用雙眼品嚐的藝術甜品

糖蓮子@紅磡
20/3/2011 19:30

從開飯網團購得到半價$50現金券。老實講，呢間舖唔做泡毛，我真係唔識佢，亦都唔知點去。開飯網嘅相片好吸引，就去驗證一下。

碎朱古力梳乎里 ($30)
老闆未送到埋枱，已經聞到朱古力嘅香味。一個大杯，比想像中更大，梳乎里脹得高高，頂尖有少許焦焦，扭紋式旋轉，有層次感。表面灑左薄薄嘅糖霜同朱古力粉，整個構圖更靚。梳乎里即叫即造，熱辣辣，軟綿綿，好鬆軟，好似食雲咁。裡面比較濕潤，朱古力味稍為未夠。

濃情黑森林(朱古力芭菲) ($29)
一隻高杯，一層一層堆砌。果凍、特濃朱古力味雪糕、甜甜圈、水果、朱古力脆條、朱古力醬。色彩配搭運用得宜，美觀，吸引食欲。整體味道正常，因為完全係現成野，無調味技巧可言。

甜品嘅造型係非常美觀，呢間店嘅甜品係會令你影相影完一幅又一幅。
靚嘅甜品令人見到都開心，呢間店做到呢個效果，已經能夠俘虜一聚美少女嘅心。
優惠左埋單都係三十零蚊兩個甜品，好唔好食係其次，當佢藝術品咁欣賞，開心下都唔錯，就用對眼去品嚐啦。

充滿港式風味，百分百香港人嘅漢堡包

時新快餐店@紅磡
20/3/2011 17:00

每次行過都唔為意嘅一間快餐店，估唔到係出名嘅人龍名店。賣漢堡包咋喎?!
係呀，自從港鐵賣廣告唔覺意泡毛埋漢堡包，人龍就越來越長，等就越來越耐。

親身感受人龍 = 門口企左不下三十人，落柯打後二十分鐘先有得食。
注意﹕ 店內廚師先生已經係摩打手出餐。

一個漢堡包即叫即製，邊等邊聽到吱吱喳喳嘅聲音，聞到肉扒嘅香味，空腹度一百巴仙。
 

雙層芝士漢堡配沙律汁 ($15) & 雙層芝士蛋漢堡配咖哩汁 ($17)

熱辣辣、香噴噴，肉汁流晒出黎，忍唔住一啖接一啖。
肉扒鮮甜鬆軟多汁，好香嘅洋蔥味，有啲似煎肉餅，港式!
蛋係煎荷包蛋，港式!
芝士其實係bonus，可有可冇，如有半溶版的話更佳。
總結，配沙律汁係好味啲嘅。

淨係即叫即製已經能為美味指數倍升。
時新係一間令我心思思成日掛住想再食嘅餐廳。

試下搵日唔支持集團連鎖霸權，改行揀港式小店，可能驚喜無限。

霸氣全失，狠評bad luck拉麵

權之助@太子
13/2/1011 13:30
13/3/2011 20:00

自2010年12月31日起，食過味吉豬仔真情演繹嘅特濃豬骨拉麵，愛上日本拉麵後，希望一山還有一山高，更加有條癮想搜尋心目中嘅終極拉麵。標榜日本師傅親自主理正宗日式拉麵，又有大量飲食雜誌嘅報導，權之助就係我嘅頭號目標。



13/2/201113:30

橫濱叉燒拉麵 ($58)
唔知頭唔知路，求其點左橫濱拉麵，因為佢話係特濃豬骨湯加雞湯，本希望試到終極豬骨濃湯。不得了，原來湯唔濃不特止，仲係有苦味!! 何解? 因為配菜竟然用波菜!! 味道偏苦嘅波菜，令到本來已經唔濃郁嘅湯底更可怕。有啲似阿媽靚湯之菠菜豬骨煲雞湯，而且仲要係雞味做主角，乜係日本湯底黎架咩? 叉燒係粉紅雪白，可想而知，味道極淡，但好在質地軟腍，都叫做食得落。放喺碗旁嘅紫菜係完全唔乾脆，未浸湯都已經腍晒。拉麵還好，都總算彈牙煙韌。

滑蛋豬扒飯定食
拉麵店竟然食飯係好過食麵。豬扒幾嫰滑，滑蛋真係滑蛋，但搞到豬扒唔脆係一個敗筆。但味道總算唔錯。

五粒星滿分，我俾夠兩粒，係俾個飯only。
OK，湯可能係正宗橫濱嘅中華湯底，係我唔識欣賞。而呢間店嘅名氣同霸氣，就憑一句「本店湯底較濃」嘅警告，我願意俾多次機會你，就試多次你個較濃嘅九州豬骨湯底。


