夏日解暑良方，體驗冰凍湯拉麵

麵一@旺角
29/5/2011 19:30

一間位置超方便，但唔起眼嘅新店舖。未有開飯網嘅評語，唔係因為有團購，係冇打算去試。集購城$20買到$50用，一口氣買左三張，共有$150quota食個晚餐。因為網上未有太多意見值得參考，求其想食乜就食乜。

叉燒豬骨湯拉麵 ($50)

湯底有豬骨味，點點深黑色可見有用黑麻油提味，感覺仍然較清爽唔算濃郁。拉麵尚算彈牙，叉燒外型討好，肉質鬆軟，但無乜肉味。最衰溏心蛋係普通半熟蛋，冇浸醬汁黎調味，但流心度尚算可觀。

凍醬油餃子拉麵 ($46)
新奇、有趣、前所未有嘅新體驗。醬油湯、麵、材料，全部都係凍嘅。一碗凍拉麵，加送六大粒冰粒。相信有花心機計算過溶冰時間，食完成碗麵時，冰係剛好溶晒。凍左嘅麻油醬汁湯底，初期仍然有甜有味，但清水冰粒溶左後，湯變得稀釋。如果佢肯花多啲心機，改為用湯雪成冰，整個感覺更加良好。凍嘅餃子皮太厚太多粉，夾起變得鬆散。冷拉麵比熱湯拉麵更加清爽彈牙。夏天試試凍湯拉麵都唔錯，但仍有不少進步空間。

小食叫左日式醬汁炸雞 ($28) 同大人氣嘅炸芝士餅 ($28)

日式醬汁炸雞不止醬汁唔夠濃，仲出現嚴重乾硬化，肉已經炸到好硬好乾。

但炸芝士餅就好唔錯，外層類似麻糬年糕，炸得香口，內層係奶味濃郁嘅半溶芝士。食起來都能夠做到拉絲效果，讚!

埋單找數，多謝兩蚊，隔離位聽到即刻呆左。

正價$152，唔洗加一，用左團購券，只需補番二個大洋。正式黎講，以$62食到份量十足，拉麵都叫做OK質素，係滿意嘅。如果以正價黎計的話，旺角搵唔到飯食，又唔想食連鎖的話，呢度都可以係其中一個選擇。

坐地下鐵做外國人食潛艇

Subway@尖沙咀
29/5/2011 15:00

我相信如果無團購，我係呢世都唔會揀呢間野去食。
多謝Groupon賜我$25當$60洗，俾機會我認識呢間店仔。

要食包，請講英文，並跟步驟，唔該各位。
店員全部都係唔識講廣東話，只識英文同唔知咩文既外國年青人。
好消息係﹕ 有中、英文字翻譯+圖畫+實物。

Step1﹕ 金晴火眼睇清楚你想食咩，包定係沙律定係咩?
Answer﹕ Meatball Marinara + Subway Melt

Step2﹕ 講清楚你想食咩包?
Answer﹕ Parmesan Oregano
Step2.2: sorry, we don't have Parmesan Bread.
Answer: Honey Oat

Step3: 你要幾大舊? 半舊6吋定係全條?
Answer: ... (佢冇問，我亦冇答，佢自動半舊左)

Step4: 要唔要其他配料? eg. 加芝士,煙肉,火腿...
Answer:...(佢自動拎左幾塊芝士，我循例答yes)

Step5: 洗唔洗熱一熱佢?
Answer: Yes, hot!

Step6: 仲要啲咩蔬菜料?
Answer: (有實物睇) Onions, Tomatoes, Lettuce

Step7: 加啲咩梳士?
Answer: Honey Mustard and Mayonnaise.

Step8: 俾錢, $39+$37 = $76 (補$16, 實價$41)

presented by Out for Lunch! Hello Kitty.岩feel!

