用九百秒品嚐神之炒蛋

澳洲牛奶公司@佐敦

22/8/2012 11:45

截至現時為止，喺開飯網擁有一千三百五十個好評嘅澳洲牛奶公司，可算係神級茶記。無論名氣、人龍、食物、速度都達神級程度。神在於人係絕對估唔到、諗唔明。今日終於有機會一試神之炒蛋。

早餐 ($26)

十二點前幫襯仍屬早餐環節，早餐嘆個牛油方飽、炒蛋、火腿通粉加飲品，廿六蚊埋單。熱杏霜飲落順口，有杏仁味，中規中矩，始終唔夠意樂咁好飲。至於奶茶就唔錯，茶味同奶味都夠濃郁，早餐提醒之選。

火腿通粉可以話比普通茶記出品更普通。湯係略咸嘅味精湯，通粉並無講究用坑通，只係普通不過嘅快熟通粉，而且煮得過腍，臨近變一pat粉嘅邊緣，不過火腿味道就幾香。牛油方飽烘得夠，中間嘅牛油落得重手，可惜麵包唔夠鬆軟，只屬中等級數。講到好味嘅牛油方包，首推民華茶餐廳嘅厚多士，一定好食過呢件一百倍。

試過前面幾樣，質素可算係比一般茶記更一般，開始懷疑開飯網嘅千幾個好評點樣呃番黎。不過此行嘅重點，應該係網友盛讚到天上有地下無嘅神級炒滑蛋，所以有心將神蛋留喺最後品嚐。蛋係普通不過黃黃橙橙嘅滑蛋，賣相並無過人之處。將一口滑蛋送入口就會發現神蛋嘅魅力。蛋香味濃，口感滑到不能再滑，半凝固結實之間仍帶有蛋汁，順滑溜口，可謂入口即溶。店方已經自行將蛋調味，少少嘅咸味更帶動黃香倍增，香味充滿口腔，係會令人食唔停口嘅味道。唔係講笑，亦無誇張，係咁耐之來，食過最好味嘅炒蛋，果然名不虛傳。

憑一款咁好味嘅炒蛋，呢間澳牛嘅生意可謂唔憂做，門外全天候排長龍就係證明。為左要消化呢條人龍，呢間小店嘅工作速度亦係極神奇，速度單位應該以「秒」黎計算更為合適。

位於人龍第八位左右，等候1分鐘已經可以入座。入場後，用45秒時間一邊安頓自己嘅身體同行李，一邊睇餐牌。睇完餐牌回過神來，身邊已出現一位侍應大哥聽候柯打。用5秒時間落左兩份套餐，2秒鐘之後，枱面已有齊所需架撐。拎起架撐作滿足心理嘅簡單清潔之間，一碟火腿通粉就送到。小結一下，從落單到第一樣食物送到，前後需時大約10秒。對於某啲叫野食總係猶豫不決嘅人士黎講，呢10秒鐘，可能係剛意識到「死啦，叫錯野添。」嘅時間。不過，當你醒覺之後，剛才「叫錯左」嘅野，就已經出現喺你面前。

接過一碗熱辣嘅火腿通粉，品嚐120秒之後，一碟更加新鮮熱辣嘅炒蛋多士就出現。再用480秒處理枱上所有食物，一聲令下，你杯飲品就喺10秒之內送到。去到此餐嘅尾聲，奢侈地用180秒時間慢嘆杯熱飲。最後用60秒時間收拾細軟，將座位放出黎，再行到櫃檯找數，離開一個有如打仗嘅戰場。由入場起計至離座，大約用左900秒。

觀察900秒所得，要應付咁龐大嘅客量，小店用都左唔少方法提高工作效率。

首先，學麥小朋友話齋，呢度嘅早餐、茶餐同快餐都係咁上下。只要控制到客人嘅選擇，食物自然出得快。雖然小店除左套餐之外，仲有一張水蛇春咁長嘅餐牌，不過因為呢度嘅神蛋實在太出名，食客自然地傾向選擇神蛋系列，廚房大可以運用大堆頭製作，乜都唔洗諗全力製作套餐嘅食物。所以留意到水吧長期有五、六碟火腿通粉，而食客亦無需要擔心擺耐左唔夠新鮮熱辣。呢度嘅食物流量，係出一碟、拎走一碟嘅流水式作業。加上長期有幾位侍應大哥喺水吧守候，摩打手式輸送食物，基本上你一落完單，新鮮熱辣嘅通粉就自動出現，時差不多過10秒。

另外，實在不得不讚下店內嘅小二哥。廚房出得快，小二哥都要處理得夠快。當日所見，上下左右嘅侍應大哥都係主動、積極、盡責、勤力，基本上就係優質員工嘅典範。更有趣嘅係，純粹經過觀察同聯想，估計佢地嘅運作模式，見證到店內分工做得極好，而且員工甚有默契。當你食完碟通粉放低隻湯匙，1秒之後，左邊就冒出一隻手拎走吉碗，右邊就送上一碟炒蛋多士。樓面大哥嘅步伐急速，卻無任何衝撞。表面上自各做緊自己野，實際上係有系統地貢獻整個運作流程。留意到幫我地落柯打嘅人，並唔係最後寫埋單嘅人。900秒之間，要收嘅通粉碗、炒蛋碟已經收晒，究竟B君如何知道我地呢份係$26、$28定$30? 觀察所得，發現有白色矮杯熱飲、透明玻璃杯凍飲同鋼杯凍飲，已經清楚分到三個價錢。再推上一層，凡係有通粉嘅客人，套餐必然有炒蛋配多士，多士哥可以唔洗諗就自動送上一份。可以話係店方設定套餐有深思，而樓面大哥亦培養出無需多講就識做嘅默契。外人睇係形同打仗般忙亂，睇通後發現係亂中有序，而實情卻係一啲都無亂過。

好多網友話呢度啲樓面好惡，一句公道話係，樓面大哥並無惡言相向，不過無論言語、行為都俾客人有壓力的確係事實。入座後自動企喺你附近聽候你柯打，落單時用提問方式加快你嘅柯打速度，再加上左右夾攻嘅超快速服務，令食客不自覺地跟上佢地嘅速度。兩個人分坐一張四人枱嘅一邊，900秒之間，對面嘅兩個位，先後有三個人坐過，不難想像客人流量之快，對家嘅速度亦都無形中拉扯我地嘅速度。作為一個有公德心嘅好市民，都應該要盡量配合，真係唔好意思慢慢嘆，更加無人會嘗試拎份報紙出黎睇。

網上流傳話有人肯出錢請人去澳牛坐一、兩粒鐘，不過無人認投。此舉唔算玩命，因為斷估店方唔會拉你出門口打，只會用言語、行為加群眾壓力迫使你合作。相信無人認投去惡搞，係出於對呢間小店嘅愛護，對神蛋嘅尊重。

驚險山林兌換記

新加坡文華雞飯@尖沙咀
6/6/2012 15:00
13/6/2012 15:00

玩左團購咁耐，近排越來越多事幹，似乎團購泡沫越來越勁。作為消費者，都分外小心。可惜，連一直看似有信譽嘅蜂賣都開始出事，買左兩張$50換$100山林道現金券，都要快快脆用埋。幾經考慮之下，最後半推半就連續兩個星期三去食同一間餐廳。

叫得做新加坡雞飯，唔食海南雞飯，不如唔好黎。最後選擇左新加坡叉燒飯套餐同燒雞飯套餐。套餐包括一個主菜、一個飯、一碟油菜，仲包埋肉骨茶或飲品，相當豐富。

首先，最抵讚就係海南雞飯三款醬都齊全，放喺每枱自由任加。特別欣賞呢度嘅黑醬油，味道濃厚，而且酒味香醇。酸辣醬除左酸味之外，蒜香味十足，辣味比較強。而薑茸就比較淡口，無乜特別。

燒雞飯套餐 ($68)
第一次黎，就貪得意叫左個燒雞飯。呢款燒雞，並唔係燒到脆卜卜嘅雞，反而似係油雞，外皮有醬油色水，賣相都唔錯。燒雞已去骨，所以食起黎非常方便。雞肉夠腍身，有皮有脂肪， 嫩滑度唔錯，但雞味較為淡，反而雞皮嘅醬油香更搶鏡。

白雞飯套餐 ($68)
第二次黎食，再試傳統白雞飯，賣相不俗，入口一樣軟滑爽口，可惜雞肉味唔算重，又係淡淡地，不過總好過燒雞皮搶味，係清淡之選。兩款雞飯都自動波跟埋油飯，呢個油飯比預期好。油飯有應有嘅光澤，未食已經聞到好香雞油味，每粒飯都係淡淡黃色，軟硬、濕潤程度適中。入口有油香，亦有點薑同香茅味道，唔會過份油膩，味道唔錯。

新加坡叉燒飯套餐 ($68)
先後兩次都點左新加坡叉燒，老實說，其實唔知同港式叉燒有乜分別，不過食過味道都唔錯。從賣相睇黎，的確同港式叉燒分別唔大，外皮都係紅紅地，略為燒焦嘅程度，中間呈白白、粉紅嘅色水。不過味道就有別於港式嘅齋甜、齋蜜味。呢款新加坡叉燒，除左固有甜甜地嘅叉燒醬味道，蒜香味都幾重，亦帶點香甜麵豉味，比港式叉燒更惹味。叉燒上面仲有薄薄一層外加醬汁，撈飯一流。

今次團購體驗比較奇特，一向使用團購優惠的話，店方絕對禁止團購客柯打套餐。但呢間餐廳竟然規定團購客必須使用套餐，不得散叫。估計因為套餐相對價錢較貴，餐廳收番除淨嘅零頭，可以賺多幾個錢。是次優惠計番團購，埋單$86，二人前下午茶其實唔算平。一心諗住，試過就算，但竟然連續兩個星期黎，真係迫不得意。

今次連續兩個星期黎同一間餐廳，可算係俾團購搵左個笨。一向謹慎，買團購前一定落足眼力，睇清楚全部隱藏條款，仲要計定預算消費額，計掂條數先會俾錢，寧願唔買，都唔會濫買。當日睇到蜂賣呢個優惠之後，一心想去試老趙越南菜嘅晚餐，所以一共買左兩張價值一百蚊現金券，諗住有二百蚊Quota實夠用，點知就中伏。

