兩個人怒食$101甜品

正月十五甜品店@紅磡
25/9/2011 15:00

食完車仔麵，較岩三點鐘係時候食個甜品做下午茶。早前又喺團購拾到平野，$15買$50現金券，一口氣掃左兩張，兩個人共有一百蚊Quota試試紅磡新開張嘅正月十五甜品店。
足足有一百蚊Quota，唔客氣地叫左兩個雪花冰，加一個奶凍同雪糕。

豆腐雪花配芒果、蜜紅豆、小丸子、奇異果 ($40)
第一次食豆腐味雪花冰，感覺新奇。雪花冰用玻璃高杯盛裝，有別於其他甜品舖用平碟上。而杯都係雪過，保持冰凍，所以減慢左冰嘅溶化時間，感覺更抵食，亦欣賞佢花過心思。雪花冰質地良好，一絲絲打幾得靚，而且比較實，唔易溶，近似雪糕同冰嘅混合體。豆腐味亦都好濃，好有豆味，味道唔太甜，有啲似少甜維他奶，又似甜甜地、非常清爽嘅豆腐花味道，真係好豆腐。
指定配料跟蜜紅豆同小丸子，呢個配搭真係頂瓜瓜。紅豆大大粒非常飽滿，而且煮得腍，外層仲粉粉地，甜度適中，再加埋白雪雪、彈牙煙韌嘅小丸子，一流。呢個配搭已經好足夠，其實水果都係其次。芒果算甜，而加錢配嘅奇異果，估唔到竟然係價錢較貴嘅金奇異果一整個! 但衰在比較酸，未夠熟。

意大利奶凍 ($18)
白白滑滑嘅奶凍，採用時興嘅玻璃樽仔裝住，面層加一粒小藍梅，非常可愛。 奶凍比一般較實淨，但仍不失幼滑，送入口腔轉眼即溶。味道雖不及北海道3.6，但亦非常香濃，係非常清爽、唔太甜嘅鮮奶原味。

朱古力雪花配香蕉、椰果、棉花糖、朱古力漿 ($35)
係最愛嘅特濃朱古力冰底，係甘苦味較為突出、少甜走奶嘅味道。聽聞係用名牌比利時朱古力製作，怪不得。配料唔少得香蕉同棉花糖，但椰果似乎唔太相襯。

雪糕 ($8)
最後仲有七蚊Quota，叫多個雪糕球。係某記雲尼拿雪糕，而老闆娘仲送多幾粒脆脆地嘅豆豆同粒粒伴食。

埋單總數$101，補番一蚊雞，實價$31，食到四款甜品，放滿一張枱，超級滿足。雪花冰雖然用杯上，但份量不比一般少，一人一個真係食到飽飽。幾款甜品味道都唔錯，正價亦唔貴，新開張小店裝修企理，服務態度良好，應該都有得做，努力!

一百分心機賣飛佛麵

蒙麵@紅磡
25/9/2011 13:30

多得頭條本搵食指南，知道紅磡咁多好野食，今次去食下平、靚、正嘅車仔麵。

豉汁鳳爪、泰式魚餅、五香牛根出前一丁配沙嗲汁 ($26)

豉汁鳳爪即係平時酒樓食到嘅鳳爪，都唔錯嘅，幾夠入味。而泰式魚餅都真係泰式風味，有好香嘅咖哩膏、香茅味。而牛根都燘得好腍、好入味，入口即溶。加四蚊配出前一丁，仲免費加埋個沙嗲汁，一個非常Match嘅配搭。

蕃茄薯仔湯鹵水大腸、柱侯牛腩米線 ($24)

好少車仔麵檔有豬大腸提供，可能因為處理需時、又麻煩，但呢間蒙麵嘅豬大腸係出晒名嘅。
薄薄一圈豬大腸無太多肥膏，非常香鹵水味而且爽口，認真唔錯。而牛腩就不過不失，應有嘅入味，應有嘅口感。最特別之處，莫過於獨家嘅湯底，只需加四蚊，就可以試到充滿住家風味、原汁原味、酸甜醒胃又濃郁嘅蕃茄薯仔湯。蕃茄薯仔湯送埋幾大舊薯仔，唔好以為係湯渣就唔食，薯仔又腍又粉、充滿蕃茄味，係絕對食得落口，變相多個配菜!