總括黎講﹕包包幾鬆軟，肉丸好味，醬好味。

材料豐富，自選材料實岩心水。係少見份量十足既三文治潛艇，當做lunch都ok呀。

第一次食，點餐都係唔知頭唔知路，嘆慢板，但好彩冇人等緊，可以玩足5分鐘。

轉頭俾完錢之後，成十個人入左黎叫野食，好彩。

講廣東話嘅先係外國人。

溫馨提示﹕ 如果預計食用時間係peak hour，而自問英文oral & listening 唔係太得，敬請食前請做足功課。
可參考網頁有詳盡簡介，話俾你知How to Order. 以免阻住地球轉，多謝合作。

流動手提版心太軟潛力雞蛋仔

媽咪雞蛋仔@紅磡
29/5/2011 13:30

門口大大隻貼住「100個開飯好評」，真係要一試。

"What a Black Wonder" Hello Kitty presents 粒粒朱古力雞蛋仔 ($14)

未食其蛋仔，先以貌取蛋仔。
未如預料咁朱古力色，係普通雞蛋仔色加點點朱古力色。

皮脆! 但都不及衰左嘅太安樓雞蛋仔脆。
(按﹕太安樓雞蛋仔最好就係個皮夠脆，但最衰就係冇蛋味。)

餡鬆軟，而且有蛋味，仲有好香濃嘅朱古力味。
每粒蛋仔都有烤焗朱古力粒粒，有啲溶左，有啲未溶。
如果溫度再高啲，相信有潛力成為流動手提版心太軟雞蛋仔。

有別於坊間一般用朱古力開粉漿，但只見其色，未嚐其味。
呢個媽咪真係會放有朱古力味嘅粒粒朱古力，唔係呃你。
俾多四蚊買包朱古力粒粒都抵啦!

窩夫之謎思vs.不爽層層疊

糖苑@旺角
22/5/2011 17:30

一個完滿嘅晚餐，最後一個step一定係甜品。
問﹕唔係嘛，5點幾就食完晚餐?!
答﹕係呀，我鍾意避開人流呀。

呢間糖苑就開喺隔攝兼吊腳嘅地方，但佢對面街每分鐘都有不下三十人等緊食添好運，會唔會帶旺生意就唔知啦。睇埋下面先講。

趁仲有下午茶餐，就叫左個「栗子紅豆窩夫配朱古力雪糕」，跟餐送糖水綠豆沙。($29)

我淨係識食格仔餅，少食窩夫類物體，唔知點為之好味。
佢個樣比格仔餅厚，個邊比格仔餅脆，整體同格仔餅差唔多腍，同格仔餅差唔多味。
啲饀比格仔餅多左都幾大粒既紅豆、幾夠栗子味嘅栗子蓉，同埋偏濃味少少有粒粒嘅朱古力雪糕。

咁佢其實同格仔餅有咩分別?
「維基百科」解答左呢個謎團。維基老師話「Waffle鬆餅」，又叫「窩夫」、「格仔餅」。
「港式窩夫」就係香港人通常稱之為「格仔餅」或「夾餅」。港式窩夫嘅格仔比較小，一般呈圓形，分成四等份。通常配上牛油、花生醬、煉奶及砂糖，再對摺夾起成半圓狀。

出盡當年考A-Level 做UE Section E既力量，估計糖苑嘅窩夫就係「比利時窩夫」。其實老闆佢自己知唔知呢? 「比利時窩夫」餅身較厚，格仔較大。製作麵糊時會加入酵母、蛋白，所以較為鬆脆。除了可配牛油、糖漿外，還可配搭水果一起吃，也可配冰淇淋。

由此可見，我係支持本地創作既，窩夫襯牛油、花生醬、煉奶同砂糖先係最完美嘅配搭，$10一底已經好滿足，唔洗搞咁多野。

另外，叫左個Oreo木糠布甸 ($34)，係開飯網友熱點甜品。

唔算大件，得個靚字。Oreo粉磨得超幼細，但又佩服佢可以壓得實唔鬆散，層次分明。
我只少食幾啖，所以訪問左負責處理佢嘅姚老闆。
「係考食呀，旦是圓有then er 涸喉既揀姐呀，姣bu爽。」 (譯﹕ 係好食呀，但食完有點兒涸喉嘅感覺呀，好不爽。)
相信係因為Oreo都幾濃味，食得太多，會有啲膩。
食甜品食到不爽，呢間野都真係得架啦。

是日甜品消費共$63
仲貴過我餐晚餐呀，死未。

ドロロ春卷配矛盾菠蘿包

廣州點心皇@佐敦
22/5/2011 16:00

佐敦係由尖咀去旺角，一直都會miss左嘅一站。唔行過黎都唔知，原來呢頭咁多好野食。
今次托團購網福，平價試食新開張嘅廣州點心皇。

自從米記選中幾間平民點心專門店上榜後，越來越多新店開張。你話啲正宗酒樓點算?!
今次優惠﹕$24有3個點心連2位茶芥
叫左芋絲炸春卷、淡水鮮蝦餃皇、蟹皇蒸燒賣，另加奶黃菠蘿包 ($18)

芋絲炸春卷個皮係唔錯，幾薄脆。嗯，無錯，唔錯嘅係啲皮ONLY，個餡呢...

