黯然銷魂西餐廳

Bubbles Dream Cafe@尖沙咀

28/8/2011 20:00

喺集購城團購價$38買到一份Bubbles Dream Cafe嘅set dinner。一間細細、唔顯眼嘅餐廳仔，位置騎呢，喺半島中心後巷，無乜人會願意有大路唔行，轉入陰暗嘅後巷。無任何宣傳嘅情況下，相信walk in人數有限，最後選擇用團購提高人氣。

$38一個晚餐都算幾豐富，有齊頭盤、主菜、甜品、飲品，掛名話原價$120，但睇到水牌街價值$98。

煙三文魚凱撒沙律

平時聽到凱撒沙律就會好驚，因為總覺得係一堆苦澀嘅雜草，呢個沙律有少許驚喜。沙律菜好新鮮，完全唔苦，配上鬆脆麵包粒、煎到非常香脆嘅煙肉粒，仲撈埋酸甜沙律醬，面層仲有幾片香濃煙三文魚，作為開胃前菜剛好。

南瓜忌廉湯

有南瓜嘅甜味，忌廉嘅幼滑口感，相信唔係開粉貨色，餐湯黎講的確唔錯。貪心啲，如果跟埋蒜蓉包一定好正。

紅酒燴牛尾意粉

其中一款主菜選擇左牛尾意粉。有三、四大舊牛尾，份量幾充足。其中三件牛尾煮得好軟腍，而且非常入味，唔知點解惟獨有一件牛尾食落幾韌，直情咬唔開。橙紅色嘅醬汁食唔出所謂嘅紅酒，有少許蕃茄嘅甜酸味，感覺似非常濃郁嘅燒牛肉汁。醬汁份量充足，足夠拌意粉食。仲有些少紅蘿蔔、西芹做配菜，蔬菜吸收晒醬汁，非常好味。意粉比較乾身，初期暖暖地拌醬汁食都還好。但到後期，醬汁同意粉開始變涼後，質感更乾硬。

辣酒蒜片鮮蝦扁意粉

六大隻蝦，配意粉仲有露筍拌炒，賣相非常討好，而且聞到好香椒蒜味，好吸引食欲。大蝦非常鮮甜彈牙，肉質爽滑，好新鮮。意粉用黑胡椒、炸蒜片炒香，亦有好香牛油味，有刺激嘅黑胡椒辣度，非常惹味，但食到後期可能會感覺太辣，幾條鮮露筍正好作為緩衝。幾欣賞扁意粉並唔似一般餐廳咁，煮得過時，太腍太軟，幾乎變糊。此餐廳嘅意粉係乾爽嘅，但如果以乾炒形式呈現，更覺硬實，而放喺底層嘅意粉仲出現輕微結餅情況。

美式芝士蛋糕

芝士味非常濃郁，有好香奶味，質感幼滑，入口即溶。一細件份量剛好，如果再大件的話，有機會覺得太膩。有時食芝士蛋糕都幾重視個餅底，一般曲奇餅底係最夾最好味。但相信呢件蛋糕重點不在餅底，餅底只有幾mm咁厚，而且好易溶化，味道亦唔突出，似乎作用不大。

特濃朱古力蛋糕

仔細睇得出，朱古力蛋糕有三層，面層有薄薄朱古力皮，中層係似慕思嘅蛋糕，底層係朱古力餅底。整個蛋糕非常濃郁，甜度適中，更能突顯到朱古力本身嘅香味。朱古力味勁濃，所以食得多會覺膩。

兩件蛋糕都唔錯，但從職員對話得知，估計係現成買貨。

一間唔起眼嘅餐廳，採取溫馨柔和風格，提供感覺上好正宗嘅西餐。由前菜、主菜到甜品都感覺到落足心機，正係網友們所謂嘅「好有Heart」。但最後嘅一段小插曲，令我對呢間好有潛質嘅小餐廳完全失望。

單尾嘅時候，疑似老闆好親切咁走黎問意見。欣賞佢善於同客人打交道，你問得我，我當然唔吝嗇，提供少少意見等你改進，我唔介意。我好客氣咁話，味道係好食嘅，但覺得意粉比較硬。疑似老闆好似有啲錯愕，話佢地嘅煮食風格比較近乎「鬼佬口味」，所以意粉會韌啲，有感言下之意﹕ 硬係正常。

無可否認，喺賣相、味道方面，每樣食品的確唔錯。但係口味唔係人人都接受，就好似黑椒落得太重手，意粉煮得太乾身等。所謂外國風味，即係意粉硬? 為左呢個問題，我訪問左幾位曾居於鬼佬地方兩年以上嘅朋友，但從未得到如疑似老闆所提供嘅答案。只知道外國嘅意粉比較有味道，口感彈牙，但不至於乾硬。

明顯地，平時食到嘅意粉係過腍。一般正常好味、有若干質素嘅西餐廳意粉係正常，軟硬度適中，應有嘅乾身，但未至於乾硬化，拌醬感覺良好嘅口感。但比較之下，此店嘅意粉的而且確係乾、硬，拌醬仍然感覺乾涸，醬汁無助軟化意粉，而干炒意粉更甚。實不相瞞，一向脾胃良好嘅小女子，返到屋企已覺胃部不適，疑似係因為食物過硬，引致頂胃情況。粉硬呢個評語，並唔係出於我自己一個偏見之詞，連平時乜都話好食嘅姚生，都語出驚人反諷一句﹕「呢啲係叫有口感，定係硬?」究竟係我地突然之間個口有問題? 定係我地咁黑仔，全場惟一兩碟乾硬化意粉都俾我地食到? 可能係個廚師有心整蠱。似乎係啦，無理由枱枱客都話牛尾煮得腍，但我地竟然得到三舊好腍，偏偏又搭左一舊韌到咬唔開嘅牛尾。

