星級發泡千奴

Starbucks Coffee
31/7/2011 15:00
27/5/2012 21:30

@荃灣
31/7/2011 15:00

第一次正正式式坐低嘆星巴克咖啡。繼上次大阪街頭得靚仔哥哥邀請試飲過後，今次第二次嘆星冰樂。星冰樂又有新口味推出，花生系列，有花生朱古力咖啡同花生碎朱古力忌廉。黎到星巴克，無咖啡因飲品唔會係我杯茶。

花生朱古力咖啡星冰樂 Peanut Mocha Frappuccino (大杯 $43)
忌廉唧得高高，再加埋一絲絲焦糖花生醬，配上有花生成份嘅莫卡咖啡。星冰樂相信係類似坊間所講嘅沙冰。淡淡咖啡，香甜嘅牛奶，加上濃郁嘅朱古力醬，用冰打得細碎。莫卡咖啡嘅味道比期望偏淡，可能因為配上冰塊打碎，沖淡左咖啡味道。但莫卡咖啡之中，有多陣花生味。花生味糖漿係主角。

沙冰嘅幼滑亦係我好欣賞嘅。好多樓上卡飛，三、四十蚊一杯所謂乜乜沙冰，冇錯，佢真係沙冰，粗糙嘅冰粒仍然存在，就好似食緊一啖沙。星冰樂嘅口感，非常幼滑，有粒粒嘅質感，但整體感覺柔滑，滑溜到近似奶昔嘅感覺。

頂頭嘅香滑忌廉塔，仲有焦糖花生醬，令整杯咖啡生色不少。一大啖嚐過原汁原味，濃厚嘅花生醬忌廉後，豪不客氣就將整個忌廉浸入咖啡。忌廉同咖啡融為一體，再多一分奶味，多一點幼滑，正合我心意。

一杯閒置左兩小時嘅星冰樂，冇任何冰、啡分離嘅情況，味道仍然好，星冰樂係成功嘅。
總結多次去樓上卡飛飲野嘅經驗，六十個分鐘，足夠令一杯沙冰完完整整咁分離成冰同咖啡，只需多一下嘅攪拌，足以令佢變成一杯淡過水嘅咖啡。

四十三蚊，一杯飲品，其實真係幾貴。但，佢係一杯咖啡，所以感覺冇咁貴。
四十三蚊，一行五人吹水飲野hea時間，坐足三個鐘，平均每小時十幾蚊，我覺得好合理。
四十三蚊，買一杯比樓上卡飛大杯，兼且好飲一百倍嘅飲品，我覺得值。
四十三蚊，買佢一個品牌。

@鑽石山
27/5/2012 21:30

今期星巴克新出左三款星冰樂特飲，有草莓忌廉豆奶、焦糖咖啡啫喱同曲奇脆脆朱古力咖啡星冰樂。見今日口淡淡，快啲用埋睇廣告儲分兌換番黎嘅廿蚊現金券先。

曲奇脆脆朱古力咖啡星冰樂 Mocha Cookie Crumble Frappuccino presented by "I'm Sad!" Hello Kitty (大杯 $45，Coupon價$25)

今期呢個發泡千奴係莫卡咖啡加曲奇嘅配搭，呢個組合根本無得錯。頂頭嘅忌廉係朱古力忌廉，頂級幼滑係絕對無講錯，香濃程度都可以接受。冰底係莫卡咖啡，同前款一樣，偏淡口味，只有淡淡嘅朱古力咖啡味，中間有一粒粒嘅曲奇脆脆。曲奇味唔算突出，咖啡味又淡淡地，始終遠遠不及熱咖啡咁濃烈，呢個係貪涼爽必須要承受嘅後果。不過只需要撈埋頂頭嘅忌廉，口味變得更好。沙冰仍然幼滑帶少少粒，超清涼解渴。

但係，四十五大洋，真係好貴，好彩睇廣告換左張廿蚊Q-pon，如果唔係，一定唔捨得飲。

揭開掘頭巷後的神秘面紗

越色牛肉粉餐廳@尖沙咀
27/5/2012 19:00

喺海防道一個商業大廈底下，經常有唔少人由樓梯行落黎，究竟啲人喺邊度黎，團購就幫我解開左呢個疑團。筍仔網$118食到清新開胃二人越式晚餐，包括小食、粉麵、甜品，仲有飲品，非常豐富。

