糖百府點秋香之終極合輯

糖百府@旺角 / 太子
24/4/2011 20:00
4/12/2011 19:30
2/1/2012 19:30
22/4/2012 18:00
29/4/2012 20:00

24/4/2011 20:00

唔知幾時開始，台灣嘅雪綿冰突然喺香港出現。 早兩個月食完四哥之後，又有團購做雪綿冰嘅優惠。糖百府佢話自己係香港第一家將雪綿冰引入本地嘅甜品舖，佢叫做雪花冰，亦叫秋香。每逢晚飯後時段，都見到有長長嘅人龍，甜品舖都要排隊咁堅?

朱古力秋香 ($38)

早前用正價試過朱古力秋香，呢個秋香嘅濃味真係難以忘懷，朱古力即使變左冰之後，仍然都係濃郁少甜嘅朱古力味。配料有朱古力嘅好拍檔，香蕉、椰果同棉花糖，就好似食緊石板街雪糕。另外，仲有朱古力漿同朱古力碎，令朱古力味更朱古力，朱古力魔必點!

芒果牛奶秋香 ($42，團購價$20)

堆得高高嘅冰底一半係牛奶味，一半係芒果味。牛奶味好濃，芒果味亦好濃，配上士多啤梨漿味道更有深度。綿冰磨得一絲絲，極幼細，輕飄飄，入口即溶，正好係消暑良品。一唔好好愛錫的話，好容易出現雪崩情況。

百香果魔豆更加得意，咬開堅挺嘅薄皮後，香甜微酸嘅果汁就爆發出黎，就好似多左一款果汁撈綿冰咁。西瓜甜度亦剛好，蒟蒻Q係雜果蒟蒻粒，好豐富水果味，但粟米片味道上就好似格格不入，只不過係增加多一種香脆口感。

今次你買我買$18可作$40消費，補番差價，只需廿蚊就可以點一點秋香，抵食。

4/12/2011 19:30

上次試過好味雪花冰，今次見到我最愛嘅團購又出現。谷旁又以$18當$40消費，最後買左兩張，試唔同味道。

柯華田秋香 ($40，團購價$18)

柯華田雪花冰打得幾靚，係一片片薄片，一樣入口即溶，可惜柯華田味道唔夠濃郁，只有淡淡香味。呢款配料有一大條OK甜嘅香蕉、酸酸甜甜嘅水果味蒟蒻Q、仲有唔少花生碎。成個配搭有啲騎呢，冰底味道淡淡地，配料又甜又酸，同冰底撞到七彩，唔太夾。花生同香蕉味道比冰底更濃郁，蓋過晒主角柯華田。今次剛好$40埋單，唔洗補錢，團購價$18就算數，但試完一定唔會再試。

2/1/2012 19:30

最後一張團購現金券，當然要花喺值得花嘅地方，選擇左encore好評嘅芒果牛奶秋香。

芒果牛奶秋香 ($42，團購價$20)

今次秋香明顯又肥又矮，亦縮左少少水。好彩，牛奶味同芒果味冰底依然好味，最愛佢嘅酸酸甜甜，再加埋士多啤梨漿、爆汁豆豆、雜果蒟蒻，係一款好清新爽甜嘅配搭。可惜今次配料比例唔平均，唔好味嘅粟米片一大堆，唔洗俾咁多我喎! 我想要多啲魔豆!

食過糖百府嘅雪花冰幾次，有好有唔好。一啲本身濃郁嘅味道，變成冰後仍然濃得起，水果口味嘅酸甜仍然酸得起，糖百府亦做得出色，保留到原汁原味。朱古力魔當然最愛朱古力秋香，而招牌芒果牛奶秋香都值得一試。 

22/4/2012 18:00

相信糖百府先生做團購做上癮，又出$18當$40消費，最後買左兩張，今次玩自選口味。自選口味有十二款冰底選擇，價錢$28至$33，包一款醬同一個基本配料。自行加料$3有一款，水果的話就$6。

咖啡冰、朱古力醬、朱古力樹皮、焦糖布丁粒、咖啡凍、西瓜 ($42，團購價$20)
第一次試咖啡冰，味道都OK喎，夠咖啡味，配埋朱古力醬自製莫卡，味道都唔錯。配料揀朱古力樹皮真係好抵，份量一大堆，夠送晒成個冰。而兩款果凍粒就無乜特別，幾爽口嘅啫喱粒，味道正常。西瓜都正常清甜。

29/4/2012 20:00

生磨杏仁冰、煉奶、杏仁片、Oreo粒、小丸子、蜜紅豆、焦糖布丁粒 ($42，團購價$20)
配料勁澎湃嘅杏仁冰，都係$42。杏仁露就食得多，真係少見有杏仁冰口味，味道都唔錯。就好似冰化左嘅杏仁露，非常香甜、濃郁。加上少許煉奶調味，更加甜蜜。另外仲有落得好重手嘅Oreo碎，令成個冰嘅味道更具層次感。其他配料有小丸子配蜜紅豆都唔錯。小丸子夠煙韌，紅豆微甜，都OK，不過再腍啲相信更好。

呢間太子分店人流超少，勁淡靜，在座嘅客人都只係團購朋友。不過呢間店嘅冰底份量好似比較多，配料亦夠豐富。數數下，原來都食過唔少款唔同口味嘅雪綿冰，其實呢個品牌嘅出品都算唔錯。所以黎得呢度，都只會做食冰怪，未試過其他甜品。

雞飯看營銷

南星魚翅燕窩樓@旺角

29/4/2012 18:30

呢間南星係N年老字號，係泰國唐人街嘅名店，主打鮑魚、魚翅及燕窩等名貴材料。今次喺團購買到$33試下佢地嘅正宗泰式海南雞飯。新加坡海南雞就食得多，人地話泰國嘅海南雞仲正，一於試下。

正宗泰式海南雞飯套餐，包油菜、湯、飲品

一碟泰式去骨海南雞，望落去似乎胸肉比較多，其中幾塊脾肉就有肥有瘦。雞係連皮嘅，肉同雞皮之間無太多脂肪，呢隻雞唔太肥。肉質唔算十分嫩滑，只係脾肉稍為OK一啲，雞胸有啲嚡。雞味亦一般，調味其實都好淡口。只好沾上三款醬汁，私自提味。