叉燒串 ($9)

叉燒串亦係小店馳名小食，必定即叫即燒，新鮮熱辣。聽聞選用梅頭豬肉，肥瘦適中，非常爽口。沾上濃甜叉燒醬同麥芽糖以炭火燒烤，極有BBQ風味。微微烤焦嘅外層，更突出炭燒嘅味道，非常好味嘅串燒。

一個兩餸麵只需$20，三餸都不過$22，價錢非常大眾化。編按﹕今次無團購啊~
而車仔麵呢個設計其實係非常無敵嘅，因為只要餸菜選擇多，食客可以隨心所欲，鍾意邊樣揀果樣，每款餸菜都必定係心頭好，合成一碗賣飛佛麵，一定好滿足。但咁耐以黎，好多車仔麵俾我嘅感覺係，餸頭菜尾求其是但俾啲你，雖然餸菜可以自由選擇，但結晶品未必一定好食。

今次黎到蒙麵，係一個新嘅車仔麵體會，感覺上材料並唔係一般嘅餸頭菜尾，每款材料都用心製作，而蕃茄薯仔湯底更加係俾足一百分心機，食客自然一百分滿足。

甜蜜蜜﹕請加入賣飛佛

甜蜜蜜甜品專門店@九龍城
18/8/2011 16:00

位於尖沙咀人氣高企嘅甜蜜蜜，進駐九龍城城南道開分店，用團購谷一谷人流，我都唔拾輸，買左兩張，$20有$40購買力，選擇左兩款點擊率高嘅甜品做下午茶。

炸香芒春卷伴芒果沙巴翁 ($40)
一個賣相好靚、芳香撲鼻嘅創意甜品。除左芒果春卷、塑低嘅沙巴翁醬外，仲有幾片新鮮水果，同埋一杯芒果醬。
薄薄嘅春卷皮包住大大件新鮮、又香甜嘅芒果拎去炸，春卷皮暖笠笠，芒果肉凍冰冰，感覺良好。如果春卷再炸得脆啲，熱啲，應該會更好。芒果春卷可以沾沙巴翁醬或者芒果醬，兩樣食法都配搭得宜。沙巴翁係蛋、 糖、同酒混合再火炙嘅醬汁。醬汁有焦香味，有輕微脆度，有少許似點點黑色嘅焦糖面。酸甜嘅春卷點一點沙巴翁醬更加滋味，香味十足。如果想芒果味更濃郁的話，可以試下配搭凍冰冰嘅芒果醬。芒果醬似係新鮮果肉打成，芒果味十足，連春卷一齊食，更加突顯芒果嘅鮮甜。旁邊嘅一片士多啤利同奇異果，更可以加添一點酸咪咪嘅感覺。

焗冰火芝士木糠布甸 ($40)
新鮮即焗，熱辣辣嘅木糠布甸，實物同相片相似度達99%，賣相一流，好心急想知道內裡乾坤。微微燒焦嘅扭紋頂係焗蛋白梳乎里，有蛋白嘅香味，有棉花糖嘅軟綿口感。鬆軟得黎，亦夠實在，唔會好似食到一啖蛋白空氣。破開焗蛋白塔，內層有溶化左、暖暖嘅芝士忌廉，凍冰冰嘅忌廉芝士塊，仲有兩層木糠。芝士味道頂級濃郁，就好似紐約芝士蛋糕嘅味道，加雪糕嘅口感，經過烤焗，仍然食到一大舊冰凍、結實嘅忌廉芝士塊。有部份溶化左嘅忌廉芝士混合左仍然乾爽嘅木糠，味道更加濃郁。甜品如其名，的的確確，確確實實食到冰火嘅感覺。而芝士、木糠味道旗鼓相當，同樣濃郁，各自發揮自己嘅角色。

