加料麻煩版碳烤雞排，想試趁早

台灣人碳烤雞排@深水埗
26/6/2011 17:00

今次係第二次食呢塊雞扒。半價$12咋喎，做咩唔食?
有別於豪大大齋炸、齋乾、齋熱氣。呢個台灣人選擇先炸、後落汁，再碳烤。睇黎係唔同鄉下嘅。

一塊同豪大大差唔多大嘅雞扒，先用大油鑊炸死佢後，放喺櫥窗前嘅碳烤架，一邊掃汁，一邊烤。烤完後，再視乎口味加上辣椒粉，最後切件上菜。完全係一場騷。

雞扒薄薄地得黎夠嫰，脆皮係小部份脆，大部份沾有醬汁。幾鍾意佢夠特別，明明炸到脆口，仲要加埋甜甜地嘅燒汁，而醬汁經過第二次加熱，真係融入晒雞扒裡面。辣椒粉係錦上添刺激，但碳烤又唔覺有碳味。成個設計係豪大大嘅加料麻煩版，係衝著豪大大而攪新意思，攪創意嘅安排。

記得上次食，係充滿美好嘅回憶，今日食似乎差左啲。 有人口痕叫左辣，變左完全勁辣，食唔到其他味。不僅如此，掃醬汁係就住就住，最後醬味唔夠，但令到個脆皮完全消失晒，可惜。第二次嘅錯誤，會令我卻步唔會再去。而家果度人流唔多，衰啲講句，估計未必做得幾耐，想試趁早。

瘋潮下午茶，瘋薯配瘋蜜

愛爾蘭瘋薯@旺角
26/6/2011 14:00

次次下午茶時間行過登打士街都見到幾間小食店前堆滿人潮，又買飲品，又買薯條。
今次買買dot com團購用$18一次過滿足晒兩個願望。

重量級瘋薯配瘋蜜芥末、酸忌廉

特登趁唔多人時食左先。金睛火眼睇住佢即叫即炸，保證新鮮。
又係肥肥嘅粗身薯條，而家潮興，無人再食瘦骨如柴嘅牙籤薯條架啦。

份量十足，薯仔味頗濃，薯條超脆，又熱辣，又熱氣。欣賞佢幾炸、幾熱氣都好，完全冇試過滴油，絕無油膩感覺。

好唔吝嗇，好唔客氣，兩大pat嘅梳士送俾你。一直都鍾意薯條配酸味汁，特別茄汁。今次無茄汁揀，試左呢個瘋蜜芥末同酸忌廉係大開眼界。

瘋蜜芥末係一種集甜、酸、芥之大成嘅汁。有蜂蜜嘅甜味、小許芥末嘅芥辣味，仲有些少酸味。平時熱狗都會用到，但將佢放喺薯條上，原來係絕配。改個名仔仲幾襯。
酸忌廉，係微微酸嘅奶油，有啲似淡芝士，係一種清爽嘅味道，仲可以突顯到薯仔味。
老實講，雖然瘋蜜芥末嘅香濃足以令佢做晒主角，但酸忌廉嘅清淡喺尾段發揮左重要嘅中和作用，將兩種汁撈埋一齊，係另一種食法。兩個人食晒成杯重量級薯條，係會有輕微飽，但完全唔覺膩。

青蘋果梳打，有粒粒嘅青蘋果味汽水

旺角掃街唔再篤魚蛋，食下薯條當下午茶小食，係一個不錯選擇。
趁而家做泡毛，$10一個細杯仔，可以試齊兩隻汁，試下無妨。

魔力無窮四川菜，重拾好味回憶

詠藜園四川菜館@黃大仙
19/6/2011 20:30 

記得差不多成十年前，詠藜園進駐黃埔蔡瀾美食坊，開張無耐，為左唔洗等咁耐，特登趁晚市開門前排隊攞籌，等足一個鐘就係為左一家四口一人一碗擔擔麵、一碟雲白肉、一客紅油抄手，閒時會點一鍋雲吞雞、食下高力豆沙...細個乜都唔識，只知道好味!