越色春卷
越色春卷可算係個人最愛越式小食，貪佢內餡夠豐富，沾魚露最正。呢件春卷真係非常澎湃，外皮炸得脆脆，非常乾爽，唔過份油膩。春卷皮包住蘿蔔、粉絲、木耳、雜菇等材料，材料全部切得細碎，所以非常有層次感。配上酸酸甜甜、少辣嘅魚露，味道唔錯，一人得半條實在唔夠喉。

牙車快沙律、豬頸肉串燒

賣相非常吸引，連平時唔好沙律嘅二人，睇見沙律咁色彩繽紛，都不其然口水直流。沙律材料非常多，唔少得新鮮椰菜絲、洋蔥絲、蘿蔔絲等指定主角。除此之外，仲加左海哲、炸蒜片等，配上魚露汁。味道甜甜酸酸，少少辣，實在超級惹味，亦帶好香嘅香茅味，好清新醒胃。難得咁俾面，唔客氣全碟掃清光。

豬頸肉串燒都唔錯，肉質好腍好爽口，而且入味。香甜嘅沙嗲醬充滿住花生香同蒜香，一人只得一條又係要投訴下，簡直吊人胃口。

炭燒香茅豬扒撈檬
試過三款小食之後，對主角更加之期待，果然無令人失望。兩碗粉份量都大得驚人，除左檬粉超多之外，連上面嘅材料都落得慷慨。撈檬嘅配料仲有多款選擇，有齊芽菜、青瓜絲、蘿蔔絲、洋蔥絲、炸蒜蓉魚仔等。無需要多加餸，配料送檬粉都夠好食。檬粉亦做得唔錯，起碼夠乾爽，煮得唔算太腍身，仍然保留煙韌爽口嘅感覺。檬粉唔會痴埋一餅，條條分明，好易夾，亦應該要讚多一下。拌上自由任加、起勢狂倒嘅越式魚露，檬粉更加好食。呢度嘅魚露味道都唔錯，蒜味亦足夠。個人較為鍾意偏酸口味，呢度似乎加左醋提升左酸味，幾喜歡。撈檬嘅主角係超大塊炭燒香茅豬扒，係唔係炭燒真係無辦法考究，但豬扒的確燒得香噴噴，充滿燒烤嘅焦香味。豬扒相當鬆軟，甜甜嘅蜜糖燒汁之中，帶濃郁香茅味，屬驚喜之作。

雞扒撈檬
另一碗雞扒撈檬其實同以上一款差唔多，只不過將豬扒換上雞扒，一樣都係大大塊。雞扒嘅調味都係用左蜜糖香茅燒汁，一樣夠腍夠入味，而且仲相當juicy。

馬拉盞炒通菜
套餐仲包括一份馬拉盞炒通菜，千祈唔好以為炒菜只係普通配角，但呢個配角唔野少。通菜好幼嫰，加上馬拉盞、蒜蓉同辣椒拌炒，好夠鑊氣，非常吸引食欲。

青檸梳打、鹹梅七喜
呢度嘅越式特飲係梳打系列，青檸梳打就無乜特別，但鹹梅七喜更為討喜。梅子鹹鹹酸酸，撈埋七喜，非常合拍。更值得欣賞嘅係，冰唔算太多，唔知點解仲溶得好慢，飲到最尾都無溝淡晒。

越色千層糕 Presented by "I'm At Home!" Hello Kitty
估唔到甜品椰汁千層糕係熱食糕甜，不過味道好好。千層糕營造到一層韌、一層軟兩種口感，而且椰香味十足，熱辣辣配上椰奶更加正斗。

完成晒呢個豐富嘅越式二人餐，由前菜小食到甜品，都係有讚無彈，其實呢度水準唔錯，起碼絕對岩口味。補番加一，大約百四蚊埋單，價錢合理。不過話晒團購價平左一半，正價真係偏貴。但係，餐廳人流唔多，坐得非常鬆動，大班人黎食都唔怕無位。而且員工態度親切，服務殷勤體貼，下次大班人Gathering可以考慮再黎。

借團購搵食機會，今日一去先知，原來海防道神秘樓梯嘅背後，就係亞士厘道嘅盡頭，呢條街收埋左唔少餐廳同酒吧，呢間越色牛肉粉餐廳就喺其中一間。呢條街就好似哈利波特魔法世界中嘅斜角巷，衝過麻瓜街道，轉眼間就係魔法世界嘅購物街。原來喺人來人往嘅海防道後面，係一條充滿外國風情嘅神秘食街。

