖部份幾脆，蛋味濃郁亦好滑溜，難怪好快俾人搶晒
28. 巧克力脆米﹕用朱古力漿包住朱古力脆米，硬硬地，朱古力都算幾濃
29. 紐約芝士蛋糕﹕唔似平時食到嘅咁實，比較鬆軟，芝士味夠，亦有好香蛋味
30. 谷古朱古力磚﹕即係特濃朱古力慕絲，朱古力味好濃，好軟滑，外層再加左啲谷古粉，帶少少微苦，酷愛濃烈口味嘅朱古力魔實會狂掃
31. 朱古力芝士蛋糕﹕芝士味足夠，但朱古力味比較薄弱

32. 柚子果凍﹕ 完全係冇味，自家製仲比佢好食
33. 士多啤梨果凍﹕同上
34. 香橙果凍﹕同上，唔明點解果凍類係超級之咁唔夠味，加水太多啦，溝淡晒
35. 香芒布甸﹕好明顯係開粉，有粒粒，唔滑的
36. 雀巢朱古力雪糕
37. 士多啤梨梳乎里蛋白球﹕同原味差不多，粉紅色，唔覺有士多啤梨味，但口感都一樣好
38. 綠茶慕絲﹕甜甜地有綠茶味嘅忌廉係唔錯嘅，下面有啲勁酸似梅的物體就好唔夾
39. 香橙布甸﹕見到藍色忌廉其實幾驚，但原來味道同白色冇分別。奶凍有少少橙味，但總覺得用橙做奶凍好似唔太夾

40. 藍莓芝士餅﹕後期新推出嘅甜品，芝士部份同紐約果款差不多，芝士味都夠濃，而藍梅醬好明顯係現成野
41. 焗麵包布甸﹕可能因為唔係太熱，唔夠香奶味同蛋味，麵包比較實

其實仲見到有其他得意食物，竟然有豬腳薑出現喺自助餐內?!

基本上，呢次嘅自助餐提供嘅食物都係大路野，冇任何非常名貴嘅材料。除左有部份食物較突出之外，其他都係一般貨仔，質素唔高，而甜品有一半都係地雷。

抵讚之處係飲品選擇多，即使酒類都唔需要加錢。而家有好多自助餐，連基本嘅果汁都要另計。提供鮮果汁已經好俾面，仲要有餐酒任飲，雖然味道唔係好好，但總算合格有餘。
另外，有啲主打食物，好似長蟹腳同鐵板燒，會限量派發。有時某啲食極都唔飽嘅人士，係好唔介意咁怒攞，完全唔留番俾其他人。排隊限量派發，一人兩件，真係想食嘅人人有份，平公啲好。
最鍾意樣樣都係細細件，特別係甜品，一杯杯非常精緻，又衛生，又上鏡，可以樣樣都試少少。最怕見到啲一大盆嘅蛋糕，到水尾而經俾人攪到不似糕形，個匙羹又烏糟，叫人點食?
而自助晚餐時間非常充裕，六點半入場足足可以食到十點，有三個半鐘時間同佢死過。
服務都尚算唔錯，特別鳴謝主廚先生好熱情咁自願充當攝影師。

以$169嘅價錢，加埋一，係剛好$199一位，以二百蚊有找嘅價錢黎計，係絕對值得。
好多酒店食個暴肥懶豬都閒閒地百幾蚊走唔甩。就算普普通通一間寫紙仔、又限時限刻嘅任食放題餐廳仔都講緊要成二百蚊。而家以自助午餐價錢，食到酒店自助晚餐，仲要三個幾鐘任飲任食喎，仲唔夠?

四火夏日不宜食乳酪

Holly Cow@尖沙咀
24/7/2011 13:45

夏日炎炎，四把火，周時要食啲涼冰冰降下溫。今個夏天，乳酪變成消暑良品。其實我都搞唔清，係我愛上團購，而團購多做乳酪優惠，所以多左機會食? 定係，我愛上食乳酪，所以多買左團購? 今次呢個團購係唔洗錢，免費單撈半價優惠券，用$14去未試過嘅Holly Cow食一個標準裝。

芒果、原味混合乳酪 & 朱古力碎片 ($28)