佔據開飯網搜查引擎「中式全選」、「四川菜」、「黃大仙區」三個項目笑臉搜尋No.1。
黃大仙詠藜園

比食飯時間夜少少，八點幾先去到等位，大約二十分鐘。
舖仔細細，古舊風味，搭枱係指定動作。

擔擔麵 (小辣) ($18)
手打幼白麵線煙韌柔滑，幼身略扁嘅麵線正好沾住麻醬湯汁。
香蔥、花生碎、肉碎、仲有芝麻醬同少許辣油，一啲麻一啲辣一啲花生嘅香濃湯汁，惹味!
有試過其他地方嘅擔擔麵，花生味係濃，但越食越膩，變左花生醬麵，幾濃都係假。
詠藜園嘅湯，係恰到好處，濃而不膩。18蚊一碗，物超所值!

紅油抄手 ($26)
肥嘟嘟脹book book非常飽滿，菜肉餡的抄手皮薄餡多，充滿肉汁。
加上甜甜辣辣嘅濃醬汁，仲有些少生蒜同麻醬，更加香，更吸引食欲。
出面食過，有啲抄手營養不良細細粒，醬汁齋辣無香味，呢啲劣食絕對可以飛歐，就算以後食抄手只可以食詠藜園的話，我都願意。

雞絲粉皮 ($50)
粉皮滑溜溜，厚薄適中，雞絲份量充足，仲有幾多青瓜絲，配上香濃嘅麻醬。整體尚算不錯，但雞絲略嫌不夠嫰滑，不夠絲。粉皮都吸晒青瓜味，對於不好青瓜的小女子來說，有點不好受，但我理解，呢個菜青瓜係必須的。

神奇地，三種食物都用花生麻醬做醬汁，但竟然完全唔覺膩。係我地好野，定係詠藜園好野?

完成正餐，叫左個網上人氣熱點太后豌豆黃 ($18) 做甜品。
豌豆糕唔會太甜，食落幾清甜，又啖啖豆味，作結良品。

百零蚊一餐非常滿意嘅四川菜。
真係闊別多年啦，今日一食，重拾番當時好味嘅回憶。
今次嘅總結都係兩個字﹕ 好味!
地埋位置確實係吊腳兼隔踄，但仍有推動你專登一去嘅魔力。

旺區樓上隱蔽雲南風味餐廳

阿詩瑪@旺角
19/6/2011 13:00

今日得到紛享團購$38食一個雲南風味午餐。喺雅蘭中心樓上，唔做泡毛都唔知有呢間舖頭。
一個午餐有齊小食、米線同飲品，可以試齊雲南民族特色風味。

套餐一﹕香醬涼茄子、豬扒酸辣米線、熱玫瑰蜜
套餐二﹕酸辣水餃、腩肉炸醬米線、凍玫瑰蜜

精選推介香醬涼茄子，呢一個冷盆正好作為開胃餐前小食。冷冰冰嘅茄子好清爽，軟腍腍嘅茄子淋上酸酸甜甜少少辣嘅醬汁，醬汁好惹味開胃。而另一個小食係酸辣水餃，四大隻菜肉水餃厚皮得黎有啲粉，酸辣汁唔算太刺激。

兩碗米線係超大個碗，而份量都係好大。豬扒有薄薄幾片，似乎沾左醬汁再炸，放左落湯後，得番啲軟腍腍嘅炸粉。好在豬扒都幾鬆軟OK入味。雲南米線嘅精髓所在係酸菜，夠酸! 而米線都幾煙韌爽滑。另一碗材料有幾塊半肥瘦、肉味充足嘅腩肉，配偏辣嘅炸醬，幾刺激，幾有風味。相信最差嘅就係杯飲品，係有少許玫瑰花味，但完全唔夠甜，全因太過慳皮落得太少蜜糖。

團購優惠$38一個餐，又唔洗加一。一個正路嘅午餐價錢，合理嘅質素。
老實講，唔係有團購，都唔知而家雅蘭中心樓上有咁多食肆。唔係有團購，相信阿詩瑪嘅吸引度唔夠旁邊嘅食肆高。 門面唔夠光鮮，明顯同其他嘅舖頭比下去，佢話套餐原價值$80，搵邊個去食呢? 起碼我唔會番轉頭。意外收獲係，團購曲線幫埋雅蘭中心五、六樓嘅樓上食肆做宣傳，以後多個地方搵食。

