莆田

莆田＠銅鑼灣
11/8/2019 12:00

適逢牛一，出銅鑼灣行下街，午餐選擇左一向非常鍾意嘅餐廳，利舞臺廣場分店仲環境舒適。坐低先飲啖菊花茶，幾鍾意果份清香。

一品醉蚶 $82

的確，要去有信譽嘅餐廳先放心食蚶。呢個前菜真係非常開胃，蚶仔粒粒飽滿，非常鮮甜，加上大量蒜蓉、蔥、辣椒，醬汁帶微酸，正。

莆田扁肉湯 $22
湯本身好清甜帶少少醋酸味，扁肉燕非常鮮甜，最鍾意餃皮煙韌彈牙，一啖一粒剛好。剛好睇到店內電視介紹，原來呢味係手藝菜，餃皮係精心製作，食落的確非常好味。

哆頭蟶炒蛋 $109

早排推出哆頭蟶主題，差不多到水尾時間，再食多一次先，今次揀左炒蛋。估唔到一碟細細嘅炒蛋收埋左好多隻蟶子。蟶子仍然飽滿鮮甜，蛋又炒得夠香，咸鮮味十足。

漁民紫菜燜飯 $88
簡簡單單一個燜飯，入面加左唔少紫菜同海蠣乾，飯味香，又夠飽肚。

酥炒芋芯 $92

最後揀左必吃十醉之一嘅酥炒芋芯做甜品。芋芯外表有焦糖脆脆的，芋頭本身粉腍，好味。

呢餐真係非常滿足。更欣賞呢間分店極之BB friendly。BB櫈、兒童餐具齊全，店員姨姨都好親切，臨走時仲整左一隻狗仔汽球俾BB，開心。

つけめんTETSU

つけめんTETSU@銅鑼灣

27/12/2015 14:00

新開呢個沾麵專門店被各大傳媒狂煲，特式係熱石加熱服務。其實呢樣服務亦唔覺得有幾新奇，記得旺角漁場台風已經玩過。不過就話係東京沾麵名店首間海外分店，亦係「熱石投湯沾麵」嘅始祖，就趁假期黎試一試。

小店係銅鑼灣，遠離拉麵激戰場，自成一角。不過位置大馬路街舖，排隊位置都相當窄。當日1點左右黎到，門口大約七八人排隊，等左半個鐘左右。

沾湯係豚骨魚介湯。令人非常失望係送上時沾汁唔夠熱，並無辣口感覺，已經估到呢個湯好快玩完。味道方面其實唔差，亦同三田製麵所好似。魚介豬骨湯非常厚身，杰度十足，亦唔油膩。味道係夠，但以重口味人士黎講亦未到超濃境界。
沾汁裡有幾件叉燒，個人覺得相當唔錯，雖然偏瘦但煮得好軟腍入味，口感有啲似午餐肉，印象相當深刻。

300g普通沾麵加蛋 $98
麵條有兩種可選，一種係普通麵，一種係傳聞類似烏冬嘅粗麵條。沾麵亦可選熱食或冷食，熱食的話，麵係會浸喺高湯之中，雖然能有效保持溫度，但一向都鍾意冷熱交融嘅感覺，亦備好硬麵，都係食番最傳統果種吧。麵條入口都幾煙韌彈牙，有小麥味，份量亦正常，肚餓的話300g都可餵飽男士。 半熟蛋入味算唔錯，但稍為過熟。

200g普通沾麵 $89

食到後半，沾汁真係凍得唔能夠忍受，就玩一玩傳說中嘅熱石投湯。宣傳講熱石可以將湯加熱到60、70度。講店員加石後，的確有一下「咋」嘅視覺享受，但入口就覺得幫補不太，湯只係略為回暖，相信係因為石頭嘅溫度未夠高，又失望了。

最後再試一試湯割，咖啡壺裝住高湯，俾客人自行加湯。由於沾汁唔算非常濃郁，只係略為加少少溝淡，入口都係微溫，飲完就算吧。值得一提，枱面有炸洋蔥碎，味道的確幾香。撈入沾汁內，係另一種風味。