提出左個善意嘅意見，疑似老闆一面錯愕，一對晴天霹靂嘅眼神，潛台詞心諗「無可能嘅事!」，再加上一堆所謂「外國風味」嘅解釋，成個ending即刻差左十倍。我都話味道好，只不過意粉煮少左十秒時間。十秒後，呢碟將會係非常完美嘅意粉。但疑似老闆嘅回應，令我感覺佢只係虛問，expected model answer係﹕「幾好呀、OK喎」呢啲虛應。對不起，我太認真了。

疑似老闆得唔到想要嘅答案，所以到最後，我地都得唔到其他團購貴客得到嘅服務態度。收唔到所謂嘅會員九折卡、亦無人以米奇手，加六十五度鞠躬，再加笑容可掬地講出一句﹕「記得下次再黎過喎!」嘅歡送儀式。

可能，我地「批評」過佢，佢唔當我係客。又可能，佢覺得我地唔likey佢，預計永世以後都唔會再去，寧願慳番張會員卡。

以$38茶餐廳價錢黎講，我俾夠101分。絕對有潛質由Cafe升呢做Restaurant，繼續以高檔西餐廳正價$98做落去，我期望幫到佢升格做到佢所講嘅$120質素，所以提出意粉建議。可惜疑似老闆嘅回應只值$38。

返到屋企，見到餐廳嘅FB同開飯網，有唔少網友盛讚啲野好食，好有Heart，會俾十個十卜等，全部都係疑似老闆期望見到嘅虛應，好有打手feel，但我相信佢地並唔係打手。相信留得言嘅果班客，全部都「好好彩」。而疑似老闆的確好識得營造一種舒適、親切、殷勤嘅氣氛，引誘你心甘情願俾個好評加笑臉，再十卜你幾句。sorry，我唔會被迷暈，亦唔會盲目跟風。

睇完網評，腦裡只依稀記得我地兩個人喺無任何送別儀式之下黯然離開餐廳，不帶走一片雲彩。

甜魔之意不在雞

肯德基家鄉雞@尖沙咀
28/8/2011 17:30

近排成日俾人引誘食啲平時唔多好嘅快餐，繼上次食過M記十八件雞，今次又去左KFC，目的唔係食雞，係Kami日式布丁。

一個新出嘅$39雞餐，有兩隻家鄉雞，一堆薯手指同汽水，仲有一杯日式布丁。
KFC一向造雞都造得唔錯，比較喜歡巴辣版較刺激。但早兩三年前開始，竟然親耳聽到個經理承認雞縮左水。眼見雞件比正常細左30%，好彩仍然能夠充分掌握獨家嘅鎖汁技術，肉汁豐富之餘，外層仲脆卜卜。
跟餐冇薯格，新推出左炸薯手指，其實即係幼身薯餅。味道唔錯，新鮮的話根本無可能唔好食，但總覺得薯餅應該襯早晨全餐。

今次嘅終極目標係Kami布丁，焦糖味已經沽清，惟有試下草莓雲呢嗱味。

一個非常可愛，曾經諗過帶埋返屋企嘅玻璃樽裝著七成滿嘅牛奶布丁，最底層係士多啤梨醬。喺平滑嘅表面畢出一細匙布丁，睇得出奶凍膠質幾重，有少量震騰騰。入口非常軟滑，喺口腔融化，感覺有啲似吉士醬，又似忌廉。奶味非常濃郁，仲夾雜些少蛋味。底層係士多啤梨醬係正宗果醬，有粒粒籽，味道夠士多啤梨，但略嫌比較清淡。

付出三十九蚊喺KFC食個下午茶，填下肚之餘，亦有甜品食，幾好。

但重點不在雞，旨在食布丁。

不太盞謎樣點心

點心棧@旺角
28/8/2011 13:30

又有一盅兩件啦! 旺角通菜街新開一間點心專門店，店仔細細，用木製家俬，幾有中式飲茶風味。今次喺李氏收購左嘅團購用$15買到$30現金券，買兩張當個午餐有$60購買力都相當足夠。

細細一張點心紙，有三、四十款平時常見嘅傳統點心。

古法糯米雞 ($19)﹕見到隔離枱嘅糯米雞賣相唔錯，又唔想食盅頭飯，所以跟風點一隻。糯米雞件頭唔算十分大，材料都算幾豐富，有一塊厚火腿、一舊超乾柴嘅叉燒、一細粒鵪鶉蛋，仲有冬菇、肉碎等。幾欣賞內餡無肥豬肉，而且糯米算幾軟熟，但其實味道確係非常普通。糯米雞竟然搵唔到雞，係俾姚生食左，定係真係唔見有?