車軚迫比薩

Big Pizza@尖沙咀

28/5/2012 13:00

尖東有一間小店嘅門面經常都攝住我嘅目光。喺極度細少嘅玻璃櫃中，放住八個異常巨大嘅Pizza，成個構圖相當得意。呢個車軚咁大嘅Pizza做團購，正係試味嘅好機會。谷旁$25可以買到12吋特大薄餅一件同飲品一杯。

夏威夷薄餅 ($35，團購價$25)、燒雞肉薄餅 ($35，團購價$25)

比薩實在太大件，無能力影到四正嘅相，惟有借Po谷旁張宣傳相。完整一個比薩有貨櫃車車軚咁大，直徑足足有24吋長。團購餐$25包一件裝薄餅，份量都唔小野，係一個大紙碟都裝唔晒嘅12吋長三角形。柯打後，店員將Pizza放入焗爐翻熱，再將Pizza放喺大紙碟上，再要對摺先可以放入紙袋。拎上手非常有重量，真係份量十足。

薄餅底唔算厚，但質地尚算鬆軟，部份位置比較香脆。不過最吸引人嘅，係表層嘅材料。內餡份量十足，鋪滿半溶化嘅芝士，散發住誘人嘅香氣。蕃茄醬酸酸甜甜，加上濃郁嘅水牛芝士，味道已經好正。夏威夷薄餅仲有有火腿、甜蜜蜜嘅菠蘿，非常清甜開胃。而燒雞肉薄餅有大大件燒雞、洋蔥、蕃茄粒、青椒粒等，材料非常豐富，啖啖肉。

兩款特大巨型比薩兼覓十足，而且味道都唔錯，材料豐富，醬汁又夠多。食一件已經夠做午餐，非常飽肚，$25抵食。得閒行過都可以買件當做lunch呀。不過最衰就係，只得外賣，買完之後，要搵個商場冷氣位先得有開餐。

重返佐敦食點心見團購也通脹

廣州點心皇@佐敦
20/5/2012 19:30

對上一次黎佐敦食點心係一年前嘅事，仲記得係團購廿幾蚊食三個點心做下午茶。一年後又做團購，今次$75食八款點心。晚餐黎食，除左八款點心之外，仲自費叫多三樣野，食個飽飽。

蘿蔔絲春卷
兩條春卷炸得非常香脆，一咬開，脆皮就爆裂，可見春卷皮又薄又脆。中間內餡澎湃，不過係清一式白蘿蔔絲，味道都幾好嘅，但略嫌悶場，而且好似有陣油味，惟有狂加喼汁浸死佢。

炸雲吞

雲吞夠大隻，外皮一樣炸得脆。皮同內餡嘅比例唔過份，起碼中間真係有蝦肉餡。唔似得有啲地方，雲吞就大大隻，炸皮超大塊，咬極都未食到啲餡。呢隻雲吞係鮮蝦雲吞，中間嘅蝦仁非常爽脆，配埋甜甜酸酸嘅醬汁正好。

蜜汁叉燒腸
腸粉係傳統式厚實版本，粉皮超厚，仲係粉粉地。煙韌尚可，但勁痴牙，質感較為糊口。中間嘅叉燒似乎香味不足，非常結實，認真麻麻。

鳳爪排骨飯
呢度嘅蒸飯係原盅裝飯，再放入籠仔之中。鳳爪有半隻腳，排骨就幾多件，味道都唔錯。飯蒸得夠乾爽，粒粒分明，可惜餸菜嘅味道未能滲入飯中，似係飯熟左後，就咁放材料上去。不過呢度嘅豉油的確好味，相信係小店特製，味道甜香，撈飯一流。
 

淡水鮮蝦餃皇

上次都試過呢款蝦餃皇，其實都係OK的，皮略為厚身，相當煙韌黏口。蝦夠多，啖啖蝦肉，而且非常新鮮爽口。不過就無常見嘅筍尖，味道唔夠豐富。

 

蟹皇蒸燒賣 ($18)

燒賣可算係我最鍾意嘅點心，呢個燒賣啖啖肉，非常結實爽口。肉同蝦都係超大件，真材實料，而且唔肥膩，唔錯。

潮州蒸粉粿 ($13)
潮州蒸粉粿出左名塊皮比一般點心厚，不過呢度嘅粉粿皮比一般嘅仲要厚身，簡直厚到離晒譜，相當煙韌黏口。好彩皮厚餡料亦唔少，有齊花生、蝦米、蘿蔔絲、粉葛、芫茜等，口感豐富，相當飽滿。不過似乎同街邊三蚊一粒分別唔大。
 

