太古美食廣場

美食廣場@太古
15/3/2016 14:00
6/3/2016 13:00

Food Republic 15/3/2016 14:00

@Pepper Lunch

@番滿門

香酥雞扒炒蛋意大利麵
估唔到番滿門會進駐美食廣場。今次揀微辣湯底更加惹味，炒蛋一貫好味。雞扒炸得香脆，唔油膩，仲有泰式辣醬，好味。

Apita  6/3/2016 13:00

@ 神戶北之板

咖哩漢堡飯

跟粟米忌廉湯、沙律。漢堡幾鬆軟多汁，咖哩係典型日式備甜咖哩。

@ 橫濱麵大將

味噌湯拉麵加蛋配迷你叉燒飯定食 $60
湯底夠濃味，拉麵係普通貨色，叉燒幾夠腍。叉燒飯可以，但醬汁唔夠。

新世紀美食廣場@旺角

新世紀美食廣場@旺角
24/2/2016 18:00
15/9/2013 12:00

24/2/2016 18:00
@泰國

泰式豬頸肉炒米粉 ($49)

幾夠鑊氣，乾身，足料，豬頸肉夠多，好多椰菜、芥蘭，蝦乾味重。

15/9/2013 12:00

@一本日式蛋包飯

雙層芝士漢堡蛋包飯 ($58)

@星洲

星洲炸醬麵 ($36)

環遊世界料理廣場

大食代@鑽石山
15/1/2016 13:00
3/2/2014  12:30
29/1/2012 13:30
26/12/2012 20:30

15/1/2016 13:00

喺鑽石山睇完得啖笑嘅早場特別肚餓，要立即醫下肚，午飯時間見邊度都人山人海，轉戰Food Court，快快脆搞掂。

@九里香
29/1/2012 13:30

鹽酥雞扒、肉燥竹筒飯、蚵仔煎、中式湯 ($40)
午餐睇落都幾豐富，鹽酥雞扒用鐵板上菜，但其實用作不大，雞扒又無配任何醬汁，「咋」一聲欠奉，乾脆用碟上其實問題不大。鹽酥雞扒外皮炸得幾脆口，可惜肉唔夠嫰，又無乜肉汁，味道亦唔夠香，好一般。蚵仔煎更加可惡，蚵仔煎竟然一粒蚵仔都搵唔到，只係簡單嘅香蔥煎蛋餅，被呃了。肉燥竹筒飯個竹筒亦係無聊之作，飯唔見得係用竹筒蒸，飯面嘅肉燥只係芡汁為主，肉碎少得可憐。真係難忘早前食過青衣一間台式小店，肉燥足料又好味，多到撈飯都撈唔晒。美食廣場呢間台式店，盛裝賣相好台式，但味道完全唔到位，四十蚊俾多左。

@韓國屋
29/1/2012 13:30

韓式泡菜豬肉炒粉絲、紫菜肉片湯 ($35)
美食廣場內每個檔口前都擺滿左食物模型，呢間韓國屋嘅料理賣相算係最唔錯。套餐附送一碗紫菜肉片湯，飲一啖已覺得係胡椒味道濃，少辣嘅味精湯，有幾片昆布紫菜，仲有嚡嚡地嘅豬肉片，用黎濕下口都可以嘅。

韓式泡菜豬肉炒粉絲份量超多，但並唔係新鮮即整，落單之後，阿姐裝起預先炒好嘅粉絲，再舖上足量嘅泡菜同豬肉就搞掂，所以等餐時間只需一分鐘，還好粉絲入口仲係溫暖嘅。韓國粉絲比我地所認識嘅粉絲粗身好多，入口非常煙韌，仲有些少黏口。呢款粉絲只用蘿蔔絲同青蔥等伴炒，炒得夠乾身，唔太油膩，而且調味好足夠，係甜甜地嘅醬油味道，其實唔加其他材料淨食都可以接受，加左泡菜同豬肉，當然更加惹味。大大塊豬肉片肉質比較實，幸好泡菜味道好濃，醃得夠入味，少酸中甜多辣，份量又夠多，連埋泡菜汁已經可以撈晒成碟粉絲，辛辣惹味，非常飽肚，真係大件夾抵食。呢間小店嘅韓式料理都算係咁，菜式選擇多，價錢合理，味道都唔錯，算係可以Book mark嘅平價韓國快餐。

