馬高先生的百份百芝士蛋糕

Marco’s Oyster Bar & Grill@佐敦
31/12/2011 21:00

除夕夜黎多個甜甜蜜蜜嘅飯後甜品，正好為一年畫上完美句號。團購用$50就可以買到一個足一磅嘅芝士蛋糕，仲話係由酒店級餅師主理，唔怪得短短幾日，已經俾人狂掃左近三千個。

紐約芝士蛋糕

一打開蛋糕盒，就聞到好香嘅水果味同芝士味，齋睇外型，已經好有驚喜。一磅蛋糕話細唔細，都足夠四、五個人齊齊分享。蛋糕賣相唔錯，有可愛嘅忌廉波波圍圈，中間有幾粒紅紅嘅士多啤梨，仲有唔少新鮮藍莓。

芝士蛋糕質地軟硬適中，食落有好香濃芝士味，同淡淡嘅蛋香，口感算幾幼滑，配合埋微甜嘅鮮忌廉一齊送入口，感覺更柔和。餅底係消化餅碎加牛油造成，少少脆亦好鬆化，有淡淡嘅牛油味同麥餅香味，同蛋糕好襯。

一般芝士蛋糕食幾啖就會覺得好膩，但只需要加埋新鮮水果伴食，感覺即刻舒服晒。而士多啤梨同藍莓都好新鮮，酸酸甜甜，正好為濃烈嘅芝士加添一份清新。

坊間一細件芝士蛋糕，閒閒地二十幾蚊，但質素未必好。呢個一磅裝芝士蛋糕，只需五十大洋，齋睇價錢其實已經唔貴，食落更加覺得抵買。因為的確係百份百真材實料，無論賣相、味道方面都係超額完成。如果下次再有團購的話，百份百會再試。

當日招呼我地拎蛋糕嘅，應該就係老闆馬高先生，因為佢個樣真係同公司Logo一模一樣。:P

Btw，佢態度非常友善，笑笑口咁話Happy New Year。So Nice。

趣味整色整水大餐

素食廚房@旺角
31/12/2011 18:30

平時食肉食得多，閒時一餐素食調劑下都唔錯。谷旁$138可以兩個人喺素食廚房嘆兩小時日式半自助餐，可以任食小食、甜品同飲品，仲包埋加一服務費，價錢唔貴，可以一試。

 

什錦刺身併盆

什錦刺身併盆賣相幾得，無論色水同形態都造得好神似。素刺身通常都係用蒟蒻製造，貪佢軟得黎有彈性，又爽爽地嘅口感。三文魚同吞拿魚都有甜甜嘅味道，食嘅時候仲有汁流出。白色嘅飽魚片仲營造到飽魚煙煙韌韌嘅質感，只要加些少芥末就更加似真嘅魚生。

忌廉南瓜濃湯
湯唔講得上濃，感覺杰杰地，似芡汁，中間有少少南瓜肉。

田園粟米沙律
一細盒沙律有蝦蟹柳絲、青瓜、粟米，再伴入沙律醬，味道正常，不過我唔鍾意青瓜。

芝士香芋春卷
又幼又長嘅條形春卷，外皮炸得非常香脆。內餡粉粉地，有芋頭粒等材料，少許溶化左嘅芝士，味道都OK。

海苔豆腐棒棒燒
用紫菜包著豆腐卷，口感唔係香脆，反而腍腍地。豆腐撈左蘿蔔、雜菜、素魚肉等，味道都幾豐富。

燒汁鎗魚
炸得乾脆嘅豆製品，用紫菜扮魚皮，食落口感似炸魚柳，好似有一絲絲嘅魚肉纖維咁，最後加個甜甜地素蠔油汁，味道唔錯。

鐵板神戶牛柳
主菜可以選擇兩款，食素當然要試下啲素扮肉嘅得意菜式，呢款神戶牛柳仲要用鐵板上菜，論外型真係做得似模似樣。鐵板熱力十足，有青、紅、黃椒伴炒，仲有唔少件素牛柳。 素牛柳食落口感非常煙韌，營造到牛肉嘅纖維質感，味道亦有少許牛味，配合埋黑椒醬，感覺更牛。

蒲燒鰻魚炒飯
炒飯有蘿蔔、雜菜、蛋、冬菇等，仲有好多細粒素鰻魚。素鰻魚係豆腐同紫菜合體，外型非常神似。炒飯仲加左甜甜地嘅蒲燒汁，令飯充滿甜味，而且炒得夠乾身，粒粒分明，同正版日式鰻魚粉飯一樣感覺。

甜品
甜品係果凍，幾清甜，中間有士多啤梨粒。雖然係任食，但只食左兩粒。因為掛住勁飲好立克，呢度嘅好立克係絕頂濃味，勁讚，唔似坊間啲茶餐廳為左縮皮，開粉都可以完全無味。

12月31日除夕夜，以素食黎做總結，非一般的潮。
$138團購二人半任食套餐，價錢正常，味道正常。記得早年前已經試過呢間素食餐廳，但知道佢近期改左名，但都原用番舊嘅裝修格局同菜單。感覺上食物素質都係無變，味道仍然好，賣相依然神似。幾喜歡佢嘅日式格調裝修，環境幾舒服，而啲樓面阿姐任何時候都係非常好聲好氣。

其實閒時食下素食料理都幾得意，最鍾意佢整色整水，用有限嘅材料，變化出無限款菜式。一邊食，一邊估下佢扮緊乜野，為一餐飯增添左唔少趣味。

速食好運叉燒包

添好運點心專門店@中環
25/12/2011 18:30

同添好運嘅緣份似乎情訂喺每年嘅十二月二十五日聖誕夜。無心插柳，2010年同2011年嘅聖誕節都喺添好運食中式點心過節。今次仲有團購支援，$60可以當$120現金使用，去試一試中環站嘅新分店。

酥皮焗叉燒包 ($18)

選擇得添好運，唔點招牌叉燒包的話，咁不如唔好黎。新鮮熱辣、圓轆轆嘅叉燒包有墨西哥酥皮，呢個酥皮鬆化到不得了，甜甜地，正好配合叉燒包。叉燒餡好濃郁，甜甜蜜蜜，仲有唔少叉燒粒，唔會用叉燒醬黎欺騙食客。而且餡料絕對唔少，叉燒餡基乎要湧出黎，真係回味無窮。

美味鮑汁鳳爪 ($25)
一般點心舖多數提供豉汁鳳爪，呢度竟然搞新意思，用鮑汁處理。鮑汁味道係好，甜甜地，鳳瓜都夠入味，但最大問題係煮得唔夠腍，皮黏骨，唔太咬得開，麻麻咋喎。