斯釘特澎湃杯裝乳酪對抗惡勢力

Yoppi Frozen Yogurt@沙田
12/6/2011 14:30

今次真係要多謝蜂買，今個團購又係超抵之作。$15買到足足$40現金券，抵到爛。
沙田新開嘅Froyo店， 就喺連城廣場轉角死角位，唔識路係留意唔到嘅。

大杯裝加四個配料 ($40)

原味、朱古力乳酪，配芒果、朱古力脆波、粟米脆片、原味麻糬 

Yoppi唔玩自助任唧，係按大細杯收費，由唧乳酪到加配料，客人只需用口講，就會有職員幫你一手包辦，妥妥當當。每日提供五款乳酪、十數款配料選擇。四十大蚊，足夠你食一個大杯，包兩款乳酪加兩款配料，仲有八大蚊剩可加多兩款配料，豐富非常!!

職員小姐拎起個大杯，細心幫你唧出300g乳酪，兩個味道各佔左右，再逐一加上配料。哇，一杯超迫爆、勁澎湃嘅大大杯乳酪。欣賞佢絕無偷工減料，份量十足，配料又夠多。唔知係唔係當時冇乜人，職員姐姐可以慢慢唧慢慢落配料，更加足料啲呢?!

配料方面，芒果、朱古力脆波、粟米脆片都係果啲野，但麻糬偏硬，唔夠煙韌。

至於乳酪，老實說間間嘅乳酪都係咁上下味，係差在滑定唔滑、酸定唔酸、實實定係水水。呢度嘅原味乳酪算係OK架啦，但滑度未夠，似有些少冰粒粒，但軟硬度適中，味道夠酸甜，又夠凍。而朱古力味乳酪就只係似軟雪糕。

對於朱古力魔黎講，見到有朱古力味乳酪係會流晒口水。但諗深一層，朱古力味嘅濃烈，同酸甜清淡嘅乳酪，又點會撈得埋一齊? 係酸酸清淡嘅朱古力味? 定係濃烈嘅乳酪味呢? 朱古力味乳酪好似係夢幻。自我安慰之下，只好當做零脂肪嘅朱古力味軟雪糕。

今個夏天，玩過自斟式磅重乳酪，又食過斯釘特晒史杯裝乳酪。按大細杯收費，可以避開最邪惡嘅自斟環節，幫你慳荷包。Yoppi斯釘特大杯晒史已經好澎湃，係絕到食得飽兩個人，絕對可以對抗惡勢力，睇黎我都係buy斯釘特杯裝版多啲。

2011大阪、神戶、和歌山五日遊之後記 [6. I Love Japan]

完成左五日四夜大阪、和歌山遊，掃左唔少手信。

五天之旅嘅酒店、行程、餐飲全部都令人滿意。

五千幾蚊團費，計埋稅、小費，七千多元埋單，玩足、食足五日。真係好抵，好抵!

睇住由六月起不斷加價嘅團費，比我地當時去，淨團費足足貴左兩千大元港幣。

更加覺得呢段時間去日本係無錯嘅選擇。真係好抵，非常抵!

無懼負面新聞，五日嘅日本之旅，無任何不愉快事情發生，一切安好，真係唔驚wo。

呢五日，令我更加鍾意日本。

鍾意日本人嘅有禮、日本街道嘅乾淨、日本空氣嘅清新、日本社會嘅秩序、日本嘅美食。

希望唔洗幾耐，I'll Be Back! Japan!

2011大阪、神戶、和歌山五日遊之第五日 [5. 勁擦心齋橋章魚燒]

9/6/2011 (星期四)

第五日with 「I Miss U! Hello Kitty」

今日專登去酒店另一間餐廳食早餐，試下唔同野食。二樓嘅餐廳食嘅野大致差不多，比三十樓多左一啲日式小食。特別一提個冷盤三文魚，新鮮嘅三文魚配檸檬汁同橄欖油，好味，encore多次!完左早餐後去左田崎珍珠，興趣不大。

下站係shopping必到﹕ 道頓堀、心齋橋

點都要影下固力果先生嘅。

心齋橋有好多藥房、服裝店、百貨公司、電器舖，仲有好幾間零食店，瘋狂勁掃手信，買左好多章魚燒小食。

Sanrio 專門店，有三層樓慢慢行!

