炑八韓烤親子餐廳

炑八韓烤親子餐廳@觀塘
5/5/2019 13:00

新開親子餐廳賣廣告賣得咁行，搞到我都心思思趁下墟。
餐廳位於觀塘，地點實在太唔就腳，出左地鐵站仲要行近十五分鐘，唔係有什麼特別係絕對唔會行過黎。約左5月5日一點場，提早少少到已見一家大細排隊等入場。

一入場就見到兒童遊樂區，靚係的確幾靚，但地方唔算大，波波池、廚房玩具等，總算應有盡有。入場第一件事就係幫小朋友租韓服，兩歲碼嘅碼岩岩好。韓服仍好新淨，影相幾靚。



睇睇餐牌，之前廣告所賣嘅套餐已經瘋狂加價，睇落唔太抵食，最後決定散叫幾種過下口癮。另外，隨餐奉送前菜尤其泡菜係不錯的。


甕配韓牛五花肉 $168
只係叫左一款燒烤食品，兩大條五花肉，調味不錯的。燒烤來講，反而最突出係爐邊泡菜蛋同芝士粟米，無限任添，而且味道非常好味，絕對係MVP之選。

蜂蜜牛油炸雞半隻 $88
炸得幾香口，仍有肉汁，味道還好，薯條都非常新鮮熱辣。

韓式炒粉絲 $78
配料夠多，味道不鑊，幾有鑊氣，又夠大碟，抵食。

朱古力蛋糕冰沫 $68

賣相討好，非常澎湃，材料都好多。牛奶味冰沬好幼細，加朱古力配搭一流。再加埋極邪惡嘅朱古力醬。

荔枝梳打 $36
味道是不錯的，也夠大杯。

星期日玩2.5小時，兒童入場費多謝$130，包一份所謂的兒童小食係幾塊餅乾仔。加埋自己落單嘅野食，埋單$630，一家三口連玩連食係可以接受嘅。野食係正確質素，但礙於位置實在太唔方便，而且遊樂區唔算十分大，真係玩一次就夠。

一幻拉麵

一幻拉麵＠尖沙咀

28/4/2019 12:00

非常出名嘅過江龍，終於排到時間來朝聖，幸好早黎到仲有位坐，仲有BB櫈俾小朋友，讚！

濃厚豚骨蝦湯拉麵 $88
一睇賣相已覺得非常濃厚嘅湯底，的確，係非常極之濃郁，喺豚骨湯嘅基礎上加上蝦味，蝦味非常突出，質地好杰身。自選幼麵掛湯送入口，係非常正斗的。叉燒都相當腍滑。自行加配多一隻溏心蛋，溏心正好。拉麵上舖滿紅薑炸麵酥，令成個麵多左一份紅薑香味，非常特別。

特濃蝦汁叉燒拌麵 $88
幾特別嘅一款拌麵，色彩繽紛，麵底拌上蝦味醬油，非常鮮味。配料有有叉燒肉絲、蔥花、炸麵酥等，撈勻一齊食，口感非常豐富。溏心蛋作為點綴，不錯。

蝦味飯團 $20
知道拉麵相當重口味，另外叫左一個飯團俾小B，有味飯，中間仲有幾隻蝦仁，味道不錯。

一向都鍾意豚骨湯拉麵，今次可算第一次似蝦味湯底，原來非常驚喜，味道濃郁，仲加一分甜鮮味，今次可算一個很好嘅新體驗。

邊爐新體驗

101手工涮涮鍋＠尖沙咀
18/3/2019 19:00

生左B之後已經好耐無出街食晚飯，已經成為大鄉里一個。經老友介紹黎呢間打邊聚餐，嘗試新嘅打邊爐體驗，果真非常驚喜。

前菜有手撕雞任食，非常開胃。大大杯台式飲品都係任點任飲，呢杯特濃朱古力珍珠真係非常濃郁，好飲。

見揀一個鍋底，冬瓜卜卜蜆肉海鮮鍋，非常澎湃，超多蜆肉，下面仲有大大個冬瓜，淨係食呢個鍋底已經好夠。湯底又夠味，蜆肉大大粒又鮮甜，非常好食。

揀左兩客台灣夜市拼盤，用黎打邊爐真係新創意。材料包括雞翼、豬耳、大腸、鵝腸等，本身已經好夠味，再係湯度煮一煮更加好味。

再揀多兩客係101特選手工火鍋拼盆，有招牌墨魚汁烏結、各式肉丸、餃子、黑松露蟹子海鮮軍艦等。幾隻招牌名物都相當有特色，又好味，打邊爐黎講，配料真係非常獨特。

豬頸肉

牛頸脊肥牛片，非常腍身，牛味濃，正。

響鈴，咸蛋黃魚片，非常香口，咸蛋黃味道好出。

埋單平日晚無限時$318。火鍋配料任加，飲品任飲，而且味道係好味。真係多得老友介紹，開發左一個新熱點。可惜星期六日有限時，無咁盡興，但都希望再黎。Bookmark一個先。