取巧一﹕虛擬兌換危機

家陣團購泡沫越來越勁，要令團購客對網上集體購買有信心，一個健全嘅「退款機制」係必須的。但凡商舖結業，或者會員買完無心情用，未有時間用，只要去信團購公司，嘈多兩嘈，公司大多會買你怕，以現金又好，爛鬼積分又好，都會願意退款賠償。不過如果客戶已經「兌換」優惠的話，就算點嘈，相信團購公司都會大條道理，闊老懶理。 就好似今次咁，會員要喺指定時間內，先將列印本「兌換」成實體現金券，所以無論最後有冇消費到，會員已經「兌換」成功。團購公司大可以堅持絕對零退款，會員只好局住用。都明白今次優惠係團購條街，唔係間間店舖有處理核實兌換券嘅能力同時間，所以集中由一間較為醒目，又抵得諗嘅甜品舖做中央統籌，商舖們真係要多謝你。不過，對於團購客黎講，呢個就係一個危機。

搵笨二﹕使用條款嚴重苛刻化
點解講到局住用咁慘，明明係你情我願，會員自願選購。可惜，換左實體現金券後，好多商舖都臨時反口，自行加鹽加醋，將團購條款嚴重苛刻化。最簡單就係修改使用時間，只安排慘淡時間俾團購客，例如晚餐要你黃昏六點前埋單等。又或者限制使用張數，無論你消費幾多都好，只可以使用一張現金券等，總之團購網頁所寫嘅所謂條款形同虛設。可能，商戶事後發覺呢件事原來無肉食，只係俾團購公司抽水，所以局限使用方式，變相拒團購客於門外。團購客只好搜尋僅有岩心水嘅商舖，將就下局住用，以免現金變廢紙。好明白團購只係一種宣傳，商舖唔想因為招呼團購客，而影響本身嘅生意，因小失大。不過，相信當初傾團購時，呢啲條款都係團購公司同商戶坐低傾的，事後反口，真有點那個。而團購公司唔監察，任由商戶自把自為，更加那個。

玩野三﹕商舖結業令局限更局限

呢兩個星期行過山林道，發現部份商舖疑似結業。就好似是次團購兌換統籌金玉滿糖，門口就貼住「內部裝修，暫停營業」。原本選擇已經唔多，仲有商舖結業，團購會員真係多得你唔少。以本人為例，發現使用條款局限後，都自行調節使用計劃。一早諗住將一次越式晚餐，改為一次午餐加一個甜品。點知連甜品舖都關門大吉，最後只好喺同一間餐廳食兩次午餐。咁總好過，明明無興趣都走去打泰拳、修甲、玩塔羅牌掛。

基於以上問題，只好選擇比較有興趣嘅文華雞飯，而且計落條數比較抵。不過使用時間超麻煩，只限平日嘅下午茶時間，惟有放假黎食。最後臨到期之前，先用晒果兩張現金券。如果網友們大手購入，真係難以想像佢地點用。經過今次驚險團購體驗，蜂賣嘅可信度已經急降到負一百分，相信日後亦唔會再買一啲要先換票再使用嘅優惠。經一事、長一智，真係要小心。

嘆滋味卡巴。看重慶噴幼文化

Bismillah Kebab House@尖沙咀
2/5/2012 13:00

呢排驚驚地團購泡沫，所以近排多數只會買筍仔網同谷旁嘅團購，總覺得信譽稍為好啲。$25買一個重慶大廈嘅中東雞肉卡巴加汽水套餐，試新野。

一份中東雞肉卡巴，原來係勁粗一大條，切開一半都好大件。一次過換兩張券，總共四大件卡巴，午餐都夠飽。

雞肉卡巴脹book book，材料好豐富。外皮唔算脆口，反而感覺輕微煙韌。外皮包住豐滿嘅餡料，餡料多到好似經過壓縮，實實在在夾埋一堆。材料有洋蔥、生菜、蕃茄、雞肉等。雞肉超級多塊，塊塊都係大大件，結結實實，並唔係雞米粒。雞肉唔柴口，有好香濃嘅燒烤味。加埋生菜、蕃茄配合得恰到好處，口感爽脆，非常清新，即使雞肉汁唔算多，但蔬菜正好彌補呢個不足，整體唔太乾身。中間嘅醬汁更係靈魂所在，食得出有類似燒烤醬同千島醬嘅味道，亦帶少許印度香料味，同雞肉、蔬菜真係好夾，香而不膩。呢件卡巴實在有中東嘅味道，但口味又未至於難以接受嘅出奇味道，個人認為正好。

一份卡巴配埋飲品，份量足夠女孩子嘅午餐，團購價$25，正價的話，就$51一份。呢個團購$25抵俾，兌換到嘅唔只係好味嘅卡巴，仲有一個小社區嘅新奇體驗。

咁大個人從來未入過重慶大廈，今次為左食野，順便行左個圈。重慶大廈就好似自成一國嘅小社區，黃皮膚嘅香港人先係外國人，黑媽媽嘅印度噴幼先係本地人。佢地人多勢眾，個個牛高馬大，老實說，其實真係有啲驚。急急腳走上樓上，人流比較少，熱鬧情況似乎唔夠樓下咁旺盛。就喺一樓嘅盡頭，終於搵到呢間連個名都唔多識讀嘅食店。等食期間四圍八下，總覺得無我地嘅落腳點，名副其實坐立不安。

食物黎到嘅時候， 選擇左靠牆嘅自閉位開餐。進餐嘅廿分鐘時間，睇住每位店員好主動、熱心咁招呼客人，黑媽媽嘅面上，任何時候都帶住笑容。雖然未聽過一句廣東話，但一聲唔鹹唔淡嘅「噴幼」，親切感頓時暴升十倍。當你講完「Thank You」之後，必定送上一句「You Are Welcome」，加送招牌白牙齒笑容，外加兩粒閃星星，其實佢地真係好鬼有禮貌。臨走嘅時候，見到剛到場嘅食客，三唔識七、男人老狗都互相擁抱，又證明到佢地真係唔怕識噴幼，更可能係，會視任何一個人為噴幼，噴幼嘅噴幼即係自己嘅噴幼。

食完個充滿住美味、人情味嘅卡巴，都係急急腳咁走，繼續喺黑媽媽嘅牛高馬大之間穿插。雖然來也匆匆、去也匆匆，但兩個匆匆似乎有啲唔同。離開時嘅匆匆，除左滿腹之外，仲多左一啲對重慶大廈呢個小社區嘅認識。佢地嘅禮貌同熱情，的確值得欣賞﹔佢地嘅噴幼文化的確幾得意。可能，呢啲就係黑媽媽人獨特嘅相處模式。

雞飯看營銷

南星魚翅燕窩樓@旺角

29/4/2012 18:30

呢間南星係N年老字號，係泰國唐人街嘅名店，主打鮑魚、魚翅及燕窩等名貴材料。今次喺團購買到$33試下佢地嘅正宗泰式海南雞飯。新加坡海南雞就食得多，人地話泰國嘅海南雞仲正，一於試下。

正宗泰式海南雞飯套餐，包油菜、湯、飲品

一碟泰式去骨海南雞，望落去似乎胸肉比較多，其中幾塊脾肉就有肥有瘦。雞係連皮嘅，肉同雞皮之間無太多脂肪，呢隻雞唔太肥。肉質唔算十分嫩滑，只係脾肉稍為OK一啲，雞胸有啲嚡。雞味亦一般，調味其實都好淡口。只好沾上三款醬汁，私自提味。

三款醬汁同一般食嘅新加坡版唔同，無左杰身嘅濃甜黑醬油。取而代之，係泰式辣椒醬油。又鹹又甜，辣味刺激，食落相當惹味。另外，個人比較喜歡又酸又甜、蒜味十足、有輕微果酸味嘅醬汁，有助舒緩肉類嘅油膩感。最後一款係食雞必備嘅薑蔥油。呢三款醬汁，亦係撈飯良伴。雞南雞必配油飯，油香味可口，飯粒煙韌。但一細碗份量對男士黎講，略為不足。

此餐仲跟埋油菜，新鮮程度正常，蠔油落得絕唔手軟，抵讚。另外，餐湯係冬瓜湯，味道相當濃郁，無太多味精，冬瓜亦食得過。睇番團購網先知，原來跟餐送熱飲，完全無左件事，蝕左。不過杯熱茶的確好飲，唔係一般茶記嘅紅茶。入口甘甜，非常潤喉。

食得七七八八，疑似老闆伯伯好主動咁推銷我地，非常有誠意，所以我都盡人事，幫佢推一推。老闆話佢地總店喺泰國唐人街，當地業務非常強勁，仲有幾間酒店添。喺香港做左唔少年，多做熟客生意。前陣子店舖搬遷，希望借團購擴充客源。老闆仲逐一介紹各款食品，包括多款招牌魚翅、燕窩套餐等，價錢由百幾至三百幾一位。據講，該店喺泰國有私家燕窩島，所以食品質素有保證，老闆仲多次提議母親節帶埋媽咪黎食。

老實說，呢個海南雞飯並無任何驚喜，實在欠缺一種令人想翻轉頭嘅吸引力。不過，我明白呢碟飯並唔係佢地嘅主打。但當日所見，呢間餐廳人流超少。七點幾時份，十個客都唔夠，可以話用淡靜黎形容，實在替佢地擔心。睇見呢個情況，我倆不自覺地慨嘆，引發左一啲深思。

呢間餐廳主打魚翅、燕窩等高檔食品。唔係話香港人唔捨得洗錢，但捨得洗錢嘅香港人，相信會選擇去高級酒樓或酒店，去品嚐此等高檔野。呢間餐廳，無論喺裝修、氣氛上，都似係茶餐廳，又似燒味舖，又有一種打冷菜館嘅風味，極其量都只係一間家庭式嘅中菜館。食品同環境氣氛嘅配合，相信係唔少香港人，包括本人，對出街食飯嘅其中一個要求。