沙律蝦春卷 ($18)

聽聞此店會經常轉換春卷款式，今次食到沙律蝦春卷。春卷外皮勁脆，脆得黎唔油膩，內餡都好豐富，有明蝦，仲有唔少雜果沙律，味道唔錯。

蜜味叉燒腸 (20)
腸粉睇落夠晶瑩剔透，但食落個皮就好一般，感覺粉粉地，比較鬆散，亦唔夠滑，餡料亦唔太多，好普通，都係大埔好食啲。

晶瑩鮮蝦餃 ($22)
呢度嘅蝦餃係一口大小，細細粒。個皮一般，食落有少少黏牙，蝦算爽口，鮮味都ok，都係一般啦。

鮮蝦燒賣皇 ($22)

賣相麻麻地，無乜色水，同宣傳照片相差十萬九千里遠。材料正常，有蝦同豬肉，仲有冬菇等材料，食落都算爽口，調味適中。唔算出色，同其他地方差唔多。

埋單計埋茶錢，總數$131，用團購券找數，實價$71。七十零蚊嘅價錢，我完全收貨。但正價的話，除左招牌叉燒包之外，其他點心嘅吸引力似乎稍遜。香港站係第三間分店，從裝修、格局黎睇，似乎偏向走快餐路徑，感覺唔點心。速食點心上菜速度勁快，我對「即叫即蒸」呢個服務抱有懷疑。唔知係唔係速食原故，除左招牌叉燒包之外，每款點心都好一般。而且價錢明顯比九龍兩店貴，可能港島掛。

惟一可取之處係，等位時間一定比九龍店短。黃昏六點幾時份，根本唔洗等位，只係七點鐘開始出現人龍。而且提供嘅點心有少許唔同，可以試新野。此店亦提供外賣服務，如果想外賣新鮮叉燒包的話，都值得嘅。

前篇參考
25/12/2011
朝拜點心名店，嗒一口「好~美~味~呀~~」驚喜叉燒包

抵食五星級矜貴甜品

甜屋@灣仔
25/12/2011 16:00

由北角沿住電車路慢慢遊去灣仔，係時候嘆番個下午茶。
喺團購網用$15買到$30甜品現金券，可以試下由據聞曾任職文華酒店餅師主理嘅甜品。

法式焦糖燉蛋 ($30，團購價$15)

店員先喺雪櫃拎出一個冰凍燉蛋，再入廚房煮焦糖。焦糖面燒得好靚，微微啡色舖滿晒成個燉蛋表面。焦糖燒得夠實淨，而且糖都幾厚身。用茶匙輕輕一敲，焦糖應聲裂開，睇得出焦糖非常脆身，幸好味道唔苦，只有微微焦香。將燉蛋送入口，感覺超級幼滑，入口即溶，同焦糖嘅香脆相配合。燉蛋有濃郁蛋味，甜度適中。仲有陣雲尼拿奶味，仲見到粒粒黑色嘅雲尼拿籽，真材實料，的確令人回味。

朱古力松露餅 ($30，團購價$15)

長長方方一件朱古力餅，頂層係特濃可可粉，仲有一粒杏仁裝飾。朱古力味勁濃，可可度最少有60%，微微嘅甘味證明左一切。餅中間仲有少許果仁，亦有微微嘅酒香，不太甜又無苦澀味。質感好似慕思、雪糕咁入口即溶，食完仲有好濃郁嘅朱古力味留喺口內，回味無窮。餅底係曲奇餅乾，感覺少少實，但牛油味唔夠香，勝在唔油膩。極濃嘅朱古力餅食落有少少膩，好彩兩人分食，完全唔係問題。惟一問題係當用叉切開朱古力餅時，實在有啲鬆散，跌到周圍都係。

位於灣仔嘅甜品店，裝修好簡潔，感覺幾高檔。每款甜品都好精緻，味道確實唔錯。標榜由五星級酒店餅師主理，但出奇地價錢唔貴，團購更加抵到爛。正價的話，相宜嘅廿零蚊有交易，當然唔少得多款矜貴嘅酒店級甜品，可謂豐儉由人。
有日行過青衣翠怡花園，發現一間格局相似，連個餐牌都似曾相識，相信係此店嘅分身，只不過新地方新店名，得閒行過可以一試究竟。

外型100分星級雞蛋仔

利強記北角雞蛋仔@北角

25/12/2011 14:00

港島蕩失路之旅第二站
難得闖蕩北角，點可以唔試下馳名嘅雞蛋仔?! 喺對面街已經見到人龍，每分鐘都有人買緊，都咪話唔勁，果然係超出名嘅排隊名店。舖仔細細，只得一個窗口仔處理交收，其他外牆位置全部都貼滿晒明星到訪嘅相片、傳媒雜誌嘅報導等等，星味十足。

一底雞蛋仔要十五蚊，都真係幾貴。還記得那些年一底雞蛋仔都只不過七蚊、八蚊，就算係早年前，十蚊雞都有交易。點解你咁貴?

雞蛋仔大大底，淡淡嘅奶啡色，熟成度剛好。每粒雞蛋都好完整，圓轆轆，脹卜卜，外皮好光滑，唔會見到一個個洞孔或者一凹一凸，整體造型俾足一百分。餅皮邊緣位同雞蛋外皮都好香脆，就好似食緊雞蛋薄脆咁。雞蛋內裡唔算飽滿，大約三份一係有餡，但勝在夠軟綿綿。甜度適中，奶味同蛋味都可以，唔算好濃，但都叫做有啲味。

論外型，佢的確好過坊間嘅好多倍，超級靚仔。

二論口感，真係做到皮勁脆、內餡軟，唔錯呀。

再論味道，應該同出面嘅差唔多，少少甜、少少奶、少少蛋，未試過有一間勁有蛋味。

最後論豐富度，都唔差過其他店，正常程度，因為咁耐都未見過有雞蛋仔內餡可以用豐滿黎形容。

呢間雞蛋仔唔算好好，但已經比好多店舖好好多。喺未發現最好嘅雞蛋仔之前，雖然無得比上，但一定係比下有餘，所以得閒行過都可以試下。

膠登炸G包

高登炸雞@荃灣

24/12/2011 13:30

非教徒平安日唔洗去敬拜主，去左荃灣潮拜高登炸雞。荃灣新開分店，唔洗山長水遠過海去筲箕灣，都係一件好事。團購$15可以享用價值$31嘅炸雞包套餐，包一個炸雞包、蕃薯條，仲跟埋汽水，抵過食老麥。