可能係我條脷有問題掛，我只食到啲硬硬地，似肉碎嘅物體，零芋頭味。芋絲嘅存在感仲衰過ドロロ(即係Keroro軍曹隊中最唔起眼果隻藍色野Dororo)

點奶黃菠蘿包一切都係機緣巧合。一坐低就有個有90%揸fit人氣質嘅叔叔，親切咁逐枱推銷，新鮮菠蘿包重新上架。講到好似好難得咁，就衝左去點一客黎試。

食落同普通菠蘿包冇分別，菠蘿皮唔錯，內裡係奶黃餡。咬多兩啖先發覺原來係有!菠!蘿!嘅! 同早幾日小儀金剛喺電視介紹過，都係佐敦嘅「真係菠蘿包」有幾分似。但係，奶黃餡就好似鬍子爸爸泡芙嘅吉士醬加熱版，加細細粒話酸唔酸嘅罐頭菠蘿，撈埋一齊好似有啲怪。唔甜唔酸，又冇菠蘿味，但奶黃又搶左菠蘿皮嘅香味。呢種咁矛盾嘅感覺，係唔能夠用筆墨黎形容。

總結一句，我寧願齋食冇餡嘅菠蘿包，感受鬆軟香脆嘅菠蘿皮算數。
借位讚下﹕再早多幾日，早餐食左個隔夜嘅泰昌餅店菠蘿包，仲好食。(PS. 隔夜係因為阿媽早一日買，我第二朝當早餐食，唔關泰昌事)


公道啲，其實我幾鍾意個燒賣同蝦餃皇，最傳統嘅點心係做得唔錯。
燒賣係香，係勁香冬菇味，餡料亦十足。絕對有意encore。
蝦餃皮夠薄，包住幾大隻蝦，調味唔錯，蝦味再濃則滿分。

最後埋單補番$18，總數四十零蚊。兩個人食當為一個下午茶，仲好過去茶記食個西多茶餐。個人意見，相信只要避走ドロロ春卷同矛盾菠蘿包，重點叫傳統類蒸煮點心，呢間野確係可有作為，值得俾錢。再讚多下，果度裝修環境唔錯，兩個人去，都唔介意安排四人闊落大梳化卡位俾我地，梳乎!

新體驗，薯條當正餐，茄汁魔屈服

New York Fries@尖沙咀
22/5/2011 13:30

多謝團購，令我可以試新野。今次試一試鬼佬薯條。
先做下research，NYF 原來係2008年來港嘅過江龍，美味重點係連皮食呀!
如果你想食脆卜卜，最熱氣果種薯條，sorry，幫唔到你，不如去買薯片食啦。

至尊風味套餐(大) The Works Combo $54 配汽水同一個沙律仔

其實，正價好貴囉! 好彩團購今次幫我慳左一半，半價$27食到，都算值得。

一份大薯條份量都幾充足，醬汁配料都唔孤寒。連皮薯條比一般粗身，腍腍地，薯味十足，有啲似香口版嘅焗薯。墨西哥風味醬有原粒煙肉、酸忌廉、芝士醬、蔥等，非常之香濃。自稱係茄汁魔既我，都願意放棄唔用茄汁一餐咁多。

你可以當NYF嘅套餐，係一餐要用叉食，兼夾食得飽人嘅西餐。四、五十蚊做一餐都仲可以接受，咁樣性價比都算合格。但如果當係下午茶，或者口痕過癮呢? 冇電視框都唔洗旨意再去。當然唔計果啲一年一百幾十萬上落，又或者中左四千萬頭獎嘅有錢人。At least, 我呢啲打工仔唔會咁豪氣。

最衰當日紅雨，如果唔係就可以出去餐廳外面嘅露台，對住180度無敵海景慢慢嘆，可能仲好食。
溫馨提示﹕其實小店仲有另一招牌--熱狗，剛坐對面嘅內地同胞就食得好滋味啦。但好多意見反映，識食嘅人去NYF都只係會食薯條，係咁多。

似拖肥多過焦糖的焦糖乳酪

Yo Mama@尖沙咀海港城

15/5/2011 16:30

Order﹕焦糖味乳酪 (無錯係Caramel焦糖，佢係咁寫既，我信佢) + 糯米糍
拎到上手，幾靚仔呀，個姐姐好有心機唧，仲有多少粒糯米糍，
飽足度都有9分啦!