今次團購好成功，以優惠價$20食到一個頂瓜瓜甜品，真係非常滿意。就算正價$40都係好合理嘅價錢，絕對值得繼續支持。兩款甜品充分表現到色香味俱全，賣相吸引、香氣誘人、味道得宜。難得一間高質素甜品舖，離開小店後，味道仍然令人回味，邊行邊繼續讚。相信佢將會係近期難得要book mark賣飛佛嘅甜品店。

祝君好運﹕五星級街坊茶餐廳

Eastar Restaurant@土瓜灣
18/8/2011 14:00

今次喺成日標榜自己最識飲識食嘅筍仔網，買左兩張套餐優惠，$40可以享用由五星級酒店大廚主理嘅三道菜西式一人餐，講到好高級咁。

蒜蓉包
未送到上枱已經聞到好香蒜蓉味，麵包上塗滿蒜蓉同牛油，除左好濃郁蒜蓉味外，仲食得出蜜糖味，好有自家製BBQ風味。蒜蓉包最緊要蒜蓉夠重手，最怕食到有啲掛名叫蒜蓉包，但其實係牛油味唔夠，蒜蓉得兩粒嘅方包。呢個包味道好足夠，但麵包焗得唔夠乾脆，亦唔夠熱。

意大利雜菜湯同蘑菇雞茸忌廉湯都無乜特別，只係忌廉湯比較稀，亦無乜餸。

法式焗田螺伴薯蓉
難得一個午餐會跟埋焗田螺做小食，就因為呢個安排，先吸引到我買呢個團購。
一大碟焗田螺有八大粒，每粒田螺都好飽滿，肥肥地夠肉地。經過蒜蓉同牛油烤焗後，味道更見濃郁，而田螺內亦充滿牛油醬汁，非常入味。對比薯蓉就夠平實，薯蓉始終係配角，所以薯蓉味道偏淡，但質感非常滑，好幼細，唔會食到粒粒薯仔。都有一段時間無食焗田螺，感覺上呢碟都唔錯，拍得住出面啲西餐廳。

芝士焗豬扒飯
一個普通過普通嘅焗豬扒飯。好彩芝士夠多，夠香濃，豬扒都係咁。蕃茄醬似乎係用原隻蕃茄煮，有粒粒嘅茄肉，味道唔錯。但呢個飯犯左相信任何一個焗飯都唔會犯嘅錯，竟然焗飯係無!炒!底!!! 只配白飯，總覺得有唔妥。蛋炒飯嘅飯質相對比較乾，再焗一焗可能出現飯焦，係食焗飯嘅樂趣。用上白飯，一黎唔夠乾，而且焗飯焗得唔夠耐，好似只係為左焗溶塊芝士，求其焗一下，咁同白飯撈汁有咩分別?

忌廉雞肉天使面
老實講賣相好唔吸引，同想像中嘅忌廉意粉相差甚遠。白色係白色，但係無黎色水嘅白色，並唔係純白、濃厚、濃稠、奶白嘅忌廉色。雞肉都係白色，係雞天然嘅顏色，只用少許鹽調味，味道偏淡。青椒、洋蔥都係無乜味，天使麵都係無乜味，而且偏腍，成碟就係淡而無味。所謂嘅忌廉原來沉晒底，因為忌廉汁較稀而且份量唔多，流晒落意粉底下，完全達唔到掛麵嘅程度。色香味無樣野做到。

團購話，呢間餐廳係由曾於五星級酒店任廚的師傅主理，但除左蒜蓉包同焗田螺係稱得上好味之外，其他食物都難配上呢個形容詞，都莫講話五星級酒店級數。可能果位屈就喺茶餐廳格局嘅半開放式廚房嘅大廚，的確曾於五星級酒店任廚，但可能主責係前菜、小食。

