Haagen Dazs Moon Cake

梨巴王子甜品棧

梨巴王子甜品棧@馬鞍山
14/09/2015 21:00

椰汁紫米露

Waffle

大自然素食

大自然素食@馬鞍山

14/09/2015 19:30

今日同靚太團食飯，黎到馬鞍山大自然。呢間野新開咁耐都係人頭湧湧，好彩有得訂枱，平日黎到唔洗等。可惜係馬鞍山分店實在細得可憐，枱與枱中間非常迫夾，通道都好窄。

先揀左個二人餐，有兩個碗、小食、同兩款小菜、最後加左一客農夫包。

碗仔翅

雞絲粉皮，麻醬俾得非常多，好味。

西檸魚柳

燒汁鰻魚

咖哩羊肉農夫包，材料好多，個包沾咖哩汁都幾好食

計埋茶錢加一，埋單總數$400

消滅寵物小精靈

沙嗲王@觀塘

6/9/2015 18:30

應承左老友要陪佢捉比卡超，終於決定睇完巨人就黎捉比卡超。黎到觀塘沙嗲王，好彩唔多人，唔洗留位。沙嗲王今期玩期間限定嘅寵物小精靈主題美食。推出三款食物同四款飲品，每惠顧一款，都會送贈寵物球信封，內含一款既小精靈Memo紙或者杯墊。

除左小精靈主題美食，仲叫左其他野食。

白咖哩香茅豬扒飯 ($52)

微辣白咖哩幾香，香茅豬扒幾香口，香茅味幾出，豬扒唔算乾都唔錯，撈埋咖哩汁好送飯。

印度薄餅 ($24)
食咖哩點可以唔襯薄餅，原味黃咖哩幾香，薄餅夠酥脆，沾醬唔錯。

芝士焗年糕 ($36)

白醬芝士落得重手，仲有少許煙肉碎，年糕煙煙韌韌都唔錯。

比卡超咖喱豬排飯 ($78)

最後點晒佢全套比卡超美食。可選炎系紅(番茄咖喱)、草系綠(波菜咖喱)或水系藍(白咖喱)。揀左個番茄咖喱配搭。比卡超飯造型已經夠可愛，起碼五官整齊。黃色飯應該加左黃薑粉微香，耳仔係墨魚汁黑色。切開比卡超個頭，原來中間仲有好多香茅豬扒同蘑菇，估唔到個頭都幾大。番茄咖喱汁係酸酸甜甜，都係微甜，相當開胃。

比卡超辣肉腸Pizza ($48)
造型明顯無咁吸引，Pizza細細個，上面加左一塊比卡超薯片同插左旗仔。餅皮係油酥餅，幾鬆脆。上面加左芝士、辣肉腸餡料，番茄醬都幾濃香。可惜薯仔好睇唔好食，硬嘅。

呱呱泡蛙藍桔荔枝梳打 ($32)
荔枝味波子汽水加勁多忌廉，三枝藍色棒棒係超甜糖膠。

雲尼拿雪糕千層塔、比卡超布甸 ($58)

千層塔配比卡超布甸，仲加多包爆炸糖，究竟包爆炸糖係放喺甸上定係個口度?
三層酥皮中間有士多啤梨等水果，同好多忌廉，頂層加個雲尼拿雪糕波。比卡超布甸係芒果布甸，算係咁啦。伴碟仲有細細粒星星啫喱。