周圍行，仲八卦入左去パチンコ彈珠機舖睇人玩。

食街道頓堀全街有好多章魚燒食店、拉麵店、蟹食專門店，仲有好多好得意嘅立體招牌。

Starbucks 靚仔哥哥講飲frappuccino，又幾好飲wo。

叫左赤鬼一客八粒章魚燒500yen，新鮮熱辣、大大粒，章魚仲好大舊，醬汁、蛋黃醬都好味，但個粉皮好似太腍，有啲the皮。

第二間叫左本家日本第一章魚燒，一客十粒。500yen。都係新鮮熱辣，除左醬汁，仲有木魚片更加香味，章魚都好足料，粉糰比較實在，整體嘅口感較配合。兩人都支持呢間本家多啲。

大約下午三點，要離開大阪市區，向機場進發。行左一陣免稅店，又掃左啲手信。六點零鐘機，唔知點解呢程機dun到阿媽都唔認得，超chok。

豬肉餅飯、壽司、餐包、藍梅蛋糕。壽司有4-5件細細，件件都唔錯，藍梅蛋糕唔太甜，藍梅味夠。

雞扒飯，雞扒幾嫰滑，特別鍾意佢個燒汁，配雞扒真係一流。旁邊嘅配菜其實都好好味。

八點幾落機，正式完成五天大阪之旅。盡興而歸。

2011大阪、神戶、和歌山五日遊之第四日 [4. 狂奔環球影城，勇闖十一大關]

8/6/2011 (星期三)

第四日with 「See U Later! Hello Kitty」

第三晚嘅神戶博 (Kobe Portopia Hotel) 酒店，比早兩晚已經讚不絕口嘅紀南溫泉酒店更好。一個字﹕「豪」。

在落神戶商務地區，房間大之餘，仲有書枱，免費上網服務等，一間服務殷勤、舒適且高檔嘅商旅酒店 。(借post官網圖)

房間仲有個露台望到鐵路、神戶港灣海景，觀景非常開揚。

早餐係喺30樓嘅Sky Lounge，望住咁嘅風景食早餐，真係爽。

早餐有日式、西式供應。特別喜歡呢度嘅蛋類食物。半透明嘅洋蔥，配粒粒火腿，半溶芝士，用半生熟嘅嫰蛋包住，係出自日本師傅嘅即場表演煎奄列神技。藉得一提係此處有比香港多50億，共合150億個活性乳酸菌嘅益力多。

臨出發前，補充影一影呢個咁宏偉嘅酒店大堂。

嘆完一個豪嘅早餐之後，HP值升至100，係時候進入本團嘅戲肉﹕ 環球影城。

10:00 正式開門進場，人山人海wo，仲有好多學生係著住校服咁入場玩。

Task 1: The Amazing Adventures of Spider-Man - The Ride
只需等候15分鐘，已經可以玩到個個讚，十粒星推介嘅Spider-Man Ride。坐住車卡係室內路軌行駛，配合3D立體電影，由蜘蛛俠拉住架車周圍飛黎飛去打怪獸，不時有煙霧、爆炸、噴水場面。行車時碰碰撞撞，唔算好驚，但非常刺激，驚喜度爆燈。

Task 2: Back to The Future - The Ride
人開始漸多，等左約20分鐘。坐住電影內嘅超時空車，飛越過去未來嘅超動感影院。架車係原地升降嘅，所以驚極有限，而影片冇Spider-Man咁高清，先入為主，呢個只有8粒星推介。

Task 3: Backdraft
11:15 已經完成2個項目，走去Backdraft睇下表演。場內分三個場館，全日語對白，好彩略懂日語，都叫做聽得明。先講述Backdraft套戲嘅由來，現場拍攝特輯，演員訪問等，唔識日文真係會訓著呀。之後入到一個模擬拍攝場境，用光、聲效營造火警現場。最後，睇住一個倉庫起火，油罐爆炸、噴火，燒毀鐵柱，親身感受火光熊熊，熱辣辣，爆炸嘅震撼。