三款醬汁同一般食嘅新加坡版唔同，無左杰身嘅濃甜黑醬油。取而代之，係泰式辣椒醬油。又鹹又甜，辣味刺激，食落相當惹味。另外，個人比較喜歡又酸又甜、蒜味十足、有輕微果酸味嘅醬汁，有助舒緩肉類嘅油膩感。最後一款係食雞必備嘅薑蔥油。呢三款醬汁，亦係撈飯良伴。雞南雞必配油飯，油香味可口，飯粒煙韌。但一細碗份量對男士黎講，略為不足。

此餐仲跟埋油菜，新鮮程度正常，蠔油落得絕唔手軟，抵讚。另外，餐湯係冬瓜湯，味道相當濃郁，無太多味精，冬瓜亦食得過。睇番團購網先知，原來跟餐送熱飲，完全無左件事，蝕左。不過杯熱茶的確好飲，唔係一般茶記嘅紅茶。入口甘甜，非常潤喉。

食得七七八八，疑似老闆伯伯好主動咁推銷我地，非常有誠意，所以我都盡人事，幫佢推一推。老闆話佢地總店喺泰國唐人街，當地業務非常強勁，仲有幾間酒店添。喺香港做左唔少年，多做熟客生意。前陣子店舖搬遷，希望借團購擴充客源。老闆仲逐一介紹各款食品，包括多款招牌魚翅、燕窩套餐等，價錢由百幾至三百幾一位。據講，該店喺泰國有私家燕窩島，所以食品質素有保證，老闆仲多次提議母親節帶埋媽咪黎食。

老實說，呢個海南雞飯並無任何驚喜，實在欠缺一種令人想翻轉頭嘅吸引力。不過，我明白呢碟飯並唔係佢地嘅主打。但當日所見，呢間餐廳人流超少。七點幾時份，十個客都唔夠，可以話用淡靜黎形容，實在替佢地擔心。睇見呢個情況，我倆不自覺地慨嘆，引發左一啲深思。

呢間餐廳主打魚翅、燕窩等高檔食品。唔係話香港人唔捨得洗錢，但捨得洗錢嘅香港人，相信會選擇去高級酒樓或酒店，去品嚐此等高檔野。呢間餐廳，無論喺裝修、氣氛上，都似係茶餐廳，又似燒味舖，又有一種打冷菜館嘅風味，極其量都只係一間家庭式嘅中菜館。食品同環境氣氛嘅配合，相信係唔少香港人，包括本人，對出街食飯嘅其中一個要求。

講到呢度，就不其然聯想到澳門福隆新街。呢條街都有唔少間非常出名、香港人冒名而去嘅魚翅專門店。佢地嘅店子幾乎可以用「up dup」黎形容，但仍然有佢嘅生存空間。的確，呢間南星，比起澳門果幾間，環境實在超班十倍。公道啲，按環境同價錢比例黎計，兩者其實差無幾。咁點解澳門果幾間做得咁好，而在落旺角嘅南星唔OK? 呢個就引申出另一個顧客定位嘅問題。

澳門果幾間，係香港人悉知，澳門人氣美食王之一。基本上可見嘅旅遊雜誌、澳門搵食指南，都有一頁半頁介紹。相信被介紹嘅果幾位主角，都係主打做遊客生意。所以假日一定見到人山人海，排隊係指定動作，遊客似乎就係此等小店嘅主要食糧。唔知南星有無做旅客推廣，無可否認，消費力其高、兩日洗廿萬嘅豉油行旅客，可能係此店嘅一大金源。與其只做街坊生意，不如開發下呢個商機。

南星嘅新舖位於朗豪酒店後面，人流真係超少，有walk in客係奇蹟。老實說，唔係團購，我絕對唔會行呢條街，亦唔會知呢間餐館存在。可能係我孤陋寡聞，本人搵食嘅資料來源，只限於開飯網、雜誌、朋友介紹等，實在唔認識呢間泰國老字號。老闆伯伯真係要花多啲心機喺宣傳方面，團購的確係一個好開始。

再者，南星可能欠缺一個具故事性嘅爆點。又可能係，唔識一種能夠將唔吸引講到好吸引、化腐朽為神奇嘅化妝術。南星主打高檔、矜貴食材，呢個絕對係一個既獨特又出位嘅賣點。老闆伯伯所講，喺泰國撈得好掂，又開酒店、又開餐館，或者用料上盛，私家燕窩高品質等，亦係賣點。其實佢大可以明目張膽地展示呢啲過人之處，唔需要咁謙虛地收收埋埋。得閒嘅，仲可以加番啲極勵志、超熱血，講述老闆如何打拼，創造出酒店飲食王國嘅故事，相信絕對會感動多十倍。

到最後，好嘅食品質素先係餐廳嘅最強武器。可能我地無試過佢嘅招牌菜，單係一份泰式海南雞飯，實在感覺唔到佢有一股攝人嘅吸引力，亦唔能夠推動本人，因為好味而去讚揚，再加以推介。呢方面真係無得搞，只可以自救，外人實在幫唔到手。

我倆並唔係什麼營銷嘅專業人士，以上只係倆口子得閒無野做吹吹水嘅愚見，係被老闆伯伯嘅誠意推介所感動，有感而發。借呢個議題慨嘆香港生意難做，呢個社會就係咁現實。做生意如果少左一啲包裝，定位有偏差，可以影響好深遠。事實亦證明，營銷確實係一門高深學問。

抵食、好味、經濟小西餐

意樂餐廳@青衣
27/3/2011 13:45
1/5/2011 14:20
1/7/2011 14:00
29/4/2012 13:45

多得領匯，商場要轉型，引入唔少新餐廳。屋邨難得一間餐廳，比茶記更高檔，拍得住小西餐廳。午餐係抵，下午茶仲抵，而食物質素係好嘅，幾次都能保持水準，食多幾次都唔怕。抵推!

