Puzzle Dining

Puzzle Dining＠馬鞍山

21/7/2019 19:30

馬鞍山係美食沙漠人所共知，出左名後多左餐廳黎馬鞍山開業，近排的確多左好多選擇，主要都係連鎮式餐廳。就係泳池新開左一間餐廳，算係近期較為喜愛嘅餐廳，平常都會黎食午餐，今次終於一到試試晚餐。餐廳仲有好靚嘅餐具俾小朋友用，抵讚! 唔太肚餓，散叫幾樣野試下先。

咸蛋黃金沙珍寶雞翼 $68
雞翼大大隻，上面有蛋黃蒜，睇落唔錯。雞翼煎得好香口，中間非常超級Juicy好嫩滑，蛋黃帶鹹香，有特別!

Puzzle 秘制叉燒薄餅 $138
之前食過午餐叉燒蛋飯已覺得呢度嘅叉燒的確非常好食。原來加入Pizza都相當好味。餅底薄薄脆脆，上面舖面叉燒、芝士等配料，非常豐富。

封門柳 $218
兩大舊封門柳仲配薯角。封門柳睇落略為深色，但還好中間燒得岩岩好，仲好Juicy好腍身，而且牛味相當重，沾埋醬汁更加提味。薯角新鮮炸起，熱辣辣。小朋友最鍾意。

自家制朱古力慕絲 $28

最後追加一款甜品，賣相非常靚。忌廉空氣感十足，朱古力慕絲味道勁濃，又幼滑，不錯。

非常歡迎呢間餐廳黎到馬鞍山，對馬鞍山媽媽黎講，位置非常方便，帶B去公園或圖書館之後，順道食埋餐飯真係一樂也。

悠閒慢歎晚餐

Go Dutch Cafe＠旺角

16/7/2019 19:00

太耐無出黎旺角，行左大半日就到食飯時間。難得同老友傾極都未完，決定搵個地方坐低食嘢兼繼續傾計。記得早幾年同朋友最好Hea就係登打士廣場，一於聽朋友介紹黎到10樓呢間Cafe。Cafe環境舒適，二個人坐一張大梳化，對腳即刻舒服晒。非常肚餓，揀左一個套餐非常豐富，有小食、主菜、飲品加甜品。

薄荷碎碎朱古力、好立克沙冰

咁大個人仍然鍾意小朋友飲品，大大杯賣相好吸引，好立克沙冰夠晒濃味，朋友嘅朱古力都非常濃郁，配上脆米片口感豐富，幾特別。

小食揀左薯仔炸蝦卷。賣相好精美，隻隻蝦卷脹卜卜，蝦膠食落都幾彈牙，味道不錯，中間仲好Juicy，唔洗沾醬已經好夠味。

主食揀左一個特濃龍蝦汁帶子蟹肉意粉。雖則蟹肉只係蟹柳，但帶子非常多夠補數，鮮甜的。龍蝦汁味濃，掛晒麵，非常鮮味。

另一個主菜揀左德國咸豬手配薯角，份量都好足，薯角新鮮熱辣，啖啖薯味。咸豬手皮係爽爽煙韌的，充滿住骨膠原，肉質都相當腍，咸咸地味道不錯，最好就加些少芥辣醬提味。

甜品時間揀左一件提拉米蘇、一件曲奇芝士餅。正正常常，勝在唔太甜。

呢度嘅食物份量都好充足，兩個人食真係夠有餘，所以去到甜品階段已經太飽只能淺嘗。食物味道係唔錯，新鮮熱辣。咁岩呢度提供旅遊書，正好一齊研究下我地嘅日本之旅。兩個人一邊食一邊傾計，悠悠閒閒過左一個夜晚。

熊小館

7/7/2019 15:00
熊小館＠九龍灣

喺Mega Box行左大半日，坐低食個下午茶。喺12樓見到呢間餐廳裝修得好靚，周圍佈置左好多熊仔。下午茶時間稍為等左一陣位就入得場，叫左兩個下午茶餐，終於都可以休息一下。

烤棉花糖吐司 $42
賣相好靚，呈司烤得微焦，上面嘅棉花糖半溶狀態，仲唧左好多朱古力醬。切開呈司已感覺到吐司脆脆的，棉花糖溶到可以拉絲，非常吸引。食落偏甜，岩晒甜魔。另外加配特飲，賣相好靚，士多啤梨橙汁，酸酸甜甜，味道都唔錯，正好中和左吐司嘅甜味。