古法馬孻糕

呢個馬孻糕係細細個圓形整個上，唔係切件版。質地都算鬆軟，味道微甜，可惜唔夠香。

流沙奶皇包 ($18)

本來想叫菠蘿包，點知菜單應該更新左，好似唔多覺，最後叫左個奶皇包做甜品。一咬開鬆軟嘅包皮，奶皇餡就爆發出黎，流沙程度可觀。奶皇餡夠香，仲混合左鹹蛋黃嘅味道同沙沙嘅口感，唔錯。

 

凍紅豆糕、杞子桂花糕

套餐包括兩款凍糕點，紅豆糕椰汁味可以，不過啲紅豆勁硬，而且冇乜味道可言。杞子桂花糕就唔錯，非常香甜清爽，充份表現到杞子同桂花嘅香味。
 

團購套餐$75，加埋另叫嘅三款點心，總數$124。今次試多左幾款點心，發現都係傳統嘅籠蒸點心稍為好啲，其他就一般啦。不過最吸引就係，呢度每款點心嘅價錢唔貴，仲要免加一，都算抵食。不過，對比一年前嘅團購優惠，原來團購都通脹左一成七，你睇物價高脹得幾厲害，團購也加價。

 

前篇參考
22/5/2011
ドロロ春卷配矛盾菠蘿包

岩手風情拉麵

岩手拉麵@旺角
20/5/2012 13:45

岩手拉麵係元朗人氣拉麵店，結業之後，喺旺角復活。新開張無耐，就喺筍仔網做團購，半價$28食一碗九州拉麵。呢間小店唔易搵，手揸地圖，喺廣華街行左兩轉，都搵唔到間舖，原來喺某個轉角位。小店真係小店，全店只有十幾個位，而且冷氣唔多夠，食完快快走。

九州拉麵 ($55，團購價$28)
一碗九州拉麵，碗就相當大，但份量偏少。蛋白拉麵沈浸喺豬骨湯之中，配上兩片日式叉燒、半隻溏心蛋，以及其他配料。

米白色嘅湯底係自家熬製嘅豬骨湯，質感幾忌廉咪，甜甜嘅豬骨味，有淡淡嘅味噌香味同蒜香，調味做得唔錯，幾香甜濃郁。油份唔算多，尚算清爽，但未能吸引我飲得一滴不漏。呢個拉麵比一般拉麵淡色，據聞係以蛋白為主嘅特製拉麵。直身幼細嘅蛋白拉麵相當結實爽滑，煙韌彈牙。可惜味道比一般拉麵淡口，欠缺蛋香，而且未能掛湯，個人都係偏好全蛋麵。

至於材料方面，日式叉燒脂肪分佈平均，半肥瘦嘅肉質口感更加爽滑。肉味香甜，但外加嘅醬汁調味似乎不足，只有好輕微炭燒味道，可能佢想突顯豬肉嘅原味，又的確可以嘅。另一主角係溏心蛋，蛋無再用醬汁滷過，只係清一式白烚。不過熟成度剛好，蛋白夠軟滑，而黃蛋係半漩固嘅狀態。其他配料仲有粟米、紫菜、青蔥等。

不得不提，自動送上嘅一杯麥茶，香味非常，清甜可口，味道比拉麵仲要深刻。整體黎講，質素只係一般。最大問題係份量少得可憐，實在唔足夠食飽人。此店仲有一個只准柯打一次嘅規矩，令到未能食飽嘅客人都無得繼續消費。個人明白一次柯打令入單、出菜、付款都簡單快捷，又可以盡快離席俾位下一批客人，但真係唔知好事定壞事。

聽聞師傅喺日本學做拉麵多年，小店採用半開放式廚房，旁邊仲有高身吧枱，俾客人睇住師傅嘅拉麵表演，幾有日式街頭拉麵店嘅風味。更具風味嘅係，師傳大聲夾惡，一邊煮拉麵，一邊訓示徒弟，充份表現到鮮明嘅主僕角色及廚房文化，都不失為一幅另類日本風情畫。