27/3/2011 13:45

蒜香煙肉忌廉汁活蜆意大利麵
選用扁意粉，偏硬少少，如果煮多廿秒就好。忌廉汁係好香油奶忌廉味，配煙肉、洋蔥粒，仲發現到十大隻蜆仔。整碟份量唔算多，但材料充足，味道好。惟一奇怪嘅係，點解會有冬菇嘅? 如改用磨菇就正常好多。

拿破崙海鮮玄米炒飯
睇得出係用圓圓肥肥嘅日本米，用花枝、蝦仁、蟹柳、蕃茄、煙肉、青椒等材料。蕃茄味略為不足，材料亦不覺得有豐富海鮮，但炒飯係算好乾爽。整體黎講叫做OK。

1/5/2011 14:20

帆立貝海鮮龍蝦汁意大利飯
蝦汁味道超濃郁，飯煮得軟腍之餘亦入晒味，醬汁份量適中。材料更加可觀，有兩大隻青口、花枝、蝦，再配上蕃茄、雜菌類燉煮。保證係新鮮熱辣，所以等得耐少少。整體味道係好嘅，賣相吸引，可以話比得上出面嘅西餐廳。

1/7/2011 14:00

蜂蜜煙鴨胸野菌忌廉意大利飯 ($39)
上次試過龍蝦汁意飯，今次試埋個忌廉汁比較一下。因為係白白地色，所以賣相不及龍蝦汁好。煙鴨胸有蜂蜜嘅甜味，忌廉汁飯都係好濃厚。整體味道係好嘅，但冇龍蝦汁咁濃郁。

瘋狂辣肉醬芝士焗薯皇
瘋狂辣肉醬未至於辣得咁瘋狂，但係酸酸地嘅肉醬上加些少刺激感。醬汁係非常濃郁嘅蕃茄味，加埋半溶芝士味道更佳，芝士份量夠多可以做到拉絲效果，惟一係醬汁比較油膩。連皮薯皇炸得好脆，有薯味。係一款好醒胃，好惹味嘅下午茶小食。

用茶餐廳嘅價錢食到拍得住高檔西餐廳嘅質素，性價比係無庸置疑。一個包飲品嘅午市套餐，都不過$40，兼冇加一。撞岩兩點打後有下午茶時間，原來更抵食。廿零蚊一個餐，除左有小食可以揀外，仲有幾款粉麵飯，當做late lunch都不為過。難怪一到兩點就現人潮，起碼要等幾張枱先有得食。

29/4/2012 13:45

九州叉燒豬骨濃湯讚岐手打拉麵 ($34)
閒時都會黎意樂食午餐或者下午茶，今日第一次試下個日式拉麵，估唔到都OK，要記低提下自己先。首先，湯底夠豬骨味，甜甜地，的確夠濃郁、幾滑、幾忌廉咪，飲完都唔過份口渴。拉麵係讚岐手打拉麵，係直身蛋麵，質地幾煙韌，食得出唔係即食麵。四大塊叉燒質地類似豬頸肉，幾爽口，只有局部地區性實實地。味道方面都好夠味，有炭燒感覺，非常入味。配料都相當認真，有蜜糖豆、木耳絲、粟米、青蔥等。整體黎講，真係交足功課，收貨有餘。如果拉麵癮起，三十幾蚊止下痕都好，仲有野飲喎。

獨孤一味拉麵天王

麵軒@旺角

22/4/2012 20:00

呢張Q-pon擺到差不多封塵，因為係2011年11月嘅產物。不嬲都習慣將啲勁長有效期嘅團購券，放到最後一刻先用。但見呢排團購爆煲，所以急急腳拎番出黎用。到呢一刻先從見天日，亦證明左呢期嘅團購吸引力欠奉。$38食一個麵軒嘅套餐，有特級御品牛肉拉麵、避風塘香脆炸豆腐加珍珠奶茶，其實都OK抵食。但此券只限旺角一分店，因為呢間分店真係靜到喊。

御品牛肉拉麵

呢個御品牛肉拉麵試過幾次，幾台式風味，係OK的。今次做團購仲可以平平地試一個套餐，其實都OK抵。呢個牛肉係牛展，份量都幾多。每塊厚薄適中，燘得勁稔，而且入味，膠質仲好重。另外，仲有唔少件牛筋，夠腍、夠入味，唔錯。麵係自製拉麵，幾彈牙煙韌，麵粉味甜甜地，幾香口，我覺得唔錯。而湯底都好夠濃郁，係紅燒牛肉湯。配菜白蘿蔔仲吸晒啲湯汁，非常爽甜。個人幾鍾意呢個麵，起碼牛味真係夠，已且湯底夠濃。

避風塘香脆炸豆腐

套餐小食係迷你炸豆腐。豆腐係勁細粒版，不過都炸得好香脆。中間幾空虛，其實似豆卜多啲。雖然叫做避風塘，但一啲辣味都無，只係簡單拌上炸蒜粒同椒鹽，非常惹味。

珍珠奶茶

呢度嘅珍珠奶菜係冰震，所以奶茶唔會俾冰溝淡晒，仲保持冰凍。奶茶味道正常，少少茶味，少許奶味，而珍珠都好煙韌。

麵軒初出道時，都攞過唔少獎，比較深刻印象係飲食天王嘅「拉麵天王」殊榮。的確，個人覺得佢嘅台式拉麵係做得唔錯，早幾年仲係我地Hea時間嘅首選地方。可惜，近幾年以特許經營方式經營，分店越開越多，但未能有效控制食物質素，唔同分店嘅水準參差不齊。惟有最主打嘅幾款特式拉麵，例如呢個御品牛肉拉麵，都算保持到水準。至於其他產品，實在不感興趣。咁做生意，似乎唔多掂，所以轉眼間執剩幾間，真係要諗下計。