高登巴打設計嘅聰明杯，裝住蕃薯條同汽水。

食包唔襯薯條，改為蕃薯條，都係一種創意。蕃薯條有薄薄嘅炸粉包裹住，蕃薯條唔太熱，薯肉爽爽地、甜甜地，炸皮唔夠脆，仲有陣油味，似乎閒置左一段時間，唔多新鮮。

大大隻字印住「高登炸雞」嘅雞包，材料都幾豐富。炸雞扒超大塊，仲有一塊新鮮蕃茄同生菜，加少少沙律醬。雞扒唔算太熱辣辣，外皮嘅炸漿薄薄地，少少脆多多腍。雞扒肉質好嫰滑，肉汁豐富，亦有雞味，有少許鹽、胡椒粉同味粉調味，雞肉有味道，仲有少少辣，味道唔錯。 略嫌唔夠脆口，而且沙律醬落得太孤寒，連包食感覺幾乾身。

大雞包原價$18一個，其實算貴，亦感覺唔到傳聞中嘅即叫即整，唔覺得好新鮮。但今日團購十五塊錢就有大包、蕃薯條仲有汽水，真係抵到無野好講，係完全夠飽有餘。至於正價會唔會再食，就係問號一大個。而家高登友都唔太支持今時今日嘅高登炸雞，只覺得被借名上位。呢啲咁政治嘅私人恩怨就唔太關我事，但只論食物質素，佢唔係太留得住我嘅歡心。

勁爆流沙湯圓

福元湯圓@紅磡
18/12/2011 17:00

周街四圍蕩，蕩蕩下，蕩左去黃埔。福元湯圓眼前一亮，終於見到佢開門。之前有好幾次行過都無開門，仲以為佢關門大吉，今日終於都有緣，嘆番碗靚湯圓先。

初體驗梗係要試多幾款，所以叫左個貪心鬼最愛嘅鴛鴦湯圓，可以一次過試晒芝麻同花生兩款湯圓，再加一個芝麻糊湯圓。

芝麻糊+芝麻湯圓 ($22) 

$22一碗芝麻糊跟三粒湯圓，正常價錢。芝麻糊濃稠度適中，甜度適中，口感超級滑，感覺上唔似生磨，因為粒粒沙沙欠奉。不過是但，志不在此。 

 

糖薑水+ 鴛鴦湯圓 ($16 )
食湯圓，一定要配糖薑水，咁先可以試到湯圓嘅本質，唔會俾啲乜糊物糊搶晒味。
一碗鴛鴦湯圓湯水有三粒芝麻湯圓，再加兩粒花生湯圓，抵食。

湯圓大大粒，皮幾薄，軟糯得黎又好煙韌。一咬開湯圓皮，烏黑油亮嘅芝麻漿就湧晒出黎，澎湃到連湯匙都裝唔住，終極流心。芝麻餡唔太甜，充滿芝麻濃香味，有少許沙沙嘅口感。熟知廚藝嘅人實知道，享受澎湃流心嘅代價，就係肥膩，而相信造芝麻湯圓都用上唔少豬油，所以感覺有啲油膩。其實味道咁好，大可以減少豬油份量，就算流心效果減半，我都一樣鍾意。

兩款湯圓比較之下，我比較鍾意珍貴嘅花生湯圓。鍾意佢嘅流心狀態，比芝麻餡少左陣油膩感。又鍾意佢有粒粒口感，唔會只用花生漿胡混過關，花生味又夠香濃，甜而不膩。配合微甜少辣嘅糖薑水，正好夠暖入心。

十零蚊一碗流沙湯圓，做下午茶就最啱。中午食完個執笠牛肉鍋，再食埋碗苦嘅糖水，真係乜心情都無晒。但傍晚時份食完呢碗暖笠笠湯圓，心情即刻舒暢番。閒時無野做四圍蕩，相信都會蕩番黎呢度食個甜品做中途站。

老字號苦水

大良八記@尖沙咀
18/12/2011 15:00

大良八記曾經係一個食糊最佳選擇，的確曾經係...
唔知點解佢要做團購，蜂買用九蚊雞就可以食到一碗糖水，買左兩張券當做飯後甜品。團購有唔少款式選擇，包括芝麻糊、杏仁糊、紅豆沙、綠豆沙、喳咋同腐竹雞蛋糖水等。 

芝麻糊
濃稠度適中，口感滑得有點過份，感覺上幾似開粉芝麻糊。芝麻唔講得上濃味，只感覺到燶味。入到喉嚨味道甘甘地，似乎係芝麻炒燶左嘅原故。佢係唔係想用燶味黎證明佢唔係開粉，而真係落手落腳炒芝麻再磨為糊?

杏仁糊
糊，真係超級糊，好似漿糊咁糊。一入口，竟然係苦嘅! 好明顯係南北杏嘅比例落得有問題，簡直係難啃! 完全放棄。

唔知幾時開始，大良由最傳統、無乜裝修嘅小店，變成連鎖式，裝修得好新潮、好有年輕氣息嘅糖水舖。分店越開越多，裝修又靚左，唔代表啲野好食左。記得早幾年前，每次想食糊，好自然會聯想到大良八記。最出名新鮮生磨芝麻糊、合桃糊，樣樣都好馳名。今時今日，重臨大良八記，希望用九蚊雞嘅價錢，重拾那些年食糊嘅滿足感。最後得黎嘅係兩碗苦水，係完完全全失望透頂，激動到有想掟碗加反枱嘅念頭。只可惜身處卡位，枱係釘實喺牆上，我無能為力。

望住港式糖水老字號嘅名字，印喺紅當當嘅新潮招牌上，覺得有啲黯然，呢個招牌將被永遠黑名單，永不翻身。剩低嘅，只有一個喊臉。

妮啲思巔娜

八月軒@旺角

16/12/2011 19:00

是晚跟同事一行九人食晚餐，預祝聖誕節。去左美心集團嘅八月系列，嘆個中西fusion嘅豐富晚餐。因為同事飯局，怕羞唔方便怒影相，所以只係精選幾款印象深刻嘅記一記低。

原隻脆脆BB豬 ($228)