一個美食廣場，有十幾個檔口，但並唔係個個檔口都賣美食。不過勝在喺同一個地方，收納左多個國家嘅料理，一行四個人已經可以叫到四款唔同口味嘅美食。情願又好，唔情願也罷，都可以互相分享，岩晒貪心人士。

@Pepper Lunch
26/11/2012 20:30

芝士黑椒牛肉飯 ($42)
牛肉香，芝士濃，香噴噴熱辣辣，的確好味。

@Pepper Lunch
3/2/2014  12:30

前篇參考
6/11/2011 韓國屋@旺角
食韓國飯要識撈

紀文@沙田一田百貨

紀文@沙田一田百貨
3/10/2013 19:00

朗豪坊美食廣場@旺角

朗豪坊美食廣場@旺角
2/6/2013 12:30

@小台北


@Pepper Lunch

一田百貨美食廣場@沙田

一田百貨美食廣場@沙田
12/5/2013 19:00

深水埗美食廣場拉麵

美食廣場@深水埗

17/3/2013 18:00

@博多拉麵

豬骨濃湯叉燒拉麵 ($65)
湯底濃香超膠口，拉麵幾幼滑，叉燒一般

@火之鳥

極上雞叉燒白湯拉麵 ($65)

Ramen Champion@佐敦

Ramen Champion@佐敦

6/1/2013 19:30

佐敦開左個拉麵主題嘅Food Court，實在太吸引。在場有六間日本拉麵過江龍，事前要先了解下每間拉麵店嘅特別同評語，以免到時出現選擇困難症。

無双﹕ 湯底清甜，湯頭也不算厚。拉麵粗身掛湯力強。叉燒厚切肉質鬆化柔軟，半熟蛋ok。

超男﹕ 豬骨湯香濃，配以大量蒜泥。特粗的麵條，配厚切日式叉燒，加勁量芽菜。

博多一幸舍﹕ 日本出名、2011年Ramen Champion冠軍。湯底膠質重，香濃不油。博多幼身白麵，叉燒薄切，份量較少。

東京忍者﹕ 白色湯頭，質感厚重而且油份頗重，豬骨味一般。叉燒肉味香濃但肥肉偏多。

常勝軒﹕ 沾麵始祖。

北海道毘沙門零﹕ 主打北海道味噌湯底。

做完資料搜集，最後選擇左「無双」同「超男」。入場時一人有一張智能卡，先去拉麵舖落單，再拎番個call機走，等食。

無双特製拉麵 ($88)

湯頭係雞骨加豚骨混合熬製嘅，所以較純豬骨湯清爽，較薄弱。不過豬骨味係有的，再多一點雞嘅鮮甜，可惜滿佈油脂粒，睇見怕怕。麵條略粗，煙韌度不算，掛湯力則一般。叉燒賣相不錯，不過略為乾身，入口的確有點鞋口，肉味偏淡，麻麻地。流心蛋賣相唔合格，好彩蛋白仍然柔軟，味道有的，但略咸，蛋黃過熟，個人唔鍾意。配料加上芽菜，再灑上黑椒，爽口清新，一般啦。

豬骨濃湯半熟蛋拉麵 ($98)

份量超多，男子漢之選。湯底較為清甜，豬骨味略嫌不足，自動加蒜，加點香辣就更好。麵條超粗，扁身偏硬，咬起來真係好累，而且飽濟。叉燒係厚切版，似港式叉燒，肉感十足。邊位燒過，帶點焦香。不過比較乾身，味道一般。半熟蛋外皮夠色水，可惜唔夠入味，溏心度正常。芽菜勁量，超級飽。

總括黎講，兩間店嘅質素一般。比起坊間嘅過江龍，水準確實有一段距離。以呢個價位黎講，真心覺得貴夾唔抵。如果有呢個筆直，我寧願食豚王。個人黎講，應該唔會encore。