蟹子燒賣 ($17)﹕燒賣算幾大粒，有兩隻大蝦，冬菇同豬肉等。蝦講唔上爽口，只覺得比較硬實，而面頭嘅蟹子，存在感不足，一般貨色。

水晶皮鮮蝦餃 ($17)﹕反而對蝦餃嘅印象比較深刻。水晶皮真係幾薄，白色餃皮隱約睇到內餡嘅大蝦。數得出每隻蝦餃都有兩隻大蝦，蝦餃嘅蝦明顯比燒賣嘅蝦好味，更新鮮彈牙。但蝦餃除左皮薄、蝦新鮮之外，配唔起「餡靚」二字。因為只有蝦味，欠缺層次感。平時食開嘅蝦餃會加左唔少竹筍，更可以突出蝦嘅新鮮，但呢隻蝦餃用料唔夠豐富。

雞絲春卷 ($13)﹕春卷皮的的確確係非常脆口，索一聲咬開，脆皮一層層裂開，豐富嘅材料一點點跌出黎。內餡有齊雲耳、西芹、蘿蔔、白菜等。但最神奇嘅事發生左，食晒全碟都唔知佢原來係雞絲春卷。究竟主角雞絲去左邊? 我認輸了，我唔想玩捉迷藏。難道佢收埋左自己喺啲青菜中間? 食左唔多覺? 其實你係唔係齋春卷? 我真係唔知。

環境舒適，用上木裝枱櫈有中國風味。但枱面有茶杯、碗碟、筷子。入座時，侍應阿姐循例問一句﹕「飲咩茶?」，我答﹕「普洱呀。」阿姐幫你斟一杯熱茶，然後乜都無放低就走左。奇境又出現，有一樣飲茶必見，非常重要嘅東西唔見左﹕茶壺。收取每位兩蚊茶錢，不貴，所以唔會每枱送上一壺茶。想添茶的話，請舉手，侍應阿姐又會問﹕「飲咩茶?」，我又答﹕「普洱呀。」重演多一次經典對白。點解咁麻煩?

四個點心，連兩位無附茶壺嘅熱茶，無加一服務費，埋單$70。手持團購券，只需補回十大洋，實價$40。平係平，但一般般，好普通，無乜特別，so so，不太盞。

神奇嘅點心店，謎樣嘅點心店，樣樣野玩緊捉迷藏。糯米雞唔見雞，蝦餃唔覺有竹筍，雞絲收埋左喺唔知邊度，連個茶壺都消失埋。謎一樣。

於串燒地雷陣中伏重傷

和味軒@油麻地
21/8/2011 19:30

位於油麻地、佐敦交界附近，一去到就知道係一間新開嘅舖頭，細細間得十多個位，以位置黎講，估計係專做自由行生意。 用$38團購買到一份聲稱值$88 嘅二人串燒餐。

團購價$38一份二人餐，包括以下七款串燒，每款兩串，另加每人一杯綠茶或豆漿。
炭燒雞腎、炭燒雞軟骨、照燒雞翼、串燒牛舌、雞肉串、豬肉串、安格斯牛柳粒

一睇個菜單，已經知道無論做Lunch或晚餐都唔會食得飽一個人，更何況係兩位?!
所以我選擇左視佢為掃街小食。

職員話豆漿欠奉，惟有揀綠茶，或者加錢轉汽水。有幾位網友話，發現餐廳明明有部裝住豆漿嘅豆漿機，但職員都話賣晒，擺明唔俾團購客。而所謂嘅綠茶，只用一隻細紙杯裝住大約七成滿嘅道地綠茶，基本上不出五啖可飲晒。如果為左增加團購嘅吸引性，格硬寫話包飲品，但最後得來如此一杯，咁我寧願你寫乜都唔包，學茶餐廳是但奉上一杯熱紅茶算數。

首先試過炭燒雞腎同炭燒雞軟骨，絕對無問題呀，因為竹籤已經出賣左佢，睇得出係邊個牌子。明顯係超市，或者扮日本食物批發店有售嘅現成串燒，只需買番黎整熱就食得，我記得家人都買過番黎食。現成貨味道唔差得去邊，燒汁夠濃，肉質都唔錯。好唔好食都唔關和味軒事，只需煮得熱就功成身退。但係，從網友們分享得知，佢地聽到廚房傳出微波爐嘅聲音，懷疑有啲食物只用微波爐翻熱，所以唔洗金田一出馬，都估到雞腎同雞軟骨嘅嫌疑最大。

一睇見隻雞翼就覺得佢營養不良，瘦瘦削削。其實雞翼好難整得唔好食，相信佢只經過鹽醃，再燒熟。絕對證明到佢係炭燒，因為雞皮燒焦左嘅地方，真係有炭味。雞肉更加係霉嘅，而且乾晒水。

牛舌係有牛舌樣，圓圓地、薄薄一塊，但無牛舌味。

一般黎講，我地好容易靠外型就分辨到雞肉同豬肉。但神奇地，成碟串燒件件外型差不多，親眼見到都唔信，基本上要咬一啖，從佢肉色、纖維先可以分辨清楚。最厲害嘅係，佢可以冇味到，連肉嘅原味都食唔出，第一次體驗到白灼仲好食過炭火串燒。每件都係乾柴鞋口，拍得住湯渣肉嘅口感。

最後到所謂嘅安格斯牛柳粒，但全碟都絕對搵唔到牛柳粒嘅存在，只有同雞、豬一樣乾柴嘅牛肉片。

睇住阿姐親手串肉，有師傅親手燒烤，門面功夫真係做到足，感覺理應唔錯。
需知道我咁理性，都廢事對比團購嘅圖片，擺明知道做宣傳，出晒沙龍技巧，用晒軟件改圖打燈，同睇幅卡通手畫相無太大分別。但，團購嘅介紹同實物，實在差不遠。最重點嘅字眼係「份量又剛剛好，肚子填得滿之餘又可以感動味蕾」。一人食一份，都做唔到「肚子填得滿」，更何況佢聲稱係二人餐。「感動味蕾」真係奇蹟，但我相信味蕾會流淚，因為佢受傷了。

超勁嘅一間舖頭，咁耐以黎，一個好評都無。七款味道串燒，食左都唔知咩黎。全場最好食嘅，係用微波爐翻叮嘅現成串燒。咁不如佢改行做微波爐餐廳啦，可以賣下微波爐杯麵、微波爐點心、微波爐糖水等，相信都係綽頭，可能內地同胞鍾意香港微波爐速食文化呢。