 

自家製心太軟 $42
心太軟整得幾出色，蛋糕殼結實成型，切開中間，朱古力漿直頭爆出黎，好澎湃。甜魔認為甜度適中，非常不錯。加配紅豆冰，紅豆大大粒，又夠甜。
 

呢個下午茶相當甜蜜，甜魔食得好滿足。而且服務態度好好，我地一家大細，小B喺BB車訓緊覺，經理二話不說就安排一個四人卡位俾我地，仲有大大個位俾我地放BB車，非常闊落舒適，搞到我地都有啲唔好意思。餐廳仲有一個細細嘅遊樂角，有些少圖書、玩具俾小朋玩，可算係一間對小朋友非常親切嘅餐廳，可惜BB訓左，有機會一定再黎。

老夫子港式餐廳

7/7/2019 12:30
老夫子港式餐廳

今日黎到九展做野，中午放飯發現呢間主題餐廳幾得意。老夫子主題，環境非常有趣，周圍都係老夫子主題角色，連枱櫈都有特別製作。

餐廳主打港式美食，同事叫左燒味飯，看似唔錯。我就叫左一碗麵，另加一啲小食大家Share。





柱候牛筋腩麵 $58
套餐跟醃青瓜。牛筋腩麵 非常大碗，超多牛腩，牛筋腩都燘得好入味，非常腍滑。幼麵都相當爽口彈牙，非常不錯。值得一提就係奶茶真係唔錯，原來是用金茶王茶底，今日實在太熱，叫左凍奶茶，味道都茶香味非常濃，相信熱奶茶會更好味。


泰式拼盆 $88
非常澎湃，有四大款菜式，豬頸肉有好香嘅香茅味，燒得好透，邊位微脆，非常惹味。泰式魚飯味道好香，春卷香脆唔油膩，札肉味道不錯。


熱浪芝麻雞翼 $48
四大隻雞翼炸得香脆，外皮脆卜卜，仲有芝麻辣粉，帶微辣好開胃，雞翼仲好Juicy，非常好味。


港式主題餐廳裝修有趣，食物味道都相當不錯，經過附近的話值得一試。

Ocio＠大圍

Ocio＠大圍

23/6/2019 15:00

剛返完大圍探家人，臨走時見肚餓，就係大圍站附近行下搵下午茶食，就係油站附近見到呢間小店，難得今日有舖甜品癮，就試下甜品下午茶。小店細細間，裝修幾別緻，還好下午茶時間唔多人，坐番張卡位舒舒服服，決定叫幾款甜品食下先。

鑊仔士多啤梨雪山熱香餅 $79

出場實在澎湃，新鮮熱辣嘅兩層pancake配凍冰冰雪糕，正! Pancake非常鬆軟，蛋香味濃。下面除左士多啤梨外，仲加左士多啤梨果醬，多一陣酸甜味，非常好味。

朱古力布朗尼窩夫$65
估唔到窩夫可以咁玩法，本身窩夫朱古力味濃，又係熱辣辣配雪糕。上面仲有好多布朗尼粒粒，朱古力味好濃郁，香氣十足。

OREO曲哉雲呢拿奶昔 $49
最後，叫左一杯奶昔解下口渴，入口非常驚喜，真係完完整整嘅冰凍Oero，變左奶昔味遁不減，冰凍好味。

呢餐非常不錯，原本普通嘅甜品改裝變成高級，賣相又靚，影左唔少相。埋單$206，以下午茶來講非常貴，但味道係唔錯。

唐記包點

唐記包點＠馬鞍山
16/6/2019 19:00

 

今日出街玩得太夜，但九龍實在太難搵食，決定趕搭車黎屋企先，再買外賣快快搞掂晚餐。好彩馬鐵站間唐記仲未關門，就咁決定。

排骨飯 $26

叫左一個排骨飯，都幾多餸，味道唔錯的。

豬軟骨飯 $29

本身想試其他飯款，可能太夜來，好多飯已經賣晒，阿姐建議可以試下豬軟骨飯。真係新奇，除左傳統蒸飯之外，原來仲賣埋客飯。飯同餸分開上，飯係超級大大碗，加大大舊豬軟骨，非常入味，軟骨煮到腍晒，醬汁甜甜地又夠多，撈飯一流。

