夏日解暑良方，體驗冰凍湯拉麵

麵一@旺角
29/5/2011 19:30

一間位置超方便，但唔起眼嘅新店舖。未有開飯網嘅評語，唔係因為有團購，係冇打算去試。集購城$20買到$50用，一口氣買左三張，共有$150quota食個晚餐。因為網上未有太多意見值得參考，求其想食乜就食乜。

叉燒豬骨湯拉麵 ($50)

湯底有豬骨味，點點深黑色可見有用黑麻油提味，感覺仍然較清爽唔算濃郁。拉麵尚算彈牙，叉燒外型討好，肉質鬆軟，但無乜肉味。最衰溏心蛋係普通半熟蛋，冇浸醬汁黎調味，但流心度尚算可觀。

凍醬油餃子拉麵 ($46)
新奇、有趣、前所未有嘅新體驗。醬油湯、麵、材料，全部都係凍嘅。一碗凍拉麵，加送六大粒冰粒。相信有花心機計算過溶冰時間，食完成碗麵時，冰係剛好溶晒。凍左嘅麻油醬汁湯底，初期仍然有甜有味，但清水冰粒溶左後，湯變得稀釋。如果佢肯花多啲心機，改為用湯雪成冰，整個感覺更加良好。凍嘅餃子皮太厚太多粉，夾起變得鬆散。冷拉麵比熱湯拉麵更加清爽彈牙。夏天試試凍湯拉麵都唔錯，但仍有不少進步空間。

小食叫左日式醬汁炸雞 ($28) 同大人氣嘅炸芝士餅 ($28)

日式醬汁炸雞不止醬汁唔夠濃，仲出現嚴重乾硬化，肉已經炸到好硬好乾。

但炸芝士餅就好唔錯，外層類似麻糬年糕，炸得香口，內層係奶味濃郁嘅半溶芝士。食起來都能夠做到拉絲效果，讚!

埋單找數，多謝兩蚊，隔離位聽到即刻呆左。

正價$152，唔洗加一，用左團購券，只需補番二個大洋。正式黎講，以$62食到份量十足，拉麵都叫做OK質素，係滿意嘅。如果以正價黎計的話，旺角搵唔到飯食，又唔想食連鎖的話，呢度都可以係其中一個選擇。