標準裝包乳酪及一個配料，都知道標準裝一個細細杯，所以貪心啲試晒兩種味道，選擇左芒果、原味兩溝。

呢度嘅特別之處係，乳酪嘅中層位置，會先放配料，再補一層乳酪，最面層又放配料。避免左得最頂有餸，最底齋食嘅困局。

乳酪食起黎比較軟滑，冇粒粒，唔似其他公司嘅咁實在、咁厚身，口感比較似軟雪糕。原味同芒果雖然已經兩溝，但味道好薄弱。乳酪應有嘅酸味不足，比較淡口味。芒果味像真度幾高，似甜芒果嘅味道，但都係甜而不酸。整體黎講，味道係偏奶味，亦似芒果牛奶雪糕嘅味道，可能佢係一隻牛掛。

最後我亦都有少少後悔揀左朱古力做配料，唔酸嘅乳酪加甜嘅朱古力，係會有啲膩。朱古力片有少許甘苦味，但都係偏甜，真係好一個甜品。如果我知道啲乳酪唔酸，相信我會選擇加水果，希望制衡番個甜味。

有時太陽底下食乳酪，係想食到酸咪咪醒胃嘅刺激感，Holly Cow絕對做唔到。多甜少酸嘅味道，同食普通軟雪糕差不多，無謂俾多一倍價錢食乳酪。而更加做唔到嘅係，喺冷氣底下，都覺得啲乳酪唔夠凍，而且好快溶，好易變稀。難以想像喺三十幾度高溫之下，一分鐘之後會變成點樣。Holly Cow似乎唔係一杯適合夏天食嘅乳酪。

焗住桑拿食懶高級格仔餅

奧斯窩夫專門店@旺角
18/7/2011 14:00

格仔餅食得多，拉手團購今次召集甜魔，做高級格仔餅窩夫優惠。小店新開張唔係太耐，網上評語有好有唔好。$16一客窩夫加雪糕，見唔係太貴，可以一試。

奧斯窩夫&朱古力雪糕 ($38)

即係雙重朱古力，有朱古力曲奇碎同比利時朱古力醬。啡啡地色嘅窩夫，粉漿應該有加入了左朱古力，有些少朱古力甜味。面層嘅朱古力醬都幾濃，係帶點甘苦味嘅特濃朱古力，而曲奇相信係類似Oreo嘅朱古力餅碎，總之就係朱古力魔最心愛嘅配搭。

平時食嘅格仔餅係軟軟嘅，西方嘅高級格仔餅應該係外脆內軟。新鮮熱辣嘅奧斯窩夫勉強都叫做到外皮脆呢個效果，但當放涼後，好容易將脆嘅感覺變成硬。而內軟呢個感覺並唔深刻，話鬆唔鬆，話軟唔軟，總之就唔係脆啦。
整體黎講，係一啲驚喜都冇。就係一舊脆脆地、硬硬地嘅蛋糕點左啲朱古力醬。味道唔算濃烈，口感唔係十分好，即使加左朱古力雪糕，都加分唔多。

朱古力雪糕夠凍，係有冰粒果種凍法，而味道可參考牛記。冰火嘅感覺係有嘅，但一啲都唔&joy-able，好想快啲食完快啲走。因為...好熱。

熱嘅唔係話件窩夫，而係堂食嘅地方。就喺果個唔知咩大廈入面，舖頭玻璃窗外有排立食位置。好熱、好熱，熱到焗桑拿咁。好想拿拿聲，一人一啖，快啲食晒閃人。如果真係有興趣試的話，強烈建議選擇外帶，用紙盒裝住，走去附近商場，涼住冷氣邊行邊食。

完成晒整份窩夫，都冇任何滿足之感。十六蚊，當跌左。
一個如此質素嘅格仔餅要花十六蚊，我都覺得唔值。咁就更加懷疑係唔係真係有人會用$32正價去買。$32喎...諗清楚。

Oh! My Black List-ed Mamma

Mamma Mia Gelato@旺角
19/6/2011 14:00
18/7/2011 13:00

何謂Gelato正確發音都唔係好sure，只知道佢係意大利甜品，比普通雪糕更低脂低糖，更健康咁話。你買我買$30現金券只需$10，就買兩張試下呢款咁新奇嘅雪糕。

19/6/2011 14:00

Blueberry Cheese & Brownies ($35，團購價$15)