親子一鍋熟的學問

丼丼屋食堂@大埔
17/5/2012 13:00

近日又殺出一間主打日式丼飯嘅專門店丼丼屋。難得一間以丼飯掛帥嘅日式料理，其實一早已經想試，但多間分店嘅人氣都相當鼎盛。趁午飯時間人唔多，先試為快。黎得呢度，當然要試最傳統、最正宗嘅丼飯，親子丼可算係丼飯界之中嘅元老。所以，一坐低，可以話餐牌都唔洗睇，就黎一份滑蛋雞肉丼定食。

滑蛋雞肉丼定食 ($53)
午市定食包括一個丼飯、蘿蔔漬物、蕃茄沙律同麵豉湯，份量相當充足，而且賣相吸引。蕃茄沙律份量都唔少，一大粒車厘茄新鮮爽甜，同水果無異，非常清爽。配上清脆嘅生菜同甜粟米粒，只加上少許柚子沙侓汁，絕對係開胃之選。麵豉湯味道正常，配料有炸豆卜同幾片紫菜。

滑蛋雞肉丼係日本傳統嘅家常丼飯，個人認為呢碗親子丼嘅賣相都相當日式。首先裝飯嘅碗口非常夠大。材料由親子鍋滑落碗，應該可以剛好完整盛載，保持整體造型，賣相先夠精美。另外，話明係親子丼，即係最殘忍嘅全家一鍋熟。一鍋熟得黎，親同子都要充分融合，難捨難離。所以，蛋一定要夠多，一般日式做法，一份最少要用上兩隻大蛋。蛋嘅形態係親子丼嘅一大關鍵。要營造到兩個層次嘅口感，分別係七成熟、稍為結實嘅固體狀﹔另一款係三成熟，滑不溜口嘅半液態狀。相信大廚都有跟足日式做法，雞肉將熟嘅時候，先加一半蛋液，待凝固後，再補充第二層蛋液，稍焗十秒即可上碟。送到客人面前時，蛋正好係半熟、半不熟嘅完美呈現，而雞肉就被幼滑嘅蛋漿包圍黏附，真正嘅一鍋熟。

丼丼屋用上日本唔知邊度嘅蛋，除左滑溜到離晒譜之外，其實蛋香只屬一般。好多食客都有微言，話雞肉無除無味，其實輕量調味，亦係日本人嘅煮食文化。薄鹽醬油先可以品嚐到食材嘅天然美味。可惜此雞不同日本雞，嫩滑尚可，惜雞味一般，所以先會惹來投訴。

親子互相融合之外，亦要同飯成為一整體，醬汁嘅角色都係功不可沒。日本料理一向味道偏淡，略甜。親子丼醬汁有好香嘅甜醬油味，亦有味醂酒香提味。醬汁簡簡單單，無過份厚鹽濃醬，正係日本料理養生嘅原因。醬汁中帶有洋蔥嘅香甜，令本來薄弱嘅蛋味，多幾分清甜。醬汁滲透喺飯粒之間，令整體味道融為一體。

丼丼屋選用日本新潟縣嘅秋田小町米。秋田小町米嘅甜度、彈性同黏度，堪稱米中之最。店方更採用高科技過濾系統，用優質食水配一級米飯。的確，親子丼嘅飯粒，粒粒都晶瑩剔透，扎實飽滿，食起黎比較煙韌有嚼勁，非常香甜。只不過醬汁嘅水份略嫌過多，飯粒未能吸盡每一滴醬汁，飯底出現網友所講嘅水浸情況，米飯過略為濕潤。某程度上，亦削弱左珍珠米嘅價值。

題外話，一埋位坐低，職員就送上一杯凍白開水，總覺得呢杯水比一般過濾水更清甜，更好飲。返到黎睇網上介紹，先知道原來餐廳用上果部超高科技濾水系統，唔知呢杯白開水係咪用呢部機特製，如果係的話，呢部機堅係有料到，又順面讚下自己嘅舌頭都相當靈敏。

製作一碗最傳統、最家庭式嘅日本丼飯，其實大有學問。丼丼屋背後亦花左唔少心機去營造最日式嘅味道，實在值得欣賞。食物味道講唔上超級好，仲有唔少進步空間。但五十多蚊嘅定食，係食足一百蚊心機同技術，其實係物有所值的。而且餐廳裝修都好日本化，舒適闊落嘅枱椅配別緻餐具。餐廳職員都好日本式熱心招待，的確有日本食堂嘅風味。