講到呢度，就不其然聯想到澳門福隆新街。呢條街都有唔少間非常出名、香港人冒名而去嘅魚翅專門店。佢地嘅店子幾乎可以用「up dup」黎形容，但仍然有佢嘅生存空間。的確，呢間南星，比起澳門果幾間，環境實在超班十倍。公道啲，按環境同價錢比例黎計，兩者其實差無幾。咁點解澳門果幾間做得咁好，而在落旺角嘅南星唔OK? 呢個就引申出另一個顧客定位嘅問題。

澳門果幾間，係香港人悉知，澳門人氣美食王之一。基本上可見嘅旅遊雜誌、澳門搵食指南，都有一頁半頁介紹。相信被介紹嘅果幾位主角，都係主打做遊客生意。所以假日一定見到人山人海，排隊係指定動作，遊客似乎就係此等小店嘅主要食糧。唔知南星有無做旅客推廣，無可否認，消費力其高、兩日洗廿萬嘅豉油行旅客，可能係此店嘅一大金源。與其只做街坊生意，不如開發下呢個商機。

南星嘅新舖位於朗豪酒店後面，人流真係超少，有walk in客係奇蹟。老實說，唔係團購，我絕對唔會行呢條街，亦唔會知呢間餐館存在。可能係我孤陋寡聞，本人搵食嘅資料來源，只限於開飯網、雜誌、朋友介紹等，實在唔認識呢間泰國老字號。老闆伯伯真係要花多啲心機喺宣傳方面，團購的確係一個好開始。

再者，南星可能欠缺一個具故事性嘅爆點。又可能係，唔識一種能夠將唔吸引講到好吸引、化腐朽為神奇嘅化妝術。南星主打高檔、矜貴食材，呢個絕對係一個既獨特又出位嘅賣點。老闆伯伯所講，喺泰國撈得好掂，又開酒店、又開餐館，或者用料上盛，私家燕窩高品質等，亦係賣點。其實佢大可以明目張膽地展示呢啲過人之處，唔需要咁謙虛地收收埋埋。得閒嘅，仲可以加番啲極勵志、超熱血，講述老闆如何打拼，創造出酒店飲食王國嘅故事，相信絕對會感動多十倍。

到最後，好嘅食品質素先係餐廳嘅最強武器。可能我地無試過佢嘅招牌菜，單係一份泰式海南雞飯，實在感覺唔到佢有一股攝人嘅吸引力，亦唔能夠推動本人，因為好味而去讚揚，再加以推介。呢方面真係無得搞，只可以自救，外人實在幫唔到手。

我倆並唔係什麼營銷嘅專業人士，以上只係倆口子得閒無野做吹吹水嘅愚見，係被老闆伯伯嘅誠意推介所感動，有感而發。借呢個議題慨嘆香港生意難做，呢個社會就係咁現實。做生意如果少左一啲包裝，定位有偏差，可以影響好深遠。事實亦證明，營銷確實係一門高深學問。

Yoppi澎湃大比拼

Yoppi Frozen Yogurt
24/11/2011 15:30
26/12/2011 20:00
20/1/2012 14:00
5/2/2012 18:30
11/3/2012 21:00
4/4/2012 15:30 

早前因為團購，認識左Yoppi。先後兩次去沙田店，都係十分驚喜嘅澎湃杯。所以見到團購做$15當$40現金使用，立即掃左六張，可以試埋唔同分店嘅水準。一試就知道每間分店，無論喺銷售方式上，質素上都有好大分別，跟據幾次嘅經驗，有以下嘅總結。

@荃灣
24/11/2011 15:30

烤布甸、朱古力乳酪 ($47，團購價$22)
烤布甸味道其實幾似焦糖布甸，味道幾濃郁，但只有甜，無香味，超級甜膩。朱古力味係特濃黑朱古力，都係比想像中甜，兩款口味都唔知係真乳酪定假乳酪。質地方面，唔知係唔係當日人較多，乳酪總係水水的，好易溶。唧乳酪嘅時候，已經係半溶狀態。食落質感當然唔會幼滑，就好似沙冰、雪芭咁粒粒粉粉。配料木糠同Oreo都係咁，但原味麻糬偏硬身，唔夠鬆軟煙韌。惟一吸引之處，就係剛好聖誕節推出左Hello Kitty杯同膠匙，對住Hello Kitty食得開心啲啲。

1. 乳酪收費﹕過磅計，每安士$4.5

2. 柯打方式﹕全自助形式，自己唧乳酪，自己加配料，玩完先俾錢
3. 乳酪﹕每日約有六至八款乳酪選擇，選擇算多，但間中都會有售罄嘅可能性

4. 配料﹕一條長長嘅配料吧，一格格放滿晒唔同嘅配料，選擇夠多之餘都好乾淨整齊

5. 其他﹕靠牆邊位置有高枱椅，可以坐低慢慢嘆

6. 溫馨提示﹕強烈建議避開繁忙時間

@鑽石山
26/12/2011 20:00

法國雲呢拿、原味乳酪 ($45，團購價$20)

法國雲呢拿竟然做成乳酪，雲呢拿味的確好香濃，但只得純甜味，一啲酸味都無，感覺似雲呢拿軟雪糕多過乳酪。而原味一樣夠酸，清新醒胃，乳酪都係酸酸地比較好。此店嘅乳酪都算結實，幼滑程度正常。配料加左一般常見嘅Oreo、脆米、彩針等等，簡簡單單。

1. 乳酪收費﹕過磅計，每安士$4.5

2. 柯打方式﹕全自助形式，自己唧乳酪，自己加配料，玩完先俾錢
3. 乳酪﹕每日有六種口味，但晚上時份經常有一、兩款口味售罄

4. 配料﹕配料吧大約有三十多款配料，款式正常，唔特別多，而且最愛嘅麻糬好似失左蹤

5. 其他﹕店仔細細，放左一張長梳化，仲有幾張高枱椅，平時都見到唔少人喺度Hea時間

6. 溫馨提示﹕ 感覺上，自由唧的話，呢間比荃灣店大杯

@旺角
20/1/2012 14:00

櫻桃味乳酪 ($40，團購價$15)
今日只得櫻桃味揀，入口勁酸咪咪，食多幾啖之後，櫻桃味先慢慢滲出，但越食越酸，酸到有啲頂唔順。乳酪都算結實挺身，好明顯氣孔非常多，所以質感一啲都唔幼滑。幸好配料選擇左唔少朱古力調和一下，有朱古力脆脆，就好似迷你麥提莎，幾得意。有淡淡朱古力味嘅雲石朱古力碎片、棉花糖同唔知咩果汁味嘅爆爆珠。

1. 乳酪收費﹕分大中細杯劃一收費，大杯裝300g跟兩款配料$32，其後配料每款$4

2. 柯打方式﹕落單後，全程由店員負責
3. 乳酪﹕寫板話每日有兩款乳酪選擇，但問過三次，三次都只得其中一款，感覺有啲取巧。真係要食的話，只好將就下，有邊種味就食邊種。以劃一收費份量黎講，呢度算少，因為乳酪塔中間係全空心，只得一個巨窿，應該同沙田店嘅300g有好大距離

4. 配料﹕餐牌上本來有唔少選擇，柯打時又話呢樣無，果樣無，選擇勁局限。而配料都落得輕手，一啲都唔豐富

5. 其他﹕職員哥哥仔極度Hea底，而且無禮貌，問多兩句都嫌你煩，唔多想做生意

6. 溫馨提示﹕推薦指數勁低，去對面商場食吧啦

@沙田
5/2/2012 18:30

朱古力、原味乳酪 ($40，團購價$15)
指定嘅原味仍然夠酸咪咪，夠結實厚身，幼滑度還可以。而朱古力味道雖然濃，但唔夠滑，冰感強勁，好似沙冰粒粒粉粉。$40包四款配料，必選最愛嘅麻糬，但好似比較硬實，無之前咁好味。芒果爆爆珠都係口感豐富，芒味香濃。芒果肉係睇住佢即場切出黎，包保新鮮香甜，唔錯。另加朱古力針調下味。

1. 乳酪收費﹕分大中細杯劃一收費，大杯裝300g跟兩款配料$32，其後配料每款$4

2. 柯打方式﹕落單後，全程由店員負責
3. 乳酪﹕每日有四至五款乳酪選擇，款式經常轉換，寫得出就食得到。相比咁多間劃一收費嘅分店黎講，一定係呢間最抵食，份量夠多，而且同時選兩款味道都得

4. 配料﹕配料選擇約有四十款，一般常見嘅都有，而職員都落得相當慷慨，非常抵食

5. 其他﹕呢間分店嘅職員都比較熱情，感覺較為良好

6. 溫馨提示﹕其實食過幾次已經覺得質素有下降趨勢，但對比其他分店，無論選擇、味道、質地同份量黎講，都仍然係略勝一籌

@鑽石山
11/3/2012 21:00

朱古力、海鹽焦糖、原味乳酪 ($45，團購價$20)
間間分店嘅朱古力味都係一樣，似沙冰多啲，而且味道有啲假。焦糖無啦啦加埋海鹽，有啲奇怪，但見幾受歡迎，所以試下，甜中帶丁點咸咁啦。原味一樣夠酸，配料都係果啲，無特別。

1-6﹕同上

@沙田
4/4/2012 15:30

荔枝、原味乳酪 ($41，團購價$16)
今次兩款乳酪質素相當高，夠結實厚身之餘，入口仲非常幼滑。原味仍然酸度十足，非常醒神，另一款新試口味係荔枝，味道其實同原味差不多，比原味甜少少，滲透住荔枝香甜味，感覺不錯。配料自由任加，麻糬今次係軟腍腍，可惜煙韌度不足。熱情果爆爆珠撈埋荔枝味真係好正，果味更濃郁。另加餅乾碎同Oreo碎，兩款都夠乾身，磨得夠細碎。首次試加朱古力醬汁調味，朱古力漿夠濃，可能有少許搶味，加少許就無妨，太多就免了。是日人龍特別長，原來沙田分店取消左劃一收費杯裝計算方法，相信實行不久，適應需時，所以非常混亂。乳酪肯定少左，價錢貴左，但質素好左，唔知好事定壞事。