藍莓芝士乳酪 Blueberry Cheese
正正式式第一次食gelato，雪糕口感黏滑，綿密，相信正係gelato與普通雪糕不同嘅質感。普通雪糕比較冰感重同質地鬆散，而gelato係好軟滑，好creamy，帶啲黏性嘅口感。藍莓芝士乳酪係聽到職員推介俾旁邊師奶嘅款式， 一啖食落味道都唔錯。有淡淡嘅芝士奶味，酸酸甜甜藍梅味，味道就似食緊涼冰冰、軟滑但較淡口嘅藍梅芝士蛋糕。

朱古力班尼斯 Brownies
以我認識Brownies係比較硬身嘅朱古力蛋糕，點樣變成gelato呢? 口感一都係軟綿幼滑，以濃郁嘅朱古力做基礎，夾雜左朱古力脆餅同朱古力碎仲有少許果仁，一個非常濃烈、令朱古力魔一啖接一啖嘅味道。味道的確係唔錯，但連嗜甜嘅人士都覺得有啲過甜，好似甜得有點過份。

18/7/2011 13:00

Vanilla Chocolate & Tiramisu ($35，團購價$15)
一拎到上手，已經睇到啲雪糕係溶溶地，直情係流汁果個情況，似乎冷凍並唔足夠，所以一路食都溶得好快。

雲尼拿朱古力 Vanilla Chocolate
就係雲尼拿加朱古力片，雲尼拿係超奶超甜，朱古力片有朱古力濃味。係一款普通不過嘅味道，而都係偏甜。

意式蛋糕 Tiramisu
呢款味道不錯呀，有香香嘅咖啡味，而酒味都特別濃郁，食到一塊塊硬硬嘅係手指餅蛋糕，真係似足tiramisu嘅口感，亦係tiramisu嘅味道，但整體黎講都係超甜。

無何否認，兩次食嘅都係軟滑嘅雪糕，入口即溶，口感上的確唔錯。但以下有幾點係令我地好不爽嘅﹕

1. 除左藍莓芝士係正常味道外，其他三款口味都係超乎正常嘅甜度。自問甜味嘅接受度都幾強，都頂唔順果種齋甜嘅感覺，真係幾膩下喎。

2. 團購網口口聲聲介紹話以$30現金係足夠食到兩個雪糕球，換句話說，團購優惠花費十大洋就可以食到兩球，平均每球五蚊。實際上，試過兩間唔同嘅店舖，都冇任何一款味道係可以$30食到兩球。睇番早前嘅網友食評，的確有部份「紅點」特別版係會貴少少，其餘嘅味道係唔需要加錢。但我睇到嘅並唔係咁，正價兩球已經開價$35，好難唔令我聯想到，佢因為要招呼團購客而特登加價。雖然十幾蚊食個雪糕都係算抵嘅，係合理價錢。但原本期望$10食到兩球，而家要$15，雖則五蚊雞唔算係啲咩大錢，但計番條數，足足係原價值嘅50%。唔係話個五大蚊，而係呢個整整五十個巴仙會令人超級咁不爽。

3. 價目唔老實已經不爽，兩個雪糕球嘅晒史更令人下唔到啖氣。每個球直徑只有大約五厘米，分分鐘可能用三、四啖份量已經完全K.O.。Gelato真係咁矜貴﹖ 而佢都好識得轉移視線，提供一個比正常湯匙仲要細一半有多嘅超細膠匙羹，等你以為可以食多幾啖，但呢個把戲呃唔到我。

4. 網上好多人都有同樣嘅意見，話呢間店嘅姐姐仔態度麻麻。親身經歷，好明確，十分顯然，非常之咁肯定，我係贊成。好多人話每當拎張Coupon出黎俾錢，姐姐仔就會變臉、面黑兼發悔氣。雖然我嘅感受未到咁極端，但的而且確，Coupon人係會被冷落，姐姐們係會擺出一個唔多想serve你嘅態度，亦好想盡快打發你走。老實說，雪糕小店唔需要五星級酒店法國餐廳級數嘅服務，就算職員小姐連最基本唧出一副親切、歡迎你光臨嘅面容都懶的話，姐姐可以唔笑，唔同啲客講多謝，唔多講一句說話都好，唔代表可以用面黑黎趕客。公司做團購都係想做宣傳，即使係冇得賺，賺番個名氣同人氣都係一件好事。倒米、趕客嘅態度只會令客人唔好受，破壞公司嘅形象，口碑生意受損，冇得賺，仲要輸埋個招牌，為乜﹖