埋單一共$380。味道唔錯，玩味十足。無估到呢間野都OK喎。

重臨詠藜園

詠藜園四川菜館@黃大仙

6/9/2015 12:00

今日同老友睇進擊的巨人，順面喺附件食個午餐。選擇左詠藜園。十二點黎到人唔多，四人枱岩岩好。咁耐無黎，叫左幾樣招牌菜。

生煎包 ($34)
包底有唔少芝麻，包皮本身幾甜，肉餡都好飽滿多汁。

銀絲卷 ($16)
外皮幾脆，中間幾軟，甜甜地唔錯呀，沾埋煉奶更好食。配豆漿清甜解渴。

紅油抄手 ($30)
肥嘟嘟脹book book非常飽滿，菜肉餡的抄手皮薄餡多，充滿肉汁。加上甜甜辣辣嘅濃醬汁，仲有些少生蒜同麻醬，花生醬香味好夠。不錯。

鮮肉小籠包 ($52)
新鮮出爐熱辣辣。皮都算薄，肉餡豐富，肉汁都好多。略嫌水氣太重，皮有啲粉粉感覺，一般啦。

上海粗炒 ($55)
幾夠鑊氣，賣相唔錯。材料都好夠，有齊菜、肉絲、冬菇絲咁。

招牌擔擔麵 ($26)
手打幼白麵線煙韌柔滑，幼身略扁嘅麵線正好沾住麻醬湯汁。香蔥、花生碎、仲有芝麻醬同少許辣油，一啲麻一啲辣一啲花生嘅香濃湯汁。但明顯花生麻醬俾得唔夠，香味已經減退，但都算可以啦。

雲白肉 ($50)
肉片夠薄，加上大量蔥蒜、醬油同辣油，呢味真係好送麵。

太后豌豆黃 ($19)
完成正餐，叫左個網上人氣熱點太后豌豆黃 ($18) 做甜品。豌豆糕唔會太甜，食落幾清甜，又啖啖豆味，似綠豆蓉糕。

埋單三百零蚊，飽到上頸。一餐非常滿意嘅四川菜。
真係闊別多年啦，今日一食，重拾番當時好味嘅回憶。今次嘅總結都係兩個字﹕ 好味!

悠閒生活

屋子生活@馬鞍山

20/8/2015 18:30

今日七夕，老公放早，可以拍下拖仔。呢間野近排好鬼hit，上晒飲食雜誌，開飯網亦爆多好評。之前試過中午行開呢頭，見到排晒長龍，洗唔洗咁勁，即管趁今晚試一試。六點半黎到，蟻都唔多隻，自由揀位任坐。

入到黎環境的確唔錯，超高樓底，好舒服，近窗位置仲係榻榻米，幾特別呀。裝修都得意，好多家居工藝製品。
 

連本餐牌都係仿功課習作咁，幾有心思。餐廳主打提供輕食，有多款咖啡、特色飲品，仲有好多窩夫、焗製甜品、蛋糕等。主食有日式定食、烏冬等。揀左幾樣網友推介嘅試下。

 

七味雞唐揚定食 ($79)，定食配有前菜、味噌湯、自選一款茶品，我揀左抹綠奶茶。

定食送上賣相非常靚仔，食材配上特色嘅餐具，成件事好日本。抹綠奶茶用一個好特別嘅手工瓦杯裝住，即時提升文藝感。入口味道清淡，質地較薄，微甜牛奶味夾著抹茶清香。定食同時配上日式味噌湯，呢味反而唔錯。材料豐富，有昆布、豆腐、日本菇等。湯濃度不錯，鹹中帶鮮，幾有日本風味。漬物係漬青瓜。白飯上灑滿芝麻飯素，為平平無其嘅白飯加左幾分香氣。

 

七味雞唐揚原來係日式炸雞扒，加上燒汁同七味粉，伴幾條菜同沙律醬。雞扒剛剛炸好，外皮仍然保持脆口，肉質軟腍多汁，加上微甜嘅醬汁，認真唔錯。惟一可惜嘅係，主調「七味」只輪為配角，簡單叫佢日式雞唐揚就好吧。

明太子釜玉冷烏冬 ($85) 係單品。烏冬冷上，烏冬汁幾清甜，幾欣賞烏冬夠彈牙，天熱食感覺良好。烏冬配上一粒溫泉蛋、明太子、蛋絲、蟹柳、青瓜、紫菜、昆布，味道還好。可惜單品價值八十幾蚊，份量非常少，三爬兩撥搞掂，真係唔夠喉。

小倉抹茶窩夫 ($45) 為晚餐畫上完美句號。賣相已經殺晒，淡忌廉為窩夫打扮成太陽狀。窩夫係圓型冬甩，新鮮熱辣外皮微脆，中間鬆軟，帶淡淡蛋香。熱熱嘅窩夫頂上一個抹茶雪糕，真正呈現出冰口境界。抹茶味道的確未夠喉，但個質地幾得別，黏黏地幾有Gelato質感。至於旁邊嘅紅豆真的只作伴碟角色。