燒賣 $18
另外，再買左一份燒賣多加餸。咁多款點心最鍾意燒賣，啖啖肉。

最後，仲買埋全店最後一個砵仔糕，非常多紅豆，味道少甜，煙煙韌韌，不錯喎。

菜肉包 $7.5
可能真係準備關門，熱包都賣得差不多，惟有買兩個凍菜肉包，返到屋企蒸10分鐘度就食得。都最鍾意呢檔嘅包，大大個，餡又多，抵食。

童年回憶＠荔園

荔園流金歲月＠荔枝角
16/6/2019 12:00

今日係父親節，想帶兩老去一啲特別嘅餐廳。好耐之前已Bookmark左荔園，呢度係好多人嘅童年回憶。

環境實在非常值得一影，船仔同過山車都係重點之一。

荔園動物反斗城 $98

摩天輪上有八隻小點心。小龜叉燒餐包、傻豬豬咸水角、雞仔鳳梨酥、天鵝芋角，隻隻都咁得意。味道就正正常常。

炸醬麵 $38
好耐無食炸醬麵，豬肉係片片肉片，甜辣酸炸醬非常好味，麵底本身也不錯。

牛坑腩麵 $38
牛腩份量都幾多，非常腍，非常入味。

淨魚蛋 $45
較實，唔夠彈牙。

酥炸明蝦角 $26

炸得好香脆，唔油膩，中間嘅蝦幾彈牙。

福建炒飯 $88
一般酒樓質素，餸料夠多，味道正常。

野菌紅燒豆腐 $78
份量都算多，大大碟，材料豐富。

路邊混醬腸 $22
賣相就一流，非常有風味，但呢度嘅腸粉認真麻麻地，一口粉，太腍身。

脆脆紅米腸 $32

腸粉都係太腍太粉，中間春卷尚算OK。

乾炒牛河 $78
鍋仔上，本身都好夠鑊氣，牛肉又夠多，調味適中，非常不錯。

餐廳以港式點心粉麵為主，賣相係吸引嘅。造型上都有心思，味道就有好有唔好，價錢又唔算貴，反正都係相機食先，影相係不錯的。

亞玉豆腐花

亞玉豆腐花＠黃埔

9/6/2019 14:00

喺黃埔九號水產食完拉麵午餐後，行商場行左一陣，臨離開黃埔食埋個甜品先走。咁岩見到豆腐花都幾多人食，試下先。

熱豆腐花 $9
最開心係黃糖自由任加，想幾要多都得。豆腐花熱辣辣，豆味幾濃，算幾滑身。糖水唔算太甜，加黃糖就岩岩好。紫凝狂食，食左半碗。

凍芝麻糊 $15

另外一款叫左芝麻糊，滿滿一碗，滿到差啲倒瀉。芝麻糊非常夠凍，岩晒夏天熱辣辣食。入口幾杰身，芝麻味道幾濃，有粒粒芝麻，似係自家製即磨，味道唔錯，不過都係豆腐花好味啲。

砵仔糕 $3
客家糍粑 $15/3粒
另外，再買少少手信拎番屋企慢慢食。砵仔糕仔仔個，小朋友份量，豆幾多嘅，唔算太甜。
糍粑脹卜卜，裡面超多餡，係花王加芝麻，味道幾好，個皮煙煙韌韌，薄薄地唔錯。

呢個下午茶唔錯。

豚道樂

豚道樂＠黃埔

9/6/2019 12:00

今日決定黎黃埔行下，入到黎九號水產搵食。點知好多都未開門，定係已結束營業。就係門口近近地搵間拉麵食，點知有驚喜。最開心係拉麵店有BB櫈，岩晒我地呢啲一家大細出門。

特上原味豚骨拉麵 $85
先呷一口湯，勁濃，勁甜，好香豬骨味，質地仲好滑好忌廉咪。麵底揀左幼直麵，需要硬度略為未做到。特上有好多片叉燒，真係非常多，叉燒經過燒烤，表面微焦，多一份炭香味。半隻溏心蛋醬油味幾入味，蛋黃半熟，剛剛好。仲有紫菜等配料，非常豐富，味道也不錯。

特上海老湯拉麵 $98

另一款海老湯拉麵係假日限定，湯底係豬骨嘅基礎下，再加入海老，味道更加濃郁鮮味。特上配料同前一款相同，因為海老題，再加上一大把櫻花蝦，多一個香脆口感，非常不錯。呢碗要求加上辣醬，更可以帶少少辣味提香，加得正確。

難得帶埋小B都可以嘆拉麵，可能係久違了的拉麵的味道，呢餐覺得份外好味。
Bookmark一下先。