鑽石山驚現馬來過江猛龍

姊妹@鑽石山

25/3/2012 13:30

身處喺鑽石山美食廣場嘅姊妹，簡單名字嘅背後，原來大有來頭。從頭條日報得知，呢間姊妹係馬來西亞過江龍，係當地一間極之出名、開到成行成市嘅食店，主打正宗星馬菜式，而鑽石山呢間更加係佢嘅第一間海外分店。

特色蛋春卷 ($30)

呢兩卷野正名係薄餅 (Popiah)，係此店嘅成名之作，聽講喺馬來西亞日賣六百份。煎得超薄嘅蛋皮，包住沙葛、青瓜、蘿蔔絲、花生碎同脆卜卜嘅炸粉等，材料好豐富。食落蔬菜料非常清爽鮮甜，加左甜甜地嘅特製醬汁，感覺更加濕潤可口。連一向討厭青瓜嘅本人，都願意咬晒所有青瓜絲。花生粒更加係重點所在，係脆度同香味嘅來源。雖然材料係全素菜，但配搭得宜，食極唔厭，十級推薦。

炸芝士春卷 ($25)

新聞紙另一推介美食，係炸芝士春卷。原來芝士並唔係包喺春卷裡面，而係放喺春卷表面。春卷炸得非常乾脆，可惜春卷皮太大塊，捲得太多層，餡料少到無影，隱約食得到有肉鬆等材料。上面嘅芝士無經過再烤焗，只係靠春卷嘅熱力自然溶化，芝士軟軟地，輕微痴牙，味道勁香，彌補到春卷嘅不足。

椰漿飯配炸雞件 ($38)

一睇呢碟飯已經覺得交足功課，首先有齊三種醬汁，未食已經俾足分，而且飯仲跟埋唔少配料，好似炸魚乾、花生同白烚蛋等，係坊間少見嘅誠意。炸雞本身其實麻麻地，炸得非常乾身，肉汁略嫌欠奉，質地偏乾柴，但外皮一陣濃香薑味都相當吸引。而椰漿飯的確無敵，入口非常香甜，椰香充斥喺口腔之中，回味無窮，食多幾啖都唔覺膩。嗜辣嘅朋友仲可以加埋特製醬汁，極度惹味，但個人實在受唔起果種又麻又辣嘅刺激，只好選擇海南三醬。黑醬油夠杰身，集甜、濃、香於一醬，另加酸辣汁同薑蓉，撈飯實在正斗。

過江龍黎香港做生意，老闆堅持選用馬來西亞當地嘅食材同正宗製作方法，確保原汁原味。的確，食到嘅係本地少接觸到嘅風味。個人覺得材料嘅配搭實在少見，特別係果卷野。呢個經驗令我改觀，一向都覺得所謂嘅美食廣場只係一個容納幾間垃圾食物嘅大排檔。但係，喺租金高企、連鎖霸權嘅時勢之下，美食廣場可能真係一個美食嘅立腳點。

酥記豬扒。賣麵不賣飲

東記上海麵@大埔
24/2/2012 13:00
2/3/2012 13:00

24/2/2012 13:00

生活喺大埔，係一件好值得高興嘅事，因為左右附近都有出名好食嘅餐廳。就近嘅大埔新街市熟食市場，已經有好幾間有能力吸引區外人士特登黎搵食嘅人氣名店。其中一間係專做豬扒、雞翼上海麵嘅小店。

豬扒拼菜肉雲吞幼麵 ($25)
此店菜單少到可以隨時背出黎，獨沽兩味，一係豬扒，一係雞翼。$25雙拼粉麵任選豬扒或雞翼，加配炸菜肉絲、雪菜肉絲、竹筍肉絲、牛丸、牛筋、牛腩、炸醬或者菜肉雲吞。亦都可以要淨豬扒、或淨雞翼，再唔係就豬扒拼雞翼，以上就係全個餐牌。

酥炸豬扒永遠都係隨後送到，因為係新鮮即炸。豬扒有肉有骨，大大塊，任何時候黎食都一定係酥脆到爆。外皮炸粉薄薄地，最欣賞佢炸得乾身，香口唔油膩。脆皮之下就係軟腍腍嘅啖啖肉，肥瘦適中，脂肪位更加嫩滑多汁。豬扒除左有甜甜嘅肉味外，仲加左唔少調味料，味道濃郁入味，蒜味特別香，惹味程度拍得住某大大雞扒。不過超級酥脆嘅代價，就係頂級熱氣，食到咁上下，惟有要浸下湯解熱，再唔係就即刻飲涼茶。

