茄魔大召集

蕃滿門@大埔
16/7/2012 13:00

今日外出工作完成，趁時間尚早食個靚飯。雖然公司附近都有大把好野食，不過食多都厭，所以一有時間就去大埔中心果頭搵食。早排知道有間專做蕃茄食品嘅餐廳，今日就做過小蛇行遠少少食飯。

特式牛腩西蘭花拼滑蛋蕃茄濃湯意粉 ($39)
一碗湯意粉份量驚人， 一黎到已聞到陣陣蕃茄香味。蕃茄湯底絕對配得起「特濃」二字，湯底除左用茄膏之外，仲加左唔少新鮮蕃茄肉，一碗湯配給到嘅份量相信有一整大個。湯底酸酸甜甜，味道一啲都唔人工化。客人可以選擇唔同程度嘅加辣，加少許辣，湯底更惹味。呢款湯底相信比阿媽靚湯還要濃郁，恨不得一滴不留，清得見底，而且食後唔覺得口渴，絕對真材實料。蕃茄湯底自動配上炒滑蛋，滑蛋炒得滑，配蕃茄食亦係唔錯。鍾意亦可以攪勻湯底，自製蕃茄蛋湯。今個意粉配上牛腩同西蘭花，唔好以為會自動淪為配角，兩者都係OK的。牛腩帶少許筋，煮得夠腍，吸收左蕃茄湯更加好味。而意粉都可以接受，不過見好多人都會選擇長通粉或者螺絲粉，相信可以邊食邊飲湯，會更加滋味。

小店開業無耐，已經得到唔少好評，對於鍾意食蕃茄嘅人黎講，實在不容錯過。當日一點鐘午飯時間人頭湧湧，好彩除左地下一層之外，樓上仲有唔少座位，所以都有唔少團隊係十個十個咁黎，確實勁有人氣。