平民乳酪皇后

Yogurt Queen@大圍

11/9/2011 17:00

大圍無啦啦又湊熱鬧喺火車站附近開間乳酪店。喺一間細細嘅團購網用優惠價$15買到$40現金券試下呢間新店。

  

士多啤梨、原味扭紋乳酪

士多啤梨味係好假嘅士多啤梨味，乳酪只有輕微酸味，總覺得乳酪嘅牛油成份幾重，唔似一般乳酪咁清涼解渴，質感軟滑幼細，但好易溶，成個感覺就似乳酪味嘅軟雪糕。

配料有罐頭椰果、幾乾身嘅木糠、迷你超細粒偏硬嘅棉花糖、唔煙韌嘅原味麻糬、芒果味爆爆珠、無乜味嘅咖啡果凍、硬硬地嘅雜果粒，仲有罐頭蜜桃等。

因為有四十蚊現金，真係可以加到好多配料，加到條數都唔知點計。

原本一杯大乳酪加四款配料只係$33，仲可以加多兩款價值$3嘅配料，團購券仲免費送多兩款，總數應該有最少八款配料，搞到我都唔知係食配料定係食乳酪。成杯野溝黎溝去，好奇怪。

喺新界一個人口老化嘅平民屋邨地區，開間潮興嘅乳酪專門店，其實真係好博。而其實呢間小店無論係門面裝修、乳酪選擇、味道等各方面嘅吸引力都唔大，實在係十級博。所以近排喺門口竟然賣埋點心燒賣同埋凍撈撈，似乎生意不景，真係好驚佢隨時關門大吉，所以要快手用埋張現金券。

老實講，質素真係麻麻，似乎襯唔起個名。就算佢再做$15一大杯嘅團購優惠，真係無興趣、亦無信心再幫襯。