1. 乳酪收費﹕過磅計，每安士$4.5
2. 柯打方式﹕落單後，由店員負責唧乳酪，客人自助加配料，最後過磅俾錢
3. 乳酪﹕每日有四至五款乳酪選擇，款式經常轉換，幾次都試到新口味，比較少重覆。今次兩款乳酪嘅質素，無論係味道同質感上都係史無前例咁好，可能水果類型做乳酪比較容易掌握。不過突然改為半自助過磅計，乳酪份量明顯比之前少三成，吸引力大減。
4. 配料﹕自助配料選擇約有三十款，一般常見嘅都有。可惜小店原先裝修設計唔係做自助，配料吧非常細，加配料都相當唔就手。客人最好就跟指定路線巡一次，唔可以後悔或心大心細，因為後面已經有其他客人準備行動，好難翻轉頭。一句講晒，地方非常狹窄，真係好唔適合用自助形式，所以搞到條隊鬼死咁長。唔好諗住靠自助過磅賺多啲錢，就格硬黎先得架!
5. 其他﹕呢間分店嘅職員都比較熱情，而且少見清一式陽光男孩，感覺非常好
6. 溫馨提示﹕如果全線劃一收費的話，沙田分店仍然排榜首位置，但一定無之前咁抵食

後記

六張團購券，換黎六個不同嘅Yoppi體驗，由2011年食到2012年，見證住多間分店嘅變化。由好變得唔好，又由差變得好左，總部似乎未能有效控制各間分店嘅食品質素。惟一控制到，就係價錢統一，連個人最愛嘅沙田分店都改為自助形式過磅收費，由此可以肯定，澎湃杯不再。唔係講笑，2011年嘅澎湃杯有圖為證。澎湃杯消失，可能係通貨膨脹嘅結果，亦代表住呢間乳酪店嘅一大吸引力不保。乳酪店越開越多，競爭越大，只好期望佢能夠維持番史無前例嘅高質素乳酪，千祈唔好再下降，繼續努力啦。

前篇參考
12/6/2011
斯釘特澎湃杯裝乳酪對抗惡勢力

17/7/2011
Like! 讚好! 再+1! 大杯乳酪再次迫爆 

請宣揚這秘密。見證這一百分誠意

秘密花園1981咖啡店@長沙灣
4/3/2012 19:00

早年前已經幫襯過呢間咪咪花園，覺得午餐質素唔錯，只不過衰在地點隔踄，介乎長沙灣同荔枝角中間，唔喺果頭返工，係絕對唔會經過。今次有口福，筍仔網$53就可以試試西式晚餐，有湯、有扒、有飲品，仲有甜品，咁豐富，千祈咪走寶。

意大利雜菜湯、牛油餐包
餐湯係平時常見嘅雜菜湯，比較稀，但蕃茄味濃酸少辣，仲有好多蘿蔔、椰菜等，相當足料。餐包係一般現成包包，鬆軟確係鬆軟，但如果花多少少時間焗熱佢，令牛油可以融入麵包中，相信會更加好。

蘋果蜜桃綠茶
餐飲可選擇茶、啡之外，仲可以揀是日特飲。蘋果蜜桃綠茶味道夠濃，蜜桃、蘋果味充分表現出黎，仲食到有細細碎碎嘅蘋果皮肉，估計係新鮮即榨，並唔係用濃縮果汁欺騙食客，真材實料。

西冷牛扒伴蒜蓉黑椒汁
大大塊地圖形狀嘅牛扒，配幾件香脆入味嘅薯角，同埋白烚雜菜，蒜蓉黑椒汁用杯仔另上，盛裝賣相討好，亦感覺高檔。西冷牛扒外層些少焦脆，要求嘅七成熟的確做到，切開牛扒肉芯仲有片片粉紅色。牛扒係帶些少筋、少許脂肪嘅類型，軟腍程度正常，帶微輕煙韌，並唔係醃到腍晒、無晒質感果種偽裝牛扒。牛味夠濃，有肉汁，沾埋蒜香帶微辣刺激嘅蒜蓉黑椒汁，味道更加豐富。始終都係黑牛最合襯。

法式羊架伴薄荷汁
估唔到團購幾十蚊已經可以品嚐到貴價羊架，真係驚喜，當見到羊架份量十足，的確比驚喜更驚喜。羊架足足有三大件，每件都係連骨帶啖啖肉，都相當厚身。 羊架外皮燒得微焦，表面灑滿香草，睇見都流口水。羊肉大約燒得八成熟，肥瘦適中，始終帶些少脂肪先至夠膻香。外皮真係脆脆地，肉質腍滑，一啲都唔韌，肉汁仲好豐富。除左羊味十足之外，亦帶微微嘅香草、黑胡椒味，可見醃製得非常夠時間。其實原汁原味唔沾任何醬汁已經好夠味，套餐仲跟埋薄荷汁。起初感覺奇奇怪怪，嘗試輕沾一滴試味，醋酸味勁濃，仲有涸喉感覺，真係有少許抗拒。但原來伴埋羊肉一齊食，肉味中和左醋酸味，令羊肉更加清新可口，就好似羊肉加黃芥末嘅微妙化學作用。事實證明，醬汁係一定要撈埋主角一齊食，先見其價值。

原味木糠布甸

一向都知道呢間小餐廳嘅木糠布甸係自家製，而且深得大眾歡心，的確，係事實。木糠布甸嘅重點係幼滑、細碎嘅瑪莉餅碎，餅碎平均地舖喺布甸表面，造型已合格有餘。木糠布甸分為兩層，中間都有一層餅乾碎，口感非常豐富。布甸甜度適中，牛油忌廉味香濃，質地好幼滑，入口即溶程度好比雪糕。加埋奶味十足嘅餅乾碎，實在太好味。質素好過好多所謂甜品舖。

藍梅芝士餅

細細件，切得幾靚仔，似乎都係自家製作品。從橫切面睇黎，餅底好結實，無任何分裂嘅情況出現，入口有好香牛油味。芝士部份都相當幼滑，勁芝味，面層嘅藍梅醬酸酸甜甜，味道到位，仲有粒粒藍梅，非常好味。不過真係太細件，完全唔夠喉。

團購價五十多蚊一個套餐，真係抵食，至於正價係一般西餐價位，$60-85左右。此餐廳嘅出品，由餐湯到甜品，都令人滿意，相信就算正價黎食都係合理價錢。特別係甜品更加令人回味，好多人都話甜品係一餐嘅終點，一個美味嘅甜品，就為一餐畫上完美嘅句號。唔知係唔係晚市客人唔算多，所以喺呢度食飯，感覺特別舒服。歐陸式嘅枱椅，加上別緻嘅裝潢擺設，氣氛認真一流。服務方面都係有讚無彈，陽光男孩們個個親切有禮，非常勤力主動，請著呢啲員工，老闆眼光真好。

改名做秘密花園，絕對唔關周姐輪或者玄彬事。經營起緣係一個非常溫馨嘅故事，而深入一個舊式工廠大廈區之中，的確係一個秘密嘅地點。附近有咁多工廠寫字樓，絕對係上班一族嘅午飯熱點。只不過平日晚上同埋假日，人流真係相對少好多，星期日晚七點時份，係完全唔需要等位。所以店方都好懂得把握網上宣傳，一來拓展市場，二來可以同客人增加交流、保持聯繫。店主亦好樂意回應客人嘅意見，從開飯網所見，無論評語係讚定彈，大部份留言都有店主細心回覆，感覺良好，亦見用心。一句講晒，能夠充分感覺到經營者對每一位客人嘅重視，足見一百分誠意。

此店絕對配得上近排一個好常見嘅形容詞「有Heart」，所以值得我同樣「有Heart」地落足一百分心機去讚揚。我相信呢個絕對唔係杯能梳的咪咪，真係希望多啲人認識佢，支持佢，等佢繼續做落去。

加油!

墜入不甜蜜陷阱

Sweetbomb 22@尖沙咀
11/12/2011 19:00
26/2/2012 20:00

諗住用$48買一個足一磅蛋糕，團購寫到好吸引咁，仲掃左兩張，試過之後就知道完全中伏。眼見呢間舖頭仲不停喺唔同團購網做優惠，好多中過招嘅食客都話要公開呢個陷阱，希望唔好再有人被騙，固然要力撐。

喺Group Buyer做嘅優惠，係$48五選一蛋糕，選擇有雲石芝士、紐約芝士、朱古力松露、朱古力慕思、芒果慕思。先後兩次使用，試過兩款口味。

(相片從略，核突到唔想影)

紐約芝士蛋糕
第一次試，諗住叫啲比較穩陣嘅芝士蛋糕。蛋糕拎上手係熱嘅，直徑約有五吋。蛋糕面無任何水果或其他裝飾，焗過嘅表面係一撻深啡、一撻淺啡，好明顯受熱完全唔均勻。蛋糕側面外圈都係凹凸不平，有唔少餅底碎跌出，絕對出唔到街。熱嘅芝士蛋糕，無經過雪藏，明顯比較腍身，切嘅時候成個蛋糕幾乎散晒，都莫講話餅底超鬆散。味道方面，芝士味係夠濃郁嘅，係少甜但有咸味嘅芝士。入口係非常粗嚡、鬆散。蛋糕仲出現甩底情況，芝士部份同餅底居然一切就上下分離。而牛油餅底壓得唔夠實，居然仲食到粒粒砂糖，咬到索索聲，所以餅底味道超甜。

朱古力松露蛋糕
落單時明明話要朱古力松露蛋糕，感覺上佢俾左朱古力慕思蛋糕我，但其實都唔太似朱古力慕思，老實講，真係食左都唔知係咩蛋糕。論外型，今次我收貨，唔算樣衰，總算有半粒士多啤梨壓場，朱古力醬舖得夠平滑，我明白生意難做，所以都收貨。蛋糕表面有一層朱古力醬，無乜特別，典型平價、偏甜、唔香嘅朱古力醬。朱古力醬之下係一舊唔知咩，入口居然係煙煙韌韌，仲有彈牙感覺，口感質地好比啫喱，估計係超勁量魚膠粉所致。奇怪嘅口感，配合埋超淡朱古力味，已經好不安。食食下，竟然咬到細粒棉花糖，本來煙韌嘅蛋糕，變得更加煙韌，都唔知似乜，根本入唔到口。