13/3/201120:00

剛好事隔一個月，再去試多次。做番晒所有research，睇清楚邊款拉麵有好評。
博多叉燒味蛋拉麵 ($52) + 博多叉燒拉麵 ($58)

拉麵仍然係彈牙煙韌，我無意見。網友推介嘅溏心味蛋係內外都充滿醬汁味，睇黎都醃左有段時間，味道係好嘅，都做到半溏心效果，蛋黃係半型固的。但，蛋係凍嘅! 叉燒外型比上次討好，係半肥瘦，更加軟腍，但仍然係無味。湯底，係徹徹底底、完完全全、極終失望。豬骨味好淡好清，只有少許咸味，講不上濃郁，亦都無濃湯果種creamy嘅膠質感。我寧願俾出前一丁豬骨濃湯嘅味精湯包欺騙一下。

咁岩兩次去都係13號，兩個bad luck嘅數字，換黎兩次bad bad嘅經驗。
價錢唔係平呀，一個麵要成五六十蚊，而且質素係差，不知錯亦不能改，係絕對唔會再有第三次機會。最後只好再來一句﹕對不起，我要狠狠地劣評你!

味覺轉移魔幻格仔餅 - 勝 - 絕對空虛玩具雞蛋仔

太安樓蛋記@筲箕灣
13/3/2011 15:00

第一次俾阿蘇勁讚，第二次俾阿蘇勁踩，開飯網劣評指數暴升。究竟佢發生咩事？

一底雞蛋仔公價$10，點解呢度仍然有人排隊?

雞蛋仔顏色同平時食嘅唔同，並唔係奶黃色，係淺啡帶些少灰色，又好有光澤，粒粒圓碌碌，假到好似食物膠模型咁。

應讚﹕ 脆皮，係超脆，係超乾脆，好似食薯片咁脆。內軟(可能因為佢空虛掛)

該彈一﹕ 唔夠充實，有啲空虛

該彈二﹕ 唔夠蛋味，只有微量甜香味

難怪開飯網友勁彈名過其實，大家期望越大失望越大。

反而意外嘅係格仔餅比較唔錯。

一樣都係新鮮出爐，可能格仔餅充滿左牛油、砂糖、煉奶、花生醬嘅關係，掩飾到蛋漿唔夠蛋味、唔濃味嘅缺點，成功轉移味覺，離奇地成個組合更岩feel。

又可能對格仔餅冇期望，所以唔失望，哈~

澳門兩日遊之第二日，行到邊食到邊

11/3/2011 (星期五)

第二日去路環睇熊貓，順面去埋澳門另一間葡撻專門店。

可能因為路途遙遠，冇乜人會選擇平日去食，所以買番黎嘅安德魯葡撻，係唔熱嘅。
雖然如此，佢個皮仍然係好鬆化，好酥、好脆，脆到咬一啖，跌一啖落街。感覺上，呢間嘅酥皮比瑪嘉烈更出色。雖然只係微暖，但個蛋餡仍然係好香濃。相信如果係新鮮出爐熱辣辣的話，一定更好。
老實說，雖然係好味，但兩間其實差唔多，如果要山長水遠走入黎的話，咁不如去番瑪嘉烈算數。


完成路環之旅，午飯時間當然係官也街附近最好。選擇左大利來記菠蘿豬扒包。
只需等五分鐘就可以送入口。大大塊豬扒相當鬆化惹味，配菠蘿包係更好味。
但整體好似不及上次黎食，冇左上次果種感動嘅衝擊。唔怪得知，越來越多劣評，睇黎下次再黎搵第二間算。

晚餐喺福隆新街解決，選揀左祥記麵家。

蝦子撈粗、牛雜蝦子撈麵

幼麵係超級咁煙韌彈牙，請多用點牙力。
蝦子有好香嘅蝦味，而且牛雜都係好入味。
印象中，好似係呢間好過隔離果間。









金沙鯪魚球配蜆蚧汁

外層用米粉包住來炸，炸得非常香脆，外面乾爽，內面仍有肉汁，魚肉一啲都唔腥。炸到咁勁，但食落都唔覺油膩，好野!
蜆蚧汁係超咸，蚧味好濃，只需沾少少，已經可以充滿晒成粒鯪魚球。

 

甜品有保健牛奶公司嘅燉奶同燉蛋。
燉蛋凍食，可能味道差啲。熱燉奶仍然係超滑，奶味濃郁。
食完甜品，飽飽上船返香港。

澳門兩日遊之第一日，靚景送自助餐

10/3/2011 (星期四)

你買我買團購優惠$369去澳門，包來回船票+觀光塔入場券+觀光塔自助餐。
好彩記得一早book定，可以搶到食自助晚餐。自助晚餐正價都要$300，真係乜都抵番晒!!

10點幾落船先去永安咖啡室食個早午餐。
對上一次睇《水舞間》想黎食，但摸左一個大門釘，今次終於有口福啦。

食過兩樣野都好好，今次阿蘇係冇介紹錯喎!

