唐記包點

唐記包點＠馬鞍山
16/6/2019 19:00

 

今日出街玩得太夜，但九龍實在太難搵食，決定趕搭車黎屋企先，再買外賣快快搞掂晚餐。好彩馬鐵站間唐記仲未關門，就咁決定。

排骨飯 $26

叫左一個排骨飯，都幾多餸，味道唔錯的。

豬軟骨飯 $29

本身想試其他飯款，可能太夜來，好多飯已經賣晒，阿姐建議可以試下豬軟骨飯。真係新奇，除左傳統蒸飯之外，原來仲賣埋客飯。飯同餸分開上，飯係超級大大碗，加大大舊豬軟骨，非常入味，軟骨煮到腍晒，醬汁甜甜地又夠多，撈飯一流。

燒賣 $18
另外，再買左一份燒賣多加餸。咁多款點心最鍾意燒賣，啖啖肉。

最後，仲買埋全店最後一個砵仔糕，非常多紅豆，味道少甜，煙煙韌韌，不錯喎。

菜肉包 $7.5
可能真係準備關門，熱包都賣得差不多，惟有買兩個凍菜肉包，返到屋企蒸10分鐘度就食得。都最鍾意呢檔嘅包，大大個，餡又多，抵食。

童年回憶＠荔園

荔園流金歲月＠荔枝角
16/6/2019 12:00

今日係父親節，想帶兩老去一啲特別嘅餐廳。好耐之前已Bookmark左荔園，呢度係好多人嘅童年回憶。

環境實在非常值得一影，船仔同過山車都係重點之一。

荔園動物反斗城 $98

摩天輪上有八隻小點心。小龜叉燒餐包、傻豬豬咸水角、雞仔鳳梨酥、天鵝芋角，隻隻都咁得意。味道就正正常常。

炸醬麵 $38
好耐無食炸醬麵，豬肉係片片肉片，甜辣酸炸醬非常好味，麵底本身也不錯。

牛坑腩麵 $38
牛腩份量都幾多，非常腍，非常入味。

淨魚蛋 $45
較實，唔夠彈牙。

酥炸明蝦角 $26

炸得好香脆，唔油膩，中間嘅蝦幾彈牙。

福建炒飯 $88
一般酒樓質素，餸料夠多，味道正常。

野菌紅燒豆腐 $78
份量都算多，大大碟，材料豐富。

路邊混醬腸 $22
賣相就一流，非常有風味，但呢度嘅腸粉認真麻麻地，一口粉，太腍身。

脆脆紅米腸 $32

腸粉都係太腍太粉，中間春卷尚算OK。

乾炒牛河 $78
鍋仔上，本身都好夠鑊氣，牛肉又夠多，調味適中，非常不錯。

餐廳以港式點心粉麵為主，賣相係吸引嘅。造型上都有心思，味道就有好有唔好，價錢又唔算貴，反正都係相機食先，影相係不錯的。

亞玉豆腐花

亞玉豆腐花＠黃埔

9/6/2019 14:00

喺黃埔九號水產食完拉麵午餐後，行商場行左一陣，臨離開黃埔食埋個甜品先走。咁岩見到豆腐花都幾多人食，試下先。

熱豆腐花 $9
最開心係黃糖自由任加，想幾要多都得。豆腐花熱辣辣，豆味幾濃，算幾滑身。糖水唔算太甜，加黃糖就岩岩好。紫凝狂食，食左半碗。

凍芝麻糊 $15

另外一款叫左芝麻糊，滿滿一碗，滿到差啲倒瀉。芝麻糊非常夠凍，岩晒夏天熱辣辣食。入口幾杰身，芝麻味道幾濃，有粒粒芝麻，似係自家製即磨，味道唔錯，不過都係豆腐花好味啲。

砵仔糕 $3
客家糍粑 $15/3粒
另外，再買少少手信拎番屋企慢慢食。砵仔糕仔仔個，小朋友份量，豆幾多嘅，唔算太甜。
糍粑脹卜卜，裡面超多餡，係花王加芝麻，味道幾好，個皮煙煙韌韌，薄薄地唔錯。