以下又學下眾多位深深不忿嘅食客，列點式舉出團購網簡介，再逐一擊破，以表達不滿。

1. 「超抵優惠價$48換購原價$188 Sweetbomb 22足一磅優質蛋糕一個」
$48一個蛋糕，無咁得閒拎去過磅，但眼見細細一個，唔多覺足一磅，有網友話只得半磅。而且食落係如此質素，拉車尾都配唔上「優質」兩個字。原價竟然開到$188酒店級蛋糕水平，簡直就係荒天下之大謬。

2. 「專業蛋糕師全人手製造。餅師擁有多年蛋糕製作經驗，全部蛋糕均由人手製造。」
全人手製造係肯定嘅，因為只有人手做先可以做到如此粗糙。「多年蛋糕製作經驗」真係無辦法驗證，而「專業蛋糕師」呢個名涵真係唔係人人掛得起。以兩個蛋糕嘅賣相、質地同味道，可以百分之一百零一肯定，佢配唔上「專業」呢個形容詞。小女子閒時無野做，都會自家製蛋糕。自知稱唔上好正，但亦未至於差嘅水平。今次呢兩個蛋糕好明顯比業餘更業餘 。

3. 「Sweetbomb 22亦非常注重健康，所有蛋糕均選用低脂低糖材料，主張無添加，全部天然真味，口味適合男女老幼！」
係唔係低脂材料，真係無咁叻食得出，但芝士蛋糕個砂糖餅底，真係驚食左會有糖尿病。主張，可能佢真係主張，但無實際行動呢。

4. 「蛋糕賣相精美，派對送禮大方得體！送禮自用一樣咁啱！」
無錯，團購網上嘅相片絕對呃得下人，估唔到真係用黎呃人。實物拎上手之後，相片嘅一成水準都無。包裝係用一個白雪雪，紙質非常薄弱，用黎裝半打蛋撻都怕頂唔順嘅紙盒，仲弱雞到個蓋係合唔埋，盒外加一個街市菠菜蘭姐姐用嘅白色膠袋。運送嘅時候係感覺到，個蛋糕處於一個非常不穩定狀態，就算好小心拎，個蛋糕係好似有腳咁周圍轆，因為包裝盒無任何用作固定嘅托盤裝置，只得一張爛鬼錫紙。包裝同內容都唔見得人，自用都覺得不能接受，請問如何送禮? 相信唔止失禮俾人笑，更加會得罪人。

5. 「三個月換領期，橫跨年中六個重要節日 (平安夜/聖誕節/Boxing Day/元旦/農曆新年/情人節)總有幾個節日岩駛。絕對適合愛人間互相分享甜蜜幸褔，或送贈親友表達祝福心意！」
相信好多團購買家就係因為呢個咁強勁嘅賣點而狂掃，諗住平平地買個蛋糕做禮物，又或者作為扒地甜品，與朋友分享，點知全體中伏。如果繼續作為禮物的話，只係將陷阱(並非祝福)轉送他人。又或者作為情人節禮物的話，相信就會出現上年二月十四團購爛花陷阱一樣嘅結果，絕對係會俾愛人詐型，食多一百粒朱古力都甜唔番。

題外話，另一間團購公司又同呢間野合作，喺一月推出$68情人節蛋糕套裝，包括一個唔知咩蛋糕，加一隻唔可愛嘅熊啤啤。如果蛋糕一如以往都係交出咁嘅質素，真係難以估計有幾多對愛侶會因而吵架鬧分手。

好多受害者話，此店明顯唔係做生意，極無誠意。更有人陰謀論話，小店打算做完團購，賺一筆錢就走佬，提醒大家買左就快啲換。總之個個都變晒憤怒鳥，包括本人在內。
小店位於尖沙咀Solo Office，人流幾乎等於零，真係唔知佢除左做團購之外，邊度搵生意。第二次去嘅時候，已經發現小店玻璃門上貼左「歡迎頂讓」四隻大字，即係證明佢本身已經做唔住。不過衰啲咁講，相信有意頂黎做嘅老細，如果睇到網上評語只有清一式劣評，都應該會立即打消念頭。真係咁博照做的話，估計食客們都會對呢個名或者呢個地址存有唔少心理陰影，生意更難做呀。

同樣都係團購，人地馬高先生真材實料嘅芝士蛋糕，都只賣$50，除左包裝靚仔、蛋糕賣相討好之外，味道更一流，個個食完都讚不絕口，團購一次比一次賣得多。呢個故事教訓，做生意者，無咁大個頭就唔好戴咁大頂帽。為食者，便宜可貪，但貪得要醒目，眼光要獨到，共勉之。

「魯肉飯」謎思

食過西門町嘅滋味魯肉飯，突然冒出一個問號。
究竟「魯肉飯」、「滷肉飯」、「肉燥飯」、「焢肉飯」有咩分別?

呢個的確係一個好問題，有時會見到一片片嘅五花腩，有時係肉碎伴飯，究竟咩等於咩?
就住呢個問題，相信夠字數可以寫篇論文。喺網上搜尋下小百科，發現原來係一門高深學問，大家研究下。

簡單版嘅解說，係唔同地方嘅名稱差異。

醬汁煮肉碎嘅飯，台灣北部叫「魯肉飯」，喺南部就叫「肉燥飯」。南部都有所謂嘅「魯肉飯」，但就係一片片嘅五花腩肉，即係北部所講嘅「焢肉飯」。維基百科又話，「魯肉飯」嘅正確寫法應該係「滷肉飯」，而「魯肉飯」只係集非成是、約定俗成嘅名稱。

假如而家身處台北，可以食到﹕
1. 「魯肉飯」等於「滷肉飯」，用濃郁醬汁滷煮嘅豬肉末配飯

2. 「焢肉飯」即係「爌肉飯」，白飯面上應該見到用醬汁醃製煮成嘅五花腩肉塊

假如去台灣南部旅行，叫法就相當唔同﹕
1. 想食豬肉末配飯，請叫「肉燥飯」
2. 想食肥肥厚厚嘅五花腩肉塊配飯，請講「魯肉飯」

更深入地研究，好多台灣朋友話，除左叫法上有分別，其實北部所講「魯肉飯」同南部稱為「肉燥飯」，即豬肉末伴飯，兩者嘅烹調方法都好唔同。

為左配合台灣北部工商業城市嘅飲食習慣，食品製作最好可以循環加熱，所以好適合用濃郁醬汁燘煮肉類呢種方法，即係「滷肉」。滷汁材料煮熟後，仲可以不停加熱，越煮越香。而「滷肉」會用上有肥有瘦嘅豬肉，切成小粒狀，所以入口會夾雜左粒粒嘅脂肪肥肉。

而南部嘅「肉燥」會用無皮同脂肪嘅純肉部位絞製成肉末，再加上紅蔥頭等用爆炒方式煮製，肉碎煮得較為乾爽，係好典型嘅家庭料理。

可以話對於「焢肉飯」係咩嘅爭議相對比較少，控肉係將五花腩肉切成大大塊嘅長片狀，當成主菜配飯食。

對我黎講，做過功課後，其實「肉燥飯」同「焢肉飯」係好容易聯想同明白。只不過「魯肉飯」就比較特別，因應唔同地方嘅製法，可能係兩樣完全唔同嘅美食。其實有唔少台灣當地嘅朋友都討論過呢個問題。當地人點餐時都覺得非常混亂，試過落柯打後，店員送上嘅菜式同心目中所想完全唔同。所以有時為免尷尬，點餐前都會問清楚，所謂嘅「魯肉飯」係肉末定係五花腩塊。

網上咁多篇文章分享，真係無辦法考究係真係假，只不過越睇越得意，不妨參考下。

情迷旺角西門町

西門町台灣麵食@旺角
5/2/2011 13:30
開飯網搜尋「旺角」+「台灣菜」，佔據搜尋榜首位置嘅，就係呢間有近三百五十個好評嘅台式料理小店。任何時間行過，店內最少坐足八成滿，晚飯時份，更會大排長龍。趁中午時份唔洗等位，一於重臨西門町嘆番餐。

廟口魯肉飯 ($31)
魯肉飯基本上係每枱客例點嘅名菜，一碗飯材料充足，有足量嘅魯肉，半隻滷蛋，仲有唔少蔬菜。魯肉係瘦肉同脂肪混合，配上香甜醬汁燉煮，非常濃郁。魯肉煮得腍，非常入味，隱約食到冬菇碎等材料，仲夾雜左粉粉軟軟嘅肥膏，入口其實有啲怕怕，但成個感覺完全唔油膩。醬汁充足、略為濕潤嘅魯肉配上爽口榨菜粒伴飯，真係非常惹味，不知不覺間已經完全清碗。強烈建議先將魯肉同飯伴勻，以免因為太好味，極速食晒啲餸，最後只淨低白飯，不過還好仲有隻滷蛋。

香辣牛筋新竹米粉 ($34)
一大碗睇見都驚喜，牛筋份量超多，相當於一般餐廳嘅兩倍份量。所謂嘅香辣，並唔算太辣，但香氣十足，味道係醒胃、惹味嘅甜辣味。牛筋食落軟韌適中，大大件亦燘得夠腍身，但仍不失爽口嘅膠質感。而新竹米粉非常幼細、煙韌，配濃味牛筋一流。

網皮芋蓉卷 ($19，優惠價$9)
九蚊雞一客，有三件芋蓉卷，真係幾抵。網皮炸得好香脆，勝在夠乾身、唔油膩。網皮低下包住芋蓉，仲有些少疑似豬肉碎同冬菇粒等，味道剛好，口感粉粉腍腍。芋蓉卷仲可以沾一下酸甜辣醬，更加好味。