今次踩地雷踩到應一應，估唔到喺大團購網如Groupon都會如此嚴重中伏。而中伏人數相信有三千幾人，大家齊齊踩地雷，哈哈。

後記
安柏娃泰式餐廳@油麻地
21/8/2011 20:30

中伏兼唔夠飽，打算走去油麻地附近食下場，見到附近有幾間小店有賣串燒小食。而其中一間泰式小店，似乎幾受街坊歡迎，所以唔介意俾多十蚊雞，再食多串雞肉串燒。

炭火即燒，新鮮熱辣，份量十足嘅雞肉，再加上沙爹汁，充滿泰式風情。
只需咬一啖，就覺得和味軒嘅串燒﹕「(借司長的名句) 完全係垃圾。」
雞肉有少許皮、少許脂肪，非常嫰滑，肉汁豐富，邊咬邊滴。沙爹汁更係頂瓜瓜，少少辣味，中間滲透少許椰香味，仲有香濃嘅花生味。
雖然經歷早前嘅地雷餐，但食番一口沾上美味醬汁嘅雞肉串燒，正好作為療傷，即刻成個人滿足晒。

降呢3.6配五倍西米王

常嚐甜品@尖沙咀
21/8/2011 19:00

知道呢間店嘅佐敦店口碑唔錯，尖沙咀新開冇耐，做過幾次團購。得十丁個評語，但有一半都係俾喊面。$10買到$25現金券，當飯後甜品都算平，最後乜都唔理，照買兩張試試。從來都唔知尖沙咀有個嘉蘭圍，係大街轉入細街背後，位置奇奇怪怪。

門口幾靚，裝修幾得意，但一入到去，感覺好差。七點鐘時份得一位職員，擔當侍應兼大廚。全店有大約二十張細枱，當中有三份二嘅枱上，都有客人食完嘅碗碗碟碟無人收拾。而不出一個鐘後，係食飯後甜品嘅黃金時段，難道哥哥仔可以一個人搞得掂? 真擔心。

呢間舖評語一般，而團購現金券局限左甜品選擇。喺選擇唔多嘅情況下，點左一個較為出名嘅奶凍，另一個求其是但點左個名稱比較特別、出面唔多見嘅大明珠。

北海道牛奶奶凍 ($32，團購價﹕$17)
呢杯奶凍比平時食嘅燉奶還要細杯，用一個界到花晒嘅透明薄膠杯盛載，配上細細個木匙。奶凍有彈性、實在嘅質感，食落口都非常軟滑，而味道好3.6。從廚房外嘅貨架得知，小店真係選用北海道3.6牛奶。感覺上，3.6牛奶可以同「濃」字畫上等號，特色係奶香味特濃，有微微嘅膻香味之餘，亦食得出牛奶本身嘅鮮甜味。奶凍上面有一點朱古力醬，相信店舖有分辨味道嘅用意，但呢一點醬，就搞亂左面層嘅牛奶味道，降晒呢。團購價$17一個，我覺得都尚算OK，但正價$32一細杯，一定唔會食。

西瓜椰汁大明珠 ($27，團購價﹕$12)
一睇就知，大明珠即係巨型版西米，根本就係椰汁西米露加西瓜。一碗有幾粒仔西瓜，加幾十粒仔大西米，加一碗椰汁，就係咁。西米俾人感覺係潔白無瑕、清純無比，其實即係無味，所以可索性高，加果汁又得，加椰汁花奶又得，可以增加甜品嘅煙韌口感。但一粒煮得唔好嘅西米係會過腍，無晒煙韌口感，嚴重者更會痴牙。呢一碗糖水，充滿住幾十粒俾正常西米大五倍嘅大明珠，每粒都充份發揮到西米家族嘅特性，即係有五倍無味、五倍唔煙韌，再加五倍痴牙，實在神奇。都懶得詳講個椰汁，擺明係罐頭現成貨，都可以溝水溝到無味。三樣材料，只需簡單烹調技巧，無太大學問，竟然可以咁差，俾個叻你。

小女子一向好少會劣評甜品，任何甜品只要食得開心，食過滿足，我都願意報以微笑。無好評，都有個中評。特別聲明，本人一向好均真，已經以優惠價黎評論，但呢次經驗真係實在太失敗。但就憑佢一款優惠價值$12嘅無敵大明珠，真係唔喊都唔得。正價廿幾蚊，邊個食呢?

甜品舖唔算細，眼見只得一個人，人手不足係一個問題。連收拾枱面都無時間，睇住啲水果汁四濺，成枱都係野，營造唔到一個舒適嘅飲食環境，店舖裝修得有幾得意、幾新潮都係假。反而某啲老字號糖水舖，地方細細，無靚裝，只得幾排白白啡啡嘅靠牆卡位同圓枱仔，但盡得歐巴桑們努力經營，摩打手拾碗抹枱，即使店舖幾老舊，都唔會介意停留。

團購選擇局限又係一個大問題。知道此店主打新潮自創甜品，好似用原隻水果上菜嘅水果冰、芝士芭菲杯等等。因為團購嘅限制，除左奶凍之外，只可以揀珍珠系列、大西米、西米同迷你西米系列，即係無野好揀。乜團購唔係想做宣傳咩? 點解唔提供最主打、最好嘅野俾人試? 一啲周圍都食到，無任何特色嘅甜品，你做團購都無意義啦，真係當薄利多銷咩? 好好反省下啦!