咸牛脷通心粉 ($28)

咸牛脷係好腍，真係好腍，幾乎入口即溶。
好入味，但唔會過咸，夾雜左牛嘅膻味同咸味。
通粉係阿蘇激讚嘅有坑紋通粉，係幾彈牙喎。
湯係淡淡地，但加左每張枱都有嘅秘製咖哩油，成個感覺唔同晒。佢有啲似加辣版嘅沙爹醬，加一匙已經無得頂，多左種香濃嘅辣味，送麵好拍檔!
加一匙就夠啦，加太多就會太辣。








蒜蓉焗肉丁公仔麵 ($23)

奇怪地個名叫焗肉丁，但得到嘅係煎肉粒。
肉粒煎到表皮香脆，裡面腍。肉質好爽口，裡面充滿肉汁，仲有好香嘅蒜蓉味。

呢個肉丁真係配公仔麵最岩!

都係要加番一匙咖哩油，多一種刺激食法。

行完三大巴後，當然要去一去潘榮記，食一食新鮮即製嘅炭火燒減蛋金錢餅。

新鮮熱辣，又香又脆，仲有好香嘅蛋黃味。十蚊雞當小食過下口癮都唔錯。正!

 

另一個下午茶精選就係瑪嘉烈葡撻。次次去到都有十幾人排隊，坐滿店外座位。$8一個澳門原汁原味新鮮辣口嘅葡撻。一拎到上手，已經聞到好香嘅奶味。皮酥，但間唔中會有痴埋一餅嘅情況，痴纏到咬唔開。餡濃，係好蛋、好奶嘅味道。表面微焦，又多一份焦香味。

夜晚七點，去觀光塔60樓，360cafe 嘆個自助晚餐，順面睇埋夜景。

  

自助餐算好多野食，刺身同冷盤嘅海鮮都好新鮮，狂掃三文魚刺身、凍蝦、煙三文魚!

熱盤可以一試幾款唔同嘅葡國菜，好似馬介休球、葡汁焗魚等。
幾乎試食晒所有甜品，有好幾款蛋糕，芝士蛋糕、tiramisu、蘋果批等。仲有焦糖布甸、朱古力泡芙、朱古力噴泉。當然唔少得澳門出名嘅木槺布甸，好味到食左兩杯。仲有其他細細杯裝嘅朱古力慕思、水果啫喱杯同雪糕。

一邊睇住夜景，一邊食自助餐，呢個buffet係一流享受。而團購優惠價，一啲都唔貴呀! 超抵!

海南混醬配烈艷叻沙

Kitchen 65@尖沙咀
27/2/2011 13:30

海南雞、叻沙點為之正宗? 我唔清楚。
一向都知道星馬菜主打離不開海南雞飯同叻沙，平時多數只會去美食廊啲舖頭仔食，都食唔出咩正宗唔正宗。今次你買我買推出以$34享用Kitchen 65 正宗星馬風味套餐，就去試下啦。

海南雞飯
一 碟去骨海南雞幾嫰滑，肥瘦適中，皮層底下夾有少許油脂，更加爽口彈牙。雞味唔算濃郁，但總算肉質軟腍搭夠。海南雞嘅好拍檔三色醬，有酸辣醬、薑蔥油同埋甜 甜嘅黑醬油，雞肉沾上三個醬汁更加惹味。出面有啲餐廳，因為貪快兼唔想洗碗，好多時俾唔足三味醬，又或者將三種醬撈埋一碟。我喜歡呢度分開三小碟，可以等 我發掘最少七種唔同配搭。每次只沾一種醬、酸辣醬+薑蔥油、薑蔥油+黑醬油、黑醬油+酸辣醬、最後三種一齊沾。海南雞沾醬就係有呢種樂趣。一大碗雞油飯， 夠香、夠油，略嫌飯煮得太乾身。但跟肉配醬一齊食，係剛好的。

新加坡叻沙
烈艷鮮橙色嘅一大碗好吸引，湯底充滿椰汁味，表層淋上少許辣油，剛好調較出一個我能接受嘅香辣味。麵嘅材料都好豐富，有魚味香濃嘅魚片、能夠充分吸收湯汁嘅豆卜、蛋味濃郁嘅鵪春蛋、新鮮嘅開背蝦、仲有芽菜等。人地話正宗喇沙應該有螄蚶，我就唔見啦，可能佢呢埋左。

正唔正宗我真係食唔出，但總結都係值得俾正評嘅。
最後埋單俾多10%加一，一個跟飲品嘅套餐價值$38。據聞原價一個午餐都值$68，呢個價相信我唔會入場。有團購嘅推動，我會試下，不過只限於試完就算。