星期日午市時間仍有供應抵食套餐，一款飯或麵只需三十零蚊，仲附送冷熱飲品一杯，超抵! 小店仲提供追加小食優惠，大約俾多十元、八塊就可以加配一款小食，四十蚊埋單，已經可以滿足離開。

當天發生左小插曲，印象深刻，但疑似老闆態度十個抵讚，應記。
落單阿姐似乎係新手，點菜覆單論論盡盡，及後見到手上嘅埋單紙，無啦啦多左三大蚊。疑似老闆問清楚後，樂意改單，並送上兩句唔好意思。後來，一碗新竹米粉竟然變成擔擔麵，先知道問題所在。原來阿姐口頭覆單正確，但手寫單出錯，所以亦順理成章出現左擔擔麵底加三蚊。疑似老闆立即換上一碗正確又新鮮嘅香辣牛筋新竹米粉，前前後後，一共講左五句唔好意思，同三次對唔住，搞到我地都真係唔好意思，麻煩晒。

雜誌盛讚此店食品非常正宗好味，但老闆並非地道台灣人，而係確確實實嘅香港人。當日所見，疑似老闆先生事事親力親為，非常落力，待客有禮不在話下，亦感覺到果種威嚴嘅氣派。隱約聽過疑似老闆提點員工，言語間無帶一點責罵，只係好聲好氣勸勉員工要盡心盡力，相信阿姐們亦心服口服。

多得頭條本搵食指南，引領我去西門町食好野，無團購之下，要搵平靚正嘅，呢度係一個不錯嘅選擇。

於串燒地雷陣中伏重傷

和味軒@油麻地
21/8/2011 19:30

位於油麻地、佐敦交界附近，一去到就知道係一間新開嘅舖頭，細細間得十多個位，以位置黎講，估計係專做自由行生意。 用$38團購買到一份聲稱值$88 嘅二人串燒餐。

團購價$38一份二人餐，包括以下七款串燒，每款兩串，另加每人一杯綠茶或豆漿。
炭燒雞腎、炭燒雞軟骨、照燒雞翼、串燒牛舌、雞肉串、豬肉串、安格斯牛柳粒

一睇個菜單，已經知道無論做Lunch或晚餐都唔會食得飽一個人，更何況係兩位?!
所以我選擇左視佢為掃街小食。

職員話豆漿欠奉，惟有揀綠茶，或者加錢轉汽水。有幾位網友話，發現餐廳明明有部裝住豆漿嘅豆漿機，但職員都話賣晒，擺明唔俾團購客。而所謂嘅綠茶，只用一隻細紙杯裝住大約七成滿嘅道地綠茶，基本上不出五啖可飲晒。如果為左增加團購嘅吸引性，格硬寫話包飲品，但最後得來如此一杯，咁我寧願你寫乜都唔包，學茶餐廳是但奉上一杯熱紅茶算數。

首先試過炭燒雞腎同炭燒雞軟骨，絕對無問題呀，因為竹籤已經出賣左佢，睇得出係邊個牌子。明顯係超市，或者扮日本食物批發店有售嘅現成串燒，只需買番黎整熱就食得，我記得家人都買過番黎食。現成貨味道唔差得去邊，燒汁夠濃，肉質都唔錯。好唔好食都唔關和味軒事，只需煮得熱就功成身退。但係，從網友們分享得知，佢地聽到廚房傳出微波爐嘅聲音，懷疑有啲食物只用微波爐翻熱，所以唔洗金田一出馬，都估到雞腎同雞軟骨嘅嫌疑最大。

一睇見隻雞翼就覺得佢營養不良，瘦瘦削削。其實雞翼好難整得唔好食，相信佢只經過鹽醃，再燒熟。絕對證明到佢係炭燒，因為雞皮燒焦左嘅地方，真係有炭味。雞肉更加係霉嘅，而且乾晒水。

牛舌係有牛舌樣，圓圓地、薄薄一塊，但無牛舌味。

一般黎講，我地好容易靠外型就分辨到雞肉同豬肉。但神奇地，成碟串燒件件外型差不多，親眼見到都唔信，基本上要咬一啖，從佢肉色、纖維先可以分辨清楚。最厲害嘅係，佢可以冇味到，連肉嘅原味都食唔出，第一次體驗到白灼仲好食過炭火串燒。每件都係乾柴鞋口，拍得住湯渣肉嘅口感。

最後到所謂嘅安格斯牛柳粒，但全碟都絕對搵唔到牛柳粒嘅存在，只有同雞、豬一樣乾柴嘅牛肉片。

睇住阿姐親手串肉，有師傅親手燒烤，門面功夫真係做到足，感覺理應唔錯。
需知道我咁理性，都廢事對比團購嘅圖片，擺明知道做宣傳，出晒沙龍技巧，用晒軟件改圖打燈，同睇幅卡通手畫相無太大分別。但，團購嘅介紹同實物，實在差不遠。最重點嘅字眼係「份量又剛剛好，肚子填得滿之餘又可以感動味蕾」。一人食一份，都做唔到「肚子填得滿」，更何況佢聲稱係二人餐。「感動味蕾」真係奇蹟，但我相信味蕾會流淚，因為佢受傷了。

超勁嘅一間舖頭，咁耐以黎，一個好評都無。七款味道串燒，食左都唔知咩黎。全場最好食嘅，係用微波爐翻叮嘅現成串燒。咁不如佢改行做微波爐餐廳啦，可以賣下微波爐杯麵、微波爐點心、微波爐糖水等，相信都係綽頭，可能內地同胞鍾意香港微波爐速食文化呢。

今次踩地雷踩到應一應，估唔到喺大團購網如Groupon都會如此嚴重中伏。而中伏人數相信有三千幾人，大家齊齊踩地雷，哈哈。

後記
安柏娃泰式餐廳@油麻地
21/8/2011 20:30

中伏兼唔夠飽，打算走去油麻地附近食下場，見到附近有幾間小店有賣串燒小食。而其中一間泰式小店，似乎幾受街坊歡迎，所以唔介意俾多十蚊雞，再食多串雞肉串燒。

炭火即燒，新鮮熱辣，份量十足嘅雞肉，再加上沙爹汁，充滿泰式風情。
只需咬一啖，就覺得和味軒嘅串燒﹕「(借司長的名句) 完全係垃圾。」
雞肉有少許皮、少許脂肪，非常嫰滑，肉汁豐富，邊咬邊滴。沙爹汁更係頂瓜瓜，少少辣味，中間滲透少許椰香味，仲有香濃嘅花生味。
雖然經歷早前嘅地雷餐，但食番一口沾上美味醬汁嘅雞肉串燒，正好作為療傷，即刻成個人滿足晒。

降呢3.6配五倍西米王

常嚐甜品@尖沙咀
21/8/2011 19:00

知道呢間店嘅佐敦店口碑唔錯，尖沙咀新開冇耐，做過幾次團購。得十丁個評語，但有一半都係俾喊面。$10買到$25現金券，當飯後甜品都算平，最後乜都唔理，照買兩張試試。從來都唔知尖沙咀有個嘉蘭圍，係大街轉入細街背後，位置奇奇怪怪。

門口幾靚，裝修幾得意，但一入到去，感覺好差。七點鐘時份得一位職員，擔當侍應兼大廚。全店有大約二十張細枱，當中有三份二嘅枱上，都有客人食完嘅碗碗碟碟無人收拾。而不出一個鐘後，係食飯後甜品嘅黃金時段，難道哥哥仔可以一個人搞得掂? 真擔心。

呢間舖評語一般，而團購現金券局限左甜品選擇。喺選擇唔多嘅情況下，點左一個較為出名嘅奶凍，另一個求其是但點左個名稱比較特別、出面唔多見嘅大明珠。

北海道牛奶奶凍 ($32，團購價﹕$17)
呢杯奶凍比平時食嘅燉奶還要細杯，用一個界到花晒嘅透明薄膠杯盛載，配上細細個木匙。奶凍有彈性、實在嘅質感，食落口都非常軟滑，而味道好3.6。從廚房外嘅貨架得知，小店真係選用北海道3.6牛奶。感覺上，3.6牛奶可以同「濃」字畫上等號，特色係奶香味特濃，有微微嘅膻香味之餘，亦食得出牛奶本身嘅鮮甜味。奶凍上面有一點朱古力醬，相信店舖有分辨味道嘅用意，但呢一點醬，就搞亂左面層嘅牛奶味道，降晒呢。團購價$17一個，我覺得都尚算OK，但正價$32一細杯，一定唔會食。

西瓜椰汁大明珠 ($27，團購價﹕$12)
一睇就知，大明珠即係巨型版西米，根本就係椰汁西米露加西瓜。一碗有幾粒仔西瓜，加幾十粒仔大西米，加一碗椰汁，就係咁。西米俾人感覺係潔白無瑕、清純無比，其實即係無味，所以可索性高，加果汁又得，加椰汁花奶又得，可以增加甜品嘅煙韌口感。但一粒煮得唔好嘅西米係會過腍，無晒煙韌口感，嚴重者更會痴牙。呢一碗糖水，充滿住幾十粒俾正常西米大五倍嘅大明珠，每粒都充份發揮到西米家族嘅特性，即係有五倍無味、五倍唔煙韌，再加五倍痴牙，實在神奇。都懶得詳講個椰汁，擺明係罐頭現成貨，都可以溝水溝到無味。三樣材料，只需簡單烹調技巧，無太大學問，竟然可以咁差，俾個叻你。

小女子一向好少會劣評甜品，任何甜品只要食得開心，食過滿足，我都願意報以微笑。無好評，都有個中評。特別聲明，本人一向好均真，已經以優惠價黎評論，但呢次經驗真係實在太失敗。但就憑佢一款優惠價值$12嘅無敵大明珠，真係唔喊都唔得。正價廿幾蚊，邊個食呢?