團購又話，一個有餐湯、蒜蓉包、焗田螺、意粉/飯，又跟埋飲品嘅餐，優惠價$40，而原價係$118。但餐廳牆上掛住嘅餐牌睇到，一個相同、無田螺嘅午餐，街價係$44，估唔到啲田螺咁貴。整體黎講，都係街坊價錢食街坊茶餐，並唔係團購所講嘅五星級酒店級數囉。

一間裝修得幾靚，掛滿藝術畫，有酒店大廚坐鎮嘅Restaurant，用嘅係茶餐廳嘅餐具，崩左角嘅湯碗，好立克牌嘅透明牙籤筒，仲有位著住水鞋嘅阿姨負責拾枱。呢個配搭唔係幾match。網上得知，呢個舖位已經轉過幾手，上幾手都做得唔長，真係唔知呢間五星級茶餐廳點啦。Good Luck!

聰明笨笨小甜品

糖院@旺角
13/9/2011 20:00

經驗所得，集購城嘅優惠真係比較抵，好幾次都係$15食到$50，真係好抵買。今次做一間位於何文田，一處平時唔會去，距離旺角東站話近唔近，話遠唔遠嘅地方。早前買左團購後，已經行過呢間甜品店，點知摸左門釘。可能甜品店一向開店時間比較晏，今次終於喺晚間時份過黎。

龍船 ($30)
成個設計其實同香蕉船差唔多，都係靠現成食物堆堆砌砌，無可能會難食。有一條熟成程度正常嘅香蕉，兩個某牌子嘅曲奇同朱古力脆脆雪糕球、三片罐頭糖水菠蘿、四個半條朱古力手指餅，仲有一堆煙韌、充滿果汁味雜果啫喱粒同明珠粒粒。

牙擦酥 ($20)
酥皮撻之上有士多啤梨、奇異果等水果。酥皮撻幾脆口，好有牛油香。驚喜嘅係，酥皮內仲有
燉蛋，幾似酥皮蛋撻。燉蛋有好香蛋味，好夠滑，但質地太腍，有啲鬆散。

感覺上呢間甜品舖好識得小把戲，眼見餐牌密密麻麻，差唔多有成一百款選擇。但細閱先發覺，當中好多都係改少少當新野。就好似「龍船」同「香蕉船」，甚至係「特級香蕉船」都係大同小異，分別唔大，只係扮有好多唔同款。
餐牌上仲有好多名稱都非常特別，就算有相片，都估唔到甜品嘅內裡乾坤，而問職員亦都好似唔太清楚。好嘅一方面可以話有驚喜，但另一方面，所揀到嘅甜品，未必合心意。名稱太特別，又同甜品無乜太大關係，客人唔知係乜，落單職員又唔清楚，有乜意思?
上網睇番團購嘅介紹，對比手上嘅餐牌，發覺每款甜品平均貴左兩大蚊。唔好以為側側膊，唔多覺，更改實在太明顯，因為只係用Label紙貼上新價錢，鬼唔知你改過咩?! 似乎每件事都未夠心思，唔夠聰明。

點都好，原料價格、人工成本上漲，最終都會轉嫁俾消費者，所以佢要加價。以上兩個甜品，團購優惠加埋只需$15，相信真係近乎成本價。論甜品味道，都係咁，唔特別。付出$15，食個兩個甜品，我樂意。但用正價，又要突登行到無雷公咁遠，真係要三思。

悠閒嘆賴高級八粒野

Mr. Steak@沙田
12/9/2011 16:00

放假行街行到累，坐低嘆番啖咖啡，嘆一個悠閒午後下午茶係一件賞心樂事。今次仲要賴高級嘆英國皇室下午茶套餐，更加不得了。一件不得了嘅事，只需$98就可以達成。谷旁團購$98皇室下午茶套餐兩人餐，包四款小點同餐茶。