對我黎講，只論服務態度呢一個環節，佢今次做團購，係徹徹底底咁失敗。
黑名單-ed，File Closed。

美國香腸味道No.1變型熱狗

Just Hot Dog@大角咀
18/7/2011 11:45

平時少食熱狗餐，團購一做優惠，就不知所措，失晒心瘋，連使用細則都未睇清楚，就買左兩張半價現金券，一共洗左$40，可作$80使用。點知....只適用於星期一至五，及只可散叫，不可買套餐。算吧啦，反正有假期，特登星期一先行一轉。

今次目的地係新開嘅奧海城三期地下，有間半開放式嘅餐廳仔，風格近似酒吧，門外仲有大太陽傘同枱櫈，唔落雨的話，不妨坐外面。

把握$80 quota，叫左一杯 Iced Mocha、一份洋蔥圈同兩隻熱狗。
總數$86，計埋團購券優惠，實價$46。

Iced Mocha ($16)
團購網寫得吸引，話「十分濃稠，口感像沙冰，朱古力味濃，定必適合嗜甜人士。」
自認係佢所謂嘅嗜甜人士兼朱古力魔，豪不猶疑就點左朱古力咖啡做飲品。飲一啖，即刻想大叫「OMG!」，係不知所謂嘅一杯飲品。的而且確，咖啡同冰一齊打，口感似沙冰，飲到一粒粒幼細嘅冰粒，又唔知點解成杯都係泡，唔通佢整錯左Cappuccino? 應該都唔會，因為味道超淡，連些少朱古力味都唔覺，莫講話濃郁，咖啡味都欠奉，不理也罷。

原味田園洋蔥圈 ($18)
未食已經聞到香香嘅洋蔥味。外層脆卜卜，薄薄炸粉包住洋蔥碎，好香甜。有別於平時食到嘅一整圈洋蔥條，呢度用嘅係切碎左嘅洋蔥蓉，入口即溶之餘，洋蔥味更加濃郁。但一細客得四個圈都幾貴下。

惹味香辣熱狗 ($26) 墨西哥香辣腸、秘製辣肉醬、新鮮洋蔥粒、天然芥末
撞岩送貨時間，得知熱狗包係嘉頓牌。麵包中間塗左牛油，經過烘焙後，牛油溶入包中，而外層有微微脆口。主角墨西哥香辣腸真係好搶鏡，一口咬落去，脆皮「索」一聲裂開，香辣嘅肉汁湧出黎，再食到啖啖肉。配上辛口嘅辣肉醬同香甜洋葱粒，仲有甜甜酸酸嘅芥末醬，一個好惹味嘅熱狗。

香甜燒烤熱狗 ($26) 燒烤腸、烤洋蔥、香脆煙肉碎、風味泡菜汁、天然芥末
主角係有焦香風味嘅燒烤腸，一樣脆皮、爽口兼多汁。洋蔥烤得正好半生熟，甜甜辣辣。煙肉碎嘅存在好似隱左形，唔多覺。而醬汁亦係少少辣、少少酸、少少甜，一個好開胃嘅配搭。

JHD主打美國原汁原味、新鮮出爐嘅熱狗，採用美國貨材料。

香腸超高水準係無庸置疑，配料同醬汁都係落足心機。但一樣咁重要嘅熱狗包竟然係本地貨嘉頓麵包，雖有好香嘅麵粉甜味，但質感過份鬆軟，好似襯唔起條香腸。

跟據平時乜都話好味，今次都忍唔住出聲嘅姚生所講，一流嘅熱狗包中間嘅開口位都應該需要烘到脆身，即使加左香腸同配料落去，食嘅時候都唔會因為用手揸緊個包而變型，亦都可以安全咁裝住啲材料唔倒瀉，呢個包係完全唔合格咁話。

