2014大阪京都七天遊之感

今次京阪七日之旅非常開心，行程完成度達95%。

景點

大阪有熱鬧繁榮一面，好多消遣商業點，景點亦夠密集，行程可以安排得進取啲。京都係古都，景點多為神社廟宇或者風景區，比較接近大自然，感受得到日本嘅悠閒。京、阪確係兩個風格唔同嘅地區，六日行程平均分配到兩地，有快有慢，有熱鬧有悠閒，相當唔錯。六日行程去左N個景點，都係好大路嘅人氣熱點。可算係京阪精華遊，要去嘅名勝都去得齊。而且景點比想像中好玩，風景亦好靚。影相影到傻左，總共成5000張。

交通

身處其中先發現原來大阪唔算好大，距離感唔遠。大阪非常容易自由行，出入靠地鐵已經可以玩勻咁多個地方。梅田雖然大，但搞清楚大方向，搭到地鐵就無問題，心得係地鐵到站唔好急住上地面，要係在月台搵岩出口揀岩電梯先上，就一定無錯。而京都就相對較難，因為主要景點交通係巴士，先要搞清楚巴士線路圖，咩車經咩景點。就因為靠巴士出入，等車同行車時間點都會比地鐵耐，所以喺京都嘅步伐好自然會慢落黎。

日期天氣

選擇4月8日至14日，因為4月10日會影Pre Wedding，早一日到埗可以適應下環境先。適逢4月8至9日係京阪櫻花滿開高峰期，的確睇到好靚嘅櫻花，更有機會去到期間限定嘅大阪造幣局。呢段時間氣溫約為十至十八度，早晚較涼要著件厚褸，中午有陽光就好和暖，都幾舒服。

人

日本人出名有禮貌，大阪同京都嘅人都係勁有禮貌。今次自由行仲特別留意到一啲跟團唔會見到嘅人，就係大阪嘅上班一族。係梅田地下街一大班黑衣人好似操兵咁操去搭地鐵，不發一言，只有整齊嘅腳步聲，呢個場景真係好Matrix。另外，今行更加欣賞日本嘅店舖服務員，由早上開門到九點關門嘅任何時間，店員都可以笑容滿面、中氣十足嘅招呼嘅客人，咁先係真係待客之道。

消費

經過小女細心安排，今行消費唔高，但絕對充實。因為日本官方提供左好多旅遊優惠，提供好多唔同類型嘅Pass、交通優惠券。只要出發前做足功課，實在可以慳番唔少。食野方面，唔一定食最靚最好，只要搵多啲網評，都可以搵到具人氣，又平又好食嘅野，質素絕對唔差。

總括黎講，經過周詳計劃，今次嘅自遊行真係相當成功。行程非常豐富，食住行都安排得非常唔錯，十分滿意難忘!