Let's Eat Out

2019年12月15日星期日

小黑糖

小黑糖＠尖沙咀
15/12/2019 14:00

食完韓式料理，就行去隔離不遠嘅厚福街搵野飲。
一條街仔幾間茶飲店，最後揀左呢間似乎都幾受歡迎嘅小店。

近來幾鍾意飲黑糖珍珠，正好呢間小店主打小黑營系列，選擇非常多，即刻選擇困難症。
最後揀左小黑糖珍珠厚鮮奶同埋宇治抺茶歐蕾珍珠，似乎都係招牌之作。

小黑糖珍珠厚鮮奶 $32
肥杯仔份量剛夠，賣相好吸引喎。
厚鮮奶奶味好香，非常幼滑。黑糖珍惜煙煙韌韌，甜味適中，不錯。叫左七成甜度，個人認為甜度剛好。

宇治抺茶歐蕾珍珠 $32
漸層色賣相好靚，黑糖珍珠都係一樣的，奶味好足，再加一點宇治抺茶味，配合得幾好。

兩杯味道都不錯，價錢唔貴，下次想再試下紫色果杯。

OPPA Coffee Bar Restaurant

OPPA Coffee Bar Restaurant@尖沙咀
15/12/2019 12:30

一段時間無出街食飯，今日約朋友黎開尖沙咀，特登搵韓國餐食。

好友介紹話呢間小店好正宗韓味，由佢拍板叫左幾樣野食。

紫菜包飯 $92
賣相好靚，件件都好工整，中間仲有好多餡料，飯又夠軟熟，傳統又飽肚的美食。

雞肉蛋漿熔岩炒飯 $168
韓國哥哥送上鐵板飯，喺客人面前加入蛋漿、芝士等，再用火槍即時加熱，好睇又好食，大推。本身飯裡仲有唔少雞肉，味道不錯，再加埋極大量芝士，拉絲度十足，撈勻後啖啖飯都有濃郁芝士味。非常邪惡，但忍唔住一啖接一啖。

蜜糖牛油無骨炸雞半份$198

份量都唔少，雞炸得金黃，外皮非常鬆脆，肉質好嫰又多汁，加少少錢叫無骨係正確的，啖啖肉，非常滿足。蜜糖甜甜的，帶少許柚子，非常不錯。喺炸雞下面仲有啲薯條，吸晒蜜糖汁非常好味。

兩口子實在非常飽足，價錢略貴但係勝在正宗韓味。不錯。

2019年9月16日星期一

正宗韓燒

韓珍＠尖沙咀
15/9/2019 18:30

太耐無食韓燒，老友建議呢間尖沙咀人氣非常高企嘅韓燒。

餐廳幾大，見到唔少店員都係韓國人，好正宗！

落單後先送上一大堆前菜，個人幾鍾意呢度嘅泡菜同洋蔥。

原來仲有一客焗蛋，脹卜卜幾得意。蛋裡面有多樣材料。

主菜黎啦，叫左一個招牌菜「八色珍味拼盤」$538，分別用上八種調味：人蔘、黑椒、日式燒汁、大醬、辣椒醬、香草、咖哩和蒜蓉，醃製出八款不同顏色烤肉。賣相真係好吸引，急不及待立即燒啦。先由最淺色，相信味道較清淡的燒起。

每件肉都好大件，燒好一邊之後反面，再剪成小塊慢慢燒。肉質相當不錯，非常入味，仲好Juicy。個人最鍾意大醬味，非常韓式，加配生菜包起來食，正好解膩。

另外，叫左一份醬油雞肉 $110，非常入味，又好嫰滑。

另外，仲叫左一份水冷麵 $68，食完熱辣辣嘅燒肉，再食一啖冷麵真係正斗。

好滿足的一餐，店員又會樂意幫你燒埋一份，感受非常正宗的美味韓燒。

2019年9月15日星期日

Good Times Restaurant And Bar

Good Times Restaurant And Bar @粉嶺
15/9/2019 14:30

今早黎到粉嶺辦工，兩時先有時間食個遲來的午餐。老友提議黎呢間西餐廳，仲係萬歲。
餐廳幾大間，前場係酒吧形式，後場係餐廳，非常獨特，生意都唔錯。

難得仲可以叫到午市尾班車，選左一個羊脾扒，老友話食豪啲，二話不說就叫左份和牛肉眼。

板燒羊脾扒配露絲瑪莉紅酒汁 $108
賣相唔錯喎，大大塊。肉質幾腍，易切。剛剛好熟的程度，羊味適中，肉汁相當多。醬汁係露絲瑪莉紅酒汁，香甜的，幾配合。配菜仲有薯蓉，滑得好過份，非常好味。午餐仲跟一杯飲品，都相當抵食。