整體黎講，味道同賣相都係唔錯嘅，但熱狗包確實係差左啲，睇黎JHD要喺熱狗包上放多啲心機啦，始終單價二十幾蚊一個都唔平。

關係差，無感情，互不交流的雪糕芭菲

北海道牧場牛乳專門店@沙田
17/7/2011 19:00

早前團購優惠試過北海道牧場甜品放題，今次又有團購做雪糕芭菲優惠，付出$16就可試下原價$35嘅芭菲。

香蕉朱古力味雪糕芭菲

睇住職員姐姐細心一層一層砌出一杯芭菲，每層味道都唔同。
最下層係類似燉奶、牛奶布甸嘅物體，軟滑質感配甜甜嘅牛奶味，室溫偏涼嘅溫度。
牛奶布甸之上有原味冇糖粒嘅粟米片同埋細細粒、白雪雪棉花糖，脆卜卜再加上軟綿綿。
一層厚厚嘅鮮牛奶忌廉蓋住粟米片同棉花糖，有好香濃嘅奶味，好creamy，忌廉上面再加幾片香蕉。
終於黎到戲肉， 冰凍凍，滑溜溜嘅牛奶軟雪糕登場，有牛奶嘅甜味，但冇牛奶嘅濃味。
最後淋一層微暖香濃嘅朱古力醬，插上威化薄脆，一杯高度十足嘅雪糕芭菲完成。

應讚嘅係，每層有獨特嘅材料，食芭菲最希望食到層層唔同嘅口感同味道，佢成功呀。但好奇怪地，食落係完全唔夾。

整杯嘅上半部份，軟雪糕配朱古力加威化薄脆都係冇問題嘅，一個正常不過嘅組合，就算加埋香蕉都係合理，就類似香蕉船嘅配搭。

食完涼冰冰嘅軟雪糕，失驚無神出現一大pat忌廉，雪糕嘅全股涼意就被偏暖嘅忌廉吹走晒。忌廉同棉花糖口感同味道上已經唔太夾，仲要遇到出奇地香脆嘅粟米片，要知道食過雪糕涼化左小咀後，口腔係唔適宜食一啲太硬嘅食物，係好容易出現界親，un親嘅情況。而最底層嘅布甸好似係為左硬銷產品而格硬加入去。

如果分開一層一層獨立食的話，每款材料嘅味道都係唔錯嘅。但甜品都講求一體性，一個整體嘅味覺享受。一杯芭菲每層之間係冇交流，各自為政，完全溝通唔到，唔夾就係唔夾。

Like! 讚好! 再+1! 大杯乳酪再次迫爆

Yoppi Frozen Yogurt@沙田
17/7/2011 15:30

早前買落嘅乳酪券，趁今日出沙田，用埋最後一張$40現金券涼一涼。

大杯裝加四個配料 ($40)

原味、椰香味乳酪，配椰果、朱古力粒、Oreo、原味麻糬 

由相信係老闆先生親自幫我地唧，唔覺意配出一大杯黑白配乳酪。純白色嘅原味乳酪同椰香乳酪，配透明白白嘅椰果、白雪雪嘅原味麻糬，以及黑黑嘅朱古力粒同黑白相間嘅Oreo曲奇餅。

原味乳酪仍然係酸咪咪，軟硬度適中，凍冰冰，非常開胃。但椰香味就比較弱雞左啲，味道只有淡淡嘅椰子味，甜而不香。食過酸嘅原味乳酪後，椰香味完全給比下去，味道被掩蓋晒。

配料方面，椰果幾爽甜，朱古力粒味道夠濃，但略嫌硬左少許。呢間舖提供嘅唔係Oreo碎，而係整整四個半塊嘅Oreo曲奇餅，出手大方，但食起黎比較麻煩，如果比同等份量嘅餅碎，我會更開心。最後，麻糬都係偏少少硬，但味道都唔錯。

食呢間乳酪最開心嘅係，大杯乳酪比其他舖頭嘅仲要大，係一個男人一手不能掌握嘅晒史。睇住乳酪已經唧得滿滿，再硬要塞配料上去，編按﹕「硬要」係有「用力」、「格硬」嘅意思。喺空間狹窄嘅乳酪杯上，加完一匙配料都未夠，仲要加多兩匙，要好用力咁將配料壓入乳酪杯內。職員唔會因為個杯冇位，或者你用團購券而偷工減料。今日亦都驗證左，就算有四、五人喺你後面排緊隊，職員都唔會因為想盡快招呼多幾個客，而貪快唧少啲乳酪或俾少兩匙配料。任何時候，任何價錢都係超迫爆、勁澎湃嘅大大杯乳酪。

均真、老實做生意嘅精神好值得欣賞。一杯如此豐滿嘅乳酪，團購價$15係超級抵食，分分鐘中午當懶豬食，係食得飽兩個人。就算正價$40一杯，都係值得磅水嘅。就憑Yoppi FroYo嘅味道、份量、營商態度，絕對值得喺呢個blog上留多一篇文章。俾個讚好你!