樓上住家怒Hea三粒鐘

2nd Home Cafe@油麻地
21/8/2011 14:00

而家團購連Cafe都唔放過，對我黎講係好事，平平地可以食一餐，今次約埋幾個朋友一齊開生日會。今次係大打溫情牌，有住家感覺嘅Cafe，地點遠離一般Cafe嘅大樓，就喺油麻地舊式商廈樓上。入口麻麻，地點偏遠，真係好難有walk in客。

$30團購餐包一個飯/意粉，一杯特飲，仲有一個甜品。

卡邦尼意粉
同平時好明顯嘅分別係，意粉表面有一層用火槍燒過芝士，有一陣濃烈嘅燒烤芝士味。意粉軟硬度適中，芝士忌廉汁夠濃郁而且非常充足，能夠充份包裹住每條意粉。但煙肉好似冇乜味道，似乎貪快未經過牛油煎香嘅程序。一碟卡邦尼意粉有超濃嘅芝士味，燒烤芝士強勁得掩蓋左忌廉味，而更重要嘅蛋味亦欠奉。最奇怪嘅係，每條意粉都唔長過十厘米，我鍾意長長的囉。

藍莓乳酸
跟餐嘅特飲非常大杯，足夠飲足三個鐘。而且冇加冰，每一啖都原汁原味，唔會因為溶冰而沖淡。飲品味道得一個特色，非常人工化。相信係濃縮果汁A加濃縮乳酸B混合而成，所以冇野好講。

北海道忌廉炸蝦丼 配 白桃乳酸
得一個疑問﹕請問何來北海道? 忌廉? 炸蝦? 啲飯? 定係個碗?
炸蝦係非常好食，外皮酥脆，炸得乾爽冇油膩感。炸粉下係一隻彈牙爽口，蝦味濃嘅明蝦。非常欣賞呢位買手揀岩貨。所謂嘅香濃忌廉汁，相信係罐頭忌廉粟米湯加蛋，咪扮晒野啦。不過，淋上飯面用黎拌飯，味道都可以接受。

濃情法式朱古力撻
非常實、相當硬嘅一件撻，只食到特濃朱古力味，朱古力味濃到連個撻皮咩味都試唔清。面層朱古力脆皮，內層係朱古力蛋糕，但朱古力味勁到似食緊原粒朱古力。當佢係一粒朱古力黎食的話，都算唔錯。

法式檸檬吉士撻
檸檬酸得黎有少許吉士甜味，反而呢個撻更特別。

Cafe環境舒適，只放五組枱椅，地方闊落，所以坐得鬆動。大部份都係長梳化位，每組枱仲有電腦同遊戲機。上Cafe當然唔少得玩game，除左電腦、wii之外，仲有唔少board game、card game，的確唔錯。
雖然限時三個鐘，但三個鐘夠晒有餘。總括黎講，食物比一般Cafe好，起碼唔會聽到廚房微波爐嘅「嘟」一聲，反而係「吱吱喳喳」嘅煎炒聲，所以每樣食物都係新鮮熱辣，相當有誠意。
論位置，的確輸蝕。而價錢認真唔平，朋友們order正價一個套餐開價$88。我只可以講，多謝團購，只此一次，我唔會再黎。

牛魔王快閃嘆牛

群記清湯腩@大埔
20/8/2011 13:30

喺大埔返工兩年多，仲未試過群記嘅牛腩。雖則就喺隔離旁邊，步行五分鐘即達，但星期一至五，每次懶豬時間都見到十幾人嘅長龍。就算幾近都好，幾乎每一日都係擦身而過。
星期六嘅中午，終於一試。但當然，要等位。

一點鐘到達，全店滿座不特止，外加十幾個人排我前面，等位總共需時三十多分鐘。等位時好彩喺陰影地方唔洗受太陽曝曬，但門外嘅廚房排風口，有一陣陣牛嘅膻香味噴出黎，真係越聞越餓。

牛面珠幼麵 ($30)
到此一遊，必點最馳名嘅牛面珠。牛腩牛雜食得多，連面珠都唔放過。細細粒顏色較紅潤，肉紋之間夾雜一絲絲膠質幼根，質感有啲似牛展，但更厚身、更嫩、更腍、更滑。味道勁牛，食得出牛嘅膻香。魚面珠食得多，第一次食牛面珠，覺得口感、味道更勝牛腩。牛面珠配幼麵都不實為一個好選擇，麵條幼身得黎幾彈牙爽口，少許鹼水都可以接受。

牛根河 ($27)
平時食牛根，多數係非常入味香濃嘅五香牛根。清湯腩嘅牛根當然唔會有任何五香味道，係清湯牛根。賣相睇落不討好，好似有堆堆脂肪咁，但原來全部都係牛根，真材實料。牛根腍得入口即溶，腍得黏口，可見膠質甚勁，係食牛根最過癮之處。雖無五香調味，但更突顯牛嘅原汁原味。而幼身河粉幾滑，未夠晶瑩剔透，亦未至於粉粉狀。整體黎講，始終不及食牛腩味道咁濃郁，係比較清淡嘅食法，建議可加兩滴店家自製辣椒油，提味之餘亦夠晒刺激。