煙三文魚/風乾火腿脆包
其中一份有煙三文魚脆包。烤得香脆嘅蒜蓉包之上，有幾片沙律菜，上面一大片薄切煙三文魚。另一份係並唔係煙三文魚，似乎係風乾火腿，肉味非常濃郁，拌生菜食剛好，唔會過咸，隱約仲食到淡淡嘅油香味。火腿充滿住原始嘅鹹香味，令人回味。

澳洲和牛漢堡
團購話和牛有足足 1.8 安士，只見到漢堡包中間夾住一塊約有一厘米厚嘅肉餅，偏圓球形，仲以為係乾煎牛肉球。外邊煎得焦香，內層係迷人嘅半生熟粉紅色，肉質有一絲絲嘅纖維，仲夾雜左些少粗糙嘅肉根，口感幾似牛根丸，但仍保留到漢堡肉餅嘅鬆化。所講嘅澳洲和牛味道的確好牛，牛味濃郁，無需要太多調味，少許嘅胡椒、少許洋蔥味道已經好足夠。漢堡包只係微微烤過，外邊少許脆，包唔夠鬆化，漢堡包似乎襯唔起件牛肉。

英國茶點鬆餅
淺啡色圓圓嘅係英國鬆餅。記得早前食KFC嘅早餐，都鍾意配佢嘅蜜糖鬆餅，貪佢甜甜地，做早餐甜品都唔錯。而呢件下午茶鬆餅，外型明顯靚仔過KFC，表面光滑，隠約見到有粒粒提子乾。非常鍾意佢嘅口感，外層少少脆口，內層鬆化，有好香嘅蜜糖同牛油味，配搭甜甜酸酸嘅提子乾，真係好味。

皇室婚宴朱古力餅
團購話朱古力餅係由皇室御廚親自教授製作，係威廉王子都有食過嘅美食，不得不試咁話。一舊正正方方嘅朱古力餅，頂頂有一粒核桃，果仁下係一層薄薄，輕微結實嘅朱古力醬，仲夾雜左幾片白朱古力片。朱古力餅混合左唔少果仁，口感結實得黎，又有覺得似糖霜、鳥結糖嘅粉粉口感。一件細細真係好足夠，因為感覺食緊朱古力，味道超甜，可能係英國本土口味。

咖啡
嘆下午茶配番杯即磨咖啡，一啖乜都冇加嘅齋啡，有好香嘅味道，一啲都唔酸。一向喜歡多奶版本，加左奶之後，更顯幼滑口感，但咖啡味已經被蓋過，比較淡口。

一份二人同行下午茶餐，加埋得八粒野同兩杯餐茶，每件都係一、兩啖可以搞掂嘅細晒史。佢話正價要$198，團購價都要$98。如果計單價，即係平均每件約$10。味道正常，可以話係合理價錢，但其實唔太抵。開飯網已經充滿住負評嘅Mr. Steak，中秋節當日只有不足十個客，似乎全部都係團購客，啲高層、大廚仲得閒坐低開會。但就因為人少少，可以安排坐到舒適嘅四人大梳化位。沙田店原來仲喺行過左都唔多覺嘅位置，而同一層已經有N間人氣食肆，要同人爭，似乎真係要俾啲心機搞搞佢。

再戰逃學威龍咖哩飯堂

銀咖哩@沙田
17/7/2011 16:30
12/9/2011 13:30

17/7/2011 16:30

寄生喺吉之島嘅小店，係沙田出名嘅學生飯堂。平日懶豬時間，坐滿左著校服嘅學生哥。星期六日嘅下午時段，坐滿流晒大汗、打完波要醫肚嘅哥哥仔。

下午茶餐 ($30)
吉列海鮮薯餅、薯角、香腸、太陽蛋、汽水，迷你咖哩飯
話明係銀咖哩，點都要加六蚊試一試咖哩飯，一個迷你版細細碗已經可以試到味道。咖哩係日式少辣偏甜嘅咖哩，蔬果甜味好濃，食落有一粒粒嘅質感，睇得出加入左肉碎、紅蘿蔔同洋蔥粒等材料。唔似一啲餐廳，用咖哩粉開水，得一pat嘅芡汁。白飯都係好野，粒粒圓圓嘅日本 珍珠米，食落比較黏口，撈飯的確岩岩好。而咖哩汁同白飯比例剛好，醬汁正好送晒成碗白飯。