但其實.....我想話呢..............我覺得佢似拖肥多啲lo~!
第一啖已經feel到食緊拖肥既感覺。
食到尾，仲開始甜到有些少喉乾。
糯米糍都算ok，起碼佢真係夠糯米，相信就係台灣人所謂既QQ。

但問題黎啦。
其實焦糖、拖肥有咩分別? 真係唔知wo...請指教
應唔應去雅虎開個post問，會唔會有機做到熱門問題?

勿論焦糖同拖肥有冇分別都好...

1. 甜、超甜、勁甜﹕冇錯，焦糖應該係甜度幾高既，OK你贏
2. 會令人感到喉乾﹕冇錯，以過往經驗，焦糖應該係會咁既，OK你贏
But...冇左焦糖既精髓所在 - 焦。sorry, 衰左

可能早年去台灣深坑豆腐街食過兩杯叮一聲既豆腐雪糕，佢既味道的確係叮一聲。
深坑豆腐味﹕有種似煙燻、烤焗既味道，正係全街都賣烤豆腐既深坑豆腐街空氣既味道。
焦糖豆腐味﹕有一種焦香，近乎就燶但未燶之間糖既味道

用呢個咁深刻既記憶做對比，牛牛既焦糖味的確係稍遜。
哎吔，原來好多網友都會先試味，呃食多幾啖都好，我地竟然冇做，笨左!
起碼可以試試佢既真材實料原味乳酪。網上風評唔錯，其實，Froyo係咪真係食原味最好呢?
點都好，牛牛乳酪既軟滑幼細口感係我欣賞既!

一杯大杯裝配一種配料，多謝$35
用左你買我買團購$15當$30洗，仲要補多5個大洋，實價$20

總結黎講，都係果句，有電視框會試，但原價我唔會食lo~~~bye bye
I Love 團購!!

一粒星算得係乜? 不外如是

一點心@太子
9/5/2011 12:30

終於一嘗米芝蓮一粒星食肆「一點心」。眼見幾次行過重重人牆堆住門口，開飯網有不下60個好評，報紙雜誌日講夜講。今次講真，期望幾高。等位30分鐘，加上運動完後的肚餓，對一點心既期望續步提高。

餐牌全部都係傳統廣東點心，選擇都算OK多。十零廿蚊一款，以點心專門店黎講，都係公價。

首輪挑戰最傳統既點心﹕燒賣、蝦餃、牛肉飯、雞絲粉卷、馬拉糕，都係一般茶樓都有，最common既點心。評語係普通過普通。連最基本既燒賣、蝦餃，都係一般貨色，可以話唐記包點$11一客有4大粒既燒賣，都足料過呢度。

腸粉乃茶樓點心最基本既食品，點都要試一碟。
oh no! 粉&厚皮，已經衰晒身為一條好腸粉最終極既錯誤。
大埔陳漢記既腸粉比佢好n倍，果種晶瑩剔透，滑一滑既粉皮，現上香香既醬油，係食一碟都唔夠。

第一round稍為好少少既，相信都係網友熱點既腐皮卷，算得上香口，皮薄餡靚。仲有牛仔骨、排骨，都叫做交足功課，香味十足，5分滿分我俾夠4分。

眼見食到半飽都未有驚喜之作，可能我地唔識貨，做唔夠research，叫錯野。OK比第二round佢平反。我地總結過隔離枱阿叔阿嬸有order過既點心，希望多人食=好食。又問埋傳菜阿姐有咩推介，正式進入round 2。

雞札、牛柏葉、鳳爪、菜苗餃、鮮竹卷、叉燒包、奶黃包。OK，算叫做合格有餘，比普通好啲啲，但未至於到達好好味呢個level。
仲有阿姐推介，日賣唔知幾多隻，新鮮出爐豐料糯米雞，好! 係唔錯既，配得起豐料呢個名。

一行四人食左約$260。一般質素，好評俾唔落手，頂多一個中評。
起碼以人均消費$60幾食一餐黎講，仲有好多其他選擇。
就以點心專門店黎講，都算不上係好評線之上。

如果咁既質素有一粒星，我只可以話我地一行四人同米記評審們既口味唔同。可能係外國人掛?! 定係當餐廳出左名後，要照顧更多既客人，質素不太如前? 好似係好多著名既小食肆都會出現既通病。係成名既代價?
如果係的話，我都好慶幸一啲我認為好食既餐廳未有上榜。起碼佢地會繼續努力保持水準，以博得街坊大眾既繼續支持，都抵我曲線好評下佢。
幾多粒星? 其實....重要咩?