淨牛爽腩 ($66)
另一款必點名物，幾乎每枱都最少點一款牛爽腩粉麵或淨爽腩。爽腩比普遍牛腩更肥美，仲會連住一塊筋膜。雖則話較牛腩肥美，但呢碗爽腩都係肥瘦得宜，唔會見到大塊肥膏，脂肪正夾雜喺肉同筋膜之間，令牛肉更加滑溜。腩位有一絲絲嘅纖維，腍得黎亦不失爽口，肉味十足。而一大塊嘅筋膜更爽脆，完全唔韌。一啖食齊軟腍同煙韌，正係牛爽腩獨有嘅口感。
群記嘅湯底更係落足功夫，超級濃郁嘅牛骨湯，相信經過長時間烹製。牛味十足之餘，亦非常鮮甜。唔介意呷多幾口，感受牛骨嘅精華，香濃而不膩，配上青蔥更加清爽。食完全餐牛味仍良久不散，口腔充滿住濃郁嘅牛骨香味，呢個湯真係不得了。難怪餐牌上竟然可以淨飲牛骨湯，一碗承惠七大元。
一碗價值六十六蚊嘅牛爽腩，並非湯碗咁大碗，而係一個普通裝白飯用嘅細碗仔。碗仔細細裝住十幾大件爽腩，並無用任何生菜、蘿蔔墊高，非常均真。但六十幾蚊呢個價錢，得黎一個細碗上菜，價單實在有點嚇人。

長期堆滿人龍，排隊等得耐，係理所當然。因為舖仔細細，數得出得廿零個位。又因為佢串到星期日休息，每天只下午一點開始營業，賣晒就關門大吉。想食嘅上班一族，只可以揀星期六黎排隊。最衰嘅係，早幾月前，多得小儀金剛一個街坊廚神大訪問，多左唔少區外人都特登走黎食，人自然更多。

一次過享受幾款牛味濃郁嘅牛產品，其實幾膩下，絕對適合各位牛魔王。
希望牛魔王大人唔好介意小店無乜服務，舖細又迫夾。更要明白可能等位時間仲長過食麵時間，無奈小店就係有一種迫你食完快閃嘅無型壓力。

雞飯綠葉勝牡丹

紅楓葉@旺角
14/8/2011 20:00

太子36酒店喺界限街嘅轉角奇離位，原來地下有間餐廳專食海南雞飯。團購$24一個晚餐，絕對食得過。

海南雞套餐 (海南雞、荷葉飯、例湯) ($48)

最新奇嘅係，海南雞飯竟然唔係配油飯或白飯，而係荷葉飯，非有料荷葉飯，而係荷葉包白飯。一打開荷葉，聞到陣陣荷葉香味，飯夠乾身，軟硬適中。食落除左有荷香味，仲有啖啖椰香味，好一個充滿馬拉風情嘅飯。

主角去骨海南雞份量都唔少，送飯食非常足夠。除左胸肉外，一份分配到脾肉，另一份就有雞翼。不嬲都對雞胸有偏見，總覺得鞋鞋硬硬。但出奇地，呢碟雞胸嫩滑度好夠，絕對入得口有餘。雞肉肥瘦適中，雞皮下仲有一層薄薄嘅脂肪更加美味。而雞脾同翼，論質感更加無任何意見。惟一不足嘅係，雞味不足，只好自行點醬撈汁，各自處理。

另一個不足係，醬汁只有兩款，提供薑蓉同酸辣醬，甜豉油唔知去左邊。還好兩款醬汁調味都不錯，應香則香，應酸辣則酸辣，仲有多陣蒜香味。但無左甜豉油，總覺得周身唔自然。

食完成碟雞，想解膩的話，海南雞底下仲有幾條菜，可以稍為清清口味。仲有個例湯潤一潤，相信係蓮耦章魚湯，夠熱辣，味道幾夠濃郁，相信冇勁落味精，不錯。

團購價一個餐$24，俾埋加一，總數$29一份，食得飽有餘，味道亦可接受，但好似個荷葉飯仲特別過啲海南雞，配角更出位。
餐廳有兩層，團購人全部安排坐樓上，個個同聲同氣，食埋同一款餐，都幾搞笑。

黑白有型，四哥雪綿冰

四哥台式雪花冰專門店@太子
27/2/2011 16:00
14/8/2011 19:00

27/2/2011 16:00

今日我去了搵四哥食雪花冰。

黑白森林 ($35，團購價$20)

四哥話芝麻味係全港獨家，係唔係獨家就唔知，但都算係比一般牛奶、果汁、朱古力之外，比較少有特別嘅冰底。

冰底打得好靚，一絲絲得黎唔鬆散，整個堆得高高，齋睇已經吸引。芝麻味道好濃，就似食緊綿冰版嘅芝麻糊。入口即溶，好軟滑，涼冰冰。配料有火龍果同珍珠粉團，火龍果一向味道較清，配濃郁嘅芝麻冰竟然係唔錯。珍珠粉團甜甜地、煙煙韌韌，除左配奶茶之外，獨立食都唔錯。整體黎講唔算太甜，但芝麻味真係越食越上癮。

平時細細地食個冰都講緊要三四十蚊，今次筍仔網團購$15買$30現金券，補番$5，埋單$20。

抵食得黎，味道唔錯。但講緊雪花冰，除左台北最地道係最好之外，香港嘅Number 1 仍然都係元朗嘅綿綿冰。

後記
14/8/2011 19:00
 

另一個團購網又做優惠，只需$18就可以任選雪花冰一個。勁抵，唔買對唔住自己，點都要試多次。

黑馬皇子 ($37，團購價$18)
佢話係小朋友最愛，但相信朱古力魔都一樣喜歡。朱古力冰底加香蕉，再加棉花糖，完全係朱古力最佳拍檔。朱古力冰底夠濃味，仲要再加朱古力漿，點會唔夠? 團購$18絕對抵食。

倉底貨無聊寫﹕好一般米線

三喜米線@旺角
12/8/2011 14:30

玩團購有個好處，就係出街唔洗諗去邊，點指兵兵是但抽到邊張團購券就去邊度食。出街一日幾餐都靠團購，唔知幾時開始，出街幾乎唔洗帶Cash。
今日點指兵兵走去食米線，$78二人米線套餐，有雞翼、米線、甜品同飲品。

