排隊食入門級拉麵

橫綱@油麻地
30/9/2012 13:00

油麻地有間橫綱拉麵，係N年前已經好出名嘅小店，所以每次行過都見到可怕嘅人群。試過幾次人流實在太多，拎左飛都打退堂鼓。近排拉麵熱潮越吹越勁，橫綱都係推介食店嘅其中之一，最後立定決心中午黎博一舖。橫綱一九八七年創立，可算係香港嘅日本拉麵店始祖。開業廿幾年，一直堅持嚴選食材、認真烹調、大眾化價錢，所以深受街坊歡迎。

味玉拉麵 ($60)
味玉拉麵係此店人氣之選，有一整隻味蛋，加上叉燒粒等。 自選豬骨味湯底比想像中薄弱，較為稀薄，味道講唔上濃郁，但算甘香清甜，幸好加上黑蒜油提味，有芝麻香同蒜香搭夠。麵條反而非常唔錯，店方選用幼身麵，非常幼滑，口感亦夠煙韌彈牙，即使浸喺熱湯一段時間，麵條都無浸腍，惟一不足就係唔夠掛湯。主食味蛋煮得比較熟，蛋黃近乎全凝固，黏口度一流，香味亦唔錯。味蛋之外，仲有厚切叉燒粒，半肥瘦，煮得入味香口，不錯。拉麵仲配上玉米粒、海帶、芽菜、菠菜、竹筍、紫菜等配料。六十蚊一碗，果真豐富。

叉燒拉麵 ($63)
另一款選擇左穩陣之選叉燒拉麵，再埋個豆醬湯，亦即係味噌湯。湯頭甜甜地，味噌尚算濃郁厚身，仲有粉粉粒粒嘅質感，相信並非開粉貨式。五大塊日式叉燒落得重手，圓圓一片切得厚薄適中，一圈圈睇得到肉同脂肪分佈，真正半肥瘦。可惜肉質唔算嫰滑，還好入口鮮甜，唔太肥膩。

此店出名之處係平、靚、正。一碗拉麵大約六十蚊，而且唔收加一，價錢比坊間所謂名牌店相差百分之三十。以六十蚊嘅價錢，算得上又靚又正，可算是愛拉麵人士嘅入門級之選。不過想試又平又靚嘅出品，必須準備好排隊嘅覺悟。由於舖面極奇細小，大約只有二十多個位。每次輪候都講緊以小時做單位。雖則舖仔細細，不過職員服務態度一流，做事效率亦唔錯，好有家庭式小店嘅感覺。總結一句，反正隊都是要排的，俾多點耐性就有好野食，不妨一等。