吉列材料全部都係新鮮即炸，而且控油技術唔錯，炸得比較乾身，外層脆卜卜，唔油膩。菜嘅吉列海鮮薯餅材料都好豐富，食到有魷魚、蝦仔、蟹柳，仲有瑤柱喎。粉粉嘅薯仔味道好香好甜，海鮮嘅甜味更滲晒入薯仔度，呢個薯餅做得唔錯。

不得不讚下個太陽蛋，相信係冇落任何調味，食得出雞蛋嘅最鮮味。煎到半生熟，蛋白同蛋黃都係半型固，蛋白邊微焦，正係太陽蛋嘅最佳型態。而薯角都炸得幾香口，個皮脆脆，薯仔味夠濃，加茄汁一流。香腸就冇野好講，仲食得出邊隻牌子添。

下午茶餐 ($24)
吉列豬扒、薯角、香腸、汽水
豬扒都一樣炸得幾好，但肉質唔得，偏韌亦覺得鞋口，肉味都唔夠。算啦，食下午茶唔好要求咁多。

一個下午茶餐廿幾蚊，無論係午市定係晚市，散叫一個咖哩飯都係不過三十蚊。好有興趣正正式式試下各款咖哩飯，聽聞芝士蛋包咖哩飯同漢堡扒咖哩飯都唔錯。作為學生飯堂最厲害之處，係白飯加底唔洗錢，正好滿足一班正值成長期，食極唔飽嘅同學仔。憑學生證仲送汽水，食得飽飽之餘，價錢又咁實惠，難怪學生哥咁喜歡。大胃王更可挑戰1.5公斤富士山咖喱飯，富士山咁高嘅白飯，配五六款材料，足足可以餵飽三個同學仔。

好一間令我回到讀書時期青春時光嘅小餐廳。

後記
12/9/2011 13:30

兩個月前幫襯過學生飯堂，今次再續前緣，試埋人氣蛋包咖哩飯。

雞扒蛋包咖喱飯 ($36)
香脆嘅吉列雞扒之下 ，一大塊煎得薄薄嘅蛋，包住下層一大碟白飯，白飯邊仲有多到流出黎嘅咖哩汁。吉列雞扒一樣係新鮮即炸，外層乾身脆卜卜，內層亦保留到雞扒嘅肉汁。而是次嘅目標蛋包飯，都係滿意之作。蛋雖然煎得薄薄，但仍然保留到幼滑、軟熟口感，部份位置仲出現透明啫喱狀嘅半生熟蛋白，配上充滿住肉碎、蔬菜同薯仔嘅濃甜咖哩汁，真係無得頂，食到一滴不留。

今次重臨銀咖哩，咖哩仍然咁好味，吉列仍然都係咁脆，打完波嘅陽光男孩仍然多，妙齡姊妹花仍然存在，佢仍然都係一間學生飯堂。

平民乳酪皇后

Yogurt Queen@大圍

11/9/2011 17:00

大圍無啦啦又湊熱鬧喺火車站附近開間乳酪店。喺一間細細嘅團購網用優惠價$15買到$40現金券試下呢間新店。

  