震騰騰食冷冰冰北海道甜甜品

北海道牧場牛乳專門店@沙田

8/5/2011 18:30

沙田開左一間門面靚，甜品靚，價錢更靚，主打北海道牛乳嘅甜品舖，無電視框係唔捨得食。

今次你買我買$88 可以任食1.5小時，值得一去。

1.5小時採取積極進取態度，決定甜品當飯食，而舖頭使用每次只可叫兩款來限速，睇下邊個贏。

Round 1

1. 巧克力杏仁北海道牛乳白玉子霜淇淋寒天﹕ 係牛乳軟雪糕外加朱古力醬及杏仁，用寒天啫喱做底。軟雪糕係好香奶味，而且十個軟滑。

2a. 龍眼奶凍﹕ 滑得黎，好香龍眼味，清爽唔太甜

2b. 巧克力慕思﹕ 濃度極高嘅朱古力味，甜中帶苦

2c. 咖啡Tiramisu

3. 北海道手工銅鑼燒 (黑胡麻香蕉)﹕ 外型討好，銅鑼燒餅有蛋味亦夠鬆軟，忌廉芝麻味略嫌未夠

4a. 黃粉金時年糕

4b. 抹茶玉子奶凍﹕ 特濃抹茶味受唔起，鍾意綠茶嘅人應該無問題

4c. 黑糖蕃薯抹茶冰淇淋﹕ 抹茶都係特濃甘苦味

Round 2

5a. 焗芝士蛋糕﹕ 超濃芝士味，比較結實

5b.草莓軟心芝士蛋糕﹕ 夾心係流心草莓醬，外層係草莓味芝士蛋糕，酸酸甜甜幾特別

5c. 芒果奶凍

6. 宇治金時北海道牛乳白玉子霜淇淋寒天﹕ 軟雪糕仍然係好滑、奶味十足

7. 北海道白玉子配牛油酥皮﹕ 即係燉奶，好creamy，酥皮好香牛油味，熱辣辣

Round 3

8. 北海道白玉子配黑胡麻醬

9. 火腿吞拿魚多士﹕ 多士焗得非常香脆

Round 4

10. 北海道牛乳冰花香蕉朱古力﹕ 超冰凍刨冰，冰刨得極幼細、配軟雪糕、香蕉、朱古力醬

Round 5

11. 粟米白玉牛乳甜湯﹕ 甜甜地嘅粟米湯，比一般更creamy

12. 核桃白玉牛乳甜湯﹕ 好香核桃味，仲有粒粒碎核桃，有啲加左核桃嘅甜麥皮

總括而言，樣樣野係靚嘅，味道都係合格嘅，唔會太甜。而奶凍類、雪糕、芝士蛋糕等係好味嘅。但可能因為好多都係凍品，牛奶味唔算突出，如果更濃的話會更好，更有北海道feel，話晒都叫主打。

憑以上嘅成績，我估我地已經俾佢backlist左，不停俾佢down speed限速，因為好多野叫左幾次都冇黎。其實仲有好多想試，好似黑胡麻焗芝士蛋糕、軟心芝士朱古力蛋糕、焦糖玉子等。

而且好大問題係，越食越凍，一來商場冷氣夠，二來樣樣野都係雪糕、奶凍，全部都係冷冰冰。最後點都要叫個熱甜湯暖一暖肚先走人。

算數，總算係飽飽咁離開。

成也蛋撻，敗也蛋撻，決戰終極王者

蛋撻王@青衣
1/5/2011 15:30

蛋撻係其中一樣最能代表香港嘅小食。唔知點解好多外國、內地高官名人來香港食蛋撻的話，一定會俾啲傳媒大字標題登相報導。一個隨街都買到，幾蚊粒嘅蛋撻仔，陪伴過好多達官貴人上報、上鏡。係蛋撻借貴人博宣傳，定係名人借蛋撻過橋?

酥皮蛋撻、牛油皮蛋撻 ($4.5/個)

賣四蚊半一個嘅蛋撻都要團購，點都要捧場。開飯團購幾乎成本價食蛋撻王，$2一個呀!