澳洲M6和牛肉眼扒 $428
老友豪爽選了和牛肉眼，賣相非常得，而且好!大!件!。要求的五成熟都處理得相當好。入口肉質非常軟腍，不失為一個高級享受。

芝士焗著條配黑松露醬 $88
大大碟薯條，新鮮熱辣，芝士味濃厚，黑松露醬又夠滋味。

環境舒適，食物質素都相當高。

2019年9月8日星期日

一龍拉麵＠馬鞍山
8/9/2019 19:00

近來幾鍾意黎呢個新場，有好多兒童遊樂空間，放完電一輪再食埋晚飯先返歸，今晚選擇呢間幾有日本風味的拉麵店。店面細細，全counter座，可以睇到成個煮麵的過程。無估到店仔細細都準備左小朋友餐具，非常細心。

灸燒叉燒拉麵 $66
價錢唔貴，份量都唔少。最欣賞湯底非常幼滑，忌廉咪，豬骨味算濃，但唔油膩，幾岩口味。叉燒本身口感亦係不錯，即場用火槍灸燒，多再一陣微微焦香。溏心蛋熟成度適中，可惜麵底略為腍少少，個人較鍾情日本的硬度。

香煎鰻魚拉麵 $88
非常創新的砲搭，特製龍蝦湯配鰻魚，材料真係超大方，相信係整整一大條鰻魚，非常滿足。湯底非常濃厚，配上拉麵條非常掛湯，啖啖都食到蝦香。

餃子 $22
新鮮熱辣，外皮脆脆的，不錯。

玉子燒 $25
四大件玉子燒，大大件，入口有蛋香，味道幾香甜，略嫌實淨左少少，不過呢個價錢的確好抵食。

一間由青年人打理的小店，細心製作，價錢抵之餘，質素係相當ok，當然仍有進步空間，總算值得一來。

2019年8月25日星期日

和味館

和味館＠長沙灣
25/8/2019 12:00

難得黎到長沙灣探麻麻，帶老人家去飲茶慢慢歎。就係屋企附近隨便搵間茶樓，原來是新開無耐的，環境不錯，相當新淨舒適。叫幾樣點心食下。

幾欣賞點心係熱辣辣，非常新鮮。
炸雲吞就香脆，唔油膩。
老人家鍾意食傳統的中式點心，牛肉球、粉果等都係合格之選。

個人最鍾意菜苗餃，餡料足，仲有大大隻蝦。
鳳爪醬汁帶微辣，非常惹味。
排骨配上少見的陳村粉，加少少豉油都已經好好味。

中午時間兩個大人都係食左百零蚊，相當抵食。麻麻話平日仲有套餐更加抵食。
真係街坊價。

2019年8月18日星期日

滿江紅小甜甜

滿江紅小甜甜
18/8/2019 18:00

今日黎到旺角晚餐決定食啲刺激野。開飯網見到呢間評語不錯即管試下。中式菜館圓檯一大張，坐得舒服，連BB都有一張竹嘅BB椅。
坐落先食幾粒醃蘿蔔，爽脆酸咪咪，非常開胃。