呢個下午茶唔錯。

豚道樂

豚道樂＠黃埔

9/6/2019 12:00

今日決定黎黃埔行下，入到黎九號水產搵食。點知好多都未開門，定係已結束營業。就係門口近近地搵間拉麵食，點知有驚喜。最開心係拉麵店有BB櫈，岩晒我地呢啲一家大細出門。

特上原味豚骨拉麵 $85
先呷一口湯，勁濃，勁甜，好香豬骨味，質地仲好滑好忌廉咪。麵底揀左幼直麵，需要硬度略為未做到。特上有好多片叉燒，真係非常多，叉燒經過燒烤，表面微焦，多一份炭香味。半隻溏心蛋醬油味幾入味，蛋黃半熟，剛剛好。仲有紫菜等配料，非常豐富，味道也不錯。

特上海老湯拉麵 $98

另一款海老湯拉麵係假日限定，湯底係豬骨嘅基礎下，再加入海老，味道更加濃郁鮮味。特上配料同前一款相同，因為海老題，再加上一大把櫻花蝦，多一個香脆口感，非常不錯。呢碗要求加上辣醬，更可以帶少少辣味提香，加得正確。

難得帶埋小B都可以嘆拉麵，可能係久違了的拉麵的味道，呢餐覺得份外好味。
Bookmark一下先。

Tiger San

Tiger San＠青衣
7/6/2019 12:00

今日放假，帶小B去青衣接爸爸放工。原來青衣城開左二期，原來真係好耐無黎啦。原來二期開左好多新餐廳，最後決定揀呢間日式料理。舖頭細細間座位唔係太多，都等左一陣位。

慢煮牛肉炒滑蛋配番茄牛肉汁 $92

賣相非常靚仔，滑蛋本身真係好滑，蛋味濃。主角係牛肉配番茄牛肉汁，醬汁味道非常濃郁，酸酸甜甜好開胃，牛肉薄薄一片非常入味，汁又夠多，撈飯一流。

明太子忌廉意粉 $88
忌廉汁味道好濃，加上明太子有輕微辣味。主角有一隻帆立貝，幾鮮甜嘅，仲有一pat明太子，可以自行調味。配料仲有一啲菇同埋紫菜，非常和風，仲好好味。

可惜今日唔太肚餓，其實仲想試埋火山石燒牛排，下次搵機會！

ASAP@第一城

ASAP@第一城

2/6/2019 12:00

炑八韓烤親子餐廳

炑八韓烤親子餐廳@觀塘
5/5/2019 13:00

新開親子餐廳賣廣告賣得咁行，搞到我都心思思趁下墟。
餐廳位於觀塘，地點實在太唔就腳，出左地鐵站仲要行近十五分鐘，唔係有什麼特別係絕對唔會行過黎。約左5月5日一點場，提早少少到已見一家大細排隊等入場。

一入場就見到兒童遊樂區，靚係的確幾靚，但地方唔算大，波波池、廚房玩具等，總算應有盡有。入場第一件事就係幫小朋友租韓服，兩歲碼嘅碼岩岩好。韓服仍好新淨，影相幾靚。



睇睇餐牌，之前廣告所賣嘅套餐已經瘋狂加價，睇落唔太抵食，最後決定散叫幾種過下口癮。另外，隨餐奉送前菜尤其泡菜係不錯的。


甕配韓牛五花肉 $168
只係叫左一款燒烤食品，兩大條五花肉，調味不錯的。燒烤來講，反而最突出係爐邊泡菜蛋同芝士粟米，無限任添，而且味道非常好味，絕對係MVP之選。

蜂蜜牛油炸雞半隻 $88
炸得幾香口，仍有肉汁，味道還好，薯條都非常新鮮熱辣。

韓式炒粉絲 $78
配料夠多，味道不鑊，幾有鑊氣，又夠大碟，抵食。

朱古力蛋糕冰沫 $68

賣相討好，非常澎湃，材料都好多。牛奶味冰沬好幼細，加朱古力配搭一流。再加埋極邪惡嘅朱古力醬。

荔枝梳打 $36
味道是不錯的，也夠大杯。

星期日玩2.5小時，兒童入場費多謝$130，包一份所謂的兒童小食係幾塊餅乾仔。加埋自己落單嘅野食，埋單$630，一家三口連玩連食係可以接受嘅。野食係正確質素，但礙於位置實在太唔方便，而且遊樂區唔算十分大，真係玩一次就夠。