甜品舖唔算細，眼見只得一個人，人手不足係一個問題。連收拾枱面都無時間，睇住啲水果汁四濺，成枱都係野，營造唔到一個舒適嘅飲食環境，店舖裝修得有幾得意、幾新潮都係假。反而某啲老字號糖水舖，地方細細，無靚裝，只得幾排白白啡啡嘅靠牆卡位同圓枱仔，但盡得歐巴桑們努力經營，摩打手拾碗抹枱，即使店舖幾老舊，都唔會介意停留。

團購選擇局限又係一個大問題。知道此店主打新潮自創甜品，好似用原隻水果上菜嘅水果冰、芝士芭菲杯等等。因為團購嘅限制，除左奶凍之外，只可以揀珍珠系列、大西米、西米同迷你西米系列，即係無野好揀。乜團購唔係想做宣傳咩? 點解唔提供最主打、最好嘅野俾人試? 一啲周圍都食到，無任何特色嘅甜品，你做團購都無意義啦，真係當薄利多銷咩? 好好反省下啦!

Oh! My Black List-ed Mamma

Mamma Mia Gelato@旺角
19/6/2011 14:00
18/7/2011 13:00

何謂Gelato正確發音都唔係好sure，只知道佢係意大利甜品，比普通雪糕更低脂低糖，更健康咁話。你買我買$30現金券只需$10，就買兩張試下呢款咁新奇嘅雪糕。

19/6/2011 14:00

Blueberry Cheese & Brownies ($35，團購價$15)

藍莓芝士乳酪 Blueberry Cheese
正正式式第一次食gelato，雪糕口感黏滑，綿密，相信正係gelato與普通雪糕不同嘅質感。普通雪糕比較冰感重同質地鬆散，而gelato係好軟滑，好creamy，帶啲黏性嘅口感。藍莓芝士乳酪係聽到職員推介俾旁邊師奶嘅款式， 一啖食落味道都唔錯。有淡淡嘅芝士奶味，酸酸甜甜藍梅味，味道就似食緊涼冰冰、軟滑但較淡口嘅藍梅芝士蛋糕。

朱古力班尼斯 Brownies
以我認識Brownies係比較硬身嘅朱古力蛋糕，點樣變成gelato呢? 口感一都係軟綿幼滑，以濃郁嘅朱古力做基礎，夾雜左朱古力脆餅同朱古力碎仲有少許果仁，一個非常濃烈、令朱古力魔一啖接一啖嘅味道。味道的確係唔錯，但連嗜甜嘅人士都覺得有啲過甜，好似甜得有點過份。

18/7/2011 13:00

Vanilla Chocolate & Tiramisu ($35，團購價$15)
一拎到上手，已經睇到啲雪糕係溶溶地，直情係流汁果個情況，似乎冷凍並唔足夠，所以一路食都溶得好快。

雲尼拿朱古力 Vanilla Chocolate
就係雲尼拿加朱古力片，雲尼拿係超奶超甜，朱古力片有朱古力濃味。係一款普通不過嘅味道，而都係偏甜。

意式蛋糕 Tiramisu
呢款味道不錯呀，有香香嘅咖啡味，而酒味都特別濃郁，食到一塊塊硬硬嘅係手指餅蛋糕，真係似足tiramisu嘅口感，亦係tiramisu嘅味道，但整體黎講都係超甜。

無何否認，兩次食嘅都係軟滑嘅雪糕，入口即溶，口感上的確唔錯。但以下有幾點係令我地好不爽嘅﹕

1. 除左藍莓芝士係正常味道外，其他三款口味都係超乎正常嘅甜度。自問甜味嘅接受度都幾強，都頂唔順果種齋甜嘅感覺，真係幾膩下喎。

2. 團購網口口聲聲介紹話以$30現金係足夠食到兩個雪糕球，換句話說，團購優惠花費十大洋就可以食到兩球，平均每球五蚊。實際上，試過兩間唔同嘅店舖，都冇任何一款味道係可以$30食到兩球。睇番早前嘅網友食評，的確有部份「紅點」特別版係會貴少少，其餘嘅味道係唔需要加錢。但我睇到嘅並唔係咁，正價兩球已經開價$35，好難唔令我聯想到，佢因為要招呼團購客而特登加價。雖然十幾蚊食個雪糕都係算抵嘅，係合理價錢。但原本期望$10食到兩球，而家要$15，雖則五蚊雞唔算係啲咩大錢，但計番條數，足足係原價值嘅50%。唔係話個五大蚊，而係呢個整整五十個巴仙會令人超級咁不爽。

3. 價目唔老實已經不爽，兩個雪糕球嘅晒史更令人下唔到啖氣。每個球直徑只有大約五厘米，分分鐘可能用三、四啖份量已經完全K.O.。Gelato真係咁矜貴﹖ 而佢都好識得轉移視線，提供一個比正常湯匙仲要細一半有多嘅超細膠匙羹，等你以為可以食多幾啖，但呢個把戲呃唔到我。

4. 網上好多人都有同樣嘅意見，話呢間店嘅姐姐仔態度麻麻。親身經歷，好明確，十分顯然，非常之咁肯定，我係贊成。好多人話每當拎張Coupon出黎俾錢，姐姐仔就會變臉、面黑兼發悔氣。雖然我嘅感受未到咁極端，但的而且確，Coupon人係會被冷落，姐姐們係會擺出一個唔多想serve你嘅態度，亦好想盡快打發你走。老實說，雪糕小店唔需要五星級酒店法國餐廳級數嘅服務，就算職員小姐連最基本唧出一副親切、歡迎你光臨嘅面容都懶的話，姐姐可以唔笑，唔同啲客講多謝，唔多講一句說話都好，唔代表可以用面黑黎趕客。公司做團購都係想做宣傳，即使係冇得賺，賺番個名氣同人氣都係一件好事。倒米、趕客嘅態度只會令客人唔好受，破壞公司嘅形象，口碑生意受損，冇得賺，仲要輸埋個招牌，為乜﹖

對我黎講，只論服務態度呢一個環節，佢今次做團購，係徹徹底底咁失敗。
黑名單-ed，File Closed。

窩夫之謎思vs.不爽層層疊

糖苑@旺角
22/5/2011 17:30

一個完滿嘅晚餐，最後一個step一定係甜品。
問﹕唔係嘛，5點幾就食完晚餐?!
答﹕係呀，我鍾意避開人流呀。

呢間糖苑就開喺隔攝兼吊腳嘅地方，但佢對面街每分鐘都有不下三十人等緊食添好運，會唔會帶旺生意就唔知啦。睇埋下面先講。

趁仲有下午茶餐，就叫左個「栗子紅豆窩夫配朱古力雪糕」，跟餐送糖水綠豆沙。($29)

我淨係識食格仔餅，少食窩夫類物體，唔知點為之好味。
佢個樣比格仔餅厚，個邊比格仔餅脆，整體同格仔餅差唔多腍，同格仔餅差唔多味。
啲饀比格仔餅多左都幾大粒既紅豆、幾夠栗子味嘅栗子蓉，同埋偏濃味少少有粒粒嘅朱古力雪糕。

咁佢其實同格仔餅有咩分別?
「維基百科」解答左呢個謎團。維基老師話「Waffle鬆餅」，又叫「窩夫」、「格仔餅」。
「港式窩夫」就係香港人通常稱之為「格仔餅」或「夾餅」。港式窩夫嘅格仔比較小，一般呈圓形，分成四等份。通常配上牛油、花生醬、煉奶及砂糖，再對摺夾起成半圓狀。

出盡當年考A-Level 做UE Section E既力量，估計糖苑嘅窩夫就係「比利時窩夫」。其實老闆佢自己知唔知呢? 「比利時窩夫」餅身較厚，格仔較大。製作麵糊時會加入酵母、蛋白，所以較為鬆脆。除了可配牛油、糖漿外，還可配搭水果一起吃，也可配冰淇淋。

由此可見，我係支持本地創作既，窩夫襯牛油、花生醬、煉奶同砂糖先係最完美嘅配搭，$10一底已經好滿足，唔洗搞咁多野。

另外，叫左個Oreo木糠布甸 ($34)，係開飯網友熱點甜品。

唔算大件，得個靚字。Oreo粉磨得超幼細，但又佩服佢可以壓得實唔鬆散，層次分明。
我只少食幾啖，所以訪問左負責處理佢嘅姚老闆。
「係考食呀，旦是圓有then er 涸喉既揀姐呀，姣bu爽。」 (譯﹕ 係好食呀，但食完有點兒涸喉嘅感覺呀，好不爽。)
相信係因為Oreo都幾濃味，食得太多，會有啲膩。
食甜品食到不爽，呢間野都真係得架啦。

是日甜品消費共$63
仲貴過我餐晚餐呀，死未。

似拖肥多過焦糖的焦糖乳酪

Yo Mama@尖沙咀海港城

15/5/2011 16:30

Order﹕焦糖味乳酪 (無錯係Caramel焦糖，佢係咁寫既，我信佢) + 糯米糍
拎到上手，幾靚仔呀，個姐姐好有心機唧，仲有多少粒糯米糍，
飽足度都有9分啦!

但其實.....我想話呢..............我覺得佢似拖肥多啲lo~!
第一啖已經feel到食緊拖肥既感覺。
食到尾，仲開始甜到有些少喉乾。
糯米糍都算ok，起碼佢真係夠糯米，相信就係台灣人所謂既QQ。

但問題黎啦。
其實焦糖、拖肥有咩分別? 真係唔知wo...請指教
應唔應去雅虎開個post問，會唔會有機做到熱門問題?

勿論焦糖同拖肥有冇分別都好...

1. 甜、超甜、勁甜﹕冇錯，焦糖應該係甜度幾高既，OK你贏
2. 會令人感到喉乾﹕冇錯，以過往經驗，焦糖應該係會咁既，OK你贏
But...冇左焦糖既精髓所在 - 焦。sorry, 衰左

可能早年去台灣深坑豆腐街食過兩杯叮一聲既豆腐雪糕，佢既味道的確係叮一聲。
深坑豆腐味﹕有種似煙燻、烤焗既味道，正係全街都賣烤豆腐既深坑豆腐街空氣既味道。
焦糖豆腐味﹕有一種焦香，近乎就燶但未燶之間糖既味道

用呢個咁深刻既記憶做對比，牛牛既焦糖味的確係稍遜。
哎吔，原來好多網友都會先試味，呃食多幾啖都好，我地竟然冇做，笨左!
起碼可以試試佢既真材實料原味乳酪。網上風評唔錯，其實，Froyo係咪真係食原味最好呢?
點都好，牛牛乳酪既軟滑幼細口感係我欣賞既!