豆漿
飲品係自家製無糖豆漿，真係超級咁無糖，無糖到連豆味都唔多覺，但勁清涼解渴。

溫泉雞翼
名字叫溫泉雞翼，唔知溫泉左喺邊part? 咪又係鹵水雞翼，味道唔錯，都幾入味，但非常細隻同瘦削，而且有啲過熟，所以肉質唔嫩滑。

三喜雲吞沙鍋米線
有四大粒雲吞配沙鍋盛裝嘅米線。雲吞比較大粒，調味還可以，雲吞皮唔夠幼滑，比一般厚少少，蝦肉一般爽口，真係無乜特別。米線配料都幾多，有各款蔥、芽菜等，唔知點解仲有腐皮。米線煮得腍身，我覺得太腍。而魚湯唔覺得係魚湯，只有輕微嘅魚味加胡椒味，湯底都係非常普通，只好自加辣椒油調調味。

美極烤雞扒沙鍋米線
完全感覺唔到烤雞扒同煎雞扒嘅分別，仍然有油膩感。烤的話都唔夠脆，肉質亦唔嫰，又唔多汁。細細件雞扒調味唔足，味道唔突出。美極烤雞扒可能係個名，唔代表用左美極鮮醬油黎醃雞扒。

雪糕涼粉冰
套餐跟埋個甜品，涼粉加左少許糖水同花奶，上面再加多個凍冰冰嘅雲呢拿雪糕，勝在就解暑。

除番開，一人份量嘅套餐值$39，我地的的確確食到$39嘅份量同質素。雖然做左團購，但並唔覺得有幾抵，只係用正價食正常餐。味道唔係十分好，亦唔特別。今次團購只係識多一間食過就算，亦唔會再去嘅小餐廳。
今餐普通到曾經諗過唔將佢記錄低，將啲相片存為倉底貨。但某日(15/10/2011)見得閒，求其寫兩句，志在豐富下個部落格，放多一篇文章而已。

尖東的高級市場

The Market@尖沙咀
11/8/2011 12:00

維港薈 Hotel Icon，新潮嘅名字，理大的教研酒店，2樓嘅The Market係時下受盡熱捧嘅新暴肥場。以港式街市為主題，主打亞洲風味美食，暑假期間仲推出多款總廚特製泰國清邁菜式。

空間感一流，未見過一大堆人排晒長龍，迫埋一堆。採用開放式廚房設計，分類放左唔同類型美食。最外圍係熟食同即製食品攤位，提供粉麵、義式薄餅、印度咖哩、燒烤食品等等。

自助沙律吧有幾款雜草蔬菜，沙律醬汁有成十幾款選擇，旁邊仲有數款新鮮水果。

冷盤前菜提供數款沙律、凍肉、芝士等

日式部提供五款刺身同埋一客兩件嘅壽司

東南亞糕點

東南亞沙律、冷盆

冷海鮮，包括蝦、青口、翡翠螺、長腳蟹，以及東南亞熱盆

甜品專柜，十多款迷你甜品，雪糕，以及即製班戟

食自助餐一向喜歡先進攻刺身冷盆
1. 三文魚刺身﹕ 三款刺身都非常新鮮，全部採用厚切。三文魚尤其光澤鮮明，肥瘦均勻，有入口即溶嘅感覺，味道鮮甜。自助餐提供咁嘅質素，已經好滿意，值得encore多次
2. 吞拿魚刺身﹕ 明顯冇三文魚咁好，食得出有筋，唔夠肥美，比較實
3. 甜蝦﹕ 蝦如其名，超鮮甜，黏黏滑滑，令我一啖愛上
4. 韓式海鮮﹕ 以韓式甜辣醬涼拌蘿蔔乾、大蝦等材料。大蝦非常爽口，韓式醬亦好惹味，少許芝麻令味道更香
5. 札肉火腿
6. 巴馬火腿﹕ 貴野喎，但我唔識欣賞，得個咸字
7. 煙鴨胸沙律﹕ 青椒、紅椒涼拌煙鴨胸
8. 涼伴雞柳
9. 涼伴海鮮﹕ 清爽醬汁拌蝦、魷魚等海鮮，海鮮好爽口
10. 三文魚啫喱﹕ 啫喱竟然咸食，但太硬，做唔到入口即溶，總覺得怪怪
11. 水牛芝士蕃茄沙律

12. 香煎龍脷柳﹕ 龍脷柳肉質好，食得出非常新鮮，只用少許鹽同胡椒香煎，味道不足
13. 醬燒豬仔骨
14. 巴東牛肉﹕ 第一次食巴東牛肉，食得出有陣陣椰香，而且非常重香料味，肉質都算嫩滑
15. 紅酒燉羊肉﹕ 羊有膻味，但整體味道一般

16. 椰青﹕ 全場最解渴嘅椰青，超清甜勁多汁

廚房嘅大後方係充滿左燒烤風味，有pizza、各款扒類、燒烤等
17. pizza﹕ 新鮮出爐嘅意式薄餅擁有香脆嘅批邊，材料豐富嘅內涵
18. 燒羊架﹕ 五成熟嘅羊架，看似吸引，但食落無味，而且肉質幾鞋，肉汁亦唔足夠，而我最想食到嘅膻味亦不足，只可以喺脂肪筋位部份慢慢找尋
19. 西冷牛扒﹕ 粉紅色都係好吸引，但牛味不足，嫩滑度都不足，最後放棄左
20. 德國腸﹕ 提供三款唔同顏色嘅德國烤腸，肉汁夠，肉味算濃郁，但偏咸，一個人亦冇可能食足三大條，切小件同朋友分享相信會更佳
21. 炭燒豬頸肉﹕ 睇落幾乾身，但食起黎味道唔錯，有炭燒味，加埋甜酸泰式辣醬更加滋味
22. 泰式雞肉串燒配沙嗲醬

