2015九州蜜月追櫻之旅 第七日 [7.1 早晨羅妮]

最後一日行程較輕鬆，9點零出門口，落樓下Check Out，交低房卡就走得，完全唔Check任何野，真係快到無人有。前幾日都係博多搵早餐，又無乜特別野想食。橫掂今日會買地鐵一日券，決定先喺天神落車，去地下街食地道日本M記快餐Lotteria。

之所以選擇Lotteria，係因為佢出名搞花臣，出過五層炸蝦堡、拉麵漢堡、進撃の巨人等神奇包，雖然今期無特別包，但都好想試下。早餐有包同飲品，柯打左一客煙肉蛋漢堡餐(¥450)，另一客名物炸蝦漢堡餐(¥450)，另外加左一份炸薯角(¥80)。

煙肉蛋漢堡正常，煙肉夠好味。明顯炸蝦漢堡係突出好多，炸蝦係用薯蓉包住，好似可樂餅咁。薯仔好甜，蝦好爽口，外皮又炸得脆，不錯吃。而追加嘅薯角係新鮮炸起，都唔錯呀。