一杯大杯裝配一種配料，多謝$35
用左你買我買團購$15當$30洗，仲要補多5個大洋，實價$20

總結黎講，都係果句，有電視框會試，但原價我唔會食lo~~~bye bye
I Love 團購!!

吱喳超級痴線麵鍋

麵軒@馬鞍山
1/5/2011 19:30

麵軒，一間台日Fusion餐廳，818團購網幫新出嘅套餐做泡毛，半價食一個手作吱喳麵鍋餐。

手作吱喳麵鍋
牛立方、嗆口甜辣醬配日式拉麵
嫩雞寶、沙沙豆醬配中華拉麵

一個餐一個鍋，半熟嘅材料一碟碟放喺你而前，標榜tailor-made口味，等客人自己揀料，自己炒。一份煮食說明書，教你如何處理。大約流程如下﹕
1. 將油放入生鍋內燒滾，加入蒜茸、乾蔥及生薑片爆至金黃色
2. 當聽到吱吱喳喳的聲音時，再放入雜菌及三色椒炒至微熱
3. 再放入牛立方或嫩雞寶煎至微焦香脆
4. 發出吱喳聲音時，再放入拉麵
5. 最後倒入沙沙豆醬或嗆口甜辣醬
6. 食得
慳番廚房師傅嘅煮菜時間，增加阿姐嘅洗碗時間，將原本應該五分鐘搞得掂嘅麵鍋拆散，等客人自己煮，感受吱吱喳喳，DIY一鍋麵出黎，好一個兼覓!

宣傳品上嘅製成物係如此美觀吸引，梳利，我做唔到。

牛立方即牛柳，有牛味，熟成度剛好的話係算嫰滑嘅。配甜辣醬好惹味，但略嫌太辣，非甜醬。而相信就係所謂嘅日式幼身拉麵，尚叫做得煙韌，撈埋啲醬黎食，都幾入味。

而嫩雞寶即雞球，味道都唔錯，肉汁幾豐富，加埋沙沙豆醬更加好味，醬汁有啲似沙茶醬同沙嗲醬混合體。而估計係中華地區嘅扁身拉麵係完完全全、徹徹底底地失敗。失敗在於麵粉量偏多嘅中華拉麵，喺炒嘅時候，無論落幾多油都好，係完全痴底，炒完之後，相信有三份一嘅麵係痴住個鍋，所以男士係絕對食唔飽。OK，可能係我地手勢差，唔識控制火喉，但中華拉麵食落亦係粉粉嘅，可以話係一條條粉團，用黎炒麵，係絕對唔OK。好玩! 係好好玩，但亦係超級咁痴線。 容我改名為﹕超級咁痴住拉麵線嘅麵鍋，簡稱「超級痴線麵鍋」。

以上一個套餐，跟一杯台式飲品，團購價$29，係食唔飽個男人嘅。
對於叫左日式拉麵嘅女士黎講，係抵食，試下無妨。而叫左中華拉麵嘅男士黎講，係換黎一吐氣咁飽。

麵軒，曾經係我嘅台食頭號食店。有幾樣得獎嘅拉麵天王係值得一再encore，好似芳香排骨拉麵同御品牛肉拉麵，而竹筒飯同鹽酥雞，以及冰震珍珠奶茶亦好有台式風味。
唔知由幾時開始，每食一次，質素就比上次下降一截，亦親眼見住好幾間分店關門大吉。因為franchise式經營，QC力度不足? 算吧啦，我勸你都係唔好搞咁多野，專心做好幾樣得獎嘅菜式吧啦。

為甜品放題平反，替團購重申意義

Bayview Restaurant Sashimi Oyster Bar@銅鑼灣
10/4/2011 16:00

比較少玩嘅豬仔團購網，泡毛$88喺180度無敵維港海景餐廳食五星酒店級甜品放題。講到咁勁，吸引左我去買兩張。臨食之前上開飯網做下功課。
Bar乜鬼bar，咪就係一間樓上cafe，而且有不少劣評話團購中伏。抱住既然買左，就當食飽算數嘅沈重心情去食。

店舖提供17款甜品，並採取1.5小時，每次每人可叫四款嘅限速策略。有你冇你順序由頭食到落腳，全部都最少要試一次。

1. 法式焦糖布甸﹕食得出係即叫即焗，面層嘅焦糖好脆，但可能有少許過火，有些少可以接受嘅焦苦味。布甸好軟滑，蛋味、奶味都好出。整體唔錯，值得encore
2. 一口雙重朱古力布朗尼﹕外層係脆脆嘅，內層係濕濕地嘅朱古力蛋糕，好重朱古力味，好味，encore多次
3. 朱古力泡芙﹕明顯係現成製品，硬硬地一舊粉，內有少許忌廉，面層加朱古力醬
4.一口蘋果批﹕一細粒迷你版蘋果批，粉團包住蘋果蓉拎去炸，炸得幾脆，蘋果蓉味道唔錯，但同我地平時食嘅蘋果批完全唔同
5.木糠蛋糕﹕似乎係主打款式，木糠餅碎同奶油忌廉一層一層舖疊，外型討好，亦都夠實，唔會鬆散。整體味道唔錯，奶油味幾香，果真招牌
6.朱古力慕絲蛋糕﹕質地軟腍，朱古力味超濃，似乎係有少許苦味嘅特濃版本
7.Tiramisu﹕比較軟腍，可可、咖啡、酒味都好濃，但芝士味稍欠奉

8. 一口香蕉芝士蛋糕﹕同一口蘋果批差不多，內容改為香蕉。香蕉味道唔錯，但芝士味虛無。容我幫佢改名為一口炸香蕉餅會更合適
9. 朱古力心太軟﹕都係新鮮即焗，蛋糕部份都幾鬆軟，而內餡係非常之咁流心，朱古力醬味道還可以，有啲似麥提莎。但真係同網友所講一樣，食到有啲咸味，唔通好似食西瓜落鹽咁，用咸味黎帶出個甜味? 大師級技巧乎?

10. 藍梅窩夫格餅﹕格餅好一般，唔鬆軟，淋上冇藍梅粒嘅藍梅醬
11. 荷蘭雲呢拿忌廉泡芙﹕明顯係現成製品，硬硬地一舊粉，內有少許忌廉
12. 士多啤梨泡芙﹕同上
13. 朱古力冬甩﹕基本味道同上，只係面層塗左朱古力，雪硬左嘅成品
14. 朱古力脆皮忌廉條﹕同上
15. 黑森林蛋卷﹕好明顯係嘉頓迷你瑞士卷切件上，誠意不足
16. 芒果蛋卷﹕同上

 

17. 原味梳乎利﹕焗得好鬆軟，表面焦焦好吸引。蛋白味幾香，但有幾粒砂糖未完全溶晒，請俾多兩分心機打蛋

整體黎講，今次團購並唔算中伏，反而借機想幫佢地平反。
先利申﹕我同Bayview絕冇利益關係，亦唔係打手賣廣告，只係食完感覺良好，想拔刀相助

Q﹕有網友話餐廳嚴重限速，出菜慢，只能夠食到2rounds
A﹕出菜唔快係理解嘅，你要人地新鮮即叫即製，又唔俾時間人，咁你想點? 而我地嘅記錄係﹕每款由頭起先叫一次兩個人分，當做試味。再精選其中六、七款，每款每人食左1至2次，咁算食到幾多round? 總之我好飽。

Q﹕總結網友大部份劣評係講﹕食物細細粒，孤寒到死，選擇又少，味道又唔得，食西餅好過咁話
A﹕人家講到明係一口甜品，唔細粒，請問你可以食到幾大粒? 而細細粒正好俾你食多幾轉，細粒唔係放題最佳晒史嗎? 選擇少，我認同，得十七款係少。味道就見仁見智，有部份係好唔得，誠意不足，但招牌幾款確實係做得出色，有本事可以怒食，橫掂唔洗加錢。

Q﹕網友小姐鬧爆話餐廳唔俾窗口位佢坐，睇唔到180度全海景咁話
A﹕我想話我都坐唔到窗口位，但我都望到個海景。人家舖仔細細，坐得果十零人，唔係你坐窗口就佢坐架啦。人家又冇呃你，佢真係有全海景，至於係唔係180度咁無敵，未度過唔知，本人亦都唔care。

Q﹕好多人就呻$88咁嘅質素，原價要$168，又話咩酒店級，完係唔值，再外加十個感嘆號
A﹕團購最邪惡之處係將個正價誇大，令你覺得你得到咁多折扣好抵。如果話俾你知呢餐原價係$880，而家你一折就食到，唔通你會覺得好味左? 定係你真係用$880呢個價去評論? 有咁大隻青蛙隨街跳麼? 其實最中肯嘅係用優惠價同該餐嘅質素做性價比，原價只不過係考慮下次再去嘅可能性。團購係俾機會你用優惠價試食，好味的話，客人會願意用正價再幫襯，呢個先係成功嘅宣傳，相信亦係團購嘅其中一個目的。

$88一人價錢食呢一餐，係合理嘅，至少我倆係咁認為。焦糖布甸、布朗尼、Tiramisu、木糠蛋糕、朱古力慕絲同心太軟我係覺得唔錯。以同一個質素，一個正常晒史，求其一間甜品舖作價四十蚊一款走唔甩。計算Bayview每款甜品平均晒史比正常細一半有多，就以$15一款黎計，以上六款各食到一次已經番本。未計街邊甜品舖冇海景俾你睇，又未計你飲左唔多覺，人家送嘅一杯沙冰特飲，更未計侍應姐姐仔走出走入送餐幾次都繼續笑住為你落單嘅殷勤服務，咁你霸左人地個位粒幾鐘吹水吹水再吹水，呢個樓上cafe嘅最低消費又點計先?

$88係合理嘅，並非中伏。
但....講咁耐，正價$168我係唔會再去的。多謝各位。