係此店嘅招牌菜，BB豬真係非常之baby，一個豬頭仔，背後放左兩排乳豬肉，九個人，大約每人分到兩至三片，估計總數大約得二十片左右。出奇地，乳豬無跟任何醬料砂糖，以為樓面拎漏左，原來醬料已經預先塗定喺豬肉底下。乳豬皮脆到不得了，脆過薯片， 脆皮底下有一層1mm厚嘅脂肪，再黎嫰滑爽口嘅豬肉，加埋甜甜鹹鹹又濃郁嘅乳豬醬，好惹味，正正係「皮脆肉嫩」嘅一百分呈現。每人分得兩片實在太少。

拔絲石榴咕嚕肉 ($88)

原先仲以為同普通版咕嚕肉一樣，但呢碟一定係更好味版本。豬肉切得細細粒，一口大小，外層有略厚嘅炸漿包裹，撈左醬汁之後，仍然感覺到脆脆嘅口感，而且豬肉好爽口，肉汁豐富。咕嚕肉醬汁一樣係酸酸甜甜，可能比正常再甜多少少，因為仲有麥芽糖做到拔絲效果。更得意嘅係，見唔到菠蘿，而改用石榴。一粒外層煙煙韌韌，中間爽口香甜嘅粒粒仔就係石榴，口感得意，同酸甜汁好配合，幾有創意。

窩巴醬燒豆腐

白雪雪嘅窩巴之上，係用炸粉包裹嘅滑豆腐，再淋一個酸酸甜甜嘅糖醋汁。豆腐真係超級滑，入口即溶，而厚厚一層炸粉仍有脆度，口感豐富。再加埋脆脆嘅窩巴，俾足三重唔同口感，玩味十足。

花雕蟹肉蟹子燴伊麵 ($98)

伊麵上舖滿白色嘅蟹肉，仲有唔少橙黃色嘅蟹子，入口有濃郁嘅花雕酒香味，跟伊麵的確係一個不錯嘅配搭。

完成正餐之後，女士們開放甜品胃，豪不客氣選擇左三款人氣甜品。

101鮮果拿破崙 ($58)

取名參考台北101大樓，千層酥究竟有幾高? 上枱嘅時候的確驚喜，八、九層千層酥再加一塊長長嘅糖膠片，淨係件千層酥都有成二十厘米高。千層酥放喺大大隻碟上，仲有糖絲伴碟，賣相一流。但問題就黎啦，點樣可以分到人人都有食，而又不損千層效果呢? 最後決定將佢上下分一半，再切開幾份。每層酥皮中間用吉士醬分隔，再加上奇異果、火龍果、蜜瓜、藍梅、西瓜等水果。水果嘅款式似乎過份新奇，紅色嘅竟然唔係士多啤梨，而係西瓜。而吉士醬實在太少，所以味道比較寡，但酥皮的確超級酥脆，每層酥皮都睇得出由十幾片薄皮組成，非常鬆化。

芭菲香蕉三弄 ($32)

藝術感十足嘅呈現，非常吸引。最底層係香蕉忌廉班戟，之後係一層香蕉雪芭同薄脆。薄脆之上有用焦糖燒過嘅香蕉片，最頂係一個雪糕球同糖膠片。整體造型好豐富，層次感十足，但味道其實好普通。焦糖香蕉片好似燒得太過火，有燒焦嘅味道。而雪芭味道較清淡，雪到好硬實，食落好似一絲絲雪冰咁。

嘚嘚地甜薄撐($26) 

甜薄撐係客家甜品名菜，用鑊仔呈上，感覺熱辣辣。薄餅比一般嘅厚身，甜甜地，口感非常煙韌又軟腍，而外皮仲煎到脆脆地，就好似咸水角嘅外皮。薄餅包住濃郁花生醬，粒粒花生碎、椰絲、砂糖等，仲有芝麻提味，材料落得夠多，好味道。價錢唔貴，最後encore多一份。

豐富嘅一餐，叫左八碟小菜，再加四個甜品，九個人平均消費都只係一百五十蚊有找。每碟賣相都好吸引，味道亦唔錯，只不過份量比較細少，每樣餸都只可以小食幾件淺嘗，最後要靠甜品補位先夠飽。但人均消費百五蚊黎講，價錢算好合理，普普通通一間酒樓都係咁嘅價位。較特別嘅係，呢間並唔係普通酒樓，而係走新派風格嘅中餐廳，有好多fusion菜式之餘，仲有唔少西式甜品，係一流嘅女士們聚會點。

尋找尖咀樓上的泰美味

新曼谷泰國菜館@尖沙咀
11/12/2011 18:30

一向怕熱氣，比較少食泰國菜，但團購半價買現金券嘅吸引力實在太強勁，$50可以當$100用，最驚喜就係鍾意用幾多張都得，咁著數?! 最後買左兩張，足二百蚊Quota，兩個人夠晒用。

泰式小食拼盆 (細$65)

細嘅小食拼盆係可以自選兩款小食，最後揀左風評較好嘅炸蝦餅同泰式春卷。炸蝦餅比想像中多，足足有三大塊再對切，而且每塊都好厚身。蝦餅炸得香口脆脆，唔覺油膩，啖啖肉，好豐富，似乎無加太多粉漿開稀，真材實料也。蝦肉夠新鮮，非常彈牙爽口，而且仲有濃郁嘅鮮蝦味。得!

泰式春卷炸得乾身又唔油膩，外層脆到不得了，夾埋內餡粉粉腍腍，口感一流。內餡豐富，有蘿蔔、粉絲、椰菜、芋頭、肉碎等材料，味道唔錯。

小食最緊要配合泰式甜酸醬，酸咪咪少少辣，更滋味。

椰青海鮮焗飯 ($78)

一上枱已經聞到好清香嘅椰青味，而且原隻椰青上菜，派頭十足。每一啖白飯都充滿椰香味，似乎飯係撈埋椰汁再焗，白飯吸收晒椰香味，熱辣辣香噴噴，越食越上癮，就算齋食白飯都已經好滿足。焗飯配料都好豐富，有新鮮爽口嘅魷魚、鮮蝦、青口，再加埋雜豆伴炒，肉鬆同腰果送飯，仲有最重要嘅新鮮椰肉，細細粒嘅椰肉甜甜地，令到焗飯更加香甜，椰味更濃郁。絕對係十粒星推介!