總括黎講，呢間沾麵出品算不錯，但尚有非常多進步空間。又可能我地已經食過唔少高水準出品，要求進一步提高，呢一碗沾麵無甚特別。

Super Nice Semi-Buffet @Kudos

皇冠假日酒店 Kudos@銅鑼灣
11/8/2015 11:30

今日生日要食好啲，揀左呢個團購，好似幾抵。五星級酒店半自助餐都係$160，仲要食足三個鐘。11:30黎到酒店，的確幾高級，餐廳係一樓，黎到時人流唔多。三個鐘食左好多野，就算最後投降，都可以飲下飲品，食下果汁，他他條條食個高級午餐。
半自助餐係包括一份主菜，外面自助吧可以任食，有前菜、沙津、刺身、甜品任食。團購價$160，另加服務費$23，$180左右價錢真係好抵。正價好似要$299，實在又太貴。

冷盆有煙三文魚、凍牛展、日式凍豆腐、番茄水牛芝士、凍火腿拼盆。

六款芝士

各式預製沙律

自助沙律吧

刺身有三文魚、鯛魚、吞拿魚、雜錦壽司

三款凍海鮮係蝦、青口同螺仔

自助焗麵包及兩款餐湯，一款係龍蝦湯，另一款西洋湯豬骨湯

麵檔

甜品有幾款布甸、三款蛋糕

兩款飲品係檸檬茶同薄荷特飲。水果有五款。

豆腐花、四款Haagen Dazs迷你杯

自助乳酪雪糕

餐廳唔算好大，11:30黎到，剛剛入座，無乜人

最鍾意煙三文魚，自加他他汁，另一款應該係煙吞拿都幾好味。

六款芝士，老公至愛，唔知有乜好食。

刺身都OK新鮮，自己食幾多夾幾多，Re-fill都幾快。沙律菜選擇唔算多，但菜都幾新鮮。

龍蝦湯味道不錯，夠濃味，又杰身，咁好彩仲撈到幾粒龍蝦肉。

食到咁上下，主菜就送到。每日有五款主菜，我地揀左

澳洲免治羊冧肉餡餅伴全麥中東包及鷹嘴豆醬配薄荷乳酪
話係肉餡餅原來係類似漢堡扒，切開肉餅肉汁豐富流晒出黎。食落有少少羊膻味，但調味較為清淡，淡淡地。中東包本身幾好味，外脆內軟，煙煙韌韌，麥味仲好香。配上三款醬，薄荷味幾香、番茄粒粒加些少香料粉、另一款本來食唔出咩醬，以為係薯仔蓉，淡淡地，有啲豆味，原來係鷹嘴豆醬，真係第一次食。呢份主菜幾有中東風味，個人就麻麻地，但老公好鬼鍾意，因為夠特別。

香煎西冷伴磨菇蓉及焦糖甜薯
我揀左呢款西冷，賣相非常吸引，西冷大大塊上面舖滿磨菇汁。

切開西冷，大約六成熟左右，個人最鍾意呢個熟度。西冷入口好腍，邊位少少筋都食得到。牛味唔太濃但都OK，幾Juicy。幾鍾意佢個磨菇汁，係粒粒碎磨菇，味道好香，仲食到好似有些少黑松露味。

食完主菜繼續自助狂食，幾款水果，順便拎埋紅酒燴梨，燴梨入晒味，紅酒味幾香，不錯。

最後到甜品時段，拎晒全部試一Round。
最鍾意法式焦糖燉蛋，味道非常香甜，面層焦糖勁脆，細細杯兩啖食晒，所以在食左三杯。
白朱朱古蛋糕都唔錯，朱古力味幾甜，中層係黑朱古力蛋糕。
芝士蛋糕味道夠濃，正常水準。第一次食紅蘿蔔蛋糕，質感有啲似香蕉蛋糕，幾鬆軟，味道係紅蘿蔔加上肉桂味，味道其實幾香，但個人麻麻地。芝麻奶凍睇落幾好，但入口唔夠味，有啲失望。青蘋果奶凍，係奶凍加青蘋果蓉層層疊，酸酸甜甜幾有趣。芒果布甸正常質素。

