2018東京家庭樂 [1.1 三堂同遊飛東京]

07:00 到機場，去K段香港航空櫃位，優先隊打左唔少人尖。早前已經網上預辦登機，只欠我同紫凝，即場Check in後，好快就出埋幾張機票同埋寄行李。過安檢又係行特別通道，兩枝水過關無問題。過海關又唔算多人，整個過程都算好快搞掂。

出關後發現美食廣場大裝修，兜左個大圈先見到麥當奴原來照常營業，不過實在太多人，都等左一陣，咁岩wechat pay做$50減$10，又慳番少少。

8:30 到達208閘口登機，打卡是指定動作。BB車到達閘口先寄存，用到最後一刻。

因為班機都幾爆，電話訂BB票時已Mark左座位，機中2X行闊位後要隔好遠先有另外兩個位。咁惟有揀機中後嘅51行闊位，爸媽就坐49行，原來隔左道牆。

本次班機係HX608，09:15 - 14:55。飛定左好快就上BB餐。

紫凝算好乖，無乜扭計，食左果蓉、食少少麵包、飲果汁，之後訓左一個零鐘。我地就輪流食飯，公公婆婆又抱一陣。四個半鐘總算安然渡過，真係極限了。

今次係飛機早餐，一份點心拼炒麵，麻麻地一般般。另一份炒蛋香腸就唔錯。跟餐配士多啤梨乳酪、麵包。