23. 自助沙律﹕ 選擇多，十幾種醬汁慢慢揀

24. 香滑燉奶﹕ 燙口熱辣，超勁奶味，亦非常幼滑

25. 椰汁紫米露﹕ 黑糯米配新鮮椰奶，所以有些少咸味

自問對甜品一啲都不客氣，毫不留情地夾晒所有在眼前出現嘅甜品。每款甜品都細細件，細件得黎外型仍討好，部份仲配上金箔點綴，盡顯矜貴
26. 芒果芝士蛋糕﹕ 鬆軟嘅芒果蛋糕，有強勁嘅芒果味，軟滑到似芒果布甸嘅質感，非常好味
27. 士多啤梨欖油蛋糕﹕ 整體黎講係酸咪咪
28. 朱古力紅桑子慕絲蛋糕﹕ 慕絲夠軟滑，而酸酸嘅紅桑子係特濃朱古力嘅好拍擋
29. 黑森林蛋糕﹕ 車厘子用紅酒浸過，非常醉人，配合特濃朱古力蛋糕，又一經典
30. 綠茶朱古力慕絲蛋糕﹕ 精緻嘅蛋糕充滿驚喜，由綠茶忌廉、綠茶蛋糕、綠茶慕斯、朱古力脆餅，以及榛子醬相間，頂層仲加左綠茶粉，一細件已經品嚐到唔同味道，極具層次感
31. 白酒啫喱﹕ 晶瑩通透嘅啫喱，有唔講得少嘅白酒味，極濃郁，內有少許朱古力粒用黎提味
32. 芒果奶凍﹕ 以朱古力脆皮作為杯仔，裝著滑溜溜、入口即溶、兼味道香濃嘅奶凍，面層加上酸甜芒果肉，襯到絕嘅組合
33. 朱古力泡芙﹕ 朱古力味濃，內層有勁厚嘅白忌廉
34. 檸檬撻﹕ 超迷你一粒仔擁有勁酸檸檬味道
35. 蘋果金寶﹕ 蘋果肉仍保留香脆口感，加上更香口嘅脆餅粒粒，有香濃嘅肉桂味，好一個甜品
36. 朱古力芝士蛋糕﹕ 唔會實得過份，朱古力味濃，所以掩蓋左芝士味
37. 綠茶奶凍﹕ 同芒果奶凍一樣，以朱古力脆皮做小杯，裝住綠茶奶凍。奶凍一樣滑溜溜、幼滑非常，綠茶味極之強勁，稍微甘苦仍帶綠茶香，喜歡綠茶嘅朋友唔好錯過
38. 麵包布甸﹕ 以電爐加熱，所以任何時間都能夠保持熱辣辣。皮脆內軟，加上雲尼拿醬更加香甜
 

雪糕都係採取高級態度，有瑞士名牌雪糕Movenpick，再加上酒店自家制雪葩，總共三種選擇
39. 熱情果及芒果雪葩﹕ 酸味十足，充滿水果香味，雪葩幼滑得黎，仲有啖啖嘅果肉，好清爽嘅飯後甜品
40. 朱古力﹕ 特濃朱古力味雪糕再加上朱古力碎，好一個雙重朱古力，朱古力魔最愛
41. 原味乳酪﹕ 食出棉花糖嘅鬆軟質感，奶味重之餘亦有香香乳酪味，味道不同FroYo，反而似杯裝嘅忌廉乳酪，新奇口味我鍾意

42. Macaron﹕ 傳說中嘅馬卡龍可遇不可求。原價$15一粒，享用自助餐嘅朋友可以免費試食一粒，要自動自覺地問職員攞，相信只有做過功課嘅朋友先知道。選擇橙味同士多啤梨味，外皮薄得黎比較脆弱，一切即散，味道比較人工化，而且偏甜
43. 熱檸檬茶﹕ 單尾嘅餐茶會由待應小姐幫你order，以一整壺上實在係驚喜。檸檬夠新鮮，無苦味，紅茶非常清香，淨飲甜茶都不錯

聞名已久，人氣極盛嘅暴肥，整體都係滿意嘅，但又未至於十個讚，可謂試過就算。
環境舒適，食物攤同餐枱明確地分隔。有幸得到天字第一號枱，可以睇實甜品部嘅一舉一動。
食物新鮮，保溫得宜。熱盆以鐵鍋裝住，更用電磁爐不停加熱，冷盆則以冰粒保冷。食物添加速度正常，未出現過想食冇得食嘅情況。
服務態度良好，睇得出部份侍應小姐係同學仔，所以更加用心服務，賓至如歸。

惟有一點諗極都唔明。十二點前到達的話，只可以攞飛等位，職員解釋因為仍在準備中。要等到十二點正，所有人一窩鋒走去入座，但只得三、四位職員負責帶位。好彩當日係平日，而我地又企喺門口不遠處，所以好快已經可以入到場。

午市自助餐埋單每人$218再加一，$240位。知道八月份調整收費，平日加價至$248，假日更去到$288，另計加一。好彩我地喺公佈加價前訂左位，所以可以維持舊價，感覺上好似賺左。
平日食的話，都請提早一個月訂位，想星期六日食的話，更需要若干耐性。以星期四中午黎講，由十二點食到兩點半，足足兩個半鐘，可以食到你投降。但聽聞星期六日嘅中午時間都會分上下場，時間比較短。真係想食的話，平日去感覺更抵。