Off Topic﹕ 豪嘆盛八高檔日式燒肉

盛八日式燒肉店@旺角
7/2/2011 11:00

點都要Off Topic一次，點都要豪一次。第一次嘆日式燒烤，點都要記低。

大人氣二人前定食 ($158)
前菜沙律、和風蒸蛋、麵豉湯，配白飯
燒汁牛肋骨、鹽燒牛舌、鹽燒黑豚、山葵手羽先、盛八腸、綠茶雪糕

滿腹四人前定食

香草牛油帶子、明蝦、香檸雞、鹽燒豬頸肉、盛八凍豆腐、和牛炒飯、稻庭烏冬

一路燒一路食，其實唔太知自己食緊乜，但係全部都好好味。牛有牛味，入口即溶，醬汁非常香濃入味，加以燒烤後，更突顯肉嘅香氣。豬有豬味，雞有雞味，海鮮有海鮮味...總之好味。鹽燒調味嘅可以令肉味更鮮，醬汁嘅味道更濃郁。特別點名推介﹕ 招牌盛八腸! 大腸質感好爽口，而且用甜甜少辣嘅醬汁醃得入味，經過燒烤後，味道更加突出。

午餐人均消費$90，大時大節豪一次都唔過份。真係好味。

前所未有勁抵團購，大阪王將篇

大阪王將@旺角
2/2/2011 12:30

玩左團購咁耐，最開心都係你買我買同恆隆商場合作搞嘅泡毛。
為左推廣家樂坊地庫新開嘅美食廊，竟然$29當$100用，簡直前所未有咁低價。

選擇大阪王將食個晏。素聞大阪王將最出名食餃子，當然要跟風柯打。

叫左兩個餐，每個餐都跟沙律、湯、餃子。正餐係叉燒拉麵、天津飯。

評? 沒有什麼好評。此篇重點是﹕ 前所未有咁抵既團購。

埋單總數$106 (coupon$29，再補$6，實價$35)

$35! 冇錯，係三十五元正，食到以上所有野。
好味嗎? 單純以正價來比較，佢唔算好味。

格硬評，點都要評的話，以下提供兩個版本。

$106 埋單version
叉燒拉麵個湯底無味嘅，啲拉麵好明顯係包裝即煮版，唔彈牙嘅!
天津飯啲蛋整得太熟啦，個飯又無料，加埋個蠔汁有啲奇奇怪怪，我鍾意食奄列蛋包飯多啲。
惟獨餃子係ok的，煎得幾香，饀料足。
但一個午餐要成五十幾蚊，真係唔ok lo。旺角求期搵間日本料理都仲抵食!

$35 埋單version
叉燒拉麵有成3大塊叉燒，湯麵嘅份量都唔少。
天津飯上菜好靚呀，脹book book。
餃子真係即叫即煎，新鮮熱辣，饀料十足，個皮好薄，仲煎得好香脆，果然係餃子王將!
做discount都無將價就貨! 抵讚!

好，人格分裂完畢。團購真係會令人迷失心智。
總結一句，單純以性價比評論，以$35價錢，食得飽兩個人嘅日本料理，絕對抵到爛。

買餸自己煮都唔止呢個價啦。

叔爬忌廉咪卡邦啦娜 (Super Creamy Carbonara)

人民公社@銅鑼灣
30/1/2011 13:00

一向都唔係幾識去港島搵食，今次蜂買同人民公社合作，搞優惠價$38食一個餐，就趁行維園花市前食個晏。有趣嘅名字，配有趣嘅裝修，座落銅鑼灣某商廈嘅樓上cafe。

$38一個餐，蜂買話可選擇火焰野雞或Carbonara卡邦尼意粉，再配沙律同飲品，二人同行仲送埋甜品。但可惜訂位時，職員話已經冇晒火焰野雞，惟有食住意粉先。睇見多位網友大罵無雞叫，失望到極，又話呃錢又話物。但其實...我無乜所謂囉，要明白人家做生意無理由白做架?! set個quota都係合理嘅。

沙律係典型我唔太喜愛嘅雜草一碟。
 

Carbonara係我喜歡嘅味道，超級creamy!! 忌廉奶油味滲晒入質地彈牙嘅天使麵，仲有些少煙肉同蘑菇，配上少許芝士粉同香草，係好西式，超濃郁嘅味道。但略嫌份量太過精緻，未夠喉。

贈送雪糕泡芙六大粒。夾左雲呢拿雪糕嘅泡芙，沾少少朱古力醬，正好作為一個填飽肚嘅甜品。

$38一個餐，有前菜、有飲品，話平唔平，隨街都搵到可以食到捧住個肚走。人民公社提供嘅係少少、細細、精緻嘅一小碟，剛夠但未飽嘅份量，幸好意粉嘅味道可以抵銷一切。未夠飽的話，再去附近食多杯乳酪仲好啦。