不過，最令小女子Happy呢就係，無啦啦被抽中做問卷調查。完成之後，無條件賞三十蚊現金卷下次消費時使用，所以點都會黎多一次，再試另一款和風丼飯。

休閒美式星期一

T.G.I Friday’s@尖沙咀
14/5/2012 12:00

玩團購除左可以抗通脹，更可以見識到平時唔會去嘅餐廳。今次蜂買介紹我去一間位於尖沙咀嘅美國餐廳，睇介紹就相當吸引，最後有六千幾人買左。優惠價$58包一份美式午餐，有齊餐湯、小食、主菜、甜品，汽水仲無限任飲。臨幫襯之前，慣性上開飯網睇下風評，點知近期新鮮嘅團購客食評，都係清一式喊臉。最後決定搵個平日中午，希望趁人少少，應該會好啲掛。

是日餐湯

無細問侍應是日餐湯即係乜野湯，但飲落覺得唔錯，估計係海鮮類忌廉湯。入口有好香嘅蝦、蟹味，亦有好濃郁洋蔥味，似係用海鮮殼餚製嘅湯，好有濃蝦湯嘅感覺。入口軟綿綿，相當杰身。味道就唔錯，但溫度唔熱偏凍，唔通佢係凍湯? 但又好似唔多夠凍。

洋蔥圈

小食揀左兩份洋蔥圈，一份四個圈，炸得四四正正，圈圈非常完整，無甩皮甩骨。外皮非常酥脆，炸粉唔過份，油份亦唔多，中間嘅洋蔥好鮮甜爽口。

蒜蓉鮮蝦意粉
意粉份量唔少，蝦仁數量真係超多，每一口意粉都可以配一粒蝦。蝦仁非常爽口，只用少許鹽、黑胡椒提味，但唔好期望好有蝦味。幼身扁意粉煮得略為腍身，但調味唔錯，用上蕃茄粒、蒜蓉調成醬汁，仲加左唔少巴西里，非常香。

海鮮雞肉飯
呢個海鮮雞肉飯比較似東南亞菜式，飯底加左咖哩，味道幾香。配料有超多蝦、少許紅青甜椒粒，仲有少少雞粒，但就唔見其他海鮮料，極其量只係鮮蝦雞肉飯，不過味道都OK。

布朗尼
即叫即整嘅布朗尼，送上時個碗仲係暖笠笠嘅。面層嘅雲尼拿雪糕開始溶化，證明下面嘅布朗尼蛋糕係超熱。布朗尼外皮脆脆，非常鬆化，中間軟腍濕潤，朱古力味超濃。可能按照美式口味，所以甜品味道偏甜，不過跟埋凍冰冰嘅雪糕，混合一齊食，相當滋味。朱古力魔必定鍾意。

團購價補番加一，每位六十多幾蚊，對比食物質素，係可以接受嘅合理質素。雖則並無超值抵買之感，但並唔係網上食評所寫咁糟糕，可以話絕對唔係一個伏，只係當正價食一個西式午餐，不過環境實在好很多。

老實說，單憑餐廳環境、氣氛，已經值得加分，俾個笑臉。超高樓底、寬敞空間不在話下，餐廳嘅佈置裝飾都非常特別，的確營造到六、七十年代嘅美國情懷。落地玻璃窗之外，雖然無環迴一百八十度全海景，但景觀相當開揚，環境非常休閒舒服，值得嘆一個下午。

餐廳職員講唔上好美式嘅熱情開朗，但起碼態度親切有禮，無出現十問九唔應、你睇我唔到嘅情況，亦絕非hea底人士。至於食客怒罵慢到無朋友嘅上菜服務亦未曾遇到，菜式大約十分鐘就送到，係可以接受。

是次進餐，都特意避開假日黃金時間，選擇平日幫襯。亦都過濾晒所有網友劣評嘅菜式，包括只得兩片菜加沙律汁嘅所謂凱撒沙律、連快餐店質素都不如嘅起司培根漢堡，以及又乾、又柴、形同焦炭嘅燒牛肋骨拼盆等。所以，我地所點嘅意粉同炒飯都係可以接受嘅正常水準。

可能我地呢個策略行得通，或者真係咁好彩無事，又可能，抱著零期望嘅心情，好容易得到出符意料之外嘅回報。好多覺得disappointed嘅網友都話食過一次就夠，絕對唔會再翻轉頭。對我黎講，我都應該唔會翻轉頭，始終對呢啲貴價美式餐興趣不大，都係一次就夠。但不得不承認，今次團購都係一個幾特別嘅新體驗，亦令我舒舒服服地hea左一個休閒下午。