士多啤梨、原味扭紋乳酪

士多啤梨味係好假嘅士多啤梨味，乳酪只有輕微酸味，總覺得乳酪嘅牛油成份幾重，唔似一般乳酪咁清涼解渴，質感軟滑幼細，但好易溶，成個感覺就似乳酪味嘅軟雪糕。

配料有罐頭椰果、幾乾身嘅木糠、迷你超細粒偏硬嘅棉花糖、唔煙韌嘅原味麻糬、芒果味爆爆珠、無乜味嘅咖啡果凍、硬硬地嘅雜果粒，仲有罐頭蜜桃等。

因為有四十蚊現金，真係可以加到好多配料，加到條數都唔知點計。

原本一杯大乳酪加四款配料只係$33，仲可以加多兩款價值$3嘅配料，團購券仲免費送多兩款，總數應該有最少八款配料，搞到我都唔知係食配料定係食乳酪。成杯野溝黎溝去，好奇怪。

喺新界一個人口老化嘅平民屋邨地區，開間潮興嘅乳酪專門店，其實真係好博。而其實呢間小店無論係門面裝修、乳酪選擇、味道等各方面嘅吸引力都唔大，實在係十級博。所以近排喺門口竟然賣埋點心燒賣同埋凍撈撈，似乎生意不景，真係好驚佢隨時關門大吉，所以要快手用埋張現金券。

老實講，質素真係麻麻，似乎襯唔起個名。就算佢再做$15一大杯嘅團購優惠，真係無興趣、亦無信心再幫襯。

會貶值的名牌雪糕

kiss n' joy@尖沙咀

11/9/2011 14:45

尖沙咀厚福街係為食貓最愛蒲點，一條小巷加埋H8多多食肆好揀。今次團購半價食乳酪雪糕，一間細細間唔起眼嘅新開小舖頭，賣嘅並唔係自助磅重乳酪，主打係recommended配搭乳酪雪糕。而乳酪雪糕特別之處係採用北海道3.6牛乳，唔加奶油、雞蛋，並無打氣。今期推介有抹茶同黑朱古力軟雪糕，另外仲有北海道原味同草莓乳酪。

Chocolate Dream ($42)

朱古力魔嘅必然選擇。成品同宣傳相差唔多喎，唔錯!

朱古力軟雪糕採用法國Valrhona同比利時Callebaut混合製成，再加埋北海道 3.6 牛乳，味道特濃咁話。難怪職員生怕我地食唔慣，再三溫馨提示，再加強迫試食，先俾我地落Order。

一杯朱古力夢數唔出用左幾多款配料。最頂層係最驚喜嘅一層，竟然雪糕杯會出現朱古力脆皮。朱古力味幾濃，而脆皮真係做到一咬即裂。脆皮上仲有薄薄嘅杏仁片同朱古力果仁脆條，仲有Callebaut黑、白朱古力粒粒。係咩牌子其實都係其次，但朱古力味的確比平時食到嘅較濃，甜度較低，味道唔錯。

朱古力軟雪糕味道唔錯，口感尚算幼滑，比較易溶，但有比一般更加香濃嘅朱古力味，甜度適中，有少許朱古力天然嘅甘苦味。可能真係用名牌朱古力製作，所以朱古力味更突出、更濃郁。

雪糕中層仲有好多特別嘅配料，有Oreo碎粉、朱古力漿、微苦煙韌嘅自家製抹茶麻糬。仲有幾塊正方形嘅朱古力威化餅，威化餅嘅甜度正好舒緩一下特濃朱古力嘅甘味。

最底層嘅仲有雪糕，同甜甜咸咸嘅花生粒。花生同朱古力其實幾夾，但因為製作需時，而食又需時，所以到達最底層嘅時候，軟雪糕都幾乎全部溶化。

此店特別之處係特濃朱古力，真係濃到苦。但對朱古力魔黎講，都絕對接受得來。整體味道唔錯，但似乎食配料多過食雪糕。配料款式過多係問題，只見職員一邊偷望製作說明貓紙，一邊加雪糕，一邊加配料。又行出，又走入，又拎高，又攞低，估計製作一杯雪糕足足等左五分鐘有多。你唔mind用咁長時間黎處理一杯雪糕，做少單生意，豪得起係一件事。但而家唔係食法國大餐，我唔需要睇到大廚點樣煮，點樣切。家陣呢杯係會溶嘅雪糕，我只想拿拿聲拎上手食，感受最凍冰冰、涼浸浸嘅一刻。

一杯朱古力夢雪糕原價$42，用團購券買，實價$22。

一杯如此濃郁嘅朱古力味雪糕，如果佢未溶的話，我覺得都值得。

但奈何親身感受五分鐘製作過程，真係好漫長，時間一秒一秒咁過，雪糕就一滴一滴咁溶...

