蝦麵店

蝦麵店@荃灣
4/8/2019 12:00

今日約左荃灣嘅朋友仔去會所玩，玩之前喺佢屋企附近食飽飩先。荃灣街坊介紹呢間蝦麵店抵食，就聽佢話試下。

中午時間黎到都幾旺場，等左一陣位。兩大一B叫一個二人餐試下。二人餐都相當豐富，包括兩括兩碗自選粉麵、兩樣小食、仲有飲品加甜品。

小食揀左一份炸魚皮，非常香脆，味道不錯。


另一款小食係類似併盆，有炸雞翼、五香滷肉卷、豆腐、串燒。份量相當多，最特別係肉卷，外皮脆脆中間係內碎加埋其他材料，口感好特別，五香味濃，又夠Juicy，好味。而串燒加沙嗲醬都非常惹味。


主菜揀左一款咖啡叻沙，自選配料係魚片四寶。湯底好有椰香，帶微辣。魚蛋、墨魚丸都夠彈牙。


福建滷麵湯底好濃味，杰杰的，材料揀左雞蛋雞絲，十足碗仔翅咁，BB都好鍾意。


最後甜品揀左亞參多士，烤得香脆，果醬酸咪咪。另一款香茅凍好清涼感覺，剛才食左d辣野即刻舒服晒。


套餐非常豐富。平常較少食檳城口味，今次一試覺得非常驚喜，味道獨特吸引，朋友仔果然無介紹錯。