前篇參考

1/5/2011

吱喳超級痴線麵鍋

知味平靚正台式餐

生活知味@青衣
26/12/2011 14:00
27/12/2011 15:30
8/4/2012 14:30
22/4/2012 13:30

呢篇記錄，絕對值得俾十粒星做個Bookmark。難得喜歡試新野嘅本人，竟然可以一連兩日去同一間餐廳食飯，真係絕無僅有。

26/12/2011 14:00

台灣芝士雞扒肉燥飯、 蜂蜜綠茶 ($40)
兩點鐘未有下午茶，叫住個午餐頂住肚。 一塊圓轆轆嘅炸雞扒，一咬開啲芝士就湧出黎。細看之外，原來係兩塊薄薄嘅雞扒，中間夾住芝士同火腿，再裹上炸粉油炸。流心雞扒外皮炸得脆卜卜，好香口，但肉質粉粉地，唔太似雞扒。中間嘅芝士同火腿就好好味，熱辣辣嘅芝士味道勁濃，加埋火腿更加惹味。食完成塊雞扒都唔覺油膩，想一試再試。流心雞扒配肉燥飯，相當有意思。肉燥份量澎湃，舖滿晒飯面，唔會好似一啲食肆，飯就一大碗，肉燥就得一細湯匙。肉燥份量多之餘，味道亦唔錯，有麵豉、醬油嘅味道，肉碎非常入味，仲有些少冬菇、洋蔥等材料，撈飯一流。蜂蜜綠茶味道正常，如果再濃郁啲就好啦。

香酥雞柳拼炸醬拉麵、西多士、台式奶茶 ($28)
香酥雞柳一大碟，份量唔少。外層有層厚厚嘅炸漿，唔係太脆，感覺粉粉地，雞柳實實地，比較乾身，沾下酸甜醬味道就好啲。加三蚊要嘅炸醬反而超級惹味，肉醬甜甜酸酸，辣辣地，仲有蕃茄味，就算撈落湯麵度，味道仍然濃郁。所謂嘅拉麵唔似日本拉麵，似係中式油麵，質地粉粉地，仲有芽菜、青蔥等做配料，都算係咁。

食完個麵，仲有西多士做甜點。西多士雖然無花生醬餡，只係外層包左蛋漿拎去半煎炸，但麵包都算鬆軟，而店方都好客氣，大方落左唔少糖漿同牛油，更滋味。台式奶茶好明顯係開粉，但奶粉份量唔夠，味道淡淡地。

27/12/2011 15:30

鹽酥雞扒米粉、西多士、布丁奶茶 ($28)
上次食過香酥雞柳一般般，眼見附近有幾枱食客都叫雞扒配麵，不如就跟風點一客，果然唔錯。大大塊鹽酥雞扒切開幾件，雞扒外皮唔係吉烈炸皮，係好似一片薄薄又酥酥脆脆嘅炸粉，真係有鹽酥感覺。雞扒肉嫰又多汁，有微微嘅胡椒味，其實唔洗沾沙律醬已經好惹味。

布丁奶茶一大杯，杯底係奶黃色嘅雞蛋布丁，沈浸喺台式奶茶之中。凍嘅台式奶茶可能已經一早調好味，所以今次有奶味亦有茶味。但布丁有少少硬，有少許粒粒、唔夠滑，仲好似有啲黏黏地嘅蛋衣。

台式牛肉公仔麵、花生厚吐司、蜂蜜綠茶 ($27)

台式牛肉就好似醬燒牛腩，牛肉半肥瘦，燘得好腍。醬汁少少辣，有啲似五香肉丁嘅味道，但因為浸左湯，所以味道唔夠濃。

今次試另一款花生醬吐司，吐司唔算厚，勝在夠鬆，而且烤得夠乾身。花生醬又夠味，溶晒入吐司，好味道。

一份豐富嘅午餐跟埋大大杯台式飲品都不過四十蚊，係好合理價錢。到左兩點三下午茶時間，一份茶餐二十零蚊已經有交易，仲要有麵、有吐司、有野飲，實在太抵。價錢平之外，味道亦正常有餘，真係唔介意連續兩日食埋同一類型嘅套餐。

8/4/2012 14:30

俾金魚佬昆左去青衣睇廟會，點知廟會已經執左。橫掂都係果頭，就等兩點三食個下午茶。一睇餐牌，就發現有所改動，好似加左少少價，不過度度都係咁加啦，不見怪。
 
知味豬扒鮮茄米粉、朱古力厚吐司、凍朱古力 ($29)

第一次試呢款豬扒 ，塊豬扒真係又厚又大塊，幾乎佔據晒成個湯碗。所謂嘅知味似乎係醬油、胡椒嘅基本調味，味道無乜特別，不過就相當鬆軟。新餐牌無左最愛嘅炸醬，只好配上鮮茄，蕃茄真係就咁一舊舊加落去，鮮茄湯底呢個期望實在過份，不過蕃茄總算鮮甜多汁。

朱古力厚吐司真係一流，除左吐司有厚度之外，上面嘅朱古力醬都係有厚度! 吐司外脆內軟，連朱古力醬都係脆脆地，非常夠味，正。

鹽酥雞扒咖哩公仔麵、西多士、 蜂蜜綠茶 ($33)
對比番上次影果幅相，鹽酥雞扒比上次更大塊。雖然加左價，但差價加番俾客人喎，讚! 雞扒又酥又脆，超入味多汁，真係無投訴。不過值三蚊雞嘅咖哩就完全唔掂，味道淡得可憐，連公仔麵果包調味粉都不如，下次一定唔會再叫。

第三次試下午茶，雖然價錢比之前貴左少少，但味道都一樣好，相信應該都會有第四次，繼續加長呢篇野啦。

22/4/2012 13:30

是日廟會行左就行左，但原來啲熟食攤位好多都未開工，最後轉戰去翠怡食飯。樓上間大快活唔知執笠定製修，決定又去飯堂食午餐。

香酥雞扒肉燥飯、手撕雞碗仔翅 ($38)
香酥雞扒一次比一次大塊，一樣咁好味。之前食過已經好欣賞呢度嘅肉燥份量非常澎湃，麵豉味勁香濃入味，撈飯一流。不過今次嘅重點，係試埋個碗仔翅。跟餐可以選擇基本飲品或手撕雞碗仔翅。早前見到唔少人都叫一盅盅嘅類似湯品物體，應該就係呢個。一打開蓋，材料勁豐富，有冬菇片、木耳絲、雞絲同素翅等。絕對係料多過湯，基本上同碗麵無乜分別，強烈建議用筷子食比較直接，肯定比街頭賣十五蚊一碗足料十倍。足料得黎，味道都唔錯。相信下次都會揀食碗仔翅，好過飲檸茶。