所以雪糕嘅價格就一秒一秒咁貶值...

$28食唔知乜午餐

Pancake Colours Cafe & Bar@尖沙咀
11/9/2011 13:30

記得四月有篇提過Pancake Colours嘅超hea下午茶。今次團購做尖沙咀店嘅午餐，$28一份，有餐湯、主菜、飲品，仲有甜品。而家通脹咁厲害，好唔好食都係其次，最緊要食得飽飽，$28一餐值得一試。

跟餐嘅忌廉湯真係無野好講。唔夠熱不特止，仲要稀過水，淡如水。好似係奶白色嘅水上浮遊左幾粒粟米同火腿。

而餐飲都係無野好講，一樣清如水，淡如水。杯夠高夠大，但大大粒冰佔左半個杯嘅高度，所謂嘅綠茶，係黃綠色嘅水。而檸檬綠茶係加左檸檬黃綠色嘅水，我當係黃綠色嘅檸水。

芝士忌廉野菌鴨胸寬條麵
正餐比跟餐配角好好多，一黎到賣相非常得。忌廉寬條麵上面有五大塊厚切鴨胸，份量充足。
意粉同一般港式餐廳一樣偏腍，而且質地勁粉，唔夠爽口彈牙。好彩芝士忌廉汁味道唔錯，拌意粉食，可以遮下羞。忌廉汁仲有唔同類型嘅野菌，煮得夠腍之餘，亦食得出有野菌本身嘅香味，苦澀草腥味唔強，都算幾新鮮。夾雜洋蔥、車厘茄、青紅椒食，整個意粉味道非常豐富。鴨胸質地鬆軟，經過稍微煎香，味道更濃烈，但相信都係現成貨，所以咸味為主，唔期望有濃香煙燻味。

龍利柳海鮮意式燴飯
一大塊橫屍飯面嘅係乾柴到阿媽都唔認得嘅香煎龍利柳。肉質麻麻，兼無肉汁，薄邊位仲出現偏硬情況，相信唔太新鮮。但樓下嘅意式燴飯非常唔錯。意式飯竟然採用圓圓嘅日本珍珠米，
質感較實，有咬口，仲煙煙韌韌，黏性幾高。用忌廉燴過，每一粒米飯都被忌廉汁包裹，越食越滋味。配料仲有西蘭花、洋蔥、車厘茄、魷魚、蝦同蜆肉等，非常豐富，真係齋食飯好過。

朱古力唔知乜
唔知乜係因為睇完、食完都真係唔知係乜，似係朱古力大菜糕，又似朱古力布甸，真係唔知乜，總之好難食。有朱古力嘅顏色，但無朱古力味。有布甸嘅質感，但無布甸嘅香滑。係奇怪、有化學味道嘅朱古力味甜品。

如此一個跟餐甜品就令我地同時有「此地不宜久留」嘅感覺，最終食左一啖就決定放棄。其實原先團購聲稱跟餐甜品係乳酪軟雪糕，但餐廳縮皮，同所有團購客統一口徑講乳酪機壞左。好多團購客就係咁唔好彩，眼白白見到斜對面隔離枱明明好滋味咁食緊乳酪杯，但就喺果一分鐘，部乳酪機就突然壞左。算吧啦，真係唔好彩啦，就係咁岩。

團購餐$28乜都包晒，任選 $47 或以下嘅任何主菜，真係唔可以要求咁多。就算唔飲個湯，唔食個甜品，都仲有杯水濕下口，而主菜係正常兼食得飽，叫做好過食茶記碟頭飯咁啦。