沙嗲雞 (半打$55)
串燒雞肉燒得好，微微燒焦，唔沾醬就咁食，啖啖肉好嫰滑，而且肉汁保留得好好，有陣陣香草味。再加埋微辣、有花生碎嘅沙嗲醬，真係絕配。如果沙嗲醬可以再濃味啲就更好啦。

椰汁西米冰 ($15)
清甜解渴，食完熱氣野，飲番杯的確唔錯。

食得飽飽，計埋加一，埋單大約二百四十零蚊。扣番團購卷優惠，呢餐只不過一百四十幾蚊。百四蚊食到如此豐富，又有咁嘅質素，真係抵到爛。
非常明白點解佢要做團購，佢似乎係一間新店，開飯網只得一篇評論，人氣度近乎零，而地理位置的確係一個好大嘅問題。位於寶勒巷，已經無尖沙咀其他地方咁旺，而佢仲要座落喺樓上舖。基本上，即使睇住地址，行過左都唔多覺，就算見到個水牌，都唔識搵門口入，風水似乎差左啲。所以，星期日嘅夜晚七點時份，竟然只有四、五枱客，人流極之少。而佢又好放心咁安排我倆二人坐大大張六人枱，可能有苦自己知，如果生意好的話，呢件事有乜可能發生。相信就算拉大隊一行十二人，周日七、八點踩場開P，都唔洗等位。

多得團購，令我發現多一個大班人Gathering嘅好去處。一來人流唔多，野食OK，估計都可以當Cafe怒hea時間。但只怕有朝一日，佢真係做唔住，咁真係無計。

麻麻地多粒豆木糠布甸

土屋甜品@旺角
4/12/2011 15:00

食飽最好就用甜品作結，$30有兩個4吋木糠布甸，都算幾抵，下午茶最岩。

原味、朱古力味木糠布甸

木糠布甸除左個頂散左啲之外，基本上算好實淨，好明顯睇到分左幾層，用木糠相隔，頂頂仲有幾粒朱古力豆豆。原味木糠布甸係用番原味嘅馬利餅餅乾碎，夠乾身。雪凍左嘅木糠布甸，布甸部份似雪糕，入口即溶，好夠滑，甜度適中。冷溫過後，布甸更加柔軟，就好似忌廉咁。而所謂嘅朱古力味，其實似係用Oreo取代左馬利餅，但可惜Oreo味並唔突出，感覺奇奇怪怪。更奇怪嘅係頂頂粒朱古力豆，同任何一款味道嘅木糠布甸都完全唔夾，畫蛇添足，不吃也罷。麻麻地咋喎。

唔知點解木糠布甸喺澳門好出名，因為去澳門自由行，所以認識左佢。第一次食，其實完全唔知係乜，只覺得甜甜奶奶， 有雪糕冰冰實實嘅口感，又幼滑得似鮮忌廉，令人愛不釋手嘅感覺。

睇番食譜製法，先知道木糠布甸原來係馬利餅餅乾碎，同淡忌廉等材料嘅冷凍合成物。最鍾意佢奶味香濃，但又唔膩，冰冰涼涼，入口即溶嘅感覺，係去澳門必食嘅甜品。而其中最難忘嘅，就係觀光塔自助餐嘅出品，超級幼滑，味道濃郁。而官也街嘅幾間名店，係零下唔知幾多度嘅凍冰冰版本，所以雪得實實，夏天良伴呀。但講到人氣No.1，人人都推選九如坊，但成六十幾蚊一件，仲未捨得食。搵日。

豉油痕燒味

廣東燒味餐廳@旺角
4/12/2011 13:00

廣東燒味開到油尖旺區通街都係，團購 $23可以有雙併燒味飯加例湯或飲品。對佢完全無期望，只求廿幾蚊食得飽肚。

叉燒燒鴨飯、叉燒油雞飯

出奇地，兩碟飯同一時間送上，但賣相可以差咁遠。

叉鴨飯，色水正常，排得靚靚，可算係正常吸引。叉雞飯啲叉燒毫無血色，白雪雪，啲雞皮黃到好似染左色，左一舊又一堆，非常混亂。

左邊嘅叉燒一號，肥瘦適中，瘦肉部份比較硬實，有少許脂肪就鬆軟好多，亦鍾意有少許燒焦嘅邊位。味道普通，蜜味唔夠，中規中距，好普遍一舊叉燒。而右邊果碟嘅叉燒二號，非常大舊，全瘦超乾柴勁嚡，一滴蜜汁或肉汁都唧唔出，齋叉燒仲好食過佢。

燒鴨其實有啲肥，脂肪同皮仲厚過舊肉，好肥膩下。鴨肉本身無乜味，但層皮嘅味道超濃超咸，毫無香味可言。 

黃油雞，皮肉正常分佈，肉都夠滑，但無乜雞味，而且雞骨間仲見紅，有啲驚。

例湯，似係一般味精湯，不飲也罷。

完全無期望下，貪平買左兩張，諗住用黎醫肚。的確，佢能夠飽腹，係肉體上嘅飽，精神同心靈完全得唔到滿足。真係唔明點解，呢間野開到遍地分店，仲話係好多豉油痕遊客來港首推嘅燒味餐廳，似乎都係店方俾錢買個旅遊書廣告位做下宣傳，呃呃氹氹咁。唔怪得，一入門口，侍應阿姐可以好自然地用煲冬瓜招呼我地話﹕ 「娘喂，痴冬C姐ben左呀!  (兩位，吃東西這邊坐呀!)」真係打左個突，心中只好暗暗回覆一句﹕ 「餓文吾市豉油痕，市腥揀忍呀。」

偏見劣食﹕青瓜撈麵

大家食@油麻地
2/12/2011 13:00

午餐只食個第一腸， 當然唔夠飽。記得早前貪平買左兩張大家食團購券，立即去食埋，填飽個肚先算。平，的確係平，只需$14，就有一客招牌炸醬撈麵，再加埋一杯冷熱飲品。

$14一客，份量唔少，一大碟撈麵，一大堆花生，超多條青瓜，炸醬豬肉碎呢埋喺麵同麵之間。一向勁憎青瓜嘅本人，聞到青瓜味真係頂唔順。而每條青瓜粗度十足，份量超多，可能比M記中裝薯條更多。好衰唔衰仲要撈埋落個麵度，要一條一條夾走都幾花時間。

除去青瓜呢個敵人後，出現番一碟我接受得到嘅炸醬麵。麵係煙韌嘅，亦唔會過腍。肉醬係好味嘅，粒粒豬肉碎調味適中，亦夠惹味，濕潤度剛好，唔覺得太油膩。再加埋香脆花生，其實係一個唔錯嘅配搭。
但...點解? 點解青瓜嘅味道仍然陰魂不散...一陣陣嘅草青腥臭味...噢! 撈!
就係呢幾十條青瓜，破壞晒成碟撈麵，所以我俾劣評。編按﹕我係有偏見!