題外話，之前試過炸雞翼都唔錯，一樣新鮮熱辣，勁juicy夠味，不過個人都係偏愛炸豬扒多一點。

老實講，黎呢度食，真係志在豬扒或雞翼呢兩位主角，其他配料都係用黎送下麵。不過幾款材料之中，菜肉雲吞都有唔少支持者。一碗有四粒，雲吞皮夠薄，有菜、有肉，內餡粉粉腍腍，調味適中。而幼麵都幾彈牙煙韌，仲係咁易有多條菜，廿幾蚊碗真係抵食。

熟食市場有兩間都係靠豬扒、雞翼麵打響名堂嘅食肆，據講係出自同一世家，只不過係兄弟分開做。兩家都試過，感覺上都係呢間東記略勝一籌。只不過有時人太多，或者東記唔憂做放大假，都可以去對面嘅世記止下痕。

值得留意，此店只賣麵，不賣飲。勁熱氣要飲野的話，隔離舖仔會主動兜搭，一杯大約十零蚊，感覺上唔太抵，我會選擇落7仔買好過。同埋，要知道此店嘅潛規則，當食物到齊後，要即時俾錢，以防走數。

後記
2/3/2012 13:00

今日又黎幫襯，要試多次個雞翼做番個記錄。

 

雞翼拼菜肉雲吞幼麵 ($25)
東記另一個招牌就係酥炸雞翼。一份有四大隻，的確，隻隻都係非常大隻，絕對唔係雞仔。雞翼同豬扒一樣，外皮超脆，薄皮之下係啖啖肉。雞翼剛好熟透，肉質非常嫰滑，醃得入味，雞汁不停滴出。呢款雞翼無豬扒咁熱氣，食多幾隻都唔怕，真係試得過。

食韓國飯要識撈

韓國屋@旺角
6/11/2011 13:30

$19一個套餐，喺而家呢個時代似乎無乜可能。但團購，集合左五千人嘅力量，化不可能為可能。$19可以喺幾個商場美食廣場嘅韓國屋，買到一份韓國傳統石頭雜錦飯，仲跟埋餐飲。

韓國傳統石頭雜錦飯，跟湯/汽水/熱柚子茶 (原價﹕$42，團購價﹕$19)

石頭雜錦飯有牛肉片、菠菜、紅蘿蔔、泡菜、大豆芽菜、紫菜，仲有隻蛋。材料都算幾豐富，雜錦飯都係以蔬菜為主，牛肉片都係得少少幾片，而且因為鍋超熱，牛肉不斷加熱，不斷由鞋變得更鞋。幾款蔬菜材料真係無乜特別，惟獨幾鍾意泡菜嘅味道，酸辣味適中，亦非常爽口，可惜份量太少。而隻蛋亦起左點綴作用，但可惜蛋太熟，蛋黃唔流，無野好玩。

老實講，蔬菜味道比較清淡，而且跟白飯，絕對講唔上惹味。食石頭飯最緊要撈得勻，味道清淡的話，可以自行添加韓式甜辣醬或豉油等，自行調較喜歡嘅味道。經過熱鍋加熱後，就可以撈出更香、更滋味嘅石頭飯。

石頭飯另一個特色，係可以煮出飯焦。學習煲仔飯嘅食法，加少許豉油再焗一焗佢，就可以品嚐到豉油汁鍋巴，又香又脆。但最怕飯焦痴牙，非常不爽。

石頭雜錦飯每一啖包含各式材料，仲有熱辣辣嘅醬汁撈飯，的確係秋冬補暖之品。
跟餐所謂嘅熱柚子茶，只係熱水加柚子皮，完全無味。石頭雜錦飯唔覺得特別好食，只係韓式甜辣醬味道算唔錯。 每樣材料其實無乜特別，惟有要識撈。

$19一個套餐，無特別過人之處，係平囉。