三田製麵所

三田製麵所＠尖沙咀

17/3/2019 12:00

帶住小B出街，好難食到拉麵。難得黎到尖沙咀，路過見到三田製麵所有BB櫈，好耐無食沾麵啦，對上一次仲係幇襯銅鑼灣店，所以唔洗諗直入。

濃厚豚骨魚介沾麵 $78

個人唔介意濃味，直接呷一啖沾湯，非常濃香，魚介味重，質地好厚好杰身。麵就係粗口，剛剛好掛滿湯。叉燒算腍滑，溏心蛋不錯。

蟹肉薯餅 $38

另外叫左一客薯餅小食，外脆唔算油膩， 中間係忌廉夾雜類似蟹肉的東西，味道係不錯嘅。

非常滿足的一餐。以後可以帶阿B來食拉麵了。

Romanne Leisure

Romanne Leisure Food Concept＠旺角

28/2/2019 19:00

適逢小妹舊公司最後一日，親愛嘅同事們一齊晚餐Farewell Dinner。一行九人，非常高興。由同事們拍版揀食咩。

板燒魷魚牛油果香橙沙律 $108

配搭非常新鮮。

番茄乾蒜蓉法包 $38

平平無奇嘅餐包，原來相當好味，烤得酥脆，舖滿芝士。

Romanne小食拼盤 $178
有焗釀大蘑菇，非常juicy，芝士味濃，炸雞翼非常香口，薯角新鮮，調味調得正好，非常惹味。

煙三文魚忌廉汁意大利麵 $98

醬汁濃厚，不錯。

香蒜辣椒美國鮮蜆意大利麵 $128
蜆仔新鮮，意粉微辣，開胃。

北海道帶子南瓜意大利飯 $138

飯煮得入味，但略為少硬，煮得未夠透。

慢烤檸檬瑪利法國燒春雞 $218
大大隻雞，無乜特別，勝在唔算鞋口。

英式啤酒炸比目魚配香料薯條 $198
魚柳好嫰滑，炸皮唔算太厚，不錯。

沖繩活性水飼豬鞍扒蜜糖芥末醬 $238
肉質不錯，幾腍滑，調味適中，配蜜糖芥末醬幾好味。

混醬芝麻慢燒豬仔骨 $198

略嫌過火，較乾身。

黑松露雜菌意大利飯配63c溫泉蛋 $98

正常。

焗肉桂蘋果脆脆配意大利雪糕 $88

甜度適中，蘋果酸酸甜甜，雪糕幾好味。

焦糖比利士窩夫 $88
賣相非常吸引，味道不錯。

一行人黎到Cafe幾乎叫晒想食嘅野，賣相吸引，非常精緻，味道都相當不錯。價錢略貴，但一班人飲飲食食吹水吹足一晚，差不多啦。

L'attitude@西環

L'attitude@西環

24/2/2019 12:00

一年一度黎到西環探親戚，就係佢屋企附近見到呢個裝修得幾有趣嘅餐廳。入到去真係非常得意，好多公仔陪你食野。原來仲有招牌棉花糖甜品，不過此行係食午餐，所以無特別叫到。

明太子意大利麵 $158
明太子微辣，醬汁味道好濃，好忌廉咪，帶子都算新鮮。不錯。

明太子炸軟殼蟹忌廉汁意大利麵 $138

韓式泡菜卡邦尼扁意粉 $108

估唔到泡菜整意粉都幾好味，發現新大陸，呢個配搭好正。

加勒比海鮮薄餅 $138
薄餅焗得脆卜卜係不錯，不過配料唔算多，有少少蜆肉、魷魚等，有啲失望。

德州燒烤牛肉漢堡$128
非常澎湖，家人話幾好味，幾juicy。試過薯條就非常新鮮，熱辣辣，外脆內軟。

 

飲品送嘅，出奇地好好飲。

成餐係相當好味，賣相精緻，所以份量都好精緻，價錢略貴，不過係港島區都係常見事吧。

棕櫚閣西餐廳

棕櫚閣西餐廳＠旺角維景酒店

22/2/2019 19:00

同一班老師食春茗飯，黎到佢地嘅主場，話呢度抵食。

酒店已有一啲歷史，餐廳都係比例平實。

刺身幾靚、壽司一堆、仲有一杯杯迷你前菜。

各式火腿凍肉，仲有沙律。

冷盤仲有好多海鮮，定期有青口、螺、蟹、蝦等，但好快俾人掃晒。

樣樣野都大大件大大碟。三文魚都係勁厚切。

熱盆選擇都好多。

比較好食有燒牛肉同埋燒烤部，串燒都唔錯。

甜品時間。

一個凍櫃放左好多杯杯甜品，

檯上仲有好多蛋糕。

杯杯甜品比較好味，印象深刻啲有奶凍、木糠布丁、朱古力慕絲等。

價錢係平，食物選擇唔算多，比較適合鍾意食海鮮嘅人。

食物唔算精緻，普普通通，的確岩成熟人味，非常平實，所以真係比較多年長嘅熟客仔。

大阪燒餅

道頓堀御好燒專門店

6/1/2019 19:00

慶祝媽媽生日，帶佢去食啲特別野，有得玩有得食。

黎到大埔店，夜晚時份要等位，都等左成半個鐘。

自助燒烤自己煮自己食。一行四人，叫一個套餐再加幾樣野。

套餐包括牛油帶子、野菜盛合、泡菜魷魚、上級牛肋肉、雞肉。朋友仔又煮得幾好，材料樣樣都幾新鮮。

雜錦炒麵、廣島燒

有說明書俾你跟住做，先將材料放上鐵板，計時，煎完一面就另一面。最後再翻一次再等一陣，隨意加上醬汁、蛋黃醬、海苔及鰹魚碎等。

朋友仔一反，煎得似模似樣。其實兩款味道都差唔多，配料又差唔多，只係一個有麵一個無麵。

最後加左一個pancake甜品。薄薄一片，蛋味幾重。

成餐係好玩嘅，但係亦好趕，又要自己煮，煮完再食，90分鐘時間又有啲趕。不過不失為一個得意體驗，老人家好喜歡呢。