如果你愛青瓜，相信你會愛死呢碟撈麵。講完。

米G蓮腸粉

第一腸粉@太子

2/12/2011 12:30

唐唐話深水埗最出名嘅美食係腸粉...?!唐唐講緊邊間腸粉真係唔知啦，只知道「米芝蓮」選中嘅係邊間腸粉專門店。就剛好喺佢上報當日，有機會一試。

之前喺筍仔網買左$10一張團購券，可以試一款腸粉，加送豆漿一杯。原本都打算呢個星期當做下午茶，去食埋佢。點知今朝早就見到各大報章介紹新一期「米芝蓮」中選名單，呢間小店就榜上有名，而且仲俾傳媒勁煲佢開業不足一年就上榜呀，金馬獎影后德嫻姐、柏高先生都係座上客呀咁。所以立即決定，即時決定，即日解決左呢張券，以免佢日後更出名，人龍湧現，想食都無得食。

十二點幾去到，好彩等位只需一分鐘。小店地方真係淺窄，舖仔細細坐到廿多人，避免不了背貼背嘅情況。一間小店獨賣腸粉，附加兩、三款粥品同蘿蔔糕等，都咪話唔博。

豆漿﹕ 幾清甜，有豆味。正好作為等待腸粉到來嘅良伴。

蜜汁叉燒拉腸﹕ 腸粉講不上晶瑩剔透，只可以隱約見到叉燒嘅橙紅色，單靠外型，已經覺得腸粉皮唔薄，的確。白白嘅腸粉皮入口帶黏性，並無想像中咁幼滑順口。人地話配方唔同坊間喎。但我欣賞佢夠米香，即使有相當厚度，仍然非常軟熟，可能各有各食法。內餡嘅叉燒，唔知係咪特意，切得比一般大塊，存在感更好。叉燒入口亦軟腍，肥瘦適中。不得不提，腸粉豉油本身已經非常好味，甜甜咸咸，正好增加腸粉嘅香味。

招牌第一拉腸﹕ 招牌腸內餡包括菜甫以及豬肉燥，好特別好創新嘅配搭。作為腸粉亦唔錯，菜甫有爽口粒粒嘅口感，加上濃郁惹味嘅肉燥，正係好台式風味嘅感覺，比一般叉燒腸更吸引。

所有腸粉都係即叫即造，即使入座唔洗等位，但等食都需要付上相當時間。全店滿座嘅情況下，等兩碟腸粉大約等左超過二十分鐘。但腸粉送上嘅時候，係熱辣辣，非常新鮮。團購價$10一碟加送豆漿，絕對無怨言。

小店開張無耐，已經數度加價，一碟腸粉由原先嘅$15，每次加兩蚊，已經加到今時今日嘅$19。當日佢仲未上米記榜之時，唔知道有幾大吸引力，令人願意俾張廿蚊紙齋食一碟腸粉。但相信由今日開始，小店人氣越勁，人龍自然越長，加價亦係理所當然嘅事，到時肯定廿蚊都唔夠埋單。好彩，早食早著。Yeah!

由頭限速到尾的抵食抵玩日燒@盛八

盛八日式燒肉店@旺角

27/11/2011 17:30

日式燒烤不嬲都矜貴，風評不錯嘅盛八，晚市普普通通都要三百幾蚊一位。唔知係生意麻麻，定係想做多轉博宣傳，堂堂盛八都要做團購。早前食過一次，印象深刻，今次佢做團購，當然唔客氣。只需$118，就可以喺黃昏五點半時份入場，享用兩個鐘嘅半任食。最後消費左五張，一家人去食餐豪嘅。

$118一人前大滿足半任食套餐，包括幾款前菜定食，同埋一客果味牛肋骨肉。另外仲有九個豚肉、手羽先等任食項目。

盛八沙律、日式茶碗蒸

沾醬包括﹕ 甜味醬油、檸檬汁、蒜蓉鹽味汁

胡麻豆腐﹕ 冷豆腐好滑，加上超級芝麻，少許醋酸味嘅芝麻醬，非常清爽開胃嘅前菜。

果味牛肋骨肉﹕ 話厚唔厚，話薄亦唔薄嘅牛肋骨肉，只需要每邊稍燒二十秒至微微變色，達到六、七成熟嘅程度就剛好。牛肋骨肉雪花好靚，燒熟左後，入口軟腍，油脂肉汁豐富，醃得夠入味，有甜甜蜜蜜嘅果味，調味剛好，唔沾任何醬汁已經夠好味。可惜只係定食，無得任叫，每人大約分到五、六片。

黑七味魷魚鬚﹕ 魷魚鬚夠爽口彈牙，調味好香胡椒、七味粉，但覺得太辣，太刺激。

山葵手羽先﹕ 可能我無食過，或者食左，但山葵味道唔多覺，以為無食過。真係唔太清楚。

鹽味手羽先﹕ 普通嘅雞翼，只需普通地加鹽，只要燒到皮脆肉嫰，已經好好。

香草雞腿肉﹕ 青BB嘅雞腿肉，其實唔覺有什麼香草味，普普通通，勝在雞肉都算滑，肉汁豐富。

橘子雞腿肉﹕ 比香草味更特別，係酸酸甜甜嘅香橙味，幾得意。

柚子豚Toro﹕ 其實即係豬頸肉，以佢本身嘅質地，爽口軟腍嘅口感，無可能會難食。呢件豚肉用左柚子醬醃製，的確入味，食到甜甜帶微酸嘅柚子味。

味噌豚Toro﹕ 呢件豚肉，肉質良好唔再講，一入口已經食到濃郁嘅味噌，醃得非常入味，惹味非常，值得再三encore。

鹽燒赤豚肉、生薑赤豚肉﹕ 肉質偏鞋，味道唔多覺，極度普通。

五個人，一個爐，不停怒燒怒食。完餐仲跟一個紅豆雪糕，牛奶味濃，有粒粒紅豆，凍冰冰，正好作為燒烤嘅總站。

盛八嘅調味醃肉係有一手，即使燒熟左撈埋一堆，根本唔記得燒過啲乜。但入到口自自然然可以憑調味配對出所屬名稱，證明肉醃得入味。

今次團購計埋加一，一人都係大約$130，雖然選擇唔算多，亦無人氣美食如鹽燒牛舌，盛八腸、羊架等，已經算好抵食。惟一唔鍾意就係追加速度奇慢，而且常漏單，兩個鐘頭裡面，有幾轉都係燒空氣，係有心定無意限速，真係不得而知啦。