精選四寶古早牛肉麵、蜂蜜綠茶 ($48)
台式古早風味牛肉麵份量都幾多，四寶係包括牛腩、肥牛、金錢肚同牛展。先講下個湯，佢話係用牛骨、牛肉熬煮十二小時嘅牛高湯，牛味都係有嘅，但可以再濃郁一啲。好彩牛腩唔韌，都幾腍滑。肥牛得少少幾片，但略為嚡口。金錢肚就超大、超多塊，幾爽口。薄薄幾片牛展味道清淡。麵底係自制手打拉麵，口感算煙韌，略帶少許粉粉，真係似手打。呢個麵材料好豐富，但所有材料都好似一樣味，其實寡寡地。同埋，一碗麵加基本飲品已經要$45，都幾貴下，似乎都係下午茶抵食。

低調高手吉列豚

豚兵衛@尖沙咀
15/4/2012 19:00

日本風捲得厲害，單係一個尖沙咀新港中心，短時間之內就開左兩間日本過江龍食店。就喺呢個商場嘅三樓，靜悄悄又開左間吉列專門店，但風頭似乎不及另外幾間人氣王。食拉麵果間，任何時候條隊都係咁長。食咖哩果間，支持者都唔少，等位閒閒地一頭半個鐘。仲有果間位處同一層鼎字派小籠包，門口永遠包住幾層人潮。團購一出，令我意識到呢間吉列小店嘅存在，只需$39就可以試試菜。

"I'm Busy!" Hello Kitty Presents
日式醬汁吉列豬扒飯、麵鼓湯、味付螺肉、蘿蔔漬物、白桃汁
團購價$39一份套餐完整呈上，滿分嘅賣相，眼神頓然Bling Bling，不自覺發出「哇!」一聲。配角麵鼓湯正常味道，正常水準。味付螺肉係現成正常貨色。對蘿蔔漬物嘅興趣不大，不過試食一口感覺良好。白桃汁略嫌冰太多，溝淡左味道本來大好嘅果汁。

大大件吉列豬扒係新鮮即炸，跟足正宗做法過三關處理。外皮係又酥、又鬆嘅麵包糠。據講特別採用大片版新鮮麵包糠，一來無咁吸油，亦較美觀。炸物最怕炸得太燶，而且油唔乾淨，有怪味。幸好師傅控油做得好，豬扒香脆可口得黎唔油膩，無一口油，係一件好清新、無怪味亦唔油膩嘅炸物，功夫認真唔錯。豬扒整體尚算鬆軟，肉汁還可以，起碼唔覺乾柴嚡口，有些少脂肪嘅位置就更加香口。肉味算可以，有甜甜嘅豬肉鮮味。加埋酸酸甜甜嘅豬扒醬，實在大滿足。

吉列豬扒必配椰菜絲，切得非常幼細，材料亦夠新鮮。夾一口爽脆清甜嘅椰菜絲，拌上炸豬扒，有效平衡熱氣感。加上據聞係由日本直送嘅秘製芝麻醬，就可以變成一道帶粒粒黃金芝麻、充滿濃郁芝麻香、酸甜開胃嘅椰菜沙律。

最後，被豬扒同椰菜絲整整覆蓋，絕不起眼嘅白飯原來都大有學問。來貨係日本頂級米，煮米程序都非常繁複，飯較為黏身，又香又軟。

四十蚊有找嘅價錢，絕對俾足一百零一分，唔介意一試再試。正價黎講，呢個套餐大約九十蚊。老實說，比起坊間吉列專門店，閒閒地百五蚊走唔甩嘅價錢，呢度實在食得過。難怪阿蘇都大讚抵食。尖沙咀呢間第二分店，店舖真係超蚊型，大約只有二十個位。雖然舖仔細細，裝修都幾和式，服務亦都幾和式，感覺唔錯。不過，呢間蚊舖好明顯生意淡靜，七點幾黃金時間，只得三幾枱客仔，明顯地，風頭已經被附近幾間名牌食肆搶晒。

好野不妨再講多兩句推銷下。呢間豚兵衛由日本人創辦，目標打造一間既經濟又實惠嘅吉列專門店。由來貨到製作都不比貴價名牌店差，純粹走薄利多銷、益街坊策略。荷包脹想食好啲嘅，仲可以選擇日本幸福麥豚同白金豚。睇過日本節目，知道幸福麥豚真係好幸福。除左有好野食，每日仲有專人按摩。所以豬幸福、食客亦好幸福。幸福麥豚吉列豬扒單品就要二百多蚊，團購價$168就有交易，不過本人就唔捨得食。但試過普通版，已經覺得好滿足。如果試埋幸福版，相信會飛天。

認真mood講，呢間真係值得一試，質素唔差。感覺上，可以用名牌吉列專門店嘅七折價錢，食到同等質素嘅美食，只係呢度無得俾你自磨芝麻醬而已。

憤怒貓的另類情調

小樽居酒屋@土瓜灣

15/4/2012 13:15 

周不時都會黎土瓜灣，呢區附近嘅午餐團購一定用得著。蜂買$28一份和風午市套餐，包日式沙津同麵豉湯，試下無妨。午餐選擇都幾多，有成十一個配搭。最後揀左最正路、最普通嘅食品，一定唔會中伏，仲可以優惠價，加配其他小食。

"I'm Angry!" Hello Kitty Presents

日式沙律

日乜鬼式呀? 日式菜? 日式沙律汁? 定日式碟呢? 雜草一碟而已。

三文魚手卷 ($5)