試一次就知道屋子賣嘅係一份悠閒。環境舒適，氣氛良好。食物賣相討好，不妨多角度欣賞下廚師擺盆嘅心思，繼而餵飽相機先。味道亦算交足功課，惟一係份量相當精緻，作為簡便午餐或者悠閒下午茶的確唔錯。可能我揀唔岩時機，作為晚餐真係唔夠飽，故以性價比黎講，價錢係偏貴，埋單$230。呢種悠閒只適用於陽光下吧。

老爹廚房

老爹廚房@馬鞍山
20/08/2015 14:00

北京樓生日飯團

北京樓@旺角

14/8/2015 20:00

十二月靚太團陪我補祝生日，狂笑過一晚。臨食完就送上驚喜蛋糕，真係超開心。今次黎北京樓豪下，因為匯豐信用卡做Promo，有一個四人套餐做六折，野食又豐富，非常抵食。要提早BOOK位，頭圍要八點交枱，我地要傾計當然要八點入場，傾到打烊。

北京樓二小拼 (杭州芳香素腐方、七里莊酒糟醉雞)

前菜有兩小碟凍盆，素腐方即係腐皮素雞咁，用上魯汁，甜甜地幾入味。

醉雞都幾滑，酒香唔錯。

金湯瑤柱花膠海皇羹非常好味，勁足料，有瑤柱、花膠粒、仲有蝦、魚肉等，湯本身味道好夠濃，仲啖啖有餸，可惜無得飲多碗。

京爆明蝦球

蝦球沾左炸粉略為炸過，幸好粉漿唔算厚，炸左仲脆脆地。蝦味又無乜架啦，但質地好彈牙爽口，加左京爆醬，似係咕嚕醬，酸酸甜甜少少辣，醋味都幾濃，真係俾佢「俗」親。

烤北京填鴨

烤呢隻鴨要預四十五分鐘，所以都等左一陣。烤好後服務員會送上原隻全相俾你睇，之後就拎到櫃台再分屍，送到上枱已經變成一塊塊。雖然只係一食，鴨殼嘅肉唔關我地事，但淨係食皮份量都唔少。食嘅時候用一塊薄餅包住，加兩塊肉，加醬汁，再加蔥或者青瓜包好就食得。幾欣賞佢薄餅同鴨都仲係熱辣辣，鴨肉唔算肥，都幾腍幾多汁，唔錯。事後發覺，呢份野實在太大，隔離枱八個人都係食一客，我地四丁友食唔晒好正常，惟有打包。

上湯浸時菜

應該係溫室豆苗，其實算整得唔錯。但個人唔太鍾意呢種菜有陣草腥味。


無錫灌湯小籠包算OK啦。包皮都算薄，係個包頂接口位包得太厚，肉餡都幾多，肉汁都算多，可以倒滿一個湯匙，湯汁呈深黃色，味道都幾鮮甜。

香糟蔣腿蒸黃魚
睇名除左知道佢係一條黃魚，真係估唔到會咁樣上菜，造型都唔錯。原來佢條魚切開幾切，將冬菇、金華火腿、筍片夾入中間拎去蒸，所以造型都幾特別。少試一啖，魚肉幾入味，肉質都唔錯。


冰皮月餅

兩舊迷你冰皮月餅，應該係最基本綠豆餡，但係太飽無食到。

以上係四人套餐嘅野，其實份量都好多，分分鐘六個人食都仲得。

本身套餐折實$788，最後計埋啲茶芥加一，人均$220左右。其實唔理佢係唔係六折啦，總之一人二百零蚊，都算唔錯呀，真係食得好飽。所以話，有時套餐都幾抵食。

Super Nice Semi-Buffet @Kudos

皇冠假日酒店 Kudos@銅鑼灣
11/8/2015 11:30

今日生日要食好啲，揀左呢個團購，好似幾抵。五星級酒店半自助餐都係$160，仲要食足三個鐘。11:30黎到酒店，的確幾高級，餐廳係一樓，黎到時人流唔多。三個鐘食左好多野，就算最後投降，都可以飲下飲品，食下果汁，他他條條食個高級午餐。
半自助餐係包括一份主菜，外面自助吧可以任食，有前菜、沙津、刺身、甜品任食。團購價$160，另加服務費$23，$180左右價錢真係好抵。正價好似要$299，實在又太貴。