一幻拉麵

一幻拉麵＠尖沙咀

28/4/2019 12:00

非常出名嘅過江龍，終於排到時間來朝聖，幸好早黎到仲有位坐，仲有BB櫈俾小朋友，讚！

濃厚豚骨蝦湯拉麵 $88
一睇賣相已覺得非常濃厚嘅湯底，的確，係非常極之濃郁，喺豚骨湯嘅基礎上加上蝦味，蝦味非常突出，質地好杰身。自選幼麵掛湯送入口，係非常正斗的。叉燒都相當腍滑。自行加配多一隻溏心蛋，溏心正好。拉麵上舖滿紅薑炸麵酥，令成個麵多左一份紅薑香味，非常特別。

特濃蝦汁叉燒拌麵 $88
幾特別嘅一款拌麵，色彩繽紛，麵底拌上蝦味醬油，非常鮮味。配料有有叉燒肉絲、蔥花、炸麵酥等，撈勻一齊食，口感非常豐富。溏心蛋作為點綴，不錯。

蝦味飯團 $20
知道拉麵相當重口味，另外叫左一個飯團俾小B，有味飯，中間仲有幾隻蝦仁，味道不錯。

一向都鍾意豚骨湯拉麵，今次可算第一次似蝦味湯底，原來非常驚喜，味道濃郁，仲加一分甜鮮味，今次可算一個很好嘅新體驗。

邊爐新體驗

101手工涮涮鍋＠尖沙咀
18/3/2019 19:00

生左B之後已經好耐無出街食晚飯，已經成為大鄉里一個。經老友介紹黎呢間打邊聚餐，嘗試新嘅打邊爐體驗，果真非常驚喜。

前菜有手撕雞任食，非常開胃。大大杯台式飲品都係任點任飲，呢杯特濃朱古力珍珠真係非常濃郁，好飲。

見揀一個鍋底，冬瓜卜卜蜆肉海鮮鍋，非常澎湃，超多蜆肉，下面仲有大大個冬瓜，淨係食呢個鍋底已經好夠。湯底又夠味，蜆肉大大粒又鮮甜，非常好食。

揀左兩客台灣夜市拼盤，用黎打邊爐真係新創意。材料包括雞翼、豬耳、大腸、鵝腸等，本身已經好夠味，再係湯度煮一煮更加好味。

再揀多兩客係101特選手工火鍋拼盆，有招牌墨魚汁烏結、各式肉丸、餃子、黑松露蟹子海鮮軍艦等。幾隻招牌名物都相當有特色，又好味，打邊爐黎講，配料真係非常獨特。

豬頸肉

牛頸脊肥牛片，非常腍身，牛味濃，正。

響鈴，咸蛋黃魚片，非常香口，咸蛋黃味道好出。

埋單平日晚無限時$318。火鍋配料任加，飲品任飲，而且味道係好味。真係多得老友介紹，開發左一個新熱點。可惜星期六日有限時，無咁盡興，但都希望再黎。Bookmark一個先。

三田製麵所

三田製麵所＠尖沙咀

17/3/2019 12:00

帶住小B出街，好難食到拉麵。難得黎到尖沙咀，路過見到三田製麵所有BB櫈，好耐無食沾麵啦，對上一次仲係幇襯銅鑼灣店，所以唔洗諗直入。

濃厚豚骨魚介沾麵 $78

個人唔介意濃味，直接呷一啖沾湯，非常濃香，魚介味重，質地好厚好杰身。麵就係粗口，剛剛好掛滿湯。叉燒算腍滑，溏心蛋不錯。

蟹肉薯餅 $38

另外叫左一客薯餅小食，外脆唔算油膩， 中間係忌廉夾雜類似蟹肉的東西，味道係不錯嘅。

非常滿足的一餐。以後可以帶阿B來食拉麵了。