另加嘅小食，五蚊雞真係唔可以要求咁多，佢真係俾番五蚊嘅質素你。紫菜係霉嘅，腍到企唔穩，連三文魚都唔太新鮮。

麵豉湯

明顯地開粉都算，味道係OK嘅，起碼有麵豉味，但豆腐微酸，果種酸似係變壞左嘅酸。

咖哩吉列豬扒飯

份量非常多，豬扒係新鮮即炸，未掂到咖哩汁嘅地方都係脆脆地嘅。但粉漿實在太厚，一口粉，肉就好薄，應該係現成買番黎嘅冷藏吉列豬扒。咖哩汁偏深色，味道係有嘅，但好有芡汁Feel，係咖哩芡汁加粒粒咖哩粉，呢個情況，應該係用咖哩磚開水造成。

日式牛肉烏冬

牛肉非常多，足足五大片，舖滿晒成個大碗之上。牛肉比較厚身，雖然仲有粉粉紅色，但入口相當嚡、韌。烏冬就唔錯，味道甜甜地，唔太粉口，都有啲彈牙感。湯底係醬油湯底，甜甜地，非常清。不過最大問題係啲粟米都好似壞壞地，又有酸酸地嘅味道。

老實講，喺呢個燒鵝脾飯都要七十蚊碗嘅時世，$28一個餐唔可以要求咁多。的確食得飽肚，味道麻麻唔緊要，但都無理由俾人嘅感覺係唔新鮮，壞壞地架?! 更搞笑嘅係，團購話佢嘅賣點係設戶外座位，休閒氣氛爆燈。但呢間小店位於大街嘅後巷之中，後巷係充滿住垃圾、水渠等等，氣氛真係一流。坐喺餐廳外嘅戶外座位，空氣中傳來嘅，並唔係令人流口水嘅焦香燒烤味，而係香噴噴嘅天拿水味，真係另類格調。我先無咁醒坐外面，不過室內成日開門關門，都有少許味道飄左入黎。Hello Kitty講得岩，真係I'm Angry!

深圳復活一天遊，大滿腹鐵板燒

大漁鐵板燒@深圳福田

9/4/2012 18:30
6/5/2012 17:30

行完書城，去左福田口岸商場，諗住去食太和鐵板燒，點知全個商場嘅舖頭都執晒笠。只好轉軚去番福民站嘅大漁。呢間鐵板燒深受香港人歡迎，上次試過一次都可以，試多次都無壞。六點半時份，餐廳五成滿，相信大部份都係香港人。價錢比上次略為貴左少少，兩個鐘任飲任食，每位RMB$168。

由於時間尚早，位置都幾鬆動，可以坐喺向窗嘅鐵板枱，親眼睇住師傅表演。而且同枱只有一對夫婦，人少少，可以好快有得食。七點鐘後人流越來越多，獨佔師傅嘅時間越來越少，所以想食好野，真係要趁早。

1. 刺身有五、六款選擇。三文魚、帆立貝、八爪魚、吞拿魚新鮮程度可以接受，味道正常。

2. 呢款蒲燒鰻魚唔係該枱師傅主理，唔知係邊度遊左過黎，相信都係即場燒烤，味道十分之好，鰻魚夠厚身，燒汁好香甜，而且非常入味，一啲都唔腥，難怪係網友熱點菜色。

3. 串燒羔羊肉孜然粉味道好夠，羊肉夠膻香。

4. 法式羊扒係網友推介食品。師傅手藝高超，剛好燒得七成熟，外皮脆脆地，非常香口熱辣。肉質肥瘦適中，非常腍滑，肉味濃郁。配料都係勁蒜、勁蔥、勁牛油，正。

5. 牛舌夠厚身，入口爽脆。試過幾款唔同口味嘅牛舌，似乎紅酒燒牛吞比較惹味，但紅酒味可以再濃一點。清清地可以選擇鹽燒都唔錯。

6. 乾煎鱈魚只用胡椒調味，最後加左類似美極嘅醬汁。魚都係雪藏貨色，但味道都OK。

7. 多春魚最緊要煎得香脆，呢個要求已經達到。

8. 扇貝最緊要多蒜、多蔥、多牛油，所以做鐵板燒就最岩。扇貝肉都好新鮮，夠甜。

9. 胡椒鳳尾蝦係開邊煎熟，只用黑胡椒調味。不過蝦好似唔太新鮮，比較腍身，仲好痴殼。

10. 呢味魷魚鬚真係值得推介，魷魚非常煙韌彈牙，而且好夠鑊氣，非常入味。

11. 半生熟牛肉配酸咪咪嘅類似喼汁物體，但我唔識欣賞。

12. 鵝肝蟹子沙律，本人對鵝肝無興趣，但蟹子沙律就唔錯，沙律汁幾好味。

13. 美式帶骨牛小排其實就好似牛仔骨，味道都係咁，但勝在唔韌。

14. 估唔到松阪豬頸肉原來咁好味，肉味好甜，肉質爽口，用黑胡椒吊味已經好正。

15. 美式奧爾良烤雞翅味道少甜偏辣、肉比較實而且乾身，一般啦。

16. 金牌牛排都係呢度嘅招牌，份量超慷慨。一大塊牛排煎好後，再切成一口大小嘅牛肉粒，肉質OK，七成熟，唔鞋口，洋蔥加胡椒味道好夾。不過份量略為過多，兩人份同四人份一樣咁多，個人覺得任食的話，量多唔係好事。