前篇參考
12/6/2011
斯釘特澎湃杯裝乳酪對抗惡勢力

邊睇魚，邊食魚，寫意豪爽日本料理

築地銀壽司@銅鑼灣
10/7/2011 20:00

日本大地震後都冇懼幅射，勇闖幅射國，食日本料理當然係冇有怕。
集購城又一勁抵優惠，$48當$150現金券狂食築地銀壽司。據聞築地銀壽司喺日本東京有多間分店，主打創意壽司，又極具人氣，而家足足有三折優惠，唔買對唔住自己呀。

首輪先叫左幾款好評熱點嘅小食同壽司。

1. 香脆雞軟骨 ($34) ﹕新鮮即炸，勁脆、超香口，雞軟骨都好爽脆，好味。但一小碟價錢偏貴，可能每粒價值兩蚊呀。

2. 三文魚三味盛 ($24)

2a. 三文魚壽司﹕ 三文魚幾肥美鮮甜。值得留意，壽司飯味道係唔錯，甜味適中，亦都好軟熟。但可能太過軟熟，用筷子夾起時有鬆散跌飯嘅情況出現，睇黎師傅要握多手啦。

2b. 洋蔥蛋黃醬三文魚壽司﹕ 喺新鮮嘅三文魚上加蛋黃醬及洋蔥絲，估唔到組合離奇地夾。生洋蔥少少辣度同酸甜蛋黃醬令三文魚味道更濃郁。

2c. 火炙蛋黃醬三文魚壽司﹕ 將三文魚微微燒香，火炙過嘅刺身暖暖地，帶多份焦香味，令魚肉質更軟熟，其實我幾鍾意。

3. 火炙岩鹽檸檬三文魚壽司 ($9)﹕ 放棄蛋黃醬，改為用岩鹽同檸檬，呢件壽司係要連檸檬食。食落口檸檬嘅酸味爆發出黎，再加上岩鹽提味，令魚更鮮甜，再經火炙勝在多一分焦香。相信檸檬同岩鹽嘅組合，同新鮮刺身配搭起黎會更加好味。

4. 日本產特製極品鰻魚 ($18)﹕ 鰻魚發燒友必點鰻魚壽司，個名都霸氣過人，而且外型非常討好。鰻魚燒得深啡色，邊位少少焦。掃上閃令令嘅鰻魚燒汁，放喺個木製壽司板上，非常之吸引。但食落口就出事，鰻魚燒得太乾，唔夠軟熟，到達偏硬、鞋口嘅境地，雖則味道都係算OK，但都唔值得再encore。

5. 火炙蛋黃醬魷魚壽司 ($9)﹕ 平時食開純白色，煙煙韌韌嘅魷魚，今日任人宰割，先浸汁再火炙。多份燒烤味外，配上蛋黃醬同燒汁，味道更具層次，而且肉質更加煙韌爽口。
6.火炙蛋黃醬蟹肉捧壽司 ($7)﹕ 任人宰割嘅主角輪到蟹柳，相信蟹柳唔係高水準材料，較鬆軟，且鮮味欠奉，只好借蛋黃醬味道搭夠。

7. 蔥花極品吞拿魚腩軍艦 ($17)﹕ 師傅將吞拿魚腩切到蓉晒，再加埋蔥花放入軍艦上。吞拿魚一向比三文魚味道更清淡，係唔係極品我唔知，切到蓉埋一pat嘅魚肉絕對食唔出鮮味，係極品的話好似有點浪費。

8. 雜錦天婦羅 ($49)﹕ 大蝦三隻、蓮耦、南瓜、蕃薯等炸成天婦羅。極品嘅天婦羅應該係乾脆俐落、唔油膩。恭喜呢度做到咁嘅效果，天婦羅偏硬身，浸一浸淡甜嘅醬汁可以稍為溶化面層嘅脆漿，更易入口。隻隻蝦都好新鮮彈牙、蕃薯南瓜都充滿甜味，呢客天婦羅認真唔錯。

到左單尾，係時候實際啲填飽個肚，選擇兩款麵食，填滿肚皮。
9. 三文魚烏冬鍋 ($59)﹕ 有幾舊三文魚，加幾條菜，幾粒菇同烏冬，放落啲唔知咩湯度煮。成鍋都唔知咩黎，好在有火爐熱住，夠熱辣。而菜浸左湯之後好腍好入味。烏冬尚算煙韌滑，但味道不足。

