石澗日本料理

石澗日本料理@尖沙咀

2/8/2015 17:30

朋友提議買左呢個團購，團購介紹寫到好吸引咁，話酒店級日式放題，諗住平平地試下。團購買券連服務費，總數$193，計落又唔係平喎。同時段原價連加一 $220，即係平左三十蚊都咁大把。野食一般啦，款式選擇唔算多，味道都係咁啦。唔特別推介但照分享下野食。

基本野，有刺身、壽司、小食、炸物、串燒、日式料理、飲品等，以放題黎講，款式唔算多。

 
前後兩碟刺身，有少少求奇，剛送上黎係OK新鮮嘅，刺身都幾厚切。但因為無冰底，刺身好快玩完。

 
前後3 Round壽司都係OK嘅，一口大小易入口。軍艦、鰻魚壽司同花之戀都係唔錯嘅，特別鍾意鰻魚芝士卷。


團購客送嘅一人一件鵝肝多士，個人唔食鵝肝，但多士係幾脆幾好味嘅。鹽燒雞軟骨正常，但部份燒得太燶，帶苦味。


雞翼又係燶嘅...


羊架燒得太燶又有苦味。好似仲衰過今朝K lunch。


一口牛，算係比較好嘅出品，牛肉唔乾乾，OK!


鹽燒牛舌配黑椒，不錯吃。


凍豆腐、炸生蠔、厚燒玉子


變態人狂叫炸物，食到喉嚨痛。天婦羅蝦、蟹柳正常。忌廉薯餅唔錯，夠忌廉。一口芝士粒又幾好味喎，忌廉芝士炸左佢外脆內軟。最愛嘅芝士年糕，煙韌年糕配爆漿芝士餡。香芋栗子餅又幾好食，幾香甜，有粒粒栗子，呢個有驚喜。


團購客每人送一杯哈根大師

整體黎講，野食係正常啦，燒野唔太掂，經常燒燶，但壽司算唔錯嘅。正價唔建議，有團購的話，可以試一次嘅，如果有兩個鐘或以上時限的話....
因為今行放題時間得個半鐘，17:30食到19:00，佢上菜速度係OK嘅，收碟清理都幾密。但放題時間實在唔夠，成件事好似打仗咁，一送上黎就食食食，直情衝鋒陷陣咁，好彩有兩位男士戰鬥力十足。今次之後，我決定以後唔會食時限得1.5hr嘅放題! 講完!

炳勝品味

炳勝品味@廣州
19/7/2015 19:30

廣州最後一站食埋晚飯先返歸。成日上廣州遊嘅朋友推介黎呢間，上網再搵搵資料又好似唔錯，又話咩咩得獎名店。六點零黎到太古匯，過馬路對面就係石牌酒店。黎到就知驚，門口已經好多人。

好彩最後等左半個鐘就安排入座。後尾先知可能俾佢呃左。入到裡面，裝修好似幾高檔，中式嶺南風。收銀對面牆仲釘左好多獎項證書出黎，係好多，亦好浮誇。因為唔係太肚餓，少試幾樣推介食品。 

 

菠蘿包 (RMB 38)
第一味上菜就有驚喜，上碟先知原來咁大個，一客六個，每個都大大個，放上個碗都裝唔晒。菠蘿包皮好酥脆，麵包本身好鬆軟，中間有菠蘿蓉，不錯。但係份量實在太多，最後食唔晒要打包第二朝做早餐。

 

原始水晶三味豆腐 (RMB 39)
呢度有幾款豆腐製品，揀左呢款三色豆腐，上面仲加左啲蝦、醬菜等。豆腐真係勁滑，入口即溶，豆味亦夠濃。黃色係蛋豆腐有蛋味，白色清豆腐，灰黑嘅應該係芝麻豆腐，有少許芝麻味但唔濃。加上其他配料少少辣，提味幾好。

豉油皇鵝腸 (RMB 48)
鵝腸好爽脆，豉油皇醬汁落得重手，炒得好有鑊氣，全場最愛。

脆皮叉燒 (RMB 48)
係網上推介菜式，睇落幾特別，點知入口就驚，因為實在太油。外皮脆脆地焦糖味係OK嘅，但皮下就好似一舊炸肥肉咁，一咬入唧晒肥油出黎，最後決定要用紙巾將油壓出就敢食，唧晒啲油出黎後，味道係幾甜嘅。

亦柯打左一渣冰爽蜂蜜柑桔汁 (RMB 48) ，分到五杯左右，味道都夠濃。

食味款式幾特別，味道係唔錯嘅，惟一係叉燒實在油得太驚嚇。價錢方面唔平，以上3個人食，埋單約RMB 260。話俾佢呃左係因為佢安排左去VIP廳房坐，淨係茶錢服務費每位已經要RMB10，如果坐大廳服務費真唔洗咁貴。不過坐房環境係幾好嘅，清靜好多，亦真係有位服務員專門負責，就當豪一次啦。