其實幾享受日式燒烤嘅過程，就好似玩Flash Game咁，睇住啲肉慢慢由紅色變啡，油脂不斷滲出，反面嘅時候，唔覺意燒成一格格嘅網紋，再等佢慢慢熟成。最後將完成品送入口中，呢個過程時間係長，但果種期待，就好似食物嘅另一種調味料。

只可食喇沙的星泰餐廳

星泰真味 @大埔
25/11/2011 13:30

是日午飯時間去左大埔中心，碰上一田百貨瘋狂勁減，人山人海得更瘋狂，搵食艱難。

最後見到一間星泰餐廳有位，拿拿聲入去開餐。

香茅豬扒喇沙湯檬+凍奶茶 ($37)
湯粉比想像中大碗，材料亦唔少，豬扒竟然俾足三大塊，仲有其他配菜，幾足料呀!
豬扒浸入湯中，都食唔出係唔係香茅，但豬扒明顯煎過，外皮焦香。豬扒肥瘦適中，仲係肉帶骨，入口軟嫰，而且醃得入味，好香蜜糖同蒜味，味道甜甜地，好開胃。
湯底色水偏黃，椰香味道濃郁，少少辣度正好夠醒胃。最愛熱辣辣嘅喇沙湯底襯檬粉，粉撈湯一啖食，正! 檬粉煮得剛好，但略嫌剪得太過細碎。配菜仲有好多芽菜、豆卜、魚片同半隻熟蛋，豆卜吸收晒喇沙湯汁，一咬就唧晒入口，至係精髓所在。

午餐三十七蚊，正常質素，價錢合理，普普通通一間茶記嘅午餐都係咁上下。
睇埋下午茶餐牌，好似大約二十幾蚊有交易。
但睇番開飯網評，好多人都俾喊臉，似乎炒飯類型係地雷，可避則避。

貴價韓西餐

Chum Chum Mi@尖沙咀
20/11/2011 20:00

尖沙咀美麗華商場有好幾間高檔又出名嘅食肆，正價真係唔捨得去食，難得有團購推廣，就去左一間韓國餐廳食晚飯。何謂高檔? 因為大多數侍應都係韓國人，電話預約請用英文，落單亦請用英文，亦見到唔少韓國人黎食飯，聽到唔少韓國話，似乎真係幾韓式。

韓式脆香甜酸雞  ($95)

份量比想像中多，差不多有十大件雞。雞係炸過嘅，但被一層酸甜醬包裹，脆皮浸腍係合理懷疑，但呢個懷疑並唔成立。雞件有一層炸漿，沾左甜酸醬後，入口時仍然香脆，新鮮熱辣嘅時候，仲食到索索聲。即使放涼左後，充分吸收左甜酸醬汁嘅外皮，仍然係實實在在嘅脆皮，唔會變成糊狀咁漿晒口，的確唔錯。醬汁酸酸甜甜，帶少許微辣，超級好味，頂級惹味。香脆嘅外皮下，雞肉都係肉嫰多汁，熟成度剛好，油脂、肉汁多到滴出黎，肉質夠嫰滑，就算係雞胸都唔會話乾柴鞋口。控油同鎖汁技術，拍得住炸雞專門店K記。配上青菜加類似千島醬嘅沙律，再加埋韓式醋漬酸羅白，最適合不過。

韓式炸醬面 ($100)

第一次食正宗韓式炸醬面，炸醬係咸咸甜甜，有啲似豉油加豆豉、麵豉嘅得意味道，但炸醬並無想像中咁濃郁。炸醬仲有唔少豬肉塊、菇類、薯仔、洋蔥等。麵條質地似烏冬，煙煙韌韌，有香甜嘅麵粉味道，質感唔錯。食炸醬麵最緊要識撈，要將所有醬料同麵撈得夠勻先至好食。

海龍皇炒飯 ($100)

一百蚊一碟炒飯，材料夠派頭，有大大隻青口、N咁多隻爽口彈牙嘅鮮蝦、多條煙煙韌韌嘅魷魚鬚，仲有無數咁多粒新鮮蜆肉。材料足之餘，炒飯亦唔錯。炒得夠乾身，蛋香味十足，再加埋唔少青、紅、黃椒粒，以及洋蔥粒伴炒，最後仲有些少芝麻提味，成碟炒飯只論香氣，已經值一百分。色彩吸引，味道亦可口，讚!

主打韓、西式Fusion菜嘅餐廳，裝修有格調，有大大張又舒服嘅梳化卡位。喺新潮嘅環境，酒吧咁嘅格局下，可以享用多款傳統韓式料理，亦有多樣創意Fusion菜，風味已經夠好，價錢貴係有道理。今次多得團購俾我試新野，埋單補番差價，優惠左都要二百幾蚊，真係唔平，唔係大時大節的話都唔捨得食。開飯網睇到，set lunch就比較相宜，平均五十幾蚊一個套餐，可以再試。

是但UP係咁啦之土瓜灣麵食

輝香園茶餐廳@土瓜灣
20/11/2011 13:00

筍網話用$14買到一碗湯粉麵，配油菜再跟餐飲。求其買左兩張，趁星期日去開土瓜灣快快脆食左先。

牛腩麵、雲吞河、蠔油生菜、腐乳通菜

牛腩麵賣相唔太得，一睇就覺得啲牛好瘦好嚡，連一絲絲嘅纖維都睇得清楚。食落都一樣，瘦肉部份又韌又嚡，勁痴牙。只有少量部位有啲脂肪，腍左丁點，幼麵無乜特別，湯底亦普通。

雲吞好一般，有啲一般爽嘅蝦咁啦。河粉唔算滑，又係一般咁啦。
油菜正常新鮮程度，最叻就係啲醬落得夠多，唔孤寒咁啦，啲腐乳幾夠味咁啦。

成餐飯，都係咁啦。唔想多講，是但hea up。因為佢都係無乜誠意，樣樣野都係咁啦，所以我都hea俾佢，而呢篇文章嘅hea度係同食物嘅hea度同等。話晒土瓜灣北帝街，算係繼九龍城之後嘅另一條食街，唔該你俾番多少認真，如果唔係就係咁先。

哈哈笑正宗日本昼御飯

笑笑居樂屋@旺角
14/11/2011 14:00

筍仔網用$25 買笑笑居樂屋價值$50午市現金券，最吸引之處係鍾意用幾多張都得。參考過午餐原價大約六十蚊，最後決定買三張，$150 Quota夠兩個人食個豐富嘅午餐。

天婦羅定食 ($62)