雞湯小雲吞 $38
當然唔少得顧及小朋友嘅不辣之選。肉少少，皮薄薄的，清清地也不錯。

原味焗蜆 $72
蜆都相當多，而且粒粒飽滿，食落相當鮮甜，唔辣正好突顯到蜆的海鮮味。

生煎菜肉包 $28
皮煎得脆脆的，幾香口。

口水雞 $78
本身我地唔太食得辣，所以只能點幾款大路都小菜。個人最鍾意口水雞，份量都幾多，雞肉幾滑，醬料有花生、蒜咸香。

蒜泥白肉 $55
大大碟賣相好吸引，白肉厚薄適中，醬油偏甜微辣，最欣賞蒜泥真係打得好幼細，用肉夾起一齊食，非常惹味。

珍寶凍檸茶 $32
食辣野必點凍飲，大大杯夠晒飲。

高力豆沙 $32
甜點必點高力豆沙，漲卜卜，空氣感十足，豆沙超多，好味。

可愛的名字，價錢親民，菜式選擇夠多，有辣有唔辣，不錯的小店。

2019年8月11日星期日

Cafe Paradise

Cafe Paradise＠杏花村
11/8/2019 16:00

今日黎到柴灣探朋友，臨走前決定去杏花村行下街。N年無黎，商場都變化好大。地下一條街變左食街，超多餐廳選擇。行到呢間Cafe Paradise，BB就俾門口嘅木馬吸引左。橫掂時間尚早，就條佢意入去食個下午茶。同木馬影幾張相後，就坐係入面嘅梳化卡位，仲放左幾隻公仔，好得意。

水牛城雞翼配薯條 $38
超大隻雞翼，外皮脆脆的，醬汁酸酸甜甜好開胃，雞翼中間仲非常Juicy，不錯。薯條新鮮熱辣，好邪惡！

黑松露野菌意式薄餅 $58
估唔到Pizza都唔細個，上面舖面野菌，黑松露味好香。餅底外脆中間軟，口感唔錯。

黑森林窩夫 $48
賣相好靚，窩夫兩件細細的，但味道不錯，加埋朱古力雪糕一齊食正好。

一家都係朱古力怪，飲品全揀朱古力系列。熱朱古力，極濃。

莫卡、朱古力沙冰
難得連沙冰都係極濃朱古力味，朱古力怪表示十分滿意。

假日都有下午茶餐，本身套餐包一杯飲品，加十蚊雞就可以升級特飲任揀，都好抵食喎。梳化又好坐舒適，不錯。

莆田

莆田＠銅鑼灣
11/8/2019 12:00

適逢牛一，出銅鑼灣行下街，午餐選擇左一向非常鍾意嘅餐廳，利舞臺廣場分店仲環境舒適。坐低先飲啖菊花茶，幾鍾意果份清香。

一品醉蚶 $82

的確，要去有信譽嘅餐廳先放心食蚶。呢個前菜真係非常開胃，蚶仔粒粒飽滿，非常鮮甜，加上大量蒜蓉、蔥、辣椒，醬汁帶微酸，正。

莆田扁肉湯 $22
湯本身好清甜帶少少醋酸味，扁肉燕非常鮮甜，最鍾意餃皮煙韌彈牙，一啖一粒剛好。剛好睇到店內電視介紹，原來呢味係手藝菜，餃皮係精心製作，食落的確非常好味。

哆頭蟶炒蛋 $109

早排推出哆頭蟶主題，差不多到水尾時間，再食多一次先，今次揀左炒蛋。估唔到一碟細細嘅炒蛋收埋左好多隻蟶子。蟶子仍然飽滿鮮甜，蛋又炒得夠香，咸鮮味十足。

漁民紫菜燜飯 $88
簡簡單單一個燜飯，入面加左唔少紫菜同海蠣乾，飯味香，又夠飽肚。

酥炒芋芯 $92

最後揀左必吃十醉之一嘅酥炒芋芯做甜品。芋芯外表有焦糖脆脆的，芋頭本身粉腍，好味。

呢餐真係非常滿足。更欣賞呢間分店極之BB friendly。BB櫈、兒童餐具齊全，店員姨姨都好親切，臨走時仲整左一隻狗仔汽球俾BB，開心。

2019年8月9日星期五

bong pro-dry aging

bong pro-dry aging＠紅磡

9/8/2019 12:00

小B暑假最後一日，放一日假陪佢。適逢下星期牛一，可以預早食好嘢慶祝。間中都會搭車落黃埔行下，必經紅磡碼頭，近年喺後面開左間五星級酒店。落左巴士經扶手電梯上就係酒店平台，全海景超正。今日老細安排左一餐"Fine Lunch"，原來正正係平台上呢間bong。餐廳非常有格調，室內仍見到180度無敵海景，老細呢個安排不錯喎。