17. 其實本來係想叫一隻連殼嘅蒸蛋，點知搵極都搵唔到圖畫落單。不過呢個茶碗蒸，蛋都蒸得好滑，又有蝦、冬菇、雞肉等食材，味道都OK。

18. 煎香蕉唔知當唔當佢做甜品好，因為香蕉煎得脆脆地，仲有少許焦糖嘅感覺，但食食下就有咸味出現。

19. 芥末汁鳳尾蝦比前一款蝦好，上面加左唔少蜜糖芥末，更加惹味，可惜蝦都係麻麻新鮮。

20. 之後仲叫過牛肉露筍卷，牛肉OK腍，餡都OK。

21. 炒生菜炒得夠腍，蒜味夠，不過又係一大碟，多到食唔晒。

22. 任飲項目，有多款果汁、茶啡、酒類等，橙汁就好正常唔錯，不過其他飲品就一般。

23. 甜品方面就比較少，紅豆雪糕幾好味，紅豆大大粒唔錯。

RMB$168一位兩小時任飲任食，唔洗再加一小費，計番港幣大約二百蚊埋單。鐵板燒其實食多會膩，因為來來去去都係牛油、蒜、蔥嘅調味。最在乎師傅控制火候嘅功力，蘇花呢位師傅係奧奇的，起碼絕少出現過熟情況。店員基本上都識廣東話，所以落單相當方便，漏單情況唔嚴重。不過落單都要講技巧，因為識落單同唔識落單係會有好明顯分別。

話說當日七點多鐘，有一行四個估計都係八十後嘅年輕人黎到，坐喺同枱最後果四個位。師傅一直不停手咁整緊好多食物，當中嘅一部份係我地嘅，另一部份係果對夫婦嘅，最後一部份可能係幫隔離枱整嘅。當我地享用緊美食嘅時候，新黎嘅四人組，有得睇，無得食。呢個情況重複左四、五次之後，佢地嘅目光開始變得銳利，充滿住殺氣咁仇視、怒啤我地，仲好明顯地講緊是是非非。

造成呢個咁明顯嘅落差，其實係有跡可尋，亦絕對可以避免。

1. 早黎早上岸

需知道客人叫到侍應落單後，廚房都需要拾碼，傳菜出黎俾該枱師傅，再由師傅逐一處理。由你落單到見到啲生肉，呢個時差大約十分鐘，仲未計你要睇埋師傅表演由生變熟嘅魔法。咁就可以解釋得到，點解頭二十分鐘，四位八十後朋友只係有得睇，無得食。因為擺喺佢地眼前嘅生肉，係其他人二十分鐘前已經落左嘅單。

2. 柯打要進取

餐廳Default客人所講嘅「呢樣」同「果樣」，份數係會乘以人頭數量。如果你一行兩人，叫「呢樣羊扒」，佢會俾你地每人一件，總數等於二。按呢個方式點菜，如果你每次叫一款、兩款的話，我相信食到聽朝都食唔飽。所以柯打要進取一點，反正落多、落少都係一樣價錢，只怕你食唔晒。我地多數一次過落五款食物，食得七七八八後，又再落新單，所以Keep住密密有得食。再者，人開始多，侍應們都太忙，把握得到侍應幫你落單的話，就要珍惜機會講多啲，以防有日，揮左十次手都無人理。

只見四位朋友，用「自己叫自己果份」嘅策略，每款食物嘅總份量由四變成一，就算我地唔在場，當然只得一個人有得食，其他三個齋睇。而且一般鐵板師傅都會將同類型食物一次過處理，以便控制同減少清潔鐵板次數。如果每樣只叫一件，師傅當然會集齊多一啲，等齊數先處理，等候時間就相對較長。

3. 把握時間

人人都知道，任飲任食得兩個鐘。鐵板燒係需要時間處理，其實可以把握空檔時間，點一啲唔需要鐵板都處理得到嘅食品，例如刺身、沙律、甜品等。即使鐵板未輪到你，都可以一邊嘆住刺身，一邊等，起碼唔會覺得苦悶或難過。你估我地真係無冷場咩? 我答你一樣有，只不過一到冷場時間，我地就會叫刺身慢慢食，充實番啲時間。與其有時間去怒啤人或者講是非，不如揮多幾次手叫侍應幫你跟跟單。

4. 注意禮儀

作為餐廳，相信都係用最公平、先到先得嘅原則去招呼客人，真正跟單做野。如果朋友們唔識遊戲規則，不單只埋怨齋睇無得食，更認為師傅偏心我地嘅，都無說話好講。OK，如果真係的話，咁又要諗下，點解師傅無論係真心，定係不自覺地又好，做出佢地所謂「偏心」的行為。

人始終係有感情嘅動物，師傅作為服務提供者，客人一句唔該，一句稱讚，一面真心覺得好味、欣賞嘅表情，其實佢地一定睇到。客人嘅欣賞都係佢地工作嘅推動力，佢開心，自然更樂意去服務你。客人應有嘅禮貌，可以換取應有嘅服務，都係互相尊重嘅表現。如果客人多是多非，投訴的投訴，師傅們睬你都唔係真心架啦。

先自聲明，我地(相信旁邊對夫婦都係)無俾任何貼士，師傅亦都無義務只係招呼我地，更何況個人覺得佢並無偏心成份。惟一有可能嘅，就係我地都好期待師傅嘅每一樣作品，亦會好用心慢慢品嚐。又可能，我影左唔少相，個師傅以為我係記者囉。咁你地都可以影架!

大約八點半鐘，食飽飽起身走人。就喺起身嘅一秒間，雙方各自笑一笑。我地感受到，四位朋友邪惡嘅笑容之下，潛台詞應該離不開「你地早走是著啦，我地終於都可以慢慢嘆」。咁在下都惟有恭喜幾位守得雲開，終於都可以獨霸師傅啦。參考過去一小時四位嘅進度，估計在坐嘅幾位男士，飽腹程度未夠一成。但最神奇嘅係，我地停手投降後，師傅係得閒到可以行開鐵板枱同人傾計，相信四位朋友真係仲未捨得正式落單。大家都係八十後嘅朋友，其實我地嘅笑容背後，隱藏住一個由心而發嘅忠告，希望佢地知道「時間剩餘最後四十五分鐘!」

後記
6/5/2012 17:30

上次食過翻尋味，諗住再食多次，點知福民店裝修裝到七月，最後轉戰會展中心分店，不過好明顯呢間分店差十萬倍。

1. 環境雖然較高檔，但一入到餐廳一陣異味，最後迫住坐喺近門口張枱，冷氣極不足。
2. 每枱人數十位，比福民店嘅八位多，所以師傅更加忙。
3. 職員明顯比較懶散，落左單十五分鐘，師傅仲未現身。職員得閒到四圍遊傾計，最積極就係收起你本Menu，等你無得叫野。
4. 食物、飲品、甜品質素較差，無上次咁新鮮，刺身每份都係細細件，色水麻麻。
5. 師傅烹調技術一般，多次出現燒燶、過份熟、過份唔熟、調味過份重手、調味過份輕手等問題，水準極唔穩定。