10. 天婦羅烏冬 ($69)﹕ 食過天婦羅好味，都唔介意encore多客，今次配埋冷烏冬。天婦羅一樣係超水準送到，雖則烏冬唔算十分之煙韌，但冷食的話更加清爽。惟一敗筆係冷麵汁偏淡口，即使落左wasabi都提唔起個味。

11. 炸蝦碎手卷 ($9)﹕ 壓軸登場，驚喜無限。九蚊一客，炸天婦羅蝦咁好? 冇! 天婦羅蝦嘅切碎版?都冇! 咁炸蝦毛有啦掛? 當然都係冇! 原來係用炸天婦羅蝦所用到嘅粉漿，炸成一粒粒，再用紫菜包成嘅手卷。好一個炸蝦碎，佢冇呃我，個名改得岩，係我地會錯意，終極地雷也，狠狠的中招!

以上嘅價錢全部係一件計，以壽司單件計，平均要十幾蚊一件，其實唔平呀。去超市，或者而家超hit嘅爭鮮外帶壽司，都只不過係$3一件。但四、五倍嘅價錢，有五蚊嘅新鮮，有五蚊嘅好味，同三蚊嘅創意，真係要值十幾蚊的。

特別欣賞呢間店舖嘅火炙系列，係擺脫左一般食壽司冷冰冰嘅框架，一種暖暖、焦香嘅新口味。可能你話熱食，食唔出材料本身嘅鮮味，但只要細心揀素材，選擇適合熱食嘅類型，係不失為一個新派口味。鍾意鮮味嘅，不妨齋食刺身吧啦，冇需食壽司。

埋單總數要$375。呢個價錢除左換黎一個地雷外，仲有幾款好味嘅壽司同一級捧嘅天婦羅。坐喺一個靜局梳化卡位，睇住出面魚缸啲魚仔游來游去，另加靚仔哥哥親切服侍，寫意。何況而家團購幫你慳左一筆，二人前埋單只需$171，足足平左兩百蚊，平均八十幾蚊一位，閒時晚餐豪一次都唔過份吧。

超高級漢堡包，解開儀態枷鎖

Absolute Burger@銅鑼灣
10/7/2011 13:30

本來對呢間餐廳興趣不大，但眼見佢已經喺不下五個團購網做泡毛， 而且價錢唔貴，就一於去試下。一間位於地庫嘅酒吧，地理位置不佳，要靠團購提高知名度，我明白。

炸菇條
同時兌換兩張團購券，著略送番一客幾條炸菇條。阿炸菇條先生，請問你邊一忽係炸過呢?
唔脆，唔熱氣，冇錯佢係菇條，但絕到食唔出係炸過。Anyway，相信係雞脾菇嘅炸菇條先生係腍嘅，但菇味好香濃、好爽口，而且水份充足，沾上燒汁更加惹味，係幾新奇嘅餐前小食。

 

龍利柳漢堡

從輕微焗燶左嘅頭殼頂得知，麵包係烘過嘅。暖暖嘅麵包面脆卜卜，夾住兩塊龍利柳同配菜，堆疊得高高，飽足度滿分。有別於平常，厚身龍利柳不經任何炸死嘅過程，只係稍微調味再煎香，些少胡椒同鹽已經充份表現出魚肉嘅鮮味，魚肉亦非常嫰滑柔軟。半熟洋蔥、新鮮生菜同蕃茄都係好好嘅配角，再加埋微酸嘅沙律醬，令到漢堡錦上添花，好一個清新嘅配搭。

跟餐嘅扭紋薯條就好一般，薯味略嫌不足，亦不夠脆口，叫做好過冇咁囉。

雞扒漢堡

基本上內容同魚堡一樣。煎雞扒頗嫩滑，肉汁亦豐富，但調味似乎輕手左，味道不足。

團購優惠$28一個餐，食乜記物記價錢都差唔得遠。有包有薯條，送罐裝汽水，蕃茄汁任唧，加送即棄手套一對，以及座枱餐紙巾數張，以免貴客食到烏痴媽叉。Absolute Burger無論喺材料、服務、味道同高度都贏物記幾條街。一個套餐有咁嘅素質，$28算係成本價啦，舖頭唔賺得幾多。