一份定食跟味噌湯、白飯同飲品。天婦羅都幾豐富，有兩隻蝦、冬菇、露筍、南瓜、白肉魚等。天婦羅做得唔錯，碟底無太多油份，可見控油做得好，起碼炸得乾身，唔覺油膩，只需稍為沾沾天婦羅醬汁，已經可以軟化脆皮，證明個脆皮唔係太硬。各樣材料都好新鮮，尤其係隻大蝦，蝦肉好爽口。而露筍、南瓜等，有好天然蔬菜嘅甜味，炸左之後，仍然保留到蔬菜嘅爽脆。天婦羅配上軟綿綿嘅正宗日本米，再加埋超級足料濃味嘅麵豉湯，一份好豐富嘅日本午餐。

鐵板泡菜豬肉定食 ($52)

以熱辣辣嘅鐵板呈上，睇見醬汁燒得起晒熱泡泡，成個畫面實在好吸引。份量唔少，送得晒成碗飯。 豬肉片每片都係大大塊，肥瘦適中，雖然一直受鐵板加熱，但入口仍然嫰滑，肉味鮮甜。韓式醬汁都非常香濃，有少許泡菜嘅酸辣味，辣度適中，夠鑊氣亦好惹味。伴菜嘅椰菜同芽菜已經煮得好腍，充分吸收醬汁。泡菜份量略為少，但味道夠濃，與肉味相配合，配飯一流。

套餐配嘅飲品，除左咖啡、奶茶外，仲可以配各款梳打特飲。選擇左青蘋果梳打，亦夠解渴，果味極濃。

大阪風野菜豬肉奄列 ($38)
話係奄列，其實係蛋包雜菜肉片，內容其實同上無乜大分別，只係少左泡菜，同埋換左個甜甜少酸嘅大阪風味燒汁。值得一提，塊蛋皮的確好野。一大塊蛋皮煎得香，但仍然食到蛋嘅幼滑，蛋味濃郁，聽講雞蛋真係日本產，怪不得。

午市套餐好豐富，正價五、六十蚊一份，以居酒屋黎講，算好合理，而平日好多時都有七折優惠，大約四十幾蚊可以食得飽飽，都算唔錯。二人份量埋單$152，今次用團購，只需補番差價，同正價加一就走得，團購實價$92，絕對值得。

樓上式餐廳都算幾大，有大大張卡位坐，相當舒服。知道笑笑居樂屋係由日本最大嘅飲食集團開設，提供多款正宗日本料理，同白木屋同一個family，所以質素有番咁上下。開飯網評得知，晚市人又多，又比較貴，實在麻麻地。有興趣試的話，不妨拎番張午市七折優惠券食番個豐富日本午餐。

飲茶不再飲茶

盅源@深水埗

13/11/2011 19:00

一盅兩件不再限於酒樓同點心專門店，年青人大膽創業，喺深水埗開設點心快餐店，先用團購提高人氣，三十蚊一位，可以任點任食多款點心同蒸飯，仲包一杯飲品，一個字抵!

有十四款細籠仔點心同四款蒸飯選擇，無限量任叫，當然唔客氣第一輪已經全部試一次。

1. 鵪鶉蛋燒賣﹕ 一盅一件嘅鵪鶉蛋燒賣，外型唔錯呀，一大件份量唔細，但蒸得比較乾身，鵪鶉蛋都收乾水，而燒賣略嫌太實，但調味還可以。

2. 山竹牛肉球﹕ 圓圓一大粒牛肉就好一般，好粉口，無乜牛味。

3. 南瓜牛骨髓﹕ 非常少見嘅一道點心，唔多覺有南瓜味，反而蒜味道較濃，牛骨髓夠腍，但我唔多鍾意食。

4. 蟹子伴燒賣﹕ 一盅兩件嘅燒賣，唔好睇佢平平地以為無餡，用魚肉燒賣黎呃人，原來入面真係足料，而蝦都爽口大隻，燒賣亦有肉味，唔錯，拍得住一般酒樓水準。

5. 四寶滑雞扎﹕ 足料，有火腿、雞、芋頭等，雞夠嫩滑，可以接受。

6. 蠔油鮮竹卷﹕ 完全唔知邊度有蠔油，但勝在夠足料，有齊木耳、蘿蔔、西芹、肉碎等，大大條味道都幾好。

7. 豉椒蒸排骨﹕ 全場最好食嘅一味，encore左多次。排骨有骨有肉，半肥瘦，而且有肉味，用少許豆豉蒸煮都夠好味。份量又唔少，雖然係細籠，但件頭不比酒樓嘅少，超水準完成。

8. 清蒸鮮蝦餃﹕ 夾起蝦餃時已發覺餃皮穿左，食落皮太厚粉，而且只得細細隻蝦仁，竹筍比較多。

9. 豉汁蒸鳳爪﹕ 一盅有三隻，調味味道剛好，鳳爪夠入味，又夠腍。

10. 香菇棉花雞﹕ 正常水準，棉花夠爽滑，幾大塊厚身，而雞都算滑，好足料。

11. 香茜白肉餃﹕ 似蔬菜餃多啲，個皮好粉，連個餡中間亦係粉嘅，唔得。

12. 柱候牛孖根﹕ 牛根超入味，又腍，又黏口，柱候味夠濃，分分鐘好味過啲粉麵檔。

13. 奶皇水晶包﹕ 唔知係唔係放耐左吹凍晒，個水晶皮好似塑膠咁硬，中間得少少奶皇。

14. 叉燒包﹕ 同一般叉燒包味道唔同，唔知有乜材料。

兩個人總共叫左四十籠點心，除左個別兩、三款唔掂之外，大部份點心都係正常水準。三十蚊任食當然舉腳俾笑臉。參考正價的話，可愛嘅細籠點心一盅一件大約五蚊雞，正常版就大路價錢約十幾蚊一籠。小店亦有套餐提供，三十幾蚊一個餐，可以選擇一碗盅頭飯、三款點心，仲包一杯飲品，的的確確係快餐價。

平時飲茶多數都係去酒樓或者新興嘅點心專門店，年青老闆們將飲茶文化結合快餐，提供左另類選擇。而家都唔知道呢條係財路定死路，但幾欣賞佢各款點心都係新鮮製作，快餐的話應該唔會係即叫即蒸，但每籠點心都係熱辣辣出晒煙，而味道亦保持應有水準。

小店創新嘅諗頭，值得欣賞。飲茶食點心唔再指定只可以揀水仙、香片定普洱茶，你想飲奶茶、咖啡，定係可樂、雪碧?