無可否認，呢間店都有可取之處
1. 每位多送兩款醬料，一款黑椒汁，另一款芝麻醬，味道都ok。
2. 漏單情況唔嚴重，出菜速度可以接受。
3. 劃一用餐時段，第一場17:30至20:00，下場20:00至22:30，保證夠時間。但其實到咁上下，佢都會催你交枱，絕對食唔到兩個半鐘。

最後，就算無得揀，都唔會再去會展中心分店，寧願唔食，係咁多。

深圳復活一天遊，拜見不倒冰雪皇后

Dairy Queen@深圳
9/4/201215:45

Dairy Queen，憑住一杯可以反轉再反轉嘅軟雪糕馳名。呢個N十年美國老字號品牌咁出名，香港竟然仲未有，只好去深圳時順便試埋。呢間分店位於少年宮書城樓下，相當方便。

焦糖布蕾暴風雪 (RMB $25)
「倒杯如灑，此杯免費」係此名嘅質素保證。標榜新鮮即製，空氣含量極低，雪糕整好之後，店員會喺你面前表現雪糕反轉再反轉，維持最少三秒，以證明雪糕仍然處於凝固狀態。軟雪糕同其他配料用機器高速攪勻，確保每一啖嘅味道都係一樣。其製作方法亦深得老麥明模仿暗抄襲，成為今日嘅麥旋風。

正牌嘅旋風軟雪糕質感更加幼滑杰身，黏性更高，比一般軟雪糕結實，但比固體雪糕幼滑軟腍。入口係勁濃郁嘅奶味，香味十足。此杯係焦糖布蕾，間中有粒粒脆脆嘅焦糖碎，軟中帶脆，口感非常豐富。不過唔知係唔係來佬野嘅原故，味道偏甜，焦糖食得多仲有少許涸喉感，不過姚生就好受落。

一杯軟雪糕要成三十蚊港幣，睇落真係好貴。如果硬要同7仔兩蚊半一個筒黎比，一定無得比，咁人地哈根大師都要三十幾蚊一個球，又點計? DQ以品牌同兼覓取勝，淨係脂肪含量勁低已經開心萬倍，而雪糕質地又好十倍，味道又加啲分，其實三十蚊咁大杯(拍得住7仔自由斟個杯)，的確OK，可以接受，更何況佢唔只係大師咁簡單，更係皇后。

深圳復活一天遊，動物園睇貓仔

深圳野生動物園 @深圳

9/4/2012 11:00 

是次深圳遊緣起，係谷旁推銷所致。$78包深圳野生動物園加海洋天地套票，見平平地、又未去過，就不如趁呢幾日復活節假期上深圳遊一遊，順便擦餐勁。食過牡丹樓早餐，出發前往深圳野生動物園。由福民站出發，搭龍華線去到深圳北站，再轉環中線至大學城站。喺大學城站搭RMB$15的士就到動物園，全程大約四十五分鐘，都OK方便。

喺動物園正門口就落左車，經過一條勁長勁闊嘅迎賓大道就去到動物園入口。

團購嘅朋友，先去入口旁邊嘅遊客服務中心，換領正式入場券，仲有飲品同遊覽車優惠券。
"I'm Sleepy!" Hello Kitty

入園後，跟住地圖行一個圈。地方都OK大，比想像中企理。可能內地唔係假期，所以遊人非常少，行得都幾舒服。不過睇落來來去去都係果啲，俾人困住，無乜生氣，臭臭地嘅陸地生物同雀鳥。

中午十二點，睇左個群虎群獅表演，有十隻、八隻東北虎、華南虎、獅子，俾馴獸師點黎點去，啲獅虎就好似貓仔咁，走黎走去，跳黎跳去，都OK得意。

"Wearing a Cap" Hello Kitty Presents 海洋天地
團購套票包埋「海洋天地」入場券，唔好以為好多野睇，入面只有兩個大魚缸，同一個海洋劇場。

海洋劇場有高台跳水、海豚遊黎遊去、海獅頂下波仔等等。陣容一定唔夠香港個港狗公園咁勁，不過睇下無妨。老老實實，如果自己買票好似要另加幾廿蚊，似乎唔太抵，團購包埋就梗係要睇埋先走。

"Wearing a Cap" Hello Kitty Presents 猛獸谷

全個動物園最好睇嘅，應該就係呢個猛獸谷。咁岩一去到呢個虎跳峽，就睇到跳跳虎。樓上有工作人員吊起啲肉黎吸引老虎，咁啲老虎就要飛身跳高咬住舊肉，最後跌埋落水。睇就幾好睇，不過啲老虎下下嘭埋落塊玻璃度，睇到都痛。

猛獸谷裡面嘅猛獸係散養的，觀眾們喺上面嘅觀賞天橋望落去。猛獸多就多，不過好多都訓死左。最得意就係，遊客可以自費RMB$50一位，乘搭鐵箱車俾啲獅子老虎觀賞。工作人員會不停用食物黎引啲猛獸撲上架車度，車入面嘅人類就V哇鬼叫，喺天橋樓上嘅觀眾就覺得幾好睇。

呢個深圳野生動物園，係國家AAAA級精品景區。睇環境應該開左好一段時間，有一定程度嘅老舊同簡陋，不過都尚算乾淨企理。我地快行一圈，睇左兩個劇場，大約用左兩個半鐘。其實下午三點仲有一場「百獸盛會」大型表演，不過時間所限，放棄左。如果有時間的話，相信都值得一睇。總括黎講，如果呢個園嘅入場費要成百幾蚊的話，就真係貴得可怕，團購價七十幾蚊去行下就算，話晒台北果個木柵動物園，行足一個上午，入場費都只係四十蚊台幣，差太遠啦。