材料不算高級，但高度實在係高級，一個做到兩個嘅高度。以漢堡嘅高度，妮啲斯，甚至係斯文少少嘅鄭淘文都好難一口咬晒成個包，醬汁橫飛、上跌下漏、左fing右甩係在所難免，就試下一餐不顧儀態吧。

在21314餐廳食中式小菜

月瀧天@尖沙咀

4/7/2011 12:30

充份表現出霸氣嘅名字，原來係一間專食中、日、越、泰式嘅放題餐廳。

入場時仍然聽到員工叫21314 (いらっしゃいませ)，但團購優惠只可以點中、越、泰式料理，刺身、壽司通通唔洗諗。

做過功課，知道呢間舖甜品食完就冇，所以一去到就搶先一步食甜品打頭陣。
1. 藍梅芝士餅﹕ 係硬身嘅芝士餅，芝士味夠濃，似New York Cheese Cake，整體味道唔錯，但面層嘅藍梅醬似乎小家左啲
2. 意大利芝士蛋糕﹕ 底層係朱古力蛋糕，蛋糕偏實，咖啡味、芝士味都唔夠
3. 木糠布甸﹕ 偏軟腍，成杯都好似食緊忌廉，奶油味係夠嘅，所以食到尾就覺得有啲膩，而且木糠餅碎唔夠係敗筆

4. 凍燉蛋﹕ 非常之軟滑，軟滑到似忌廉。唔止有蛋味，仲係更濃郁蛋黃嘅味道
5.芒果慕絲蛋糕﹕ 只有甜酸味，冇芒果味嘅慕絲
6. 朱古力蛋糕﹕ 朱古力味算濃，但又硬又實
7. 藍梅慕絲蛋糕﹕ 只有甜味，冇藍梅味嘅慕絲
8. 朱古力慕絲蛋糕﹕ 只有甜味，冇朱古力味嘅慕絲

9. 香酥荔茸盒﹕ 所謂一客原來得一粒，有芋頭味，外層有酸甜汁提味，味道一般

 9. 沙拉京都骨﹕ 排骨好腍，甜酸醬幾惹味，配沙律醬亦好味
10. 泰式蝦膏炒豬頸肉﹕ 豬頸肉好爽口，配蝦醬原來有微妙效果，好惹味

11. 北越蒸粉卷﹕ 粉包配扎肉，再加甜酸汁。粉皮薄得黎幾滑，但內容唔夠豐富，得少許肉碎同大量雲耳
12. 蔗蝦：蝦好爽口，但蝦味不足
 
13. 越式香茅豬扖：香茅味突出，但豬扒得個咸字，好在肉質鬆軟
14. 越南春卷﹕ 皮腍唔脆，但勝在唔油膩
15. 越式香茅雞翼﹕ 炸得好酥脆，香茅味就唔覺，但肉汁充足

 

16. 青胡椒炒豬頸肉﹕ 豬頸肉都係好爽口，青胡椒味好出，有少許辣

17. 賽磅蟹﹕ 漿糊咁嘅樣，蛋白加蟹柳加磨菇，係咁多

18. 椒鹽鮮魷﹕ 真係有條條鮮魷，炸得酥脆，有椒鹽味

19. 翡翠花枝片﹕ 花枝片幾新鮮，幾有鑊氣，幾似喺飲宴常食到嘅味道
20. 牛油炒雜菜﹕ 雜菇炒菜，牛油味夠，所以有啲太肥膩
21. 京葱爆牛肉﹕ 牛肉醃到腍晒，炒得幾有鑊氣

22. 芝麻味雪糕﹕ 預左呢啲平平地嘅放題，只會俾牛奶公司。芝麻味都幾濃，好似太甜

中、越、泰三式料理黎講，呢度嘅中式小炒係唔錯嘅，夠鑊氣。越式料理未見特別，而泰式唔太岩我地口味。而甜品除左芝士餅之外，其他亦唔覺特別。呢度最好就係樣樣即叫即煮，新鮮熱辣。
服務殷勤，態度良好，食完即刻有人幫你收碟、換碟。$48買開飯團購券外，一人俾多$10加一，計埋晒總數$58一位。總括黎講，放題菜色選擇唔太多，味道又唔係十分好，竟然中式菜係最突出。以六十蚊埋單，當食餐中菜叫小炒，可能感覺會良好啲。