Task 4: Jaws
呢個算係排得最耐嘅遊戲，需時約三十分鐘。一船人出海遊覽，竟然不知不覺間進入鯊魚嘅巢穴，被鯊魚襲擊。逃亡時，遇上爆破，穿越一片火海。一個幾刺激、驚險嘅佈局，配合船長小姐嘅精湛演繹，好值得一去。但都係全日語對話嘅問題，唔明白嘅朋友，要俾多啲想像力。

Task 5: Animation Celebration
12:25，未夠鐘睇水上匯演，正諗住如何hea時間之際，服務員小姐好熱烈宣傳12:30有戲開場。一入去，以為係小朋友專屬卡通片劇場，有啲俾騙嘅感覺。一開場，有例牌的全日語真人對話加電視presentation。入到場內先知道，原來係真人配3D動畫嘅互動表演。漫畫家設計卡通中途，唔小心俾隻卡通人物啄木鳥飛左出現實世界搞搞震，人同卡通你追我逐，男主角仲俾啄木鳥吸左入卡通世界內。開心! 驚喜! 無論人定係卡通喺時間、位置上都配合得天衣無縫，無需戴3D眼鏡，已經做到立體嘅效果，真係好佩服影城喺動畫科技有咁嘅功力。

Task 6: Water World
準時13:30開場，水世界係一個充滿水花、爆破嘅海戰劇場。美女被捉，英雄打壞人嘅劇情，詳見1995年嘅電影未來手世界。神奇就神奇在，冇啦啦，突然間飛出一架飛機。從可來呀究竟?!最喜歡主持人將場內氣氛推到高點，會善用開場前時間同觀眾玩樂，小心唔跟住做就會俾人淋水。

Task 7: Terminator 2:3-D

一入場有紅衣小姐怒講十分鐘，估計係想帶觀眾入戲，以觀眾為對象，宣傳Cyber System嘅高科技，點知機械人反擊，真人演出配合3D電影，講述阿諾成功打敗機械人。

Task 8: Space Fantasy - The Ride
等左差不多三十分鐘，亦都非常之咁隆重其事，要將所以手提行李寄存入locker。Space Fantasy係室內過山車，四個人一架車，四周圍黑媽媽，只有少少閃星星。過山車速度都幾快，又有非常強勁嘅急速轉彎上落，離心力超強，好刺激。

時間已經係3:30pm，可以話想玩嘅遊戲都玩晒，有部份遊戲興趣不大，所以選擇skip。例如侏羅紀公園有強勁濕身，室外過山車嚴重唔敢玩等。行完Hello Kitty Store，見仲有時間，係時候精選第二round，再行番所有禮品店。

Task 9: The Amazing Adventures of Spider-Man - The Ride 第二次

Task 10: Universal Studios Cinema 4-D (Sesame Street 4-D Movie Magic)
超級咁厲害地，3D電影畫面做得好靚，配合香氣、噴水、吹泡泡，好好睇嘅一套電影。

Task 11: Back to The Future - The Ride 第二次
臨佢關門前最後衝入去玩多一次。

其他得意奇境﹕ Hello Kitty & Dear Daniel被蒸煮中

18:00 正式關門，離開環球影城，去對面嘅City Walk食飯。

去左ポームの樹食蛋包飯，今餐自費。完成一日狂奔，食飯一定要食好啲。

蟹肉薯飯餅配蛋包牛油飯﹕ 薯餅炸得香脆，蛋滑溜溜，蛋味勁香。

漢堡扒配蛋包茄汁飯﹕ 漢堡鬆軟多汁，茄汁炒飯好香，牛肉汁亦非常濃味，配蛋一流。

商場內有個章魚小丸子食廊，包括幾間大阪出名嘅章魚燒名店，仲有精品專買店。

離開嘅時候開始日落了。

夜晚就去左神戶嘅碼頭，睇神戶夜景同神戶塔。