豆腐花味道OK嘅，可惜唔算太滑。麵包布甸有啲失望，淡而無味。反而西米焗布甸就幾香。
呢度無朱古力噴泉，只有預早整好嘅朱古力包餅乾條同棉花糖。

雪糕時間有自助任唧乳酪，超級冰凍，味道勁濃，超爽。
Haagen Daza有雲尼拿、香蕉、咖啡、朱古力味。

整體黎講，主菜係非常讚，中間嘅自助食品都相當唔錯。都知道半自助餐嘅自助食品唔算多，但款式都幾多元化。值得一讚，服務員非常有禮貌，而且收碟都好勤力，又可能平日時間人流唔多，基本上一食完放低刀叉，五秒後必有人收走隻碟。最抵嘅係，今餐午市時間係由11:30至14:30，食足三個鐘。梳化坐得舒服唔太迫，就算食飽投降，都仲可以飲下野慢慢坐。真係非常滿意嘅一餐。

三田製麵所

三田製麵所@銅鑼灣

15/2/2015 13:00
3/5/2015

15/2/2015 13:00
剛開業幾日，而家仍係試業階段。
十二點到達，已見十幾人嘅人龍，等左約不多一個鐘，先可入座。
選擇左一中一大沾麵。均一價$78

拉麵賣相不錯，香味亦不錯。
沾汁係魚介風味，湯之上有一片紫菜，仲有魚介粉。不客氣將粉撈勻試一口，豬骨湯加上魚介，魚介海味幾突出，豬骨明顯給比下去。湯汁質地非常厚，好容易掛麵，但問題就係食大麵嘅時候，沾汁會一滴不留。湯汁黎講味道係夠既，以拉麵湯底黎講算唔錯，但以沾麵湯黎，略為唔夠重口味。最大問題係湯汁溫度唔夠，入口無燙熱感覺，相信好快會被拉麵感染。

至於麵，賣相不俗，但入口唔夠煙韌，略嫌有糊口感覺。標準出品係冷麵，溫度適中，飛水夠乾，還好無再淡化沾汁，麵的確非常掛湯，不過冷麵令室溫湯更冷，食到一半，真係以為自己食緊冷麵。

完食後，請店員係僅餘嘅沾汁加上清湯，可怕清湯溫度嚴重不足，一心諗住將湯加熱會有另一番風味，竟換來一次無得救。可惜。

配料方面，沾湯入面有叉燒粒，呢個係全場最好食，肉質鬆軟，肥瘦適中，吸收晒沾湯味道，非常好味。跟麵有一片厚切叉燒，味道正常，略帶一點乾，只好將叉燒放落湯浸死，情況稍有改善。溏心蛋溏心度OK，味道略為淡口微甜。

整體黎講，如果無任何日本夠店嘅光環，呢碗沾麵可算係唔錯。但以沾麵名店呢個名號出場，出品似乎欠缺風範，實在失望。可能營運上未純熟，食物溫度唔夠，出菜時間亦較為慢，難怪排隊要等咁耐。是次排隊一個鐘，換來一次失望，加一張$25現金券。就因為呢張現金券，決定俾多一次機會佢，期待下次有進步。

3/5/2015

第二次，再試下佢嘅沾麵。

沾汁味道仍然濃，杰到好似糊咁係特色，可惜沾汁唔熱呢個問題有改變，但仍未解決。以一碗平$25價錢，其實算值，但仍然有失金柒招牌名氣。

香港的一蘭拉麵

一蘭拉麵@銅鑼灣
11/8/2014 20:00

日本食過頂呱呱，黎到香港人龍長到傻。原來開左新分店，排隊時間唔太耐，大約半個鐘就入得。店內風格跟足日本，好有風味。

湯底仍然好味，但總覺得日本的更濃。
拉麵是日本的，但總覺得唔夠極硬。
叉燒仍然好味。
蛋反面比想像中好，微咸，中間溏心，非常不錯。

 夜晚黎食，需要替玉半個

無得去日本，黎呢度可算係止痕之選!