溫情肥龍穴

四海遊龍@紅磡
13/5/2012 13:30

呢間被我地稱為四海肥龍嘅餐廳，早一排好似執下又一間，仲以為絕左種。點知突然殺出一個團購，先知道仲有唔少分店在生。今次$31可以食一個豐富台式餐，有牛肉麵、鍋貼，仲有豆漿，真抵食。其實十二點至兩點呢啲黃金時間係禁止使用優惠，但見一點半到場人少少，膽粗粗問下龍頭大老闆可否破例，佢又好唔介意俾我地入座，真係唔該晒。

正宗台灣牛肉麵

牛肉麵超大碗，除左個碗大，份量亦多。台式牛肉即係類似厚切牛展嘅物體。可以話，牛肉份量仲多過團購張宣傳相，足足有七、八大件。每件牛肉腍得黎不失嚼勁，膠質亦相當豐富，燘到入晒味，充滿紅燒香料味道，牛味亦濃郁。麵底係手打拉麵，唔算好滑溜，但幾鍾意煙韌爽口、微甜嘅感覺。所謂嘅牛肉湯，係清湯之上加些少紅燒牛肉醬汁，味道較為香濃，入口微甜，帶輕微豆瓣醬香辣味，可惜牛味欠奉。不過，呢碗麵算係交足功課，絕無偷工減料。

招牌鍋貼

每份團購餐都跟六隻招牌鍋貼，兩份十二隻一碟上，實在豪邁爽快。只睇賣相，呢碟鍋貼絕對唔差。即叫即煎，熱辣辣嘅長條形鍋貼，的確係貼貼服服咁貼住隻碟。外表煎得恰到好處，金黃微啡色，不帶一點焦黑。鍋貼外皮又薄又香脆，咬時仲聽到清脆嘅索索聲。內餡係簡單嘅豬肉、椰菜、洋蔥等，配搭非常清爽香甜，鮮味十足，肉汁都好豐富。加埋隨手任加嘅黑醋配蒜蓉，實在非常惹味。

豆漿

隨餐附送嘅豆漿，真係夠大杯，足足係一般上海舖三倍份量。豆漿夠凍，微甜，有淡淡豆香，絕對係飯後清爽嘅好配搭。

印象中，覺得呢間肥龍生意麻麻，所以分店越來越少，唔係今次團購，真係以為佢絕左種。今次再試，先發覺佢嘅質素其實唔差。不過，唔少網友話，位於美食廣場之中嘅幾間分店，質素完全唔得，所以劣評爆多。雖知道呢間野都係特許經營，估計食材都係由總部製作再分發，理應有充份監控，控制水準。但真係唔知點解，好多食肆都會出現同樣情況，分店數量同劣評數量係成正比，尤其以特許經營嘅食肆更加嚴重。相信呢個都係為食貓們，唔鍾意食連鎖霸權，寧願捐窿捐罅、四處尋食嘅原因之一。但個人就覺得呢間紅磡分店係OK嘅。

不得不讚多下，呢間紅磡店雖然店仔細細，只係簡單企理嘅茶記款式小店，但員工上下都非常好修養，禮貌一百分，態度一百零一分。每奉上一碟鍋貼、一碗麵，甚至一杯豆漿，都會送句多謝。由入場到離席，屬於我倆嘅多謝次數，應該不比果碟鍋貼少。呢餐係充滿溫情、人情味嘅豐富午餐。雖則一入場已表明團購客嘅身份，但店方絕無任何一絲歧視成份，態度仲好到令人唔好意思。所以我地都諗住叫多一兩款小食，等佢賺多幾個錢。可惜，呢餐實在太豐富飽足，無能為力，惟有下次。

又白又滑的阿婆

阿婆豆腐花@大埔
10/5/2012 15:30

大埔墟有間每分鐘都有人排隊嘅名店，除左區內街坊之外，仲有唔少區外人士專登黎幫襯。賣嘅，只係獨孤一味嘅豆製品，但受歡迎程度，絕對係大埔墟之中最強。

豆腐花 ($7)
呢碗豆腐花嘅一大吸引力，係滑到離晒譜嘅口感。豆腐花面係超級白滑，非常柔軟。經常唔覺意，就會大力一索，豆花直衝入喉嚨，快過閃電。豆腐花絕對係入口即溶，水感非常豐富，可算係個人記憶中，史上最滑豆腐花。可能係水份較多，豆味唔算濃郁，呢個應該都係滑滑豆花嘅常見問題。豆腐花本身加左微甜嘅糖水，再自助任加黃糖，熱力慢慢溶化糖粉，味道更加香甜。