Ideal Chef

Ideal Chef@廣州
19/7/2015 13:30

就係花城匯開左好多新餐廳，今次就黎試呢間。裝修好有英倫風格，好輕鬆悠閒，真係可以hea半日。

周打忌廉海鮮湯 (RMB 29)
好多人都推介呢味。係用農夫包做碗，裝上忌廉湯，上面仲有一隻大蝦同青口。忌廉湯都好香好濃，沾一啲麵包都唔錯。

至尊雞肉披薩 (RMB 59)
新鮮即焗，餅底焗得脆，餡料亦好多，醬汁同芝士俾得夠多。雞肉夠入味，配芝士好味。

主菜加RMB 19配汽水同炸薯角，原來薯角先係重點，真係好好味。新鮮熱辣唔在講，仲要炸得脆，薯肉夠軟身，調味亦足夠，好惹味。

 

黑松露珍菌意大利飯 (RMB 59)
味道都夠濃，菇類都夠多。

芒果丹麥酥 (RMB 12)
賣相好靚，丹麥酥都幾香，中間有吉士醬同芒果肉。

 

車厘子朱古力批 (RMB 29)
朱古力唔夠濃味，一般啦。

 

星洲名廚

星洲名廚@土瓜灣

9/7/2015 13:30

土瓜灣呢間都幾好評，終於有機會試下。價錢唔貴，午餐約$50，份量大，好鬼飽。

雞扒撈麵 ($42)
原來係公仔麵，撈左唔少醬油，加埋炸蒜，幾好味。雞扒烤得好香脆，內質幾嫰，又夠入味，唔錯。

咖哩厚切豬扒飯 ($50)
煎得酥香，豬扒真係超級厚切，厚得黎肉質好夠腍，完全唔鞋口，亦醃得好入味。咖哩幾香，但較辣味重。

見好多人食海南雞飯，可以搵日黎再試。

瀛素食

瀛素食@油麻地
29/11/2014 20:30
21/7/2014 19:30
5/7/2015 20:00

21/7/2014 19:30

5/7/2015 20:00

Pie 517@深圳少年宮

Pie 517@深圳少年宮書城

18/5/2014 13:00
21/6/2015 13:00

18/5/2014 13:00

上得深圳書城，都鍾意黎呢間食，鍾意佢幾乾淨企理，裝修設計好有格調。始終書城太多人，係南區呢邊人流較少，可以慢慢hea下。食物主打係西式輕食，價錢唔貴，野食又唔錯。

拿鐵 (RMB18)
農夫南瓜湯
絕對夏威夷 (RMB16)、了不起的番茄 (RMB13)
呢度主打係即焗薄餅，經常見到有新鮮出爐，流量唔少。每份薄餅長條型分四塊，每份RMB 十幾蚊，可以叫幾款唔同味道試下。等左十幾分鐘，薄餅送到，焗得幾脆，餅底非常薄，配料都幾多，味道唔錯。

焗豬扒飯 (RMB44)
番茄味夠濃，豬扒鬆軟。番茄醬同芝士幾都落得重手，焗得微焦，味道不錯。

環境幾舒服，幾高檔。

21/6/2015 13:00

芝士焗海鮮飯 (RMB 46) 欣賞佢夠多料，芝士味重。

絕對夏威夷 (RMB16)、了不起的番茄 (RMB13)

漁場台風

漁場台風@旺角
14/6/2015 12:00

荃灣台風係我最喜愛的拉麵店。旺角開左一間姐妹店，一定要支持。「漁場台風」同「台風」有唔同，漁場日間只賣沾麵，晚間只賣湯麵。漁場店面比荃灣店大，裝修好有特色，有好多日本明星、動漫公仔擺設，感覺更加輕鬆自在。
 
店方提供得意嘅宣傳版，教你如何正宗地食沾麵。漁場日間提供幾款沾麵。是次選擇魚介豬骨沾麵、芝麻沾麵。
 

魚介豬骨沾麵 ($83)
一碗係沾麵、溏心蛋、紫菜同檸檬。另有沾汁有叉燒、蔥、冬筍等配料。沾汁魚介味香，豬骨中有魚介香味，濃杰度一般，以拉麵湯黎講係超水準，但以沾汁黎講，濃度可略增會更好。拉麵方面，硬度適當，柔韌有彈力，略嫌溫度可以再降低。台風嘅溏心蛋一值都係不錯，水準保持。叉燒切為方型，肉質正常。值得推介係，食到一大半時，店員主動提供熱岩石加熱，即刻為變冷嘅沾汁重新注入熱力，溫度提升唔少，值得一讚。最後加上熱辣辣嘅清湯，提升沾汁嘅清香，都算唔錯。


芝麻沾麵($85)
沾汁再加上焙煎黑芝麻，但味道少有少提香，但未到好濃香程度。


總括來說，台風做拉麵係好出色，出乎意料嘅好，而沾麵都叫有水準，仍未算突出，但熱石誠意可加分。