冷盆有煙三文魚、凍牛展、日式凍豆腐、番茄水牛芝士、凍火腿拼盆。

六款芝士

各式預製沙律

自助沙律吧

刺身有三文魚、鯛魚、吞拿魚、雜錦壽司

三款凍海鮮係蝦、青口同螺仔

自助焗麵包及兩款餐湯，一款係龍蝦湯，另一款西洋湯豬骨湯

麵檔

甜品有幾款布甸、三款蛋糕

兩款飲品係檸檬茶同薄荷特飲。水果有五款。

豆腐花、四款Haagen Dazs迷你杯

自助乳酪雪糕

餐廳唔算好大，11:30黎到，剛剛入座，無乜人

最鍾意煙三文魚，自加他他汁，另一款應該係煙吞拿都幾好味。

六款芝士，老公至愛，唔知有乜好食。

刺身都OK新鮮，自己食幾多夾幾多，Re-fill都幾快。沙律菜選擇唔算多，但菜都幾新鮮。

龍蝦湯味道不錯，夠濃味，又杰身，咁好彩仲撈到幾粒龍蝦肉。

食到咁上下，主菜就送到。每日有五款主菜，我地揀左

澳洲免治羊冧肉餡餅伴全麥中東包及鷹嘴豆醬配薄荷乳酪
話係肉餡餅原來係類似漢堡扒，切開肉餅肉汁豐富流晒出黎。食落有少少羊膻味，但調味較為清淡，淡淡地。中東包本身幾好味，外脆內軟，煙煙韌韌，麥味仲好香。配上三款醬，薄荷味幾香、番茄粒粒加些少香料粉、另一款本來食唔出咩醬，以為係薯仔蓉，淡淡地，有啲豆味，原來係鷹嘴豆醬，真係第一次食。呢份主菜幾有中東風味，個人就麻麻地，但老公好鬼鍾意，因為夠特別。

香煎西冷伴磨菇蓉及焦糖甜薯
我揀左呢款西冷，賣相非常吸引，西冷大大塊上面舖滿磨菇汁。

切開西冷，大約六成熟左右，個人最鍾意呢個熟度。西冷入口好腍，邊位少少筋都食得到。牛味唔太濃但都OK，幾Juicy。幾鍾意佢個磨菇汁，係粒粒碎磨菇，味道好香，仲食到好似有些少黑松露味。

食完主菜繼續自助狂食，幾款水果，順便拎埋紅酒燴梨，燴梨入晒味，紅酒味幾香，不錯。

最後到甜品時段，拎晒全部試一Round。
最鍾意法式焦糖燉蛋，味道非常香甜，面層焦糖勁脆，細細杯兩啖食晒，所以在食左三杯。
白朱朱古蛋糕都唔錯，朱古力味幾甜，中層係黑朱古力蛋糕。
芝士蛋糕味道夠濃，正常水準。第一次食紅蘿蔔蛋糕，質感有啲似香蕉蛋糕，幾鬆軟，味道係紅蘿蔔加上肉桂味，味道其實幾香，但個人麻麻地。芝麻奶凍睇落幾好，但入口唔夠味，有啲失望。青蘋果奶凍，係奶凍加青蘋果蓉層層疊，酸酸甜甜幾有趣。芒果布甸正常質素。

豆腐花味道OK嘅，可惜唔算太滑。麵包布甸有啲失望，淡而無味。反而西米焗布甸就幾香。
呢度無朱古力噴泉，只有預早整好嘅朱古力包餅乾條同棉花糖。

雪糕時間有自助任唧乳酪，超級冰凍，味道勁濃，超爽。
Haagen Daza有雲尼拿、香蕉、咖啡、朱古力味。

整體黎講，主菜係非常讚，中間嘅自助食品都相當唔錯。都知道半自助餐嘅自助食品唔算多，但款式都幾多元化。值得一讚，服務員非常有禮貌，而且收碟都好勤力，又可能平日時間人流唔多，基本上一食完放低刀叉，五秒後必有人收走隻碟。最抵嘅係，今餐午市時間係由11:30至14:30，食足三個鐘。梳化坐得舒服唔太迫，就算食飽投降，都仲可以飲下野慢慢坐。真係非常滿意嘅一餐。