ラーメン松壱家

ラーメン松壱家@銅鑼灣

10/8/2014 13:00

終極雞湯拉麵 ($113)
比一般豬骨湯底更白，但不算太油，粗麵夠硬。叉燒不錯，偏肥，軟綿入味。
蛋全熟一般

醬油豬骨拉麵 ($78)
豬骨湯正常，不算突出

味道係不錯的，得一樣唔鍾意，點解要加一，明明係日本人開，點解黎到香港要加一，地道味走晒。

達磨日式拉麵@銅鑼灣

達磨日式拉麵@銅鑼灣
6/9/2013 19:00

拉麵風捲左咁耐，都仲未試過呢間廣受歡迎嘅達磨。竟然有一日佢做團購! $98有兩個麵，兩杯飲品，加一個小食。平到咁，點都要試下。

豚角煮豚骨拉麵
賣相係OK的，配料亦唔錯。第一啖湯係OK的，但第二啖湯已感覺到豚骨清淡，配不上特濃二字。作為人氣拉麵過江龍，湯底似乎略遜一籌。拉麵一般，質感可以接受。豚角煮即是五花腩，肉中間夾著脂肪，入口鬆化軟腍，相當唔錯。溏心蛋熟成度不錯，略帶甜醬油味，OK!

叉燒豚骨拉麵
可憐的叉燒拉麵叉燒得一片，味道甜甜，肉質可以，但無乜特別。

團購餐跟一份野菜薯餅，味道OK的。另柯打一份芝士年糕，原來沾煉奶係咁好味。

整體來說，拉麵好一般。銅鑼灣店夜晚七點人氣唔旺盛，難怪要做團購。看來當初所謂嘅人氣拉麵，風頭已被蓋過。

博多一風堂的完美演繹

博多一風堂@銅鑼灣

13/1/2013 18:00

在銅鑼灣希慎蘋果店訂情後，去一風堂作一個完美嘅句號。日本過江龍登陸香港，一夜成名，變成拉麵魔必須朝拜嘅人氣名店。

一風堂主餐牌提供五款湯底選擇，有普通版同特製版之分。價錢較貴嘅特製版配料更多，更豐富。

白丸元味特製版 ($88)

一風堂嘅原創拉麵，原味豬骨湯底。特製版有夠豪華，有兩塊日式叉燒、兩塊日式豬柳、木耳、芽菜、竹筍、紫菜、半隻半熟蛋。

湯底以豬頭骨、豬腿骨及豬手骨等熬超過十八小時以上煮成，白滑帶淺啡嘅色水實在討好。湯底非常忌廉咪，滑不溜口，膠質甚重。豬骨味道香醇濃厚，鮮甜無比，正是介紹所講嘅濃郁溫和。湯底調味適中，又唔會過份油膩，飲多多都唔怕，絕對係終極高水準之作，正是個人最期望嘅完美湯頭。

豬骨湯配上博多傳統風味嘅特幼麵條更係一絕。選擇硬麵，效果亦做到煙韌實在嘅質感，不過仍有再硬一點嘅空間。麵條非常幼滑，掛湯力一流，每啖拉麵都緊緊附上湯汁，滋味非常，可算係食過最好嘅麵條。

叉燒亦係高水準之作。特製版可以試到兩款唔同風味嘅叉燒，一款用豬肩肉做，另一種用豬腩肉做。豬肩肉叉燒係一般常見嘅款式，肉質腍滑，肉味香甜。另一個係類似五花腩嘅三層巴士叉燒，肥肉瘦肉相間，非常工整，肉質更加軟滑，幾乎入口即溶。不過個人略嫌腩肉太肥膩，普通版較為吸引。