呢間小小嘅豆腐花店，可算係覓食大埔嘅地標之一，任何時間都堆滿立食嘅人潮，因為呢度絕對係平靚正嘅下午茶首選。即場立食一碗只需六大蚊，外賣加多一蚊，可以拎番公司慢慢嘆。

順帶一提， 除左豆腐花之外，豆漿都相當清甜抵飲，而腐乳都OK抵買。

嘆滋味卡巴。看重慶噴幼文化

Bismillah Kebab House@尖沙咀
2/5/2012 13:00

呢排驚驚地團購泡沫，所以近排多數只會買筍仔網同谷旁嘅團購，總覺得信譽稍為好啲。$25買一個重慶大廈嘅中東雞肉卡巴加汽水套餐，試新野。

一份中東雞肉卡巴，原來係勁粗一大條，切開一半都好大件。一次過換兩張券，總共四大件卡巴，午餐都夠飽。

雞肉卡巴脹book book，材料好豐富。外皮唔算脆口，反而感覺輕微煙韌。外皮包住豐滿嘅餡料，餡料多到好似經過壓縮，實實在在夾埋一堆。材料有洋蔥、生菜、蕃茄、雞肉等。雞肉超級多塊，塊塊都係大大件，結結實實，並唔係雞米粒。雞肉唔柴口，有好香濃嘅燒烤味。加埋生菜、蕃茄配合得恰到好處，口感爽脆，非常清新，即使雞肉汁唔算多，但蔬菜正好彌補呢個不足，整體唔太乾身。中間嘅醬汁更係靈魂所在，食得出有類似燒烤醬同千島醬嘅味道，亦帶少許印度香料味，同雞肉、蔬菜真係好夾，香而不膩。呢件卡巴實在有中東嘅味道，但口味又未至於難以接受嘅出奇味道，個人認為正好。

一份卡巴配埋飲品，份量足夠女孩子嘅午餐，團購價$25，正價的話，就$51一份。呢個團購$25抵俾，兌換到嘅唔只係好味嘅卡巴，仲有一個小社區嘅新奇體驗。

咁大個人從來未入過重慶大廈，今次為左食野，順便行左個圈。重慶大廈就好似自成一國嘅小社區，黃皮膚嘅香港人先係外國人，黑媽媽嘅印度噴幼先係本地人。佢地人多勢眾，個個牛高馬大，老實說，其實真係有啲驚。急急腳走上樓上，人流比較少，熱鬧情況似乎唔夠樓下咁旺盛。就喺一樓嘅盡頭，終於搵到呢間連個名都唔多識讀嘅食店。等食期間四圍八下，總覺得無我地嘅落腳點，名副其實坐立不安。

食物黎到嘅時候， 選擇左靠牆嘅自閉位開餐。進餐嘅廿分鐘時間，睇住每位店員好主動、熱心咁招呼客人，黑媽媽嘅面上，任何時候都帶住笑容。雖然未聽過一句廣東話，但一聲唔鹹唔淡嘅「噴幼」，親切感頓時暴升十倍。當你講完「Thank You」之後，必定送上一句「You Are Welcome」，加送招牌白牙齒笑容，外加兩粒閃星星，其實佢地真係好鬼有禮貌。臨走嘅時候，見到剛到場嘅食客，三唔識七、男人老狗都互相擁抱，又證明到佢地真係唔怕識噴幼，更可能係，會視任何一個人為噴幼，噴幼嘅噴幼即係自己嘅噴幼。

食完個充滿住美味、人情味嘅卡巴，都係急急腳咁走，繼續喺黑媽媽嘅牛高馬大之間穿插。雖然來也匆匆、去也匆匆，但兩個匆匆似乎有啲唔同。離開時嘅匆匆，除左滿腹之外，仲多左一啲對重慶大廈呢個小社區嘅認識。佢地嘅禮貌同熱情，的確值得欣賞﹔佢地嘅噴幼文化的確幾得意。可能，呢啲就係黑媽媽人獨特嘅相處模式。