跟據蛋撻王所講，師傅將水皮同油皮摺疊成384層嘅酥皮，加入蛋漿製成酥皮蛋撻。有冇三百幾層就食唔出，但酥皮的確係好鬆化，亦非常欣賞佢好乾脆、唔油膩。有啲餅店嘅所謂酥皮係數得出有幾層，而且口感偏硬，仲食到成口油。

而牛油撻皮加入曲奇嘅元素，撻皮更香脆，牛油味好香。個人黎講，比較鍾意食牛油皮。

而蛋漿餡好滑好軟好嫰，但略嫌蛋香味不足。熱辣辣，新鮮出爐嘅蛋撻點都唔會難食得去邊。但係唔係因為新鮮得濟，成個蛋撻好脆弱，撻皮好易散，而蛋餡都好腍。同王者呢個稱號好似仲有若干距離。坊間一個蛋撻開價差唔多，以幾蚊雞決一死戰，要成為萬人之上，似乎仍雖努力。

後記

知道有幾間分店仲有賣埋燒賣、炒麵、蘿蔔糕等，我話你不如賣掂啲撻先算啦，當自己茶餐廳咩?! 如果光靠賣蛋撻同麵包、西餅就唔能夠維持生意的話，咁枉為王罷啦。

吱喳超級痴線麵鍋

麵軒@馬鞍山
1/5/2011 19:30

麵軒，一間台日Fusion餐廳，818團購網幫新出嘅套餐做泡毛，半價食一個手作吱喳麵鍋餐。

手作吱喳麵鍋
牛立方、嗆口甜辣醬配日式拉麵
嫩雞寶、沙沙豆醬配中華拉麵

一個餐一個鍋，半熟嘅材料一碟碟放喺你而前，標榜tailor-made口味，等客人自己揀料，自己炒。一份煮食說明書，教你如何處理。大約流程如下﹕
1. 將油放入生鍋內燒滾，加入蒜茸、乾蔥及生薑片爆至金黃色
2. 當聽到吱吱喳喳的聲音時，再放入雜菌及三色椒炒至微熱
3. 再放入牛立方或嫩雞寶煎至微焦香脆
4. 發出吱喳聲音時，再放入拉麵
5. 最後倒入沙沙豆醬或嗆口甜辣醬
6. 食得
慳番廚房師傅嘅煮菜時間，增加阿姐嘅洗碗時間，將原本應該五分鐘搞得掂嘅麵鍋拆散，等客人自己煮，感受吱吱喳喳，DIY一鍋麵出黎，好一個兼覓!

宣傳品上嘅製成物係如此美觀吸引，梳利，我做唔到。

牛立方即牛柳，有牛味，熟成度剛好的話係算嫰滑嘅。配甜辣醬好惹味，但略嫌太辣，非甜醬。而相信就係所謂嘅日式幼身拉麵，尚叫做得煙韌，撈埋啲醬黎食，都幾入味。

而嫩雞寶即雞球，味道都唔錯，肉汁幾豐富，加埋沙沙豆醬更加好味，醬汁有啲似沙茶醬同沙嗲醬混合體。而估計係中華地區嘅扁身拉麵係完完全全、徹徹底底地失敗。失敗在於麵粉量偏多嘅中華拉麵，喺炒嘅時候，無論落幾多油都好，係完全痴底，炒完之後，相信有三份一嘅麵係痴住個鍋，所以男士係絕對食唔飽。OK，可能係我地手勢差，唔識控制火喉，但中華拉麵食落亦係粉粉嘅，可以話係一條條粉團，用黎炒麵，係絕對唔OK。好玩! 係好好玩，但亦係超級咁痴線。 容我改名為﹕超級咁痴住拉麵線嘅麵鍋，簡稱「超級痴線麵鍋」。

以上一個套餐，跟一杯台式飲品，團購價$29，係食唔飽個男人嘅。
對於叫左日式拉麵嘅女士黎講，係抵食，試下無妨。而叫左中華拉麵嘅男士黎講，係換黎一吐氣咁飽。

麵軒，曾經係我嘅台食頭號食店。有幾樣得獎嘅拉麵天王係值得一再encore，好似芳香排骨拉麵同御品牛肉拉麵，而竹筒飯同鹽酥雞，以及冰震珍珠奶茶亦好有台式風味。
唔知由幾時開始，每食一次，質素就比上次下降一截，亦親眼見住好幾間分店關門大吉。因為franchise式經營，QC力度不足? 算吧啦，我勸你都係唔好搞咁多野，專心做好幾樣得獎嘅菜式吧啦。