半熟蛋嘅賣相亦係完美呈現，蛋白軟滑，蛋黃色澤橙黃，呈流心啫喱狀，黏口度十足，蛋味濃郁。不過呢隻蛋未經過汁煮處理，只用最原始味道出場。

味噌豬骨 特裝版($88)

另一款試下味噌湯底，係原味豬骨嘅基礎上加入味噌，味噌完全溶入濃郁嘅豬骨湯之中，湯底仍然保留豬骨嘅香味，滲透出味噌香甜濃郁嘅味道，更加惹味。不過湯面浮起粒粒脂肪精華，實在有點怕怕。麵條充分吸收味噌湯，味道更加香甜。叉燒似乎同白丸略為唔同，切法偏厚，不過一樣軟滑，吸收左味噌更為可口。

一風堂的確係拉麵界嘅王者，個人極為欣賞。

好多網友都會拎一風堂同豚王作比較。個人認為兩者嘅出品都係超水高準，不相伯仲。豚王嘅湯底係濃烈且豪邁，一風堂係香濃又溫和，可謂一剛一柔，兩者我都喜歡。

舞心拉麵

舞心拉麵@銅鑼灣
25/12/2012 15:30

拉麵狂熱之下，開始嘗試唔同嘅拉麵過江龍名店。黎銅鑼灣嘅目的其實係豚王，可惜豚王條隊長到得人驚，肚空空未有排隊嘅動力，惟有轉戰較為低調，但風評都唔錯嘅舞心拉麵。創辦人伊東先生，從拍戲而戀上拉麵，再變成為職業，故事幾吸引。店內仲有霸氣十足嘅鼓舞海報，幾英架。

店方只提供三款拉麵。白，係基本的豚骨拉麵；黑，係加左黑蒜油嘅濃豚骨拉麵；最後赤，即係辣味豚骨拉麵。

白 ($78)
豬骨湯拉麵有一片叉燒、半雙蛋、芽菜、木耳絲、蔥花。
拉麵來到，陣陣豚骨湯香味，賣相不錯，真係流口水。湯頭係奶白色嘅豬骨濃湯，味道香甜濃郁，豬骨味鮮甜無比。質感幼滑忌廉咪，較為薄身，膠質唔重，係一種清甜爽口嘅湯頭，無多餘油份，不油不膩非常清爽易入口。

拉麵係較為直幼身嘅麵條的拉麵，欣賞佢夠滑身而且零鹼水味，亦算掛湯。落單時店員會主動查詢客人要求拉麵嘅硬度。正常版本確實於網友所指比較腍身，硬版嘅口感就更為討好。

拉麵包括一片薄切叉燒。從賣相睇黎，似乎再經過燒烤程序。肥瘦相間，相當唔錯錯。入口鬆化，所以夾起時有少許散開。不過肉味香甜，算可以了。另有半隻蛋更為討好。蛋白蛋軟腍，蛋黃溏心啫喱狀。有香甜嘅醬油味道，而且蛋味濃郁，上佳之作。其他配料仲包括芽菜、木耳同青蔥，整體感覺唔錯。

黑 ($83)
濃味豬骨湯拉麵有一片叉燒、半雙蛋、芽菜、木耳絲、蔥花。
呢款係原味嘅基礎上加多左黑蒜油同辣味噌。混合左豬骨湯後，多一點微辣，味道更香濃惹味。如果仲唔夠重口味的話，枱面仲有芝麻同生蒜蓉等係任加唔嬲的，可以自行調較出自己喜歡嘅口味。

拉麵份量唔多，材料亦算少，叉燒只有薄薄一片，價錢算貴少少，好彩唔洗加一。
木製裝潢好日本Feel，小店地方唔算寬敞，但坐得好舒服。師傅亦係日本人，全場日文四圍飛，氣氛唔錯。亦好喜歡自動送上嘅玄米茶，清香解膩。唔想排隊的話，呢度確係一試無妨，別有一番樸實寧靜嘅感覺。